Հռոմի Պապ

Վարչապետը Ֆրանցիսկոս Պապին շնորհակալություն է հայտնել Սուրբ Աթոռի կողմից հայ գերիներին ազատ արձակելու շարունակական ջանքերի համար

Սուրբ Աթոռ կատարած աշխատանքային այցի շրջանակում տեղի է ունեցել վարչապետ Նիկոլ Փաշինյանի առանձնազրույցը Նորին Սրբություն Ֆրանցիսկոս Պապի հետ: Այս մասին հայտնում են ՀՀ վարչապետի աշխատակազմից։ Վարչապետ Փաշինյանը շնորհակալություն է հայտնել հանդիպման համար և նշել, որ իր համար մեծ պատիվ է առաջին անգամ գտնվել Առաքելական պալատում։ ՀՀ վարչապետի խոսքով` բարձր ու բարձրագույն մակարդակով շարունակվող փոխայցերը գալիս են փաստելու Հայաստանի և Սուրբ Աթոռի միջև առանձնահատուկ միջպետական հարաբերությունների մասին: Նիկոլ Փաշինյանը հավելել է, որ Հայաստանում ռեզիդենտ Առաքելական նվիրակի նշանակումը զգալի առաջընթաց կլինի բարեկամական հարաբերություններում։ Միաժամանակ, վարչապետն ընդգծել է Հայաստանի լիակատար աջակցությունը Սուրբ Աթոռին՝ միջազգային հարթակներում խաղաղության օրակարգի սպասարկման և այս ուղղությամբ համատեղ հանդես գալու և գործելու հարցում։ Նիկոլ Փաշինյանը Նորին Սրբությանը տեղեկացրել է Հայաստան-Ադրբեջան խաղաղության գործընթացի վերջին զարգացումների մասին և վերահաստատել Հայաստանի Կառավարության հավատարմությունը Խաղաղության օրակարգին։ Նաև ընդգծել է, որ Հայաստանի Հանրապետությունը հանուն խաղաղության իր բաժին ներդրումն ունենալու հարցում վճռական է։ Վարչապետը Նորին Սրբությանը շնորհակալություն է հայտնել Սուրբ Աթոռի կողմից հայ գերիներին ազատ արձակելու շարունակական ջանքերի համար։ Զրուցակիցները քննարկել են նաև երկուստեք հետաքրքրություն ներկայացնող այլ հարցեր:Առանձնազրույցից հետո Ֆրանցիսկոս Պապը ողջունել է վարչապետի տիկին Աննա Հակոբյանին, դստերը և վարչապետին ուղեկցող պատվիրակության անդամներին:

16:39 - 18 նոյեմբերի, 2024

Սուրբ Աթոռ կատարած այցի շրջանակում առանձնազրույց ունեցա Ֆրանցիսկոս Պապի հետ. վարչապետ

Սուրբ Աթոռ կատարած աշխատանքային այցի շրջանակում առանձնազրույց ունեցա Նորին Սրբություն Ֆրանցիսկոս Պապի հետ: Այդ մասին Տելեգրամի իր էջում գրել է վարչապետ Նիկոլ Փաշինյանը և կից լուսանկարներ հրապարակել:

14:54 - 18 նոյեմբերի, 2024

Նիկոլ Փաշինյանն աշխատանքային այցով մեկնել է Սուրբ Աթոռ

Վարչապետ Նիկոլ Փաշինյանը տիկնոջ՝ Աննա Հակոբյանի հետ, աշխատանքային այցով մեկնել է Սուրբ Աթոռ (Վատիկան): Այս մասին հայտնում են ՀՀ վարչապետի աշխատակազմից: Այցի շրջանակում վարչապետը հանդիպում կունենա Նորին Սրբություն Ֆրանցիսկոս Պապի հետ:

09:13 - 18 նոյեմբերի, 2024

Զելենսկին Վատիկանում Հռոմի պապի հետ հանդիպմանը խնդրել է օգնել ՌԴ-ում գերության մեջ գտնվողների ազատ արձակմանը |factor.am|

factor.am: Ուկրաինայի նախագահ Վլադիմիր Զելենսկին Վատիկանում հանդիպել է Հռոմի Ֆրանցիսկոս պապի հետ։ Reuters-ի փոխանցմամբ՝ հանդիպումը տևել է 35 րոպե։ Գործակալությունը հիշեցնում է, որ սա Զելենսկիի և Ֆրանցիսկոս պապի երկրորդ հանդիպումն է վերջին մի քանի ամիսների ընթացքում։ Ըստ ANSA-ի՝ Հռոմի Ֆրանցիսկոս պապը Զելենսկիին նվիրել է ծաղկի բրոնզե հարթաքանդակ՝ «Խաղաղությունը փխրուն ծաղիկ է» մակագրությամբ։ Ուկրաինայի նախագահը քահանայապետը նվիրել է յուղաներկ «Ջարդ Բուչայում. Մարիչկայի պատմությունը», որը պատկերում է մի աղջկա՝ Կիևի մերձակայքում գտնվող Բուչա քաղաքի ավերակների մեջ։ Տեղեկացվում է, որ Զելենսկին Հռոմի պապին խնդրել է օգնել Ռուսաստանի կողմից գերության մեջ գտնվող ուկրաինացիների ազատ արձակման հարցում:

17:32 - 11 հոկտեմբերի, 2024

Հռոմի պապը դատապարտել է ռուսական ուղղափառ եկեղեցու հետ կապված Ուկրաինայի որոշումը |azatutyun.am|

azatutyun.am: Հռոմի Ֆրանցիսկոս պապը օգոստոսի 25-ին դատապարտել է Կիևի որոշումը, որն արգելում է Ուկրաինայում Ռուս ուղղափառ եկեղեցու հետ կապեր ունեցող կրոնական կազմակերպությունների գործունեությունը: «Ոչ մի քրիստոնեական եկեղեցի չի կարող ուղղակիորեն կամ անուղղակիորեն վերացվել: Եկեղեցիներին չպետք է դիպչել»,- ասել է Հռոմի պապն իր ամենշաբաթյա աղոթքի ժամանակ: «Մտածելով Ուկրաինայում վերջերս ընդունված օրենքի մասին՝ ես վախենում եմ աղոթողների ազատության համար», - ասել է Ֆրանցիսկոսը Սուրբ Պետրոսի հրապարակում։ Նա հավաքված ժողովրդին ասաց, որ «աղոթելով չարություն չի գործում, եթե ինչ-որ մեկը իր ժողովրդին վատություն է անում, նա մեղավոր է, բայց նա չի կարող որևէ վատ բան անել աղոթելով»։ Օգոստոսի 24-ին օրենսդրությունը ստորագրելիս Զելենսկին ընդգծել է, ինչպես նա անվանել է ուկրաինացի ժողովրդի հոգևոր անկախությունը՝ ասելով, որ Ուկրաինայի ուղղափառ եկեղեցին «այսօր քայլ է անում դեպի ազատագրում Մոսկվայի սատանաներից»: Ռուսաստանի հետ կապված ուկրաինական ուղղափառ եկեղեցին հայտարարեց, որ խզել է բոլոր կապերը Մոսկվայի պատրիարքարանի հետ 2023 թվականին՝ Ռուսաստանի կողմից Ուկրաինա լայնամասշտաբ ներխուժման պատճառով: Այնուամենայնիվ, ուկրաինական իշխանությունները նրան մեղադրում են կապեր պահպանելու մեջ: Պապը նաև ասել է, որ շարունակում է «ցավով» հետևել Ուկրաինայի մարտերին։

11:33 - 26 օգոստոսի, 2024

Զելենսկին ժամանեց Շվեյցարիա

Ուկրաինայի նախագահ Վլադիմիր Զելենսկին ուրբաթ օրը ժամանել է Շվեյցարիա, որտեղ հաջորդ օրը մեկնարկելու է Ուկրաինայի խաղաղության միջազգային համաժողովը։ «Երկու օր ակտիվ աշխատանք կլինի աշխարհի բոլոր մասերի երկրների, տարբեր ազգերի հետ, որոնք միավորված են Ուկրաինայում արդար և կայուն խաղաղություն բերելու ընդհանուր նպատակի շուրջ», - գրել է նա X սոցցանցում։ Ավելի վաղ azatutyun.am-ը հայտնել էր, որ Իտալիայում «Մեծ յոթնյակի» գագաթնաժողովի շրջանակում Ուկրաինայի նախագահ Վլադիմիր Զելենսկին հանդիպել է Հռոմի պապ Ֆրանցիսկոսին։ «Մենք բարձր ենք գնահատում Վատիկանի մասնակցությունը գագաթնաժողովին և ջանքերը, որոնք ուղղված են խաղաղության հաստատմանը, մասնավորապես Ռուսաստանի կողմից առևանգված ուկրաինացի երեխաների վերադարձի հարցում»,- գրել է Զելենսկին Telegram-ում։

21:03 - 14 հունիսի, 2024

Արամ Ա կաթողիկոսը Հռոմի Պապի հետ քննարկել է ԼՂ հայության և հայ գերիների վերադարձի հարցերը

Մեծի Տանն Կիլիկիո Ն.Ս.Օ.Տ.Տ. Արամ Ա Վեհափառ Հայրապետը հունիսի 12-ին Վատիկանում հանդիպել է Նորին Սրբություն Հռոմի Ֆրանցիսկոս Պապի հետ: Այս մասին հայտնել են Մեծի Տանն Կիլիկիո կաթողիկոսությունից: Հանդիպման ընթացքում տեսակետների փոխանակում է տեղի ունեցել Վեհափառ Հայրապետի կողմից առաջարկված հետևյալ կետերի շուրջ. ա) Միջեկեղեցական հարաբերությունների առավել ծավալումը ու հարաբերությունը գործակցության վերածելու հրամայականը: բ) Սուրբ Հարության տոնը բոլոր եկեղեցիների կողմից միասնաբար նույն թվականին նշելու հարցը: գ) Երրորդ Վատիկանի ժողով գումարելու անհրաժեշտությունը՝ գործուն ներկայությամբ ոչ կաթոլիկ եկեղեցիների: դ) Լիբանանում քրիստոնյա-իսլամ համակեցության ամրապնդումը և նոր նախագահի ընտրությունը: ե) Ադրբեջանում գտնվող հայ քաղաքական բանտարկյալների շուտափույթ ազատ արձակումը: զ) Լեռնային Ղարաբաղի հայության վերադարձը իր պապենական հողերը՝ միջազգային երաշխավորությամբ։

21:50 - 12 հունիսի, 2024

Բավ է պատերազմը, այո՛ խաղաղությանը. Հռոմի պապ |azatutyun.am|

azatutyun.am: Հռոմի Ֆրանցիսկոս պապը հորդորել է Իրանին և Իսրայելին խուսափել գործողություններից, որոնք կարող են սնուցել «բռնության պարույրը» Մերձավոր Արևելքում՝ այն ներքաշելով ավելի ավելի խորը հակամարտության մեջ: «Բավ է պատերազմը, բավ են հարձակումները, բավ է բռնությունը: Այո երկխոսությանը, այո խաղաղությանը», - ասել է նա Սուրբ Պետրոսի հրապարակում ուխտավորներին: Հիշեցնենք, որ Իրանը ապրիլի 13-ի ուշ երեկոյան ԱԹՍ-եր ու հրթիռներ է արձակել Իսրայելի ուղղությամբ։ Իսրայելի հաղորդմամբ՝ որսացել են արձակված շուրջ 300 անօդաչու թռչող սարքերի և հրթիռների «ճնշող մեծամասնությունը»: Իսլամական հեղափոխության պահապանների կորպուսը հայտարարել է, որ Իրանը Իսրայելում թիրախավորել է երկրի ռազմական օբյեկտները և բոլոր թիրախները հաջողությամբ ոչնչացվել են։ Թեհրանը առավոտյան հայտարարել է, որ չի պատրաստվում շարունակել գործողությունը։

18:22 - 14 ապրիլի, 2024

Հռոմի պապը կրկին կոչ է արել դադարեցնել կրակը Գազայում |armenpress.am|

armenpress.am: Հռոմի պապը կրկին կոչ է արել դադարեցնել կրակը Գազայի հատվածում: Նա խորը վիշտ է հայտնել Իսրայելի ավիահարվածի հետևանքով «Համաշխարհային կենտրոնական խոհանոց» (WCK – World Central Kitchen) ՀԿ-ի կամավորների մահվան կապակցությամբ: Այս մասին հայտնում է Euronews-ը՝ նշելով, որ Հռոմի պապը ևս մեկ անգամ կոչ է արել ապահովել մարդասիրական օգնության հասանելիությունն և անհապաղ ազատ արձակել գերիներին: «Եկեք խուսափենք տարածաշրջանում հակամարտությունն ընդլայնելու անպատասխանատու փորձերից և աշխատենք, որպեսզի որքան հնարավոր է շուտ դադարեցնենք այս և մյուս պատերազմները, որոնք շարունակում են մահ ու տառապանք բերել աշխարհի շատ անկյուններում»,-հայտարարել է Հռոմի պապը:

21:17 - 03 ապրիլի, 2024

Կոչ եմ անում Հայաստանին և Ադրբեջանին շարունակել բանակցությունները հարաբերությունների կարգավորման համար․ Հռոմի Պապ |armeniasputnik.am|

armeniasputnik.am: Հռոմի Ֆրանցիսկոս պապը Զատկի իր ավանդական ուղերձում անդրադարձել է նաև Հայաստանին և Ադրբեջանին «Կոչ եմ անում բանակցություններ վարել Հայաստանի և Ադրբեջանի միջև, որպեսզի միջազգային հանրության աջակցությամբ նրանք կարողանան շարունակել երկխոսությունը, օգնել տեղահանվածներին, հարգել ու պահպանել տարբեր կրոնական դավանանքների պաշտամունքի վայրերը և հասնել խաղաղության համաձայնագրի»,- ասել է հովվապետը։ Նա կոչ է արել նաև Ռուսաստանին և Ուկրաինային գերիներ փոխանակել «բոլորը բոլորի դիմաց» սկզբունքով, իսկ իսրայելցիներին և պաղեստինցիներին հորդորել է հրադադար հաստատել:

15:56 - 31 մարտի, 2024

Հռոմի Պապն անդրադարձել է Հայաստանին և ԼՂ-ից տեղահանված հայ բնակչությանը |1lurer.am|

1lurer.am: Հռոմի Պապն անդրադարձել է Հայաստանին և Լեռնային Ղարաբաղից տեղահանված հայ բնակչությանը: Սուրբ Աթոռում Հայաստանի դեսպանությունից հայտնում են, որ 2024 թվականի փետրվարի 28-ին Նորին Սրբություն Ֆրանցիսկոս Պապը ընդունել է Վատիկան ժամանած Հայ Կաթողիկե եկեղեցու Սինոդի անդամներին՝ Տանն Կիլիկիո Կաթողիկե Հայոց Կաթողիկոս - Պատրիարք Ամենապատիվ և Գերերջանիկ Տ.Տ. Ռաֆայել Պետրոս 21-րդ Մինասյանի գլխավորությամբ։ Հռոմի Պապը նրանց ուղղած իր խոսքում նշել է, որ ուրախ է Սուրբ Գրիգոր Նարեկացու հիշատակի օրվան հաջորդած այդ հանդիպան համար, ապա անդրադարձել Հայաստանին՝ մասնավորապես նշելով. «Ինչպես չհիշել՝ բառերով կամ աղոթքներով, Հայաստանը, հատկապես նրանց, ովքեր փախել են Լեռնային Ղարաբաղից, ապաստան փնտրող տեղահանված բազմաթիվ ընտանիքներին»։ Խոսելով ընթացող պատերազմների, հակամարտությունների մասին՝ Նորին Սրբությունը դրանք «միշտ ողբերգական ու միշտ անհեթեթ» է անվանել և շարունակել. «Քանիցս աղաչեցի «բավական է»։ Միասին արձագանքենք խաղաղության աղաղակին, որպեսզի այն դիպչի բոլորի սրտերին …։ Եվ ամենից առաջ աղոթենք։ Ես դա կանեմ ձեր ու Հայաստանի համար»։

09:39 - 29 փետրվարի, 2024

Հռոմի Ֆրանցիսկոս պապը քրիստոնյաներին միասնության կոչ է արել և ցավակցել Իրանին |tert.am|

tert.am: Աստվածհայտնության տոնի առթիվ Հռոմի Ֆրանցիսկոս պապը քրիստոնյաների միասնության և խաղաղության համար միասնական աղոթքի կոչ է արել: Հիշելով Երուսաղեմում Պողոս 6-րդ պապի՝ Կոստանդնուպոլսի տիեզերական պատրիարք Աթենագորասի հետ հանդիպման 60-ամյակը՝ Ֆրանցիսկոս պապն ասել է. «Եկեք սովորենք երկու փառահեղ եկեղեցիների հանդիպումից, շարունակենք դեպի քրիստոնյաների միասնությունը տանող ընդհանուր ճանապարհը՝ աղոթելով, աշխատելով և ձեռք ձեռքի քայլելով: Եկեք միասին աղոթենք հանուն Պաղեստինում, Իսրայելում, Ուկրաինայում խաղաղության: Չափազանց շատ են մահերն ու ավերածությունները»: Ինչպես հաղորդում է «ՏԱՍՍ»-ը, այս մասին Հռոմի Պապն ասել է Սուրբ Պետրոսի հրապարակում հավատացյալներին ուղղված տոնական պատարագից հետո: Նա նաև կարեկցանք է հայտնել Իրանի ժողովրդին Իրանում տեղի ունեցած ահաբեկչությունից հետո, որի հետևանքով տասնյակ մարդիկ են զոհվել։ «Ես իմ հոգևոր մտերմությունն եմ հայտնում Քերմանում տեղի ունեցած ահաբեկչության բազմաթիվ զոհերի հարազատներին, բոլոր տուժածներին»,- ընդգծել է Հռոմի Պապը։

16:57 - 06 հունվարի, 2024

Ես շարունակում եմ աղոթել պատերազմի պատճառով տառապող ժողովուրդների համար․ Հռոմի Ֆրանցիսկոս պապ

Հռոմի Ֆրանցիսկոս պապը «X»-ի իր միկրոբլոգում շնորհավորել է բոլոր հավատացյալների Նոր տարին: «Ես շարունակում եմ աղոթել այն ժողովուրդների համար, որոնք տառապում են պատերազմների պատճառով՝ նահատակված ուկրաինացի ժողովրդի, Պաղեստինի և Իսրայելի ժողովուրդների, սուդանցիների և շատ ուրիշների համար։ Քանի որ տարին ավարտվում է, եկեք ինքներս մեզ հարց տանք, թե քանի մարդկային կյանք է խլվել զինված բախումների հետևանքով։ Որքա՞ն մահ, ավերածություն, տառապանք, աղքատություն»,- գրել է Ֆրանցիսկոս պապը։

21:11 - 31 դեկտեմբերի, 2023

Թող մոտենա Հայաստանի և Ադրբեջանի միջև վերջնական խաղաղության օրը. Հռոմի պապը Սբ. Ծննդյան տոնի առթիվ ուղերձով է հանդես եկել

Հռոմի պապը Սուրբ Ծննդյան տոնի առթիվ ուղերձով է հանդես եկել: Ինչպես տեղեկանում ենք Սուրբ Աթոռում Հայաստանի դեսպանության տարածած հաղորդագրությունից, Կաթողիկե եկեղեցու առաջնորդը, հանդես գալով իր ուղերձում անդրադարձել է նաև Հայաստանին և Ադրբեջանին: «Թող մոտենա Հայաստանի և Ադրբեջանի միջև վերջնական խաղաղության օրը: Թող այն խրախուսվի մարդասիրական նախաձեռնություններով, տեղահանվածների վերադարձով իրենց տները՝ օրինական և ապահով պայմաններում, ինչպես նաև յուրաքանչյուր համայնքի կրոնական ավանդույթների և պաշտամունքի վայրերի նկատմամբ փոխադարձ հարգանքով»,- մասնավորապես ասված է Հռոմի պապի ուղերձում:

17:56 - 25 դեկտեմբերի, 2023

Հռոմի պապը ողջունել է հայ և ադրբեջանցի գերիներին ազատ արձակելու որոշումը |1lurer.am|

1lurer.am: Կիրակի օրը Հռոմի Ֆրանցիսկոս պապը իր ուրախությունն է հայտնել հայ և ադրբեջանցի գերիների ազատ արձակման կապակցությամբ։ Այդ մասին հայտնում է Vatican news-ը։ «Ես Հարավային Կովկասում խաղաղության հաստատման մեծ հույս եմ տածում Հայաստանի և Ադրբեջանի միջև այս դրական նշանի հետ կապված», - ասել է Հռոմի պապը՝ միաժամանակ խրախուսելով երկու ժողովուրդներին և նրանց առաջնորդներին որքան հնարավոր է շուտ խաղաղության պայմանագիր կնքել։ Հիշեցնենք, որ 2023թ․ դեկտեմբերի 7-ին Հայաստանի վարչապետի աշխատակազմը և Ադրբեջանի նախագահի վարչակազմը համատեղ հայտարարություն են տարածել, ըստ որի՝ Ադրբեջանը ազատ է արձակում 32 հայ զինծառայողների, ՀՀ-ն իր հերթին, առաջնորդվելով մարդասիրության արժեքներով, և որպես բարի կամքի դրսևորում, ազատ է արձակում 2 ադրբեջանցի զինծառայողների:

18:26 - 10 դեկտեմբերի, 2023

Հռոմի պապն առաջարկել է ռազմական ծախսերը ուղղել սովի դեմ պայքարի հիմնադրամին |armenpress.am|

armenpress.am: Հռոմի Պապ Ֆրանցիսկոսն առաջարկել է ռազմական արդյունաբերության մեջ ներգրավված միջոցներն ուղղել սովի դեմ պայքարի միջազգային հիմնադրամի ստեղծմանը, և դրանք ծախսել կայուն զարգացման ապահովման համար: Այս մասին ասված է պոնտիֆիկոսի ելույթում, որը պատրաստվել էր կլիմայի փոփոխության մասին ՄԱԿ-ի շրջանակային կոնվենցիայի Կողմերի համաժողովում: Առողջական վիճակի պատճառով Հռոմի Պապ Ֆրանցիսկոսը չի կարողացել ներկա գտնվել կոնֆերանսին: Նրա ելույթը արտասանել է Վատիկանի պետական քարտուղար կարդինալ Պիետրո Պարոլինը, որը գլխավորել է Սուրբ Աթոռի պատվիրակությունը: «Որքան էներգիա է ծախսում մարդկությունը այսքան պատերազմներում, որոնք բռնկվել են ամբողջ աշխարհում՝ Իսրայելում և Պաղեստինում, Ուկրաինայում և շատ այլ վայրերում։ Հակամարտությունները չեն լուծում խնդիրները, բայց հանգեցնում են դրանց ավելացման: Որքան ռեսուրսներ են ծախսվում սպառազինությունների վրա, որոնք քանդում են մեր ընդհանուր տունը։ Առաջարկում եմ ռազմական նպատակներով ծախսվող գումարներով ստեղծել սովի վերացման միջազգային հիմնադրամ և կլիմայի փոփոխությամբ տառապող աղքատ երկրներում՝ կայուն զարգացման նախագծեր»,- ելույթի տեքստն է մեջբերում ՏԱՍՍ-ը:

16:54 - 02 դեկտեմբերի, 2023