Հաշվեքննիչ պալատ

Արտաքին պետական վերահսկողություն իրականացնող Հաշվեքննիչ պալատը հիմնադրվեց 1996թ. մայիսի 29-ին:

ՀՀ Ազգային ժողովի վերահսկիչ պալատի խնդիրներն էին` իրականացնել բազմակողմանի եւ մասնագիտական վերահսկողություն պետական եկամուտների եւ միջոցների արդյունավետ ծախսման նկատմամբ՝ ապահովելով դրանց օգտագործման թափանցիկությունը: ՀՀ ԱԺ վերահսկիչ պալատի մյուս կարեւորագույն գործառույթը ԱԺ ներկայացված հաշվետվությունների վերլուծությունն էր:

Հայաստանի վերահսկիչ պալատը ձեւավորվել էր Ազգային ժողովի կողմից եւ հաշվետու էր երկրի օրենսդիր մարմնին: Պալատը Ազգային ժողով էր ներկայացնում կիսամյակային տեղեկանքներ, վերահսկողության վերաբերյալ ընթացիկ հաշվետվություններ, պալատի գործունեության տարեկան ծրագիրն ու հաշվետվությունը` հրապարակային դարձնելով իր ուսումնասիրության արդյունքները:

2018 թվականի հունվարի 16-ին Ազգային ժողովն ընդունեց «Հաշվեքննիչ պալատի մասին» ՀՀ օրենքը, որը ուժի մեջ մտավ 2018 թվականի ապրիլի 9-ին: Հաշվեքննիչ պալատը կազմված է նախագահից եւ 6 անդամից:

Գագիկ Բարսեղյանն ընտրվեց Հաշվեքննիչ պալատի անդամ |news.am|

news.am: Գագիկ Բարսեղյանն ընտրվեց Հաշվեքննիչ պալատի անդամ: Նրա թեկնածութունն առաջադրել էր ԱԺ «Քաղաքացիական պայմանագիր» խմբակցությունը: ԱԺ 107 պատգամավորից քվեարկությանը մասնակցել են 72-ը: Ձայները բաշխվել են հետևյալ կերպ՝ կողմ 67, դեմ 5: Նշենք, որ Բարսեղյանը 2016 թվականից ՀՀ ԱԺ բյուջետային գրասենյակի համակարգող փորձագետ է:

12:45 - 17 հունվարի, 2023

Հաշվեքննիչ պալատի անդամի պաշտոնում առաջադրվել է Գագիկ Բարսեղյանի թեկնածությունը |1lurer.am|

1lurer.am: Ազգային ժողովի ֆինանսավարկային և բյուջետային հարցերի հանձնաժողովը Հաշվեքննիչ պալատի անդամի պաշտոնի համար ԱԺ-ին է առաջարկել «Քաղաքացիական պայմանագիր» խմբակցության կողմից առաջադրված Գագիկ Բարսեղյանի թեկնածությունը: Բարսեղյանը 2016 թվականից ՀՀ ԱԺ բյուջետային գրասենյակի համակարգող փորձագետ է: «Ցանկանում եմ վստահեցնել, որ, հիմնվելով իմ գիտելիքների, փորձի և հմտությունների վրա, պատրաստ եմ առավելագույնս ներգրավվել բոլոր այն աշխատանքներում, որոնք կնպաստեն ՀՀ-ում միջազգային չափորոշիչներին համապատասխան բարձրագույն աուդիտորական մարմին ունենալուն»,- ասաց Բարսեղյանը:

11:31 - 17 հունվարի, 2023

Կորոնավիրուսի համար հատկացված միջոցների յուրացման փաստով քրեական գործ է հարուցվել |civilnet.am|

civilnet.am: Հայաստանի Հակակոռուպցիոն կոմիտեում քրեական գործ է հարուցվել կորոնավիրուսի դեմ պայքարի շրջանակում կատարված ծախսերի հետ կապված․ այդ մասին հայտնեցին Գլխավոր դատախազությունից։ Քրեական գործ հարուցվել է՝ հաշվի առնելով ֆինանսների նախարարության համապատասխան ստուգումներն ու Հաշվեքննիչ պալատի վերջին հաշվեքննությունը։ Անցյալ ամիս Հաշվեքննիչ պալատը հանդես էր եկել կորոնավիրուսի համար հատկացված ծախսերի աղմկոտ հաշվեքննությամբ։ Դրանով պարզվել էր, որ կորոնավիրուսի կանխարգելման շրջանակում առանց ծախսային հիմնավորումների ու հաշվետվությունների գումարների վերաբաշխումներ են եղել, որոշ դեպքերում պացիենտի բուժման ծախսերը եղել են ուռճացված, գնումները հիմնականում իրականացվել են մեկ անձից գնման ընթացակարգով և այլն, տարբեր բժշկական կենտրոններում էլ ծախսերը իրականացվել են խեղաթյուրումներով։ Ինչպես ՍիվիլՆեթի գրավոր հարցմանն ի պատասխան հայտնեցին դատախազությունից, վարչապետի հանձնարարականի համաձայն, դատախազության պետական շահերի պաշտպանության վարչությունը ստացել ու ուսումնասիրել է առողջապահության նախարարությունում կորոնավիրուսի բուժման գործընթացի վերաբերյալ իրականացրած ստուգման, հաշվեքննության ակտերը։ Դրա արդյունքում դատախազությունը Հակակոռուպցիոն կոմիտեին հանձնարարել է նյութեր նախապատրաստել։ Մայիսի 23-ին Հակակոռուպցիոն կոմիտեում հարուցվել է քրեական գործ՝ յուրացման կամ վատնման, ինչպես նաև պաշտոնեական լիազորությունների չարաշահման ու պաշտոնեական կեղծիք կատարելու հատկանիշներով։ Հունիսի 10-ին Ազգային ժողովում քննարկում էր կայացել պատգամավորների և Հաշվեքննիչ պալատի ներկայացուցիչների միջև։ «Քաղաքացիական պայմանագրի» պատգամավորները պարզաբանումներ էին պահանջում Հաշվեքննիչ պալատի նախագահից Ատոմ Ջանջուղազյանից՝ առողջապահության նախարարության կողմից համավարակի ժամանակ տեղի ունեցած խախտումների բարձրաձայնման համար։

16:17 - 14 հունիսի, 2022

Ատոմ Ջանջուղազյանն ընտրվեց Հաշվեքննիչ պալատի նախագահ |civilnet.am|

civilnet.am: Մարտի 2-ի նիստում Ազգային ժողովը Հաշվեքննիչ պալատի նախագահ ընտրեց ֆինանսների նախկին նախարար Ատոմ Ջանջուղազյանին։ 107 պատգամավորից ընտրությանը մասնակցել է 70-ը։ Բոլորն էլ կողմ են քվեարկել Ջանջուղազյանի թեկնածությանը։ Ատոմ Ջանջուղազյանը սովորել է Երեւանի պետական ճարտարագիտական համալսարանում, տեխնիկական գիտությունների թեկնածու է: 2018-2021 թթ․ Ատոմ Ջանջուղազյանը զբաղեցրել է ֆինանսների նախարարի պաշտոնը։Հաշվեքննիչ պալատի նախկին նախագահ Լևոն Յոլյանը 2022-ի հունվարի 19-ին հրաժարականի դիմում էր ներկայացրել։

15:31 - 02 մարտի, 2022

ԱԺ-ն մարտի 1-ի հերթական նիստի ավարտից հետո կանցկացնի լրացուցիչ նիստ |armenpress.am|

armenpress.am: ՀՀ ազգային ժողովը մարտի 1-ին ժամը 18:30-ից մինչև 20:00-ն կանցկացնի լրացուցիչ նիստ: Մարտի 1-ի հերթական նիստում «Քաղաքացիական պայմանագիր» խմբակցության ղեկավար Հայկ Կոնջորյանն ԱԺ կանոնակարգ օրենքի համաձայն առաջարկեց մարտի 1-ին ժամը 18:30-20:00-ն ավելացնել ևս մեկ նիստ: Նա խնդրեց առաջարկը դնել քվեարկության: Մարտի 1-ի չորրորդ հերթական նիստից հետո մեկ լրացուցիչ նիստ անցկացնելու վերաբերյալ ԱԺ որոշման նախագիծը քվեարկությամբ ստացավ 59 կողմ, 10 դեմ, 1 ձեռնպահ ձայներ: Խորհրդարանն այժմ քննարկում է Հաշվեքննիչ պալատի հանձնաժողովի նախագահի պաշտոնում Ատոմ Ջանջուղազյանի թեկնածության հարցը: Ժամը 16:30-ից մինչև 18:00-ն ԱԺ-ում հայտարարությունների ժամ է:

16:12 - 01 մարտի, 2022

ԱԺ հանձնաժողովը դրական եզրակացություն տվեց Հաշվեքննիչ պալատի նախագահի պաշտոնում Ջանջուղազյանի թեկնածությանը |1lurer.am|

1lurer.am: ՀՀ ազգային ժողովի ֆինանսավարկային և բյուջետային հարցերի մշտական հանձնաժողովն արտահերթ նիստում հավանություն տվեց Հաշվեքննիչ պալատի նախագահի պաշտոնում Ատոմ Ջանջուղազյանի թեկնածությանը: «Համոզված եմ, որ համատեղ աշխատանքի ընթացքում մեզ կհաջողվի մեր բոլոր պետական ինստիտուտներին բարձրացնել այլ կայացման աստիճանի և փոխել մեր պետության դիրքը համաշխարհային իրականության մեջ»,- ասաց Ատոմ Ջանջուղազյանը: Ջանջուղազյանի թեկնածության հարցը կքննարկվի ԱԺ լիագումար նիստում:

13:49 - 14 փետրվարի, 2022

Հաշվեքննիչ պալատի նախագահի թափուր պաշտոնի համար ներկայացվել է Ատոմ Ջանջուղազյանի թեկնածությունը |1lurer.am|

1lurer.am: Հաշվեքննիչ պալատի նախագահի թափուր պաշտոնի համար ԱԺ «Քաղաքացիական պայմանագիր» խմբակցությունը ներկայացրել է ֆինանսների նախկին նախարար Ատոմ Ջանջուղազյանի թեկնածությունը: Ջանջուղազյանի թեկնածության հարցը քննարկվում է ԱԺ ֆինանսավարկային և բյուջետային հարցերի մշտական հանձնաժողովի արտահերթ նիստի ընթացքում: Ջանջուղազյանն իր խոսքում խոսեց հաշվեքննիչ մարմինների գործառույթների և առաքելության մասին: «Հանրային հարստության, ունեցվածքի կառավարման գործընթացի նկատմամբ պահանջարկը ծագել է այն ժամանակ, երբ հանրությունը հայտարարել է իր մտադրությունը՝ ինքնիշխան ու ժողովրդավարական հիմքով ունենալ պետություն, այդ թվում նաև Հայաստանը բացառություն չէ: Բարձրագույն հաշվեքննիչ մարմինները ձևավորվել են հենց այս տրամաբանությամբ, եկել են բավարարելու այս պահանջարկը»,- ասաց Ջանջուղազյանը: Նրա խոսքով՝ Հաշվեքննիչ պալատում ներքին հսկողության համակարգ պետք է գործի՝ հակակշիռների և զսպումների մեխանիզմ: «Այն դեպքում, երբ պետական ծառայողը, մասնավորապես Հաշվեքննիչ պալատի աշխատակիցը կունենա այնպիսի գիտակցություն, որ բացառիկ շահը հանրային պետական շահն է, կունենա բավարար կարողություն և ցանկություն՝ ծառայելու այդ շահին, վստահաբար կունենանք հաջողություն»,- ասաց Ջանջուղազյանը:

12:56 - 14 փետրվարի, 2022

ՔՊ–ն Հաշվեքննիչ պալատի նախագահի պաշտոնում առաջադրել է Ատոմ Ջանջուղազյանի թեկնածությունը

Հունվարի 31-ին կայացել է «Քաղաքացիական պայմանագիր» խմբակցության նիստ, որի ընթացքում որոշում է կայացվել Հաշվեքննիչ պալատի նախագահի պաշտոնում առաջադրել Ատոմ Ջանջուղազյանի թեկնածությունը։ Այս մասին տեղեկացնում է «Քաղաքացիական պայմանագիր» խմբակցության ֆեյսբուքյան էջը։

19:07 - 31 հունվարի, 2022

ԱԺ նախագահը ստորագրել է Հաշվեքննիչ պալատի նախագահի լիազորությունները դադարած համարելու մասին արձանագրությունը

13:07 - 27 հունվարի, 2022

ԱԺ-ն Հաշվեքննիչ պալատի անդամի պաշտոնում ընտրեց Եղիշե Սողոմոնյանին |armenpress.am|

armenpress.am: ՀՀ ազգային ժողովը փակ գաղտնի քվեարկությամբ Հաշվեքննիչ պալատի անդամի պաշտոնում ընտրեց Եղիշե Սողոմոնյանին: Սողոմոնյանի թեկնածությունն առաջարկել էր «Քաղաքացիական պայմանագիր» խմբակցությունը: Եղիշե Սողոմոնյանի թեկնածությանը կողմ էր քվեարկել 68 պատգամավոր, դեմ՝ 24-ը: Քվեարկությանը մասնակցել էր 92 պատգամավոր:

10:23 - 09 դեկտեմբերի, 2021

ՔՊ-ն Հաշվեքննիչ պալատի անդամի թեկնածու է առաջադրել Եղիշե Սողոմոնյանին

«Քաղաքացիական պայմանագիր» խմբակցությունը Հաշվեքննիչ պալատի անդամի թեկնածու է առաջադրել Եղիշե Սողոմոնյանին: Թեկնածուի կենսագրությունը ներկայացրեց ԱԺ ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանը:

15:08 - 02 դեկտեմբերի, 2021

Հաշվեքննիչ պալատի անդամի թեկնածուն չէր ներկայացրել. ԱԺ հանձնաժողովի նիստը հետաձգվեց |armenpress.am|

armenpress.am: ՀՀ ազգային ժողովի ֆինանսավարկային և բյուջետային հարցերի մշտական հանձնաժողովի նիստը հետաձգեց, որում ընդգրկված էր Հաշվեքննիչ պալատի անդամի տեղի համար Եղիշե Սողոմոնյանի թեկնածության քննարկման հարցը: Եղիշե Սողոմոնյանի թեկնածությունը ներկայացրել է «Քաղաքացիական պայմանագիր» խմբակցությունը: Հանձնաժողովի նախագահ Գևորգ Պապոյանը նիստի մեկնարկին ասաց. «Քանի որ Եղիշե Սողոմոնյանն առողջական խնդիրների պատճառով նիստից բացակայում է, և թեկնածուին հնարավոր չէ հարցեր տալ, հետևաբար նիստը հետաձգվում է»: Այս հարցի քննարկման համար ավելի ուշ կհրավիրվի արտահերթ նիստ:

11:33 - 18 հոկտեմբերի, 2021

Պաշտպանության նախարարությունում այժմ իրականացվում է հաշվեքննություն․ Լևոն Յոլյան

Բոլոր ոլորտներն էլ կարևոր են․ ոստիկանություն, սոցապ, հիմա Պաշտպանության նախարարությւոնում ենք ուսումնասիրություն անում։ Այս մասին այսօր Ազգային ժողովում լրագրողների հետ զրույցում ասաց հաշվեքննիչ պալատի նախագահ Լևոն Յոլյանը՝ անդրադառնալով իրենց կողմից ուսումնասիրվող ոլորտներին։ «Պաշտպանության նախարարությունում այժմ իրականացվում է հաշվեքննություն և՛ գաղտնի մասով, և՛ ոչ գաղտնի մասով, տարվա վիճակից ելնելով՝ չենք հասցրել անցած տարի վերջացնել։ Ամենայն հավանականությամբ՝ առողջապահություն, պաշտպանության, պետական եկամուտների կոմիտեում մոտակա ամիսների ընթացքում կլինեն վերջնական հաշվեքննության արդյունքները»,–ասաց նա։ Ինչ վերաբերում է նրան, որ Արսեն Թորոսյանը, երբ առողջապահության նախարար է, դիմել է պալատին, որպեսզի կորոավիրուսով պայմանավորված գնումները չուսումնասիրել, իսկ այնուհետև պատճառաբանել է պատերազմով և կրկին դիմել է, որ չստուգեն, ներկայումս նման հետաձգման դիմո՞ւմ է եղել կառավարությունից, Լևոն Յոլյանն ասաց, որ առաջին նամակը մայիս կամ հունիս ամիսներին է եղել։ Շարունակությունը՝ tert.am-ում։

18:21 - 09 հունիսի, 2021

Գեղամ Հովեյանն ընտրվեց Հաշվեքննիչ պալատի անդամ |armenpress.am|

armenpress.am: ՀՀ ազգային ժողովում կայացած փակ և գաղտնի քվեարկության արդյունքում Գեղամ Հովեյանն ընտրվեց Հաշվեքննիչ պալատի անդամ: Քվեարկության արդյունքները ներկայացրեց Հաշվիչ հանձնախմբի նախագահ Վահագն Հովակիմյանը: «Քվեարկությանը մասնակցել է 98 պատգամավոր, քվեաթերթիկներից անվավեր է ճանաչվել 1-ը: Ձայները բաշխվել են հետևյալ կերպ` 95 «կողմ» և 2«դեմ»»,- ասաց Հովակիմյանը: Գեղամ Հովեյանի թեկնածությունն առաջադրել էր «Իմ քայլը» խմբակցությունը:

16:25 - 07 մայիսի, 2021

Խորհրդարանը քննարկում է Հաշվեքննիչ պալատի անդամի պաշտոնում Գեղամ Հովեյանի ընտրության հարցը |armenpress.am|

armenpress.am: ՀՀ ազգային ժողովը քննարկում է Հաշվեքննիչ պալատի անդամի պաշտոնում Գեղամ Հովեյանի ընտրության հարցը: Թեկնածությունն առաջադրել է «Իմ քայլը» խմբակցությունը: «Իմ քայլը» խմբակցության և խորհրդարանի Ֆինանսավարկային և բյուջետային հարցերի մշտական հանձնաժողովի անդամ Կարեն Գրիգորյանը ներկայացրեց Գեղամ Հովեյանի համառոտ կենսագրությունը: Գեղամ Հովեյանը ծնվել է 1975թ. մարտի 1-ին, Մարտունու շրջանի Վարդենիկ գյուղում: Ամուսնացած է, ունի երեք զավակ: Ավարտել է Երևանի պետական ժողովրդական տնտեսության ինստիտուտը: 2005-2007թթ. սովորել է Պետական կառավարման ակադեմիայի Հանրային կառավարման բաժնում, ունի մագիստրոսի կոչում: Աշխատանքային գործունեության ընթացքում Ֆինանսների և էկոնոմիկայի նախարարություններում, ինչպես նաև Վերահսկիչ և Հաշվեքննիչ պալատներում զբաղեցրել է տարբեր բարձր պաշտոններ: Գեղամ Հովեյանն արժանացել է նաև մի շարք պարգևների:

11:39 - 07 մայիսի, 2021

Հաշվեքննիչ պալատի անդամի պաշտոնում առաջադրվել է Գեղամ Հովեյանի թեկնածությունը |armenpress.am|

armenpress.am: Ազգային ժողովի «Իմ քայլը» խմբակցությունը Հաշվեքննիչ պալատի անդամի թափուր տեղի համար առաջադրել է Գեղամ Հովեյանի թեկնածությունը: Հովեյանի թեկնածությունը խորհրդարանի Ֆինանսավարկային և բյուջետային հարցերի մշտական հանձնաժողովի նիստում ներկայացրեց խմբակցության պատգամավոր Կարեն Գրիգորյանը: «Պարոն Հովեյանը ծնվել է 1975 թ. մարտի 1-ին, Մարտունու շրջանի Վարդենիկ գյուղում: Ամուսնացած է, ունի երեք զավակ: Ավարտել է Երևանի պետական ժողովրդական տնտեսության ինստիտուտը: 2005-2007թթ. սովորել է Պետական կառավարման ակադեմիայի Հանրային կառավարման բաժնում, ունի մագիստրոսի կոչում»,- նշեց Գրիգորյանը՝ հավելելով, որ աշխատանքային գործունեության ընթացքում Գեղամ Հովեյանը Ֆինանսների և էկոնոմիկայի նախարարություններում, ինչպես նաև Վերահսկիչ և Հաշվեքննիչ պալատներում զբաղեցրել է տարբեր բարձր պաշտոններ: Գեղամ Հովեյանն արժանացել է նաև մի շարք պարգևների:

11:54 - 10 մարտի, 2021