Ուկրաինայում բացված մարդասիրական միջանցքները ոչ մի տեղ լիարժեք չեն աշխատում։ Այս մասին հայտարարել է Դոնեցկի Ժողովրդական Հանրապետության ղեկավար Դենիս Պուշիլինը, հաղորդում է «TACC»-ը։
«Չնայած պայմանավորվածություններին, որոնք ձեռք են բերվել հումանիտար միջանցքների բացման շուրջ բանակցությունների շրջանակներում, դրանք ոչ մի տեղ լիարժեք չեն աշխատում»։
Նրա խոսքով այս պահի դրությամբ «ազատագրվել է» Դոնեցկի Ժողովրդական Հանրապետության 50%-ից ավելին։
Հիշեցնենք, որ արդեն երրորդ օրն է, ՌԴ ՊՆ-ն վաղ առավոտից հայտարարում է լռության ռեժիմ՝ բացելով մարդասիրական միջանցքներ։ Ուկրաինական կողմից նշում են, որ համաձայն չեն քաղաքացիների տարհանմանը դեպի ՌԴ, այլ որ նրանք պետք է տեղափոխվեն ուկրաինական այլ, երկրի արևմուտքում գտնվող քաղաքներ։
Այսօր Ուկրաինան նշել է մարդասիրական միջանցքների հետևյալ ուղղությունները․ Վորզելից, Բորոդյանկայից, Իրպինից և Բուչայից մարդասիրական միջանցք է բացվում դեպի Կիև, Մարիուպոլից՝ Զապորոժիե, Վոլնովախայից՝ Պոկրովսկ, Իզյումից՝ Լոզովա և Էներգոդարից՝ Զապորոժիե։
Ավելի վաղ հայտնել էին, որ լռության ռեժիմի հաստատումից հետո Ուկրաինայի Սումի քաղաքից մոտ 5000 մարդ է տարհանվել։
comment.count (0)