Ֆինլանդիա

Հայաստանի և Ֆինլանդիայի ԱԳ նախարարները քննարկել են ՀՀ-ԵՄ գործընկերության օրակարգային հարցեր

Հելսինկիում կայացել է ՀՀ ԱԳ նախարար Արարատ Միրզոյանի և Ֆինլանդիայի ԱԳ նախարար Էլինա Վալտոնենի առանձնազրույցը: Նախարարները քննարկել են երկկողմ օրակարգի, ՀՀ-ԵՄ գործընկերության խորացման, ինչպես նաև տարածաշրջանային զարգացումներին վերաբերող հարցեր, որին հաջորդել է ընդլայնված կազմով հանդիպում։ Ինչպես հայտում են ՀՀ ԱԳՆ-ից, զրուցակիցները քննարկել են քաղաքական երկխոսությանը զուգահեռ ոլորտային տարբեր ուղղություններով համագործակցության զարգացման հնարավորությունները, այդ թվում՝ առևտրի, գործարար կապերի, տեղեկատվական տեխնոլոգիաների և կրթության ոլորտներում։ Առանձնանշվել են ժողովրդավարական ինստիտուտների ամրապնդման ուղղությամբ ՀՀ կողմից իրականացվող շարունակական բարեփոխումները և այդ հարցում Ֆինլանդիայի կողմից աջակցության ծրագրերը։ Արարատ Միրզոյանը և Էլինա Վալտոնենը հանգամանալից քննարկել են ՀՀ-ԵՄ գործընկերության օրակարգային հարցեր։ Անդրադարձ է կատարվել հարաբերությունների զարգացման դինամիկային, այդ ուղղությամբ հասարակության շրջանում ակտիվ քննարկումներին, մշակվող գործընկերության նոր օրակարգի լայն շրջանակին և հնարավոր հեռանկարներին։ ԵՄ կառույցների և անդամ երկրների հետ համագործակցությամբ կիրառվող կարևոր գործիքների շարքում մատնանշվել են վիզաների ազատականացման շուրջ երկխոսության մեկնարկը, Եվրոպական խաղաղության գործիքի ներքո ՀՀ-ին աջակցության տրամադրումը, ինչպես նաև ԵՄ մշտադիտարկման առաքելության գործունեության կարևորությունը։ Անդրադարձ է կատարվել բազմակողմ հարթակներում փոխգործակցությանը, այդ թվում՝ ԵԱՀԿ-ում Ֆինլանդիայի առաջիկա նախագահության շրջանակներում։ Հայաստանի և Ֆինլանդիայի ԱԳ նախարարները մտքեր են փոխանակել տարածաշրջանային հարցերի շուրջ։ Նախարար Միրզոյանը ներկայացրել է հարևանների հետ հարաբերությունների կարգավորման ուղղությամբ գործադրվող ջանքերը։ Հարավային Կովկասում հարատև կայունության հաստատման համատեքստում Արարատ Միրզոյանը շեշտել է Հայաստանի և Ադրբեջանի միջև խաղաղության պայմանագրի կնքման կարևորությունը, ինչպես նաև տարածաշրջանային հաղորդակցությունների ապաշրջափակման ՀՀ տեսլականը։

Այսօր 18:25

Հելսինկիում կայացել է Հայաստանի և Ֆինլանդիայի արտաքին գործերի նախարարների առանձնազրույցը

Հելսինկիում կայացել է Հայաստանի արտաքին գործերի նախարար Արարատ Միրզոյանի և Ֆինլանդիայի արտաքին գործերի նախարար Էլինա Վալտոնենի առանձնազրույցը: Այս մասին հաղորդագրություն է տարածել ՀՀ արտաքին գործերի նախարարությունը։ Նախարարները քննարկել են երկկողմ օրակարգի, ՀՀ-ԵՄ գործընկերության խորացման, ինչպես նաև տարածաշրջանային զարգացումներին վերաբերող հարցեր։

Այսօր 17:07

ՀՀ ԱԳ նախարարը և Ֆինլանդիայի խորհրդարանի նախագահը մտքեր են փոխանակել երկու երկրների քաղաքական երկխոսության խորացման վերաբերյալ

Նոյեմբերի 28-ին Հելսինկի աշխատանքային այցի շրջանակներում ՀՀ արտաքին գործերի նախարար Արարատ Միրզոյանը հանդիպում է ունեցել Ֆինլանդիայի խորհրդարանի (Էդուսկունտա) նախագահ Յուսսի Հալլա-ահոյի հետ։ Ինչպես հայտնում են ՀՀ ԱԳՆ-ից, զրուցակիցները քննարկել են Հայաստանի և Ֆինլանդիայի միջև երկկողմ համագործակցության օրակարգային հարցեր։ Մտքեր են փոխանակվել երկու երկրների միջև քաղաքական երկխոսության խորացման ուղղությամբ իրականացվող քայլերի և հեռանկարների շուրջ՝ շեշտելով գործընթացում ակտիվ միջխորհրդարանական կապերի կարևորությունը։ Հայաստանի ԱԳ նախարարը և Ֆինլանդիայի խորհրդարանի նախագահն ընդգծել են նաև ԵՄ ու փոխադարձ հետաքրքություն ներկայացնող այլ ձևաչափերով փոխգործակցության հարցում հետաքրքրությունը՝ հիմնված ընդհանուր ժողովրդավարական արժեքների, դիմակայության ամրապնդման ու կայուն զարգացման նպատակների վրա։ «Մենք տեսնում ենք լայն հնարավորություններ Հայաստանի և Ֆինլանդիայի միջև ձևավորված ակտիվ քաղաքական երկխոսությանը համահունչ կառուցելու համագործակցության հավակնոտ օրակարգ, որը կներառի փոխադարձ հետաքրքրություն ներկայացնող բոլոր ոլորտները, ինչպես նաև ԵՄ գործիքները»,- նշել է նախարար Միրզոյանը։ Արարատ Միրզոյանը և Յուսսի Հալլա-ահոն մտքեր են փոխանակել տարածաշրջանային հարցերի և առկա մարտահրավերների շուրջ: Այս համատեքստում ՀՀ ԱԳ նախարարը զրուցակցին ներկայացրել է Հարավային Կովկասում կայուն խաղաղության հաստատման ՀՀ տեսլականը, այդ թվում՝ Հայաստանի և Ադրբեջանի միջև հարաբերությունների կարգավորման գործընթացի վերջին զարգացումները: Որպես խաղաղության օրակարգի կարևոր բաղադրիչ՝ նախարար Միրզոյանն անդրադարձել է ՀՀ կառավարության կողմից մշակված «Խաղաղության խաչմերուկի» ծրագրին, դրա կյանքի կոչման ուղղությամբ ընթացիկ քննարկումներին։ Հանդիպման ավարտին նախարար Միրզոյանը գրառում է կատարել խորհրդարանի պատվավոր հյուրերի մատյանում։

Այսօր 14:54

Նոյեմբերի 28-29-ը Արարատ Միրզոյանն աշխատանքային այցով կլինի Ֆինլանդիայում

Նոյեմբերի 28-29-ը ՀՀ ԱԳ նախարար Արարատ Միրզոյանն աշխատանքային այցով կգտնվի Ֆինլանդիայում: Կայանալու է հանդիպում Ֆինլանդիայի ԱԳ նախարար Էլինա Վալտոնենի հետ: Հանդիպումներ են ծրագրված Ֆինլանդիայի գործադիր և օրենսդիր շրջանակների նաև այլ բարձրաստիճան պաշտոնյաների հետ: Այս մասին տեղեկացնում է ՀՀ ԱԳՆ մամուլի խոսնակ Անի Բադալյանը: «Մենք պատրաստակամ ենք շարունակաբար ընդլայնել քաղաքական երկխոսությունն ու համագործակցությունը Ֆինլանդիայի հետ՝ ինչպես երկկողմ, այնպես էլ բազմակողմ ձևաչափերով։ Ժողովրդավարական բարեփոխումների խթանմանը զուգահեռ կա մեծ ներուժ տնտեսական կապերի ամրապնդման և այլ ոլորտներում համագործակցության զարգացման համար։ Ակնկալում եմ արդյունավետ քննարկումներ Հելսինկիում»,- ասել է ԱԳ նախարարը:

16:06 - 27 նոյեմբերի, 2024

Հայաստանի արտաքին գործերի նախարարը կայցելի Ֆինլանդիա |armenpress.am|

armenpress.am: Հայաստանի Հանրապետության արտաքին գործերի նախարար Արարատ Միրզոյանը Ֆինլանդիայի ԱԳ նախարար Էլինա Վալտոնենի հրավերով կայցելի Հելսինկի․ Միրզոյանը Հելսինկիում կգտնվի նոյեմբերի 28-29-ը։ Այս մասին նշված է Ֆինլանդիայի ԱԳ նախարարության տարածած մամուլի հաղորդագրության մեջ։ Նշվում է, որ արտգործնախարարները կանդրադառնան Հայաստան-Ֆինլանդիա երկկողմ հարաբերություններին, Հայաստանի և Եվրամիության հարաբերություններին, ԵԱՀԿ-ում Ֆինլանդիայի առաջիկա նախագահությանը և տարածաշրջանային հարցերի։ «Ֆինլանդիան ու Հայաստանը երկկողմ լավ հարաբերություններ ունեն։ Արտաքին գործերի նախարար Միրզոյանի այցը հնարավորություն կտա քննարկել համագործակցության սերտացումը։ Ֆինլանդիան վճռականորեն աջակցում է Եվրամիությանը մերձենալու Հայաստանի ջանքերին և խրախուսում է երկրին՝ շարունակել ժողովրդավարական զարգացման ուղին»,- նշել է Ֆինլանդիայի ԱԳ նախարար Էլինա Վալտոնենը։ Ֆինլանդիա այցի ընթացքում ՀՀ ԱԳ նախարարը կհանդիպի նաև երկրի նախագահ Ալեքսանդր Ստուբի, խորհրդարանի նախագահ Յուսի Հալլա-Ահոյի և Եվրոպական հարցերի և սեփականության հարցերով նախարար Յոակիմ Ստրենդի հետ։

14:10 - 27 նոյեմբերի, 2024

Հայաստանը հրավիրվել է COP29-ին, մասնակցել-չմասնակցելն իրենց որոշումն է․ Ալիև |factor.am|

factor.am: Բաքվում անցկացվող COP29-ի շրջանակում Ադրբեջանի նախագահ Իլհամ Ալիևը հանդիպել է Ֆինլանդիայի նախագահ Ալեքսանդր Ստուբի հետ։ Վերջինը նշել է, որ Հելսինկին աջակցում է Հայաստանի և Ադրբեջանի միջև խաղաղության օրակարգը և շահագրգռված է այն առաջ տանելու հարցում։ Հայտարարելով, թե «ԵԱՀԿ Մինսկի խումբն արդեն պատմության անբաժանելի մաս է՝ Ալիևն ընդգծել է, որ Ադրբեջանն աջակցում է խաղաղության օրակարգին»։ Ալիևը նաև ասել է, որ «Հայաստանին հրավեր է ուղարկվել՝ մասնակցելու COP29 գագաթնաժողովին, սակայն մասնակցել-չմասնակցելը Հայաստանի որոշումն է»։ Զրույցի ընթացքում մտքեր են փոխանակվել նաև երկկողմ օրակարգի հարցերի շուրջ։

18:03 - 11 նոյեմբերի, 2024

Ֆինլանդիայի նախագահը Հայաստանի և Ադրբեջանի ղեկավարների հետ քննարկել է ԵԱՀԿ-ում ապագա ղեկավարումը |news.am|

news.am: Ֆինլանդիայի նախագահ Ալեքսանդր Ստուբը հայտարարել է, որ ինքը քննարկել է Ադրբեջանի և Հայաստանի առաջնորդներ Իլհամ Ալիևի և Նիկոլ Փաշինյանի, ինչպես նաև չճանաչված Կոսովոյի ղեկավար Վյոսա Օսմանիի հետ ԵԱՀԿ-ում Հելսինկյան առաջիկա նախագահության հարցը։ Ինչպես նա գրել է X-ում, հանդիպումները կայացել են Եվրոպական քաղաքական համայնքի գագաթնաժողովի շրջանակներում։ «Այլ թեմաների թվում մենք քննարկել ենք եվրոպական անվտանգությունը, Ուկրաինան, տարածաշրջանային խնդիրները և ԵԱՀԿ-ում Ֆինլանդիայի առաջիկա նախագահությունը»,- նշել է Ստուբը։ Ֆինլանդիան կնախագահի ԵԱՀԿ-ն կազմակերպության հոբելյանական տարում՝ 2025 թվականին։ ԵԱՀԿ անդամ պետությունը մեկ օրացուցային տարի կատարում է կառույցի գործող նախագահի լիազորությունները:

09:42 - 19 հուլիսի, 2024

Տեղի է ունեցել ՀՀ վարչապետի և Ֆինլանդիայի նախագահի հանդիպումը

Եվրոպական քաղաքական համայնքի 4-րդ գագաթնաժողովի շրջանակում տեղի է ունեցել Հայաստանի վարչապետ Նիկոլ Փաշինյանի հանդիպումը Ֆինլանդիայի նախագահ Ալեքսանդր Ստուբի հետ: Ինչպես տեղեկանում ենք վարչապետի աշխատակազմի տարածած հաղորդագրությունից, զրուցակիցները քննարկել են Հայաստան-Ֆինլանդիա հարաբերությունների հետագա զարգացմանն ու ընդլայնմանը վերաբերող հարցեր: Մասնավորապես, կարևորվել է տնտեսական փոխգործակցության ընդլայնման ուղղությամբ հետևողական քայլերի իրականացումը: Նիկոլ Փաշինյանը և Ալեքսանդր Ստուբն անդրադարձ են կատարել Հայաստան-Եվրոպական միություն համագործակցության խորացմանը, ՀՀ-ում իրականացվող ժողովրդավարական բարեփոխումներին, ինչպես նաև Հայաստան-Ադրբեջան խաղաղության գործընթացին և տարածաշրջանային անվտանգությանը վերաբերող հարցերի:

15:30 - 18 հուլիսի, 2024

Նիկոլ Փաշինյանն ու Ալեքսանդր Ստուբը քննարկել են Հայաստան-Ֆինլանդիա հարաբերությունների զարգացմանը վերաբերող հարցեր |1lurer.am|

1lurer.am: Տեղի է ունեցել վարչապետ Նիկոլ Փաշինյանի հեռախոսազրույցը Ֆինլանդիայի նախագահ Ալեքսանդր Ստուբի հետ: Զրուցակիցները քննարկել են Հայաստան-Ֆինլանդիա հարաբերությունների հետագա զարգացմանն ու ընդլայնմանը վերաբերող հարցեր: Մասնավորապես, կարևորվել է տնտեսական փոխգործակցության ընդլայնման ուղղությամբ հետևողական քայլերի իրականացումը: Նիկոլ Փաշինյանը և Ալեքսանդր Ստուբն անդրադարձ են կատարել Հայաստան-Եվրոպական միություն համագործակցության խորացմանը, մեր երկրում իրականացվող ժողովրդավարական բարեփոխումներին, ինչպես նաև Հայաստան-Ադրբեջան խաղաղության գործընթացին և տարածաշրջանային անվտանգությանը վերաբերող հարցերի:

15:24 - 04 հունիսի, 2024

ՌԴ-ում Ֆինլանդիայի նոր դեսպանը կդառնա Մարյա Լիիվալան, Մոսկվան արդեն տվել է ագրեմանը |news.am|

news.am: Ռուսաստանում Ֆինլանդիայի նոր դեսպանը կլինի Մարյա Լիիվալան. Ռուսաստանի Դաշնությունն արդեն ստորագրել է ագրեմանը (դեսպան ընդունելու համաձայնություն) նրա նշանակման համար, հարցազրույցում ասել է ՌԴ ԱԳՆ երկրորդ եվրոպական դեպարտամենտի տնօրեն Սերգեյ Բելյաևը. ՏԱՍՍ-ի հետ։ «Ֆինլանդիայի նախագահի աշխատակազմը հրապարակել է ֆիննական պետության ղեկավարի որոշումը՝ սեպտեմբերի 1-ից Մարյա Լիիվալային Ռուսաստանի Դաշնությունում Ֆինլանդիայի դեսպան նշանակելու մասին։ Այս որոշումը կարող էր կայացվել միայն ռուսական կողմի ագրեմանը ստանալուց հետո»,- ասել է դիվանագետը։ Շարունակությունը` սկզբնաղբյուր կայքում։

11:24 - 11 մայիսի, 2024

Արմեն Գրիգորյանը Ֆինլանդիայում ԵԱՀԿ ԽՎ նախագահի հետ հանդիպմանը կարևորել է կառույցի դերը երկրների միջև խաղաղության հաստատման գործընթացում

Ապրիլի 10-ին ՀՀ ԱԽ քարտուղար Արմեն Գրիգորյանը Ֆինլանդիա այցի ընթացքում աշխատանքային նախաճաշ է ունեցել Ֆինլանդիայի պառլամենտի պատգամավոր, արտաքին գործերի հանձնաժողովի նախագահ Կիմմո Կիլյունենի և ՀՀ հարցերով ԵԽԽՎ զեկուցող, ԵԱՀԿ խորհրդարանական վեհաժողովի նախագահ Պիա Կաումայի հետ: Մասնակիցները քննարկել են Հայաստանում ժողովրդավարական բարեփոխումների իրականացման գործընթացը, ՀՀ-ԵՄ հարաբերություններն ու դրանց ավելի սերտացումը տարբեր ոլորտներում, ինչպես նաև Հայաստան-Ֆինլանդիա համագործակցային հարաբերությունները: Հանդիպման մասնակիցները կարևորել են ԵԱՀԿ Խորհրդարանական վեհաժողովի դերը երկրների միջև խաղաղության հաստատման գործընթացում:

15:09 - 10 ապրիլի, 2024

ԱԽ քարտուղարը Ֆինլանդիայի ԱԳՆ-ում քննարկմանը ներկայացրել է ՀՀ արտաքին քաղաքականությունը

ՀՀ ԱԽ քարտուղար Արմեն Գրիգորյանը Ֆինլանդիա կատարած աշխատանքային այցի ընթացքում կլոր-սեղան քննարկում է անցկացրել Ֆինլանդիայի Արտաքին գործերի նախարարությունում: Այս մասին տեղեկացնում են ԱԽ գրասենյակից: Քննարկմանն ԱԽ քարտուղարը ներկայացրել է ՀՀ արտաքին քաղաքականությունը, ՀՀ-ԵՄ հարաբերությունների զարգացումը, ապրիլի 5-ի ՀՀ-ԵՄ-ԱՄՆ հանդիպման մանրամասները և պատասխանել ներկաների հարցերին:

16:56 - 09 ապրիլի, 2024

Բրյուսելում կայացել է Հայաստանի և Ֆինլանդիայի վարչապետների հանդիպումը

Բրյուսելում կայացել է Հայաստանի և Ֆինլանդիայի վարչապետներ Նիկոլ Փաշինյանի և Պետեր Օրփոյի հանդիպումը: Այս մասին հայտնում են ՀՀ վարչապետի աշխատակազմից։ Անդրադարձ է կատարվել Հայաստանի և Ֆինլանդիայի միջև երկկողմ համագործակցության հարցերին։ Զրուցակիցները մտքեր են փոխանակել Հայաստանի և Եվրոպական միության միջև համապարփակ գործընկերության օրակարգի, ընդլայնման և փոխգործակցության խորացման հեռանկարների շուրջ։ Երկուստեք կարևորվել են վերջին տարիներին Հայաստանում իրականացվող ժողովրդավարական բարեփոխումներն ու ժողովրդավարական ինստիտուտների ամրապնդմանը միտված հայեցակարգերն ու իրականացվող ծրագրերը։ ՀՀ վարչապետը ներկայացրել է ՀՀ կառավարության կողմից մշակված «Խաղաղության խաչմերուկ» նախագիծը՝ որպես տնտեսական փոխկապակցվածության ապահովման և Հարավային Կովկասում խաղաղության կարևոր երաշխիք։

17:27 - 21 մարտի, 2024

Ֆինլանդիայի դեսպանը խոր մտահոգություն է հայտնել Ադրբեջանի կողմից իրականացված ռազմական սադրանքի առնչությամբ

ՀՀ ԱԺ նախագահ Ալեն Սիմոնյանը փետրվարի 13-ին ընդունել է Հայաստանի Հանրապետությունում Ֆինլանդիայի արտակարգ և լիազոր դեսպան Կիրստի Նարինենին: Այս մասին հայտնում են ԱԺ-ից: Զրույցի սկզբում կողմերը կարևորել են Հայաստանի և Ֆինլանդիայի միջև երկկողմ հարաբերությունների զարգացումը միջպետական և միջխորհրդարանական համագործակցության խթանման միջոցով: Քննարկվել է խորհրդարանական բարեկամական խմբերի շրջանակում փոխգործակցության ընդլայնման և զարգացման անհրաժեշտությունը: Անդրադառնալով տարածաշրջանային խնդիրներին՝ ԱԺ նախագահը դեսպանին է ներկայացրել փետրվարի 13-ի առավոտյան Ադրբեջանի կողմից իրականացված ռազմական սադրանքը, որի հետևանքով հայկական կողմն ունի զոհեր և վիրավորներ: Դեսպանն իր խոր մտահոգությունն է հայտնել դեպքի առնչությամբ և ընդգծել, որ Ֆինլանդիան միջազգային գործընկերների հետ կշարունակի հետևել Հարավային Կովկասում անվտանգության և խաղաղության հաստատման գործընթացին՝ փորձելով նպաստել խաղաղության հաստատմանը: Անդրադառնալով ինստիտուցիոնալ բարեփոխումներին՝ դեսպան Կիրստի Նարինենը բարձր է գնահատել Հայաստանում առկա ժողովրդավարական գործընթացները: Քննարկվել են Հայաստան-Եվրամիություն, Հայաստան-Ֆինլանդիա հարաբերությունների ընդլայնմանը վերաբերող հարցեր:

14:55 - 13 փետրվարի, 2024

Ֆինլանդիայի նախագահական ընտրություններում հաղթել է նախկին վարչապետ Ստուբը |azatutyun.am|

azatutyun.am: Ֆինլանդիայի նախագահական ընտրությունների երկրորդ փուլում, ձայների 100 տոկոսի հաշվարկով, հաղթել է երկրի նախկին վարչապետ Ալեքսանդր Ստուբը (Ազգային կոալիցիա կուսակցություն)՝ հավաքելով ձայների 51,6 տոկոսը։ Ձայների 48,4 տոկոսով՝ երկրորդ տեղում Ֆինլանդիայի նախկին արտգործնախարար Պեկկա Հաավիստոն է (Կանաչների կուսակցություն)։ Նախագահի երդմնակալության արարողությունը տեղի կունենա մարտի 1-ին։ Ֆինլանդիան երեկ երկրորդ փուլով նախագահ էր ընտրում: Ընտրությունների առաջին փուլը հունվարի 28-ին էր։ Առաջին փուլում Ֆինլանդիայի նախագահի պաշտոնի համար 9 թեկնածու էր պայաքարում։

10:53 - 12 փետրվարի, 2024

Թուրքիայի խորհրդարանի օրակարգում այսօր կներառվի ՆԱՏՕ-ին Շվեդիայի անդամակցության հայտի քննարկումը |factor.am|

factor.am: Թուրքիայի խորհրդարանի այսօրվա նիստի ամենակարևոր օրակարգային հարցերից է լինելու ՆԱՏՕ-ին Շվեդիայի անդամակցության հայտի քննարկումը, հայտնում է TRT Haber-ը։ Նշվում է, որ քննարկումից հետո այն ներկայացվելու է խորհրդարանի անդամների քվեարկությանը։ Ըստ թուրքական մամուլի տեղեկությունների՝ քվեարկությունը տեղի է ունենալու այս շաբաթ, սակայն հստակ օր չի նշվում։ Հիշեցնենք, որ ՆԱՏՕ-ին Շվեդիայի անդամակցության հայտն առաջին անգամ խորհրդարանի արտաքին հարաբերությունների հանձնաժողովի օրակարգ է բերվել անցյալ տարվա նոյեմբերի 16-ին։ Դեկտեմբերի 26-ին անդամակցության արձանագրությունն ընդունվել է խորհրդարանի արտաքին հարաբերությունների հանձնաժողովի կողմից: Ֆինլանդիան և Շվեդիան ՆԱՏՕ-ին միանալու համար դիմել էին Ուկրաինա ՌԴ ներխուժումից հետո։ Անկարան Ֆինլանդիայի հայտը վավերացրել էր 2023 թվականի մարտին, իսկ Շվեդիայի հայտի դեպքում տարբեր նախապայմաններ է առաջ քաշում։

15:30 - 23 հունվարի, 2024