azatutyun.am: Ադրբեջանի արտգործնախարար Ջեյհուն Բայրամովը երեկ ընդունել է Բաքվում Ռուսաստանի նոր դեսպան Միխայիլ Եվդոկիմովին։

Ըստ Ադրբեջանի ԱԳՆ-ի՝ հանդիպման մասնակիցները նշել են Բաքվի և Մոսկվայի միջև հարաբերությունների զարգացման կարևորությունը երկկողմ և բազմակողմ համաձայնագրերի շրջանակներում՝ բարեկամության և փոխըմբռնման պայմաններում, քննարկել են նաև Ադրբեջանի և Հայաստանի միջև խաղաղության գործընթացը։

APA գործակալության փոխանցմամբ՝ Բայրամովը հայտարարել է, թե «Ադրբեջանի տարածքային ամբողջականության և ինքնիշխանության մեկնաբանումը հայկական կողմի դիրքորոշման հիման վրա», ինչը, Բաքվի պնդմամբ, տեղ է գտել Ռուսաստանի արտգործնախարարության հուլիսի 15-ի հայտարարությունում, չի համապատասխանում Մոսկվայի և Բաքվի միջև Դաշնակցային փոխգործողության մասին հռչակագրում ամրագրված սկզբունքներին:

Նա նաև պնդել է, որ «Լաչին» անցակետի տեղադրումը Ադրբեջանի ինքնիշխան իրավունքն է և ուղղված է «հակաօրինական գործունեության կանխարգելմանն ու թափանցիկության ապահովմանը»: Բայրամովը կրկնել է «Ադրբեջանի հայ բնակիչների պահանջմունքների բավարարման համար Աղդամ-Խանքենդի ճանապարհի օգտագործման» առաջարկը, որ արել էր անցած շաբաթ: