Ժողովուրդը կարող է հաղթանակել, երբ միաբանված է մեկ նպատակով, մեկ ձգտումով ու բաղձանքով։

Հանրապետության տոնի կապակցությամբ տոնական ուղերձում ընդգծել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը՝ անդրադառնալով հայ ժողովրդի միասնականության կարևորությանը և մայիսի 28-ի պատմական խորհրդին։

«Այսօր, երբ մեր ժողովուրդը կանգնած է նոր փորձությունների առջև և աղետալի պատերազմից ու Արցախի բռնազավթումից հետո կրում է արհավիրքների ծանր հետևանքները, մայիսի 28-ի խորհուրդը կրկին հնչեցնում է անբեկանելի ճշմարտությունը, որ ժողովուրդը կարող է հաղթանակել, երբ միաբանված է մեկ նպատակով, մեկ ձգտումով ու բաղձանքով։ Մեր անկախությունը մեր հայրերի սրբազան ավանդն է մեզ, որը պիտի փայփայենք և շարունակենք համատեղ ջանքերով շենացնել մեր երկիրը, զորացնել մեր պետականությունը»,- նշված է ուղերձում։

Կաթողիկոսը հիշեցրել է նաև 1918-ի մայիսյան հերոսամարտերի խորհուրդը, որով դարերի ընդմիջումից հետո վերականգնվեց հայկական պետականությունը՝ արժանապատիվ ու ապահով կյանք կերտելու տեսլականով։