Բելառուս

Լուկաշենկոն պահանջել է աշխատանքից հեռացնել այն ուսուցիչներին, որոնք չեն ցանկանում դասավանդել պետական գաղափարախոսությանը համապատասխան |tert.am|

tert.am: Բելառուսի նախագահ Ալեքսանդր Լուկաշենկոն պահանջել է աշխատանքից հեռացնել այն ուսուցիչներին, որոնք չեն ցանկանում դասավանդել պետական գաղափարախոսությանը համապատասխան։ Այս մասին նա հայտարարել է օգոստոսի 24-ին կրթության նախարար Իգոր Կարպենկոյի հետ հանդիպման ժամանակ, հայտնում է «Բելտա» պետական լրատվական գործակալությունը։ Իր խոսքում շեշտելով Բելառուսում պետական կրթություն, պետական դպրոցներ, պետական գաղափարախոսություն տերմինները՝ Լուկաշենկոն հայտարարել է․ «Եվ նրանք, ովքեր ցանկանում են հետևել այս սկզբունքներին, խնդրեմ՝ գնացեք ուսուցանեք, ուսուցանեք, աշխատեք։ Նրանք, ովքեր չեն ուզում, ուրեմն դպրոցում չպետք է լինեն։ Այս մասին պետք է ասվի ուղիղ, անկեղծ և ազնիվ կերպով»։ Նա նաև պահանջել է պաշտպանել ուսուցիչներին։ «Պաշտպանեք ուսուցիչներին ամեն տեսակի հարձակումներից։ Մենք դա արդեն սկսել ենք անել, ընդ որում՝ շատ ակտիվորեն և շատ խստորեն կասեցնում ենք բոլոր տեսակի հարձակումներն ուսուցիչների, բժիշկների նկատմամբ»,-ասել է նա։

15:56 - 24 օգոստոսի, 2020

Մինսկում ձերբակալել են ընդդիմության համակարգող խորհրդի երկու անդամների |azatutyun.am|

azatutyun.am: Երկուշաբթի օրը Մինսկում ձերբակալվել են Ընդդիմության համակարգող խորհրդի անդամներ Օլգա Կովալկովան և Սերգեյ Դիլևսկին: Նրանց մեղադրում են չարտոնված զանգվածային միջոցառումներ կազմակերպելու մեջ: Իշխանության խաղաղ փոխանցման հարցով Ընդդիմության համակարգող խորհրդի դեմ ավելի վաղ բելառուսական իրավապահները քրեական գործ են հարուցել` «պետական իշխանության զավթման, ազգային անվտանգությանը վնաս պատճառելու փաստերով»։ Խորհրդին բացի քաղաքական գործիչներից, քաղաքացիական ակտիվիստներից, անդամակցում է նաև գրականության Նոբելյան մրցանակակիր Սվետլանա Ալեքսիևիչը:

14:36 - 24 օգոստոսի, 2020

Բելառուսում մահացած են գտել բողոքի ակցիաների ժամանակ անհետացած երիտասարդին. նրան փնտրել են 10 օր. meduza.io |tert.am|

tert.am: Բելառուսում մահացած են գտել 28-ամյա Նիկիտա Կրիվցովին, որը կորած էր համարվում օգոստոսի 12-ից՝ երկրում բողոքի ակցիաների 4-րդ օրվանից: Կրիվցովի մահվան մասին հայտնել է «Հրեշտակ» որոնողափրկարարական ջոկատը, գրում է meduza.io-ն: Ինչպես Onliner.by-ին պատմել է Մինսկի ոստիկանության մամուլի խոսնակ Նատալյա Գանուսևիչը, երիտասարդի մարմինը հայտնաբերվել է օգոստոսի 22-ին, անտառում ծառից կախված վիճակում: Կրիվցովի կինը պատմել է, որ չգիտի՝ մասնակցել է նա արդյոք բողոքի ցույցերին և ձերբակալվել է արդյոք: «Նա օգոստոսի 12-ից դադարել է կապի դուրս գալ, նա անհետացել էր: Իսկ այսօր մեզ զանգահարեցին և ասացին, որ նրան կախված են գտել»,- պատմել է Կրիվցովի կինը: Սկզբնապես հաղորդվել էր, որ նրա մարմնի վրա հայտնաբերվել են բռնության հետքեր: Սակայն որոնողափրկարարական ջոկատի ղեկավար Սերգեյ Կովգանի խոսքով՝ ոստիկանությունը հայտնել է զոհի ընտանիքին, որ նրա մարմնի վրա տեսանելի բռնության հետքեր չկան: Կրիվցովի կինը դեռ չի տեսել ամուսնու մարմինը: Միևնույն ժամանակ, նա վստահություն է հայտնել, որ իր ամուսինը չէր կարող ինքնասպան լինել:

13:16 - 24 օգոստոսի, 2020

Բելառուսի ընդդիմությունը հայտնել է սահմանադրական փոփոխությունների հարցով հանրաքվեի անցկացման նախապատրաստական աշխատանքների մասին |tert.am|

tert.am: Բելառուսի ընդդիմության ստեղծած Համակարգող խորհուրդը հայտարարել է սահմանադրական փոփոխությունների հարցով հանրաքվեի անցկացման նախապատրաստական աշխատանքների մեկնարկի մասին, այս մասին ֆեյսբուքյան իր էջում հայտնել է նախագահի նախկին թեկնածու Սվետլանա Տիխանովսկայայի վստահված անձ Օլգա Կովալկովան։ Նրա խոսքով՝ «նախկին նախագահի ձեռքում իշխանության պահպանումը ձեռնարկությունների հսկայական վնասների կհանգեցնի և կազդի ազգի բարօրության վրա»։ «Ասում է մեզ, որ Ռուսաստանից, Չինաստանից, Ուկրաինայից աշխատավորներ կբերի, բայց սա մե՛ր երկիրն է։ Մենք Բելառուսի ժողովուրդն ենք, և մեզ միայն պետք է, որ նա հեռանա։ Հայտարարում ենք, որ գործում ենք միայն Սահմանադրության շրջանակում։ Կոչ ենք անում երկրի բոլոր քաղաքացիներին Ներկայացուցիչների պալատի պատգամավորների և տեղական խորհուրդների պատգամավորների լիազորությունների զրոյացման գործընթաց սկսել։ Սկսում ենք Սահմանադրության մեջ փոփոխությունների վերաբերյալ հանրաքվեի նախապատրաստական աշխատանքները»,-գրել է Կովալկովան։ Երեկ, տարբեր գնահատականների համաձայն, 100-150 հազար ցուցարարներ հավաքվել են Անկախության հրապարակում, որտեղից շարժվել են «Պլանետա» հյուրանոց, որը տեղակայված է «Մինսկը՝ հերոս քաղաք» հուշակոթողի մոտակայքում: Հարյուրավոր զինվորականներ շրջապատել են «Մինսկը՝ հերոս քաղաք» հուշակոթողի տարածքը:

11:39 - 24 օգոստոսի, 2020

Մինսկում իշխանությունների պահանջով նվազեցրել են շարժական ինտերնետի արագությունը |tert.am|

tert.am: Բելառուսի բջջային օպերատորներից մեկը՝ A1 ընկերությունը, պետական իշխանության մարմինների պահանջով Մինսկի որոշ շրջաններում նվազեցրել է իր 3G ցանցի թողունակությունը: Այս մասին հայտնել է կապի A1 օպերատորի մամուլի ծառայությունը։ «Ափսոսանքով հայտնում ենք, որ պետական մարմինների պահանջով Ազգային անվտանգության ապահովման կապակցությամբ Մինսկ քաղաքի որոշ շրջանների տարածքում էականորեն նվազեցվել է A1 3G ցանցի թողունակությունը։ Այս պահանջի կատարումը հանգեցնում է տվյալների փոխանցման ծառայության որակի վատթարացմանը»,- ասված է մեկնաբանության մեջ: Տեղական ԶԼՄ-ների հաղորդմամբ՝ համացանցի աշխատանքի զգալի խափանումներ են նկատվել կիրակի՝ տեղական ժամանակով ժամը 18:35-ի սահմաններում, երբ ցուցարարների զգալի մասը մոտեցել է Անկախության հրապարակին։

10:04 - 24 օգոստոսի, 2020

Լիտվայում կենդանի շղթա էին կազմել՝ ի աջակցություն Բելառուսի

Կիրակի օրը՝ օգոստոսի 23-ին, Լիտվայի բնակիչները կենդանի շղթա էին կազմել՝ ի աջակցություն Բելառուսի։ Հայտնում է rbc.ru-ն։ Ակցիային, որը կոչվում էր «Ազատության ուղի», մասնակցել է մոտ 50 հազար մարդ, որոնք 32 կմ երկարությամբ շղթա էին կազմել Վիլնյուսից մինչև Բելառուսի հետ սահմանին գտնվող Մյադինինկայա բնակավայրը։ Ակցիայի մասնակիցների մեջ էին նաև Լիտվայի նախագահ Գիտանաս Նաուսեդան, նախկին նախագահներ Վալդաս Ադամկուսը ու Դալյա Գրիբաուսկայտեն, ինչպես նաև սեյմի նախագահ Վիկտորաս Պրանցկետիսը, նախարարներ, պատգամավորներ ու քաղաքագլուխներ։ Թարգմանությունը՝ Լիլիթ Հարությունյանի

09:19 - 24 օգոստոսի, 2020

Լուկաշենկոն ուղղաթիռով ժամանել է Անկախության պալատ․ նա ուղղաթիռից դուրս է եկել՝ ինքնաձիգը ձեռքին

Ալեքսանդր Լուկաշենկոն ուղղաթիռով ժամանել է Մինսկի Անկախության պալատ, որի մոտ հավաքվել էին ցուցարարները, որոնք այսօր երթ էին կազմակերպել քաղաքի կենտրոնում: Այս մասին հայտնում է meduza.io-ն։ Դատելով «Пул Первого» տելեգրամյան ալիքի տեսանյութից (այն Լուկաշենկոյի մամուլի ծառայության ալիքն է)՝ նա ուղղաթիռից դուրս է եկել՝ ինքնաձիգը ձեռքին: «Նախագահը կրում է զրահաբաճկոն, ձեռքին ինքնաձիգ է», - հայտնել է մամուլի ծառայությունը: Անկախության պալատը Լուկաշենկոյի նստավայրն է: Ոստիկանությունն այսօր արգելափակել էր Հաղթանակի պողոտան, որտեղ գտնվում է նստավայրը, որպեսզի կանխեր ցուցարարների զանգվածային երթը: Ակցիայի մասնակիցները կանգ էին առել ոստիկանական շղթայի առաջ. ցուցարարներից ոմանք ցրվել էին, ոմանք շարժվել էին հակառակ ուղղությամբ: Ավելի վաղ հայտնել էինք, որ Մինսկի Անկախության հրապարակում ավելի քան 100 հազար մարդ է հավաքվել։ Ցուցարարները պահանջում էին ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար, ինչպես նաև Ալքսանդր Լուկաշենկոյի հրաժարականը։ Լուսանկարը՝ Дождь-ի տելեգրամյան ալիքից։

21:54 - 23 օգոստոսի, 2020

Բելառուսում ցուցարարները պահանջում են ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար

Բելառուսի մայրաքաղաք Մինսկի Անկախության հրապարակում, Tut.by- ի և Euroradio-ի գնահատմամբ, ավելի քան 100 հազար մարդ է հավաքվել։ Այս մասին հայտնում է meduza.io-ն։ Ցուցարարները երթով առաջ են շարժվել, բայց նախագահ Լուկաշենկոյի նստավայրի մոտ նրանց ճանապարհը փակել են։ Այնուհետև ցուցարարները քաղաքի կենտրոնով քայլել են դեպի «Պլանետա» հյուրանոցը: Այստեղ տեղի ունեցած կարճ հանրահավաքից հետո նրանք գնացել են Պետական դրոշի հրապարակ: Բելառուսի քաղաքներում բնակիչները հավաքվում են կենտրոնական հրապարակներում և երթեր կազմակերպում: Գրոդնո քաղաքում կա ավելի քան 10 հազար ցուցարար: Nexta տելեգրամյան ալիքի փոխանցմամբ՝ ցուցարարները պահանջում են ազատել բոլոր ձերբակալվածներին և քաղբանտարկյալներին, դատել նրանց, ովքեր մեղավոր են խոշտանգումների և սպանությունների համար, ինչպես նաև Ալքսանդր Լուկաշենկոյի հրաժարականը։ Ավելի վաղ հայտնել էինք, որ Մինսկի Անկախության հրապարակում ցուցարարները կաթվածահար են արել տրանսպորտի աշխատանքը: Լուսանկարը՝ Nexta-ի։

19:29 - 23 օգոստոսի, 2020