Փրկարար ծառայության տնօրեն-ներքին գործերի նախարարի տեղակալ Կամո Ցուցուլյանն ապրիլի 2-ին ընդունել է ՄԱԿ-ի Պարենի համաշխարհային ծրագրի հայաստանյան գրասենյակի տնօրենի տեղակալ Օսկար Եկդահոլին և ծրագրի ներկայացուցիչներին։ Հանդիպմանը ներկա էին նաև Փրկարար ծառայության տնօրենի տեղակալները։

Կողմերը քննարկել են համագործակցության զարգացման հեռանկարները, հատկապես՝ ՄԱԿ-ի կողմից մշակված պատրաստվածության ծրագրերի առաջնահերթությունները։ Անդրադարձ է կատարվել Պարենի համաշխարհային ծրագրի առաջարկած հիմնական ուղղություններին՝ ներառյալ շարժական պահեստների ստեղծմանը, դրանցում ներգրավված անձնակազմի կարողությունների զարգացմանը, ճգնաժամային իրավիճակներում աջակցության մեթոդների կատարելագործմանը։

Մասնակիցները կարևորել են ոլորտային համագործակցության խորացման նշանակությունն ու քննարկել համատեղ նախագծեր իրականացնելու հնարավորությունները։ Հատկապես կարևորվել է համագործակցությունը երկրաշարժերի դեպքում, երբ Պարենի համաշխարհային ծրագիրը կարող է հանդես գալ որպես առանցքային դերակատար՝ ապահովելով արագ արձագանքման և աջակցության համակարգեր։

Ավարտին կողմերը պայմանավորվել են ստեղծել համատեղ աշխատանքային խումբ՝ աղետների կառավարման ոլորտում համագործակցությունն ավելի արդյունավետ դարձնելու համար։