Թուրքիա

Սև ծովում մեկնարկել են զորավարժություններ Թուրքիայի ռազմածովային ուժերի մասնակցությամբ |ermenihaber.am|

ermenihaber.am: Սև ծովում մեկնարկել են «Sea Braze» անվանումը կրող զորավարժությունները, որոնց մասնակցում են 8 երկրի զինծառայողներ։ Բացի ԱՄՆ-ի և Թուրքիայի ռազմածովային ուժերից, զորավարժություններին մասնակցում են նաև Բուլղարիայի, Ուկրաինայի, Նորվեգիայի, Վրաստանի, Ռումինայի և Իսպանիայի զինված ուժերի ներկայացուցիչները։ Նշյալ զորավարժություններում Թուրքիան ներկայացված է TCG Yıldırım (F-243) ֆրեգատով։ Զորավարժություններին մասնակցում են նաև ՆԱՏՕ-ի ռազմանավերը։

11:32 - 27 հուլիսի, 2020

Թուրքիայում Covid-19-ից մահացածների թիվն անցել է 5․600-ը |ermenihaber.am|

ermenihaber.am: Թուրքիայում հուլիսի 26-ին կորոնավիրուսից (Covid-19) մահացել է 17 մարդ։ Այդ մասին «Twitter» միկրոբլոգի իր պաշտոնական էջում հայտնել է Թուրքիայի առողջապահության նախարար Ֆահրեթթին Քոջան։ Նա նշել է, որ 1 օրում կատարված 40․016 թեստի արդյունքում հաստատվել է կորոնավարակի 927 նոր դեպք։ Նույն ժամանակահատվածում գրանցվել է ապաքինման 1․010 դեպք: Ըստ պաշտոնական տվյալների` մինչև օրս համավարակից ապաքինվել է 209.487 մարդ, իսկ 1.249 հիվանդ էլ գտնվում է վերակենդանացման բաժանմունքում։ Թուրքիայում մինչև այժմ ընդհանուր առմամբ արձանագրվել է վարակման 226․100 և մահվան 5․613 դեպք։ Թեստավորումների թիվը հասել է 4 մլն 572.688-ի։

10:34 - 27 հուլիսի, 2020

Էրդողանը Ստամբուլում հանդիպել է Լիբիայի Ազգային համաձայնության կառավարության ղեկավար Ֆայեզ Սարաջի հետ |tert.am|

tert.am: Թուրքիայի նախագահ Ռեջեփ Թայիփ Էրդողանը Ստամբուլում հանդիպել և բանակցություններ է վարել Լիբիայի Ազգային համաձայնության կառավարության ղեկավար Ֆայեզ Սարաջի հետ: Այս մասին տեղեկացնում է «Անադոլու» գործակալությունը` հղում տալով Թուրքիայի նախագահի աշխատակազմին: Սարաջի՝ Թուրքիա այցելության մասին չէր տեղեկացվել, բանակցությունների մանրամասների մասին նույնպես տեղեկություն չկա: 2011-ին Լիբիայի առաջնորդ Մուամմար Կադդաֆիի տապալումից և սպանությունից հետո երկիրը գործնականում դադարել է գործել որպես միասնական պետություն: Ներկա պահին երկրում երկիշխանություն է: Արևելքում իշխում է ժողովրդի կողմից ընտրված խորհրդարանը, իսկ արևմուտքում և մայրաքաղաք Տրիպոլիում՝ ՄԱԿ-ի և ԵՄ-ի աջակցությամբ կազմավորված Ազգային համաձայնության կառավարությունը: Երկրի արևելյան հատվածի իշխանությունները գործում են Տրիպոլիից անկախ և համագործակցում են Հաֆթարի բանակի հետ:

11:37 - 26 հուլիսի, 2020

Կոչ ենք անում Ադրբեջանին և Թուրքիային դադարեցնել իրենց պետության կողմից հովանավորվող հայատյացության արշավները․ ԱՄՆ Հայ դատի հանձնախումբ |factor.am|

factor.am: ԱՄՆ Հայ դատի հանձնախումբը Սան Ֆրանցիսկոյի հայկական դպրոցի՝ ադրբեջանցիների կողմից վանդալիզմի ենթարկվելու միջադեպը դատապարտող հայտարարություն է տարածել: «Կոչ ենք անում Ադրբեջանի և Թուրքիայի կառավարություններին անհապաղ դադարեցնել իրենց պետության կողմից հովանավորվող և հրահրվող թունավոր հայատյացության արշավները: Նաև կոչ ենք անում միջազգային հանրությանը՝ կառավարություններից մինչև հասարակական կազմակերպություններ, վերացնել հայերի դեմ ուղղված այս գլոբալ հարձակողական արշավը և կոչ անել անհապաղ դադարեցնել սադրանքները։ Ի վերջո, մենք մեր համայնքին կոչ ենք անում զգոն լինել ցանկացած կասկածելի գործունեության նկատմամբ, նման գործողությունների մասին անհապաղ զեկուցել իրավապահներին և ձեռնպահ մնալ ցանկացած սադրանքի տրվելուց»,- ասվում է հայտարարությունում։ Հիշեցնենք՝ ադրբեջանցիների կողմից վանդալիզմի է ենթարկվել Սան Ֆրանցիսկոյի հայկական դպրոցը։

19:58 - 25 հուլիսի, 2020

ԵՄ-ի և Թուրքիայի միջև համաձայնություն է ձեռք բերվել լիբիական հակամարտության շուրջ |ermenihaber.am|

ermenihaber.am: ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելը հայտնել է, որ Լիբիայում հրադադարի ռեժիմի պահպանման համար համատեղ աշխատանքներ իրականացնելու հարցում համաձայնություն է ձեռք բերվել Թուրքիայի արտգործնախարար Մևլութ Չավուշօղլուի հետ։ Բորելը Չավուշօղլուի հետ ունեցած հեռախոսազրույցի մասին գրառում է կատարել սոցցանցում։ ԵՄ բարձրաստիճան պաշտոնյան նաև նշել է, որ Չավուշօղլուի հետ համաձայնություն է ձեռք բերվել Արևելյան Միջերկրականում լարվածությունը թուլացնելու, ինչպես նաև ԵՄ անդամ երկրների արտաքին գործերի նախարարների ոչ պաշտոնական խորհրդի նիստից առաջ հանդիպելու վերաբերյալ։

17:37 - 24 հուլիսի, 2020

ԱԳ նախարարի տեղակալ Ավետ Ադոնցը հեռախոսազրույց է ունեցել Չեխիայի ԱԳ նախարարի տեղակալ Ալեշ Խմելարժի հետ

Հուլիսի 24-ին ԱԳ նախարարի տեղակալ Ավետ Ադոնցը հեռախոսազրույց ունեցավ Չեխիայի արտաքին գործերի նախարարի տեղակալ Ալեշ Խմելարժի հետ: Ավետ Ադոնցն իր չեխ գործընկերոջը ներկայացրեց հուլիսի 12-ից հայ-ադրբեջանական պետական սահմանի հյուսիս-արևելյան հատվածի երկայնքով Ադրբեջանի կողմից զինուժի կիրառման արդյունքում ստեղծված իրավիճակը, ինչպես նաև՝ խաղաղ բնակչության և քաղաքացիական ենթակառուցվածքների դեմ Ադրբեջանի կողմից իրականացվող շարունակական ագրեսիան: Ներկայացնելով իրադարձությունների վերաբերյալ ՀՀ դիրքորոշումը՝ ԱԳ նախարարի տեղակալը զրուցակցի ուշադրությունը հրավիրեց Ադրբեջանի կողմից հնչեցրած աննախադեպ սպառնալիքի՝ Մեծամորի ատոմակայանը ռմբակոծելու պատրաստակամության մասին հայտարարության վրա, ինչը սպառնում է ողջ տարածաշրջանի խաղաղ բնակչությանը: Ավետ Ադոնցը դատապարտեց նաև Թուրքիայի որդեգրած հակահայկական և Ադրբեջանին միակողմանի սատարող քաղաքականությունը, ինչն էլ ավելի է ապակայունացնում տարածաշրջանը: Ալեշ Խմելարժն իր հերթին նշեց, որ նման սպառնալիքներն անընդունելի են և շեշտեց, որ նման խնդիրները պետք է լուծվեն բացառապես բանակցությունների միջոցով։ Չեխիայի ԱԳ նախարարի տեղակալն ընդգծեց լարվածության հետագա աճից զերծ մնալու, կառուցողական բանակցային դաշտ վերադառնալու և խնդիրը ԵԱՀԿ Մինսկի խմբի համանախագահության շրջանակներում՝ բացառապես խաղաղ բանակցությունների միջոցով լուծելու կարևորությունը: Այդ համատեքստում նա կարևորեց ՀՀ ԱԳ նախարարի՝ ԵՄ Բարձր ներկայացուցչի հետ ունեցած հեռախոսազրույցը և դրան հետևած հայտարարությունը: Խոսելով Հայաստան-ԵՄ հարաբերությունների մասին՝ զրուցակիցները քննարկեցին ՀԸԳՀ համաձայնագրի վավերացման գործընթացը, ինչպես նաև՝ ՀՀ-ԵՄ օրակարգային այլ հարցեր: Կողմերը նաև անդրադարձան հայ-չեխական երկկողմ հարաբերությունների ներկա մակարդակին և դրանց հեռանկարներին: Զրուցակիցները ներկայացրին համավարակի վերաբերյալ Հայաստանում և Չեխիայում տիրող իրավիճակը, կառավարությունների կողմից ձեռնարկված միջոցները՝ ուղղված համավարակի հաղթահարմանն ու սոցիալ-տնտեսական վիճակի բարելավմանը:

17:09 - 24 հուլիսի, 2020

«Մեզ հետ ոչ ոք սպառնալիքի լեզվով խոսելու իրավունք չունի». Թուրքիայի ԱԳՆ-ն պատասխանել է Ֆրանսիայի նախագահի` Թուրքիային ուղղված քննադատություններին |tert.am|

tert.am: Թուրքիայի արտգործնախարարության մամուլի խոսնակ Համի Աքսոյը պատասխանել է Ֆրանսիայի նախագահ Էմանուել Մակրոնին, որը Թուրքիային քննադատել էր Հունաստանի և Կիպրոսի ծովային սահմանները խախտելու համար՝ ԵՄ-ին կոչ անելով լրացուցիչ պատժամիջոցներ սահմանել: Այս մասին տեղեկացնում է «Անադոլու» գործակալությունը: «Ֆրանսիան կորցնում է իր չեզոքությունն ու կայունությանը նպաստելու հնարավորությունը յուրաքանչյուր հայտարարությամբ և ամեն սխալ քայլով՝ Միջերկրական ծովի արևելյան մասում տեղի ունեցող իրադարձությունների համատեքստում: Նախագահ Մակրոնի հայտարարությունները մեզ համար ոչ մի նշանակություն չունեն: Մեզ հետ ոչ ոք սպառնալիքի լեզվով խոսելու իրավունք չունի»,-ասել է Աքսոյը: Թուրքիայի ԱԳՆ խոսնակը չի մոռացել քննադատել Ֆրանսիային նաև Լիբիական ազգային բանակին աջակցելու համար` նշելով, որ «ՄԱԿ-ի կողմից ճանաչված Լիբիայի կառավարության դեմ ապօրինի ուժերին օգնող պետությունն իրավունք չունի նման լեզվով խոսելու»: «Ֆրանսիան պետք է դադարի նայել ինքն իրեն խոշորացնող հայելու մեջ և պետք է սկսի զգուշավոր քաղաքականություն վարել: Պետք է դադարեցնի Լիբիայում, Սիրիայում ապօրինի ուժերին և բոլոր նրանց, ովքեր կարծում են, որ Միջերկրական ծովի արևելքում իրենք են միակ տերն ու տիրակալը, աջակցելը: Այդ քաղաքականությունը ոչ մի արդյունք տալ չի կարող»,-ասել է Աքսոյը:

16:39 - 24 հուլիսի, 2020