Ֆինլանդիա

Արմեն Գրիգորյանը Ֆինլանդիայում ԵԱՀԿ ԽՎ նախագահի հետ հանդիպմանը կարևորել է կառույցի դերը երկրների միջև խաղաղության հաստատման գործընթացում

Ապրիլի 10-ին ՀՀ ԱԽ քարտուղար Արմեն Գրիգորյանը Ֆինլանդիա այցի ընթացքում աշխատանքային նախաճաշ է ունեցել Ֆինլանդիայի պառլամենտի պատգամավոր, արտաքին գործերի հանձնաժողովի նախագահ Կիմմո Կիլյունենի և ՀՀ հարցերով ԵԽԽՎ զեկուցող, ԵԱՀԿ խորհրդարանական վեհաժողովի նախագահ Պիա Կաումայի հետ: Մասնակիցները քննարկել են Հայաստանում ժողովրդավարական բարեփոխումների իրականացման գործընթացը, ՀՀ-ԵՄ հարաբերություններն ու դրանց ավելի սերտացումը տարբեր ոլորտներում, ինչպես նաև Հայաստան-Ֆինլանդիա համագործակցային հարաբերությունները: Հանդիպման մասնակիցները կարևորել են ԵԱՀԿ Խորհրդարանական վեհաժողովի դերը երկրների միջև խաղաղության հաստատման գործընթացում:

15:09 - 10 ապրիլի, 2024

ԱԽ քարտուղարը Ֆինլանդիայի ԱԳՆ-ում քննարկմանը ներկայացրել է ՀՀ արտաքին քաղաքականությունը

ՀՀ ԱԽ քարտուղար Արմեն Գրիգորյանը Ֆինլանդիա կատարած աշխատանքային այցի ընթացքում կլոր-սեղան քննարկում է անցկացրել Ֆինլանդիայի Արտաքին գործերի նախարարությունում: Այս մասին տեղեկացնում են ԱԽ գրասենյակից: Քննարկմանն ԱԽ քարտուղարը ներկայացրել է ՀՀ արտաքին քաղաքականությունը, ՀՀ-ԵՄ հարաբերությունների զարգացումը, ապրիլի 5-ի ՀՀ-ԵՄ-ԱՄՆ հանդիպման մանրամասները և պատասխանել ներկաների հարցերին:

16:56 - 09 ապրիլի, 2024

Բրյուսելում կայացել է Հայաստանի և Ֆինլանդիայի վարչապետների հանդիպումը

Բրյուսելում կայացել է Հայաստանի և Ֆինլանդիայի վարչապետներ Նիկոլ Փաշինյանի և Պետեր Օրփոյի հանդիպումը: Այս մասին հայտնում են ՀՀ վարչապետի աշխատակազմից։ Անդրադարձ է կատարվել Հայաստանի և Ֆինլանդիայի միջև երկկողմ համագործակցության հարցերին։ Զրուցակիցները մտքեր են փոխանակել Հայաստանի և Եվրոպական միության միջև համապարփակ գործընկերության օրակարգի, ընդլայնման և փոխգործակցության խորացման հեռանկարների շուրջ։ Երկուստեք կարևորվել են վերջին տարիներին Հայաստանում իրականացվող ժողովրդավարական բարեփոխումներն ու ժողովրդավարական ինստիտուտների ամրապնդմանը միտված հայեցակարգերն ու իրականացվող ծրագրերը։ ՀՀ վարչապետը ներկայացրել է ՀՀ կառավարության կողմից մշակված «Խաղաղության խաչմերուկ» նախագիծը՝ որպես տնտեսական փոխկապակցվածության ապահովման և Հարավային Կովկասում խաղաղության կարևոր երաշխիք։

17:27 - 21 մարտի, 2024

Ֆինլանդիայի դեսպանը խոր մտահոգություն է հայտնել Ադրբեջանի կողմից իրականացված ռազմական սադրանքի առնչությամբ

ՀՀ ԱԺ նախագահ Ալեն Սիմոնյանը փետրվարի 13-ին ընդունել է Հայաստանի Հանրապետությունում Ֆինլանդիայի արտակարգ և լիազոր դեսպան Կիրստի Նարինենին: Այս մասին հայտնում են ԱԺ-ից: Զրույցի սկզբում կողմերը կարևորել են Հայաստանի և Ֆինլանդիայի միջև երկկողմ հարաբերությունների զարգացումը միջպետական և միջխորհրդարանական համագործակցության խթանման միջոցով: Քննարկվել է խորհրդարանական բարեկամական խմբերի շրջանակում փոխգործակցության ընդլայնման և զարգացման անհրաժեշտությունը: Անդրադառնալով տարածաշրջանային խնդիրներին՝ ԱԺ նախագահը դեսպանին է ներկայացրել փետրվարի 13-ի առավոտյան Ադրբեջանի կողմից իրականացված ռազմական սադրանքը, որի հետևանքով հայկական կողմն ունի զոհեր և վիրավորներ: Դեսպանն իր խոր մտահոգությունն է հայտնել դեպքի առնչությամբ և ընդգծել, որ Ֆինլանդիան միջազգային գործընկերների հետ կշարունակի հետևել Հարավային Կովկասում անվտանգության և խաղաղության հաստատման գործընթացին՝ փորձելով նպաստել խաղաղության հաստատմանը: Անդրադառնալով ինստիտուցիոնալ բարեփոխումներին՝ դեսպան Կիրստի Նարինենը բարձր է գնահատել Հայաստանում առկա ժողովրդավարական գործընթացները: Քննարկվել են Հայաստան-Եվրամիություն, Հայաստան-Ֆինլանդիա հարաբերությունների ընդլայնմանը վերաբերող հարցեր:

14:55 - 13 փետրվարի, 2024

Ֆինլանդիայի նախագահական ընտրություններում հաղթել է նախկին վարչապետ Ստուբը |azatutyun.am|

azatutyun.am: Ֆինլանդիայի նախագահական ընտրությունների երկրորդ փուլում, ձայների 100 տոկոսի հաշվարկով, հաղթել է երկրի նախկին վարչապետ Ալեքսանդր Ստուբը (Ազգային կոալիցիա կուսակցություն)՝ հավաքելով ձայների 51,6 տոկոսը։ Ձայների 48,4 տոկոսով՝ երկրորդ տեղում Ֆինլանդիայի նախկին արտգործնախարար Պեկկա Հաավիստոն է (Կանաչների կուսակցություն)։ Նախագահի երդմնակալության արարողությունը տեղի կունենա մարտի 1-ին։ Ֆինլանդիան երեկ երկրորդ փուլով նախագահ էր ընտրում: Ընտրությունների առաջին փուլը հունվարի 28-ին էր։ Առաջին փուլում Ֆինլանդիայի նախագահի պաշտոնի համար 9 թեկնածու էր պայաքարում։

10:53 - 12 փետրվարի, 2024

Թուրքիայի խորհրդարանի օրակարգում այսօր կներառվի ՆԱՏՕ-ին Շվեդիայի անդամակցության հայտի քննարկումը |factor.am|

factor.am: Թուրքիայի խորհրդարանի այսօրվա նիստի ամենակարևոր օրակարգային հարցերից է լինելու ՆԱՏՕ-ին Շվեդիայի անդամակցության հայտի քննարկումը, հայտնում է TRT Haber-ը։ Նշվում է, որ քննարկումից հետո այն ներկայացվելու է խորհրդարանի անդամների քվեարկությանը։ Ըստ թուրքական մամուլի տեղեկությունների՝ քվեարկությունը տեղի է ունենալու այս շաբաթ, սակայն հստակ օր չի նշվում։ Հիշեցնենք, որ ՆԱՏՕ-ին Շվեդիայի անդամակցության հայտն առաջին անգամ խորհրդարանի արտաքին հարաբերությունների հանձնաժողովի օրակարգ է բերվել անցյալ տարվա նոյեմբերի 16-ին։ Դեկտեմբերի 26-ին անդամակցության արձանագրությունն ընդունվել է խորհրդարանի արտաքին հարաբերությունների հանձնաժողովի կողմից: Ֆինլանդիան և Շվեդիան ՆԱՏՕ-ին միանալու համար դիմել էին Ուկրաինա ՌԴ ներխուժումից հետո։ Անկարան Ֆինլանդիայի հայտը վավերացրել էր 2023 թվականի մարտին, իսկ Շվեդիայի հայտի դեպքում տարբեր նախապայմաններ է առաջ քաշում։

15:30 - 23 հունվարի, 2024

ՀՀ նախագահը Ֆինլանդիայի ԱԳ նախարարի հետ քննարկել է երկկողմ օրակարգի խորացման և ՀՀ-ԵՄ գործընկերության հարցեր

Դավոսի համաշխարհային տնտեսական համաժողովի շրջանակներում Հանրապետության նախագահ Վահագն Խաչատուրյանը հանդիպում է ունեցել Ֆինլանդիայի արտաքին գործերի նախարար Էլինա Վալտոնենի հետ: Այս մասին հայտնում են ՀՀ նախագահի աշխատակազմից: Հանդիպման ընթացքում քննարկվել են Հայաստանի և Ֆինլանդիայի միջև ինչպես երկկողմ օրակարգի խորացման, այնպես էլ ՀՀ-ԵՄ գործընկերության հարցեր: Զրույցի ընթացքում անդրադարձ է կատարվել Հարավկովկասյան տարածաշրջանում առկա ընդհանուր իրադրությանն ու առկա անվտանգային մարտահրավերներին: Հանդիպմանը երկուստեք կարևորվել են վերջին տարիներին Հայաստանում իրականացվող ժողովրդավարական բարեփոխումներն ու ժողովրդավարական ինստիտուտների ամրապնդմանն ուղղված հայեցակարգերն ու իրականացվող ծրագրերը։

10:34 - 17 հունվարի, 2024

Վաշինգտոնն ու Հելսինկին համաձայնագիր են ստորագրել Ֆինլանդիայում ամերիկյան ուժեր տեղակայելու մասին |1lurer.am|

1lurer.am: ԱՄՆ պետքարտուղար Էնթոնի Բլինքենը և Ֆինլանդիայի պաշտպանության նախարար Անտտի Հյակկյանենը պաշտպանության ոլորտում համագործակցության մասին համաձայնագիր են ստորագրել, որի համաձայն՝ ԱՄՆ-ը ռազմական ներկայություն կունենա հանրապետության տարածքում: Փաստաթղթի բանակցություններն ընթացել են 2022 թվականի օգոստոսից: Այն պատրաստվել է ՆԱՏՕ-ի անդամների միջև ուժերի կարգավիճակի մասին համաձայնագրի հիման վրա: Պայմանագրում ասվում է, որ ամերիկյան ռազմական ներկայությունը կամրապնդի ինչպես Ֆինլանդիայի, այնպես էլ ամբողջ տարածաշրջանի անվտանգությունն ու կայունությունը: «Ուկրաինայի դեմ Ռուսաստանի ագրեսիվ պատերազմի հետևանքով Ֆինլանդիայում և Եվրոպայում անվտանգության պայմանների փոփոխությունը ևս մեկ անգամ ընդգծում է երկկողմ համագործակցության կարևորությունը»,- նշել են Ֆինլանդիայի ԱԳՆ-ից: Հյակկյանենն ավելի վաղ հայտարարել էր, որ փաստաթղթի ստորագրումը «վերջակետ չէ, այլ նոր քայլ պաշտպանության ոլորտում է՛լ ավելի սերտ համագործակցության ճանապարհին»: «Համաձայնագիրն արտացոլում է ԱՄՆ-ի հանձնառությունը Ֆինլանդիայի անվտանգության ապահովման հարցում և պայմաններ է ստեղծում ճգնաժամերի ժամանակ համագործակցության համար։ Ֆինլանդիան միայնակ չէ, որ պաշտպանում է իրեն, բայց դա անում է որպես ՆԱՏՕ-ի անդամ և Միացյալ Նահանգների հետ»,- նշել է նախարարը:

13:00 - 19 դեկտեմբերի, 2023

Բայդենն ու Էրդողանը քննարկել են Շվեդիայի՝ ՆԱՏՕ-ին անդամակցության հարցը |shantnews.am|

shantnews.am: ԱՄՆ նախագահ Ջո Բայդենը Թուրքիայի առաջնորդ Ռեջեփ Թայիփ Էրդողանի հետ զրույցում քննարկել է ՆԱՏՕ-ի ամրապնդման հարցը՝ մատնանշելով Շվեդիան դաշինքում արագ ընդգրկելու անհրաժեշտությունը, հայտնել են Սպիտակ տանը։ «Նրանք քննարկել են ՆԱՏՕ-ի դաշինքի ամրապնդման կարևորությունը, ներառյալ Շվեդիային որպես դաշնակից որքան հնարավոր է շուտ ընդունելու կարևորությունը, ինչպես նաև Թուրքիայի փոխհամատեղելիության հետագա ամրապնդումը», - ասվում է հաղորդագրության մեջ: Բայդենը և Էրդողանը նաև պայմանավորվել են սերտ կապի մեջ մնալ 2024 թվականի հուլիսին Վաշինգտոնում կայանալիք ՆԱՏՕ-ի գագաթնաժողովից առաջ: Բացի դրանից, Բայդենը Էրդողանին աջակցություն է հայտնել Հունաստանի և Թուրքիայի հարաբերություններում վերջին կառուցողական քայլերի համար։ Հինգշաբթի օրը թուրքական T24 հրատարակությունը հայտնել է, որ թուրքական խորհրդարանի կողմից ՆԱՏՕ-ին Շվեդիայի անդամակցության արձանագրության վավերացման հետ կապված իրավիճակը բարդացել է Իսրայելի և պաղեստինյան ՀԱՄԱՍ շարժման միջև հակամարտություն սկսելուց հետո, և կա Անկարայի և Վաշինգտոնի միջև վստահության բացակայություն: Շվեդիան՝ որպես Եվրամիության անդամ, Թուրքիայի նախագահ Ռեջեփ Թայիփ Էրդողանի հետ բանակցություններում համաձայնել է, որ դիմումը վավերացնելու դիմաց, նպաստի ԵՄ-ին Թուրքիայի անդամակցության գործընթացի ակտիվացմանը։ Միաժամանակ ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Շվեդիայի՝ ՆԱՏՕ-ին անդամակցելու և Թուրքիայի՝ ԵՄ-ին անդամակցելու հարցերը «կապված չեն միմյանց հետ»։ Օգոստոսին նա ասաց, որ լավատես է, որ Շվեդիան կմիանա դաշինքին այս աշնանը:

10:06 - 15 դեկտեմբերի, 2023

Ադրբեջանը պիտի պատասխանատվություն կրի միջազգային իրավունքը խախտելու համար. ԱԺ պատգամավորը՝ Ֆինլանդիայի գործընկերներին

Հայաստանի շուրջ ստեղծված ներկա իրավիճակը, առկա մարտահրավերներն ու խնդիրները ՀՀ ԱԺ «Պատիվ ունեմ» խմբակցության պատգամավոր, Հայաստան-Ֆինլանդիա բարեկամական խմբի ղեկավար Աննա Մկրտչյանը քննարկել է ԵԱՀԿ Խորհրդարանական վեհաժողովի Ֆինլանդիայի պատվիրակության անդամների հետ՝ Ֆինլանդիա-Հայաստան բարեկամական խմբի ղեկավար Վիլհելմ Յուննիլայի գլխավորությամբ: Հանդիպումը կայացել է նոյեմբերի 19-ին՝ Երևանում ընթացող ԵԱՀԿ ԽՎ աշնանային նստաշրջանի շրջանակում: Ինչպես տեղեկացնում են ՀՀ Ազգային ժողովից, Աննա Մկրտչյանն անդրադարձել է ադրբեջանական ագրեսիայի հետևանքով Լեռնային Ղարաբաղի հայաթափման, էթնիկ զտման խնդիրներին՝ նշելով, որ Ադրբեջանը շարունակում է հնչեցնել իր սպառնալիքները: Միջազգային կառույցի իր գործընկերներին դիմելով՝ պատգամավորն ընդգծել է, որ Ադրբեջանի հանդեպ եղած մոտեցումներն անհրաժեշտ է խստացնել, քանի որ եթե Ադրբեջանը խախտում է միջազգային իրավունքի նորմերը, ապա պիտի նաև պատասխանատվություն կրի դրա համար: Նշվում է, որ, ըստ Հայաստան-Ֆինլանդիա բարեկամական խմբի ղեկավարի, պետք չէ բավարարվել սոսկ հայտարարություններով, քանզի նման հայտարարությունները չեն կանգնեցնում ագրեսոր Ադրբեջանի քայլերը: Նա շեշտել է Ադրբեջանի նկատմամբ պատժամիջոցներ կիրառելու անհրաժեշտությունը: «Պետք է միջազգային հանրությունը միջազգային պարտավորությունների, մասնավորապես, մարդասիրական իրավունքի շրջանակում ապահովի մեր քաղաքացիների կյանքի և ազատ տեղաշարժի իրավունքը»,- ասել է Աննա Մկրտչյանը: «Պատգամավորն անդրադարձել է նաև Հայաստանի ներքաղաքական հարցերին: Ըստ նրա՝ Հայաստանում կան քաղաքական հայացքների համար ազատությունից զրկված անձինք»,- ասվում է հաղորդագրության մեջ: Ըստ աղբյուրի՝ կողմերը կարևորել են նաև միջխորհրդարանական համագործակցությունը՝ ընդգծելով բարեկամական խմբերի միջև կապերի խորացումն ու ընդլայնումը: Հանդիպման ընթացքում կողմերը խոսել են այս պահին Սյունիքում տիրող իրավիճակի մասին:

18:30 - 19 նոյեմբերի, 2023

Ադրբեջանի գործողությունները չեն սահմանափակվում ԼՂ-ով, այլ տարածվում են Հայաստանի ինքնիշխան տարածքների վրա. Ալեն Սիմոնյանը՝ Ֆինլանդիայի դեսպանին

Հայաստանի Հանրապետության ԱԺ նախագահ Ալեն Սիմոնյանը հոկտեմբերի 2-ին ընդունել է Ֆինլանդիայի Հանրապետության արտակարգ եւ լիազոր դեսպան Կիրստի Նարինենին: Ինչպես տեղեկացնում են ՀՀ ԱԺ-ից, Ալեն Սիմոնյանն, անդրադառնալով ԼՂ-ից բռնի տեղահանված հայերի եւ Հայաստանի ինքնիշխանության դեմ Ադրբեջանի ունեցած նկրտումներին, տեղեկացրել է, որ հանդիպումից րոպեներ առաջ Ադրբեջանի զինված ուժերը հրաձգային զենքերից կրակ են բացել Կութի հատվածում տեղակայված հայկական դիրքերի անձնակազմի համար սնունդ տեղափոխող մեքենայի ուղղությամբ: «Ադրբեջանի գործողությունները չեն սահմանափակվում Լեռնային Ղարաբաղով, այլ տարածվում են Հայաստանի ինքնիշխան տարածքների վրա, որոնց մի մասը մնում է Ադրբեջանի վերահսկողության տակ»,- հիշեցրել է ՀՀ ԱԺ նախագահը: Այս համատեքստում քննարկվել է տարածաշրջանում տեւական խաղաղության հասնելու անհրաժեշտությունը: Ֆինլանդիայի դեսպանն արձագանքել է, որ Հայաստանի ժողովրդավարությունը դժվար ճանապարհ է հաղթահարում եւ այս հարցում միջազգային գործընկերների աջակցության կարիքն ունի: Նա հավելել է, որ Լեռնային Ղարաբաղի՝ ամիսներ շարունակ տեւած շրջափակումն ու բռնի տեղահանությունը նոնսենս են: Այս համատեքստում քննարկվել է Ադրբեջանի դեմ միջազգային ատյանների կողմից պատժամիջոցների կիրառման անհրաժեշտությունը:

17:06 - 02 հոկտեմբերի, 2023

Միրզոյանն ու Ֆինլանդիայի արտգործնախարարն անդրադարձել են տարածաշրջանային անվտանգության և կայունության հարցերի

Սեպտեմբերի 18-ին ՄԱԿ-ի գլխավոր ասամբլեայի 78-րդ նստաշրջանի շրջանակներում ՀՀ արտաքին գործերի նախարար Արարատ Միրզոյանը Նյու Յորքում հանդիպում է ունեցել Ֆինլանդիայի արտաքին գործերի նախարար Էլինա Վալտոնենի հետ: Ի շարունակություն երկու նախարարների՝ օգոստոսի վերջին կայացած հեռախոսազանգի՝ Արարատ Միրզոյանը և Էլինա Վալտոնեն առավել մանրամասն քննարկել են երկկողմ օրակարգի ընդլայնման հարցեր՝ հիմնված ժողովրդավարական արժեքների, օրենքի գերակայության ամրապնդմանն ուղղված առաջնահերթությունների վրա: Այս համատեքստում ընդգծվել է առավել հավակնոտ քաղաքական օրակարգի ձևավորման հարցում երկուստեք առկա պատրաստակամությունը: Այս մասին տեղեկացնում են ՀՀ ԱԳՆ-ից։ Անդրադարձ է կատարվել տարածաշրջանային անվտանգության և կայունության հարցերի: Արարատ Միրզոյանը շեշտել է Ադրբեջանի կողմից 9 ամսից ավելի Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված հումանիտար ճգնաժամը, 120 հազար բնակչության բոլոր հիմնարար իրավունքների խախտումները: Ընդգծվել է Արդարադատության միջազգային դատարանի փետրվարի 22-ի և հուլիսի 6-ի իրավաբանական պարտադիր ուժ ունեցող որոշումներին համապատասխան Լաչինի միջանցքով երկու ուղղություններով անխոչընդոտ տեղաշարժի վերականգնման հրատապությունըը: Կարևորելով մինչ օրս ԵՄ և իր անդամ պետությունների կողմից հնչած հասցեական ուղերձները՝ ՀՀ արտաքին քաղաքական գերատեսչության ղեկավարն ընդգծել է Ադրբեջանի ապակառուցողական գործելաոճի դադարեցմանն ուղղված հստակ քայլերի անհրաժեշտությունը:

20:46 - 18 սեպտեմբերի, 2023

Արարատ Միրզոյանը Ֆինլանդիայի իր գործընկերոջն է ներկայացրել ԼՂ-ում խորացող հումանիտար ճգնաժամի մանրամասները

Օգոստոսի 29-ին ՀՀ արտաքին գործերի նախարար Արարատ Միրզոյանը հեռախոսազրույց է ունեցել Ֆինլանդիայի Հանրապետության արտաքին գործերի նախարար Էլինա Վալտոնենի հետ։ Այս մասին հայտնում են ՀՀ ԱԳՆ-ից: Նախարար Միրզոյանն իր գործընկերոջն է ներկայացրել Ադրբեջանի կողմից Լաչինի միջանցքի՝ արդեն 8 ամսից ավել շարունակվող ապօրինի արգելափակման հետևանքով Լեռնային Ղարաբաղում ժամ առ ժամ խորացող հումանիտար ճգնաժամի մանրամասները: ՀՀ ԱԳ նախարարը մասնավորապես նշել է, որ խախտված են 120000 բնակչության տարրական իրավունքները, առկա է սննդի ու դեղորայքի սուր պակաս, խաթարված է ԼՂ-ին գազի և էլեկետրաէներգիայի մատակարարումը։ Արարատ Միրզոյանն ընդգծել է ՄԱԿ Արդարադատության միջազգային դատարանի փետրվարի 22-ի և հուլիսի 6-ի իրավաբանական պարտադիր ուժ ունեցող որոշումներն Ադրբեջանի կողմից իրականացնելու, Լաչինի միջանցքի արգելափակումն անհապաղ վերացնելու և Լեռնային Ղարաբաղի ժողովրդի էթնիկ զտումը կանխելու հրամայականը: Շեշտվել է առկա գործիքակազմը միջազգային գործընկերների, այդ թվում՝ ԵՄ և իր անդամ պետությունների կողմից արդյունավետ գործածելու կարևորությունը։ Արարատ Միրզոյանը նշել է, որ պաշտոնական Բաքվի կողմից Լեռնային Ղարաբաղում մարդասիրական իրավիճակի շարունակական սրումը հարվածի տակ է դնում տարածաշրջանում կայունության հաստատմանն ուղղված Հայաստանի և միջազգային հանրության ջանքերը: Հեռախոսազանգի ընթացքում անդրադարձ է կատարվել նաև ՀՀ-ԵՄ գործընկերությանը, Հայաստանում ԵՄ քաղաքացիական առաքելությանը, ինչպես նաև Հայաստանում ժողովրդավարական բարեփոխումներին շարունակական աջակցությունը։

22:03 - 29 օգոստոսի, 2023

Ռուսաստանը պերսոնա նոն գրատա է հայտարարել Ֆինլանդիայից 9 դիվանագետի |hetq.am|

hetq.am: Ռուսաստանում Ֆինլանդիայի դեսպան Անտի Հելանտերյան կանչվել է ՌԴ ԱԳՆ։ Նրան «վճռական բողոք է արտահայտվել»։ Այդ մասին հայտնել է ՌԴ արտաքին գործերի նախարարությունը։ Ինչպես նշում է ռուսական արտաքին քաղաքական գերատեսչությունը, Մոսկվայում Ֆինլանդիայի դեսպանության և Սանկտ Պետերբուրգում ֆիննական գլխավոր հյուպատոսության 9 աշխատակցի Ռուսաստանը հայտարարել է պերսոնա նոն գրատա։ Մոսկվան նաև որոշել է հոկտեմբերի 1-ից հետ կանչել «Սանկտ Պետերբուրգում Ֆինլանդիայի գլխավոր հյուպատոսության գործունեության մասին» համաձայնությունը։ Մոսկվայում կարծում են, որ ՆԱՏՕ-ին Ֆինլանդիայի անդամակցությունը սպառնալիք է ստեղծում ՌԴ անվտանգության համար, ինչպես նաև Հելսինկիին մեղադրում Կիևին սպառազինություն տրամադրելու, «հակառուսական առճակատման քաղաքականության վարման» և ռուսաստանցիներին մուտքի վիզայի տրամադրման հարցերում խոչընդոտների մեջ։ Այս տարվա հունիսին Ֆինլանդիան արտաքսել էր ռուսաստանցի 9 դիվանագետի։ Պաշտոնական Հելսինկին ակտիվորեն սառեցնում է ռուսաստանցի օլիգարխների ակտիվները, որոնք գտնվում են պատժամիջոցների տակ։ Deutsche Welle-ն, հղում անելով Helsingin Sanomat պարբերականին, գրում է, որ ապրիլի վերջին սառեցվել է 1710 ֆիզիկական և իրավաբանական անձանց ակտիվներ (ընդհանուր մոտ 244 միլիոն եվրո)։ Մայիսի 17-ին Ֆինլանդիայի ԱԳՆ-ում հայտարարել էին, որ Ռուսաստանը սառեցրել է ֆիննական դիվանագիտական ներկայացուցչությունների հաշիվները։ Խոսքը Մոսկվայում Ֆինլանդիայի դեսպանության և Սանկտ Պետերբուրգում ֆիննական գլխավոր հյուպատոսության մասին էր։ Այդ առիթով Ֆինլանդիան բողոքի նոտա էր ուղարկել Մոսկվային։

09:25 - 07 հուլիսի, 2023

Ֆինլանդիան կարտաքսի ռուսաստանցի 9 դիվանագետի |hetq.am|

hetq.am: Ֆինլանդիան կարտաքսի 9 դիվանագետի, որոնք աշխատում են Հելսինկիում Ռուսաստանի դեսպանությունում։ Ֆիննական իշխանությունները նրանց մեղադրում են ռուսական հետախուզության հետ կապ ունենալու մեջ։ «Նրանց գործողությունները հակասում են Դիվանագիտական հարաբերությունների մասին Վիեննայի կոնվենցիային»,- ասված է Ֆինլանդիայի նախագահի գրասենյակի հայտարարության մեջ։ Բացի այդ, նշվում է, որ ռուսական դեսպանը կտեղեկացվի արտաքսման մասին։ Որոշումը կայացվել է Ֆինլանդիայի նախագահ Սաուլի Նինիստյոյի և արտաքին ու անվտանգության քաղաքականության նախարարական կոմիտեի հանդիպման ժամանակ: Հիշեցնենք, որ ապրիլին Շվեդիան արտաքսել էր ռուսաստանցի 5 դիվանագետի, որոնք «իրականացնում էին գործունեություն, ինչն անհամատեղելի էր նրանց դիվանագիտական կարգավիճակի հետ»։ Բացի այդ, սեպտեմբերից Շվեդիան փակում է Ռուսաստանի գլխավոր հյուպատոսությունը Գյոթեբորգում։ Ի պատասխան, մայիսի վերջին Ռուսաստանը հայտարարեց, որ արտաքսում է շվեդ 5 դիվանագետի և հետ կանչում համաձայնությունը Սանկտ Պետերբուրգում Շվեդիայի գլխավոր հյուպատոսության գործունեության վերաբերյալ։

09:09 - 07 հունիսի, 2023

Ուկրաինայի նախագահը Ֆինլանդիայից մեկնել է Նիդեռլանդներ |news.am|

news.am: Ուկրաինայի նախագահ Վլադիմիր Զելենսկու ինքնաթիռը մայիսի 3-ի երեկոյան Ֆինլանդիայից թռել է Նիդեռլանդներ։ Այս մասին տեղեկացրել են De Telegraaf, NOS եւ Algemeen Dagblad նիդեռլանդական ԶԼՄ-ները։ Ինքնաթիռը վայրէջք է կատարել ժամը 22.15-ին հոլանդական «Սհիպհոլ» օդանավակայանում։ Սպասվում է, որ մայիսի 4-ին Վլադիմիր Զելենսկին հանդիպում կունենա Նիդեռլանդների վարչապետ Մարկ Ռյութեի հետ։ NOS հեռուստաընկերության տվյալներով՝ Ուկրաինայի նախագահը Հաագայում ելույթ կունենա՝ «Չկա աշխարհ, եթե չկա արդարություն Ուկրաինայի համար» թեմայով։ Ֆինլանդիայում Վլադիմիր Զելենսկին գտնվել է մայիսի 3-ի ցերեկը։ Նա խոսել է Ֆինլանդիայի նախագահ Սաուլի Նիինիստյոյի հետ։ Բանակցություններից հետո կայացած ճեպազրույցում նա տեղեկացրել է, որ Ֆինլանդիան չի կարողանա Ուկրաինային տրամադրել Hornet կործանիչներ, քանի դեռ ԱՄՆ-ից չի ստացել նոր F-35 կործանիչները։ Գերմանական N-TV հեռուստաալիքի տվյալներով՝ մայիսի 13-ին Ուկրաինայի նախագահը մեկնելու է Բեռլին, իսկ մայիսի 14-ին՝ Ախեն, Կառլոս Մեծի մրցանակի համար։

11:40 - 04 մայիսի, 2023