Արագածոտնի մարզ

ՀՀ Արագածոտնի մարզը հիմնադրվել է 1996 թվականին: Մարզի տարածքը կազմում է 2753 քառ. կմ եւ զբաղեցնում է ՀՀ տարածքի 9.3 %-ը: Մարզն իր մեջ ընդգրկում է Աշտարակի, Թալինի, Ապարանի և Արագածի նախկին շրջանները: 

Ծովի մակերեւույթից 2000-2500 մետր բարձրության վրա: Մարզի 19 համայնքներ ունեն լեռնային, իսկ 40 համայնքներ` բարձր լեռնայինի կարգավիճակ: Բնակչության թվաքանակը 2019 թ.հուլիսի 1-ի դրությամբ կազմում է 161774 մարդ: Մարզում կա 72 համայնք:

ՀՀ տարածքում կան փակ ավտոճանապարհներ

ՀՀ տարածքում կան փակ ավտոճանապարհներ

Արտակարգ իրավիճակների նախարարությունը տեղեկացնում է, որ ՀՀ տարածքում կան փակ ավտոճանապարհներ։ Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները: Լոռու մարզում, Սյունիքի մարզի Գորիս, Տավուշի մարզի Դիլիջան քաղաքներում, Դիլիջանի ոլորաններում և Արագածոտնի մարզի Ծաղկահովիտի տարածաշրջանում տեղում է ձյուն։ Վարդենյաց լեռնանցքում, Սարավան-«Զանգեր» հատվածում, Տավուշի մարզի Դիլիջանի ոլորաններում, Նոյեմբերյան քաղաքում, Սյունիքի մարզի բարձրադիր գոտիներում և Գորիս քաղաքում մառախուղ է։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։
10:14 - 03 դեկտեմբերի, 2022
Հոկտեմբերի 24-ին ժամանակավորապես կդադարեցվի մի շարք հասցեների էլեկտրամատակարարումը

Հոկտեմբերի 24-ին ժամանակավորապես կդադարեցվի մի շարք հասցեների էլեկտրամատակարարումը

«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ հոկտեմբերի 24-ին պլանային նորոգման աշխատանքներ իրականացնելու նպատակով ժամանակավորապես կդադարեցվի հետևյալ հասցեների էլեկտրամատակարարումը` Երևանի քաղաքի՝ 10:00-16:00 Աբելյան փ. 47 շենքի բնակիչ-բաժանորդներ, 11:00-15:00 Նուբարաշեն 11 փողոցի առանձնատներ, 11:00-16:00 Նուբարաշեն 6փ. 26, 28; 8փ. 2-18; 10փ. 1-12; 12փ. 1-12 առանձնատներ, 11:00-17:00 «Դատապարտյալների հիվանդանոց» քրեակատարողական հիմնարկ, թիվ 143 մանկապարտեզ, «Ա. Տիգրանյանի անվան երաժշտական դպրոց» ՀՈԱԿ,Զինկոմիսարիատ, Բագրատունյաց պող․ 4, 6, 8, 10 շենքեր, Բագրատունյաց պող. 1-ին նրբ․ 3, 7, 9, 11, 13, 15 շենքեր, Արտաշիսյան փ․ 40/8, 42/6, 42/7, 44/4ա, 44/3, 44/4, 44/5, 45/20, 45/21, 47/19, 49/19ա, 51/16, 51/17, 51/18 շենքեր և հարակից ոչ բնակիչ- բաժանորդներ, Նորագավիթ թաղ. 1, 2, 6 փողոցների առանձնատներ, Նորագավիթ թաղ. 1-ին փողոցի 1-ին փակուղու առանձնատներ և հարակից ոչ բնակիչ- բաժանորդներ, Նորագավիթ թաղ. 2-րդ փողոցի 1-ին նրբանցքի առանձնատներ, Նորագավիթ թաղ. 6-րդ փողոցի 6-րդ փակուղու առանձնատներ, Համբարձումյան փ. 10, 12, 45/2, 47 շենքեր և 37-67Ա առանձնատներ, Արաբկիր 23փ. 1/2; 25փ. 2, 2/1, 17; 27փ. 6/2, 9 շենքեր, Արաբկիր 27փ. 1-13 առանձնատներ, Արաբկիր 25 փողոցի առանձնատներ, Ռիգայի փ. 126/4 շենք, Վերին Անտառային փ. 9-192/2, 13/4, 27/1 121/7, 124/1, 133, 135, 136/3, 138/2, 138/6 շենքեր և 1-186/13 առանձնատներ, Անտառային փ. 11-220 շենքեր և 1-148/5 առանձնատներ, Լեռ Կամսարի փ. 30/3, 40/2 շենքեր, Լեոնիդ Ազգալդյան փ. 12/5, 12/6 շենքեր, Աղբյուր Սերոբի փ. 52/20 շենքեր, Գևորգ Էմինի փ. 22 շենք։Արմավիրի մարզի՝ 11:00-17:00 Լենուղի, Այգեվան, Հուշակերտ, Արաքս, Նոր Ամասիա և Նալբանդյան գյուղեր, Արարատի մարզի՝ 11:00-16:00 Արտաշատ քաղաք՝ Թումանյան, Մարքսի, Իսակովի, Աճառյան, Արազի, Այվազովսկու, Բակունցի, Բուդաղյան, Թորոմոնյան, Կասյան, Ներսիսյան, Դուրյան, Օգոստոսի 23-ի և Օրբելի փողոցներ մասնակի, Վայոց Ձորի մարզի՝ 11:00-15:00 Գլաձոր գյուղ մասնակի, Կոտայքի մարզի՝ 11։00-17։00 Կոտայք և Կաթնաղբյուր գյուղեր մասնակի, Ջրվեժի և Ձորաղբյուրի ամառանոցներ մասնակի, Գեղարքունիքի մարզի՝ 10։30–16:30 Լիճք բնակավայրն ամբողջությամբ և հարակից ոչ բնակիչ- բաժանորդներ, Տավուշի մարզի` 11:00-13:00 Գետահովիտ գյուղ, գազի լցակայաններ, բջջային կայաններ և հարակից ոչ բնակիչ-բաժանորդներ, 16:30-17:30 Ջուջևան, Ոսկեպար, Բարեկավան գյուղեր, գազի լցակայաններ, բջջային կայաններ և հարակից ոչ բնակիչ-բաժանորդներ, Շիրակի մարզի՝ 10:00-14:00 Աշոցքի տարածաշրջան՝ Բավրա գյուղի 3-րդ փողոց մասնակի։Ձեր իրավունքներին կամ պարտականություններին վերաբերող, ինչպես նաև այլ հարցերի առնչությամբ կարող եք զանգահարել 1-80 և 0 8000 0 180 շուրջօրյա գործող հեռախոսահամարներով: «Հայաստանի էլեկտրական ցանցեր» ընկերությունը հորդորում է հետևել էլեկտրաանվտանգության կանոններին:
12:01 - 22 հոկտեմբերի, 2022
Արագածոտնի մարզպետարանը հերքել է լուրը, թե Արագածավան թուրքեր են մտել ու գերի տարել հովիվների

Արագածոտնի մարզպետարանը հերքել է լուրը, թե Արագածավան թուրքեր են մտել ու գերի տարել հովիվների

Արագածավան ոչ մի թուրք չի մտել, ոչ մի հովիվ գերի չէ։ Այս մասին հայտնում են Արագածոտնի մարզպետարանից՝ ի պատասխան 168.am լրատվական կայքում տեղ գտած՝ «Ինչ է կատարվում Արագածավանում» վերտառությամբ հրապարակմանը։  «Հայտնում ենք, որ լուրը բացարձակապես չի համապատասխանում իրականությանը։ Արագածավան ոչ մի թուրք չի մտել, ոչ մի հովիվ գերի չէ։ Չենք բացառում, որ կեղծ ահազանգը կարող էր որևէ մեկի կամ մի խումբ անձանց նենգ ու ոչ ողջամիտ արարքը լինել»-,- նշված է համայանքապետարանի տարածած հաղորդագրության մեջ։    Իսկ Արագածավան խոշորացված համայնքի համայնքապետ Արթուր Հովսեփյանը «Հայկական ժամանակ»-ի հետ զրույցում տեղեկացրեց, որ գյուղից դուրս` դեպի Թուրքիայի սահման գտնվող ֆերմայի բանվորները ռուս սահմանապահների հսկողությամբ անցաթղթով են ելումուտ անում նշված տարածք: Նրանք մնացել են սահմանից այն կողմ, ահազանգել են այդ մասին, և ռուս սահմանապահներն արձագանքել ու բանվորներին վերադարձրել են Հայաստանի սահման։ Արթուր Հովսեփյանը նաև վստահեցրեց, որ գյուղում որևէ թուրք չի եղել և չկա։ Դեպքի մասին ավելի հստակ մանրամասներ ԱԱԾ-ից պարզելու պարագայում, համայնքապետը կտեղեկացնի հավելյալ: Հիշեցնենք, որ երեկ երեկոյան 168․am-ը տեղեկություն հրապարակեց, որ իրենց ընթերցողները հայտնել են՝ Արագածավան համայնք երեք զինված թուրքեր են մտել, ութ հովիվների՝ իրենց անասուններով, գերի են վերցրել, որոշ ժամանակ անց ռուսական կողմի միջնորդությամբ սկզբում անասուններին են բաց թողել, այնուհետև հովիվներին:
09:28 - 22 հուլիսի, 2022
Փոխվարչապետ Մաթևոսյանը Արագածոտնի մարզում ծանոթացել  է սուբվենցիոն ծրագրերով իրականացված և իրականացվող աշխատանքներին

Փոխվարչապետ Մաթևոսյանը Արագածոտնի մարզում ծանոթացել է սուբվենցիոն ծրագրերով իրականացված և իրականացվող աշխատանքներին

Փոխվարչապետ Համբարձում Մաթևոսյանը հունիսի 29-ին այցելել է Արագածոտնի մարզ, ծանոթացել համայնքների տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերով իրականացված և իրականացման փուլում գտնվող աշխատանքներին։ Այցի ընթացքում փոխվարչապետին ուղեկցել են Արագածոտնի մարզպետ Սերգեյ Մովսիսյանը, Էկոնոմիկայի նախարարի տեղակալ Արման Խոջոյանը, Քաղաքաշինության կոմիտեի նախագահ Արմեն Ղուլարյանը, Ջրային կոմիտեի նախագահ Վահագն Գևորգյանը, Աշտարակի և Թալինի համայնքապետերը, այլք։ Աշխատանքային այցի առաջին կանգառը Թալինի հիմնանորոգվող բժշկական կենտրոնի շինհրապարակում էր։ Քաղաքաշինության կոմիտեի նախագահը, ներկայացնելով ծրագրի մանրամասները, տեղեկացրել է, որ շինարարական աշխատանքները, որոնք մեկնարկել են 2021 թվականի հունիսին, նախատեսում են ավարտել ու հիվանդանոցը շահագործման հանձնել 2023 թվականի տարեվերջին։ Փոխվարչապետ Մաթևոսյանը շրջել է շինհրապարակում, զրուցել բուժանձնակազմի հետ, բժշկական կենտրոնի ղեկավար կազմի հետ քննարկել զարգացման ծրագրերը։ Աշխատանքային այցի ընթացքում Համբարձում Մաթևոսյանը եղել է նաև Գառնահովիտ բնակավայրում կառուցվող մոդուլային դպրոցի տարածքում, ծանոթացել է իրականացվող աշխատանքներին։ Դպրոցի ուսուցչական անձնակազմի հետ զրույցում փոխվարչապետը հորդորել է նրանց մասնակցել ատեստավորման գործընթացին, մասնագիտական որակավորումը բարձրացնելուն զուգահեռ բարձրացնել նաև աշխատավարձի չափը։ Համբարձում Մաթևոսյանը զրուցել է նաև տեղի բնակիչների հետ, լսել նրանց հուզող խնդիրները՝ կապված մթերումների, ոռոգման ջրի, այգեհիմնման աշխատանքների հետ, այնուհետև ներկայացրել է գյուղատնտեսության ոլորտում իրականացվող պետական աջակցության ծրագրերը, հորդորել է օգտվել այդ հնարավորություններից ու Էկոնոմիկայի փոխնախարար Խոջոյանի հետ պատասխանել է ներկաներին հետաքրքրող հարցերին։ Թալին համայնքի Կարմրաշեն բնակավայրում փոխվարչապետն այցելել է Հայրենական պատերազմում զոհված կարմրաշենցիների հիշատակին կառուցված հուշահամալիր, Արցախյան 44-օրյա պատերազմում զոհված Տեփանյան Արտյոմի շիրիմին և ծաղիկներ խոնարհել զոհված հերոսների հիշատակին։ Աշխատանքային այցի հաջորդ կանգառը Արագածոտն բնակավայրում վերակառուցվող մանկապարտեզն էր, որտեղ, ծանոթանալով իրականացվող աշխատանքներին, փոխվարչապետ Մաթևոսյանը հայտարարել է, որ անորակ աշխատանք չի ընդունվելու։ Մարզպետ Մովսիսյանը հավաստիացրել է՝ եթե շինարարությունը լիարժեք և որակով չիրականացվի, աշխատանքը չի ընդունվի։ Աշտարակ քաղաքում Համբարձում Մաթևոսյանը շրջել է նաև Կոմիտասի անվան բարեկարգվող պուրակում, ծանոթացել քաղաքի ասֆալտապատման աշխատանքների որակին, տվել է մի շարք հանձնարարականներ։ Այցի ավարտին փոխվարչապետ Մաթևոսյանն Արագածոտնի մարզպետարանում հանդիպել է համայնքների ղեկավարներին, մարզպետարանի ղեկավար կազմին և մարզի մթերող մի շարք կազմակերպությունների ներկայացուցիչներին։ Համայնքների ղեկավարների հետ զրույցի ընթացքում փոխվարչապետն անդրադարձել է ստացվող սուբվենցիայի ծրագրային հայտերի որակին, հայտերի ներկայացման ժամկետների փոփոխությանը, հորդորել է պարբերական դարձնել համայնքների բնակիչների հետ շփումներում պետական աջակցության ծրագրերի վերաբերյալ տեղեկության տրամադրումը և ընդգծել․ «Կառավարությունը հետևողական է տարածքային համաչափ զարգացմանը, և, նաև սուբվենցիոն ծրագրերի իրականացմամբ, անելու է առավելագույնը՝ համայնքների տնտեսական և սոցիալական ենթակառուցվածքները զարգացնելու ուղղությամբ»։ Մթերող կազմակերպությունների ներկայացուցիչների հետ շփման ժամանակ Համբարձում Մաթևոսյանը հետաքրքրվել է առկա խնդիրներից, դրանց լուծման հարցում Կառավարության հնարավոր աջակցության ձևաչափից, այնուհետև պատասխանել է նրանց կողմից բարձրաձայնված հարցերին։ Փոխվարչապետի կողմից մարզային այցերը շարունակական բնույթ են կրելու։
10:21 - 30 հունիսի, 2022
Նիգավանում հնչած կրակոցների հետևանքով մահացած քաղաքացիների հարազատները ակցիա էին իրականացնում |tert.am|

Նիգավանում հնչած կրակոցների հետևանքով մահացած քաղաքացիների հարազատները ակցիա էին իրականացնում |tert.am|

tert.am: Ապարանում այսօր բողոքի ակցիա էին իրականացնում վերջերս Նիգավանում հնչած կրակոցների հետևանքով վիրավորված և հրազնենային վնասվածքներից մահացած քաղաքացիների հարազատները։ Նրանք պնդում են, որ փոխմարզպետ Էդգար Փարվանյանի հորեղբոր տղան է հրահրել միջադեպը։ Ակցիայի մասնակիցները ասում են, որ Փարվանյաններն Ապարանից պետք է գնան, և պահանջում են օբյեկտիվ քննություն։ Լրագրողների հետ զրույցում Ապարանում կրակոցներից սպանված Տիգրան Հարությունյանը հայրը ասաց, որ վիճաբանությանը ներկա են եղել Արագածոտնի փոխմարզպետ Էդգար Փարվանյանի հորեղբոր տղաները և Մաթևոս Ասատրյանի եղբայրը․ «Մեր պահանջն այն է, որ արդար քննություն ընթանա և բոլոր մեղավորները պատժվեն։ Բոլորի համար տարօրինակ է, որ սպանությունից մեկ շաբաթ անցել է, բայց ձերբակալվել է ընդամենը 1 հոգի»։ Նա նաև հավելեց, որ պահանջատեր են լինելու, որ բոլոր մասնակիցները պատժվեն։ Իսկ Ապարանում սպանված Հմայակ Միքայելյանի եղբայրը հայտնեց, թե փոխմարզպետ Էդգար Փարվանյանի հորեղբոր տղան՝ Ռոմանն է զանգել, կանչել բոլորին, միջադեպ հրահրել ու անհետացել․ «Ռոմանը ներկայացել է որպես Ապարանում հարց լուծող։ Գազալցակայանում առաջինը ծեծել են Ռաֆոյին։ Ռոմանին ոչ ոք չի ճանաչում որպես Ապարանում հարց լուծող, իր հարց լուծելը այսպիսի բաների է հանգեցրել, շատ դեպքեր են եղել, որոնք արյունալի չեն եղել և հրաշքով պրծել են։ Ռոմանը հավաքում է մի քանի հոգու, կռիվ հրահրում, ու ինքը անհետանում է այդտեղից։ Ապարանում եթե կա մեկը, որ կասի՝ դա այդպես չէ, ես իր աչքերի մեջ երկար կնայեմ։ Ռոմանը դեռ ձերբակալված չէ, այսքան մարդ դրա համար է հավաքվել, որ Ռոմանի տնեցիները հավաքեն իրենց իրերը ու հասկանան, որ Ապարանում իրենք տուն չունեն»։ Իսկ Ժորա Փարվանյանը՝ Ռոման Փարվանյանի հայրն ասաց․ «Ռոմանը չի զանգել հրավիրել, հակառակը՝ ինքն ասել է՝ չգաք գազալցակայան։ Երևանից եկած երեք տղաների հետ ընկերություն չի արել Էդգարը, կարող է ճանաչել է, ես չգիտեմ։ Ես չգիտեմ Ռոմանին տարել են այդ օրը ոստիկանական բաժին, թե ոչ, ես տանն էլ չեմ եղել դեպքի օրը։ Բանդա է ստեղծվել, ամեն ինչ լավ կազմակերպված է եղել, շատ լավ ամեն ինչը արված է։ Իրավապահ մարմինները կպարզեն»,- ասաց նա։ Հարցին, թե ինչ են պատրաստվում անել՝ հաշվի առնելով, որ սպանվածների հարազատները պահանջում են, որ նրանք հեռանան գյուղից, Ժորա Փարվանյանը նշեց․ «Ո՞վ կարող է մեզ ասել, որ գնանք այստեղից, սա իմ պապի ազատագրած հողն է, ես այստեղից ոչ մի տեղ չեմ գնա, եթե չգիտեք, գնացեք Սարդարապատ, այնտեղ գրած է պապիս անունը՝ Փարվանի Խաչո, սա իմ տունն է։ Վտանգավորն իրենք են»։ Հիշեցնենք, որ միջադեպը տեղի է ունեցել հունիսի 19-ին։ Մինչ պաշտոնական տեղեկատվության տարածումը մամուլում շրջանառվել է, թե դեպքը առնչություն ունի ՔՊ պատգամավոր Մաթևոս Ասատրյանի հարազատների և ՔՊ Արագածոտնի փոխմարզպետ Էդգար Փարվանյանի հորեղբոր որդու հետ։ Ոստիկանությունը պաշտոնապես գրել էր, որ «միջադեպը քաղաքական ենթատեքստ չի պարունակում, ավելին՝ պատճառը կենցաղային է», իսկ Մաթևոս Ասատրյանը հերքել էր իր կամ իր հարազատների մասնակցությունը միջադեպին Այս պահին, ըստ պաշտոնական տվյալների, ձերբակալված է 32-ամյա տղամարդ։ Հետևե՛ք մեզ նաև Telegram-ում
13:34 - 25 հունիսի, 2022
Արագածոտնում հիմնվել է 5 ՄվՏ հզորությամբ «Թալին-2» արևային ֆոտովոլտային էլեկտրակայանը

Արագածոտնում հիմնվել է 5 ՄվՏ հզորությամբ «Թալին-2» արևային ֆոտովոլտային էլեկտրակայանը

Հայաստանում ամենաշատ արևային օրերն ունեցող մարզերից մեկում՝ Արագածոտնում, ևս 1 արևային ֆոտովոլտային կայան է հիմնվել․ «Բիլդմաստեր» ՍՊԸ-ն Թալինում կառուցել է 5 ՄվՏ հզորությամբ «Թալին-2» կայանը։ Ծրագրի արժեքը շուրջ 5 մլն դոլար է։ Այս մասին հայտնում են Արագածոտնի մարզպետարանից։    «Նախօրեին հանդիսավորությամբ և պաշտոնատար անձանց մասնակցությամբ տեղի է ունեցել կայանի բացումը։ Ներկա են եղել Արագածոտնի մարզպետ Սերգեյ Մովսիսյանը, փոխմարզպետ Հարություն Գուլյանը, մարզպետի խորհրդական Արմեն Գրիգորյանը, մարզպետարանի զարգացման ծրագրերի, վերլուծության և զբոսաշրջության բաժնի պետ Գագիկ Պողոսյանը, Թալինի համայնքի ղեկավարի պաշտոնակատար Տավրոս Սափեյանը։   «Բիլդմաստեր» ՍՊԸ ներկայացուցիչների հետ կարմիր ժապավենը կտրել է մարզպետ Սերգեյ Մովսիսյանը։   Շնորհավորանքի խոսքում նա ընդգծել է, որ կայանը երկրի և մարզի տնտեսական զարգացման, երկրի էներգետիկ կայունության և անկախության ապահովման, կանաչ էներգետիկայի մասսայականացման տեսանկյունից մեծ կարևորություն է ներկայացնում, և նման խոշոր ներդրումները մարզում խրախուսելի են։ Կայանն արտադրում է 10 500 000 կվտ-տարի էլեկտրաէներգիա և CO2 գազի արտանետումը կրճատում է 10200 տոննա-տարիով։   Նշենք, որ «Թալին-2»-ի կառուցման համար ձեռք է բերվել շուրջ 11,5 հա հողակտոր, որից շուրջ 7,5 հա էներգետիկ նշանակության հողակտորի վրա կառուցվել է կայանը»։
13:09 - 21 մայիսի, 2022
Արագածոտնի մարզի Թալին համայնքի ավագանու լիազորությունները դադարեցվեցին․ ավագանու արտահերթ ընտրություններ կլինեն

Արագածոտնի մարզի Թալին համայնքի ավագանու լիազորությունները դադարեցվեցին․ ավագանու արտահերթ ընտրություններ կլինեն

ՀՀ կառավարությունը որոշեց վաղաժամկետ դադարեցնել Հայաստանի Հանրապետության Արագածոտնի մարզի Թալին համայնքի ավագանու լիազորությունները եւ նշանակել ավագանու արտահերթ ընտրություններ: Հայաստանի Հանրապետության կենտրոնական ընտրական հանձնաժողովին սույն որոշումն ուժի մեջ մտնելուց հետո մեկշաբաթյա ժամկետում պետք է նշանակի Հայաստանի Հանրապետության Արագածոտնի մարզի Թալին համայնքի ավագանու արտահերթ ընտրության անցկացման օրը: Անցյալ տարվա դեկտեմբերի 5-ին ՀՀ Արագածոտնի մարզի Թալին միավորված համայնքում տեղի էր ունեցել համամասնական ընտրակարգով ավագանու ընտրություն: Թիվ 18 տարածքային ընտրական հանձնաժողովի դեկտեմբերի 12-ի №44-Ա որոշման համաձայն՝ Թալին համայնքի ավագանին ընտրվել է և մանդատները բաշխվել են 4 կուսակցությունների միջև. 1) «Զարթոնք» ազգային քրիստոնեական կուսակցություն՝ 6 մանդատ. 2) «Հայք» լիբերալ կուսակցություն՝ 3 մանդատ. 3) «Մեր համայնքը» կուսակցությունների դաշինք՝ 2 մանդատ, 4) «Քաղաքացիական պայմանագիր» կուսակցություն՝ 10 մանդատ: Դեկտեմբերի 17-ին կայացել է Թալին համայնքի ավագանու առաջին նիստը, որի ընթացքում ընդունվել է ավագանու թիվ 02-Ա որոշումը, որի համաձայն՝ Տավրոս Սափեյանն ընտրվել է համայնքի ղեկավար: Սակայն, առ այսօր չի կայացել համայնքի ընտրված ղեկավարի երդման արարողությունը՝ ավագանու անդամների քվորումը չապահովվելու հիմքով: «Տեղական ինքնակառավարման մասին» օրենքի համաձայն՝ «Ավագանու հերթական նստաշրջանները գումարվում են փետրվարի երկրորդ երեքշաբթի օրվանից մինչև հունիսի վերջին չորեքշաբթին և սեպտեմբերի երկրորդ երեքշաբթի օրվանից մինչև դեկտեմբերի վերջին չորեքշաբթին: Նստաշրջանի ընթացքում յուրաքանչյուր ամիս հրավիրվում է ավագանու առնվազն մեկ նիստ»: Ս.թ. փետրվարի 8-ից առ այսօր Թալին համայնքի ավագանու նիստեր չեն հրավիրվել և անցկացվել, քանի որ դրանք պետք է հրավիրվեին համայնքի ղեկավարի կողմից, այնինչ՝ Օրենքի 74-րդ հոդվածի 1-ին մասով սահմանված կարգով Թալին համայնքի ընտրված ղեկավարն իր լիազորությունները չի ստանձնել: Օրենքի 69-րդ հոդվածի 1-ին մասի համաձայն՝ «Հայաստանի Հանրապետության կառավարությունը կարող է վաղաժամկետ դադարեցնել ավագանու լիազորությունները, եթե` 1) հերթական նստաշրջանի ընթացքում ավագանու նիստերը երեք ամսից ավելի չեն գումարվում.»: Այդ ժամկետը լրացել է ս.թ. մայիսի 8-ին: Ինչպես տեղեկանում ենք որոշման նախագծի հիմնավորումից՝ եռամսյա ժամկետում Թալի համայնքի ավագանու նիստեր չգումարվելու փաստն արձանագրվել է համայնքի աշխատակազմի կողմից և ներկայացվել է ՀՀ ՏԿԵՆ ՀՀ Արագածոտնի մարզպետի գրությամբ: Ելնելով վերոգրյալից՝ մշակվել և Կառավարության քննարկմանն է ներկայացվում «Հայաստանի Հանրապետության Արագածոտնի մարզի Թալին համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու մասին» Կառավարության որոշման նախագիծը: «Հայաստանի Հանրապետության Արագածոտնի մարզի Թալին համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու մասին» Կառավարության որոշման ընդունման կապակցությամբ լրացուցիչ ֆինանսական միջոցների պահանջ չի առաջանում, իսկ Հայաստանի Հանրապետության պետական բյուջեի եկամուտներում և ծախսերում փոփոխություններ չեն սպասվում:
12:12 - 13 մայիսի, 2022
Կառավարությունը երկարաձգեց Ապարան  համայնքի՝ հանրային գերակա շահ ճանաչված սեփականության  օտարման գործընթացը

Կառավարությունը երկարաձգեց Ապարան համայնքի՝ հանրային գերակա շահ ճանաչված սեփականության օտարման գործընթացը

2021 թ․-ի հուլիսի 29-ին ՀՀ կառավարությունը 1246-Ա որոշմամբ հավանություն տվեց «Մայլեռ Մաունթայն Ռեզորթ» փակ բաժնետիրական ընկերության ներկայացրած ներդրումային ծրագրին, որ նախատեսում է Արագածոտնի մարզի Ապարան համայնքի տարածքում՝ 2080 հեկտար ընդհանուր մակերեսով հողամասում։ ՓԲԸ-ն մտադիր է այդ տարածքում լեռնային հանգստավայր կառուցել։ Հետագայում՝ հոկտեմբերի 7-ին, կառավարությունը մեկ այլ որոշմամբ այդ տարածքների նկատմամբ հանրության գերակա շահ ճանաչեց։ Այս որոշմամբ սեփականության օտարման վերջնաժամկետ էր սահմանվել այս տարվա մայիսի 31-ը։ Արդեն այսօր կառավարությունը փոփոխություններ կատարեց հոկտեմբերի 7-ի որոշման մեջ, որով սեփականության օտարման վերջնաժամկետ սահմանվեց 2023 թ․-ի մայիսի 31-ը։ Որոշման հիմք է դարձել «Մայլեռ Մաունթայն Ռեզորթ» ՓԲԸ-ի խնդիր-առաջարկը։  «Ընդհանուր առմամբ տարածքում առկա է մոտ 745 գույք: Նշված գույքային միավորների նկատմամբ գրանցված իրավունքներ ունեցող անձանց հայտնաբերման ուղղությամբ տարվող աշխատանքների, Կադաստրի կոմիտեի կողմից ներկայացված տեղեկատվության մեծ ծավալի և դրա մշակման ժամանակատարության պատճառով հնարավոր չէ օտարման գործընթացն իրականացնել մինչև 2021 թ․-ի մայիսի 31-ը»,-նշված է նախագծի հիմնավորման մեջ։ «Հանրության գերակա շահերի ապահովման նպատակով սեփականության օտարման մասին» օրենքի համաձայն՝ հանրության գերակա շահ ճանաչելու մասին կառավարության որոշումն ուժի մեջ մտնելուց հետո կառավարության սահմանած կարգով և ժամկետներում լիազոր մարմինը կազմում է օտարվող սեփականության նկարագրության արձանագրությունը, Ըստ նախագծի՝ կառավարության որոշման մեջ նշված փոփոխությունը կատարելուց հետո հնարավոր կլինի կազմել նկարագրության արձանագրությունները, ավարտել օտարման գործընթացը և ավարտին հասցնել ծրագրի իրականացումը: Նախագծով սահմանվում է նաև, որ նկարագրության արձանագրությունները կկազմի լիազոր մարմին ճանաչված Էկոնոմիկայի նախարարությունը։ Ինչպես ավելի վաղ հայտնել էինք, կառավարության անցած տարվա որոշման հետևանքով հանրության գերակա շահ էր ճանաչվել նաև Ապարան համայնքի Եղիպատրուշ գյուղի բնակիչների սեփականություն համարվող վարելահողերը և տնամերձ հողամասերը։ Եղիպատրուշցիները հայտարարել էին, որ այս թեմայով հանրային լսումներ չեն իրականացվել։ Վերջին ամիսների ընթացքում Եղիպատրուշի բնակիչները բողոքի ակցիաներ են իրականացրել [1,2] Կառավարության մոտ՝ հայտարարելով, որ դեմ են իրենց սեփականությունը հանրային գերակա շահ ճանաչելու կառավարության որոշմանը։
11:09 - 05 մայիսի, 2022
«Մայլեռ» ներդրումային ծրագրի իրականացման նպատակով խաղատան կազմակերպման համար առանձին օրենսդրական ակտ կընդունվի

«Մայլեռ» ներդրումային ծրագրի իրականացման նպատակով խաղատան կազմակերպման համար առանձին օրենսդրական ակտ կընդունվի

Առաջարկվում է «Մայլեռ» ներդրումային ծրագրի իրականացման նպատակով խաղատան կազմակերպման համար առանձին օրենսդրական ակտի ընդունում, որով կսահմանվի առանձնահատուկ կարգավիճակ՝ համապատասխան պետական տուրքի սահմանմամբ: ՀՀ կառավարությունն այսօր որոշում ընդունեց հավանություն տալ «Մայլեռ» ներդրումային ծրագրի շրջանակներում «Մայլեռ Մաունթայն Ռեզորթ» փակ բաժնետիրական ընկերությանը խաղատան լիցենզիա տրամադրելու մասին», «Շահումով խաղերի, ինտերնետ շահումով խաղերի և խաղատների մասին» ՀՀ օրենքում լրացում կատարելու մասին» ՀՀ օրենքների նախագծերի վերաբերյալ կառավարության օրենսդրական նախաձեռնությանը:  Կառավարությունն ավելի վաղ հավանության էր արժանացրել 30 միլիարդ ՀՀ դրամի ներդրմամբ Արագածոտնի մարզի Ապարան համայնքի տարածքում  2080 հեկտար ընդհանուր մակերեսով հողամասում լեռնային հանգստավայրի կառուցմանը։ Այս որոշումը, սակայն, վրդովեցրել էր Ապարան համայնքի Եղիպատրուշ գյուղի բնակիչներին, քանի որ կառավարությունն այս նախագծի իրականացման համար հանրային գերակա շահ էր ճանաչել նաեւ եղիպատրուշցիներին պատկանող հողատարածքները։ Այժմ կառավարությունը ծրագրի իրականացման շրջանակներում Ընկերությանը խաղատան գործունեության լիցենզիան տրամադրելու օրենքի նախագիծն ուղարկում է Ազգային ժողով։ Լիցենզիան տրամադրվում է ծրագրի իրականացման համար նախատեսված տարածքում «խաղատան կազմակերպում» գործունեության նպատակով։ Կառավարությունը որոշման նախագծի հիմնավորման մեջ նշում է, որ «Մայլեռ» ներդրումային ծրագրով նախատեսվող զբոսաշրջային գոտում պետք է հնարավորություն տրվի խաղատների ստեղծում նույնատիպ պայմաններով, ինչ ներկայումս առկա է գործող օրենսդրությամբ (Ծաղկաձոր, Ջերմուկ, Սևան և այլ քաղաքների նմանությամբ)։ Գործող օրենսդրությամբ նշված կարգավորումները նպատակ են հետապնդել, որ խաղատների առկայությունը լինի զբոսաշրջային կենտրոն հանդիսացող տարածքներում, ինչը հնարավորություն կտա ներգրավել առավել շատ թվով զբոսաշրջիկների։ Առաջարկվող մոտեցումը ենթադրում է Ծրագրի իրականացման նպատակով համապատասխան օրենսդրական ակտի ընդունում։ Գործադիրի համոզմամբ՝ խաղատան լիցենզիայի տրամադրումը կարող է դառնալ այլընտրանքային ժամանցի տեսակ զբոսաշրջիկների համար և կարող է հավելյալ մուտքեր ապահովել պետական բյուջե։ Նշենք, որ ՀՀ Արագածոտնի մարզի Եղիպատրուշ գյուղի մի խումբ բնակիչներ պարբերաբար բողոքի ակցիաներ են իրականացնում կառավարական շենքերի մոտ՝ ընդդեմ գործադիրի՝ անցած տարվա որոշման, որով հանրային գերակա շահ են ճանաչվել գյուղացիներին պատկանող հողամասերը։ 
15:40 - 22 ապրիլի, 2022
«Գյուղացին ստիպված է լքել իր տնամերձ հողամասը և գնալ արտագնա աշխատանքի»․ եղիպատրուշացիները կրկին բողոքի ակցիա իրականացրին

«Գյուղացին ստիպված է լքել իր տնամերձ հողամասը և գնալ արտագնա աշխատանքի»․ եղիպատրուշացիները կրկին բողոքի ակցիա իրականացրին

ՀՀ Արագածոտնի մարզի Եղիպատրուշ գյուղի մի խումբ բնակիչներ այսօր բողոքի ակցիա իրականացրին կառավարության դիմաց՝ ընդդեմ գործադիրի անցած տարվա որոշման, որով հանրային գերակա շահ են ճանաչվել գյուղացիներին պատկանող հողամասերը։ Ավելի վաղ հայտնել էինք, որ անցած տարի կառավարությունը հավանություն էր տվել «Մայլեռ Մաունթայն Ռեզորթ» ՓԲԸ-ի ներդրումային ծրագրին, որով նախատեսվում էր Ապարան համայնքի տարածքում լեռնային հանգստավայր կառուցել։ Ավելի ուշ գործադիրը այդ տարածքների նկատմամբ հանրային գերակա շահ էր ճանաչել։ Այս տարածքների մեջ էին մտնում նաև Եղիպատրուշ գյուղի բնակիչների սեփականություն համարվող վարելահողերը և տնամերձ հողամասերը։ Եղիպատրուշ գյուղի բնակիչները գրավոր դիմել էին Էկոնոմիկայի նախարարությանը՝ նշելով, որ այս թեմայով հանրային լսումներ չեն անցկացվել, ինչպես նաև իրենց մտահագությունն էին հայտնել հողամասերից զրկվելու առնչությամբ։ Այսօրվա ակցիայի մասնակից Արա Հովհաննիսյանը, որ Եղիպատրուշ գյուղում հողամասեր ունի, ասաց՝  հանգստյան գոտի կառուցելու մտադրությունը գյուղացիների շահերից չի բխում․ «30 և ավելի տարիներ մենք ազգային իշխանություն չենք ունեցել, որ զբաղվի գյուղացու հոգսերով, գյուղի պրոբլեմներով։ Այդ կուտը, որ հերթական անգամ տվել են, որ սարքելու են տուրիստական գոտի, դա բացարձակ գյուղացու շահերից չի բխում, և տնամերձ հողամասերը օտարելը, գերակա շահ ճանաչելը  վնաս կբերի գյուղին, հերթական անգամ գյուղացին ստիպված է լքել իր հազար մետր տնամերձ հողամասը և գնալ արտագնա աշխատանքի, որը ներկա պայմաններում ցանկալի չէ։ Թող կուտ չտան, որ աշխատատեղով կապահովեն։ Ենթադրենք 30 հոգի ստրուկի նման օրավարձով աշխատեցին, հարստացրին էդ կազմակերպության տերերին, գյուղացին դրանից ի՞նչ է օգտվելու»։ Ակցիայի մեկնարկից քիչ հետո վարչապետ Նիկոլ Փաշինյանի օգնական Գագիկ Իսախանյանը ընդունեց ակցիայի մասնակիցներից մի քանիսին։ Հանդիպմանը մասնակցած Սամվել Մաթևոսյանը մեր զրույցում հայտնեց, որ վարչապետի օգնականին հստակ ներկայացրել են իրավիճակը, և մինչև հաջորդ հինգշաբթի սպասելու են պատասխանի․ «Մեր պահանջները բարձրացրել ենք, ասեցին՝ կքննարկենք վարչապետի հետ, կտեսնենք՝ ով է զբաղվելու ձեր հարցով, ձեզ կզգուշացնենք։ Մենք հստակ ամեն ինչը բացատրել ենք, էդ կեղծիքների մասին ասել ենք։ Մենք հստակեցրել ենք՝ եթե մինչև եկող հինգշաբթի մեր հարցի պատասխանը չեղավ, մենք ավելի հուժկու քայլերի ենք գնալու»։ Նշենք, որ մարտի 28-ին Եղիպատրուշի բնակիչները նույն պահանջով ակցիա էին իրականացրել Էկոնոմիկայի նախարարության շենքի մոտ։   Նանե Ավետիսյան
17:28 - 07 ապրիլի, 2022
875 մլն դրամ՝ 38 համայնքներում 44 սուբվենցիոն ծրագրերի համար
 |hetq.am|

875 մլն դրամ՝ 38 համայնքներում 44 սուբվենցիոն ծրագրերի համար |hetq.am|

hetq.am: Կառավարությունը համայնքներին պետական բյուջեով արդեն իսկ նախատեսված սուբվենցիաներից բացի այլ սուբվենցիաներ տրամադրելու նպատակով Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի և Տավուշի մարզպետարաններին կհատկացնի 875 մլն 473 հազ. դրամ։ Որոշումն ընդունվեց Կառավարության ապրիլի 7-ի նիստում։ Առաջարկվում է համաֆինանսավորել 38 համայնքների թվով 44 ծրագրեր։ Տարածքային կառավարման և ենթակառուցվածքների նախարարի խոսքով՝ դրանցից 26-ը 2021 թ-ին ավարտված ծրագրեր են, անհրաժեշտ է 604 մլն դրամ վճարել, իսկ 18-ը դեռևս 2020 թ-ին հաստատված ծրագրեր են, որոնք իրականացվել են 2021-2022 թթ-ին, և պետք է վճարել Կառավարության մասնաբաժինը։ Որոշման նախագծի քննարկման ժամանակ վարչապետ Նիկոլ Փաշինյանը հետաքրքրվեց, թե այս տարվա սուբվենցիոն ծրագրերն ինչ ընթացք ունեն։  Գնել Սանոսյանն էլ հայտնեց, որ ընդհանուր ստացել են 461 հայտ՝ 79,5 մլրդ դրամ արժեքով, որից Կառավարության մասնաբաժինը 43,5 մլրդ դրամ է։ Նախարարի խոսքով՝ այժմ սպասում են համայնքներից նախագծերի ուղարկմանը։
16:06 - 07 ապրիլի, 2022
«Մի ամբողջ գյուղի զրկում են ապրելու իրավունքից»․ Եղիպատրուշի բնակիչները Էկոնոմիկայի նախարարության շենքի դիմաց ակցիա են իրականացրել

«Մի ամբողջ գյուղի զրկում են ապրելու իրավունքից»․ Եղիպատրուշի բնակիչները Էկոնոմիկայի նախարարության շենքի դիմաց ակցիա են իրականացրել

ՀՀ Արագածոտնի մարզի Ապարան համայնքի Եղիպատրուշ գյուղի բնակիչները այսօր բողոքի ակցիա են իրականացրել Էկոնոմիկայի նախարարության շենքի դիմաց՝ ընդդեմ կառավարության անցած տարվա որոշման, որով հանրային գերակա շահ է ճանաչվել գյուղացիներին պատկանող հողամասերը։ Infocom-ը, հիշեցնենք, ավելի վաղ անդրադարձել էր թեմային․ անցած տարի կառավարությունը հավանություն էր տվել «Մայլեռ Մաունթայն Ռեզորթ» ՓԲԸ-ի ներդրումային ծրագրին, որով նախատեսվում էր Ապարան համայնքի տարածքում լեռնային հանգստավայր կառուցել։ Ավելի ուշ գործադիրը այդ տարածքների նկատմամբ հանրային գերակա շահ էր ճանաչել։ Այս որոշման հետևանքով գերակա շահ էին ճանաչվել նաև Եղիպատրուշ գյուղի բնակիչների սեփականություն համարվող վարելահողերը և տնամերձ հողամասերը։ Եղիպատրուշ գյուղի բնակիչները գրավոր դիմել էին Էկոնոմիկայի նախարարությանը՝ նշելով, որ այս թեմայով հանրային լսումներ չեն անցկացվել, ինչպես նաև իրենց մտահագությունն էին հայտնել հողամասերից զրկվելու առնչությամբ։ Այսօրվա բողոքի ակցիային մասնակցած Եղիպատրուշի բնակիչ Կարեն Հովհաննիսյանը Infocom-ի հետ զրույցում ասաց՝ մի ամբողջ գյուղի զրկում են ապրելու իրավունքից․ «Գյուղը ապրում է այդ հողով, եթե գյուղով են ապրում, բնականաբար հողով են ապրում։ Գյուղնշանակության հողեր ունենք, տնամերձ ունենք, երբ այս գյուղում Արևմտյան Հայաստանից եկել են ապրելու, այդ ժամանակվանից մելորացիա են արել, հողը մշակել են, սարքել են բերիի հող, այսօր դա գյուղացիներից վերցնում են։ Ո՞նց կարելի է հայրենիքը գերակա շահ ճանաչել»։ Հովհաննիսյանի խոսքով՝ ամբողջ գյուղն այսօր նույն խնդրի առջև է կանգնած․ «Ես ունեմ հողեր, մշակել եմ, քար եմ հավաքել, հողը հող եմ դարձրել, մի քանիսի պատճառով այդ հողերի մասին գրվել է աղակալված հողեր։ Ես ուզում եմ գյուղնախարարությունից համապատասխան մասնագետներ ուղարկեն, ես տեսնեմ՝ որ հողն է աղակալված։ Եթե ես գյուղում ապրեմ, բայց հող չմշակեմ, ինչի՞ համար եմ գյուղում ապրում։ Գյուղում ունեմ անասուններ, գոմեր, եթե հողը վերցնում են, անասունը ոնց եմ պահելու։ Մեկի հարստանալու միջոցի համար մի ամբողջ համայնք պետությունը պետք է օտարի՞»,-մեր զրույցում ասաց նա։ Բնակիչներից Սամվել Մաթևոսյանն էլ  տեղեկացրեց, որ անցած տարվա աշնանը «Մայլեռ Մաունթայն Ռեզորթ» ՓԲԸ-ից երկու աշխատակից են եկել գյուղ՝ հողերի ուսումնասիրման նպատակով․ «Ժողովուրդը հարցրել է՝ դուք լիցենզիա ունե՞ք, որ հողերը նայեք, գնահատեք, ասել են՝ դեռ ոչ, նոր ենք դիմել Էկոնոմիկայի նախարարություն, որ լիցենզիա հանենք, դրա հիման վրա ժողովուրդը իրենց ետ են ուղարկել, ասել են՝ երբ լիցենզիա ունենաք, կգաք։ Գնացել են, անցել է 3-4 ամիս, ու մի շաբաթ առաջ ամբողջ գյուղին Էկոնոմիկայի նախարարությունից ծանուցագրեր է եկել այն մասին, որ մենք առաջարկեցինք, որ միասին ձեր հողերը նայենք, տեսնենք, թե ինչպիսին է պրոցեսը, քանի որ դուք չեք եկել, օրենքի այս այս կետերով մենք դա արել ենք մեր ուժերով։ Բայց նման բան չի եղել, ես հիմա հանցագործության մասին հաղորդագրություն եմ տալիս»,- ասաց նա։ Բնակիչների խոսքով՝ նախատեսվում է, որ հողամասերը կօտարվեն մինչև այս տարվա մայիսի 31-ը։ Գյուղացիներն ակնկալում են, որ լուծումը կլինի հօգուտ իրենց․ «Մենք սպասում ենք գյուղացու սրտով լուծման, եթե չի լուծվում, միգուցե կդիմենք այլ քայլերի։ Գյուղ կանգնի, գերան կկոտրի։ Ով ուզում է լինել, մենք ուզում ենք ապրել մեր գյուղում։ Մենք հող մշակող մարդիկ ենք, գյուղի ժողովուրդ ենք, գյուղացուն թող չջղայնացնեն»,- ամփոփելով՝ ասաց Կարեն Հովհաննիսյանը։ Նանե Ավետիսյան  
18:37 - 28 մարտի, 2022