Տավուշի մարզ

Տավուշի մարզը գտնվում է Հայաստանի հյուսիսարևելյան մասում, մարզկենտրոնը Իջևան քաղաքն է։

Ընդգրկում է Իջևանի, Տավուշի, Նոյեմբերյանի տարածաշրջանները և 4 քաղաքներ՝ Իջևանը, Նոյեմբերյանը, Բերդը և Դիլիջանը։ Մարզը սահմանակից է Վրաստանին, հյուսիսում և արևելքում՝ Ադրբեջանին։ Ներկայումս Տավուշի մարզպետն է Հայկ Չոբայանը։

Դովեղում նախնական համաձայնությամբ կառուցվող դպրոցը և Քաղաքաշինության կոմիտեի իրարամերժ պատասխանները |hetq.am|

hetq.am: Տավուշի մարզի Դովեղ գյուղի դպրոցի շինարարության մասին «Հետք»-ը հոդված էր հրապարակել այս տարվա մայիսի 6-ին։ Դպրոցը կիսակառույց է, հունիսի կեսերին այն պետք է պատրաստ լինի։ Դպրոցի շինարարության վերաբերյալ մեր երկրորդ հարցմանը պատասխանելու համար 2 ամսից ավելի ժամանակ պահանջվեց։ Այս պատասխանի և մեր ավելի վաղ արված հարցման պատասխանի միջև էական հակասություններ կան։ «Կանժիլստրոյ» ՍՊ ընկերության և Քաղաքաշինության կոմիտեի միջև, Դովեղ գյուղում դպրոց կառոցելու նպատակով, 2020-ի նոյեմբերի 26-ին պայմանագիր է կնքվել։ Պայմանագրի գինը 743 մլն 233 հազար դրամ է։ 2023-ի նոյեմբերի 23-ին «Կանժիլստրոյ» ՍՊ ընկերության հետ համաձայնագիր է կնքվել, ըստ որի՝ պայմանագրով սահմանված գումարը ավելացել է 475 մլն 113 հազար դրամով կամ պայմանագրով սահմանված գումարի 64%-ի չափով` կազմելով 1 մլրդ 218 մլն դրամ: Դովեղ գյուղում դպրոցի շինարարությունը սկսվել է 2022-ի դեկտեմբերի 27-ին և որպես շինարարության ավարտ պայմանագրում նշվում է՝ «450 օրացուցային օր»։ Բացի պայմանագրով սահմանված գումարի չափից՝ մեկ այլ համաձայնագրով, որը կնքվել է 2023թ․-ի դեկեմբերի 7-ին, 90 օրացուցային օրով երկարացվել է շինարարության ժամկետը։ Մինչ այս համաձայնագրի կնքումը, ըստ պայմանագրի, շինարարությունը պետք է ավարտվեր 2024-ի մարտի կեսերին, իսկ համաձայնագրի կնքումից հետո նախատեսվում է, որ շինարարությունը պետք է ավարտվի 2024թ․-ի հունիսի կեսերին։ «Հետք»-ը 2024թ․-ի փետրվարի 27-ին հարցում է ուղարկել Քաղաքաշինության կոմիտե՝ խնդրելով պատասխանել, թե որն է պայմանագրով սահմանված գնի և ժամկետների փոփոխության պատճառը, և որ փուլում է գտնվում շինարարությունը։ Մարտի 4-ին ստացված պատասխան նամակում նշվում է՝ նախապես դպրոց կառուցելու համար դիտարկվել է գործող դպրոցի տարածքը, բայց դասապրոցեսը չընդհատելու նպատակով որոշվել է նոր տարածքի վրա կառուցել դպրոցը: «Հաշվի առնելով գյուղի ռելիեֆի առանձնահատկությունները և շինարարական աշխատանքների ընթացքում ի հայտ եկած գրունտային նոր պայմանները, ինչպես նաև շինհրապարակի տեղամասին կից ճանապարհի առկայությունը՝ առաջացել է դպրոցի կառուցման աշխատանքներին զուգահեռ զգալի ծավալի հողային նոր աշխատանքների իրականացման և հենապատի կառուցման անհրաժեշտություն»,- նշված է Քաղաքաշինության կոմիտեի պատասխան նամակում։ Ըստ Քաղաքաշինության կոմիտեի՝ նշված հանգամանքներով է պայմանավորված գնային և ժամանակացուցային փոփոխությունը։ Նամակում նշվում է, որ ներկա պահին (04.03.2024) ընթանում են դպրոցի և հենապատի կառուցման աշխատանքները։ Մենք նոր հարցում ենք ուղարկել Քաղաքաշինության կոմիտե, քանի որ այս պատասխանից նոր հարցեր են առաջանում, մասնավորապես՝ ինչպե՞ս է ստացվել, որ մինչ շինաշխատանքների մեկնարկը, ուսումնասիրության արդյունքում չեն պարզվել՝ տարածքի գրունտային պատկերը և անհրաժեշտ աշխատանքների ծավալը։ Ինչո՞ւ դպրոց կառուցելու համար հայտարարված մրցույթում ի սկզբանե չի ընդգրկվել հենապատի կառուցումը, քանի որ ճանապարհը կար մինչև դպրոցի շինարարության մեկնարկը: Այս հարցումն ուղարկել ենք 2024թ․-ի մարտի 11-ին։ Քաղաքաշինության կոմիտեից պատասխան նամակով լրացուցիչ 30 օր խնդրեցին՝ հարցմանը պատասխանելու համար։ Հարցման պատասխանը ստացել ենք մայիսի 20-ին՝ 70 օր անց, որը ավելի խնդրահարույց է, քան առաջինը։ Քաղաքաշինության կոմիտեի երկու պատասխանների միջև հակասություններ կան։ Քաղաքաշինության կոմիտեն նույն հարցի վերաբերյալ երկու պատասխաններում տարբեր դիրքորոշումներ է ներկայացրել «․․․միջնակարգ դպրոցի տիպային (մոդուլային) շենքի կառուցման համար նախապես դիտարկվել էր գործող դպրոցի տարածքը։ Սակայն դասապրոցեսը չընդհատելու նպատակով և հետագայում դպրոցի շենքն այլ նպատակով օգտագործելու հնարավորությունը հաշվի առնելով՝ քննարկումների արդյունքում որոշվել է համայնքի կողմից նոր հողատարածք տրամադրել»,- նշված է առաջին պատասխանում։ «․․․միջնակարգ դպրոցի տիպային (մոդուլային) շենքի կառուցման համար նախապես դիտարկվել էր գործող դպրոցի տարածքը, որի համար 2020 թվականին հայտարարվել է գնման գործընթաց, և արդյունքում «Կանժիլստրոյ» ՍՊԸ-ի հետ 2020 թվականի նոյեմբերի 26-ին կնքվել է պայմանագիր։ Հետագայում պարզվել է, որ գոյություն ունեցող դպրոցի մի մասը տեղական իշխանության, տարբեր բարերարների և ԱԻՆ Տավուշի մարզի Նոյեմբերյանի ՀՕՊ ՀՓՋ-ի ուժերով վերանորոգվել և կահավորվել է՝ Դովեղի ՀՕՊ հրշեջ-փրկարարական ծառայության կարիքների համար։ Նշված տարածքը հետագայում ՀՀ կառավարության համապատասխան որոշմամբ հանձնվել է ԱԻՆ-ին»,- նշված է երկրորդ պատասխանում։ Այսպիսով ստացվում է՝ Քաղաքաշինության կոմիտեն գործող դպրոցի տարածքի վերաբերյալ երկու տարբեր նամակներում ներկայացրել է երկու տարբեր դիրքորոշում։ Եթե առաջին նամակի համաձայն գործող դպրոցի տարածքը որոշվել է չօգտագործել, նորը կառուցելու համար, որպեսզի դասապրոցեսը չխաթարվի, ապա երկրորդ նամակում նշվում է, որ պայմանագրի կնքումից հետո է պարզ դարձել, որ գործող դպրոցի մի մասը օգտագործվում է ԱԻՆ ստորաբաժանման կողմից և Կառավարության որոշմամբ այդ տարածքը տրամադրվել է ԱԻՆ-ին։ Հետաքրքիր է նաև այն, որ պայմանագրի կնքումից հետո է պարզվել այս հանգամանքը, և նամակում նշվում է՝ վերոնշյալով պայմանավորված՝ շինարարական աշխատանքները չեն մեկնարկել։ Քաղաքաշինության կոմիտեն նախնական համաձայնություններով է դպրոց կառուցում Երկրորդ նամակում նշվում է՝ համայնքը Քաղաքաշինության կոմիտեին 2020-ի փետրվարին ներկայացրել է հողատարածքի մի քանի տարբերակ։ Կոմիտեի և տիպային նախագիծը մշակող «Հայնախագիծ» ԲԲ ընկերության ներկայացուցիչները ուսումնասիրել են ներկայացված տարածքները, համայնքում հանդիպել են համայնքի ղեկավարի, մարզպետարանի պատասխանատուների և բնակիչների հետ և քննարկել առաջարկված տարբերակները։ Ոսումնասիրության ընթացքում պարզել են, որ այդ մի քանի հողատարածքներն ունեն ռելիեֆային վատ պայմաններ և որոշ դեպքերում՝ ոչ բավարար մակերես։ «Սակայն ելնելով տվյալ համայնքում դպրոց կառուցելու անհրաժեշտությունից՝ հողամասերից ընտրվել է առավել բարենպաստ պայմաններ ունեցող տարբերակը»,- նշված է Քաղաքաշինության կոմիտեի նամակում։ Ըստ Քաղաքաշինության կոմիտեի նամակի՝ ընտրված հողատարածքում դպրոցի կառուցման համար անհրաժեշտ մակերեսն ապահովելու համար անհրաժեշտ է եղել ձեռք բերել համայնքային հողին հարող, մասնավոր սեփականություն հանդիսացող հողակտորներից մի քանիսը։ Այդ տարածքների սեփականատերերի նախնական համաձայնությունն ունենալով՝ տրվել էր հանձնարարական «Հայնախագիծ» ԲԲ ընկերությանը՝ իրականացնելու համապատասխան ուսումնասիրություններ։ Նամակում նշվում է՝ այդ եղանակով նախագիծը իրականացնելու դեպքում շինհրապարակը ճանապարհից բավականաչափ հեռավորություն կունենար, ռելիեֆի առանձնահատկությունները լրացուցիչ բարդություններ չէին առաջացնի։ Բայց հետագայում հողամասերի սեփականատերերը հրաժարվել են նախնական համաձայնությունից։ Որոշվել է դպրոցը կառուցել միայն համայնքապատկան հողատարածքում, որն իր հերթին հավելյալ ծախսեր է առաջացրել։ Ինչպես արդեն նշել ենք, 2023-ի նոյեմբերի 23-ին «Կանժիլստրոյ» ՍՊ ընկերության հետ համաձայնագիր է կնքվել, ըստ որի՝ պայմանագրով սահմանված գումարը ավելացել է 475 մլն 113 հազար դրամով։ Ըստ Քաղաքաշինության կոմիտեի՝ այս համաձայնագիրը կնքվել է, քանի որ շինարարության ընթացքում ի հայտ են եկել գրունտային նոր պայմաններ՝ առաջացնելով զգալի ծավալի հողային նոր աշխատանքներ, և շինհրապարակի տեղամասին կից ճանապարհի առկայությամբ պայմանավորված հենապատի կառուցման անհրաժեշտություն։ Համաձայնագիրը կնքվել է շինաշխատանքների մեկնարկից մոտ 11 ամիս անց։ Այս մասին նշված է առաջին պատասխանում, իսկ երկրորդ պատասխանով ավելի մանրամասն է ներկայացվել։ ««Հայնախագիծ» ընկերության իրականացրած վերլուծության արդյունքում պարզ է դարձել, որ ռելիեֆային առանձնահատկություններից և ճանապարհի առկայությունից ելնելով՝ նշված տարածքին համապատասխան տեղակապման նախագիծ մշակելու համար անհրաժեշտ է նախատեսել հենապատ, հողային աշխատանքների ծավալի ավելացում, որոնք կհանգեցնեն ընդհանուր նախահաշվային արժեքի ավելացման։ ․․․Հաշվի առնելով Դովեղ բնակավայրում դպրոց կառուցելու անհրաժեշտությունը, ինչպես նաև ընտրված հողատարածքից զատ այլընտրանքի բացակայությունն ու ժամկետի սղությունը՝ Կոմիտեի հանձնարարությամբ «Հայնախագիծ» ԲԲ ընկերությանն առաջարկվել է շարունակել նախագծային աշխատանքները և նախագիծը տեղակապել հատկացված տարածքում։»,- նշված է Քաղաքաշինության կոմիտեի երկրորդ պատասխանում։ Ավելի մանրամասն՝ սկզբնաղբյուրում։

20:00 - 27 մայիսի, 2024

Փաշինյանի գլխավորությամբ անցկացվել է Լոռիում և Տավուշում արտակարգ իրավիճակի կառավարման օպերատիվ շտաբի նիստ

Վարչապետ Նիկոլ Փաշինյանի գլխավորությամբ առավոտյան անցկացվել է Լոռու և Տավուշի մարզերում արտակարգ իրավիճակի կառավարման օպերատիվ շտաբի հեռավար նիստ: Այս մասին հայտնում է կառավարության մամուլի ծառայությունը։ Նիստին մասնակցել են Վարչապետի աշխատակազմի ղեկավար Արայիկ Հարությունյանը, Տարածքային կառավարման և ենթակառուցվածքների նախարար Գնել Սանոսյանը, ով ղեկավարում է օպերատիվ շտաբի աշխատանքները, ՆԳ նախարարի տեղակալ-ՆԳՆ փրկարար ծառայության տնօրեն Կամո Ցուցուլյանը, Լոռու մարզպետ Արամ Ղազարյանը, Տավուշի մարզպետ Հայկ Ղալումյանը, Ալավերդու համայնքապետ Դավիթ Ղումաշյանը, Տաշիրի համայնքապետ Էդգար Արշակյանը և Դիլիջանի համայնքապետ Դավիթ Սարգսյանը: Նիստի սկզբում վարչապետը նշել է, որ նիստի նպատակն է քննարկել Տավուշի և Լոռվա մարզերում տեղի ունեցած հեղեղումների հետևանքները կառավարելու նպատակով ձևավորված օպերատիվ շտաբի աշխատանքի առաջին արդյունքները: «Նախ ուզում եմ կառավարության և ժողովրդի անունից ցավակցություն հայտնել հեղեղումներին զոհ դարձած քաղաքացիների ընտանիքների անդամներին, հարազատներին, բարեկամներին: Նախ կխնդրեմ, որ պարոն Սանոսյանը հակիրճ զեկույց ներկայացնի, թե այս պահին ի՞նչ ենք արձանագրել և ի՞նչ ունենք»,- նշել է վարչապետը: Գնել Սանոսյանը զեկուցել է, որ Լոռու և Տավուշի մարզերում, հատկապես Աղստև և Դեբետ գետերի ջրամբար ավազաններում՝ իրենց վտակներով, ջրերի վարարումների հետևանքներով արձանագրվել են մի շարք ավերվածություններ: «Մասնավորապես, կարող ենք առանձնացնել հինգ գոտի, որտեղ ավերվածություններն էական են՝ Ալավերդին, Տաշիրը, Ալավերդուց դեպի Այրում հատվածը, Այրումից դեպի Բագրատաշեն հատվածը և Դիլիջանից դեպի Իջևան հատվածը: Ամենամեծ վնասները հիմնականում Ալավերդիից դեպի Բագրատաշեն ուղղությամբ է արձանագրվել: Տարբեր ենթակառուցվածքներ, մասնավորապես, Մ6 միջպետական ճանապարհը, կամուրջներ, երկաթգիծը, ջրագծեր, էլեկտրահաղորդման գծեր, գազատարներ և այլ ենթակառուցվածքներ: Ալավերդի համայնքում կան մի շարք բնակավայրեր, մասնավորապես՝ 9 բնակավայր, որոնք կամուրջների վնասման հետևանքով ունեն Ալավերդի քաղաքի հետ կապի խնդիր և հիմա իրականացվում են այդ բնակավայրերի տարանցիկ այլ ճանապարհների կազմակերպման և նրանց կապի հաստատման հետ կապված աշխատանքներ: Երեկ ամբողջ օրվա ընթացքում Տավուշի և Լոռու մարզերում պետական տարբեր գերատեսչություններ, մարզպետարանի, համայնքապետարանի ներկայացուցիչներ միասին փորձել են աշխատել, համակարգել աշխատանքները: Պետք է ասեմ, որ երեկվա դրությամբ մոտ 105 սմ-ով Դեբետ գետում ունենք ջրի նվազում, տարբեր այլ վտակներում 50 սմ, 70 սմ ջրի նվազում, ինչը վաղ առավոտից հեշտացրել է ափապաշտպան և այլ աշխատանքների իրականացումը: Ընդհանուր ունենք վնասված 14 կամուրջ, որոնցից 5-6-ն ավելի փոքր են, կան նաև համայնքային նշանակության ավելի փոքր կամուրջներ»,- ասել է Գնել Սանոսյանը: Նրա խոսքով՝ մի շարք բնակավայրեր կան, որոնք հոսանքազրկվել են, դրանց մի մասում էլեկտրաէներգիան հաջողվել է վերականգնել, բայց կան բնակավայրեր, մասնավորապես, Լոռու մարզի մոտ 2500 բնակիչ դեռևս զրկված է էլեկտրաէներգիայից, իսկ Տավուշի մարզում՝ մոտ 1000 բնակիչ: Մի շարք հատվածներում կան նաև գազամատակարարման հետ կապված խնդիրներ: «Մենք երեկ Քաղաքաշինության կոմիտեի գործընկերների հետ հրավիրել ենք նաև կամուրջների կառուցման մասնագետների, ովքեր իրականացրել են այն կամուրջների զննությունները, որոնք պահպանվել են, չեն քանդվել: Սակայն փորձել ենք հասկանալ, թե դրանք ինչպիսի վիճակում են: Այսօր վաղ առավոտից մասնագետներն ուղևորվել են այն հատվածներ, որտեղ կամուրջները քանդվել են և այդ բնակավայրերի հետ կապի խնդիր կա, որպեսզի կարողանանք տեսնել, գնահատել, թե ինչ վերականգնողական աշխատանքներ կամ կարճաժամկետ միջոցներ են հնարավոր ձեռնարկել, որպեսզի կամուրջները վերականգնվեն: Ամբողջ ընթացքում Փրկարար ծառայության աշխատակիցներն աշխատել են և իրականացրել մարդկանց տարհանում: Փրկարար ծառայությունը, մասնավորապես, 429 հայրենակիցների տարբեր հատվածներից դուրս է բերել, որոնց մեծ մասն, իհարկե, մոտ 380-ը՝ Լոռու մարզում, մնացածը՝ Տավուշի մարզում: Աշխատանքները մնացած ուղղություններով շարունակվում են: Այսօր, ինչպես նշեցի, գետերը որոշակի մակարդակով իջել են և մեզ հնարավորություն է տալիս կարգավիճակն ավելի գնահատել և աշխատանքներ տանել: Հիմա այն հինգ բնակավայրերը, որոնք գտնվում են Դեբետ գետի ձախ ափին, այդ բնակավայրերի ճանապարհն է բացվում, որպեսզի կապ հաստատենք, մնացած աշխատանքները հիմնականում ընթացքի մեջ են»,- ասել է ՏԿԵ նախարարը: Նրա խոսքով՝ մեծ վնասներ է կրել նաև երկաթուղին, ընդհանուր մոտ 2,5 կմ: «Լուրջ վնասներ է պատճառվել և բավական ժամանակ կպահանջի երկաթուղու կապը վերականգնելու ուղղությամբ: Շատ լուրջ վնասներ է կրել Մ6 ճանապարհը, մոտ 8-9 հատվածներում ճանապարհը կամ ամբողջությամբ, կամ մասնակի քանդվել է: Լուրջ վնասներ է պատճառվել Մ4 միջպետական ճանապարհի հինգ հատվածներ, բայց երեկ ամբողջ օրն ափապաշտպան աշխատանքները հնարավորություն տվեցին ճանապարհը թեկուզ վնասված, բայց անցանելի պահպանել: Վաղ առավոտից արդեն հնարավոր է նաև երթևեկել Այրում-Բագրատաշեն հատվածով, շատ մեծ վնասներ չկան և ճանապարհն արդեն երթևեկելի է»,- ասել է օպերատիվ շտաբի ղեկավարը: Միաժամանակ նշվել է, որ տարհանված քաղաքացիները տեղակայվել են կամ իրենց հարազատների բնակարաններում, կամ հյուրանոցներում: 2 հղի կին բժշկական հետազոտության նպատակով տեղափոխվել է հիվանդանոց: ՆԳ նախարարի տեղակալ-ՆԳՆ փրկարար ծառայության տնօրեն Կամո Ցուցուլյանը զեկուցել է, որ 13 մարտական հաշվարկ 3 օպերատիվ խմբով ափամերձ տարածքներում իրականացնում են փրկարարական գործողություններ: Վարչապետ Փաշինյանը շեշտել է, որ տարհանված որևէ քաղաքացի կացարանի խնդիր չի ունեցել: «Ընդ որում, այստեղ էլ հատուկ արձանագրեցինք և տեսանք մեր ժողովրդի առանձնահատկությունը, որովհետև, ըստ էության, մեծ մասը տեղավորվել են իրենց հարազատների, բարեկամների, ծանոթների տներում»,- նշել է վարչապետը: Գնել Սանոսյանը տեղեկացրել է, որ Ալավերդու համայնքապետարանում ստեղծվել է պահեստային կետ, որտեղ կուտակվել է սնունդ՝ տեղահանված անձանց կարիքները բավարարելու նպատակով: Այժմ վարչական ղեկավարների կողմից տեղի է ունենում կարիքների գնահատում, և ըստ դրա՝ կլուծվեն սննդի և մյուս խնդիրները: Նշվել է նաև, որ 50-ից ավել ավտոմեքենաներ ջրածածկ են եղել և հնարավոր է այդ թիվն ավելանա: Վարչապետ Փաշինյան նշել է, որ նախկինում էլ Ալավերդիում և մյուս հատվածներում ջրհեղեղներ եղել են: «Պարզվեց, որ պաշտոնական արձանագրված տվյալներով՝ Տաշիրում արձանագրվել է 1972 թվականի հուլիսի 5-ին, 1983 թվականի մայիսի 18-ին: Ընդ որում՝ հետաքրքիր է, որ նախորդ երկու դեպքերում էլ ջրի ծավալներն ավելի շատ են եղել, քան երեկ արձանագրված հեղեղումը: Իսկ Դեբեդ գետի ավազանում և Ալավերդիում մի ջրհեղեղ արձանագրվել է 1959 թվականի մայիսի 19-ին և երկրորդ ջրհեղեղը՝ 1966 թվականի մայիսի 16-ին: Եվ հետաքրքիր է ուղղակի վիճակագրության համար, 1959 թվականի հեղեղումն ավելի ուժեղ է եղել, քան այժմ ունեցած հեղեղումը, իսկ 1966 թվականինը՝ ավելի թույլ է եղել: Այս առումով մենք, իհարկե, պետք է վերլուծենք փլուզված հատվածների ինժեներական խնդիրները»,- ասել է վարչապետը: Իր հերթին, Գնել Սանոսյանը նշել է, որ պետք է ընդհանուր վերանայել և գետերի հուներում իրականացնել մաքրման, ինչպես նաև ափապաշտպան և ամրակայման աշխատանքներ: Տեղեկացվել է նաև, որ հեղեղումների հետևանքով փլուզվել են նաև տներ և այլ օբյեկտներ: Վարչապետը նաև հետաքրքրվել է, թե ինչպե՞ս են իրականացվելու ավերված հատվածների վերականգնում, վերականգնման կոնկրետ պլան կա՞, ընդհանրապես՝ հաշվարկ կա՞, թե քանի կիլոմետր է ավերվել ամբողջովին և քանի կիլոմետր ճանապարհ է, որ մասնակի է վնասվել: «Միգուցե, կիլոմետրերով մեծ չեն՝ 20 մետր, 50 մետր հատվածներ են վնասված, բայց հատկապես Մ6 ճանապարհը շատ վնասվածքներ ունի՝ հաշվի առնելով, որ 3-4 հատվածներում ամբողջ ճանապարհը չկա: Ուստի ծավալներն էլ են մեծ լինելու: Ավելի հեշտ կլինի վերականգնել Մ4 ճանապարհի վնասված հատվածները՝ հաշվի առնելով, որ մասնակի են վնասումները»,- զեկուցել է ՏԿԵ նախարար Գնել Սանոսյանը և հավելել, որ Մ6 ճանապարհին իրականացվող աշխատանքները երկար ժամանակ և ռեսուրս կպահանջեն: Վարչապետը հանձնարարել է Մ6 ճանապարհի վերականգնման հետ կապված նույնպես հրատապության սկզբունքով գործել: Հետաքրքրվելով կտրված գյուղերի հետ կապված վիճակով՝ վարչապետը հանձնարարել է ուղղաթիռներով ապրանքների մատակարարումներ ապահովել: Նիկոլ Փաշինյանը հանձնարարել է կարճաժամկետ կարիքները գույքագրել և հրատապության ռեժիմով իրականացնել, ինչպես նաև միջնաժամկետ և երկարաժամկետ կարիքների գույքագրում իրականացնել: «Բայց ընդհանուր առմամբ, հիմա կարևոր է, որպեսզի կարողանանք վնասների օբյեկտիվ հաշվարկ իրականացնել»,-հավելել է Նիկոլ Փաշինյանը: Գնել Սանոսյանի զեկուցմամբ, բնակավայր առ բնակավայր կամ ճամփեզրին առկա շենք-շինությունների վերաբերյալ տեղեկատվություն է հավաքագրվում: Նիստի ընթացքում կարևորվել է նաև միջազգային աջակցությունն՝ առկա խնդիրների լուծման գործում: Ամփոփելով՝ կառավարության ղեկավարը շնորհակալություն է հայտնել կատարված օպերատիվ աշխատանքի համար և հավելել. «Ըստ էության, ես երեկ բոլոր տեղերում եղել եմ, տեսա, որ մեր ծառայությունները, մարմինները՝ տեղական ինքնակառավարման մարմինները, մարզպետարանները, փրկարար ծառայությունն օպերատիվ ձևով արձագանքել են, աշխատել են: Քաղաքացիների հետ շփվելուց էլ ասացի, ու իրենք էլ կիսեցին այդ տեսակետը, որ այս աղետի վնասները և հետևանքները կարող էին շատ ավելի ծանր լինել, բայց նաև օպերատիվ աշխատանքը, որ ուշ երեկոյից, կեսգիշերից բոլոր մարմինները ճշգրիտ ժամանակին արձագանքել են, մեզ հնարավորություն է տվել, որպեսզի հնարավորինս մեղմվի այն վնասը, որ աղետը կարող էր տալ: Հիմա, այո, պետք է կենտրոնանանք, ինչպես պարոն Սանոսյան, երեկ հանձնարարեցի, երեք շերտի բաժանենք՝ կարճաժամկետ կարիքներ՝ արագ արձագանք, միջնաժամկետ կարիքներ և երկարաժամկետ: Պետք է հետևություններ անենք նաև մեր ճանապարհաշինական, քաղաքաշինական ստանդարտների մեջ, եթե ինչ-որ վերանայումներ պետք է անենք՝ այս աղետի հետևանքները վերլուծելով, այս աշխատանքն էլ անպայման պետք է արվի: Իհարկե, օպերատիվ շտաբը պետք է դառնա այն կենտրոնը, որտեղ տեղեկատվությունը կենտրոնանում է և համապատասխան ձևով արդեն ձեր առաջարկներով նաև հանձնարարականներ կտրվեն, որպեսզի այդ բոլոր ուղղություններով մենք շարունակենք նաև երկարաժամկետ աշխատանքը»: Հեղեղումների հետևանքով ներկայում զոհերի թիվը 4 է:

16:34 - 27 մայիսի, 2024