Թուրքիա

Չավուշօղլուն շնորհակալություն է հայտնել Ալիևին Միջերկրական ծովում Թուրքիայի դիրքորոշումը պաշտպանելու համար |tert.am|

tert.am: Թուրքիայի արտգործնախարար Մևլութ Չավուշօղլուն թվիթերյան գրառմամբ շնորհակալություն է հայտնել Ադրբեջանի նախագահ Իլհամ Ալիևին Միջերկրական ծովի արևելյան հատվածում Թուրքիայի կողմից կատարվող սեյսմիկ հետազոտական աշխատանքներին աջակցություն հայտնելու համար: Այս մասին գրում է «Անադոլու» գործակալությունը: «Ադրբեջանի աջակցության մասով չէինք էլ կարող կասկածել: Թուրքիան էլ, իր հերթին, միշտ Ադրբեջանի կողքին է լինելու»,-գրել է Չավուշօղլուն: Թուրքիայի արտգործնախարարն իր գրառումն ավարտել է «մեկ ազգ, երկու պետություն» խոսքերով: Սեպտեմբերի 2-ին Ադրբեջանի նախագահ Իլհամ Ալիևը երկրում Հունաստանի նորանշանակ դեսպանի հետ հանդիպման ժամանակ հայտարարել է, որ Ադրբեջանը Միջերկրական ծովում պաշտպանում է Թուրքիայի դիրքորոշումը:

12:38 - 03 սեպտեմբերի, 2020

«Ադրբեջանի այն դիրքորոշման պայմաններում, որն այսօր է հնչեցվում, ես չեմ տեսնում այն ուղին, որով հնարավոր է ԼՂ հակամարտության կարգավորումը». Ռոբերտ Քոչարյանի հարցազրույցը РБК-ին |tert.am|

tert.am: Ռոբերտ Քոչարյանը հարցազրույց է տվել ռուսական РБК հեռուստաալիքին: Լրագրողը հարցրել և ստացել է Քոչարյանի տեսակետները քաղաքականություն վերադարձի, «թավշյա հեղափոխության» պատճառների, Բելառուսում իրավիճակի, Ադրբեջանի հետ հակամարտության, Արցախի խնդրի կարգավորման, Սերժ Սարգսյանի, Հայաստանի տնտեսության ու առաջիկա ծրագրերի մասին: Հարցազրույցի ընթացքում նա անդրադարձել է նաև Լեռնային Ղարաբաղի հակամարտության ներկայիս իրավիճակին: «Ադրբեջանի այն դիրքորոշման պայմաններում, որն այսօր է հնչեցվում, ես չեմ տեսնում այն ուղին, որով հնարավոր է հակամարտության կարգավորումը: Լեռնային Ղարաբաղի գոյության իրավունքներն անվիճելի են: Առաջինը՝ Լեռնային Ղարաբաղը երբեք չի եղել անկախ Ադրբեջանի կազմում: Դա փաստ է: Երկրորդը Լեռնային Ղարաբաղի գոյության իրավական հիմքերն են: ԽՍՀՄ-ում ինքնավար հանրապետությունները իրավունք ունեին հանրաքվեի միջոցով որոշելու իրենց ճակատագիրը: Եվ երրորդ՝ դա Լեռնային Ղարաբաղի Հանրապետության գրեթե 30 տարվա փաստացի գոյությունն է, որը պաշտոնական Բաքուն փորձում է հերքել»,-ասել է Ռոբերտ Քոչարյանը: Քոչարյանը անդրադարձել է նաև հայ-ադրբեջանական սահմանին տեղի ունեցած վերջին բախումներին: «Երևի չարժեր չափազանցնել այդ բախման մասշտաբները, եթե չլիներ մշտական սպառնալիք, որ ցանկացած նմանատիպ բախում կարող է հանգեցնել լայնամասշտաբ պատերազմի: Օբյեկտիվորեն նման սպառնալիք կա միշտ: Շփման գծի ամբողջ երկայնքով: Դրանով էլ բացատրվում է Ռուսաստանի և ԵԱՀԿ ՄԽ համանախագահների արագ արձագանքը` մարել հիմա, որպեսզի ավելի մեծ հրդեհ չբռնկվի մեկ կամ երկու շաբաթից: Իսկ ինքն իրենով հակամարտության այս մասշտաբը մեծ չէր, նույնիսկ անհամեմատելի է 2016 թվականի դեպքերի հետ: Ամեն դեպքում զոհեր են եղել: Սակայն պատերազմի վերսկսման հավանականությունը մշտապես կա: Եվ հենց դրանով է բացատրվում և՛ ԶԼՄ-ների, և՛ համանախագահների, և՛ ընդհանրապես միջազգային հանրության նման զգայուն վերաբերմունքն այն ամենին, ինչ կատարվում է այդ շփման գծում»,-ասել է նա: Շարունակությունը՝ tert.am-ում

17:57 - 02 սեպտեմբերի, 2020

«Թուրքիայի դեմ քայլեր մի՛ արեք, տուժողը դուք եք լինելու»․ Չավուշօղլուն դիմել է Հունաստանին |ermenihaber.am|

ermenihaber.am: Թուրքիայի Արտաքին գործերի նախարար Մևլութ Չավուշօղլուն անդրադարձել է Հունաստանին պատկանող և Հարավային Էգեյան կղզիներ վարչական միավորի մաս կազմող Մեիս (Կաստելորիզո) կղզում զորք տեղակայելու Հունաստանի որոշմանը։ Չավուշօղլուն նշել է, որ այդ կղզին Հունաստանի ցամաքային տարածքից 580 կմ, իսկ Թուրքիայի Անթալիայի նահանգից ընդամնեը 2 կմ հեռավորության վրա է գտնվում։ Բայց հակառակ այդ հանգամանքի՝ Թուրքիայի արգործնախարարի խոսքերով 40 հազար կմ քառակուսի ջրային տարածքի վրա Հունաստանի վերահսկեղությունն է տարածվում, որը անընդունելի է իրենց համար։ Թուրք պաշտոնյան կարծում է այս ամենն արվել է այն բանի համար, որ Թուրքիան բանտարկված լինի ամեն կողմից։ Ըստ նրա՝ Միջերկրական ծովի Արևելյան ափի երկրները պետք է բանակցությունների միջոցով «արդարացի» կերպով բաժանեն իրար մեջ ջրային տարածքը։ Մևլութ Չավուշօղլուն նաև ընդգծել է, որ այդ կղզիներում 1947 թվականի Փարիզի համաձայնագրով արգելված է զորքերի տեղակայումը և կարելի է միայն սահմանափակ թվով ոստիկանական ուժեր տեղակայել անվտանգություն ապահովելու նպատակով։ Թուրքիայի արտգործնախարարը սպառնացել է, որ եթե Հունաստանը շարունակի սահմանափակումները շրջանցելով մեծաթիվ զորքեր տեղակայել այնտղ, ապա տուժողը հենց Հունաստանն է լինելու։

14:53 - 02 սեպտեմբերի, 2020

ՀՀ-ն դատապարտում է Թուրքիայի կողմից ՆԱՏՕ-ի խաղաղապահների գործունեության խոչընդոտումը |armenpress.am|

armenpress.am: ՀՀ արտաքին գործերի նախարարությունը դատապարտելի է համարում Թուրքիայի այն քայլը, որով վերջինս արգելել է գերմանական օդանավին թռչել իր օդային տարածքով և տանել հայ խաղաղապահներին: Այս մասին սեպտեմբերի 2-ին հրավիրված մամուլի ասուլիսի ընթացքում ՀՀ արտաքին գործերի նախարարի մամուլի խոսնակ Աննա Նաղդալյանն ասաց. «Դատապարտելի է, որ Թուրքիան արդեն իսկ խոչընդոտում է ՆԱՏՕ-ի և ՄԱԿ-ի շրջանակներում խաղաղապահների գործողությունները՝ ելնելով պարզապես իր հակահայկական դիրքերից: Մենք այս հարցի մասին նաև բարձրաձայնել ենք մեր միջազգային գործընկերների մոտ՝ դիվանագիտական խողովակներով»։

14:51 - 02 սեպտեմբերի, 2020

Հայաստանը Թուրքիային չի դիտարկում որպես ԼՂ հիմնախնդրի կարգավորման միջնորդ. ՀՀ ԱԳՆ |armenpress.am|

armenpress.am: Հայաստանի Հանրապետությունը Թուրքիային չի դիտարկում որպես Լեռնային Ղարաբաղի հիմնախնդրի կարգավորման միջնորդ: Այս մասին սեպտեմբերի 2-ին տեղի ունեցած մամուլի ասուլիսի ընթացքում ասաց ՀՀ արտաքին գործերի նախարարի մամուլի խոսնակ Աննա Նաղդալյանը: «Թուրքիան իր պահվածքով, կարծես, իրապես ցանկանում է իրեն դրսևորել որպես հակամարտության կողմ, ինչը Թուրքիայի ապակայունացնող քաղաքականության հերթական դրսևորումն է: Տպավորությունն այնպիսին է, որ Հայաստանը շրջափակման ենթարկող երկիրը՝ երկիր, որը չի ճանաչում և, անգամ, արդարացնում է Հայոց ցեղասպանությունը, փորձում է հանդես գալ որպես տուժած կողմ»,- ասաց Նաղդալյանը: ԱԳ նախարարի մամուլի խոսնակը նշեց, որ Լեռնային Ղարաբաղի հիմնախնդրի կարգավորման միակ ձևաչափը ԵԱՀԿ Մինսկի խմբի համանախագահությունն է: Հայաստանը Թուրքիային չի դիտարկում որպես միջնորդ և իր քաղաքականությունը Թուրքիայի հանդեպ իրականացնում է հենց այս գնահատականի հիման վրա:

13:36 - 02 սեպտեմբերի, 2020

Թուրքիայում ձերբակալել են ԻՊ-ի պարագլուխներից մեկին |armenpress.am|

armenpress.am: Թուրքիայի անվտանգության ուժերը ձերբակալել են «Իսլամական պետություն» (ԻՊ) ահաբեկչական խմբավորման պարագլուխներից մեկին: Այդ մասին սեպտեմբերի 1-ին հայտնել է Թուրքիայի ներքին գործերի նախարար Սուլեյման Սոյլուն: «Կալանավորվել է ԻՊ ահաբեկչական կազմակերպության այսպես կոչված էմիրը Թուրքիայում: Խուզարկության ժամանակ զինյալի մոտ հայտնաբերվել է քայքայիչ գործունեության պլան»,- գրել է ներքգործնախարարության ղեկավարը Twitter-ի՝ իր էջում: 2019 թվականի հոկտեմբերի 27-ին ԱՄՆ-ի նախագահ Դոնալդ Թրամփը հայտարարել է Միացյալ Նահանգների զինծառայողների կողմից ԻՊ-ի հիմնադիր եւ պարագլուխ Աբու Բաքր ալ Բաղդադիի ոչնչացման մասին: Թրամփն այն ժամանակ շնորհակալություն է հայտնել Ռուսաստանին, Թուրքիային, Սիրիային եւ Իրաքին գործողությունն իրականացնելիս աջակցության համար: Նրա խոսքով՝ ՌԴ-ն ԱՄՆ-ի համար օդային տարածություն է բացել Սիրիայի որոշակի շրջաների երկնքում, հաղորդել է ՏԱՍՍ-ը:

13:44 - 01 սեպտեմբերի, 2020

Թուրքիայի ԱԳՆ-ն անհանգստություն է հայտնել իր կողմից ահաբեկչական ճանաչված «Սիրիայի ժողովրդավարական ուժերի» ներկայացուցիչների՝ Ռուսաստան հրավիրվելու կապակցությամբ |tert.am|

tert.am: Թուրքիան Ռուսաստանին կոչ է արել հրաժարվել քայլերից, որոնք կարող են ծառայել սիրիական այն կառույցների շահերին, որոնք կապված են Թուրքիայի կողմից ահաբեկչական ճանաչված «Քուրդիստանի աշխատավորական կուսակցության» հետ: Այս մասին գրում է «Անադոլու» գործակալությունը` հղում տալով Թուրքիայի արտգործնախարարության տարածած հայտարարությանը: Թուրքիայի ԱԳՆ-ն հայտարարությունը տարածել է Ռուսաստան «Սիրիայի ժողովրդավարական ուժերի», որոնց գլխավոր միջուկը կազմում են հենց ՔԱԿ անդամները, պատվիրակության այցի և Ռուսաստանի պաշտոնատար անձանց հետ բանակցություններ վարելու առնչությամբ: «Ռուսաստանի Դաշնությունը պետք է խուսափի այնպիսի գործողություններից, որոնք հակասում են Աստանայի ձևաչափի ոգուն և պարտավորություններին»,-ասված է Թուրքիայի ԱԳՆ հայտարարության մեջ: Արտգործնախարարությունում ընդգծել են նաև, թե ՔԱԿ-ի սիրիական թևը սպառնում է Սիրիայի տարածքային ամբողջականությանը:

10:44 - 01 սեպտեմբերի, 2020

Թուրքիան ապակառուցողական և վտանգավոր քաղաքականություն է վարում․ Զոհրաբ Մնացականյանը՝ «Ինտերֆաքս»-ին |shantnews.am|

shantnews.am: ՀՀ ԱԳ նախարար Զոհրաբ Մնացականյանը հարցազրույց է տվել «Ինտերֆաքս» գործակալությանը։ Պատասխանելով հարցին՝ համաձա՞յն եք, որ Թուրքիայի աջակցությունը Բաքվին «կրակի վրա յուղ է լցնում» և հեռացնում է կոնֆլիկտի կարգավորման հնարավորությունը, նախարարը նշել է․ «Հուլիսի 12-ից հետո միջազգային հանրությունը դեէսկալացիայի, բռնությունը դադարեցնելու բազմաթիվ կոչեր է արել: Միակ երկիրը, որ փորձեց ոչ թե նվազեցնել լարվածությունը, այլ ավելի շատ անկայունություն մտցնել տարածաշրջանում, Թուրքիան էր: Թուրքիայի ապակայունացնող քաղաքականությունն ու ագրեսիան սպառնալիք են ներկայացնում իր հարևան բոլոր տարածաշրջանների համար: Այսօր Թուրքիան փորձում է իր ապակայունացնող քաղաքականությունը «արտահանել» Հարավային Կովկասի տարածաշրջան: Դա լուրջ մտահոգություն է առաջացնում: Թուրքիան ապակառուցողական և վտանգավոր քաղաքականություն է վարում։ Թուրքիան իր գործողություններով շարունակում է սպառնալիք լինել Հայաստանի անվտանգության համար: Այդ կապակցությամբ Հայաստանը կաշխատի իր անվտանգության հետագա ամրապնդման, այդ թվում՝ իր գործընկերների հետ համագործակցության ճանապարհով»,- ասել է ՀՀ ԱԳՆ ղեկավարը:

10:14 - 01 սեպտեմբերի, 2020

Թուրքիան երկարաձգել է Միջերկրական ծովում երկրաբանական-հետախուզական աշխատանքների անցկացման ժամկետը |tert.am|

tert.am: Թուրքիան որոշել է երկարաձգել Միջերկրական ծովում իր կողմից անցկացվող երկրաբանական-հետախուզական աշխատանքների անցկացման ժամկետը: Այս մասին գրում է «Անադոլու» գործակալությունը: Գործակալության տվյալներով` Անկարան Navtex-ի նոր ծանուցագիր է թողարկել, որի համաձայն՝ Oruç Reis նավը կշարունակի իր աշխատանքները Միջերկրական ծովի արևելյան հատվածում մինչև սեպտեմբերի 12-ը, այնինչ սպասվում էր, որ այդ աշխատանքները կավարտվեն սեպտեմբերի 1-ին: Նշվում է, որ նավն իր աշխատանքները շարունակելու է Կիպրոսի ափերի մոտակայքում` Ataman և Cengiz Han նավերի հետ միասին:

09:44 - 01 սեպտեմբերի, 2020

Համավարակի պատճառով Թուրքիայի տնտեսությունը ռեկորդային անկում է գրանցել |tert.am|

tert.am: 2020 թվականի երկրորդ եռամսյակում Թուրքիայի տնտեսությունն ամենամեծ անկումն է գրանցել 1998 թվականից ի վեր: Այս մասին տեղեկացնում է «Անադոլու» գործակալությունը` հղում տալով Թուրքիայի ֆինանսների նախարար Բերաթ Ալբայրաքի ներկայացրած տվյալներին: Ըստ նախարարի ներկայացրած տվյալների՝ Թուրքիայի տնտեսությունը 2020 թվականի ապրիլ-հունիս ամիսներին կրճատվել է 9,9%-ով: «Մենք գիտեինք, որ մեզ վրա կզգանք հարյուրամյակի ամենաճգնաժամային համավարակի հետևանքները, որոնք երկրորդ եռամսյակում հանգեցրել են աշխարհի շատ երկրների տնտեսական ցուցանիշների անկմանը»,-հայտարարել է Ալբայրաքը: Միևնույն ժամանակ, թուրք նախարարը բավականին լավատես է և հայտարարել է, որ Թուրքիայի տնտեսությունը գտնվում է ամուր հիմքերի վրա:

17:41 - 31 օգոստոսի, 2020

Հայաստանում քրդական համայնքը բողոքի ակցիա արեց ՄԱԿ-ի գրասենյակի դիմաց |tert.am|

tert.am: Հայաստանում քրդական համայնքը բողոքի ակցիա արեց ՄԱԿ-ի գրասենյակի դիմաց։ Նրանք ցանկանում են ՄԱԿ-ի ուշադրությունը սևեռել Իրաքի տարածքում քրդական բնակավայրերի նկատմամբ թուրքական գործունեությունների վրա։Ակցիայի մասնակիցներից «Քուրդիստան կոմիտեի» նախագահ Սլո Դրբոյանն ասաց, որ Իրաքում տեղի ունեցողն անհանգստացնում է Հայաստանում գտնվող քրդական ժողովրդին, և ցանկանում են ՄԱԿ-ի ուշադրությունը հրավիրել տեղի ունեցող իրադարձությունների վրա: «Մենք ուզում ենք դիմել ՄԱԿ-ի ղեկավարությանը, որ միջամտի և միջոցներ ձեռնարկի` կանխելու թուրքերի այս ցեղասպան քաղաքականությունը, որը վտանգ է ներկայացնում տարածաշրջանի բոլոր ժողովուրդների համար»,- ասաց նա և հավելեց, որ քրդական ժողովրդի առաջին ցանկությունը ժողովրդավարությունն է: Նրա դիտարկմամբ`թուրքերին հաջողվում է լռեցնել մյուս ժողովուրդների ղեկավարներին, և նրանք կարողանում են իրացնել իրենց ծրագրերը: Ըստ Սլո Դրբոյանի՝ պետք է պայքարել, որ Թուրքիայի նախագահի «ֆաշիստական» ռեժիմին վերջ դրվի: Սլո Դրբոյանը նշեց, որ իրենց նամակը ցանկանում են հանձնել ՄԱԿ-ի ներկայացուցիչներին, որ ղեկավարությունը կարողանա տիրապետել տեղի ունեցող իրադարձությունների մանրամասներին: Նրանք նամակը փոխանցեցին ՄԱԿ-ի աշխատակցին:

13:44 - 31 օգոստոսի, 2020

Թուրքիայի պատվիրակությունը երկօրյա այցով մեկնեց Ռուսաստան Լիբիայի շուրջը բանակցությունների համար |armenpress.am|

armenpress.am: Թուրքիայի պատվիրակությունն օգոստոսի 31-ին երկօրյա այցով մեկնել Է Մոսկվա Լիբիայի եւ Սիրիայի շուրջը բանակցությունների համար: Այդ մասին հայտնել են հանրապետության արտաքին գործերի նախարարությունում: Արտաքին քաղաքական գերատեսչության հայտարարության համաձայն՝ այցը տեղի կունենա օգոստոսի 31-ից մինչեւ սեպտեմբերի 1-ը: Ռուսաստանցի պաշտոնակիցների հետ բանակցություններում Թուրքիայի պատվիրակությունը կգլխավորի փոխարտգործնախարար Սեդաթ Օնալը: A Haber հեռուստաալիքի տվյալներով՝ պատվիրակության կազմի մեջ են մտնում նաեւ ազգային պաշտպանության նախարարության եւ Ազգային հետախուզական կազմակերպության ներկայացուցիչներ, հաղորդել Է ՏԱՍՍ-ը:

11:29 - 31 օգոստոսի, 2020

Նրանք, ովքեր կարծում են, թե կարող են կարմիր գծեր սահմանել Միջերկրական ծովի արևելքում, կբախվեն մեր երկրի վճռական դիրքորոշմանը. Թուրքիայի ԱԳՆ պատասխանն Էմանուել Մակրոնին |tert.am|

tert.am: Թուրքիայի արտգործնախարարության մամուլի խոսնակ Համի Աքսոյը պատասխանել է Միջերկրական ծովում Թուրքիայի դեմ «կարմիր գծերի քաղաքականություն» սկսելու մասին Ֆրանսիայի նախագահ Էմանուել Մակրոնի հայտարարություններին: Այս մասին գրում է «Անադոլու» գործակալությունը: «Նրանք, ովքեր կարծում են, թե կարող են կարմիր գծեր սահմանել արդար գործի դեմ, կբախվեն մեր երկրի վճռական դիրքորոշմանը: Տարածաշրջանում կարմիր գծեր սահմանելը կարող է բխել միայն Թուրքիայի և Կիպրոսի թուրքերի միջազգային իրավունքներից: Նրանց համար, ովքեր իրենց տեսնում են խոշորացնող հայելու մեջ, ժամանակն է նայել ճշմարտության աչքերին: Քարտեզի վրա գծեր գծելով՝ կայսերական պայմանավորվածությունների իրականացման դարաշրջանն անցյալում է»,-հայտարարել է ԱԳՆ խոսնակը: Աքսոյն ընդգծել է, որ Միջերկրական ծովում բոլոր տարաձայնությունները պետք է լուծվեն «տարածաշրջանի երկրների ընդհանուր համաձայնությամբ և երկխոսությամբ»: Ֆրանսիայի նախագահ Էմանուել Մակրոնը մի քանի օր առաջ լրագրողների հետ հանդիպմանը հայտարարել էր Միջերկրական ծովում Թուրքիայի գործողությունների դեմ «կարմիր գծերի քաղաքականություն» սկսելու մասին:

10:37 - 31 օգոստոսի, 2020

Թուրքիայի համար մինչև 13․1% տնտեսական անկում է կանխատեսվում |factor.am|

factor.am: Բրիտանական «Reuters» լրատվական գործակալության կողմից 14 ընկերության մասնակցությամբ կատարված հետազոտության արդյունքներով՝ այս տարվա երկրորդ կիսամյակում Թուրքիայի համար միջինը 11,8 տոկոս, իսկ 2020թ․ ընդհանուր առմամբ միջինը 1․9 տոկոս տնտեսական անկում է սպասվում։ Կանխատեսումների համաձայն կորոնավիրուսով պայմանավորված ճգնաժամի հետևանքով Թուրքիայի համար տարվա երկրորդ կիսամյակում կանխատեսվում է 7․1-13․1 տոկոս տնտեսության անկման ցուցանիշ։ Նշվում է, որ Թուրքիայի տնտեսությունը 2020թ․ առաջին կիսամյակում 4․5 տոկոսով աճ է գրանցել։

10:32 - 29 օգոստոսի, 2020

Եվրոպական Միությունը Թուրքիայի դեմ պատժամիջոցների փաթեթ է պատրաստում |tert.am|

tert.am: Եվրոպական Միությունը Թուրքիայի դեմ պատժամիջոցներ է պատրաստում, որոնց մասին քննարկումներ են լինելու սեպտեմբերի 24-ին տեղի ունենալիք ժողովի ժամանակ․ Անկարայի նկատմամբ սահմանափակող միջոցառումների փաթեթը քննարկվում է Միջերկրական ծովի արևելյան հատվածում աճող ճգնաժամի հետ կապված, որի շրջանակներում թուրքական կողմը չի հրաժարվում Հունաստանի հետ հակամարտության «սադրիչ ուղուց», գրում է eadaily.com կայքը։ Աղբյուրը մանրամասնում է, որ պատժամիջոցները կարող են Թուրքիայի առանձին անձանց, երկրի նավերի՝ մասնավորապես եվրոպական նավահանգիստների օգտագործման վրա ազդել։ ԵՄ պաշտոնական ներկայացուցիչները նշում են, որ միության երկրներն իրենց ուշադրությունը սևեռում են այն գործողությունների վրա, որոնք անօրինական են համարվում։

10:07 - 29 օգոստոսի, 2020

Թուրքիայի պաշտպանության նախարարը զորավարժությունների համար քննադատել է Հունաստանին |ermenihaber.am|

ermenihaber.am: Թուրքիայի Պաշտպանության նախարար Հուլուսի Աքարը քննադատել է Միջերկրական ծովում Հունաստանի իրականացրած զորավարժությունները՝ նշելով, որ նմանատիպ զորավարժություններով և քայլերով հնարավոր չէ խանգարել Թուրքիայի զինված ուժերին և փոխել նրանց ծրագիրը։ Աքարը ևս մեկ անգամ կրկնել է, որ իրենք բարիդրացիական հարաբերությունների կողմնակից են, բաց են երկխոսության համար, բայց երբեք չեն հրաժարվի իրենց «իրավունքներից»։ Պաշտպանության նախարար Աքարը պատրաստակամութուն է հայտնել հունական կողմի ցանկության դեպքում հյուրընկալել նրանց Թուրքիայում։ «Մենք մեր սահմաններում մնալու պայմանով մեր իրավունքներն ենք պահանջում։ Մյուս կողմից չենք պատրաստվում մի կաթիլ ջուր զիջել և թույլ չենք տա մեր իրավունքները ոտնահարել»,- ասել է թուրք պաշտոնյան։ Նա դժգոհել է նաև, որ իրենց «խաղաղասիրական» սեյսմիկ հետազոտություններին ի պատասխան հույները զորավարժություն են անցկացնում, ռազմանավեր ու ռազմական ինքնաթիռներ են ուղարկում։

13:33 - 28 օգոստոսի, 2020