ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Ուկրաինայի ԶՈՒ ԳՇ պետն ու ՆԱՏՕ–ի ռազմական կոմիտեի նախագահը քննարկել են Դոնբասում առկա իրավիճակը |tert.am|

tert.am: Ուկրաինայի զինված ուժերի գլխավոր շտաբի պետ Ռուսլան Խոմչակը ՆԱՏՕ-ի ռազմական կոմիտեի նախագահ, օդուժի գլխավոր մարշալ Ստյուարտ Պիչի հետ հեռախոսազրույցի ընթացքում քննարկել է Դոնբասում առկա իրավիճակը, հայտնում է «Իզվեստիա» պարբերականը՝ հղում տալով Ուկրաինայի զինված ուժերի գլխավոր շտաբի մամուլի ծառայության կողմից գերատեսչության պաշտոնական կայքում տեղադրված հայտարարությանը: Նշվում է, որ Խոմչակը Պիչին տեղեկացրել է «Միացյալ ուժեր»-ի գործունեության տարածքում առկա իրավիճակի մասին: Բացի այդ, զրույցի ընթացքում կողմերն ուշադրություն են դարձրել Ուկրաինայի և ՆԱՏՕ-ի միջև ռազմական համագործակցության հետագա զարգացմանը: Գլխավոր շտաբի պետը նաև շնորհակալություն է հայտնել ՆԱՏՕ-ին՝ Ուկրաինային աջակցելու համար, և նշել, որ երկրի զինված ուժերի և դաշինքի միջև առկա երկխոսությունը պահպանում է իր դրական զարգացումը: Մարտի 11-ին Ուկրաինայի Եվրոպական և եվրաատլանտյան ինտեգրման հարցերով փոխվարչապետ Օլգա Ստեֆանիշինան՝ Եվրոպայում ՆԱՏՕ-ի ցամաքային զորքերի հրամանատար, գեներալ-լեյտենանտ Ռոջեր Քլոթիի հետ հանդիպման ժամանակ ասել է, թե Կիևն ակնկալում է, որ Ուկրաինայի ներկայացուցիչները, ընդլայնվելու հնարավորություններ ունեցող գործընկերության շրջանակներում, պարտականություններ կստանձնեն դաշինքի շտաբներում, հրամանատարական կառույցներում և ստորաբաժանումներում: Ուկրաինայի զինված ուժերի ցամաքային զորքերի հրամանատար Ալեքսանդր Սիրսկին ասել է, որ պատվիրակության այցը ցույց է տալիս, որ ՆԱՏՕ-ն Ուկրաինային ընկալում է որպես ռազմավարական գործընկեր:

11:33 - 13 մարտի, 2021

ԵՄ-ն կես տարով երկարացրել է պատժամիջոցները ՌԴ-ի և Ուկրաինայի քաղաքացիների և կազմակերպությունների նկատմամբ |tert.am|

tert.am: Եվրամիությունը կես տարով երկարացրել է անձնական պատժամիջոցները ռուս և ուկրաինացի անհատների և այդ երկրների կազմակերպությունների նկատմամբ` «Ուկրաինայի ինքնիշխանությունը խաթարելու համար»: Այս մասին ասվում է մարտի 12-ին հրապարակված ԵՄ պաշտոնական հայտարարության մեջ, գրում է «Իզվեստիան»: Որոշումն ընդունվել է Ռուսաստանի և Ուկրաինայի 177 քաղաքացու և 48 իրավաբանական անձի նկատմամբ: Գործող ցուցակում փոփոխություններ չեն կատարվել:

19:27 - 12 մարտի, 2021

Զախարովան Ուկրաինային զգուշացրել է զերծ մնալ Դոնբասում ուժային սցենարի իրականացումից |tert.am|

tert.am: Ուկրաինան Մոսկվային ուղղված մեղադրանքներով «նախանձելի հաճախականությամբ» քողարկում է իր անգործությունը Դոնբասում: Ինչպես փոխանցում է «Կոմերսանտ»-ը, նման կարծիք է հայտնել ՌԴ ԱԳՆ պաշտոնական ներկայացուցիչ Մարիա Զախարովան:«Ուկրաինայի պաշտոնական դեմքերը նախանձելի հաճախականությամբ, հատկապես վերջին շրջանում, քողարկում են իրենց անգործությունը և ակնհայտորեն խախտում են երկրի արևելքում իրավիճակի կարգավորմանն ուղղված պայմանավորվածությունները՝ Ռուսաստանի հասցեին մեղադրանքներ հնչեցնելով և մեզ վրա բարդելով այն հարցի պատասխանատվությունը, որ Ուկրաինան գործանականում փակուղի է մտցրել բանակցային գործընթացը»,- ասել է Զախարովան՝ ելույթ ունենալով ամենաշաբաթյա ճեպազրույցի ժամանակ:Դիվանագետն Ուկրաինային կոչ է արել զերծ մնալ Դոնբասում իրավիճակի հետագա էսկալացիայից:

15:01 - 12 մարտի, 2021

Զախարովան վտանգավոր չի համարում Ադրբեջանի զինված ուժերի զորավարժությունները տարածաշրջանում |1lurer.am|

1lurer.am: Ադրբեջանի զինված ուժերի օպերատիվ-մարտավարական զորավարժությունները, որոնք անցկացվելու են մարտի 15-18-ը, կրում են պլանային բնույթ և ռիսկեր չեն պարունակում տարածաշրջանում կայունության և անվտանգության համար: Այս մասին ճեպազրույցում ասել է Ռուսաստանի ԱԳՆ պաշտոնական ներկայացուցիչ Մարիա Զախարովան: «Սովորաբար զորավարժություններ անցկացնում են Հարավային Կովկասի բոլոր պետությունները, դա արվում է կանոնավոր կերպով, համապատասխան տեղեկությունները նախապես հաղորդվում են շահագրգիռ կողմերին: Մեր տեղեկություններով` այդ զորավարժությունները, ինչպես ասացի, պլանային բնույթ են կրում՝ ուղղված զորքերի մարտական պատրաստվածության կատարելագործմանը և տարածաշրջանում կայունության և անվտանգության համար ռիսկեր չեն ստեղծելում»,- ասել է դիվանագետը: Չորեքշաբթի Ադրբեջանի պաշտպանության նախարարության մամուլի ծառայությունը հայտարարեց առաջիկա զորավարժությունների մասին, որոնց մասնակցելու է 10,000 զինծառայող:

14:12 - 12 մարտի, 2021

Արցախում ռուս խաղաղապահների համար կառուցվել է 9-րդ բլոկ-մոդուլային ավանը |tert.am|

tert.am: Ռուսաստանի ՊՆ նախարարության նյութատեխնիկական ապահովման մասնագետներն Արցախում կառուցել են 9-րդ բլոկ-մոդուլային ավանը․ այն գտնվում է Ասկերանում և նախատեսված է 60 ռուս խաղաղապահների համար, հաղորդում է ՌԴ ՊՆ-ն։ Ինչպես նշում է գերատեսչությունը, բլոկ-մոդուլային ավանները կառուցվում են ռուսական խաղաղապահ զորախմբի ռազմական անձնակազմի տեղակայման պայմանները բարելավելու նպատակով։ Բլոկ-մոդուլային ավանները լիարժեք ինքնավար օբյեկտներ են, որոնք հագեցած են անհրաժեշտ բոլոր պայմաններով՝ էլեկտրաէներգիայով, ջրամատակարարմամաբ, ջրահեռացման համակարգով, ջեռուցմաբ և սանհանգույցներով: Զինվորականների համար տեղադրված են մահճակալներ, պահարաններ, խոհանոցի կահույք, սեղաններ, աթոռներ, սանհանգույց, էլեկտրական վառարաններ, սառնարաններ, լվացքի մեքենաներ, միկրոալիքային վառարաններ, հեռուստացույցներ, օդորակիչներ, կաթսաներ, ասված է ՌԴ ՊՆ-ի հաղորդագրությունում։

09:41 - 12 մարտի, 2021

2020-ը Երկրորդ աշխարհամարտից ի վեր համաշխարհային տնտեսության համար ամենավատ տարին էր. Պուտին |tert.am|

tert.am: 2020 թվականը համավարակի պատճառով դարձել է Երկրորդ համաշխարհային պատերազմից հետո համաշխարհային տնտեսության համար ամենավատ տարին: Այս մասին հայտարարել է ՌԴ նախագահ Վլադիմիր Պուտինը, գրում է «ՌԻԱ Նովոստի» գործակալությունը:«Կնշեմ, որ անցյալ տարին համաշխարհային տնտեսության համար ամենադժվարն էր Երկրորդ համաշխարհային պատերազմի ավարտից ի վեր»,-ասել է Պուտինը ներդրումային ակտիվությունը մեծացնելու միջոցառումների վերաբերյալ հանդիպման ժամանակ:Մոլորակի ՀՆԱ-ն 2020 թվականին նվազել է 3,5 տոկոսով, նշել է Ռուսաստանի առաջնորդը:«Պատճառներն օբյեկտիվ են: Սա առաջին հերթին համավարակաբանական իրավիճակն է, հարկադիր սահմանափակումների ներդրումը, որոնք բացասաբար են անդրադարձել բիզնեսի վրա, և ընդհանրապես տնտեսական դինամիկայի վրա»,-ասել է Պուտինը:

16:31 - 11 մարտի, 2021

Խաղաղապահներն ադրբեջանական 6 ավտոշարասյուն են ուղեկցել Լաչինի միջանցքով |hetq.am|

hetq.am: Արցախում տեղակայված ռուսական խաղաղապահ զորախումբը մարտի 10-ին Ադրբեջանի զինված ուժերի 6 ավտոշարասյուն է ուղեկցել Լաչինի միջանցքով հյուսիսային և հարավային ուղղություններում և Շուշի-Ջիվանի երթուղով։ Այս մասին ասվում է Ռուսաստանի Դաշնության պաշտպանության նախարարության (ՌԴ ՊՆ) հրապարակած տեղեկագրում։ Արցախում տեղակայված ռուսական խաղաղապահ զորախմբի զինծառայողները 27 դիտակետերում իրականացնում են իրավիճակի վերահսկում և հրադադարի ռեժիմի պահպանման մոնիտորինգ։ 2020թ. նոյեմբերի 23-ից մինչև օրս խաղաղապահ զորախմբի ինժեներասակրավորական խմբերը չպայթած զինամթերքից մաքրել են 1623 հեկտար տարածք, 508 կմ ճանապարհ, 1577 բնակելի շինություն, այդ թվում՝ սոցիալական նշանակության 30 օբյեկտ։ Հայնաբերվել և վնասազերծվել է 25 154 պայթյունավտանգ առարկա։

22:56 - 10 մարտի, 2021

Հանդիպել են Լավրովն ու Չավուշօղլուն |tert.am|

tert.am: Չորեքշաբթի երեկոյան Դոհայի օդանավակայանում հանդիպել են Ռուսաստանի Դաշնության և Թուրքիայի արտաքին գործերի նախարարներ Սերգեյ Լավրովը և Մևլութ Չավուշօղլուն: Ռուս նախարարը առաջինն է ժամանել Էր-Ռիադից, իսկ թուրքը՝ Բիշքեկից: Այս մասին գրում է «Կոմերսանտ» պարբերականը: Սկսելով բանակցությունները՝ Սերգեյ Լավրովը նշել է, որ հենց այսօր երկու երկրների նախագահները տեսակոնֆերանսի ռեժիմով մասնակցել են թուրքական «Ակքույու» ԱԷԿ-ի երրորդ բլոկի հիմքի համար բետոնի լցման արարողությանը: Մևլութ Չավուշօղլուն ցավով նշել է, որ թռիչքի պատճառով իրեն հաջողվել է դիտել հեռարձակման միայն մի փոքրիկ հատվածը: Հինգշաբթի օրը երկու նախարարներն էլ կհանդիպեն Կատարի իրենց գործընկերոջ ՝ Մոհամմադ բին Աբդուրահման Ալ Թանիի հետ, և եռակողմ բանակցություններ կանցկացնեն: Հանդիպման հիմնական թեման կլինի Սիրիան: Դոհան վաղուց Մոսկվային առաջարկել է այս ձևաչափը, որը կարող է լրացնել Սիրիայի հարցով այլ հարթակներին:

22:26 - 10 մարտի, 2021

Մենք չենք ընդունում Թուրքիայի դիրքորոշումը Ղրիմի հարցում. Դմիտրի Պեսկով |1lurer.am|

1lurer.am: ՌԴ նախագահի մամուլի քարտուղար Դմիտրի Պեսկովը հայտարարել է, որ Կրեմլը վստահ է, որ Թուրքիան ժամանակի ընթացքում կհասկանա Ղրիմի հարցում Ռուսաստանի դիրքորոշման ճիշտ լինելը: Այդ մասին տեղեկացնում Է ՏԱՍՍ գործակալությունը: Ղրիմի հարցը Կրեմլի ներկայացուցիչն անվանել է «թեմա, որը դասվում է ՌԴ-ի և Թուրքիայի տարաձայնությունների շարքին»: «Մենք չենք ընդունում Ղրիմի հարցում Թուրքիայի դիրքորոշումը, դրա հետ մեկտեղ մենք համբերատար շարունակում ենք պարզաբանել մեր դիրքորոշումը»,- ընդգծել է Պեսկովը: Կրեմլի ներկայացուցիչը վստահություն է հայտնել, որ թուրք գործընկերները վաղ թե ուշ կհասկանան Ռուսաստանի Դաշնության դիրքորոշման հիմնավորվածությունը: Ավելի վաղ թուրքական իշխանությունները հայտարարել էին, որ Անկարան չի ճանաչում Ղրիմի միավորումը Ռուսաստանին:

20:30 - 10 մարտի, 2021

ՌԴ և ՀՀ պաշտպանության նախարարները հեռախոսազրույց են ունեցել |shantnews.am|

shantnews.am: ՌԴ պաշտպանության նախարար, բանակի գեներալ Սերգեյ Շոյգուն հեռախոսազրույց է ունեցել ՀՀ պաշտպանության նախարար Վաղարշակ Հարությունյանի հետ: Այս մասին հայտնում է ՌԴ պաշտպանության նախարարությունը։ «Զրույցի ընթացքում քննարկել են երկկողմ ռազմական և ռազմատեխնիկական համագործակցության հարցեր, իրավիճակը Լեռնային Ղարաբաղի այն տարածքներում, որտեղ ռուս խաղաղապահ զորակազմն իրականացնում է հսկողություն, քննարկել են նաև փոխադարձ հետաքրքրություն ներկայացնող այլ հարցեր»,- նշվում է գերատեսչության հաղորդագրությունում:

19:33 - 10 մարտի, 2021

ՌԴ փոխարտգործնախարարը ԵԱՀԿ ներկայացուցչի հետ քննարկել է ԼՂ հիմնախնդիրը |tert.am|

tert.am: Ռուսաստանի ԱԳ նախարարի առաջին տեղեկալ Վլադիմիր Տիտովը չորեքշաբթի քննարկում է ունեցել ԵԱՀԿ գործող նախագահի` Անդրկովկասի հարցերով հատուկ ներկայացուցիչ Անիկա Սյոդերի հետ:Ինչպես հաղորդում է ՌԴ ԱԳՆ մամուլի ծառայությունը, կողմերը քննարկել են տարածաշրջանում տիրող իրավիճակը, այդ թվում՝ Լեռնային Ղարաբաղի հիմնախնդիրը:

17:43 - 10 մարտի, 2021

Ցանկանում ենք, որ Հայաստանում ստեղծված իրավիճակը շուտափույթ կարգավորվի. ՌԴ փոխարտգործնախարար |tert.am|

tert.am: Հայաստանում ստեղծված իրավիճակը երկրի ներքին գործն է, Ռուսաստանը շահագրգռված է, որ իրավիճակն այնտեղ հնարավորինս շուտ կարգավորվի: «ՏԱՍՍ» գործակալության փոխանցմամբ՝ այս մասին այսօր հայտարարել է ՌԴ փոխարտգործնախարար Անդրեյ Ռուդենկոն:«Դիտարկում ենք դա որպես Հայաստանի ներքին գործը: Մենք չենք միջամտում գործընթացներին, որոնք այնտեղ տեղի են ունենում, և չենք սատարում որևէ մեկին: Ցանկանում ենք, որ իրավիճակը շուտափույթ կարգավորվի, քանի որ դա բխում է մեր բոլորի շահերից»,- ասել է Ռուդենկոն:

13:43 - 10 մարտի, 2021

Խմբակցությունն արձանագրել է, որ զինվորականների կողմից քաղաքականությանը միջամտությունը եղել է անընդունելի. Մակունց |1lurer.am|

1lurer.am: «Իմ քայլը» խմբակցության ղեկավար Լիլիթ Մակունցը խորհրդարանում՝ լրագրողների հետ ճեպազրույցի ժամանակ, անդրադառնալով ԳՇ պետի՝ զբաղեցրած պաշտոնից ազատվելու փաստին, ասաց, որ խմբակցությունն արձանագրել է, որ զինվորականների կողմից քաղաքականությանը միջամտությունը եղել է անընդունելի: «Պատահական չէ նաև, որ աշխարհի տարբեր երկրներից այդ հայտարարության հետ կապված եղավ արձագանք: Խոսքը ԵԽԽՎ-ի, ՄԱԿ-ի, ԱՄՆ-ի, Ռուսաստանի և այլ երկրների մասին է»,- ասաց Մակունցը: Լրագրողներից մեկի արձագանքին ի պատասխան, թե Թուրքիան էլ է հայտարարություն արել, նշեց, որ անընդհատ պետք չէ բերել մեր հակառակորդ և թշնամի երկրի ղեկավար անձանց ելույթները, որովհետև դրանով որևէ լավություն մեր երկրին չենք անում:

13:40 - 10 մարտի, 2021

ՌԴ խաղաղապահները Լեռնային Ղարաբաղում ականազերծել են շուրջ 1623 հա տարածք |armenpress.am|

armenpress.am: Ռուսաստանի Դաշնության պաշտպանության նախարարության միջազգային ականազերծման կենտրոնի մասնագետները շարունակում են Լեռնային Ղարաբաղում ականազերծման և պայթյունավտանգ իրերի հայտնաբերման ու վնասազերծման աշխատանքները: Այս մասին հայտնում է ՌԴ պաշտպանության նախարարության պաշտոնական կայքը: «Ընդհանուր առմամբ, 2020 թ. նոյեմբերի 23-ից չպայթած զինամթերքից մաքրվել է 1 623 հա տարածք, 508 կմ ճանապարհ, 1 577 շենք-շինություն, այդ թվում՝ 30 սոցիալական նշանակության օբյեկտ, հայտնաբերվել և վնասազերծվել է 25 154 պայթունավտանգ առարկա»,- ասված է հաղորդագրությունում:

21:57 - 09 մարտի, 2021

Դոհայում նախատեսվում է Լավրով-Չավուշօղլու հանդիպում |hetq.am|

hetq.am: Ռուսաստանի արտաքին գործերի նախարար Սերգեյ Լավրովը և Թուրքիայի արտաքին գործերի նախարար Մևլյութ Չավուշօղլուն կհանդիպեն չորեքշաբթի օրը՝ մարտի 10-ին, Դոհայում։ Այդ մասին գրում է TACC գործակալությունը։ Հանդիպումը կկայանա Մերձավոր Արևելքի երկրներում Լավրովի այցի շրջանակներում։ Դեռևս հայտնի չէ, թե ինչ հարցեր են ներառված հանդիպման օրակարգում։ Քաթարում Լավրովին կընդունի էմիր Թամիմ բեն Համադ Ալ Թանին։ Բացի այդ, Լավրովը բանակցություններ կվարի նաև Քաթարի արտաքին գործերի նախարար Մուհամեդ բեն Աբդել Ռահման Ալ Թանիի հետ։

20:07 - 09 մարտի, 2021

Անկարայի դատարանը վճիռներ է կայացրել Ռուսաստանի դեսպանի սպանության գործով |azatutyun.am|

azatutyun.am: Անկարայի առանձնապես ծանր հանցագործությունների գործերով դատարանը Թուրքիայում Ռուսաստանի Դաշնության արտակարգ և լիազոր դեսպան Անդրեյ Կարլովի սպանության գործով հինգ մեղադրյալների դատապարտել է ցմահ ազատազրկման: Դեսպան Կարլովը սպանվել է 2016 թվականի դեկտեմբերի 19-ին Անկարայի Արդիական արվեստի թանգարանում ելույթ ունենալու պահին: Թուրք ոստիկանները տեղում սպանել են դեսպանի վրա կրակ արձակած նախկին ոստիկան Մևլութ Ալթինթաշին: Դատարանը Սալիհ Յիլմազին մեղավոր է ճանաչել դեսպանին սպանելու հրահանգ արձակելու, իսկ Շահին Սեհութին մեղավոր է ճանաչել մարդասպանի գործողությունները ղեկավարելու համար: Երկու ամբաստանյալները դատապարտվել են երկուական ցմահ ազատազրկման: Վեց ամբաստանյալ անմեղ է ճանաչվել, ևս ութ ամբաստանյալ դատապարտվել է 8 տարվա ազատազրկման:

20:06 - 09 մարտի, 2021