arm.sputniknews.ru: ՀՀ նախկին փոխոստիկանապետ Լևոն Երանոսյանի նկատմամբ համաներում է կիրառվել։ Այս մասին Sputnik Արմենիային ասաց փաստաբան Տիգրան Սաֆարյանը։

Նա նշեց, որ Երանոսյանին առաջադրված մեղադրանքներից մեկի մասով քրեական հետապնդումը դադարեցվել է վաղեմության ժամկետի հիմքով։

«Մյուս դրվագով առաջադրված մեղադրանքը վերավորակվեց, դատարանը 4 տարի ժամկետով ազատազրկման դատապարտեց, սակայն համաներման կիրառմամբ ազատ արձակվեց պատժի կրումից»,–ասաց Սաֆարյանը:

Հիշեցնենք, որ Երանոսյանը մեղադրվում էր պաշտոնեական լիազորությունները չարաշահելու մեջ։ Ըստ քրեական գործի նյութերի` նա, չունենալով լուսաձայնային հատուկ միջոցներ ստանալու և անձամբ գործադրելու լիազորություն, 2018–ի ապրիլի 16-ին և 22-ին` Երևանում բողոքի զանգվածային ակցիաների ժամանակ, ցուցարարների նկատմամբ գործադրել է 8 հատ «Զարյա» տեսակի լուսաձայնային նռնակներ, ինչի հետևանքով երկու տասնյակից ավելի անձինք են տուժել։ Հատուկ միջոցների գործադրման հետևանքով Բաղրամյան պողոտայում ծառայող ոստիկանության զորքերի զինծառայողներից 6 հոգի ստացել են մարմնական վնասվածքներ։