ԵՄ - infocom.am

ԵՄ

Եվրոպական միությունը (ԵՄ) իրավունքի քաղաքական համայնք է, որի նպատակն է Եվրոպայի երկրների ու ժողովուրդների ինտեգրման ու կառավարման գործառույթի կազմակերպումը: Հիմնվել է 1993 թվականի նոյեմբերի 1-ին, բաղկացած է եվրոպական 27 երկրներից։ ԵՄ կառույցներն են Եվրոպական խորհրդարանը, Եվրամիության խորհուրդը, Եվրոպական խորհուրդ, Եվրոպական խորհուրդ, Եվրամիության Արդարադատության դատարանը, Հաշիվների դատարանը, Եվրոպական կենտրոնական բանկը։

Լիսաբոնյան համաձայնագրի ընդունմամբ՝ Եվրոպական արտաքին գործերի ծառայության պատասխանատվության տակ անցան Եվրոպական միությունը և իր քաղաքացիներին ներկայացնող 140 պատվիրակությունները և գրասենյակները:

Հայաստանում Եվրոպական միության դեսպանն ու ԵՄ պատվիրակության ղեկավարն է Ն.Գ. Անդրեա Վիկտորին։

Եթե ՍԴ-ն որոշի, որ խաղաղության համաձայնագրի տեքստը չի համապատասխանում մեր Սահմանադրությանը, ես այդ դեպքում կնախաձեռնեմ սահմանադրական փոփոխություններ․ Փաշինյան

Վարչապետ Նիկոլ Փաշինյանը ներկա է գտնվել «Երևանյան երկխոսություն-2025» միջազգային համաժողովի բացման արարողությանը: Միջոցառմանը մասնակցել է նաև պաշտոնական այցով Հայաստանում գտնվող Սլովակիայի վարչապետ Ռոբերտ Ֆիցոն: Միջազգային ֆորումը կազմակերպվել է ՀՀ արտաքին գործերի նախարարության կողմից: Ֆորումին մասնակցել են 40-ից ավելի երկրներից շուրջ 600 մասնակիցներ, այդ թվում` բարձրաստիճան պաշտոնյաներ, միջազգային կազմակերպությունների, գիտական շրջանակների ներկայացուցիչներ, վերլուծաբաններ, փորձագետներ և այլն: Այս մասին հայտնում են ՀՀ վարչապետի աշխատակազմից։ Նիկոլ Փաշինյանը՝ ողջունելով ներկաներին, անդրադարձել է «Հայաստանի և Ադրբեջանի միջև խաղաղության և միջպետական հարաբերությունների հաստատման մասին» համաձայնագրի նախագծին և նշել, որ փաստաթուղթը վերջնական տեսքի է բերվել և ավարտին հասցվել դրա շուրջ բանակցությունները: «Հայաստանը հայտարարել է, և անձամբ ես հայտարարել եմ, որ պատրաստ եմ ստորագրել այն: Գիտեք, որ Ադրբեջանը պաշտոնապես կապակցում է համաձայնագրի ստորագրումը երկու խնդրի հետ. դրանցից առաջինը ԵԱՀԿ ՄԽ կառույցների լուծարումն է»,- ասել է վարչապետն՝ ավելացնելով, որ ԵԱՀԿ Մինսկի խմբի լուծարման օրակարգն ընդունելի է ՀՀ Կառավարության համար և հայկական կողմը պատրաստ է առաջ շարժվել: «Բայց մյուս կողմից ուզում ենք համոզվել, հավաստիանալ, որ մենք և Ադրբեջանը նույն կերպ ենք ընկալում իրավիճակը: Ուզում ենք հավաստիանալ, որ Ադրբեջանի մտադրությունը չէ իր տարածքում հակամարտային իրավիճակը փակել և արտահանել այն Հայաստանի Հանրապետության տարածք: Ինչո՞ւ ենք այսպես ասում, որովհետև գիտեք, որ, դժբախտաբար, վերջին տարիներին Ադրբեջանը սկսել է Հայաստանի Հանրապետության ինքնիշխան տարածքի մոտավորապես 60%-ն անվանել այսպես կոչված «արևմտյան Ադրբեջան», և գիտեք մեր դիրքորոշումն այդ հարցի վերաբերյալ: Մենք բազմիցս ասել ենք, որ չի կարող լինել «արևմտյան Ադրբեջան» Հայաստանի Հանրապետության ինքնիշխան տարածքում, ուստի ընդհանուր առմամբ ո՞րն է մեր առաջարկն ապագայի համար: Մենք առաջարկում ենք ստորագրել խաղաղության համաձայնագիրը, և զուգահեռ դիմել ԵԱՀԿ-ին՝ ՄԽ-ի կառույցները լուծարելու հարցով: Ես կարծում եմ՝ դա կառուցողական մոտեցում է և առաջարկ՝ ունենալ սեղանին դրված երկու փաստաթուղթ և ստորագրել դրանք միաժամանակ, նույն պահին, նույն վայրում»,- նշել է Նիկոլ Փաշինյանը:Ըստ վարչապետի՝ հաջորդ խնդիրը, որն Ադրբեջանը բարձրացնում է, այն պնդումն է, թե ՀՀ Սահմանադրությունն իբրև պարունակում է Ադրբեջանի նկատմամբ տարածքային պահանջներ: Նիկոլ Փաշինյանը նշել է, որ խաղաղության համար շատ կարևոր նախապայման է այն, որ կողմերը պետք է որևէ տարածքային պահանջ միմյանց նկատմամբ չունենան: Այդ համատեքստում երկրի ղեկավարն անդրադարձել է Հայաստանի և Ադրբեջանի միջև սահմանի սահմանազատման երկու հանձնաժողովների համատեղ գործունեության մասին կանոնակարգին, որն անցյալ տարի ՀՀ Սահմանադրական դատարանն ուսումնասիրել է. «Իմիջիայլոց, Ալմա-Աթայի հռչակագիրը հիշատակված էր որպես հիմնարար սկզբունք Հայաստանի և Ադրբեջանի միջև սահմանազատման գործընթացում, ուստի երկու կանոնակարգերը, իսկ դա նշանակում է նաև՝ Ալմա-Աթայի հռչակագիրը, ամբողջովին համապատասխանում են ՀՀ Սահմանադրությանը»: Երկրի ղեկավարն ընդգծել է՝ ՀՀ Սահմանադրական դատարանը արձանագրել է, որ Ալմա-Աթայի հռչակագիրն ամբողջովին համապատասխանում է ՀՀ Սահմանադրությանը, ինչը նշանակում է, որ ՀՀ Սահմանադրության մեջ չկա տարածքային պահանջ որևէ հարևանի նկատմամբ: «Համաձայնեցված տեքստում մենք դրույթ ունենք, որ Հայաստանը և Ադրբեջանը ճանաչում են միմյանց տարածքային ամբողջականությունն այնպես, ինչպես եղել է Խորհրդային Միության ժամանակներում՝ որպես խորհրդային սոցիալիստական հանրապետություններ։ Խաղաղության համաձայնագրի համաձայնեցված տեքստի նախագծում մեկ դրույթ էլ կա։ Կողմերը հայտարարում են, որ միմյանց նկատմամբ չունեն որևէ տարածքային պահանջներ և ապագայում չեն ներկայացնելու որևէ նման պահանջներ», - ասել է Նիկոլ Փաշինյանը՝ անդրադառնալով ևս մեկ կարևոր դրույթի, որը նախատեսում է՝ կողմերը չեն կարող իրենց պետական օրենսդրությունը վկայակոչել որպես հիմնավորում խաղաղության համաձայնագիրը չկատարելու համար։Վարչապետը նշել է, որ Հայաստանի օրենսդրության համաձայն՝ խաղաղության համաձայնագիրը ստորագրելուց հետո այն պարտադիր պետք է ներկայացնել Սահմանադրական դատարան: «Եթե Սահմանադրական դատարանը որոշի, որ Հայաստանի և Ադրբեջանի միջև խաղաղության համաձայնագրի տեքստը չի համապատասխանում մեր Սահմանադրությանը, ես այդ դեպքում կնախաձեռնեմ սահմանադրական փոփոխություններ, քանի որ այս խաղաղության գործընթացը և խաղաղության համաձայնագիրը չպետք է բաց թողնվեն: Եվ կփորձենք, կհամոզենք մեր հասարակությանը, որ այդ փոփոխությունը արվի՝ տևական և երկարաժամկետ խաղաղության հասնելու համար: Բայց եթե Սահմանադրական դատարանը որոշի, որ համաձայնագիրն ամբողջովին համապատասխանում է ՀՀ Սահմանադրությանը, ապա այդ պարագայում որևէ խոչընդոտ չի լինի փաստաթուղթը մեր Ազգային ժողով վավերացման ուղարկելու ճանապարհին»: Վարչապետը նշել է` դա նշանակում է, որ վավերացումից և ուժի մեջ մտնելուց հետո Հայաստանի և Ադրբեջանի միջև խաղաղության համաձայնագիրն ամենաբարձր իրավաբանական ուժը կունենա Հայաստանի Հանրապետությունում. «Սա շատ կարևոր լուր է, որովհետև դա նշանակում է, որ խաղաղության համաձայնագիրը կլուծի բոլոր մտահոգությունները, որոնք Ադրբեջանը կարող է ունենալ և ունի ներկայումս: Ուստի, ակնհայտ է, որ Ադրբեջանի կողմից բարձրացված խնդիրները լուծելու ճանապարհը պայմանագրի ստորագրումն է, ոչ թե չստորագրումը»: Երկրի ղեկավարն ընդգծել է՝ Ադրբեջանի Սահմանադրության մեջ կան որոշ տարածքային պահանջներ ընդդեմ Հայաստանի, բայց ՀՀ Կառավարությունն այդ հարցն առանձին չի բարձրացրել, քանի որ համարել է, որ պայմանագրի տեքստում այդ հարցը կհասցեագրվի. «Խաղաղության պայմանագրի ստորագրումը հասցեագրում է, փարատում է, լուծում է բոլոր հնարավոր խնդիրները՝ և՛ Հայաստանինը, և՛ Ադրբեջանինը։ Ուստի, իմ դիրքորոշումը, իմ կոչն այս իրավիճակում հետևյալն է՝ մենք պետք է կենտրոնանանք խաղաղության համաձայնագրի ստորագրման ուղղությամբ: Եվ ես վերահաստատում եմ, որ անձամբ ես և մեր Կառավարությունը, մեր քաղաքական թիմը պատրաստ ենք առաջ շարժվելու և ստանձնելու պատասխանատվության մեր բաժինը տևական և կայուն խաղաղություն մեր տարածաշրջանում ունենալու համար»: Երկրի ղեկավարը խոսել է նաև «Խաղաղության խաչմերուկ» նախագծի մասին և ընդգծել, որ նախագծի շրջանակում Հայաստանն առաջարկել է կոնկրետ լուծում տարածաշրջանային հաղորդակցության ուղիները երկկողմ, միջազգային և տարանցիկ շարժի համար բացելու նպատակով: Վարչապետն անդրադարձել է «Խաղաղության խաչմերուկ» նախագծի կարևոր սկզբունքներին՝ պետությունների տարածքային ամբողջականություն, ինքնիշխանությունը, իրավազորությունը և փոխադարձություն: «Սա շատ կարևոր նախագիծ է հաղթահարելու մատակարարման համաշխարհային շղթաների ճգնաժամերը։ Երբ Ադրբեջանի և Թուրքիայի հետ մեր ճանապարհները բացվեն, դա նոր հնարավորություններ կբացի կապակցելու արևելքը և արևմուտքը, հյուսիսը և հարավը»,- ասել է վարչապետը՝ հավելելով, որ, դժբախտաբար, որոշակի վարանողականություն է նկատվում Ադրբեջանի կողմից: Նիկոլ Փաշինյանը նշել է, որ այդ հարցում հնարավոր առաջընթաց ունենալու համար առաջարկվել են կոնկրետ լուծումներ՝ Հայաստանը պատրաստ է Ադրբեջանի արևմտյան մասերից Նախիջևան Հայաստանի տարածքով բեռնափոխադրումներ կազմակերպել «Մեզ համար շատ կարևոր է համանման կապակցվածություն ունենալ: Մենք ասում ենք հետևյալը՝ Ադրբեջանից Ադրբեջան Հայաստանի տարածքով և Հայաստանից Հայաստան Ադրբեջանի տարածքով՝ հարգելով երկրների տարածքային ամբողջականությունը, ինքնիշխանությունը և իրավազորությունը: Այս առաջարկը պաշտոնական է, այն սեղանին է, և ցանկացած պահի, երբ Ադրբեջանը համաձայնվի, մենք պատրաստ կլինենք մուտք գործել այս գործընթացի իրագործման փուլ»։ Ամփոփելով խոսքը՝ Նիկոլ Փաշինյանը նշել է, որ ՀՀ Կառավարությունն ունի կոնկրետ առաջարկներ առաջընթաց ունենալու և տարածաշրջանում տևական և կայուն խաղաղության հասնելու համար. «Տևական և կայուն խաղաղությունը Հայաստանի և Ադրբեջանի միջև ոչ միայն հնարավոր է, այլ նաև՝ հասանելի։ Եվ մենք վճռական ենք, մենք հանձնառու ենք խաղաղության օրակարգին: Մենք պատրաստ ենք շարունակել խորհրդակցություններն Ադրբեջանի հետ այն հարցում, թե ինչպես հասնել խաղաղության համաձայնագրի ստորագրման կետին և այլ փաստաթղթերի ստորագրմանը, որոնք ամբողջովին և կտրականապես կփոխեն իրավիճակը և տարածաշրջանի ժողովուրդների ճակատագիրը: Մենք, իհարկե, հավատարիմ կլինենք այդ օրակարգին և ամեն ինչ կանենք, ինչ մեզնից կախված է՝ իհարկե, հարգելով իմ արդեն նշած սկզբունքները: Տիկնայք և պարոնայք, իմ համոզմունքն այն է, որ ի հեճուկս բոլոր փաստարկների, բոլոր սադրանքների և այլն, Հայաստանի և Ադրբեջանի միջև չի՛ լինելու պատերազմ, լինելո՛ւ է խաղաղություն: Եվ դա շատ միանշանակ է ինձ համար»։

15:00 - 26 մայիսի, 2025

Հայաստանի հետ հարաբերությունների խորացումը Սլովակիայի արտաքին քաղաքական առաջնահերթություններից է. Ռոբերտ Ֆիցո |armenpress.am|

armenpress.am: Սլովակիայի արտաքին քաղաքականության առաջնահերթությունների թվում է նաև Հայաստանի հետ հարաբերությունների խորացումը։ «Երևանյան երկխոսություն» երկրորդ համաժողովի ընթացքում ունեցած ելույթում այս մասին ասել է Սլովակիայի վարչապետ Ռոբերտ Ֆիցոն։ «Սա շատ կարևոր է համաժողով է՝ քննարկելու համար կենսական նշանակություն ունեցող տարածաշրջանային և գլոբալ հարցերը։ Կցանկանայի օգտվելով առիթից՝ ներկայացնել Սլովակիայի արտաքին քաղաքականության առաջնահերթությունները, Սլովակիայի դերակատարությունն ընդհանուր համագործակցության համատեքստում։ Առաջնահերթությունների թվում են խաղաղության հաստատմանն ուղղված մեր ջանքերն ու Հայաստանի հետ հարաբերությունների խորացումը»,- ասել է Ֆիցոն։ Խոսելով Հայաստանի հետ հարաբերությունների մասին՝ Ռոբերտ Ֆիցոն ասել է, որ Հայաստանի և Սլովակիայի միջև հաստատվել են ամուր բարիդրացիական հարաբերություններ, որոնք հիմնված են ընդհանուր քրիստոնեական արժեքների վրա։ «Մեր երկրները նաև առևտրային գործընկերներ են, որոնց միջև տնտեսական կապերն աճում են հատկապես էներգետիկայի, մեքենաշինության, պաշտպանության և զբոսաշրջության ոլորտներում։ Օգտագործելով այս առիթը՝ մենք Հայաստանի վարչապետի հետ հանգամանորեն կքննարկենք համագործակցության ընդլայնման հնարավորությունները։ Մենք աջակցում ենք Հայաստանի ու ԵՄ-ի սերտ համագործակցությանն ու հարաբերություններին։ Սլովակիան պատրաստ է կիսվել տնտեսական ձեռքբերումներով և սոցիալական ոլորտում իրականացրած բարեփոխումների իր փորձով՝ նպաստելով Հայաստան-ԵՄ գործընկերության պայմանագրի կնքման և վիզաների ազատականացման երկխոսությանը»,- նշել է Սլովակիայի վարչապետը։ Նա հավաստիացրել է, որ Սլովակիան այսուհետ ևս կաջակցի ԵՄ դիտորդական առաքելության ներկայությանը Հայաստանում, ինչն արդարացրել է իրեն շատ դեպքերում։ «Սլովակիան և Հայաստանը սերտորեն համագործակցում են նաև Կոսովոյում իրականացվող խաղաղապահ ուժերի գործունեության համատեքստում։ Հայաստանի ներդրումը Արևմտյան Բալկաններում կայունության գործում մեծապես գնահատելի է։ Հայաստանի վարչապետի ջանքերը Հայաստանի և Ադրբեջանի միջև խաղաղության պայմանագրի կնքման գործում նույնպես ողջունելի են։ Այս տարածաշրջանում տևական խաղաղության և անվտանգության վերաբերյալ ոչ վաղ անցյալում հնչած հայտարարություններն առանցքային նշանակություն ունեն երկու կողմերի համար։ Խաղաղության պայմանագրի ստորագրումը բավականին ուժեղ մեսիջ կհղի Եվրոպային առ այն, որ հակամարտությունը կարող է լուծվել դիվանագիտական երկխոսության միջոցով։ Սլովակիան կանգնած է ձեր կողքին և պատրաստ է աջակցել ձեր ջանքերին»,- ասել է նա։ Խոսելով Եվրամիության և ՆԱՏՕ-ի մասին՝ Ֆիցոն շեշտել է, որ երկու կառույցներն էլ կենսական նշանակություն ունեն Սլովակիայի համար։ «Այս ինտեգրացիան և շփումների շրջանակը հաստատվել են Եվրոպական տարածաշրջանում խաղաղության հաստատման ու բարգավաճման նպատակով։ Անդամակցելով ԵՄ-ին՝ Սլովակիան գրանցել է առաջընթաց քաղաքական, տնտեսական և սոցիալական ոլորտներում, որը հիմնված է բարիդրացիական հարաբերությունների և փոխգործակցության վրա։ Այդ գործընթացը խորացնելու նպատակով հատկապես տնտեսության բնագավառում կան լավ հեռանկարներ մեր քաղաքացիների համար։ Այդուհանդերձ, սա չի նշանակում, որ մենք չպետք է քննադատական վերաբերմունք ցուցաբերենք ԵՄ-ի քաղաքականության և որոշումների նկատմամբ։ Օրինակ՝ Սլովակիայի կառավարությունը հակադրվել է Եվրամիության այն առաջարկներին, որոնց շնորհիվ պետք է հրաժարվել ռուսական էներգակիրների ձեռքբերումից։ Սլովակիան կոնկրետ քայլեր է կատարել իր էներգետիկ ռեսուրսները դիվերսիֆիկացնելու ուղղությամբ։ Մենք հասկանում ենք միայն մեկ կողմից մատակարարումների հետ կապված ռիսկերը, սակայն ԵՄ-ի առաջարկները կարճատեսական են։ Համոզված ենք, որ դրանք կհարվածեն մեր մրցունակությանը և էներգետիկ անվտանգությանը՝ հատկապես միջուկային էներգետիկայի տիրույթում, որտեղ ներկայում չկա վառելիքային այլընտրանք Սլովակիայի համար»,- նշել է Սլովակիայի վարչապետը։ Նա հավելել է, որ իրենց արտաքին քաղաքականության մեջ ձգտում են հավասարակշռության՝ կառուցելով նոր գործընկերություն։ «Ձգտում ենք նաև ամրացնել ռազմավարական հարաբերությունները մի շարք երկրների հետ։ Ունենալով փոքր, սակայն բաց և արտահանման միտված տնտեսություն՝ մենք ցավով ենք տեսնում գլոբալ տնտեսական միտումները, մասնավորապես անազնիվ առևտրային մրցակցությունն ու տնտեսական պրոտեկցիոնիզմը։ Սլովակիայում 20 հազար աշխատատեղեր կվտանգվեն, եթե համաշխարհային առևտրային պատերազմը խորանա։ Այդ պատճառով մենք կարիք ունենք առաջ մղել հարաբերություններն այն երկրների հետ, որոնք հետաքրքրված են արտահանման դիվերսիֆիկացիայով»,- ընդգծել է Սլովակիայի վարչապետը։

14:10 - 26 մայիսի, 2025