Տիգրան Ավինյան

ՀՀ նախկին փոխվարչապետ, «Քաղաքացիական պայմանագիր» կուսակցության վարչության անդամ։ Ծնվել է 1989թ. փետրվարի 28-ին։ 2005 թվականին ավարտել է Երեւանի Ալեքսանդր Պուշկինի անվան թիվ 8 դպրոցը: 2009 թվականին ավարտել է Հայ-ռուսական (սլավոնական) համալսարանի կիրառական մաթեմատիկայի ֆակուլտետի բակալավրիատը: 2011 թվականին ավարտել է Հայ-ռուսական (սլավոնական) համալսարանի կիրառական մաթեմատիկայի ֆակուլտետի մագիստրատուրան (տնտեսագիտության մեջ մաթեմատիկական մոդելավորման գծով): 2014 թվականին գերազանցությամբ ավարտել է Լոնդոնի Մարիա թագուհու համալսարանը, ստանալով ֆինանսների մագիստրոսի կոչում:

2009-2013 թվականներին աշխատել է Զարգացման Հայկական Բանկում որպես բիզնես վարկավորման բաժնի ավագ մասնագետ: 2010-2011 թվականներին հիմնադրել եւ ղեկավարել է ոռոգման համակարգերի տեղադրմամբ եւ լանդշաֆտային դիզայնով զբաղվող «Իրիգեյթ» ընկերությունը: 2014-2016 թվականներին աշխատել է ՇՏԵ ընկերությունում որպես SAP համակարգերի խորհրդատու: 2014-2018 թվականներին ղեկավարել է ծրագրային ապահովմամբ զբաղվող «Սայբեր Վիժըն» ընկերությունը։

2017-2018 թվականներին եղել է Երեւան քաղաքի ավագանու անդամ «ԵԼՔ» խմբակցությունից։ 2018 թվականի մայիսի 11-ին նշանակվել է Հայաստանի Հանրապետության փոխվարչապետ: Ավինյանի ընտանիքին են պատկանում «Սայբեր Վիժըն» ընկերությունը, որը այժմ ղեկավարում է նրա կինը՝ Մարիամ Պահլավունին, «Իրիգեյթ» ընկերությունը, որը ղեկավարում է նրա հայրը՝ Արմեն Ավինյանը։

Խոնարհում մեր բոլոր նահատակների հիշատակին, թող նրանց սխրանքն ու նվիրումը նպաստեն մեր պետության հզորացմանն ու զարգացմանը․ Ավինյան

Ֆեյսբուքյան էջում գրել է Երևանի քաղաքապետ Տիգրան Ավինյանը․ «Սիրելի՛ հայրենակիցներ,այսօր ոգեկոչման ու մեծարումի օր է։ Երկրորդ համաշխարհային պատերազմում տարած հաղթանակը նաև մեր հազարավոր հայրենակիցների անմնացորդ նվիրումի շնորհիվ էր: Նրանց հերոսական պայքարն արդեն անկախ Հայաստանի ինքնիշխանության ու պայծառ ապագայի համար շարունակեցին մեր եղբայրները, հայրերն ու որդիները, ցավոք՝ նաև կյանքի գնով: Խոնարհում մեր բոլոր նահատակների հիշատակին։ Թող նրանց սխրանքն ու նվիրումը նպաստեն մեր պետության հզորացմանն ու զարգացմանը»։

12:11 - 09 մայիսի, 2024

Տիգրան Ավինյանը ներկայացրել է Կենտրոն վարչական շրջանի նոր ղեկավարին

Երևանի քաղաքապետ Տիգրան Ավինյանը Կենտրոն վարչական շրջանի աշխատակազմին է ներկայացրել նորանշանակ ղեկավար Պետրոս Պետոյանին: Այս մասին հայտնում են քաղաքապետարանի լրատվական ծառայությունից։ Հաջողություններ մաղթելով պատասխանատու աշխատանքում՝ քաղաքապետ Ավինյանը կարևորել է վարչական շրջանների դերը՝ ի հայտ եկող խնդիրների արագ արձագանքման, բնակիչների հետ մշտական կապի ապահովման ու կարիքների գնահատման հարցում: Ներկայացնելով հիմնական այն ոլորտները, որոնց բարելավման ուղղությամբ համայնքը հիմնարար լուծումներ է նախաձեռնել, քաղաքապետը նշել է, որ ցանկացած նախագծի հիմքում դրվել ու դրվելու է հանրային շահը։ Շնորհակալություն հայտնելով վստահության համար՝ Կենտրոն վարչական շրջանի նորանշանակ ղեկավար Պետրոս Պետոյանը նշել է, որ աշխատանքային իր փորձը, կառավարչական հմտությունները, Երևանի նկատմամբ սերն ու հոգատարությունը ներդնելու է հօգուտ քաղաքային միջավայրի բարելավման ու առկա խնդիրների լուծման:

15:44 - 06 մայիսի, 2024

«Վեոլիա ջուր» ընկերության հետ պայմանագիրը կվերանայվի. Ավինյան |armenpress.am|

armenpress.am: Առատ տեղումների հետևանքով Երևանում խնդիրներ են արձանագրվել տրանսպորտային հանգույցներում, թունելներում և փողոցներում: Աշխատանքային հերթական խորհրդակցության ժամանակ այս մասին կրկին զեկուցվեց քաղաքապետ Տիգրան Ավինյանին: Վերջինս ընդգծեց, որ «Վեոլիա ջուր» ընկերության հետ պայմանագիրը կվերանայվի: Համաձայն վարձակալության պայմանագրի՝ Երևան քաղաքի մակերևութային ջրերի, հեղեղատար և անձրևընդունիչ ցանցի սպասարկման և շահագործման պատասխանատուն «Վեոլիա ջուր» ընկերությունն է. խողովակաշարերը, դիտահորերն ու անձրևընդունիչ հորերն ամբողջությամբ հանձնված են «Վեոլիա ջուր» ընկերությանը: «Մենք ունենք մի իրավիճակ, երբ բազմաթիվ բողոքներ են հղվում քաղաքապետարան, որոնք հանգուցալուծում չեն ստանում: Երևանցիներին չի հետաքրքրում պայմանագրային դրույթները, վստահ եմ՝ օբյեկտիվ են պատճառները: Այս տարի կառավարության մեր գործընկերների ու «Վեոլիա ջուր» ընկերության հետ պետք է գանք մի հանգուցալուծման, որովհետև ամեն մի բակում չենք կարող կոյուղիների հարցով զբաղվել: Մեզ պետք է մի ընկերություն, որն ամբողջ ցանցի պատասխանատվությունն իր վրա կվերցնի, ամեն ծառայություն ունի իր գինը, այդ գինը պետք է հասկանանք, որովհետև չենք կարող այս տարի մենք անենք, մյուս տարի մեկին խնդրենք: Պետք է մի սուբյեկտ, որն ամբողջապես պատասխանատու է, այս հարցում ամենավերջին պատասխանատվությունը մերն է. պետական գույք է, համայնքային էլ չէ, չգիտեմ մենք նախորդ տարի իրավունք ունեինք այդ 14 կմ կոյուղին կառուցելու թե ոչ, բայց կարիքը կար, արել ենք: Կա շատ նորմալ դժգոհություն մարդկանց մոտ, և ոչ ոքի հետաքրքիր չէ 10 տարի առաջ ինչ պայմանագիր է կնքվել, պետք է փոխվի այդ պայմանագիրը»,- շեշտել է քաղաքապետը: Քաղաքապետի հանձնարարությամբ արդեն մեկ ամիս է՝ ընթանում են գույքագրման աշխատանքներ, որտեղ բացակա է կամ վերակառուցման ենթակա է հեղեղատար համակարգը, կառաջարկվի կազմել քաղաքային ծրագիր:

13:02 - 06 մայիսի, 2024

«Եթե գիտական կողմը չկա, մնացածը էմոցիոնալ, սիրողական մակարդակի խոսակցություն է». Ավինյանը՝ ծառերի փոխարինման ծրագրի մասին |hetq.am|

hetq.am: Երևանի քաղաքապետարանի ապրիլի 8-ի գործակարգավարական նիստում քաղաքապետ Տիգրան Ավինյանը հայտնեց, որ նախորդ շաբաթ էկոակտիվիստների հետ հանդիպմանն ասել էր՝ ժամանակավորապես կդադարեցնեն ծառերի փոխարինման ծրագիրը՝ ակնկալելով, որ որոշակի գիտական շրջանակներից կստանան գրավոր հիմնավորումներ, որոնք նվազագույնը հարցականի տակ կդնեն նախորդ 20-ից ավելի գիտնականների ընդունած փաստաթուղթը։ Ավինյանը «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանին հարցրեց՝ արդյոք որևէ մեկը ներկայացրել է գրավոր հիմնավորում։ «Որևիցե նորություն չունենք, որևէ մեկը գիտական հանրության կամ գիտնականների կողմից որևիցե հակափաստարկ մինչ այս պահը չի ներկայացրել։ Ավելին, գիտությունների ազգային ակադեմիայում նախաձեռնվել է քննարկում, որին մասնակցել են տարբեր շահագրգիռ գերատեսչություններ։ Բացառությամբ մեկ անձի, բոլոր հիմնական հռետորները խոսում էին, որ թեղիները Երևան քաղաքից պետք է հանվեն, դա ակնհայտ է։ Կենսաբազմանության, Էկոնոսֆերայի ինստիտուտն էր ուզում ներգրավված լիներ, խոստացել եմ, որ գիտատեխնիկական խորհուրդ կհրավիրվեն նաև այդ գերատեսչություններից մեկական գիտնականներ։ Գիտությունների ազգային ակադեմիան ասում էր, որ որևիցե ինստիտուտ մինչ այս պահը չի հետազոտել, դե կներեք, շատ վատ է, որ մինչև էս պահը չի հետազոտել, որովհետև այս խնդիրը 2000-ականներից կախված է Երևանի գլխին և առաջացնում է պրոբլեմներ։ Եթե ինչ-որ մեկը ցանկություն կունենա ավելի ակնհայտ բանն ավելի մանրակրկիտ հետազոտելու, կարծում եմ, դա տվյալ գերատեսչության խնդիրը կլինի»,- հայտնեց Բեգոյանը։ Ըստ նրա՝ ԳԱԱ-ում քննարկման հիմնական մեխն այն էր, որ թեղիները սպառել են իրենց, թեղիները Երևանի կլիմային այդքան էլ հարմար ծառատեսակներ չեն եղել, թեղիները բերվել են Երևան հեշտ և արագ լուծում տալու համար, և որ դրանք պետք է փոխարինվեն հետագա տարիների ընթացքում։ Տիգրան Ավինյանն էլ նշեց, որ նախորդ տարվա փետրվարի 23-ին գիտական աշխատաժողովի ժամանակ 25 գիտնականներ պնդել են՝ Երևան քաղաքի կանաչ տնկարկները լիարժեք չեն կատարում քաղաքային միջավայրին անհրաժեշտ էկոհամակարգային ծառայություններ, սանիտարական, էկոլոգիական և գեղագիտական։ «Եթե կա գիտական դեբատ, մեծ հաճույքով ևս մեկ շրջափուլ անցկացնենք, հասկանանք՝ միգուցե կա որոշակի ճշմարտություն, որ բաց ենք թողել։ Այնուամենայնիվ, որպեսզի խոսակցությունը չլինի սիրողական մակարդակի, եթե գիտական կողմը չկա, մնացածը էմոցիոնալ, սիրողական մակարդակի խոսակցություն է»,- ասաց Ավինյանը։ Շարունակությունը՝ սկզբնաղբյուր կայքում

11:00 - 08 ապրիլի, 2024

Հայկ Մարությանի գրառումը հավանելու համար Արմեն Բեգոյանը աշխատակցին ծանուցել է կարգապահական տույժ կիրառելու մասին

Այսօր՝ ապրիլի 5-ին, Երևանի քաղաքապետարանի «Կանաչապատում և շրջակա միջավայրի պաշտպանություն» ՀՈԱԿ-ի տնօրեն Արմեն Բեգոյանը ծանուցագիր է ուղարկել նույն հիմնարկի աշխատակից Էմիլ Մկրտչյանին, որով սոցիալական ցանցերում Հայկ Մարությանի և «Ազգային առաջընթաց» խմբակցության ավագանու անդամների գրառումների տակ հավանում (Like) դնելու հիմքով Մկրտչյանին սպառնում է կիրառել կարգապահական տույժ և պահանջում է բացատրագիր: Այս մասին ֆեյբուքյան իր էջում գրել է Երևանի ավագանու «Ազգային առաջընթաց» խմբակցության ղեկավար Գրիգոր Երիցանը՝ հրավորելով ՄԻՊ-ի, ԶԼՄ-ների եւ իրավապաշտպան կազմակերպությունների ուշադրությունը։ «Սա 2018-ից ի վեր նախադեպը չունեցող քաղաքական հետապնդում է համայնքային ծառայողի նկատմամբ և հարձակում ՀՀ քաղաքացու մտքի և կարծիքի արտահայտման ազատության վրա: ՀՀ յուրաքանչյուր քաղաքացի՝ այդ թվում Երևանի քաղաքապետարանի և համայնքային հիմնարկների աշխատակիցներն ազատ են սոցիալական ցանցերում հավանել այն, ինչ ցանկանում են, և դրա համար չպետք է պատժվեն: Երևանի քաղաքապետ Տիգրան Ավինյանը պարտավոր է դատապարտել համայնքային հիմնարկում վախի և ավտորիտար մթնոլորտի տարածումը՝ րոպե առաջ հեռացնելով Բեգոյանին զբաղեցրած պաշտոնից: Հակառակ դեպքում պարզ է դառնում, որ հենց քաղաքապետն է խրախուսում այս ստալինյան ոչ ժողովրդավարական գործելաոճը»,- նշել է Երիցյանը։

17:02 - 05 ապրիլի, 2024

Երևանի քաղաքապետարանը նոր տրոլեյբուսների և 171 նոր ավտոբուսների մասով պայմանագրերի կնքման փուլում է |1lurer.am|

1lurer.am: Երևանի քաղաքապետարանը նոր տրոլեյբուսների և 171 նոր ավտոբուսների մասով պայմանագրերի կնքման փուլում է. դրանք տրանսպորտային ցանցի կարևոր մաս պետք է դառնան: Այդ մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը: «Շատ կարևոր է նաև 18 մետրանոց ավտոբուսների հետագա գնումը, որովհետև գալիք տարի՝ 2025-ին, լրանում է HIGER մակնիշի ավտոբուսների օգտագործման ժամկետը, և այդ ավտոբուսները նույնպես պետք է փոխարինվեն: Շատ լավ են ծառայել այդ ավտոբուսները Երևան քաղաքին, բայց արդեն բարոյապես մաշված են, երևի մոտավորապես պարկի կեսը չունենք: Ունենք խնդիր նաև մասնավոր գծերի հետ կապված, որոնց ընդհանուր շարժակազմը նույնպես բավականին հին է, և դրանք ունեն փոխարինման կարիք: Եվ այս 250 հատ 18 մետրանոց ավտոբուսներով մենք ամբողջապես փակում ենք մեր տրանսպորտային ցանցի պահանջարկը»,- ասաց նա և հավելեց, որ այս տարի Երևան քաղաքում նախատեսվում են նոր ավտոբուսների համար առանձնացված գծերի սահմանում: «Այս ավտոբուսային գծերի հայտնվելը Երևան քաղաքում էականորեն կրճատելու է մարդկանց տեղաշարժի ժամանակը Երևանով, և սա ապացուցված փաստ է: Իհարկե, անհատ վարորդների համար որոշակի անհարմարություններ են առաջանալու, բայց այն մարդկանց համար, որոնք օգտվելու են տրանսպորտից, նրանք էականորեն շատ ավելի կարճ ժամկետներում են Ա կետից Բ կետ տեղաշարժվելու: Մեզ պետք է նաև քննարկում հասկանալու համար, թե ավտոբուսային առանձնացված գծերով ի՛նչ այլ տրանսպորտային տեսակներ կարող են երթևեկել, և, մասնավորապես, ենթադրում եմ՝ կարող են լինել հեծանիվները, մոպեդները, միգուցե մոտոցիկլետները, միգուցե ինչ-որ մի փուլում՝ երևանյան տաքսին, որը կարելի է քննարկել, թե նման առանձին ծառայություն ուզո՞ւմ ենք ունենալ, օրինակ՝ էլեկտրաավտոներով առանձին տաքսիներ սպասարկեն Երևան քաղաքում, նրանց նույնպես այդ հնարավորությունը տրվի»,- ասաց նա և ընդգծեց, որ այդ պրոցեսում չպետք է խախտել մրցակցային տրամաբանությունը, բայց միաժամանակ տաքսիների համար պետք է նոր պահանջներ սահմանել: Ավինյանը նաև նշեց, որ տրանսպորտային փոփոխությունների ամենակարևոր հատվածը տոմսային համակարգի ներդրումն է լինելու, որը պետք է սեպտեմբերից գործարկվի: Ավագանին իր անելիքն արել է, մնում է տեխնիկական հարցերը լուծվեն: «Փուլային փոփոխությունը «Երևան ավտոբուսում», այսինքն՝ կանխիկ վճարելուց դեպի անկանխիկ մեթոդ, արդեն իսկ այսօրվանից պետք է սկսվի»,- եզրափակելով խոսքը՝ ասաց Ավինյանը:

11:22 - 01 ապրիլի, 2024

Երևանը պատրաստակամ է գործակցության տարբեր ծրագրեր իրականացնել սիրիական քաղաքների հետ. Ավինյան

Երևանի քաղաքապետ Տիգրան Ավինյանն ընդունել է Սիրիայի Արաբական Հանրապետության արտակարգ և լիազոր դեսպան Նորա Արիսյանին: Դեռևս 1997 թ. Երևանի և Դամասկոսի միջև կնքվել է քույր քաղաքներ հռչակելու մասին համաձայնագիր. կողմերը փաստել են, որ փաստաթուղթը թարմացման անհրաժեշտություն ունի: Անդրադառնալով Երևանում իրականացվող ծրագրերին ու քաղաքի զարգացման տեմպերին՝ դեսպան Նորա Արիսյանը նշել է, որ Սիրիայի քաղաքները Երևանի փորձառության անհրաժեշտությունն ունեն: Քաղաքապետ Ավինյանն իր հերթին նշել է, որ Երևանը բաց և պատրաստակամ է գործակցության տարբեր ծրագրեր իրականացնել սիրիական քաղաքների հետ և աջակից լինել օրակարգային բոլոր հարցերում: «Հայ և սիրիացի ժողովուրդների միջև բարեկամական սերտ կապերն իրապես պատմական բնույթ ունեն, և դրանից է բխում, որ հայազգի ներկայացուցիչներն իրենց ակտիվ տեղն ունեն Սիրիայում՝ ամենատարբեր բնագավառներում, և, իհարկե, ինձ համար ուրախալի է, որ Դուք՝ տիկին դեսպան, ներկայացնում եք Սիրիայի Արաբական Հանրապետությունն այս պաշտոնում: Գիտակցելով այն դժվարին ժամանակաշրջանը, որ անցել եք՝ մենք պատրաստ ենք աջակցել գործընկեր քաղաքին տարբեր հարցերում»,- ընդգծել է քաղաքապետը:

18:50 - 21 մարտի, 2024

Քաղաքն այլանդակել մենք չպետք է թույլ տանք. Տիգրան Ավինյան |1lurer.am|

1lurer.am: Երևանյան հուշարձաններին ու ճարտարապետական նշանակություն ունեցող շենքերի հարակից սրճարաններն ու նմանատիպ այլ կառույցները կապամոնտաժվեն: Այդ մասին Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը՝ նշելով, որ խոսքը, մասնավորապես, Երևանի Կենտրոնի մասին է: Ավինյանը հանձնարարեց, որ կոնկրետ դեպքերով իրավական լուծումները հետազոտվեն: «Կան սրճարաններ, որոնք բացարձակապես իրենց տեղում չեն, պետք է մաքրվեն: Ինչպես նախորդ տարի հրապարակի [Ազգային] պատկերասրահի կամարի տակ գտնվող անհասկանալի վաճառքի կետն է մաքրվել, այդպես պետք է շարունակվեն մաքրվել բոլոր նմանատիպ կետերը, և միգուցե ավելի մեծ սրճարաններ, և այդ իրավական հիմքերն էլ պետք է գտնենք, որովհետև անվերջանալի տարատեսակ իրավական կետերին հղում անելով՝ պահպանել այդ այլանդակությունները՝ ես չեմ պատրաստվում հանդուրժել: Ինչպես նաև չեմ պատրաստվում հանդուրժել այն գլոբալ տրամաբանությունը, որ տարբեր դատական վճիռներով մետաղյա ինքնակամ շինություններ են օրինականացվում, պարտադրում, որ օրինականացվեն այն հատվածներում, որտեղ ծառեր պետք է լինեն, կանաչ տարածքներում՝ անկախ նախկինում եկած պրակտիկայից: Եվ ես կարծում եմ՝ այդտեղ էլ իրավական առումով աշխատանք ունենք անելու, որովհետև ես հաշտ չեմ նմանատիպ վճիռների հետ և չեմ լինելու հաշտ, և դա խնդիր է լինելու, մինչև կարողանանք իրավական լուծումները գտնել: Քաղաքն այլանդակել մենք չպետք է թույլ տանք»,- ասաց նա:

12:00 - 18 մարտի, 2024

Քարոզարշավի կասկածելի ֆինանսներ,Երևանյան լճի թերի բարեկարգում,ուղեվարձեր. զրույց Տիգրան Ավինյանի հետ

«Ինֆոքոմի» լրագրող Լյուսի Մանվելյանը Երևանի քաղաքապետ Տիգրան Ավինյանի հետ զրուցել է հանրային տրանսպորտի նոր ուղեվարձի, Երևանյան լճի հարակից տարածքի բարեկարգման խնդիրների, ՔՊ ավագանու թեկնածուի ընկերության՝ պետական գնումներում հաղթելու, Երևանի ավագանու ընտրություններին ընդառաջ ՔՊ կուսակցության կասկածելի նվիրատվությունների մասին։ - Հասարակական տրանսպորտի նոր ուղեվարձերի մասին - Երևանյան լճի հարակից այգու թերի բարեկարգման մասին - Քաղաքապետարանի գնումների, բիզնեսի և քաղաքականության տարանջատման մասին - Երևանի ավագանու ընտրություններին ընդառաջ ՔՊ կուսակցության կասկածելի նվիրատվությունների մասին - Երևանի ապաստարանների մասին

16:46 - 15 մարտի, 2024

Քարոզարշավի կասկածելի ֆինանսներ, Երևանյան լճի թերի բարեկարգում, նոր ուղեվարձեր. հարցազրույց Տիգրան Ավինյանի հետ

15:00 - 15 մարտի, 2024

Տիգրան Ավինյանն ու Գիորգի Շարվաշիձեն քննարկել են Երևանի և Թբիլիսիի միջև գործակցության ընդլայնմանն առնչվող հարցեր

Երևանի քաղաքապետ Տիգրան Ավինյանի ու Հայաստանի Հանրապետությունում Վրաստանի Հանրապետության արտակարգ և լիազոր դեսպան Գիորգի Շարվաշիձեի հանդիպման ժամանակ քննարկվել են Երևանի և Թբիլիսիի միջև գործակցության ընդլայնմանն առնչվող հարցեր: Երևանի քաղաքապետարանից հայտնում են, որ կողմերը բարձր են գնահատել երկու մայրաքաղաքների միջև հաստատված փոխգործակցությունը, իրականացվող փորձի փոխանակման ծրագրերն ու ընդգծել, որ առկա է մեծ ներուժ՝ նոր ուղղություններ ու ոլորտներ ընդգրկելու համար: Շնորհակալություն հայտնելով ջերմ ընդունելության ու համագործակցությունն ընդլայնելու պատրաստակամության համար՝ դեսպան Գիորգի Շարվաշիձեն նշել է, որ իր լիազորությունների շրջանակում պատրաստակամ է աջակցելու և օժանդակելու երկուստեք կապերի խորացման բոլոր նախաձեռնություններին և ծրագրերին:

18:02 - 13 մարտի, 2024

«Մայր Հայաստան» և «Ազգային առաջընթաց» խմբակցություններն առաջարկեցին օրակարգից հանել տրանսպորտի թանկացման հարցը |hetq.am|

hetq.am: Երևանի ավագանու «Մայր Հայաստան» և «Ազգային առաջընթաց» խմբակցություններն ավագանու այսօրվա՝ մարտի 12-ի նիստում առաջարկեցին օրակարգից հանել տրանսպորտի թանկացման հարցը, ինչպես նաև բոլոր չզեկուցվող հարցերը դարձնել զեկուցվող։ Հիշեցնենք՝ միասնական տոմսային համակարգի լրամշակված նախագծով առաջարկվում է՝ 30 օրվա համար սահմանել 8800 դրամ սակագին՝ անսահմանափակ երթևեկելու հնարավորությամբ, 90 օրվա համար՝ 23600 դրամ՝ անսահմանափակ երթևեկելու հնարավորությամբ, 365 օրվա համար՝ 88000 դրամ՝ անսահմանափակ երթևեկելու հնարավորությամբ։ «Ազգային առաջընթաց» խմբակցության ղեկավար Արամ Թորոսյանն առաջարկեց հարցն ընդհանրապես հանել օրակարգից, քանի որ այն ամբողջովին մշակված չէ։ Թորոսյանը նաև նշեց, որ հարցի քննարկման համար որպես փորձագետ հրավիրել են Երևանի նախկին քաղաքապետ Հայկ Մարությանին, որի մուտքն արգելվում է։ «Այն ներքին հրամանը, որը գործում է քաղաքապետարանի և շենքի պահպանությունն իրականացնող կազմակերպության միջև, չի կարող վերադասվել օրենքից»,- նշեց Թորոսյանը։ Երևանի քաղաքապետ Տիգրան Ավինյանը չանդրադարձավ Արամ Թորոսյանի՝ որպես փորձագետ Հայկ Մարությանի՝ նիստին մասնակցելու առաջարկին՝ ասելով, որ իրենք լսեցին խմբակցությունների առաջարկները։ Նա քվեարկության դրեց միայն ՔՊ խմբակցության առաջարկը։

10:54 - 12 մարտի, 2024

Ջրագծին մոտեցնող ճանապարհն անանցանելի է. ջրագիծը ծածկվել է ջրով. քաղաքապետարանը՝ Արաբկիրում ջրամատակարարման աշխատանքների մասին |1lurer.am|

1lurer.am: Երեկ երեկոյան՝ 21:00-ի սահմաններում, վթարվել է Արզնի 2-Երևան ջրատարը, որի միջոցով իրականացվում է Արաբկիր և Կենտրոն վարչական շրջանների 25 տոկոս բաժանորդների ջրամատակարարումը: Երևանի քաղաքապետարանի գործակարգավարական խորհրդակցության ժամանակ քաղաքապետ Տիգրան Ավինյանին զեկուցվեց, որ հողի շերտերի փլուզման հետևանքով փոխվել է Հրազդան գետի հունը, որի հետևանքով անանցանելի է ջրագծին մոտեցնող ճանապարհը, ջրագիծը ծածկվել է ջրով, ինչի պատճառով հնարավոր չէ իրականացնել վթարավերականգնողական աշխատանքներ: Այս պահին արդեն իսկ սկսվել է նախապատրաստական աշխատանքներ վթարավերականգնողական աշխատանքներ իրականացնելու համար: Մեծ ծավալի գրունտային աշխատանքներ պետք է կատարվեն գետի հունը տեղափոխելու համար, նոր միայն վթարավերականգնողական աշխատանքները կսկսվեն: Քաղաքապետին զեկուցվեց, որ գիշերվա ընթացքում նախնական ջրանջատումներ եղել են, օրվա ընթացքում կմշակվեն ռեժիմները, կհայտարարվեն գրաֆիկները, մինչև ջրամատակարարման վերականգնումը: Տիգրան Ավինյանը ցանկացավ ճշտել՝ արդյոք դա այն հատվածն էր, որ Երևանից դուրս էր, ու մի ժամանակ այնտեղ նաև շինաղբ էին թափում: «Այո, դա վերաբերում է Քանաքեռավանին հարող հատվածին, մեկ տարի առաջ այդտեղ լանջ է փլուզվել, փոխել հունը, հիմա մի քիչ ներքև՝ որտեղ Վեոլիան տեղափոխել էր խողովակը, շինաղբով չի պայմանավորված, ուղղակի դրանք սողքային լանջեր են, հիմա շինաշխատանքները պետք է կատարվեն ամբողջ ծավալով. կամ պիտի վերատեղադրվի խողովակը, կամ փոխվի հունը: Մենք Արաբկիր վարչական ղեկավարի հետ այնտեղ կլինենք, կտեղեկացնեմ ընթացքի ու արդյունքների մասին»,- զեկուցեց փոխքաղաքապետ Կամո Արեյանը:

10:50 - 11 մարտի, 2024

«Մայր Հայաստան»-ը դատական հայց է ներկայացրել Տիգրան Ավինյանի դեմ

«Մայր Հայաստան» խմբակցության որոշմամբ՝ Սամվել Հակոբյանը (Երևանի ավագանու «Մայր Հայաստան» խմբակցության անդամ) դատական հայց է ներկայացրել Տիգրան Ավինյանի դեմ: «Բանն այն է, որ քաղաքապետի լիազորությունների ստանձնման ավագանու նիստը քվորում չի ունեցել, ինչը հակասում է օրենսդրական պահանջներին: Սույն գործով Վարչական դատարանում կայանալիք նախնական դատական նիստը տեղի կունենա մարտի 5-ին՝ ժամը 11-ին, ՀՀ վարչական դատարանի Երևանի նստավայրի շենքում (ք. Երևան, Գարեգին Նժդեհի 23, 1-ին հարկ, թիվ 1 նիստերի դահլիճ)»,- հայտնում են «Մայր Հայաստան» խմբակցությունից։

15:48 - 04 մարտի, 2024

Երևանում տեղական ինքնակառավարման մասին օրենքի նոր նախագիծը դրվել է շրջանառության մեջ |armenpress.am|

armenpress.am: Երևանի քաղաքապետարանը շրջանառության մեջ է դրել Երևան քաղաքում տեղական ինքնակառավարման մասին նոր օրենքի նախագիծը։ Այս մասին զեկուցվեց Երևանի քաղաքապետարանի գործակարգավարական խորհրդակցության ժամանակ։ Երևանի քաղաքապետ Տիգրան Ավինյանն ընդգծեց, որ նոր օրենքի նախագծում անդրադարձ կա բոլոր ոլորտներին։ «Նախորդ ժամանակահատվածում հավաքագրված գրեթե բոլոր խնդիրներին անդրադարձ կա, և որոշակի լուծումներ կան։ Այս օրենքի ընդունումից հետո Երևանի ավագանին շատ մեծ անելիք ունի։ Կարծում եմ՝ ժամանակն է, որ Երևանի ավագանու խմբակցությունների հետ խոսենք և քննարկենք հենց ավագանու կողմից ընդունվելիք որոշումները։ Կարծում եմ, որ պետք է հնարավորինս սեղմ ժամկետներում առաջ շարժվենք և ապահովենք նաև կոմունիկացիան կառավարության մեր գործընկերների հետ»,- ասաց Ավինյանը։ Քաղաքապետը Երևանի փոխքաղաքապետ Արմեն Փամբուխչյանին հանձնարարեց հնարավորինս արագ կազմակերպել բոլոր հնարավոր քննարկումները, որպեսզի օրենքի նախագծի ընդունման գործընթացը մաքսիմալ արագ լինի։

12:17 - 04 մարտի, 2024

Կասկադ համալիրի վերին հատվածը վերադարձվել է Երևանին. այնտեղ լայնածավալ ծրագիր կիրականացվի |1lurer.am|

1lurer.am: Երևանին է վերադարձվել Կասկադ համալիրի վերին հատվածը` 11.5 հա տարածքով: Այս մասին հայտարարեց Երևանի քաղաքապետ Տիգրան Ավինյանը: Նա տեղեկացրեց, որ այդ հատվածում շինարարությունը դեռ խորհրդային տարիներից անավարտ է մնացել: «Քաղաքապետարանն առաջիկայում այս հատվածում ևս լայնածավալ ծրագիր կիրականացի, որի արդյունքում համալիրը կներկայանա ամբողջական ու ավարտուն տեսքով»,- տեղեկացրեց նա: Ավինյանը հայտնեց, որ հանդիպել է ֆրանսիացի ճարտարապետ Վիլմոտի հետ, խնդրել Կասկադ այցելել, նրանք համաձայնել են այդ հատվածում տալ անվճար էսքիզային որոշակի լուծումներ, որոնք պետք է քննարկվեն:

10:05 - 04 մարտի, 2024