Արցախ

Արցախի Հանրապետություն կամ Լեռնային Ղարաբաղ․ 1991թ․ սեպտեմբերի 2-ին անկախացած հանրապետություն։ 2020 թվականի նոյեմբերի 9-ի հայտարարությունից հետո Արցախում տեղակայվել են ՌԴ խաղաղապահ ուժերը։ Ներկայումս  Արցախի  վերահսկողության տակ է նախկին Խորհրդային Միության կազմի մեջ մտնող Լեռնային Ղարաբաղի ինքնավար մարզը՝ բացառությամբ Հադրութի շրջանի և Շուշիի շրջանի Շուշի և Քարին տակ բնակավայրերի։

Մայրաքաղաքը Ստեփանակերտն է։ Գործող նախագահը Արայիկ Հարությունյանն է։

Արցախի Հանրապետության անկախությունը դեռեւս չի ճանաչել ՄԱԿ անդամ որեւէ պետություն։

Արցախի ԱԺ մշտական հանձնաժողովների համատեղ նիստում ներկայացվել է «ԱՀ 2023թ պետական բյուջեի մասին» օրենքի նախագիծը

Արցախի ԱԺ մշտական հանձնաժողովների համատեղ նիստում ներկայացվել է «ԱՀ 2023թ պետական բյուջեի մասին» օրենքի նախագիծը

Նոյեմբերի 25-ին Արցախի ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արթուր Հարությունյանի նախագահությամբ հրավիրվել է ԱԺ մշտական հանձնաժողովների համատեղ նիստ: Արցախի ԱԺ լրատվության և հանրության հետ կապերի բաժնի հաղորդմամբ՝ օրակարգում «ԱՀ 2023թ պետական բյուջեի մասին» ԱՀ օրենքի նախագծի քննարկման հարցն էր: Այն ներկայացրել է ԱՀ ֆինանսների և էկոնոմիկայի նախարարի տեղակալ Նորայր Ավանեսյանը: «Նախարարի տեղակալի փոխանցմամբ՝ ԱՀ 2023թ պետական բյուջեի նախագիծը մշակվել է՝ հաշվի առնելով Արցախի Հանրապետության Նախագահի 2020-2025 թվականների ծրագրի նպատակադրումները և Արցախի Հանրապետության 2023-2025 թվականների պետական միջնաժամկետ ծախսերի ծրագրի դրույթները: Անդրադառնալով 2022թ մակրոտնտեսական ցուցանիշներին՝ Նորայր Ավանեսյանը նշել է, որ 2022թ. 9 ամսվա արդյունքներով գրանցվել է 18.2 տոկոս տնտեսական աճ՝ նախորդ տարվա 9 ամիսների համեմատությամբ: Համախառն ներքին արդյունքը կազմել է 199.6 մլրդ դրամ, նախորդ տարվա նույն ժամանակահատվածի՝ 162.8 մլրդ դրամի դիմաց: 9 ամսվա արդյունքներով աճ է արձանագրվել տնտեսության բոլոր ճյուղերում: Ըստ նախարարի՝ «Արդյունաբերություն» ճյուղի հաշվին 10.4 տոկոսային կետն է ապահովվել, «Գյուղատնտեսություն, անտառային տնտեսություն և ձկնորսություն» ճյուղի հաշվին՝ 0.9 տոկոսային կետը, շինարարության ճյուղի հաշվին ՝0.7 տոկոսային կետը: Ըստ կանխատեսումների՝ 2022 թվականին համախառն ներքին արդյունքը կկազմի 285.2 մլրդ դրամ՝ ապահովելով 10% իրական աճ՝ 4% դեֆլյատորի պայմաններում: 2023 թվականի համար կանխատեսումային համախառն ներքին արդյունքի ծավալը կկազմի 311.5 մլրդ դրամ, աճը՝ մոտ 5.0 տոկոս, կանխատեսվող 4.0 տոկոս դեֆլյատորի դեպքում։ Գնաճի ցուցանիշը կանխատեսվել է 4.5 տոկոսի սահմաններում` +/-1.0 տոկոս տատանման թույլատրելի միջակայքով: «2023թ պետական բյուջեի սեփական եկամուտները ծրագրվել են 49 մլրդ 850 մլն դրամի չափով, բյուջետային վարկի չափը 2023 թվականին կկազմի 144.0 մլրդ դրամ, բյուջեի ծախսերը նախատեսվում են 215 մլրդ 171.4 մլն դրամի չափով, ՀՆԱ-ում ծախսերի մակարդակը կկազմի 69.1 տոկոս, արդյունքում դեֆիցիտը կկազմի` 21 մլրդ 321.4 մլն դրամ»,- նշել է ֆինանսների և էկոնոմիկայի նախարարի տեղակալը: 2023թ. բյուջեի նախագծով նախատեսված հիմնական ծախսային գերակայություններն ըստ ոլորտների հետևյալն են՝ Գյուղատնտեսություն՝ 6 մլրդ 037.1 մլն դրամ, Էներգետիկ ոլորտի զարգացման և սուբսիդավորման ծրագիր՝ 4 մլրդ 20.0 մլն դրամ Արցախի ներդրումային հիմնադրամ՝ 4.0 մլրդ դրամ Կապիտալ ներդրումներ՝ 22.0 մլրդ դրամ Սոցիալական պաշտպանություն՝ 72 մլրդ 939.9 մլն դրամ Բնակարանային ապահովման ծրագիր՝ 10.0 մլրդ դրամ «Պատերազմական գործողությունների հետևանքով տեղահանված և (կամ) բնակտարածք կորցրած անձանց բնակարանային կարիքի ժամանակավոր բավարարման նպատակով դրամական աջակցության տրամադրում ծրագիր՝ 12 մլրդ 102.7 մլն դրամ Առողջապահություն՝ 13 մլրդ 401.1 մլն դրամ Կրթություն՝ 15 մլրդ 497.0 մլն դրամ Մշակույթ, երիտասարդություն և սպորտ՝ 1 մլրդ 843.4 մլն դրամ Համայնքների բյուջեներ՝ 1 մլրդ 108.1 մլն դրամ Գլխավոր օրինագիծը ներկայացնելուց հետո ֆինանսների նախարարի տեղակալը պարզաբանումներ է տվել պատգամավորների հարցադրումներին: Նիստը նախագահող Արթուր Հարությունյանը տեղեկացրել է, որ «ԱՀ 2023թ. պետական բյուջեի մասին» օրենքի նախագծի քննարկումները կշարունակվեն ֆինանսաբյուջետային և տնտեսական կառավարման մշտական հանձնաժողովի և ոլորտային հանձաժողովների համատեղ նիստերում»,- ասված է հաղորդագրության մեջ:
13:45 - 25 նոյեմբերի, 2022
Ռուբեն Վարդանյանը մեկնաբանել է Արցախի քաղաքական համակարգի և նախարարների հրաժարականի մասին որոշումները

Ռուբեն Վարդանյանը մեկնաբանել է Արցախի քաղաքական համակարգի և նախարարների հրաժարականի մասին որոշումները

Կարևորելով թափանցիկության սկզբունքը՝ հարկ եմ համարում ավելի հանգամանալից անդրադառնալ երեկվա որոշումներին։ Այս մասին ֆեյսբուքյան իր էջում գրել է Արցախի Հանրապետության պետական նախարար Ռուբեն Վարդանյանը։ «Արցախի քաղաքական համակարգի մասին Արցախի կառավարման համակարգը պետք է համապատասխանի այն մարտահրավերներին, որոնց առաջ այսօր կանգնած են Արցախը և Արցախի ժողովուրդը։ Ամեն երկիր չէ, որ անցել է այն ճանապարհով, որով անցել են Արցախի Հանրապետությունը և Արցախի ժողովուրդը։ Այսօր Արցախի ժողովուրդը կանգնած է գոյութենաբանական խնդրի առաջ։ Ու մենք բոլորս հստակ պետք է գիտակցենք դա: Արցախի ներկայիս քաղաքական համակարգը չափազանց բարդ է: Մեզ նման փոքր երկրների համար արդյունավետ կարող է լինել ավելի պարզ համակարգը, ուղիղ ժողովրդավարության մեխանիզմների ներդրումն ու կիրառումը: Շատ կարևոր է, որ ժողովուրդը հնարավորություն ունենա ներգրավվել իր ճակատագրին վերաբերող հարցերի լուծմանը: Հանրաքվեների միջոցով կամարտահայտման մեխանիզմի ներդրումը թույլ կտա քաղաքացուն մասնակից դառնալ իր, իր երեխաների ապագայի ու իր երկրին վերաբերող կոնկրետ որոշումների կայացմանը, տեղեկացված լինել ու ինչ-որ չափով նաև պատասխանատվություն կրել կայացված որոշումների համար: Թափանցիկ աշխատանքը, որոշումների կայացման հիմնավորվածությունը, առաջնահերթությունների որոշման չափանիշների սահմանումը կօգնեն հաղթահարել անարդարության այն սուր զգացողությունը, որ այսօր կա Արցախում, վերականգնել ապագայի նկատմամբ նրանց հավատն ու վստահությունը: Սա ռազմավարական այն գիծն է, որն անհրաժեշտ է հաշվի առնել առհասարակ բոլոր բարեփոխումներն իրականացնելիս: Համոզված եմ, որ քաղաքական համակարգի բարեփոխումներին պետք է զգուշությամբ վերաբերվել, չխուսափել պարզ խոսելուց և մինչև դրանց իրականացումը հանրության հետ բովանդակային քննարկումներ անցկացնել: Նախարարների հրաժարականի մասին Այո, դա դժվար որոշում էր և դա իմ որոշումն էր, և քննարկվել է բոլոր նախարարների հետ։ Ինչ–որ ներքին կոնֆլիկտներ կան, որոնց ես անգամ չեմ ցանկանում միջամտել։ Ես Արցախում իրավիճակը գնահատել և գնահատում եմ որպես ծայրահեղ, ուստի այն միջոցները, որոնք ես մտադիր եմ առաջարկել ճգնաժամը հաղթահարելու համար, այնքան էլ դասական չեն։ Այսօր գործադիր իշխանության առաջ բոլորովին նոր տիպի խնդիրներ են դրված, և դրանց լուծման համար այլ մասնագետներ են պետք, որոնք այլ փորձ, հմտություններ և գիտելիքներ ունեն։ Երբ աղետի հետևանքով շենքը փլվում է, առաջին հերթին շտապ փրկարարական խմբեր են կանչվում փլատակները մաքրելու և մարդկանց դուրս բերելու համար: Հետո գալիս են շինարարներն ու ճարտարապետները, որոնք մաքրված վայրում նոր շենք են կառուցում։ Հիմա մենք հենց այդպիսի իրավիճակում ենք․ հետպատերազմյան վերականգնման փուլից անցում ենք կատարում դեպի ստեղծարար աշխատանք: Շնորհակալ եմ բոլոր նրանց, ովքեր ազնվորեն և բարձր պրոֆեսիոնալիզմով են կատարել գործի իրենց մասը։ Հիմա արդեն առաջ է գալիս նոր տեսակի աշխատանքի անցնելու և նոր բնույթի խնդիրներին լուծումներ տալու, ըստ դրանց «վերադասավորվելու» հարցը: Մենք ունենալու ենք երեք հիմնական ուղղություն և խնդիրների վեց խումբ՝ յուրաքանչյուրն իր նախագծերով։ Մենք պետք է տասնյակ բարեփոխումներ իրականացնենք։ Այս ճակատը ենթադրում է բոլորովին նոր մոտեցում. դա ավելի շատ նախագծերի կառավարում է, քան ընթացիկ վարչական աշխատանք։ Ճիշտ ձևավորված թիմը հաջողության երաշխիքն է ռազմավարական նպատակներին հասնելու ճանապարհին: Եթե հիմա կառավարչական սխալներ թույլ տրվեն, ապա այս չափազանց կարևոր ու բարդ փուլում կարող ենք վտանգել Արցախի անվտանգության և զարգացման նպատակը: Իսկ դա անթույլատրելի է։ Մեր հանձնառությունը մեկն է՝ երաշխավորել հայկական Արցախի կայուն և հարատև զարգացումը»,- գրել է նա։
12:12 - 25 նոյեմբերի, 2022
Լեմկինի ինստիտուտը սատարում է Արցախի ինքնորոշման իրավունքը՝ ցեղասպանությունից խուսափելու համար

 |armenpress.am|

Լեմկինի ինստիտուտը սատարում է Արցախի ինքնորոշման իրավունքը՝ ցեղասպանությունից խուսափելու համար |armenpress.am|

armenpress.am: Ցեղասպանության կանխարգելման Լեմկինի ինստիտուտը կանգնած է Արցախի Հանրապետության ժողովրդի կողքին, որը հոկտեմբերի 30-ին Ստեփանակերտում հայտնել է ինքնորոշման իր կամքը: Այս մասին Ցեղասպանության կանխարգելման Լեմկինի ինստիտուտը հայտարարություն է տարածել՝ «Ցեղասպանության միջոցով «խաղաղություն» կամ «բարեկեցություն» գոյություն չունի» խորագրով: «Լեմկինի ինստիտուտն իր համերաշխությունն է հայտնում Արցախի Հանրապետության ժողովրդին, որը բարձրաձայնել է ինքնորոշման իր կամքի մասին: Ադրբեջանը հավակնություններ ունի Արցախի նկատմամբ՝ չնայած այդ տարածքում հազարամյակներ շարունակ բնակչության մեծամասնությունը հայեր են եղել», - գրված է հայտարարությանը կից թվիթերյան գրառման մեջ: Ինստիտուտը հիշեցնում է, որ ինքնորոշման իրավունքը միջազգային իրավական համակարգի հիմնարար իրավունքներից մեկն է, և Արցախի ժողովուրդն արժանի է այն բանին, որ միջազգային հանրությունը լրջորեն վերաբերվի ինքնորոշման նրանց պահանջներին: Հայտարարությունում նաև հակիրճ ներկայացվում է Արցախի կարգավիճակի փոփոխության պատմությունը, Արցախյան երկու պատերազմները և դրանց հետևանքով ստեղծված իրավիճակը: Ցեղասպանության կանխարգելման Լեմկինի ինստիտուտը նաև շեշտում է, որ միջազգային հանրությունը չպետք է անտեսի տարածաշրջանում Հայոց ցեղասպանության հետևանքները, որն «Արևմտյան Հայաստանում լիովին ոչնչացրեց հայկական ներկայությունը», ինչպես նաև «հայերի նկատմամբ ադրբեջանցի ազգայնականների անզուսպ ցեղասպանական թշնամանքը»: «Արևմտյան աշխարհը և հատկապես ՆԱՏՕ-ն չեն հասկանում, Արցախը «զիջելը» կնշանակի հայերի դեմ ցեղասպանության թողտվություն՝ հայերի բռնի տեղահանում և հալածանքներ, համատարած ոճրագործություններ, մշակութային ժառանգության ոչնչացում և վերջին տասնամյակների ընթացքում կովկասյան տարածաշրջանում ամենամեծ հումանիտար ճգնաժամերից մեկը, այդ թվում՝ փախստականների մեծ հոսք դեպի Հայաստանի Հանրապետություն: Եվ որ կարևոր է, հաշվի առնելով Թուրքիայում և Ադրբեջանում ցեղասպանության ներկայիս կարմիր դրոշները, ինչպես նաև այն, ինչ մենք գիտենք ցեղասպանության գործընթացի մասին ընդհանրապես, աներևակայելի է, որ Արցախի «զիջումը» վերջ կդնի հակամարտություններին տարածաշրջանում, առավել ևս՝ կհանգեցնի «խաղաղության» և «բարեկեցության», - գրված է հայտարարությունում: Լեմկինի Ինստիտուտը նաև կոչ է անում ստեղծել անկախ միջազգային հանձնաժողով, որը կուսումնասիրի Արցախում առկա խնդիրներն արդար արդյունք և կայուն խաղաղություն հաստատելու նպատակով:  
11:53 - 25 նոյեմբերի, 2022
Ադրբեջանի ՊՆ-ն մեղադրում է ռուսական կողմին Արցախում սահմանային իրավիճակը ոչ օբյեկտիվ ներկայացնելու մեջ

Ադրբեջանի ՊՆ-ն մեղադրում է ռուսական կողմին Արցախում սահմանային իրավիճակը ոչ օբյեկտիվ ներկայացնելու մեջ

Ադրբեջանի պաշտպանության նախարարությունը հաղորդագրություն է տարածել, որում դժգոհում է, որ ռուսական խաղաղապահ առաքելության հաղորդագրություններում գործածվում են Արցախի Հանրապետության հայկական տեղանունները՝ չնայած նրան, որ ադրբեջանական կողմը, ըստ հաղորդագրության, «Ղարաբաղի տնտեսական գոտու բնակավայրերի ցանկը և քարտեզը՝ ադրբեջանական տեղանուններով, պաշտոնապես տրամադրել է ՌԴ ՊՆ-ին, Ադրբեջանի տարածքում ժամանակավորապես տեղակայված ռուսական խաղաղապահ զորախմբի նախկին և ներկա հրամանատարությանը, ինչպես նաև թուրք-ռուսական միացյալ մոնիթորինգի կենտրոնին»։ Մասնավորապես՝ Ադրբեջանի պաշտպանական գերատեսչությունը մեջբերում է ՌԴ խաղաղապահ զորախմբի՝ 2022թ․ նոյեմբերի 24-ի հաղորդագրությունը, որտեղ նշվում է, որ ադրբեջանական կողմը խախտել է հրադադարի պահպանման ռեժիմը՝ կրակ բացելով Մաղավուզ բնակավայրի ուղղությամբ։ Ադրբեջանի ՊՆ-ն նշում է, թե իբր բնակավայրի անունը ոչ թե Մաղավուզ է, այլ Չարդաղլը և հերքում հրադադարի ռեժիմը խախտելու մասին ռուսական կողմի հաղորդագրությունը։ Ադրբեջանի ՊՆ-ն նաև մեղադրում է ռուսական կողմին, թե վերջինս իր պաշտոնական հաղորդագրություններում չի նշում Արցախյան կողմից հրադադարի խախտումների մասին։ Նաև նշվում է, թե Սարիբաբայում ականներ են հայտնաբերել, որոնք հայկական արտադրության են և 2021 թվականի։ «Կոչ ենք անում Ադրբեջանի տարածքում ժամանակավորապես տեղակայված ռուսական խաղաղապահ զորախմբի հրամանատարությանը համապատասխան տեղեկատվության մեջ ճիշտ նշել մեր երկրի տարածքում գտնվող բնակավայրերի տեղանունները և լրջորեն ճնշել հայկական անօրինական զորամիավորումների բոլոր սադրիչ գործողությունները, այդ թվում՝ տարածքների ականապատումը»,- նշված է Ադրբեջանի ՊՆ հաղորդագրության մեջ։ Ավելի վաղ Ադրբեջանի՝ Լաչինի միջանցքով Արցախ զինամթերք տեղափոխելու մեղադրանքներին անդրադարձել է ՀՀ հատուկ հանձնարարություններով դեսպան Էդմոն Մարուքյանը՝ նշելով, որ Ադրբեջանը Հայաստանի օկուպացված տարածքներից վերցրել է ցամաքային ականները, տեղափոխվել Լեռնային Ղարաբաղի՝ Ադրբեջանի կողմից վերահսկվող տարածք՝ միջազգային գործընկերներին ցույց տալու և Լաչինի միջանցքը վիճարկելու կեղծ հիմքեր ստեղծելու համար։
09:57 - 25 նոյեմբերի, 2022
 Քաշաթաղից տեղահանված բնակիչները  բողոքի ակցիա են իրականացրել կառավարության շենքի դիմաց |news.am|

Քաշաթաղից տեղահանված բնակիչները բողոքի ակցիա են իրականացրել կառավարության շենքի դիմաց |news.am|

news.am: Արցախից տեղահանված, տուն ու տեղ կորցրած մեր հայրենակիցները կանգնել են փաստի առջև․ Քաշաթաղից տեղահանվածներին տալիս են տան գնման սերտիֆիկատ, բայց բանկերը հրաժարվում են գումար տրամադրել, գործարք կնքել՝  նրանց կանգնեցնելով խնդրի առջև։ Այսօր՝ նոյեմբերի 24-ին, կառավարության դիմաց բողոքի ակցիա իրականացնող քաշաթաղցիներից մեկը լրագրողների հետ զրույցում նշեց, որ Արցախից տեղահանված քաղաքացիների խնդիրներն այս ընթացքում ավելացել են, որովհետեւ բնակարաններ գնելու սերտիֆիկաների բաժանումն սկսվել է: «Մոտ 4 հազար շահառու է, որ պետք է սերտիֆիկաներից օգտվի, նրանցից երեք հազարն արդեն ստացել է սերտիֆիկատները: Նրանց երեւի թե 90 տոկոսը մոտեցել են բանկերին, բայց որեւէ գործխարք անել չի հաջողվել: Այս ընթացքում ընդամենը 1-2 շահառու է կարողացել գործարք կատարել եւ ավարտին հասցնել գործարքը: մեկը նորապսակների ծրագրով են, այսինքն լրացուցիչ հիփոթեքային վարկ են վերցրել, որ կարողանան տուն առնել, երկրորդն էլ ավելի նորմալ պայմաններով բնակարան են վերցրել: Մնացածի մոտ չի ստացվում, քանի որ  մարդիկ հենց Քաշաթաղից ունեն խնդիրներ, որոնք լուծված չեն, իսկ բանկային համակարգն ունի իր կանոնները: Պետք է կառավարությունը ԿԲ-ի հետ համագործակցելով չեղարկեն այդ կանոնները, որպեսզի ամեն շահառու կարողանար բանկում կատարել իր գործարքը, ոչ թե ընկներ բանկային ողջ շղթայի մեջ; Դա եւ կանխավծարի մուծումն է, եւ տների գնահատումը եւ կադաստրի վճարումներ կատարելը եւ վարկային մաքուր պատմություն ունենալը: Այս բոլորը խանգարում է, որ մարդը կարողանա օգտագործել իր սերտիֆիկատը: Իսկ սերտիֆիկատն էլ տրվում է մեկ տարի ժամկետով, որից երեք ամիսն անցել է: Սերտիֆիկատի մեջ նաեւ գումար է նշված՝ մինչեւ 10 մլն դրամ, Երեւանի համար մինչեւ 8 մլն դրամ, սահմանամերձ գյուղերի համար՝ մինչեւ 14 մլն դրամ, եւ Արցախում՝ մինչեւ 12 մլն դրամ»,-ասաց նա: Հարցին, թե որքանով է հնարավոր 14 մլն դրամով սահմանամերձ գոտում բնակարան գնել, Քաշաթաղի բնակիչը պատասխանեց. «Սահմանամերձում ռեալ է, բայց բանկը կգնահատի՞ սահմանամերձում որեւէ տուն 14 մլն կամ 12 մլն դրամ, միանշանակ չի գնահատում բանկը: Բանկերի 90 տոկոսն ասում է՝ մենք գործարք չենք անում: Շահառուներին ասել են՝ հունվարին մոտեցեք»:
18:07 - 24 նոյեմբերի, 2022
Արցախի նախագահը մեկնաբանել է Սահմանադրության փոփոխության նախագիծը շրջանառությունից հանելու որոշումը

 |armenpress.am|

Արցախի նախագահը մեկնաբանել է Սահմանադրության փոփոխության նախագիծը շրջանառությունից հանելու որոշումը |armenpress.am|

armenpress.am: Արցախի Հանրապետության նախագահ Արայիկ Հարությունյանը պարզաբանել է, թե ինչու է Սահմանադրության փոփոխության նախագիծը շրջանառությունից հանելու որոշում կայացրել: Հարությունյանը հարցին անդրադարձել է Արցախի խորհրդարանում: Նա պարզաբանել է, որ այդ փոփոխությունն առաջարկել էր, որովհետև քաղաքական ուժերի կողմից կար կարծիք, որ ամեն ինչ կենտրոնացված է մեկ մարդու՝ երկրի նախագահի ձեռքին, իսկ նոր իշխանություն ձևավորելու համար պետք էր գնալ արտահերթ ընտրությունների, որի միակ ճանապարհը սահմանադրական փոփոխությունն է: «Մինչև այսօր համարում եմ, որ Սահմանադրության մի հոդվածով իմ առաջարկած փոփոխությունն ամենաճիշտ տարբերակն է, բայց նաև երկրի ներքին կայունությունն ավելի կարևոր եմ համարում, քան սահմանադրական փոփոխությունը: Այսօր այդ փոփոխության կարիքը, բարեբախտաբար, չկա, քանի որ այդ լիազորություններն ամբողջությամբ կենտրոնացված չեն նախագահի ձեռքում: Իհարկե, նախագահի կողմից է այդ լիազորություններով օժտվել պետնախարարը, բայց գոնե բոլոր այն մտահոգությունները, որ կար նախկինում, այսօր ֆունկցիաների բաժանման արդյունքում, կարծես, լուծվել են: Դրա համար սահմանադրական փոփոխության հարցում մենք շտապելու որևէ անհրաժեշտություն չունենք»,-ասել է նախագահ Հարությունյանը՝ նշելով, որ ի առաջարկությունների վերաբերյալ Ազգային ժողովը մտահոգություններ էր հայտնել: Հիշեցնենք, որ Արցախի Հանրապետության նախագահ Արայիկ Հարությունյանը նոյեմբերի 22-ին, հիմք ընդունելով «Ազգային ժողովի կանոնակարգ» օրենքի 62-րդ հոդվածի 3-րդ մասի 4-րդ կետը և 78-րդ հոդվածի 6-րդ մասը, դիմել է Ազգային ժողովի նախագահին՝ Արցախի Հանրապետության Սահմանադրության փոփոխության նախագիծը վերադարձնելու նպատակով՝ այն հանելով շրջանառությունից: նման որոշման համար պատճառ են հանդիսացել Արցախի Հանրապետության սահմանադրական փոփոխության նախաձեռնության իրացման ընթացքում հնչած տարաբնույթ քաղաքական գնահատականները, ինչպես նաև նախագծի վերաբերյալ հանրության շրջանում առաջացած բացասական արձագանքները, ինչը կարող էր ներքին պառակտման ու լարվածության հերթական պատճառ դառնալ:
17:50 - 23 նոյեմբերի, 2022
Ներկա ճգնաժամային իրավիճակը և մարտահրավերները պահանջում են կառավարման նոր մոտեցումներ. Ռուբեն Վարդանյան

Ներկա ճգնաժամային իրավիճակը և մարտահրավերները պահանջում են կառավարման նոր մոտեցումներ. Ռուբեն Վարդանյան

Արցախի Հանրապետության պետական նախարար Ռուբեն Վարդանյանն այսօր հանդիպում է ունեցել իր համակարգման ոլորտում գտնվող նախարարների հետ: Պետնախարարն անդրադարձել է պետական կառավարման համակարգի գործունեության սկզբունքներին՝ նշելով, որ  ներկա ճգնաժամային իրավիճակը և մարտահրավերները պահանջում են կառավարման նոր մոտեցումներ: Նա տեղեկացրել է, որ Արցախի Հանրապետության նախագահի հետ պայմանավորվածության համաձայն՝ պետական նախարարի համակարգման ոլորտում գտնվող բոլոր նախարարները  դադարեցնում են պաշտոնավարումը: Նրանցից չորսը շարունակելու են պաշտոնավարել որպես նախարարի ժամանակավոր պաշտոնակատար, իսկ հինգը՝ ազատվում են աշխատանքից, որոնց լիազորությունները ժամանակավորապես կատարելու են նախարարների տեղակալները: Պետնախարար Ռուբեն Վարդանյանը շնորհակալություն է հայտնել  բոլոր նախարարներին՝ իրենց գործունեության համար: Նա հատկապես գնահատելի  է համարել այն նախարարների աշխատանքը, ովքեր պաշտոններն ստանձնել են  անմիջապես պատերազմից հետո՝  փորձելով հաղթահարել հետպատերազմական փուլը և նշել է, որ նրանց փորձն ու գիտելիքներն օգտակար կլինեն Արցախի զարգացման համար: Հանդիպումից հետո Ռուբեն Վարդանյանը նաև քննարկում է ունեցել նախարարների  ժամանակավոր պաշտոնակատարների հետ՝ հորդորելով նրանց ամենայն պատասխանատվությամբ մոտենալ իրենց աշխատանքներին և ողջ ծավալով իրականացնել պարտականությունները:
14:58 - 23 նոյեմբերի, 2022
Արայիկ Հարությունյանը դիմել է ԱԺ նախագահին՝ Արցախի Սահմանադրության փոփոխության նախագիծը վերադարձնելու նպատակով

Արայիկ Հարությունյանը դիմել է ԱԺ նախագահին՝ Արցախի Սահմանադրության փոփոխության նախագիծը վերադարձնելու նպատակով

Արցախի Հանրապետության նախագահ Արայիկ Հարությունյանը, հիմք ընդունելով «Ազգային ժողովի կանոնակարգ» օրենքի 62-րդ հոդվածի 3-րդ մասի 4-րդ կետը և 78-րդ հոդվածի 6-րդ մասը, դիմել է Ազգային ժողովի նախագահին՝ Արցախի Հանրապետության Սահմանադրության փոփոխության նախագիծը վերադարձնելու նպատակով՝ այն հանելով շրջանառությունից: Այս մասին տեղեկացնում է ԱՀ նախագահի կայքը։ Նման որոշման համար պատճառ են հանդիսացել Արցախի Հանրապետության սահմանադրական փոփոխության նախաձեռնության իրացման ընթացքում հնչած տարաբնույթ քաղաքական գնահատականները, ինչպես նաև նախագծի վերաբերյալ հանրության շրջանում առաջացած բացասական արձագանքները, ինչը կարող էր ներքին պառակտման ու լարվածության հերթական պատճառ դառնալ: Ըստ երկրի ղեկավարի՝ ներքին համերաշխությունն ու միասնականությունը պետության ամենազորեղ ուժն են և ամենակարևոր երաշխիքը՝ պետականաշինության այս դժվարագույն փուլում առկա մարտահրավերներն արժանապատվորեն դիմագրավելու գործում: Նշվում է, որ Հանրապետության նախագահը նախաձեռնելու է լրացուցիչ քաղաքական խորհրդակցություններ սահմանադրական փոփոխությունների հետագա ընթացքի շուրջ:
14:00 - 23 նոյեմբերի, 2022
Արցախի նախագահի հրամանագրերով մի խումբ նախարարներ ազատվել են պաշտոններից

Արցախի նախագահի հրամանագրերով մի խումբ նախարարներ ազատվել են պաշտոններից

Արցախի նախագահ Արայիկ Հարությունյանը նոյեմբերի 23-ին ստորագրել է մի շարք հրամանագրեր՝ պաշտոններից ազատման վերաբերյալ, հայտնում են Արցախի նախագահի աշխատակազմից։ Համաձայն այդ հրամանագրերի՝ Միքայել Հայրիյանն ազատվել է Առողջապահության նախարարի պաշտոնից: Առողջապահության նախարարի պարտականությունները ժամանակավոր վերապահվել են նախարարի տեղակալ Արթուր Օհանջանյանին: Նորայր Մուսայելյանն ազատվել է գյուղատնտեսության նախարարի պաշտոնից: Գյուղատնտեսության նախարարի պարտականությունները ժամանակավոր վերապահվել են նախարարի առաջին տեղակալ Տիգրան Առստամյանին: Անահիտ Հակոբյանն ազատվել է կրթության, գիտության, մշակույթի և սպորտի նախարարի պաշտոնից: Կրթության, գիտության, մշակույթի և սպորտի նախարարի պարտականությունները ժամանակավոր վերապահվել են նախարարի տեղակալ Հասմիկ Մինասյանին: Արմինե Պետրոսյանն ազատվել է սոցիալական զարգացման և միգրացիայի նախարարի պաշտոնից: Սոցիալական զարգացման և միգրացիայի նախարարի պարտականությունները ժամանակավոր վերապահվել են նախարարի առաջին տեղակալ Վահրամ Առաքելյանին: Հայկ Խանումյանն ազատվել է տարածքային կառավարման և ենթակառուցվածքների նախարարի պաշտոնից: Տարածքային կառավարման և ենթակառուցվածքների նախարարի պարտականությունները ժամանակավոր վերապահվել են նախարարի առաջին տեղակալ Վարդան Բեգլարյանին: Ժիրայր Միրզոյանն ազատվել է արդարադատության նախարարի պաշտոնից և նշանակվել արդարադատության նախարարի ժամանակավոր պաշտոնակատար: Դավիթ Բաբայանն ազատվել է արտաքին գործերի նախարարի պաշտոնից և նշանակվել արտաքին գործերի նախարարի ժամանակավոր պաշտոնակատար: Արամ Սարգսյանն ազատվել է քաղաքաշինության նախարարի պաշտոնից և նշանակվել քաղաքաշինության նախարարի ժամանակավոր պաշտոնակատար: Վահրամ Բաղդասարյանն ազատվել ֆինանսների և էկոնոմիկայի նախարարի պաշտոնից և նշանակվել ֆինանսների և էկոնոմիկայի նախարարի ժամանակավոր պաշտոնակատար:  
12:07 - 23 նոյեմբերի, 2022
Արցախում կառավարության նոր կազմ է ձևավորվում, որի մեջ ես չեմ լինի. Հայկ Խանումյանը լքում է Արցախի ՏԿԵ նախարարի պաշտոնը

Արցախում կառավարության նոր կազմ է ձևավորվում, որի մեջ ես չեմ լինի. Հայկ Խանումյանը լքում է Արցախի ՏԿԵ նախարարի պաշտոնը

Նոյեմբերի 23-ին, մոտ 2 տարի պաշտոնավարելուց հետո, կդադարեմ զբաղեցնել ԱՀ Տարածքային կառավարման և ենթակառուցվածքների նախարարի պաշտոնը: Այս մասին ֆեյսբուքյան իր էջում գրել է Արցախի ՏԿԵ նախարար Հայկ Խանումյանը: «Արցախում կառավարության նոր կազմ է ձևավորվում, որի մեջ ես չեմ լինի: Կառավարությունն Արցախում ամենակազմակերպված մարմինն է և այն զգում է բոլորիս աջակցության կարիքը: Արցախի կառավարության ձախողումը, անկախ կազմից, կարող է ճակատագրական լինել ամբողջ հայության համար: Հետևաբար Արցախի կառավարությունը կարիք ունի ամբողջ հայության աջակցությանը: Շնորհակալություն եմ հայտնում ԱՀ նախագահին և կառավարության գործընկերներին՝ համատեղ աշխատանքի համար: Երախտապարտ եմ նախարարության և ենթակա կառույցների բոլոր աշխատակիցներին ճգնաժամային ու վերականգնման ժամանակաշրջանում այս ծանր բեռն իրենց ուսերին կրելու համար: Մենք աշխատել ենք՝ առանց ուշադրություն դարձնելու բազմաթիվ հարձակումներին, անարդար թիրախավորմանը, նախարարի ու նախարարության դեմ կազմակերպված արշավներին, իրենց պետական ինստիտուտների տեղ դրած թայֆաների կողմից ստեղծված շինծու քրեական գործերին: Շարունակում եմ գործել հանուն մեծ նպատակի՝ ուղղված Արցախը հայկական սուվերենության ներքո պահելուն»,- գրել է Խանումյանը:
19:02 - 22 նոյեմբերի, 2022
Ադրբեջանը այսօրվա մեջ երկրորդ անգամ ապատեղեկատվություն է տարածում, թե ՊԲ ստորաբաժանումները խախտել են հրադադարի ռեժիմը․ Արցախի ՊՆ

Ադրբեջանը այսօրվա մեջ երկրորդ անգամ ապատեղեկատվություն է տարածում, թե ՊԲ ստորաբաժանումները խախտել են հրադադարի ռեժիմը․ Արցախի ՊՆ

Նոյեմբերի 22-ին՝ օրվա ընթացքում երկրորդ անգամ, Ադրբեջանի պաշտպանության նախարարությունը հերթական ապատեղեկատվությունն է տարածել այն մասին, թե իբր ժամը 09:17-ից 14:48-ն ընկած ժամանակահատվածում, Պաշտպանության Բանակի ստորաբաժանումները տարբեր ուղղություններով խախտել են հրադադարի ռեժիմը և կրակ բացել ադրբեջանական դիրքերի ուղղությամբ։ Այս մասին հայտնում են Արցախի ՊՆ մամուլի ծառայությունից։  Հիշեցնենք, որ Ադրբեջանի ՊՆ-ն առավոտյան տարածել էր ապատեղեկատվություն այն մասին, թե իբր ՊԲ ստորաբաժանումները նոյեմբերի 21-ի ժամը 16։50-ից նոյեմբերի 22-ի ժամը 01։05-ն ընկած ժամանակահատվածում կրակ են բացել Արցախի Հանրապետության Մարտունու շրջանի օկուպացված տարածքներում տեղակայված ադրբեջանական դիրքերի ուղղությամբ։ Միևնույն ժամանակ Արցախի ՊՆ-ից հայտնել են, որ երեկ և այսօր Ադրբեջանի ԶՈՒ ստորաբաժանումները խախտել են հրադադարի ռեժիմը՝ հրաձգային զինատեսակներից կրակ բացելով ՊԲ դիրքերի, ինչպես նաև Մաճկալաշեն գյուղի մերձակայքում գտնվող հողատարածքների ուղղությամբ։ 
17:50 - 22 նոյեմբերի, 2022