Հռոմի Պապ

Նիկոլ Փաշինյանը շնորհավորել է Հռոմի Պապ Լևոն XIV-ին՝ ընտրվելու կապակցությամբ

ՀՀ վարչապետ Նիկոլ Փաշինյանը X-ի իր էջում շնորհավորական ուղերձ է հղել Նորին Սրբություն Հռոմի Պապ Լևոն XIV-ին՝ ընտրվելու կապակցությամբ։ «Սրտանց շնորհավորում եմ Նորին Սրբություն Հռոմի Պապ Լևոն XIV-ին ընտրվելու կապակցությամբ։ Այս դժվարին ժամանակներում խաղաղության, կարեկցանքի և ազնվության ձեր ձայնը առավել կարևոր է, քան երբևէ։ Մաղթում եմ ձեզ ուժ և իմաստություն ձեր սուրբ առաքելության մեջ»,– գրել է Փաշինյանը։

10:24 - 10 մայիսի, 2025

ԱՄՆ-ից Ռոբերտ Փրևոստը ընտրվել է նոր պապ

ԱՄՆ-ից Ռոբերտ Փրևոստը ընտրվել է նոր պապ. պատմության մեջ առաջին ամերիկացի պապը կկրի Լեոն XIV անունը։ Այս մասին հայտնում է CNN լրատվականը։ 69-ամյա Փրևոստը ծնվել է Չիկագոյում, Իլինոյս նահանգում։ Միջազգային փորձ ունեցող առաջնորդը երկար տարիներ աշխատել է որպես միսիոներ Հարավային Ամերիկայում և վերջերս ղեկավարել է Վատիկանի ազդեցիկ կառույցներից մեկը՝ եպիսկոպոսների նշանակումների հարցերով զբաղվող դիկաստերիան։ Սպասվում է, որ նա կշարունակի Ֆրանցիսկոս Պապի բարեփոխումների ուղղությունը։ Փրևոստը շուրջ տասը տարի աշխատել է Պերուի Տրուխիլյո քաղաքում, այնուհետև 2014–2023 թվականներին ղեկավարել է Չիկլայոյի եպիսկոպոսությունը։ Վատիկանի լրատվականին տված հարցազրույցում՝ եպիսկոպոսների դիկաստերիայի ղեկավար նշանակվելուց հետո, Փրևոստը նշել էր. «Ես դեռ ինձ միսիոներ եմ համարում։ Իմ կոչումը, ինչպես յուրաքանչյուր քրիստոնյայի, մնում է նույնը՝ լինել միսիոներ և քարոզել Ավետարանը»։

21:27 - 08 մայիսի, 2025

Վատիկանի Սիքստինյան կապելլայի վրայով սպիտակ ծուխ է բարձրացել

Վատիկանի Սիքստինյան կապելլայի վրայով սպիտակ ծուխ է բարձրացել, որը նշանակում է՝ կարդինալները կոնկլավի երկրորդ օրը նոր պապ են ընտրել: Նրա ինքնությունը և այն անունը, որը նա կընդունի որպես պապ, շուտով կբացահայտվի: Լուսանկարը՝ Դեն Քիթվուդ/Getty Images։

21:09 - 08 մայիսի, 2025

Վատիկանում կոնկլավի երկրորդ քվեարկության ժամանակ ևս Հռոմի պապ չի ընտրվել

Վատիկանի Սիքստինյան կապելլայի ծխնելույզից կրկին սև ծուխ է դուրս եկել՝ ազդարարելով, որ կոնկլավում ներգրավված կարդինալներին երկրորդ քվեարկության ընթացքում էլ չի հաջողվել Հռոմի պապ ընտրել: Հրապարակում մարդիկ են հավաքվել՝ հետևելու, թե ծխնելույզից ինչ գույնի ծուխ դուրս կգա։ Հիշեցնենք՝ եթե ծուխը սև է լինում, ուրեմն հաջորդ օրը կրկին քվեարկություն է լինելու, եթե ծխմելույզից սպիտակ ծուխ ելնի, նշանակում է՝ կաթոլիկ եկեղեցին նոր առաջնորդ ունի։ Ապրիլի 21-ին Հռոմի Ֆրանցիսկոս պապի մահվանից հետո կարդինալները կընտրեն 267-րդ պապին։

14:27 - 08 մայիսի, 2025

Վատիկանի Սիկստինյան մատուռի ծխնելույզից սև ծուխ բարձրացավ. Հռոմի պապ չեն ընտրել

Չորեքշաբթի երեկոյան Վատիկանի Սիկստինյան մատուռի ծխնելույզից սև ծուխ բարձրացավ՝ նշանավորելով կարդինալների առաջին անորոշ քվեարկությունը՝ նոր Հռոմի պապ ընտրելու համար։ Այս մասին հայտնում է Reuters լրատվականը։Քվեարկությունն անցկացվել է փակ համագումարի ընթացքում, որի ժամանակ կարդինալները փակվել էին Սիկստինյան մատուռում։ Հիշեցնենք, որ մայիսի 7-ին ամբողջ աշխարհից ավելի քան 130 կարդինալներ հավաքվել են Վատիկանում և փորձում են նոր քահանայապետի ընտրել։

23:07 - 07 մայիսի, 2025

Վատիկանում մեկնարկում է կոնկլավը՝ Հռոմի նոր պապին ընտրելու համար |armenpress.am|

armenpress.am: Ամբողջ աշխարհից ավելի քան 130 կարդինալներ հավաքվել են Վատիկանում և այսօր՝ մայիսի 7-ին, կսկսեն նոր քահանայապետի ընտրության գործընթացը։ Այս մասին հաղորդում է BBC-ն։ Առավոտյան Սուրբ Պետրոսի տաճարում պատարագից հետո, կեսօրին կարդինալները կգնան Սիքստինյան կապելլա, որպեսզի իրենց ձայնը տան նախընտրած թեկնածուին։ Մատուռ մտնելուց հետո կարդինալներն այլևս ոչ մի հաղորդակցություն չեն ունենա արտաքին աշխարհի հետ, մինչև չընտրվի Հռոմի նոր պապ։ Այնուհետև բոլորը կսպասեն այնքան, մինչև Սիքստինյան կապելլայի ծխնելույզից ծուխ դուրս կա։ Եթե ծուխը սև լինի, ուրեմն հաջորդ օրը կրկին քվեարկություն կլինի, իսկ եթե սպիտակ ծուխ ելնի ծխնելույզից, ուրեմն կաթոլիկ եկեղեցին նոր առաջնորդ ունի։ Ապրիլի 21-ին Հռոմի Ֆրանցիսկոս պապի մահվանից հետո կարդինալները կընտրեն 267-րդ պապին։ Լուսանկարը՝ AP photo, 2005թ․, Վատիկան

10:20 - 07 մայիսի, 2025

Ավարտվել է Հռոմի Ֆրանցիսկոս պապի հուղարկավորության արարողությունը |armenpress.am|

armenpress.am: Հռոմի Ֆրանցիսկոս պապի հուղարկավորության արարողությունն ավարտվել է: Պապին հուղարկավորել են Սանտա Մարիա Մաջորե եկեղեցում՝ իր ցանկությամբ: Հուղարկավորության արարողությունը տեղի է ունեցել Սուրբ Պետրոսի հրապարակում: Մասնակցել են տասնյակ երկրների առաջնորդներ՝ ԱՄՆ նախագահ Դոնալդ Թրամփը, Ֆրանսիայի նախագահ Էմանուել Մակրոնը, Ուկրաինայի նախագահ Վոլոդիմիր Զելենսկին և այլք: Հռոմի պապի հուղարկավորության արարողությանը մասնակցել է նաև Հայաստանի նախագահ Վահագն Խաչատուրյանը: Արարողությանը մասնակցել է նաև Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը: 88-ամյա Ֆրանցիսկոս պապը մահացել է սրտի կաթվածից, ապրիլի 21-ի վաղ առավոտյան՝ տեղական ժամանակով առավոտյան ժամը 07:35-ին Վատիկանի Սանտա Մարտայի իր կեցավայրում:

17:55 - 26 ապրիլի, 2025

Տասնյակ հազարավոր մարդիկ հավաքվել են Վատիկանի Սուրբ Պետրոս հրապարակում հրաժեշտ տալու Ֆրանցիսկոս պապին

Տասնյակ հազարավոր մարդիկ հավաքվել են Վատիկանի Սուրբ Պետրոս հրապարակում՝ հրաժեշտ տալու կաթոլիկ եկեղեցու առաջին լատինամերիկացի առաջնորդին՝ Ֆրանցիսկոս պապին։ Շատերը գիշերվանից են հերթ կանգնել՝ Պապին հրաժեշտ տալու համար։ Արարողությանը մասնակցում են նաև աշխարհի առաջնորդներ։ Արգենտինացի պապը, որը մահացել է երկուշաբթի օրը՝ 88 տարեկան հասակում, 12 տարվա պապականության ընթացքում ջանացել է եկեղեցին դարձնել ավելի ներառական։ Մոտ 250,000 մարդ հարգանքի տուրք է մատուցել նրա դագաղին, որը երեք օր դրված էր Սուրբ Պետրոսի տաճարում։ Լուսանկարը՝ Andrew Medichini/AP Photo։

11:42 - 26 ապրիլի, 2025

Ամենայն Հայոց Կաթողիկոսը ցավակցագիր է հղել Հռոմի Ֆրանցիսկոս պապի մահվան կապակցությամբ

Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը ցավակցագիր է հղել Հռոմի Սրբազան Քահանայապետ Ֆրանցիսկոս պապի մահվան կապակցությամբ։ Այս մասին հայտնում է Մայր Աթոռի տեղեկատվական համակարգը։ «Երջանկահիշատակ Ֆրանցիսկոս Պապը խոնարհ, քաջ ու բարի հովիվ էր, որ հավատարմորեն քայլում էր մեր Տեր Հիսուս Քրիստոսի հետքերով։ Նա ստանձնեց պապական բարձր ու պատասխանատու առաքելությունը դժվարին ժամանակներում և վկայեց Ավետարանը՝ մշտապես պաշտպան լինելով արդարության ու խաղաղության, առանձնակի ուշադրություն ու խնամք բերելով կարիքավորներին, ինչպես նաև՝ իր կարևոր ներդրումը բերելով միջեկեղեցական հարաբերությունների զորացմանը։ ․․․Առանձնակի մխիթարությամբ ենք անդրադառնում, որ Սրբազան Պապը մշտապես իր աղոթքն էր հնչեցնում պատերազմներով և անարդարությամբ վիրավորված աշխարհի, ի մասնավորի արցախյան պատերազմի ծանր հետևանքները կրող մեր ժողովրդի համար», - ասված է Վեհափառ Հայրապետի ցավակցագրում։ Նորին Սրբությունն ընդգծել է, որ հայ ժողովուրդը երախտագիտությամբ է հիշելու Հայոց Ցեղասպանության 100-րդ տարելիցի առիթով Սուրբ Պետրոսի տաճարում մատուցված Սուրբ Պատարագը, Սուրբ Գրիգոր Նարեկացու հռչակումը որպես Տիեզերական Եկեղեցու Վարդապետ, ինչպես և Սրբազան Քահանայապետի այցը Հայաստան։ Ամենայն Հայոց Կաթողիկոսն իր աղոթքն է վերառաքել առ Աստված երջանկահիշատակ Սրբազան Պապի հոգու հանգստության և խաղաղության, ինչպես և ողջ Կաթոլիկ Եկեղեցու հոգևոր դասի և հավատացելոց մխիթարության համար։

14:21 - 22 ապրիլի, 2025

Վատիկանը հրապարակել է Հռոմի պապի կտակը․ նա խնդրում է իրեն հուղարկավորել Մարիա Մաջորե բազիլիկում՝ առանց որևէ հատուկ զարդարանքի |factor.am|

factor.am: Վատիկանը հրապարակել է Հռոմի Ֆրանցիսկոս պապի՝ 2022 թվականի հունիսի 29-ով թվագրվող կտակը, որում ցուցումներ են նրա թաղման վերաբերյալ որպես Պապական մեծ բազիլիկ հայտնի Սանտա Մարիա Մաջորե տաճարում։ Ֆրանցիսկոս պապ կտակում հայտնել է վերջին ցանկությունները, որոնք վերաբերում են միայն թաղման վայրին։ Նա խնդրել է, որ իր գերեզմանը պատրաստվի Պողոսյան մատուռի (Salus Populi Romani մատուռ) և Բազիլիկի Սֆորցա մատուռի միջև գտնվող կողային միջանցքի թաղման խորշում, ինչպես ցույց է տրված կից հատակագծում։ Դամբարանը պետք է լինի գետնի վրա, պարզ, առանց որևէ հատուկ զարդարանքի, միայն մեկ գրությամբ՝ Ֆրանցիսկոս։

10:53 - 22 ապրիլի, 2025

Արարատ Միրզոյանը ցավակցել է Հռոմի պապի մահվան կապակցությամբ |armenpress.am|

armenpress.am: Հայաստանի արտաքին գործերի նախարար Արարատ Միրզոյանը ցավակցություն է հայտնել Հռոմի Ֆրանցիսկոս պապի մահվան կապակցությամբ։ Այս մասին Արարատ Միրզոյանը նշել է X-ի իր միկրոբլոգում կատարած գրառման մեջ։ «Ես միանում եմ ամբողջ աշխարհի մարդկանց, որոնք սգում են Հռոմի պապ Ֆրանցիսկոսի մահը: Նա բազմաթիվ հայերի սրտերը միավորեց հայկական ժառանգության ճանաչմամբ, մարդասիրական գործին նվիրվածությամբ և անջնջելի հիշողություն թողեց 2016 թվականին Հայաստան կատարած իր այցից։ Թող նրա ժառանգությունն առաջնորդի մեզ դեպի ավելի խաղաղ աշխարհ, ինչպես արտահայտվել է նրա՝ Զատկի առթիվ վերջին ուղերձում»,-նշված է ՀՀ ԱԳ նախարարի գրառման մեջ:

16:45 - 21 ապրիլի, 2025

Խորապես վշտացած եմ Հռոմի Ֆրանցիսկոս պապի մահվան կապակցությամբ․ Նիկոլ Փաշինյան

Խորապես վշտացած եմ Հռոմի Ֆրանցիսկոս պապի մահվան կապակցությամբ։ Այս մասին ասված է ՀՀ վարչապետ Նիկոլ Փաշինյանի՝ «X»-ում կատարած գրառման մեջ։ «Նորին Սրբության ակնառու առաջնորդությունը՝ դեպի խաղաղ և արդար աշխարհ, չի կարող մոռացության մատնվել: Ցավակցում եմ աշխարհի բոլոր հավատացյալներին այս մեծ կորստի համար», - ասվում է գրառման մեջ։

16:11 - 21 ապրիլի, 2025

Մահացել է Հռոմի Ֆրանցիսկոս պապը

Հռոմի Ֆրանցիսկոս պապը մահացել է: Այս մասին տեղեկանում ենք Vatican News-ի X-ի էջից: «Հռոմի Ֆրանցիսկոս պապը մահացել է Զատկի առավոտյան՝ երկուշաբթի օրը՝ 2025թ. ապրիլի 21-ի առավոտյան: Նա մահացել է Վատիկանի Կասա Սանտա նստավայրում»,- նշվում է հաղորդագրությունում: Ֆրանցիսկոս պապը 88 տարեկան էր: Հիշեցնենք, որ Հռոմի Պապը ս.թ. փետրվարի 14-ին տեղափոխվելկ էր Ջեմելի հիվանդանոց է, քանի օր շնչառության հետ կապված դժվարություններ էր ունեցել, դրանից հետո նրա մոտ երկկողմ թոքաբորբ էր ախտորոշվել: Նա հիվանդանոցից դուրս էր գրվել ընդամենը մեկ ամիս առաջ. նա բուժում էր ստանում թոքաբորբից։ Կիրակի օրը՝ մահվանից մեկ օր առաջ, Ֆրանցիսկոսը Վատիկանի Սուրբ Պետրոս տաճարի պատշգամբից շնորհավորել է կաթոլիկներին Զատիկի կապակցությամբ:

12:07 - 21 ապրիլի, 2025

Հռոմի պապը այսօր խաղաղության կոչ է արել Հայաստանին ու Ադրբեջանին |azatutyun.am|

azatutyun.am: Հռոմի պապը այսօր Սուրբ Հարության ուղերձում խաղաղության կոչ է արել Հայաստանին ու Ադրբեջանին։ «Տոնական այս օրը եկեք հիշենք Հարավային Կովկասն ու աղոթենք, որ Հայաստանի ու Ադրբեջանի միջև վերջնական խաղաղության համաձայնագիրը շուտով ստորագրվի ու իրագործվի՝ ճանապարհ հարթելով տարածաշրջանում երկար սպասված հաշտության համար»,- ասել է Կաթոլիկ եկեղեցու հովվապետը։ Սուրբ Պետրոսի հրապարակից հղած ուղերձում Ֆրանցիսկոս պապը նաև իր զորակցությունն է հայտնել Իսրայելին, միաժամանակ ընդգծել Գազայի ժողովրդի տառապանքները՝ կոչ անելով հակամարտող կողմերին հրադադար հաստատել և ազատ արձակել գերիներին։ Հիշատակելով մոլորակի այլ հատվածներում շարունակվող հակամարտությունները՝ Հռոմի պապը դիմել է քաղաքական առաջնոդներին՝ կարիքավորներին օգնելու, խաղաղություն տարածելու խնդրանքով։

10:06 - 21 ապրիլի, 2025

Ֆրանցիսկոս պապը փետրվարի 14-ից հետո առաջին անգամ ներկայացել է Վատիկանի Սուրբ Պետրոս հրապարակում |armenpress.am|

armenpress.am: Սուրբ Պետրոս հրապարակում Հիվանդների ու առողջապահական գործիչների հոբելյանական սուրբ պատարագի ավարտին, որը մատուցել է Գերապ. Ռինո Ֆիզիքելլան՝ կարդալով այս առիթով Սրբազան Պապի պատրաստած քարոզը, Նորին Սրբությունը անակնկալ կերպով ներկայացել է հրապարակ՝ նախքան վերջին օրհնությունը։ Vaticannews-ը տեղեկացնում է, որ Հռոմի պապը Սուրբ Պետրոս հրապարակում զետեղված ամբիոնից պատարագիչ Գերապայծառի հետ միասին բոլոր ներկաներին շնորհել է իր առաքելական օրհնությունը, ապա տկար, բայց հստակ ձայնով բոլորին մաղթել բարի կիրակի։ «Բարի կիրակի բոլորիդ և շնորհակալություն», - ասել է Սրբազան Պապը, և, հասկանալով, որ իր առաջին ողջույնի խոսքը լսելի չէ եղած բոլորին, մեկ անգամ ևս կրկնեց իր ողջույնը, մինչ Սուրբ Պետրոս հրապարակում գտնվող հազարավոր հավատացյալները հուզումնալից ծափահարությամբ ընկալել են Քահանայապետին ու նրա ողջույնի խոսքերը։ Այս առաջին անգամն էր, որ Նորին Սրբությունը փետրվարի 14-ից հետո հայտնվել է Սուրբ Պետրոս հրապարակում և խոսք ուղղել հավատացյալներին։ Հունվարին Ֆրանցիսկոս պապը հիվանդացել էր բրոնխիտով. փետրվարի 14-ին նրան տեղափոխել են Հռոմի «Gemelli» կլինիկա, քանի որ հիվանդությունը քրոնիկ էր դարձել։ Ռենտգենից և լաբորատոր հետազոտություններից հետո քահանայապետի մոտ հայտնաբերվել էր նաև երկկողմանի թոքաբորբ։ Հռոմի Ֆրանցիսկոս պապը 88 տարեկան է:

10:01 - 07 ապրիլի, 2025

Հռոմի պապի որոշմամբ՝ Հայոց ցեղասպանության նահատակ Երանելի Իգնատիոս Մալոյանը կսրբադասվի |armenpress.am|

armenpress.am: Հռոմի Ֆրանցիսկոս Պապի որոշմամբ՝ երեք երանելիներ, այդ թվում՝ Հայոց ցեղասպանության ժամանակ նահատակված հայ կաթոլիկ արքեպիսկոպոս Երանելի Իգնատիոս Շուքրալահ Մալոյանը կսրբադասվեն։ Այս մասին հայտնում է Վատիկանի տեղեկատվական կայքը՝ մանրամասնելով, որ կսրբադասվեն նաև Երկրորդ համաշխարհային պատերազմի ժամանակ սպանված Պապուա Նոր Գվինեայի աշխարհական կաթողիկոսը և վենեսուելացի կրոնական մի քույր, որը իր կյանքը նվիրել է կրթությանը և աղքատներին։ Աղբյուրի փոխանցմամբ՝ այս որոշումը Հռոմի Ֆրանցիսկոս պապը կայացրել է մարտի 28-ին։ Երանելի Իգնատիոս Մալոյանը ծնվել է 1869 թվականի ապրիլի 19-ին, ներկայիս Թուրքիայի Մարդին քաղաքում։ 14 տարեկանում նա մտել է Լիբանանի Զմմաու վանքի կղերական միաբանություն և ձեռնադրվել է 1896 թվականին՝ ստանալով Իգնատիուս անունը։ Նա Ալեքսանդրիայում փայլել է իր քարոզներով ինչպես արաբերենով, այնպես էլ թուրքերենով։ Այնուհետև նշանակվել է Կահիրեի Պատրիարքական փոխանորդ, բայց դրան հաջորդող տարում վերադարձել է Ալեքսանդիա՝ տեսողական խնդիրների պատճառով։ 1911 թվականին նշանակվել է Մարդինի Պատրիարքական Փոխանորդ։ Հայոց ցեղասպանության ժամանակ նա ձերբակալվել է տասնյակ քրիստոնյաների հետ և բերվել դատարան: Երբ նրան ասել են, որ կյանքը կարող են խնայել իսլամ ընդունելու պարագայում, Իգնատիոս Շուքրալահ Մալոյանը հայտարարել է. «Մենք երբեք անհավատարիմ չենք եղել պետությանը… բայց, եթե դուք մեզ խնդրում եք անհավատարիմ լինել մեր կրոնին, դա երբեք չի լինելու»: Դրանից հետո նրան խոշտանգել են և կարճ ժամանակ անց մահապատժի են ենթարկել։ Նա երանելի է հռչակվել է Սուրբ Հովհաննես Պողոս II պապի կողմից 2001 թվականին։

16:23 - 01 ապրիլի, 2025