ԱՄՆ-ն պատժամիջոցներ է սահմանել վրացի միլիարդատեր, «Վրացական երազանք» կուսակցության հիմնադիր, նախկին վարչապետ Բիձինա Իվանիշվիլիի նկատմամբ։ ԱՄՆ Պետական դեպարտամենտի հայտարարության մեջ նշվում է, որ պատժամիջոցները կիրառվել են, քանի որ նա «խարխլում է Վրաստանի ժողովրդավարական և եվրաատլանտյան ապագան՝ ի շահ Ռուսաստանի Դաշնության»։

Հայտարարության մեջ նաև նշվում է, որ Իվանիշվիլիի և «Վրացական երազանքի» գործողությունները ոտնահարել են մարդու իրավունքները Վրաստանում։ 

Այս պատժամիջոցներին է անդրադարձել Վրաստանի վարչապետ Իրակլի Կոբախիձեն՝ այդ քայլն անվանելով «շանտաժ»։ 

Իվանիշվիլիի «Վրացական երազանք» կուսակցությունը պնդում է, որ սատարում է արևմտամետ Վրաստանին՝ միաժամանակ պահպանելով կապերը Ռուսաստանի հետ: Այնուամենայնիվ, Վրաստանի կառավարության ԵՄ-ին անդամակցելու բանակցությունները մինչև 2028 թվականը սառեցնելու որոշումը ամենօրյա բողոքի ակցիաների ալիք է առաջացրել Վրաստանում, որոնք հանգեցրել են ավելի քան 400 մարդու կալանավորման։

Ավելի վաղ՝ դեկտեմբերի 18-ին, ԱՄՆ-ն պատժամիջոցներ էր սահմանել Վրաստանի մի շարք պաշտոնյաների նկատմամբ, որոնք մեղադրվում էին ցուցարարների ճնշումներին մասնակցելու մեջ։