1lurer.am: ԱՄՆ նախագահ Ջո Բայդենը պաշտոնը թողնելուց մի քանի օր առաջ որոշում է կայացրել Կուբային հանել ահաբեկչությանն աջակցող պետությունների ամերիկյան ցուցակից։

Ի պատասխան՝ Կուբան, համաձայնության գալով Վաշինգտոնի հետ, խոստացել է ազատ արձակել 553 բանտարկյալի։ ԱՄՆ-ն ակնկալում է, որ նրանց թվում կլինեն չորս տարի առաջ բողոքի ցույցերին մասնակցելու համար դատապարտվածները։

Բայդենի հայտարարության մեջ ասվում է, որ Կուբայի իշխանությունները վերջին վեց ամսվա ընթացքում չեն աջակցել միջազգային ահաբեկչությանը և վստահեցնում են, որ մտադիր չեն դա անել ապագայում։

Կուբան ԱՄՆ պատժամիջոցների տակ է 1962 թվականից։ 2015-ին դեմոկրատ նախագահ Բարաք Օբաման Կուբային հանեց «ահաբեկիչների» ցուցակից, 2021-ին հանրապետական ​​նախագահ Թրամփը, դարձյալ հեռանալուց մի քանի օր առաջ, Հավանան վերականգնեց այդ ցուցակում, իսկ չորս տարի անց դեմոկրատ նախագահ Բայդենը Կուբային նորից հանեց այնտեղից։

Ահաբեկչությունն աջակցող պետությունների ցուցակում հայտնված երկիրը զրկվում է  ԱՄՆ-ի տնտեսական օգնությունից և սահմանվում է նրան ամերիկյան զենք վաճառելու արգելք։ Կուբայի բացառումից հետո ամերիկյան ցուցակում մնում են Իրանը, Սիրիան և Հյուսիսային Կորեան։