Խաղաղության եվրոպական հիմնադրամը կկրկնապատկի Եվրոպական միության ռազմական օգնությունն Ուկրաինային՝ այդ նպատակով հատկացնելով ևս 500 միլիոն եվրո։ ՏԱՍՍ գործակալության հաղորդմամբ՝ այս մասին այսօր՝ Վերսալում ԵՄ գագաթնաժողովին ժամանելուն պես, ասել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը։

«ԵՄ երկրները 500 միլիոն եվրո են հատկացրել Ուկրաինային մեր ռազմական աջակցության համար: Խաղաղության եվրոպական հիմնադրամը կկրկնապատկի այդ աջակցությունը՝ ավելացնելով ևս 500 միլիոն եվրո»,- ասել է Բորելը: Այսպիսով, ԵՄ-ի՝ Ուկրաինային տրամադրվող դրամական աջակցությունը կկազմի 1 միլիարդ եվրո։

Նա վստահեցրել է, որ դժվար չի եղել ստանալ ԵՄ բոլոր երկրների աջակցությունը՝ Ուկրաինային ռազմական օգնության նպատակով գումար հատկացնելու համար։

ԵՄ ներկայացուցիչը նաեւ խոստացել է նոր պատժամիջոցներ պատրաստել Ռուսաստանի եւ «ռուս օլիգարխների» դեմ։

Հիշեցնենք՝ ավելի վաղ՝ մարտի 1-ին, Ուկրաինան ԵՄ անդամակցության հայտ էր ներկայացրել, որը, սակայն, մերժվել էր։ Ուկրաինայից հետո նմանատիպ դիմումներ են ներկայացրել նաեւ Վրաստանն ու Մոլդովան։

Լուսանկարում՝ Ժոզեֆ Բորելը