Ինֆոքոմ

Այս որոշումը կայացրել ենք՝ հաշվի առնելով ռազմական իրադրությունը՝ ոչ միայն այսօրվա, այլեւ նրա հնարավոր շարունակությունը․ Նիկոլ Փաշինյան

ՀՀ վարչապետ Նիկոլ Փաշինյանը Ֆեյսբուքի իր էջում ուղիղ եթերի միջոցով անդրադարձել է Ղարաբաղյան պատերազմը դադարեցնելու մասին հայտարարությանը։ «Ես հիմա շատ բաներ չեմ կարող ասել՝ մարդկանց կյանքերը չվտանգելու համար։ Այսօր, նրանք, որոնք ջարդուփշուրներ են անում, նրանք թիկունքից հարվածում են դիրքերում կանգնող մեր տղաներին։ Այսօր մի ընդդիմադիր քաղաքական գործիչ, որն իմ հրաժարականն է պահանջել, երեկ չէ առաջին օրը Շոշի դիրքերը թողել փախել է՝ գեներալի ուսադիրներով, այսօր եկել ասում է՝ մեր բանակի կողքին կանգնած ենք։ Ես համոզված եմ՝ այսօրվա կազմակերպիչների մեջ կան նաեւ այդպիսի մարդիկ, շատ մարդիկ, որոնց մտադրությունները ազնիվ եւ արդար են, գիտեմ, որ կան մեր զոհված եղբայրների հարազատները։ Ես խոնարհվում եմ նրանց առաջ։ Այսօր ինձ ասացին, որ էս դեբոշներ սարքողների մեջ կան, օրինակ, օլիգարխների, այսպես ասած, հանցավոր խմբեր։ Էդ էն մարդիկ են, որոնք քսան տարի գողացել են զինվորից, որոնք քսան տարի գողացել են բանակից, որոնք քսան տարի հարկ չեն վճարել, այսօր եկել են ազգի ու դավաճանության մասին են խոսում։ Էդ մարդիկ ի՞նչ գործ ունեն Երեւանում։ Արցախի նախագահի կոչերը չեն լսե՞լ, օգնելու աղաղակները չե՞ն լսել, ի՞նչ գործ ունեն Երեւանում կամուֆլյաժով։ Հիմա պատեհ առիթ է իրենց համար, դուրս են եկել իրենց թալանածը պաշտպանելո՞ւ։ Գիտե՞ք՝ ինչի են ազատ մտնում ջարդուփշուր անում, որովհետև ինչքան ոստիկան կա, ինչքան ԱԱԾ կա, ինչքան ՊՊԾ կա՝ բոլորը դիրքերում են, իմ որդին էլ է դիրքերում, իմ կինն էլ է դիրքերում, եւ ես հպարտ եմ դրա համար։ Բայց ես հասկանում եմ, որ պիտի բովանդակային եւ մանրամասն բացատրություններ տալ, այսօր էլ եմ պատրաստ, բայց ինչու չեմ տալիս, որովհետեւ ինֆորմացիոն դիսոնանսի հետ կապված խնդիր կա, ռազմական դրության պայմաններում եւ պատերազմի պայմաններում ձեւակերպած ամեն նախադասություն ազդեցություն է ունենում մարտական գործողությունների վրա։ Ֆեյսբուքյան գրառումները, ձեւակերպումները շատ արագ հասնում են առաջին դիրք եւ շատ արագ հասնում են թշնամուն։ Դա է պատճառը, որ ես այսօր չեմ կարող ասել այն ամենը, ինչ պիտի ասեմ։ Բայց ես ուզում եմ՝ մի բան հասկանանք․ այս որոշումը կայացվել է ռազմական իրավիճակի վերլուծության արդյունքում եւ այն մարդկանց գնահատականի եւ նրանց լսելու արդյունքում, որոնք ամենաշատն են տիրապետում ռազմական իրավիճակին։ Մենք պետք է հասկանանք մի բան, որ, ըստ էության, մեր փառապանծ բանակը էսօր կռվել է ահաբեկիչների, ՆԱՏՕ-ի երկրորդ բանակի եւ Ադրբեջանի դեմ։ Եւ ինչու չենք կարողացել այնպես անել, որ այսօրվա թուղթն այլ բովանդակություն ունենա։ Որովհետեւ քսանհինգ տարի խմել ենք մեր զինվորի ու բանակի կենացը, եւ այդ օղին, գինին, սեղանին դրված հացը որոշ մարդիկ գնել են գողացված փողով։ Մենք, սեղանին նստած, իմացել ենք, որ այդ հացը գողացված փողով է գնված, բայց հավեսով կերել ենք, խմել ենք, հոտնկայս խմել ենք զինվորի կենացը։ Զինվորին պահել ենք թերմացքներով, ութսունականների զենքերով, եւ մեր հույսը եղել է, որ բանակցային գործընթացում կռուտիտ կլնինենք։ Լավ, հինգ, վեց, տասը տարի կռուտիտ եղար, ինչքան կարելի է կռուտիտ լինել, դրա վերջն ի վերջո գալիս է, եւ երբ էդ վերջի մասին չես մտածում (եւ մենք բոլորս չենք մտածել էդ վերջի մասին)․․․ ես իմացել եմ դա, որովհետեւ առաջին օրից տեղեկացել եմ բանակցային բովանդակությանը։ Ընդ որում՝ բանակցային բովանդակությանը մի վիճակում, որտեղ կռուտիտների բոլոր ռեսուրսներն այլեւս սպառված են։ Ես ի՞նչ եմ արել․ ոչ թե գնացել եւ այդ բանակցային ժառանգությունը վերցրել եւ ասել եմ՝ ես հիմա կանեմ դրա արդյունքները, այլ փորձել եմ պատրաստվել այս օրվան, ամեն ինչ արել եմ դրա համար, ինչ հնարավոր էր, ինչ հնարավոր էր անել երկուսուկես տարում։ Եվ մեր բանակը 44 օր պատվով կռվում է՝ կրելով անթիվ զրկանքներ։ Ես ծնկի եմ գալիս մեր բոլոր նահատակների, նրանց մայրերի, հայրերի առաջ։ Ես նրանցից ներողություն եմ խնդրում, որ մենք չենք կարողացել իրենց գործը շարունակել պատշաճ մակարդակով։ Մենք այս որոշումը կայացրել ենք՝ հաշվի առնելով ռազմական իրադրությունը՝ ոչ միայն այսօրվա, այլեւ նրա հնարավոր շարունակությունը։ Ես խնդրում եմ բոլոր քաղաքացիներին տուրք չտալ ջարդարարների խմբերին, որովհետեւ այնտեղ են կուսակցական հայտնի շրջանակներ, մարդ կա՝ հարուցված քրգործի շրջանակներում պետությանը 80 մլրդ դրամի պարտավորություն ունի։ Դա ավելին է, քան Հայաստան համահայկական հիմնադրամին ուղարկած փողը։ Այդ գումարը պիտի դառնար զենք, տեխնիկա, գիտություն, ԱԹՍ, եւ այլն։ Այդ մարդիկ էսօր դեբոշ են անում՝ իրենց թալանելու իրավունքը վերագտնելու համար։ Երկուսուկես տարի լցվել են, թե՝ էս ո՞նց եղավ, որ թալանելու հնարավորությունները կորցրինք։ Ես ընդունում եմ, որ մենք այս երկու տարվա ընթացքում չենք արել էն չափի գումարների վերադարձ, որ պիտի անեինք, որովհետեւ փորձել ենք ամեն ինչ անել օրինական մեթոդներով։ Ես ցավում եմ, որ շատ մանրամասն չեմ կարող խոսել էս ամենի մասին, մի պարզ պատճառով, որ իրավիճակը ռազմաճակատում դեռ կայուն չէ։ Շատ կարեւոր է, որ մենք հիմա այնպես անենք, որ վնաս չտանք։ Ես հասկանում եմ էմոցիաները, բայց էս խոսակցությունը մանրամասն անելու ժամանակ դեռ կունենանք, եւ ոչ մի պատասխանատու չի փախչի պատասխանատվությունից, այդ թվում ես, եթե պատասխանատու եմ։ Այսօր մենք մարզպետների ջոկատներ ունենք, որ դիրքերում կանգնած են։ Ընդ որում՝ մի մասը՝ ջերմության մեջ։ Գիտե՞ք ինչու, որովհետեւ այսօր դեբոշ անող որոշ մարդիկ չեն գնացել իրենց դիրքում փոխարինելու»։

04:43 - 10 նոյեմբերի, 2020

ՊԲ ստորաբաժանումները վճռականորեն պաշտպանել եւ պաշտպանում են Շուշին․ ՊԲ ներկայացուցիչ Սուրեն Սարումյան

22:24 - 09 նոյեմբերի, 2020

Մեր հրամանատարներից շատերը, զենքը ձեռքներին, գնում, զորքի կողքին կանգնում ու անձնուրաց կռվում են․ Արծրուն Հովհաննիսյան

Եկեք Շուշի ներթափանցած զորքերի մարտավարության, խմբաքանակի և այլ մանրամասներ չհայտնեմ: Այս մասին այսօր տեղի ունեցած ասուլիսի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը։ «Այսօր ցանցում Ալիևի հայտարարությունից հետո եղել են բավականին տարբեր տրամադրություններ ստեղծող ոչ պաշտոնական հայտարարություններ մեր կողմից: Մեր զորքերը կռվում են անձնուրաց, մեր հրամանատարներից շատերը, նույնիսկ խախտելով մարտավարության կանոնները, տրամաբանությունը, զենքը ձեռքներին, գնում, զորքի կողքին կանգնում ու անձնուրաց կռվում են: Չշտապենք, սպասենք պաշտոնական հաղորդագրություններին, սպասենք Շուշիի ճակատամարտի ավարտին»,- ասաց նա։ Հովհաննիսյանի խոսքով՝ ընդհանուր առմամբ օպերատիվ իրավիճակը իմանալով, ուժերն ու միջոցները, որոնք ներդրված են եղել Շուշին գրավելու համար Ալիևի կողմից։ «Մեր իրավիճակը հասկանալով՝ հուսով եմ, որ կավարտվի Շուշիի համար ճակատամարտը, որը տևում է արդեն երեք-չորս օր»,- եզրափակեց նա։

22:30 - 08 նոյեմբերի, 2020

Ընդհանուր իրավիճակը կարելի է համարել բավականին դրական․ Արծրուն Հովհաննիսյան

Իրավիճակը ռազմաճակատում շարունակում է մնալ լարված: Երեկ ողջ գիշեր և այսօր՝ ամբողջ օրվա ընթացքում, ռազմաճակատի տարբեր ուղղություններում մարտերը շարունակվել են: Մարտերը եղել են բավականին ինտենսիվ: Այս մասին այսօր տեղի ունեցած ասուլիսի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը։ «Հյուսիսում թշնամու զորքերը՝ հիմնականում փոքր մարտավարական խմբեր՝ հրետանու կրակի աջակցությամբ, փորձել են հարձակվել մեր դիրքերի ուղղությամբ, սակայն, կորուստներ կրելով, հետ են շպրտվել: Շուշի քաղաքի մեջ և հարակից տարածքներում՝ պարիսպների տակ, ճանապարհների վրա, որոնք տանում են դեպի Շուշի, մարտերը ողջ օրվա ընթացքում եղել են բավականին սաստիկ, այս պահին էլ որոշակի մարտեր ընթանում են, չնայած ինտենսիվությունը զգալիորեն թուլացած է:»,- նշել է նա։ Հովհաննիսյանի խոսքով՝ սաստիկ է եղել նաև Բերձորի ուղղությամբ. թշնամու ուժերը մի քանի անգամ փորձել են ճեղքել և դուրս գալ դեպի Բերձոր՝ հավանաբար փորձելով այդ ուղղությամբ օգնության հասնել Շուշիում կռվող իրենց ստորաբաժանումներին, բայց, կրելով զգալի կորուստներ, հետ են շպրտվել, ավելին՝ դիմել են փախուստի: «Այս պահին մարտերն ընթանում են, ընդհանուր իրավիճակը կարելի է համարել բավականին դրական: Մեր զորքերին հաջողվում է թշնամու ուժերին թույլ չտալ որևէ ուղղությամբ զարգացնել հաջողություններ, բայց մարտերն ընթացքի մեջ են»,- ընդգծեց ՊՆ ներկայացուցիչը։

22:22 - 08 նոյեմբերի, 2020

Այսօր մարտեր են ընթացել նաև Բերձորի, Մարտունիի, Մատաղիսի հատվածներում․ Արծրուն Հովհաննիսյան

Այսօր՝ Պետրոս Ղազարյանին տված հարցազրույցի ընթացքում, ՀՀ պաշտպանության նախարարության ներկայացուցիչ Արծրուն Հովհաննիսյանը նշեց՝ 1992 թվականին իրավիճակ է եղել, երբ Շուշին մերը չի եղել, ավելին՝ Մարտակերտը մերը չի եղել: «Մենք հասկանում ենք, որ մեզ համար դա սուրբ քաղաք է, հոգեբանական կարևոր նշանակություն ունեցող քաղաք է: Եթե դու ունես վճռականություն՝ կռվելու մինչև վերջ, եթե դու ունես պատրաստակամություն՝ չզիջելու ամեն ինչ, գնալու մինչև վերջ, իմ կարծիքով, առանձին վերցրած՝ որևէ քաղաք ոչ մի բան չի որոշում: Մենք միանշանակ ձգտելու ենք, Շուշին մեզ համար այն բնագիծն է, որը գերսիմվոլիզացված է»,- ասաց նա։ Հովհաննիսյանը հայտնեց, որ Շուշի տանող որոշ ճանապարհներ հակառակորդի ձեռքում են, բայց ոչ ամբողջը․ հակառակորդին չի հաջողվել քաղաք եկող բոլոր ենթակառուցվածքները, լոգիստիկան կտրել: «Երեկ գիշեր արդեն զուտ դիվերսիոն խմբեր չէին (Շուշիում- խմբ.), արդեն ավելին էր` հրետանի, որոշակի զրահատեխնիկա, քանակն էր բավականին մեծ: Դիվերսիոն խմբերը նախորդ օրերին էին: Իրենց ողջ ներկապնակով եկել են»,- նշեց պաշտպանության նախարարության ներկայացուցիչը: Հովհաննիսյանը հայտնեց, որ այսօր մարտեր են ընթացել նաև Բերձորի, Մարտունիի, Մատաղիսի հատվածներում: «Մատաղիսյան ուղղությամբ այսօր էլի որոշակի հարձակումներ եղել են ոչ մեծ ներուժով: Հաջողության չեն հասել (հակառակորդը- խմբ.): Մարտունիում առավոտյան մի դիրք էին վերցրել մեզնից, բայց ահագին ուժեր մարտի մտցնելով` զրահատեխնիկայի կորուստ ունեցան ու նորից հետ շպրտվեցին»,- ասաց նա։ Հովհաննիսյանը նշեց, որ Հարդրութից արևմուտք գտնվող ուղղությամբ եղող դիրքերում ծանր մարտեր են ընթացել օրվա ընթացքում, կուտակումներ են եղել, հիմա էլ կան: «Մեզ հաջողվեց հետ շպրտել մեկ-երկու գրոհ, բայց համառ մարտեր են գնում, կարող են գիշերն էլ գնալ, վաղն էլ շարունակվել: Բայց որևէ դիրք չի հաջողվել հակառակորդին վերցնել: Այսօր շատ ավելի համառ էին գրոհում և՛ Մարտունիի ուղղությամբ (ընդ որում, երկու փորձ կատարեցին` Ճարտարի ուղղությամբ՝ առանձին, Մարտունու ուղղությամբ՝ առանձին), և՛ Հադրութից մի փոքր հարավ-արևմուտք էլի նույն հարձակումն էր անդադար գնում ահագին համառ ուժերով, բայց հաջողության չհասան»,- ասաց նա: Մանրամասները՝ տեսանյութում։

21:48 - 08 նոյեմբերի, 2020

Շուշիի համար ճակատամարտը, ինձ թվում է, վաղը կավարտվի․ Արծրուն Հովհաննիսյան

Ռազմական գործողություններն այս պահին ընթանում են Շուշիի ներսում և Շուշիի շրջակայքում։ Այս մասին այսօր՝ Պետրոս Ղազարյանին տված հարցազրույցում, հայտնեց ՀՀ պաշտպանության նախարարության ներկայացուցիչ Արծրուն Հովհաննիսյանը։ «Մեր զորքերը հերոսական պայքար են մղում` Շուշին պաշտպանելու և որոշ դիրքերում, որտեղ արդեն հայտնվել են ադրբեջանական կամ վարձկան ուժերը, դրանց չեզոքացնելու և լիարժեք վերահսկողությունը մեր ձեռքը վերադարձնելու ուղղությամբ»,- նշեց նա։ Հովհաննիսյանի խոսքով՝ ամբողջ ցերեկ` վաղ առավոտից, համառ մարտեր են եղել: Հակառակորդը երեկ՝ ցերեկը, գիշերը, սկսել է մեծ խմբերով ներթափանցել Շուշի, և մեր զորքերը, կատարելով վերախմբավորում, հակառակ գործողություններ են իրականացրել: «Չկա այնտեղ կողմ, որն ունի լիարժեք վերահսկողություն և լիարժեք նախաձեռնողականություն քաղաքի և շրջակայքի տարածքների վերահսկողության նկատմամբ»,- հայտնեց նա։ Հովհաննիսյանը կարծում է՝ հակառակորդը չէր պատկերացնում, որ մենք այսպես համառ կդիմադրենք Շուշիի համար։ Նա հորդորեց Շուշիի վերաբերյալ վաղաժամ գնահատականներ չտալ՝ ո՛չ լավատեսական, ո՛չ, առավել ևս, վատատեսական, և կոչ արեց վստահել մեր զորքին: «Մեր զորքը համառ պայքար է մղել ամբողջ օրը, շատ գրագետ պայքար է մղել բոլոր զորատեսակներով: Սպասենք որոշ ժամանակ: Կարելի է ասել, ոը Շուշիի համար առանձին ճակատամարտը, որը երեք-չորս օր անդադար ընթանում է տարբեր փուլերով, հաջողությունների ու անհաջողությունների տատանումներով, վաղը, իմ կարծիքով, վերջանական պարզ կլինի: Վաղը, ինձ թվում է, կավարտվի ճակատամարտը Շուշիի համար»,- ասաց նա։ Ինչ վերաբերում է Ադրբեջանի նախագահ Իլհամ Ալիևի հայտարարություններին, թե իրենք վերցրել են Շուշին, և թուրքական կողմի շնորհավորանքին, Հոնհաննիսյանը նշեց, որ Ալիևն այս ամբողջ ընթացքում հայտարարում էր, որ իրենք շատ բնակավայրեր են վերցրել, բայց իրականում այդպես չէր։ «Առնվազն շատ դեպքերում ավելի շուտ էր հայտարարում, քան դա լինում էր։ Եվ որոշ բաներ էլ հայտարարում է, բայց մինչև հիմա այդպես չէ: Չէի ուզենա` մեր հասարակությունը հենվեր Ալիևի հայտարարությունների վրա»,- ասաց նա։ Մանրամասները՝ տեսանյութում

20:35 - 08 նոյեմբերի, 2020

Բաթումի վերաբերյալ Էրդողանի հայտարարությունը նոր չէ․ այն չորս տարվա վաղեմություն ունի

Սոցցանցերի հայաստանյան տիրույթում այսօրվա ընթացքում ակտիվորեն տարածվում է մի լուր, ըստ որի՝ Թուրքիայի նախագահ Էրդողանն այսօր հայտարարել է, որ Վրաստանի Բաթումը, Սիրիայի, Հունաստանի եւ Բուլղարիայի մի շարք քաղաքներ պետք է մտնեն Թուրքիայի սահմանների մեջ: Այս տեղեկությունն իր էջում հրապարակել էր նաեւ առողջապահության նախարարի խորհրդական Աշոտ Սարգսյանը, սակայն ավելի ուշ հեռացրեց գրառումը՝ չնայած հայալեզու որոշ լրատվամիջոցներ, հիմք ընդունելով Սարգսյանի գրառումը, լուրն արդեն տարածել էին։ Էրդողանն իրականում այսպիսի հայտարարություն արել է շուրջ չորս տարի առաջ՝ 2016 թվականի հոկտեմբերի 15-ին՝ Թուրքիայի Ռիզե քաղաքի համալսարանում ունեցած ելույթի ժամանակ (տեսանյութում ելույթի այդ հատվածը՝ սկսած 30-րդ րոպեից): Թուրքիայի նախագահը, մասնավորապես, պատասխանելով հարցին, թե ինչու են իրեն հետաքրքրում Կիպրոսը, Սիրիան, Վրաստանը եւ մնացած երկրները, ասել է, որ իրեն հետաքրքրում են աշխարհի այն անկյունները, որտեղ կան իրենց մշակույթի մասնիկները: «Ինձ հետաքրքրում են Թուրքիան, Ղարաբաղը, Կիպրոսը, Իրաքը, Ղրիմը, Բոսնիան, ինչպես նաեւ մյուս եղբայր երկրները: Մենք ունենք այս երկրներով հետաքրքվելու բոլոր իրավունքները, եւ որ օրը չհետաքրքվենք դրանցով, կկորցնենք մեր ապագան։ Մենք նախ պետք է հավատանք մեզ, մեր ուժերին, մեր պատմությանը»,- նշել է Էրդողանը: Թուրքիայի նախագահը ելույթում նաեւ ուղիղ չի շեշտել, թե դրանք պետք է մտնեն Թուրքիայի սահմանների մեջ: Նա միայն ասել է, որ հետաքրքրված է այդ տարածքներով: Այսպիսով, հայաստանյան մեդիատիրույթում շրջանառվող լուրն առնվազն չորս տարվա վաղեմություն ունի․ Էրդողանն այսօր Բաթումի՝ Թուրքիայի սահմանների մեջ մտնելու մասին որեւէ հայտարարություն չի արել։ Աննա Պալաքյան

19:08 - 07 նոյեմբերի, 2020

Այսօր հայոց հրետանին Շուշիի մարտերում պարտության մատնեց հակառակորդի հրետանուն․ Արծրուն Հովհաննիսյան

Արդեն շուրջ երկու օր չեն դադարում մարտերը Շուշիի շրջակայքում: Այսօր և երեկ` անցնող գիշերը, բավականին ծանր ու ինտենսիվ մարտեր էին Շուշիի շրջակա բնակավայրերում, Շուշի տանող ճանապարհների վրա, ինչպես նաև Շուշիի մերձակայքում: Այս մասին այսօրվա ճեպազրույցի ընթացքում հայտնեց ՀՀ պաշտպանության նախարարության ներկայացուցիչ Արծրուն Հովհաննիսյանը։ «Եթե 1992 թվականի մայիսի 8-ը հայոց պատմության մեջ նշվել է որպես Շուշիի ազատագրման օր, հայոց պատմության մեջ հավանաբար այս անցնող օրերը կմտնեն որպես Շուշիի պաշտպանության փայլուն օր: Հակառակորդի հետախուզադիվերսիոն առանձին վաշտային մարտավարական խմբերի, վարձկանների, հրոսակախմբերի ոչնչացման «Գյոռբագյոռ» ռազմագործողությունը հաջողությամբ շարունակվում է»,- ասաց նա: Հովհաննիսյանի խոսքով՝ այսօր մեր հրետանին, հետևակը, այլ ստորաբաժանումներն ուղղակի հրաշքներ են գործել: «Թշնամու զորքերից, վարձկաններից և մնացած թափթփուկներից Շուշի տանող ճանապարհների ձորակներում տասնյակ, եթե ոչ հարյուրավոր դիակներ են մնացել: Առաջիկայում համապատասխան տսանյութերը, ֆոտոնյութերը կլինեն»,- նշեց նա։ Հովհաննիսյանը հայտնեց, որ Շուշի եկող ճանապարհների նոր զորախմբերին ջախջախել են նաև հերոսական քարինտակցիները: Առանձին ճանապարհներով դեպի Շուշի իրենց մնացորդ զորաջոկատներին օգնության եկող ադրբեջանական ստորաբաժանումներին ջախջախել են մյուս գյուղի բնակիչները: «Այսօր Շուշիի հերոսական պաշտպանության օրերից էր: Շուշին մերն է, Շուշին չի ընկնելու, և ինչքան էլ որ դրա մասին բաղձա Ալիևը, լցվե՛ք վստահությամբ, հայոց բանակը մինչև վերջ կռվելու է, ու Շուշին չի ընկնելու»,- նշեց նա: Հովհաննիսկանն ասաց, որ տեղում կռվող զինվորականներից շատերը, որոնց հետ ինքը խոսել է, շատ հստակ բառապաշարով ասել են, որ ամբողջ պատերազմի ընթացքում մեր հրետանին այսպես փայլուն և հզոր չէր աշխատել: «Չեմ կարող ասել, որ Շուշիի պաշտպանական օպերացիան ավարտված է․ մարտերը շարունակվում են։ Չեմ կարող ասել, որ ամեն ինչ փայլուն է, և այլ ծանր օրեր չեն սպասվում, բայց մենք պատվով դուրս ենք եկել այս իրավիճակից, և իրավիճակը փոխված է: Վաղը դժվար թե նույն իրավիճակը լինի»,- նշեց նա։ Հովհաննիսյանի խոսքով՝ վերջին երկու-երեք օրը դեպի Շուշի հակառակորդի ձգտումներն այնքան էլ զուտ դիվերսիոն խմբերի գործողություններ չէին: «Տեսաք այսօրվա տեսանյութից, որ հիմնականում մարտավարական, վաշտային խմբեր են, դրանցում կան նաև դիվերսիոն խմբեր: Էլիտար ստորաբաժանումներ են, որոնց տրված է համապատասխան ուժեղացում` որպես կանոն թեթև ու արագաշարժ զրահատեխնիկա, լավ սպառազինված են և այնպիսի պատրաստություն են անցել, որ կարող են ցերեկ թե գիշեր նույն ուժգնությամբ մարտ վարել, իրենց աջակցում է հիմնականում հրետանին, բայց այսօր վստահաբար կարող եմ ասել, որ եթե նույնիսկ առանձին խմբերի պայքարը Շուշիի ուղղությամբ դեռ շարունակվում է կամ կարող է լինել, ապա այսօր հայոց հրետանին Շուշիի մարտերում պարտության մատնեց իրենց հրետանուն»,- ասաց նա: Պաշտպանության նախարարության ներկայացուցիրը նշեց, որ այս պահին էլ մարտերն ընթանում են, բայց ուժգնությունը զգալիորեն թուլացել է: Այլ ճակատներոււմ հիմնականում համեմատաբար ավելի թույլ գործողություններ են կատարվել: «Ե՛վ Հադրութում, և՛ հարակից գյուղերում մարտերը շարունակվում են, թշնակամական ուժերը փորձել են բոլոր հնարավոր ճանապարհներով (նախընտրելին իրենց համար եղել են հիմնականում մայրուղիները, ասֆալտապատ ճանապարհները) ձգտել դեպի Շուշի, բայց բոլոր ուղղություններում ջախջախվել են: Մենք այսօր ցուցադրել ենք կադրեր, հավատացե՛ք՝ այսօրվա կադրերից ավելի սարսափելի կադրեր կան իրենց հասարակության համար»,- ասաց նա։ Անդրադառնալով ՌԴ Արտաքին հետախուզության ծառայության ղեկավար Սերգեյ Նարիշկինի հայտարարությանը, թե թուրքական հետախուզությունը մասնակցում է ԼՂ իրադարձություններին՝ Հովհաննիսյանն ասաց․ «Մենք մի քանի անգամ նշել ենք, որ Ադրբեջանի օգտին է աշխատում ոչ թե Թուրքիայի ԶՈՒ-ի կամ անվտանգության համակարգի այս կամ այն առանձին սեգմենտը, այլ ամբողջ Թուրքիան՝ իր հետախուզությամբ, տեխնիկական աջակցությամբ, ղեկավարմամբ: Մենք փաստացի ֆիքսել ենք, որ Ադրբեջանի ԶՈՒ ղեկավարություն հասկացություն չկա. կա Թուրքիայի գլխավոր շտաբի կողմից Ադրբեջանի և դրան գումարած այլ ստորաբաժանումների զորատեսակների, խմբերի, վարձկանների և այլոց ղեկավարում»: Վերջում Հովհաննիսյանը շեշտեց, որ պատերազմը շարունակվում է, պատերազմը առանձին վերցրած` Քարինտակի մարտը չէ, Շուշիի ճակատամարտը չէ, և կոչ արեց վստահել մեր բանակին:

23:01 - 06 նոյեմբերի, 2020

Վարձկանները, դիվերսիոն տարբեր խմբերը չեն հաջողելու․ «գյոռբագյոռ» օպերացիան շարունակվելու է․ Արծրուն Հովհաննիսյան

Երեկ` ողջ գիշեր, մարտերը շարունակվել են, ոչ մի րոպե չեն լռել, չնայած ակտիվությունը որոշակի նվազել է: Այս մասին այսօրվա ճեպազրույցի ընթացքում հայտնեց ՀՀ պաշտպանության նախարարության ներկայացուցիչ Արծրուն Հովհաննիսյանը։ «Մարտերի շարունակումը կախված է նրանից, որ դիվերսիոն խմբերը, որոնք գտնվում են Շուշի քաղաքի մերձակա անտառներում, համայնքներում, ճանապարհներին, ձորակներում և այլուր, փորձում են ամեն կերպ լուծել որոշակի խնդիրներ»,- նշեց նա: Հովհաննիսյանն ասաց, որ առավոտյան մարտերը շարունակվել են ավելի թեժ՝ հրետանու կիրառությամբ: Օրվա ընթացքում նաև Ադրբեջանի ԶՈՒ-ն հյուսիսում, կենտրոնական ուղղությունում, Կարմիր շուկայի հատվածում, հարավային ուղղությամբ, տարբեր տեղերում փոքր գրոհող խմբերով, նվազագույն քանակի զրահատեխնիկայով, հրետանու կրակի աջակցությամբ փորձել են նորից առաջ գալ, սակայն հետ են շպրտվել՝ կրելով կորուստներ: «Ինչ վերաբերում է Շուշի քաղաքի մերձակա համայնքների, անտառների դիվերսիոն խմբերին, ապա վերջիններս, հիմնականում հանդիպելով մեր ԶՈՒ տարբեր ստորաբաժանումների դիմադրությանը, հանգուցային կետերի պահակակետերին, պահպանության ստորաբաժանումներին, երկարատև մարտի չեն բռնվում: Օրվա ընթացքում հաջողվել է մի քանիսին օղակել և ոչնչացնել, շպրտել տվյալ բնագծերից»,- ասաց նա։ Հովհաննիսյանի խոսքով՝ այսօր գիշեր էլ մարտեր կլինեն, ինչպես նախորդ գիշեր: Նա նշեց, որ նախորդ գիշեր եղել է Արցախում, որտեղ դիվերսիոն խմբերի չեզոքացման ստորաբաժանումներն իրենց գործը շարունակում էին: «Վարձկանները, դիվերսիոն տարբեր խմբերը` լինեն Ադրբեջանի ԶՈՒ ստորաբաժանումների մշտական կազմից, թե այլ տեղերից, իրենց փոքր խմբերով չեն հաջողելու, որովհետև Շուշիի և հարակից բնակավայրերի բնակիչները, զենքը ձեռքներին, պաշտպանում են իրենց բնակավայրերը: Այո՛, որոշ տեղերում մարտերը շարունակվում են և շարունակվելու են, բայց իրավիճակն օրհասական չէ: Կան տեխնիկական, լոգիստիկ դժվարություններ, բայց «գյոռբագյոռ» օպերացիան շարունակվելու է»,- ասաց նա։ Հովհաննիսյանը հայտնեց, որ ինքը քիչ առաջ մարտական խմբերից մեկից ստացել է տեղեկություն, ըստ որի՝ հակառակորդի մոտավորապես 30 հոգանոց մի խմբավորում շրջափակման մեջ է ընկել, չեզոքացվել է, ոմանք հասցրել են փախչել: Անդրադառնալով «Լրագրողներ առանց սահմանների» կազմակերպության հայտարարությանը, թե 80 լրագրողներ Ստեփանակերտում հայտնվել են թակարդում և առանց իրենց կյանքը վտանգելու՝ չեն կարող Հայաստան հասնել ՝ Ադրբեջանի ԶՈՒ-ի արձակված կրակի պատճառով՝ Հովհաննիսյանն ասաց․ «Առաջին անգամ չէ, որ խոսում ենք այն մասին, որ Ադրբեջանը թիրախավորում է խաղաղ բնակիչներին, լրագրողներին, ծննդատները, եկեղեցինեը: Ինչ վերաբերում է լրագրողների հետ աշխատանքին, ես երեկ անձամբ շփվեցի նրանցից շատերի հետ: ՊԲ-ն, Արցախի իշխանություններն աշխատանքի բոլոր պայմանները ստեղծել են, և եթե նրանք ուզում են աշխատել, շարունակում են աշխատել, որևէ խոչընդոտող բան չկա։ Այլ հարց է, որ կարող են թիրախավորվել: Իսկ ովքեր ուզում են դուրս գալ Արցախից, ապա համապատասխան ճանապարհներ կան, որևէ վտանգ` կոնկրետ ճանապարհները փակելու մասով, չկա»: Հովհաննիսյանը տեղեկացրեց, որ Բերձորի ուղղության ճանապարհը քաղաքացիների համար դեռ փակ է, չնայած ճանապարհը Լիսագորի հատվածում այսօր մեր ստորաբաժանումների կողմից մաքրվել է, և համապատասխան պարեկություն է կատարվում։ Պաշտպանության նախարարության ներկայացուցչի խոսքով՝ հակառակորդը այսօր Կարմիր շուկայի ուղղությամբ փորձել է մատակարարումներ բերել մեքենաներով և ճեղքում իրականացնել, սակայն խոցվել է հակառակորդի մի քանի մեքենա, այդ թվում` անձնակազմով բեռնված, և հակառակորդն այդ ուղղությունից ևս հետ է շպրտվել:

23:13 - 05 նոյեմբերի, 2020

Շուշիի ուղղությամբ հակառակորդի վիճակը այնքան էլ լավ չէ, իրավիճակն իրենց համար կարող էր փոխվել, եթե Մարտունու ուղղությամբ ճեղքում իրականացնեին, չստացվեց․ Արծրուն Հովհաննիսյան

Այսօր՝ Պետրոս Ղազարյանին տված հարցազրույցում, ՀՀ պաշտպանության նախարարության ներկայացուցիչ Արծրուն Հովհաննիսյանը, որը վերադարձել էր Արցախի Հանրապետությունից, նշեց, որ առավոտյան էլ, այս պահին էլ իրավիճակը նույնն է: «Թշնամին նախ հյուսիսային և կենտրոնական ուղղությամբ և հարավում փորձել է տարբեր հարձակումներ իրականացնել ոչ մեծ խմբերով․ մոտավորապես վաշտային մարտավարական խմբեր մի քանի միավոր զրահատեխնիկայով Կարմիր շուկայի ուղղությամբ են նորից փորձել ակտիվանալ, կորցնելով մի քանի միավոր տեխնիկա` հետ են շպրտվել»,- հայտնեց նա։ Հովհաննիսյանի խոսքով՝ Ադրբեջանի նախագահ Իլհամ Ալիևը ներկայացնում է, որ հարձակվում են Շուշիի վրա, սակայն ինքը զարմացած է, քանի որ պատերազմի այդպիսի ձև չկա, երբ հարձակվողին փնտրես, գտնես, ոչնչացնես: «Ի՞նչ է նշանակում հարձակում, եթե մենք իրենց փնտրում ենք, գտնում ենք, խումբ է՝ 15-20 հոգանոց, խփում ենք, փախչում են այլ ուղղությամբ: Խիտ անտառ է՝ շատ վատ ճանապարհային ցանցով, որտեղ մեծ զրահատեխնիկա օգտագործել չես կարող, մաքսիմում՝ փոքր զրահամեքենաներ: Նորից շրջանցում են մի այլ տեղից, փորձում են գտնել դիմադրության թույլ կետեր, գյուղեր մտնել, վնասել, դրոշներ դնել, նկարվել: Հետո մոտենում են մեր տղաները, խփում են, նորից փախչում են (հակառակորդը- խմբ․)՝ տալով մեկ-երկու զոհ, վիրավոր»,- ասաց նա։ Հովհաննիսյանը նշեց, որ Շուշիի ուղղությամբ հակառակորդի պայմանական հարձակվողների վիճակը այնքան էլ լավ չէ, քանի որ խմբավորման այդ ծավալով, հարձակման այդ ձևով չեն գրավում քաղաք։ «Այսօր ամբողջ օրը փորձել են մագլցել ժայռերը, որ մտնեն Շուշի. Մագլցողները փոքր խմբեր են՝ 5-10, մաքսիմում՝ 20 հոգանոց: Խփում ես, մոտենում ես, տեսնում` բոլորի մոտ դրոշ կա: Պարզ է, չէ՞, որ խայտառակ վիճակի են, սիմվոլիկ մի բան են ուզում անել․ նկարեն, որ Շուշի մեկը մտավ, դրոշ դրեց: Չեն կարողանում: Այս իրավիճակն իրենց համար կարող էր միանգամից փոխվել մի դեպքում, եթե կարողանային Մարտունու ուղղությամբ ճեղքում իրականացնել: Երեք-չորս օր փորձեցին, չստացվեց: Իրենց խմբավորումը կփրկվեր առանձին կոտորվելու ճակատագրից: Չստացվեց»,- ասաց նա։ Հովհաննիսյանը նաև հայտնեց, որ Լիսագորի ուղղությամբ՝ դեպի Շուշի, դիվերսիոն խմբեր կան։ «Երեկ մեր ԱԹՍ-ից նկարած հայտնի տեսանյութը հենց էդ ուղղությամբ էր: Այսօր՝ ամբողջ օրը, ականանետերով, հրետանիով, մաքրող խմբերով գտել ենք, խփել ենք, նորից փախել են»,- նշեց նա։ Մանրամասները՝ տեսանյութում։

21:47 - 05 նոյեմբերի, 2020

Սոլովյովն ապատեղեկատվություն է տարածում․ Փաշինյանը The Jerusalem Post-ին տված իր հարցազրույցի համար ներողություն չի խնդրել

Ռուսական «Вечер с Владимиром Соловьевым» հաղորդման մեկնաբան Վլադիմիր Սոլովյովը թվիթերի իր միկրոբլոգում երկու օր առաջ գրել է, թե ՀՀ վարչապետ Նիկոլ Փաշինյանը ներողություն է խնդրել Իսրայելից՝ The Jerusalem Post պարբերականին տված հարցազրույցում հնչեցրած հայտարարության համար։ «Փաշինյանը ներողություն է խնդրել Իսրայելից՝ Վիեաննայում տեղի ունեցած ահաբեկչական հարձկումից հետո՝ The Jerusalem Post-ին տված իր հարցազրույցի համար»,- գրել է Սոլովյովը։ Այնինչ, այս գրառումն իրականության հետ աղերս չունի։ Փաշինյանը, մասնավորապես, խոսելով Իսրայելի առաջարկած մարդասիրական օգնության մասին, The Jerusalem Post-ի թղթակցի հետ զրույցում ասել էր․ «Իսրայելը հայտնվել է միեւնույն շարքում Թուրքիայի, ահաբեկիչների եւ սիրիացի վարձկանների հետ` ընթացիկ պատերազմում Ադրբեջանին սատարելու հարցում, եւ, ի վերջո, տուժելու է այդ դաշինքին միանալու հետեւանքով։ Հումանիտար աջակցություն մի երկրի կողմից, որը վարձկաններին զենք է վաճառում, որով վարձկանները հարվածի տակ են պահում խաղաղ քաղաքացիական բնակչությունը: Ես առաջարկում եմ, որ Իսրայելն այդ օգնությունն ուղարկի վարձկաններին եւ ահաբեկիչներին՝ որպես իր գործունեության տրամաբանական շարունակություն»: Հարցազրույցի նույն օրը՝ նոյեմբերի 3-ին, հայտնի դարձավ, որ Վիեննայի կենտրոնական սինագոգին (հրեական աղոթատուն) հարող տարածքում տեղի է ունեցել ահաբեկչություն․ մի քանի գրոհայիններ միաժամանակ իրականացրել են առնվազն վեց հարձակումներ: Այս դեպքից հետո Փաշինյանը ֆեյսբուքյան եւ թվիթերյան իր էջերում գրեց՝ ցավում է, որ հարցազրույցի հրապարակումից ընդամենը ժամեր անց Իսրայելը թեկուզ անուղղակի թիրախ դարձավ՝ Վիեննայի սինագոգի տեսքով։ Փաստորեն, Սոլովյովը սխալ է ներկայացնում Փաշինյանի խոսքերը։ Ռուս մեկնաբանի թվիթերյան գրառման մեկնաբանություններում օգտատերերը մատնանշել են, որ ՀՀ վարչապետը ոչ թե ներողություն է խնդրել, այլ ցավով արձանագրել է տեղի ունեցածը։ Այն, որ Սալավյովը ոչ թե վրիպել է, այլ դիտմամբ է սխալ ներկայացրել եղելությունը, փաստում է հանգամանքը, որ նույնիսկ այդ մեկնաբանություններից հետո նա ոչ ուղղել, եւ ոչ էլ հեռացրել է իր գրառումը։ Բացի այս, նույնիսկ Google-ի ավտոմատ համակարգի միջոցով Փաշինյանի անգլերեն գրառումը ռուսերեն թարգմանելիս «ցավալի» բառը «ներողություն» չի դառնում։ Նշենք, որ Փաշինյանն այս երկու օրերի ընթացքում որեւէ այլ հարթակում եւս ներողություն չի խնդրել իր հարցազրույցում հնչեցրած հայտարարությունների համար։ Հայարփի Բաղդասարյան

15:17 - 05 նոյեմբերի, 2020

Ամուր թիկունք. որտե՞ղ են անհրաժեշտ կամավորներ

15:15 - 05 նոյեմբերի, 2020

Երեխաներ ունեցող կանանց՝ հայրենիքի պաշտպանությանը կամավորագրվելու սահմանափակումը միայն տարիքային է

Նոյեմբերի 2-ին Hraparak.am-ը հրապարակել էր «4 երեխա ունեցող Աննա Հակոբյանը մեկնելու է առաջնագիծ, 3 երեխա ունեցողներին՝ մերժում են» վերտառությամբ հոդված, որում խոսվում է մի քանի երեխա ունեցող կանանց ռազմաճակատ մեկնելու արգելքի՝ հստակ նորմով ամրագրված լինելու մասին։ Հոդվածագիրը թեմայի շուրջ զրուցել է «Զինվորի մայր» հասարակական կազմակերպության նախագահ Մարգարիտա Խաչատրյանի հետ, որը, ըստ «Հրապարակի», տեղյակ էր օրենքից։ Խաչատրյանի խոսքերով՝ «երկու երեխա ունեցող կանանց էլ թույլ չեն տալիս մեկնել, եթե իրենք զինապարտության օրենքով զինգրքույկ չունեն, եթե զինապարտության չեն անցել՝ իրենք զինակոչի ենթակա չեն։ Եթե հաշվառված չեն պահեստազորում, գնալու են՝ ճանապարհից հետ գան»։ Մարգարիտա Խաչատրյանն, ըստ ամենայնի, նկատի է ունեցել «Զինապարտության մասին» ՀՀ օրենքը, որի համաձայն՝ զինապարտներ են համարվում նախազորակոչային, զորակոչային տարիքի եւ պահեստազորում հաշվառված արական, ինչպես նաեւ զինվորական մասնագիտություն ունեցող կամ զինվորական ծառայություն անցած իգական սեռի քաղաքացիները: Սակայն այստեղ խոսքը ոչ թե կամավորագրման, այլ պահեստազորում հաշվառվելու մասին է։ Որեւէ օրենքով եւ նորմով ամրագրված չէ բազմազավակ կանանց սահման մեկնելու արգելքը Առհասարակ, Հայաստանի պաշտպանությանն առնչվող հարցերը կարգավորվում են «Պաշտպանության մասին» ՀՀ օրենքով, ըստ որի՝ աշխարհազորը քաղաքացիների կամավորության եւ տարածքային սկզբունքով Զինված ուժերի Գլխավոր շտաբի ենթակայությամբ գործող ստորաբաժանումների համալիր է, որում ընդգրկված քաղաքացիները մասնակցում են Հայաստանի Հանրապետության զինված պաշտպանությանը։ Պարզ ասած՝ աշխարհազորի կազմում ընդգրկվում են կամավորները, որոնք հաշվառված չեն պահեստազորում եւ պատերազմական ժամանակի հաստիքների կցագրված չեն։ Սեպտեմբերի 27-ին ընդունվեց եւ հրապարակվեց Հայաստանի Հանրապետությունում ռազմական դրություն հայտարարելու մասին կառավարության որոշումը եւ սահմանվեց 18-55 տարեկան ՀՀ քաղաքացիների զորահավաք։ Ե՛ւ Պաշտպանության մասին օրենքի, ե՛ւ ռազմական դրություն սահմանելու մասին որոշման մեջ բազմազավակ կանանց կամավորագրվելու եւ ռազմաճակատ մեկնելու վերաբերյալ որեւէ սահմանափակում չկա։ Այսինքն՝ բազմազավակ կանանց չկամավորագրելու կամ նրանց կամավորագրման համար արգելք հանդիսանալու իրավական հիմք չկա՝ բացի վերոնշյալ տարիքային սահմանափակումը։ Այս օրերին կանանց կամավորագրմամբ զբաղվել է նաեւ ոստիկանության փոխգնդապետ Մարինե Այրումյանը։ Մեր զրույցում Այրումյանը նույնպես նշեց, որ կամավորը իր կամքի ուզածը կարող է անել, եւ որ բազմազավակ կանանց համար իրավական տեսանկյունից սահմանափակում չկա․ գործում է միայն տարիքային սահմանափակում՝ ՀՀ օրենսդրության համաձայն։ Այսպիսով՝ գործող օրենսդրական կարգավորումներով չի կարող սահմանափակվել երեխաներ ունեցող կանանց՝ հայրենիքի պաշտպանությանը կամավորագրվելու գործընթացը։ Իսկ ինչ վերաբերվում է որոշ կանանց կամավորագրվելու հայտերը մերժելուն, ապա սա այն պատճառով է, որ դիմողների պակաս չկա։ Սա մեր զրույցում հաստատեց նաեւ ոստիկանության գնդապետը՝ նշելով, որ արդեն ավարտվել է կանանց կամավորագրումը՝ բավարար թվով կամավորների արագ արձագանքման շնորհիվ։ Ի հավելումն նշենք, որ, համաձայն «Պաշտպանության մասին» ՀՀ օրենքի, աշխարհազորայինի հավաքագրման հիմքը նրա հետ կնքված պայմանագիրն է: Պայմանագիր չի կարող կնքվել այն քաղաքացու հետ, որը ենթակա է պարտադիր զինծառայության, հանդիսանում է զինծառայող, ոստիկանության ծառայող, փրկարար ծառայող, քրեակատարողական ծառայող, հարկադիր ծառայող, եւ այն անձը, որը պատիժ է կրում կամ որի նկատմամբ իրականացվում է քրեական հետապնդում: Նարեկ Մարտիրոսյան

18:24 - 04 նոյեմբերի, 2020

Զինվորը պետք է իմանա, որ թիկունքն ուժեղ է․ նկարիչ Ալիկ Ասատրյանը վաճառում է կտավները, գումարը՝ ուղիղ Համահայկական հիմնադրամին

Արցախա-ադրբեջանական պատերազմի ընթացքում յուրաքանչյուրը՝ թե՛ առաջնագծում, թե՛ թիկունքում, փորձ է անում իր կարողությունների սահմանում ներդրում ունենալ մեր հաղթանակի ճանապարհին։ Սրանից անմասն չեն մնում նաեւ արվեստագետները, ոմանք՝ մեկնելով ճակատ, ոմանք՝ ցուցաբերելով անհրաժեշտ ֆինանսական օգնություն։ 60-ամյա նկարիչ Ալիկ Ասատրյանը, որն արցախյան առաջին պատերազմի տարիներին «Մեծն Մուրադ» ջոկատի հետ Շուշիում էր՝ կրակոցների ու զենքերի շաչյունների տակ ֆիլմ նկարելու, այսօր Հոլանդիայում է, որտեղից վաճառում է իր կտավները՝ գումարը՝ ուղիղ «Հայաստան» համահայկական հիմնադրամին․ Ասատրյանի աշխատանքների վաճառքից արդեն մոտ 18․000 եվրո է փոխանցվել։ - Ինչպե՞ս եք,- իրականում ոգեկոչող պատասխան լսելու ակնկալիքով՝ հարցնում եմ նկարչին ու ստանում վստահ պատասխանը։ - Դե, հիմա պարտավոր ենք լավ լինել, որ հաղթենք,- ասում է Ալիկը՝ գնված հերթական նկարի փաթեթի վրա նշումներ անելով։ Ծագումով մեղրեցի Ալիկ Ասատրյանը պատերազմի առաջին օրերից է որոշել վաճառել կտավները։ Մեր զրույցի ընթացքում էլ չէր կտրվում գործից՝ եռանդով փաթեթավորելով կտավները՝ փոստային բաժանմունք ուղարկելու համար։ «Արդեն 3-րդ շաբաթն է՝ նկարներ եմ փաթեթավորում, ուղարկում աշխարհի տարբեր մասեր։ Ես զինվորական փորձ չունեմ ու կարծում եմ՝ այսպես ավելի շատ եմ օգուտ տալիս, քան եթե առաջնագծում լինեի։ Բայց եթե բանը հասնի նրան, որ իմ կարիքն էլ լինի, ես էլ պետք է գնամ»։ «Մանկությունը մնաց հողի տակ» անունով նկարը՝ «Այստեղ մեր գյուղն էր, որը էլ չկա։ Եթե Հայաստանի գյուղերը կորցնենք, Երեւանը կորած է» գրությամբ։ Ասում է՝ այս հիմա շատ աշխատանք կա անելու, դեռ մի քանի նկար էլ պիտի փաթեթավորի։ «Բացի իմ տան եղած նկարներից՝ պետք է 1 նկար Իտալիայից գնա Ամերիկա, 2 նկար՝ Ֆրանսիայից՝ Պորտուգալիա եւ Գերմանիա։ Աղջիկս էլ է նկարիչ․ ինքն էլ 100 եվրոյով մի նկար վաճառեց ու փոխանցեց հիմնադրամին, կինս էլ 300 եվրո փոխանցեց»։ «Պատերազմ-հաղթանակ, սեր եւ խաղաղություն» Կտավների հիմնական գնորդները հայերն են, որովհետեւ, ըստ նկարչի, մեր պատերազմն, ըստ էության, միայն մեզ է հետաքրքրում։ 1993-ից Հոլանդիայում բնակվելուց ի վեր ընդամենը 3 անգամ Հայաստանում եղած Ալիկը հայրենիքում ներդրում ունի․ 1980 թվականին հարազատ քաղաքում՝ Մեղրիում, լուծել է նկարչական դպրոց չլինելու հարցը․ «Բացեցի դպրոցը, աշխատեցի այնտեղ 7 տարի, մեծ դպրոց դարձավ, հիմա իմ աշակերտներն էլ են նկարում․ վերջին անգամ երեքուկես տարի առաջ եմ այցելել»,- ասաց մեր զրուցակիցը՝ հուզած ձայնով ավելացնելով, որ վերջերս իր աշակերտուհիներից մեկի որդին զոհվել է Արցախում։ «Հավերժ փա՛ռք մեր անմահացած հերոսներին» Իր ֆեյսբուքյան էջում մեծ ակտիվության շնորհիվ Ալիկ Ասատրյանն օգնում է նաեւ իր հայ ընկերներին՝ վաճառելու նաեւ իրենց նկարները։ Սակայն կան կտավներ, որոնք չի վաճառի։ Դեռ 3 տարի առաջ ֆեյսբուքյան հարթակում ստեղծել է «Վերնատուն 22» խումբը՝ արվեստի շուրջ համախմբելով մարդկանց եւ ձեռնարկելով 9 մեծ նախագիծ։ Այդ նկարները պահել է «Վերնատան» «Հեքիաթ» նախագծի համար․ «Պետք է գիրք հրատարակենք։ Այդ նկարները չէի ցանկանա վաճառել, որովհետեւ հուսով եմ, որ հաղթելու ենք, ու գիրքը տպագրվելու է»։ Իսկ մյուս կտավներից էլ դժվար բաժանվելու խնդիրը կարծես թե հաղթահարված է․ «Կտավները իմ տարիների աշխատանքներն են, բայց ինձ համար ավելի դժվար է լսել զինվորի մահվան մասին։ Ես հիմա իմ ամենասիրելի ու ամենաթանկ աշխատանքերն էլ կես գնով եմ դնում վաճառքի, որովհետեւ պետք է գիտակցել, որ հայրեինքը լինել կամ չլինելու խնդրի առաջ է կանգնած»։ «Նիկե», հին հունական դիցաբանության մեջ հաղթանակի աստվածուհին Վաճառելու հենց առաջին օրերից նկարները փոստով ուղարկելը ֆինանսական առումով որոշակի դժվարություն է ստեղծել, սակայն մեր հայրենակիցները տրամադրել են նաեւ այդ գումարը․ «Մեր հայրենակիցներն ինձ շատ են աջակցում, գիտեն՝ ես այստեղ ֆիզիկապես ապրում եմ, հոգով Հայաստանում եմ։ Իմ վերջին տարիների նկարներն էլ Հայաստանի մասին են։ Այսօր ամեն մարդ պետք է լավատես լինի, թեւ տա զինվորին, զինվորը պետք է իմանա, որ թիկունքն ուժեղ է»,- մեր զրույցն այսպես է եզրափակում հոլանդահայ նկարիչն ու անցնում իր գործին։ Սեդա Առաքելյան

22:36 - 03 նոյեմբերի, 2020

Ավստրիայի ՆԳՆ ղեկավարը նաև հայտնել է, որ Վիեննայում տեղի ունեցած հրաձգությունը ահաբեկչություն է

Ինչպես արդեն հայտնել ենք Ավստրիայի մայրաքաղաք Վիեննայում գտնվող սինագոգում անհայտ անձը մի քանի կրակոց է արձակել և պայթեցրել իրեն: Ավստրիայի ՆԳՆ-ից հայտնում են, որ կասկածյալներից մեկը ձերբակալվել է։ Այս մասին հաղորդում է РИА Новости-ն։ Ավստրիական հեռուստատեսությունը հաղորդել էր, որ Վիեննայի կենտրոնում տեղի ունեցած կրակոցներին զուգահեռ՝ հանցագործները պատանդ են վերցրել մեկ այլ տարածքում գտնվող ռեստորանի այցելուներին, սակայն РИА Новости-ի հետ զրույցում ճապոնական ռեստորանի ներկայացուցիչը հերքել է պատանդների մասին լուրերը։ Ավստրիայի ՆԳՆ ղեկավարը նաև հայտնել է, որ Վիեննայում տեղի ունեցած հրաձգությունը ահաբեկչություն է։ Նա նաև խնդրել է քաղաքի բնակիչներին փողոց դուրս չգալ։ Kronen Zeitung թերթը գրում է, որ ահաբեկչության հետևանքով մեկ ոստիկան է սպանվել։

01:22 - 03 նոյեմբերի, 2020

Հադրութի տարածաշրջանում մեր դիրքերի ուղղությամբ գրոհի ժամանակ թշնամին թողել է 15-16 դիակ ու փախել

Տեղեր կան մեր դիրքերի առջև, որ արդեն 20 և ավելի օրեր Ադրբեջանի ԶՈՒ-ի, վարձկանների, միգուցե այլ պետությունների զինծառայողների, ահաբեկիչների դիեր այդպես էլ մնում են բաց երկնքի տակ և առաջացնում են լուրջ խնդիրներ։ Փորձում ենք այդ խնդիրը լուծել, որ համաճարակ չառաջանա, բայց դիակները այդպես մնում են։ Այս մասին այսօր տեղի ունեցած ասուլիսի ժամանակ ասաց ՀՀ ՊՆ ներկայացուցիչ Արծրուն Հովհաննիսյանը։ «Այսօր էլ Հադրութի տարածաշրջանի գյուղերից մեկի հատվածում մեր դիրքերի ուղղությամբ իրենց (Ադրբեջանի - խմբ․) բավական մեծաքանակ զորքերի գրոհը հետ մղելիս նորից իրենք մեր դիրքերի դիմաց թողել են մոտ 15-16 դիակ ու փախել են ու բացարձակապես մոտիկ չեն եկել, դիակները չեն տարել»,- ընդգծեց նա։ ՊՆ ներկայացուցիչը, պատասխանելով լրագրողներից մեկի հարցին, թե Ադրբեջանը արդյո՞ք ունի արբանյակային հետախուզության հնարավորություն, ասաց՝ քանի որ այստեղ փաստացի ունենք Թուրքիայի՝ մարտական գործողությունների լիարժեք վերահսկողությունը կամ կառավարումը, շատ հնարավոր է, որ արբանյակային նման հնարավորություն ունենան։ «Բայց դա կատաստրոֆիկ երևույթ չէ, որովհետև մենք ևս ունենք որոշակի հնարավորություններ՝ նույն հետախուզությունն իրականացնելու։ Այդ պատճառով մենք ոչ թե պետք է մտածենք միայն, թե ինչպես անենք, որ չտեսնեն, այլ ինչպես անենք, որ խաբենք, որ լավ քողարկենք մեր շարժերը, տեղերը, գործողությունները, միջոցները»,- նշեց Հովհաննիսյանը։ Արծրուն Հովհաննիսայնն իր խոսքը եզրափակեց՝ ասելով․ «Պատերազմը շարունակվում է, հակառակորդը ամեն կերպ ամեն ուղղությունից փորձում է նոր հարձակողական գործողություններ ձեռնարկել՝ փոքր, միջին, մեծ ուժերով։ Ակտիվորեն փորձում է կիրառել իր կրակային ներգործության որոշակի առավելությունը՝ հրետանի, հրթիռային միջոցներ, ավիացիա, ԱԹՍ-ներ և այլն։ Մենք մեր պաշտպանական խնդիրները շատ գրագետ լուծում ենք, հիմնականում մեծ կորուստներ պատճառելով՝ հետ ենք շպրտում հակառակորդին։ Պատերազմն ունի իր բարդությունները, դժվարությունները, բայց ես վստահ եմ՝ մեր զորքերը տիրապետում են իրավիճակին, օր օրի ձեռք են բերում ավելի մեծ փորձ, ավելի լավ են ճանաչում թշնամուն, ավելի լավ են հասկանում նրա մտահղացումները, ավելի լավ են պատկերացնում ու կարողանում գտնել այն հակաթույները, որոնք նա օգտագործում է որպես բարձր տեխնոլոգիական միջոցներ»։

22:51 - 02 նոյեմբերի, 2020