Ներքին գործերի նախարարություն

2022թ. դեկտեմբերի 16-ին ընդունված ՀՀ օրենքով Հայաստանում ստեղծվել է Ներքին գործերի նախարարություն։

Նախարարությունը ներառում է Միգրացիայի և քաղաքացիության ծառայություն, Ոստիկանությունը և Փրկարար ծառայությունը։

ՆԳ նախարարի պաշտոնը այժմ զբաղեցնում է Արփինե Սարգսյանը։

Նորաստեղծ նախարարության առաջին ղեկավարը եղել է Վահե Ղազարյանը։

Քաղաքացիները սեպտեմբերի 1-ից վարորդական վկայականի քննությունները կկարողանան վերահանձնել նաև բացասական գնահատական ստանալու հաջորդ օրը |armenpress.am|

armenpress.am: 2025 թվականի սեպտեմբերի 1-ից քաղաքացիները հնարավորություն կունենան հավելյալ վճարի դիմաց վարորդական վկայական ստանալու համար քննությունը վերահանձնել նաև բացասական գնահատական ստանալու հաջորդ օրը։ Օրենսդրական նախագծերի համապատասխան փաթեթը հավանության արժանացավ ՀՀ կառավարության մայիսի 15-ի նիստում։ Համաձայն հաստատված նախագծերի՝ վարորդը բացի պլաստիկ տարբերակից կարող է ունենալ նաև վարորդական վկայականի թվային տարբերակը, որը Պարեկային ծառայության կողմից կհամարվի իրավաչափ և վարորդի մոտ պլաստիկ քարտի ֆիզիկական բացակայությունը վարչական պատասխանատվության չի հանգեցնի։ Նախագծերի փաթեթի հիմնական զեկուցող, ՀՀ ներքին գործերի նախարար Արփինե Սարգսյանը շեշտեց, որ նախագիծն առաջարկում է կարգավորել 3 խումբ հարց։ «Առաջինը՝ պետք է շեշտեմ, որ թե՛ մեր հանրապետությունում, թե՛ միջազգային պրակտիկայում գոյություն ունի ստանդարտից տարբերվող արագացված և արտոնյալ պայմաններում ծառայությունների մատուցման տրամաբանություն ևս, որի դեպքում համապատասխան վճարի դիմաց անձը կարողանում է շատ ավելի կարճ, շատ ավելի հարմարավետ տարբերակում ստանալ իր ծառայությունը, և մեր հանրապետությունում այդպիսի ծառայությունները բազմաթիվ են։ Ներքին գործերի նախարարության մակարդակում կցանկանայի, օրինակ, առանձնացնել անձնագրային ծառայությունների ոլորտը, երբ ունենք ստանդարտ վճարի դիմաց մատուցվող ծառայություն և արագացված կարգով անձնագրի կամ նույնականացման քարտի տրամադրման դեպքում հավելյալ վճարի դիմաց ծառայությունը ստանալու մեխանիզմ։ Նույնն առաջարկում ենք այս օրենսդրական նախաձեռնությամբ կիրառել վարորդական վկայականների ստացման համար նախատեսված տեսական և գործնական քննությունների համար»,-ասաց նախարարը։ Նախարարի բնութագրմամբ՝ եթե անձը թե՛ տեսական, թե՛ գործնական քննություններից ստանում է բացասական գնահատական, ապա նա միայն մեկ շաբաթ անց ունի վերահանձնման հնարավորություն, բայց քաղաքացիներից լինում են բազմաթիվ խնդրանքներ, դիմումներ, որտեղ նշվում է, որ որոշակի գումարի դիմաց նրանք պատրաստ են արագացված ծառայություններ ձեռք բերել և դրա դիմաց ոչ թե 7 օր հետո վերահանձնել քննությունը, այլ, օրինակ, պայմանական՝ հաջորդ օրը կամ չորս օր հետո, որովհետև լինում են իրավիճակներ, երբ կարիք կա մի կողմից հարմարավետության տեսանկյունից ավելի արագ հանձնել քննությունը, մյուս կողմից կարիք կա քննությունը հանձնել շատ ավելի սեղմ ժամկետներում։ «Ըստ այդմ՝ առաջարկում ենք բացասական ստանալու դեպքում հաջորդ օրը քննությանը մասնակցելու համար սահմանել հավելյալ վճար, որը կկազմի 45 հազար դրամ, բացասական ստանալուց 3 օր հետո քննությունը վերահանձնելու դեպքում՝ 30 հազար դրամ։ Սա հավելյալ հնարավորություն է ՀՀ քաղաքացիների համար։ Այսինքն` վերահանձնման ստանդարտ սպասելաժամանակը, որը 7 օր է, պահպանում ենք, սակայն, եթե անձը ունի հնարավորություն և ցանկություն՝ հավելյալ վճարի դիմաց ստանալ հավելյալ ծառայություն, ապա այս դեպքում տալիս ենք իրավական նոր հնարավորություն»,– հայտարարեց նախարարը՝ հավելելով, որ մեկ այլ փոփոխությամբ` եթե 2-րդ վերահանձնման ժամանակահատվածը մեկ ամիս անց է, ապա այս դեպքում ևս սահմանվել են ժամկետային որոշակի հնարավորություններ. եթե մեկ ամիս անց ևս անձը ստանում է բացասական գնահատական, ապա նա կարող է քննությունը վերահանձնել 7-րդ և 14-րդ օրը։ Նախարարի խոսքով՝ հարցերի երկրորդ խումբը վերաբերում է հաշվառման վկայագրերի և վարորդական վկայագրերի թվայնացմանը․ «Մենք հնարավորություն ենք տալիս հաշվառման վկայագրին և վարորդական վկայականի պլաստիկ տարբերակին զուգահեռ ունենալ նաև թվայնացված տարբերակը, և ՀՀ տարածքում իրավաչափ ու թույլատրելի համարել նաև դրանց շրջանառությունը։Եթե առկա է ճանապարհային երթևեկության որևէ կանոնի խախտում, և այդ անձը չունի պլաստիկ վկայականը, բայց կա թվային տարբերակը, ապա դա չի հանգեցնի վարչական պատասխանատվության կիրառման։ Երրորդ խումբ կարգավորումները վերաբերում են թվային հարթակում տրանսպորտային միջոցների առուվաճառքի իրականացմանը։ Նախորդ նիստում ես նշել էի, որ մենք մեր քաղաքացիներին հնարավորություն ենք տալու, որպեսզի եթե առաջին անգամ է գրանցումը տեղի ունենում, հաշվառման համարանիշը ստանան նաև փոստային առաքման միջոցով։ Սա թույլ կտա համապատասխան վճարի դեպքում քաղաքացուն առաքել հաշվառման համարանիշը։ Սա ևս հավելյալ ծառայություն է, և, եթե քաղաքացիները ցանկություն չունենան սրանից օգտվել, ապա պահպանվում է ստանդարտ տարբերակը»,-նշեց Արփինե Սարգսյանը՝ հավելելով, որ նախատեսվում է հաշվառման և վարորդական վկայականների թվային տարբերակների դեպքում նաև լրացուցիչ բոնուսներ ապահովել քաղաքացիների համար` տարբեր ծառայություններից օգտվելու դեպքում։ Նախարարը հայտնեց, որ այս ընդհանուր օրենսդրական կանոնների ուժի մեջ մտնելու ժամկետն առաջարկվում է ֆիքսել 2025 թվականի սեպտեմբերի 1-ը։

15:08 - 15 մայիսի, 2025

Ջրատարն ընկած կնոջը հաջողվեց փրկել, ընկերոջը՝ ոչ. մեկ անձ կալանավորվել է

Ապրիլի 26-ի վաղ առավոտյան Ոստիկանության օպերատիվ կառավարման կենտրոն հնչած ահազանգը դժբախտ պատահարի մասին էր։ Հայտնում էին, որ Արցախի պողոտայով անցնող ջրատարը կին ու տղամարդ են ընկել, կնոջը դուրս են բերել, իսկ տղամարդուն՝ չի հաջողվել։ Հետո պիտի պարզվեր, որ նրանց օգնության կանչերին առաջինն արձագանքել են Ոստիկանության պետական պահպանության գլխավոր վարչության 1-ին ռազմականացված ջոկատի ծառայողները, որոնք իրականացնում են ջրատարի մոտակայքում գործող կարևոր նշանակության օբյեկտի պահպանություն։1-ին ռազմականացված ջոկատի հրաձիգ Սարգիս Սարգսյանը վերհիշում է կատարվածի մանրամասները։«Գործընկերոջս հետ վազեցինք ձայների ուղղությամբ։ Ջրատարում նկատեցինք մի տղամարդու և մի կնոջ, որոնք բռնվել էին ամրանից։ Ջուրը բավական վարար էր, ու նրանք հազիվ էին կարողանում իրենց պահել։ Ես անմիջապես կիսով չափ մտա ջրատարը և բռնելով կնոջ ձեռքից՝ նրան դուրս հանեցի ջրատարից։ Փորձեցի նաև դուրս բերել տղամարդուն, բայց չհաջողվեց. ջուրը նրան տարավ»,- նշում է հրաձիգ Սարգիս Սարգսյանը։ Սարգիս Սարգսյանն ու գործընկերը որոշ տարածություն վազել են ջրատարի երկայնքով, փորձել տղամարդուն փրկելու հնար գտնել, բայց չեն կարողացել։ Պարզվեց, որ ջրատարն ընկած կինը Երևանում բնակվող 48-ամյա Սյուզաննա Կ.-ն է, իսկ տղամարդը՝ նրա 42-ամյա ընկերը, որն օտարերկրյա քաղաքացի է։ Հետագայում պիտի պարզվեր նաև, որ տեղի ունեցածն ամենևին էլ դժբախտ պատահար չէ, այլ՝ հանցանք, որի բացահայտման գործը ստանձնեցին Քրեական ոստիկանության Երևան քաղաքի վարչության Մարդու դեմ ուղղված հանցագործությունների դեմ պայքարի բաժնի ծառայողները։ Շենգավիթ վարչական շրջանի քննչական բաժնում նախաձեռնվեց քրեական վարույթ, որի շրջանակներում ձեռնարկված միջոցառումների՝ հրապարակման ենթակա արդյունքները ներկայացնում է բացահայտման միջոցառումներին ներգրավված Քրեական ոստիկանության Երևան քաղաքի վարչության ՄԴՈՒՀԴՊ բաժնի ծառայող Վարդան Մանուկյանը։ «Քրեական վարույթի շրջանակներում ձեռնարկված բազմաբնույթ օպերատիվ-հետախուզական միջոցառումների արդյունքում նախ պարզեցինք, որ ջրատարն ընկած կինը և նրա օտարերկրացի ընկերը Նոր Խարբերդի տներից մեկում ալկոհոլ են օգտագործել, ապա որոշել են միասին գնալ զվարճանքի վայր»,-մանրամասնում է Վարդան Մանուկյանը։ Զվարճանքի վայր հասնելու համար նրանք Արարատի մարզի Այնթապ գյուղում կանգնեցրել են պատահական ավտոմեքենա ու վարորդին խնդրել, որ իրենց տեղափոխի։ Երևանի քրեական ոստիկանները օպերատիվորեն պարզեցին ոչ միայն տվյալ ավտոմեքենայի մակնիշը, համարանիշը, այլև կատարվածի մի շարք հանգամանքներ։ Վարդան Մանուկյանը նշում է՝ «Նախ պարզեցինք, որ ջրատարն ընկած կինն ու նրա ընկերը նստել են արծաթագույն «Օպել» մակնիշի ավտոմեքենա։ Ուսումնասիրություններ կատարեցինք Նոր Խարբերդում ու հարակից թաղամասերում բնակվող և արծաթագույն «Օպել» շահագործող անձանց շրջանում։ Մեր օպերատիվ տեսադաշտում հայտնվեց 26-ամյա երիտասարդ, որը դեպքի օրն իր արծաթագույն «Օպել»-ով եղբոր հետ այդ ճանապարհով գնալիս է եղել Նուբարաշեն»։ Քրեական ոստիկանների օպերատիվ տեսադաշտում հայտնված երիտասարդը բնակվում էր Նուբարաշենի Մասիս Ա թաղամասում։ Իրավապահների առաջնային խնդիրն էր հստակեցնել նրա և եղբոր գործողությունները՝ նրանց և ջրատարն ընկածների փոխհարաբերությունների բնույթը, ենթադրյալ հանցանքի շարժառիթը։ «Մեզ հաջողվեց պարզել, որ նուբարաշենցի եղբայրները և ջրատարն ընկած կինն ու նրա ընկերը միմյանց չեն ճանաչել։ Ավելին՝ առաջին անգամ միմյանց տեսել են, երբ ջրատարն ընկած կինն ու նրա ընկերը զվարճանքի վայր հասնելու նպատակով կանգնեցրել են երիտասարդների «Օպելը»։ Ճանապարհին նրանց միջև վեճ է ծագել, որն ուղեկցվել է քաշքշուկով»,- նշում է քրեական ոստիկանը։ Վեճի ընթացքում վարորդն ավտոմեքենան կայանել է Արցախի 5-րդ նրբանցքի հատվածում՝ ջրատարի հարևանությամբ։ Այնուհետև կինը, դեռևս չպարզված հանգամանքներում, ընկել է ջրատարը, իսկ նրա օտարերկրացի ընկերոջը հրել ու դիտավորյալ ջրատարն է գցել «Օպելի» վարորդը, ինչից հետո եղբայրները հեռացել են տարածքից։ Նույն օպերատիվությամբ Երևանի քրեական ոստիկանները հայտնաբերեցին ու նախաքննական մարմին ներկայացրին 21 և 26 տարեկան եղբայրներին։ Նրանցից ավագին մեղադրանք է ներկայացվել։ Դատարանի որոշմամբ նա կալանավորվել ու տեղափոխվել է քրեակատարողական հիմնարկ։Փրկարար ծառայության և Ոստիկանության ուժերը ձեռնարկում են որոնողական միջոցառումներ՝ ջրատարն ընկած տղամարդուն հայտնաբերելու ուղղությամբ։Հանգամանքները նախաքննությամբ պարզվում են։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

12:01 - 08 մայիսի, 2025