Գյումրի

Կարմիր խաչի ընկերությունը օգնություն կտրամադրի Գյումրիում կարկուտից տուժած ընտանիքներին

Հուլիսի 13-ին Գյումրիում տեղացած ուժեղ կարկուտի հետեւանքով առավել տուժած 600 ընտանիք՝ ընդհանուր առմամբ 2670 մարդ, մասնավորապես՝ Գյումրիի տնակային թաղամասում բնակվող եւ այլ տուժած ընտանիքներ, Հայկական Կարմիր խաչի ընկերության (ՀԿԽԸ) կողմից կստանան մարդասիրական օգնություն՝ դրամական աջակցություն եւ անկողնային պարագաներ (400 ընտանիք՝ 1800 անձ), հագուստ եւ կոշիկ ձեռք բերելու վաուչերներ (200 ընտանիք՝ 870 անձ)։ Յուրաքանչյուր անձի կտրամադրվի 49 696 ՀՀ դրամին համարժեք աջակցություն (ընդհանուր առմամբ՝ 132 688 587 ՀՀ դրամ)։ Վերջին 170 տարվա ընթացքում տեղացած աննախադեպ կարկուտից հետո Գյումրու քաղաքապետարանն իրականացրել էր կարիքների նախնական գնահատում՝ հայտնաբերելու առավել խոցելի ընտանիքներին։ Հայկական Կարմիր խաչի ընկերությունը (ՀԿԽԸ)՝ որպես կառավարությանն աջակցող կառույց մարդասիրական ոլորտում, կարկուտից տուժած բնակչությանն աջակցելու նպատակով միջոցներ հայթայթելու համար համապատասխան ծրագրով դիմեց Կարմիր խաչի եւ Կարմիր մահիկի ընկերությունների միջազգային ֆեդերացիայի Աղետներին արձագանքման արտակարգ իրավիճակների ֆոնդին եւ ստացավ դրական արձագանք։ ՀԿԽԸ-ն առավել տուժած ընտանիքների կարիքների անհատական գնահատում եւ ցուցակների վերջնական ճշգրտում կիրականացնի Գյումրու քաղաքապետարանի հետ սերտ համագործակցությամբ։

16:40 - 28 հուլիսի, 2020

Գյումրու Մհեր Մկրտչյան փողոցը վաճառված է. սեփականատերը պարիսպ է կառուցում |armtimes.com|

armtimes.com: Գյումրու կենտրոնական հատվածների փողոցներից մեկում ծառեր են հատվել, կառուցապատում է սկսվել: Նման բողոքով գյումրու բնակիչ Մալխաս Ղազարյանն ասաց՝ շատ բան չգիտի ոչ վաճառողի, ոչ գնորդի մասով, բայց որ քաղաքի փողոցի այդ հատվածը վաճառվել է, ու սկսել են ծառուղին վերացել, որպեսզի դա դառնա փակ տարածք, հստակ է: Նշենք, որ Մհեր Մկրտչյան փողոցի մի հատվածը ձգվում է մինչև Խրիմյան Հայրիկ խճուղի, երկրորդ մասն ավարտվում է Հայաստանի ազգայի պոլիտեխնիկական համալսարանի Գյումրու մասնաճյուղի մոտ՝ դեպի Ձորի թաղ կոչվող հատվածում: «Ֆունդամենտն են փորել, պարիսպ բդի շարեն: Լրիվ փողոցը վաճառված է: Կսեմ՝ ո՞վ է ծախել, որ առել ես, կսե մետրը 2000 դրամով առել եմ: Եկել է, ընձի կսե՝ տոկ կուտա՞ս, գործ ենեմ: Ըսի՝ չէ, չեմ տա, ես մենակ կռնամ բողոքե, որ ուլիցն առել ես, բայց ո՞վ է ծախել: Լավ դու առար, բայց քաղաքապետարան ու կադաստրը ինչխ են հաստատել: Հարցրեցի, կըսե՝ ես չեմ հասկընա՝ ընդիկ քու ի՞նչ գործդ է, ես էլ ըսի՝ այ մարդ, ես էլ չեմ հասկընա, թե դու ինչղ ես առել»,-վրդովված ներկայացրեց քաղաքացին: Վիճահարույց տարածքը ժամանակին պատկանել է նախկին Տեքստիլ գործարանին: 88-ի աղետից հետո գործարանը չի աշխատել, այնուհետ սեփականաշնորհվել է, սեփականատերն էլ գործարանն ու գործարանի տարածքը մաս-մաս վաճառել է: «Էդ մարդն էլ իրեն իրավունք վերապահեց, որ ինքն է էդ տարածքի և ճարտարապետը, և քաղաքապետը, և ամեն ինչը, ու սկսեց էդ հողամասերն իր գիտելիքների չափով բաժանել մանր մասերի, առանց հաշվի առնելու գլխավոր հատակագծի պահանջները, հողի օգտագործման, գործառնական նպատակային նշանակությունը: Ու սկսեց աճուրդով վաճառել էդ հողամասերը, առանց որևէ քաղաքաշինական փաստաթուղթ հաշվի առնելու: Մենք դրա դեմ բողոք ներկայացրեցինք էն ժամանակ, որ անթույլատրելի է, դատական պրոցես սկսվեց, մենք պարտվեցինք: Դրանից հետո արդեն, երբ որ էդ հողատերերն արդեն ուզում էին ստանալ ճարտարապետական առաջադրանք, նախագծման շինթույլտվություն, արդեն մեր իրավունքներն օգտագործելով, մեր պահանջները դրեցինք, որ անպայման պետք է տարածքի կառուցապատումն իրականացվի գլխավոր հատակագծին համապատասխան»,- բացատրեց Գյումրու քաղաքապետարանի ճարտարապետ Հենրիկ Գասպարյանը: Նախկին սեփականատերը վաղուց է մահացել, սակայն գնորդները կան: Նրանցից մեկն էլ Հովհաննես Հարությունյանն է, որն օրեր առաջ տարածքում կառուցապատում է սկսել իրականացնել: Տարածքը ձեռք է բերել աճուրդով՝ 2007-2008 թվականներին: Մեզ հետ զրույցում Հարությունյանը նշեց՝ օրենքով, փաստաթղթով: ՀԺ-ի հարցին, թե ինչու այսքան ժամանակ սեփական տարածքում որևէ աշխատանք չի արվել, ասաց՝ տարբեր պատճառներով չի հարմարվել: «Հիմա արդեն տարածքը կառուցապատվում է՝ արտադրություն հիմնելու համար: Ներդրում է արվելու էն հողի վրա, որը հանդիսանում է սեփականություն, ունի սեփականության վկայական և պահանջվող բոլոր փաստաթղթերը: Օրինական դիմել ենք Գյումրու համայնքապետարան, ստացել ենք շինթույլտվություն և սկսել ենք իրականացնել շինաշխատանքները»,- ասաց սեփականատերը: Խնդրի պարզաբանման նպատակով Գյումրու քաղաքապետարանին ուղղված մեր հարցերին կառույցի որոշմամբ պատասխանող գլխավոր ճարտարապետ Հենրիկ Գասպարյանը վստահ ընդգծեց. տարածքում ապօրինի շինարարություն է սկսված: «Ես չգիտեմ ով է, բայց գիտեմ, որ էնտեղ ինչ-որ պարսպի կառուցման փորձ է կատարվել: Սկսել էին շինարարություն կատարել, որն ապօրինի էր: Մեր կողմից շինարարական աշխատանքների թույլտվություն չի տրվել, կասեցվել է սկսած աշխատանքը: Թույլտվություն չկա, կարող է տարիներ առաջ դիմել են, բայց էս վերջերս չեն դիմել շինարարությունից առաջ»,- ասաց քաղաքապետարանի պատասխանատուն: Ոչ թե էս վերջերս, կամ ավելի վաղ, այլ 2020 թվականի մայիսին է Հարությունյանը քաղաքապետարանից ստացել իր շինթույլտվությունը: Մայիսի 22-ին: Փաստաթղթի հաստատումն ու ստորագրությունը Գյումրու քաղաքապետ Սամվել Բալասանյանինն է: Փաստաթուղթը փոխանցեց Հովհաննես Հարությունյանը: Դրանով սեփականատեր Հովհաննես Ավետիքի Հարությունյանին թույլ է տրվում Մհեր Մկրտչյան 48 հասցեում իրականացնել պարսպի կառուցում: Լուսանկարում սեփականատիրոջ կողմից ներկայացված փաստաթուղթն է Քաղաքապետարնի պատասխանատուն պնդում է, որ շինարարությունն ապօրինի է, սեփականատերը ներկայացնում է նույն քաղաքապետարանի կողմից իրեն տրված շինթույլտվությունը: Տարածքի բնակիչն էլ պնդում է՝ թույլ չի տա, որ որևէ մեկը փողոցը զավթի, պարիսպներ դնի, փակի իր, մյուսների և մեքենաների ճանապարհը: Ճարտարապետն ասում է, իրենք էլ թույլ չեն տա, քանի որ Մհեր Մկրտչյան փողոցը քաղաքի մայր երակն է: Այն սեփականաշնորհված հատվածում միանալու է Խրիմյան Հայրիկ խճուղուն, իսկ հակյառակ ուղղությամբ՝ ձոր կա, որի վրայով կառուցվելիք կամրջով Մհեր Մկրտչյանը կմիանա Շիրակացի փողոցին: Շարունակությունը՝ armtimes.com-ում

14:59 - 25 հուլիսի, 2020

Չենք կարող անտեսել դժվար վիճակի մեջ գտնվող մարդկանց խնդիրները. Արմեն Սարգսյանն այցելել է Գյումրի

Հանրապետության նախագահ Արմեն Սարգսյանը հուլիսի 24-ին կարճատև աշխատանքային այցով եղել է Գյումրիում՝ ծանոթանալու հուլիսի 13-ին տեղացած հորդառատ անձրևի ու կարկուտի հետևանքներին և քննարկելու առաջացած խնդիրներն ու դրանք լուծելու հնարավորությունները։ Ինչպես տեղեկացրին նախագահի աշխատակազմի հասարակայնության հետ կապերի վարչությունից, Գյումրիի Երևանյան խճուղու սկզբնամասում գտնվող կամրջի մոտ Շիրակի մարզային փրկարարական վարչության պետ տեղակալ Կարեն Եղշաջյանը Հանրապետության նախագահին ներկայացրել է իրավիճակը: Այնուհետև նախագահ Սարգսյանը հանդիպել է բնական աղետից տուժած ընտանիքների հետ, անմիջապես տուժածներից տեղեկացել նրանց կրած վնասների մասին: Շիրակի մարզպետ Տիգրան Պետրոսյանի, Հայ առաքելական եկեղեցու Շիրակի թեմի առաջնորդ գերաշնորհ Տ. Միքայել արքեպիսկոպոս Աջապահյանի, Գյումրիի քաղաքապետ Սամվել Բալասանյանի հետ հանդիպմանը Հանրապետության նախագահին տեղեկություններ են հաղորդվել հորդառատ անձրևի և ուժեղ կարկուտի հետևանքով առաջացած՝ քաղաքացիների խնդիրների և դրանց լուծման ուղղությամբ ձեռնարկված և ձեռնարկվող միջոցառումների մասին: Նախագահը հետաքրքրվել է տուժած ընտանիքների վիճակով։ «Այնպիսի տպավորություն է, որ հարվածը եղել է կրկին ցավոտ տեղին, տուժել են այն մարդիկ, որ ապրում են տնակներում,-նշել է նախագահը: -Այդ մարդիկ այսօր դժվար վիճակի մեջ են, և չենք կարող նրանց խնդիրներն անտեսել»: Հանրապետության նախագահն ասել է, որ իր հանձնարարությամբ նախագահի աշխատակազմի կողմից արդեն իսկ ծրագրվել են և ընթացքի մեջ են տուժած ընտանիքներին աջակցության որոշակի ծրագրեր: Մասնավորապես, այդ ընտանիքների համար ձեռք է բերվել կենցաղային տեխնիկա, որը շուտով կհանձնվի հասցեատերերին: Նախագահ Սարգսյանն ասել է, որ նման բարդ իրավիճակում հայտնված որևէ մեկն անտեսված չպետք է լինի․ «Էական է, որ մարդիկ իրենց մոռացված չզգան, գյումրեցիներն իմանան, որ ուշադրության կենտրոնում են, չնայած կորոնավիրուսին, չնայած սահմանային ընդհարումներին»: Նախագահը նշել է, որ կորոնավիրուսի համավարակի պատճառով ուշադրությունը կենտրոնացված է առողջապահության համակարգի և առողջության հետ կապված խնդիրների վրա․ համավարակը ողբերգական հետևանքներ է ունենում՝ մարդկային կյանքեր խլելով: Այդ համատեքստում նա ընդգծել է, որ, անշուշտ, կարևոր է վիճակագրական տվյալներ ունենալ ցանկացած իրավիճակի վերաբերյալ, սակայն միշտ պետք է հիշել, որ ցանկացած թվի հետևում մարդկային կյանք ու ճակատագիր է: Ինչպես Գյումրիում տեղացած անձրևների պարագայում, այնպես էլ ավելի մեծ ու, ցավոք, նաև մարդկային կյանքեր խլող համաշխարհային աղետի՝ կորոնավիրուսի համավարակի դեպքում պետք է ամեն ինչ անել, որ որևէ մեկն իրեն անօգնական չզգա: Նախագահ Սարգսյանը մարզային և քաղաքային իշխանություններին հորդորել է ավելի պատրաստված լինել, ենթակառուցվածքները վերանորոգելիս կամ նորը կառուցելիս հաշվի առնել նաև նման տարերքների հավանականությունը. «Եթե կոյուղի կամ ջրահեռացման գիծ ենք կառուցում, կամ բնակելի շենքի կամ դպրոցի տանիք ենք ամրացնում, պետք է հաշվի առնել նաև եղանակային հնարավոր փոփոխությունները»: Մարզային ու քաղաքային իշխանությունների ղեկավարները Հանրապետության նախագահին տեղեկություններ են ներկայացրել մարզի և մարզկենտրոնի զարգացմանն ուղղված ընթացիկ ու նախատեսվող ծրագրերի մասին: Նախագահն ասել է, որ որևէ ծրագիր իրականացնելիս չափազանց կարևոր է Գյումրիի դիմագծի և, առհասարակ, մարզի պատմամշակութային միջավայրի պահպանությունը: «Գյումրին գեղեցիկ է իր պատմաճարտարապետական յուրահատուկ ոճով: Այս գեղեցկությունը պետք է պահպանել, սա Հայաստանի ադամանդն է, և պետք է շատ ուշադիր լինել,-ասել է նախագահ Սարգսյանը: -Մեր ունեցած արժեքներին շատ ավելի զգայուն պետք է վերաբերվենք, շատ խնամքով պահպանենք»: Գյումրիի ծրագրերի համատեքստում անդրադարձ է եղել նաև մեծ մտածող, փիլիսոփա, ծնունդով գյումրեցի Գեորգի Գուրջիևի այգի, գուրջիևյան միջավայր ստեղծելու նախագահական նախաձեռնությանը։ Նախագահ Արմեն Սարգսյանը նշել է, որ ծրագրի իրագործումը նպաստելու է քաղաքի զարգացմանը թե՛ զբոսաշրջային, թե՛ մշակութային ու սոցիալ-տնտեսական ուղղություններով: Նշված ծրագրի իրականացման համար դիտարկվում է Գյումրու Կարսի խճուղու վրա գտնվող նախկին զորամասի տարածքը:

20:40 - 24 հուլիսի, 2020

«Գյումրի-1» և «Գյումրի-2» սոցիալական աջակցության տարածքային բաժինների ղեկավարները ստացել են ապօրինի վարձատրություններ. ՔԿ

ՀՀ ԱԱԾ Շիրակի մարզային վարչությունում նախապատրաստված նյութերով տվյալներ են ձեռք բերվել՝ Գյումրիի քաղաքապետարանի ենթակայությամբ գործող «Գյումրի-1» և «Գյումրի-2» սոցիալական աջակցության տարածքային բաժինների աշխատակիցների կողմից առերևույթ ապօրինություններ կատարելու վերաբերյալ: Նախնական տվյալներով՝ Գյումրիի քաղաքապետարանի ենթակայությամբ գործող «Գյումրի-1» և «Գյումրի-2» սոցիալական աջակցության տարածքային բաժինների ղեկավարները, աշխատակիցների հետ նախնական համաձայնությամբ, հանդիսանալով պաշտոնատար անձ չհանդիսացող հանրային ծառայողներ, համապատասխանաբար 2020թ. մարտից մինչև հունիս և 2019թ. նոյեմբերից մինչև 2020թ. հունիս ընկած ժամանակահատվածներում, իրենց լիազորությունների շրջանակներում վարձատրություն տված կամ նրանց ներկայացրած անձանց օգտին ապօրինի որևէ գործողություն կատարելու կամ չկատարելու համար, անձամբ կամ միջնորդի միջոցով տարբեր քաղաքացիներից, շորթմամբ կամ այլ եղանակով պարբերաբար պահանջել և ստացել են ապօրինի վարձատրություններ: Նյութերի նախապատրաստմամբ ձեռք բերված տվյալների համաձայն՝ սոցիալական աջակցության տարածքային նշված բաժինների աշխատակիցները յուրաքանչյուր փաստագրման ժամանակ իրենց տարածքային բաժնում հաշվառված մի շարք նպաստառու ընտանիքներից պահանջել և յուրաքանչյուրից ստացել են ապօրինի վարձատրություններ, որոնց մի մասը պահել են իրենց, իսկ մյուս մասը հանձնել են բաժինների պետերին: Բացի այդ, նշված բաժինների ղեկավարներն ինչպես անձամբ, այնպես էլ՝ իրենց աշխատակիցների միջոցով, սոցիալապես անապահով քաղաքացիներին սոցիալական աջակցության ծրագրում ընդգրկելու համար, քաղաքացիներից ստացել են հատկացվելիք 3 ամսվա համար նախատեսված գումարից մեկ ամսվա գումարը, որի մի մասը աշխատակիցները փոխանցել են բաժնի պետերին, իսկ մի մասը պահել են իրենց: Նկատի ունենալով, որ նախապատրաստված նյութերում առերևույթ առկա է քրեական գործ հարուցելու օրինական հիմք և առիթ՝ ՀՀ ԱԱԾ քննչական դեպարտամենտում ՀՀ քրեական օրենսգրքի 311.1-րդ հոդվածի (պաշտոնատար անձ չհանդիսացող հանրային պաշտոն զբաղեցնող անձի, հանրային ծառայողի կողմից ապօրինի վարձատրություն ստանալը) 3-րդ մասի 1-ին, 2-րդ և 3-րդ կետերով, 312.1-րդ հոդվածի (պաշտոնատար անձ չհանդիսացող հանրային պաշտոն զբաղեցնող անձին, հանրային ծառայողին ապօրինի վարձատրություն տալը) 1-ին մասով և ՀՀ քրեական օրենսգրքի 311.1-րդ հոդվածի 3-րդ մասի 1-ին և 3-րդ կետերի, 312.1 հոդվածի 1-ին մասի հատկանիշներով հարուցվել է երկու քրեական գործ, որոնք նախաքննություն կատարելու համար ուղարկվել են ՀՀ քննչական կոմիտեի Շիրակի մարզային քննչական վարչություն և ընդունվել վարույթ: ՀՀ քննչական կոմիտեի տեղեկատվության և հասարակայնության հետ կապերի բաժին

19:19 - 24 հուլիսի, 2020

ԱԱՏՄ-ն ստուգայց է իրականացրել Գյումրու փակ տիպի հաստատություններում

ՀՀ առողջապահական և աշխատանքի տեսչական մարմնի(ԱԱՏՄ) Հյուսիսային տարածքային կենտրոնի մասնագետներն այսօր ուժեղացված ռեժիմով հերթական ստուգայցն են իրականացրել Գյումրի և Արթիկ քաղաքներում: Գյումրիում ուժեղացված ստուգայց անցկացվել էր երկու օր առաջ ևս։ Ստուգայցերի շրջանակն այսօր ընդգրկել է մասնավորապես «Գյումրիի տարեցների շուրջօրյա խնամքի կենտրոն»-ը, «Ֆրիտյոֆ Նանսենի անվան երեխաների խնամքի և պաշտպանության N2 գիշերօթիկ հաստատություն» ՊՈԱԿ-ը: Այցի և արդյունքների մասին տեղեկացնում է ԱԱՏՄ-ն: Փակ տիպի այս հաստատություններում, որտեղ աշխատում են 14-օրյա հերթափոխով, բոլոր աշխատակիցները հետազոտվում են մինչ հերթափոխն ընդունելը: Դիտարկման արդյունքում արձանագրվել է, որ «Գյումրիի տարեցների շուրջօրյա խնամքի կենտրոն»-ում և «Ֆրիտյոֆ Նանսենի անվան երեխաների խնամքի և պաշտպանության N2 գիշերօթիկ հաստատություն»-ում հակահամաճարակային միջոցառումների պատասխանատուները նշանակված են, ստեղծված է օպերատիվ շտաբ՝ իր պատասխանատուով: Գրանցամատյաննեը պատշաճ լրացված են, երեխաներին խնամքի կենտրոնում օրական ջերմաչափում են նույնիսկ երեք անգամ: Ապահովված են անհատական պաշտպանիչ միջոցները, դիմավահանները, ախտահանիչները, հպման մակերեսների համար օգտագործվում է սպիրտի 70 տոկոսանոց լուծույթ, սանհանագույցներում առկա են մեկանգամյա օգտագործման անձեռոցիկներ:

20:07 - 23 հուլիսի, 2020

Գյումրիում շուտով իր դռները կբացի կամերային «Մտորումների թատրոնը» |hetq.am|

hetq.am: Մայթին շարած փոքրիկ աթոռների վրա տեղավորված սակավաթիվ հանդիսատեսը հեքիաթի սպասումով լուռ հետեւում է կիսաթափանց էկրանին հայտնվող ու անհետացող ստվերներին: Եվս մի քանի րոպե եւ ներկայացումը սկսվում է: Գյումրվա բարբառով տարբեր պատումները հնչում են ծանոթ դերասանների ձայններով: Էկրանի հետեւում «թաքնված» տիկնիկավարները հմտորեն ղեկավարում են կաշվից պատրաստված խամաճիկներին: Գյումրեցի հանդիսատեսի համար ստվերային թատրոնը նորություն է: Սա տեսողական արվեստի ձեւ է, որ ձեւավորվել է Չինաստանում 1700 տարի առաջ, հետագայում տարածվել Հնդկաստանում, Եգիպտոսում, Ֆրանսիայում, Անգլիայում, ԱՄՆ-ում եւ մի շարք այլ երկրներում: Ստվերների թատրոնում կիրառվում են կիսաթափանց մեծ էկրաններ եւ հարթ մարիոնետներ՝ խամաճիկներ, որոնք կառավարվում են բարակ փայտիկներով: Մարիոնետները սովորաբար պատրաստվում են բարակ, թափանցիկ կաշվից, թղթից կամ ստվարաթղթից, կարող են լինել ինչպես ամուր եւ ամբողջական, այնպես էլ ճկվող եւ առանձին մասերից բաղկացած: Այստեղ էլ, ինչպես եւ տիկնիկային թատրոնի պարագայում, խամաճիկներին շունչ ու հոգի տվողը տիկնիկավարն է: Հովհաննես Հովհաննիսյան Հուլիսի 19-ին, ստվերային ներկայացմամբ, Գյումրու նորաստեղծ «Մտորումների թատրոնն» առաջին անգամ, ոչ պաշտոնապես ներկայացավ իր սակավաթիվ հանդիսատեսին: Թատրոնի հիմնադիրը ՀՀ վաստակավոր արտիստ, Վ. Աճեմյանի անվ. դրամատիկական թատրոնի դերասան եւ ռեժիսոր Հովհաննես Հովհաննիսյանն է: Գյումրիում գործող երկու թատրոնների՝ դրամատիկականի եւ տիկնիկայինի կողքին իր առաջին քայլերն անող 3-րդ թատրոնի ծնունդը համընկավ աշխարհն իրար խառնած կորոնավիրուսային պանդեմիայի, արտակարգ դրության հաստատման եւ մի շարք սահմանափակումների հետ: Հիմնադրի խոսքերով, Գյումրու 3-րդ թատրոնը հավակնություններ չունի մրցելու մյուս թատրոնների հետ, այն կամերային բնույթի է, լինելու է խիզախումների, գաղափարների իրականացման փորձարարական հարթակ: «Երկու տարի է մտածում էի այս մասին,-խոստովանում է Հովհաննես Հովհաննիսյանը,-երկար ժամանակ որոնումների մեջ էի, անգամ մտածում էի թատրոնը կոչել «Որոնումների թատրոն», սակայն հետո հասկացա, որ այն ինչը հանդիսատեսին բերելու է մեր մոտ, պարտադիր մտորումների տեղիք է տալու, այդպես ծնվեց թատրոնի ներկայիս անունը»: Չլիներ կորոնավիրուսը, ապրիլի 1-ին՝ Հումորի միջազգային օրը, թատրոնը պաշտոնապես ազդարարելու էր մուտքը թատերական աշխարհ: Մարտ ամսին, երբ աշխարհում ամեն ինչ գնում էր փակման ճանապարհով, Գյումրու սրտում՝ Կումայրի արգելոցի հենց կենտրոնում, ծնվում էր մի նոր մշակութային օջախ: Տեղն եւս պատահական չի ընտրված: Աբովյան փողոցում գտնվող երկհարկանի շինություններից մեկի նկուղային հարկում 1978-79թթ-ին բացվել էր առաջին՝ «Կոնյակի բարը», որտեղ կարելի էր ճաշակել կոնյակ, վիսկի, ջին, սկոտչ, ռոմ, լսել ջազային երաժշտություն: «Բարմենը Ֆիլիպն էր: Երեկոյան այստեղ միշտ լիքն էր, գալիս էին միայն տղամարդիկ՝ կանանց մուտքն արգելված էր: Խմում էին, խոսում ու վերջում պարտադիր կռիվ էր՝ ժամը 24-ից հետո սկսվում էր Արամ Խաչատրյանի «Սուսերով պարը»,-զրուցակիցս ծիծաղում է,-մենք էլ նոր-նոր կյանք մտնող 16-17 տարեկան պատանիներ էինք, դպրոցի համար տված գումարները խնայում էինք, որ գայինք մի բաժակ ռոմ կամ վիսկի խմելու, էդպես փորձում էինք հասուն կյանք մտնել: Վայրն ինձ համար միշտ ասոցացվել է ազատության, նոր գաղափարների հետ, այնպես որ Գյումրիում, երբ տեղ էի փնտրում թատրոնի համար, էս տեղն աչքի առաջ ունեի, խոսեցի տանտիրոջ հետ, որ հիմա Երեւանում է ապրում, սիրով համաձայնվեց վարձով տալ»: Արթուր Օթարյան «Մտորումների թատրոնն» ազատ հարթակ է լինելու ստեղծագործողների համար, որտեղ կարելի է գալ սեփական նախագծով, անգամ սեփական փոքրիկ թատերական կազմով եւ անել ներկայացումներ: Տիկնիկային թատրոնի դերասան-տիկնիկավար Արթուր Օթարյանի համար նորաստեղծ թատրոնը հնարավորություն է մարմին տալու տարիների երազանքին: «Միշտ երազել եմ, որ Գյումրիում ունենանք ստվերների թատրոն,-ասում է Արթուրը,-Չինաստանում եւ Հնդկաստանում արվեստի այս տեսակը մեծ տարածում է ունեցել 2-րդ հազարամյակում, 16-րդ դարում տարածվել է Թուրքիայում, որտեղ ավելի շատ հայտնի է եղել «Ղարագյոզ» կոչվող տիկնիկը, հայերն եւս անմասն չեն մնացել այս արվեստին: Մենք՝ վերցնելով էդ կերպարն, իրեն կոչել ենք Ղազարոս: Երեւանում կա ստվերների թատրոն՝ «Այրոգի»-ին, որ գործում է 1980-ականներից, մենք էլ կլինենք երկրորդը: Անունը կորոշենք, երբ խումբը վերջնականապես ձեւավորվի, կարեւորը որ արդեն ունենք ստեղծագործելու տեղ»: Շարունակությունը՝ hetq.am-ում

18:00 - 23 հուլիսի, 2020

Գյումրու ծերանոցում համաճարակային իրավիճակը կայունանում է․ կորոնավիրուսով հիվանդ շահառուներից միայն 4-ն է հիվանդանոցում |factor.am|

factor.am: Գյումրիի տարեցների տուն-ինտերնատում կորոնավիրուսային իրավիճակը կայունանում է։ Այժմ խնամքի կենտրոնի շահառու 4 պացինենտ է հոսպիտալացված։ «Հիվանդանոցում արդեն 4 հոգի է մնացել, մյուսները դուրս են գրվել։ Երկուսը Սպիտակում են, մեկը՝ Երևանում, մեկը՝ Գյումրիում»,- ասաց Հայկական Կարմիր Խաչ ընկերության լրատվական ու լուսաբանման բաժնի վարիչ Նունե Գրիգորյանը։ Մայիսի 1-ից Հայկական Կարմիր Խաչն է ստանձնել խնամքի կենտրոնի կառավարումը, և այն այժմ կոչվում է Գյումրու շուրջօրյա խնամքի կենտրոն։ Մեր զրուցակիցը նաև նշեց, որ 16 շահառու մեկուսացած է խնամքի կենտրոնում, նրանց վիճակը նորմալ է։ Աշխատակիցների մոտ էլ փոփոխություն չկա առաջին օրվանից։ «12 հոգի էր հիվանդ, որոնցից մեկը՝ հիվանդանոցում, մյուսների վիճակը նորմալ է։ Իրենք տանն են մեկուսացած»,- ասաց Նունե Գրիգոյանը։ Ընդհանուր առմամբ, հիվանդ շահառուներից մահացել է 5-ը։ «Վերջին շահառուի մոտ կրկնակի թեստը բացասական էր, սակայն այնքան ծանր հիվանդություններ ուներ, որ մահացել է»,- ասաց Գրիգորյանը։ Շարունակությունը՝ factor.am-ում։

17:00 - 22 հուլիսի, 2020

Գյումրիում տեքստիլ 2 արտադրամասերը կորոնավիրուսի պատճառով կասեցումից հետո աշխատանքը վերսկսել են. տեսչական մարմինները ստուգումներ են իրականացրել |shantnews.am|

shantnews.am: Այսօր Գյումրիում ստուգումներ են իրականացրել կառավարության ենթակա շուկայի վերահսկողության, բնապահպանության և ընդերքի, տրանսպորտի, սննդի, առողջապահության և աշխատանքի տեսչական մարմինները։ 5 տեսչական կառույցներից յուրաքանչյուրը դիտարկումներն իրականացրել է իր ոլորտի շրջանակում։ Ստուգումներ են արվել բենզա և գազալցակայաններում, հանրային տրանսպորտում, սպասարկման օբյեկտներում, Գյումրիի տեքստիլ արտադրության այն ընկերություններում, որոնցում աշխատակիցների թիվը 100-ից ավելի է։ Շուկայի վերահսկողության տեսչական մարմնի մշտադիտարկման առանցքում մի շարք տնտեսվարողներ էին։ Նախ այցելեցին բենզալցակայաններ, որոնցում անվտանգության կանոնները հիմնականում պահպանված էին, բայց փակ աղբամանները ճիշտ տեղում, գծանշումները համապատասխան հեռավորությամբ չկատարելու դիտողություններ արվեցին։ «Առաջին այցելության ժամանակ Գյումրիում 5-6 տնտեսվարողի գործունեություն է կասեցվել, էստեղ աղբամանների, գծանշումների խնդիրներ կային հիմնականում, բայց էսօրվա կրկնայցը ցույց է տալիս, որ մի քանի տնտեսվարողների մոտ, որոնց գործունեությունը նախկինում կասեցվել էր, տեսնում ենք, որ շտկված են դրանք, էդ խնդիրները վերացված են»,- ասաց Շուկայի վերահսկողության տեսչական մարմնի իրազեկման և հանրային կապերի բաժնի պատասխանատու Դավիթ Պետրոսյանը։ Հանրային սպասարկման օբյեկտներում ջերմաչափման գրանցամատյաններ կան, աշխատակիցները դիմակներ կրում են։ Սանիտարական նորմերի պահպանմանը ժամանցի վայրերում պատասխանատուները հատուկ ուշադրություն են դարձնում, հատկապես երբ նման սրահներ այցելում են նաև երեխաները։Առողջապահության և աշխատանքի տեսչական մարմնի աշխատակիցների ուսումնասիրությունների կենտրոնում այսօր տեքստիլ արտադրության ընկերություններն էին, որոնցում աշխատակիցների թիվը գերազանցում է 100-ը։ Մեկ ամիս առաջ է աշխատանքը վերսկսել «Սվետտեքս» ընկերությունը։ Հունիսի սկսզբին ընկերության երկու տասնյակ աշխատակիցների մոտ հայտնաբերվել էր COVID 19-ը , ինչի պատճառով ընկերությունը ժամանակավորապես դադարեցրել էր աշխատանքը, մոտ 120 աշխատակիցներ մեկուսացվել էին։ «Մենք 26-27 վարակակիր ունեինք, աշխատակիցները հունիսի 9-ից գտնվում էին հարկադիր պարապուրդի մեջ, մարդիկ իրենց տներում նստած իրենց հեռավորությունը պահել են, գտնվել են բժիշկների հսկողության տակ, աշխատանքը վերսկսել ենք հունիսի 22-ից»,- նշեց «Սվետտեքս» ընկերության արտադրամասի ղեկավար Սուսաննա Պետրոսյանը: «35 դեպք ենք ունեցել հունիս ամսվա սկզբին, կասեցվեց մեր գործունեությունը, բոլոր հիվանդները մեկուսացվեցին, սկսել ենք աշխատել, ու առ այսօր ոչ մի հիվանդ չունենք»,- ասաց Հմայակ Ապիկյանը: Շարունակությունը՝ shantnews.am-ում

11:07 - 22 հուլիսի, 2020