Կանադա

Կանադան սահմանադրական միապետություն է, որը գտնվում է Հյուսիսային Ամերիկայում։ Կանադայի մայրաքաղաքը Օտտավան է։ Պետական լեզուներն են անգլերենն ու ֆրանսերենը:

Հայաստանի Հանրապետության եւ Կանադայի միջեւ դիվանագիտական հարաբերությունները հաստատվել են 1992թ. հունվարի 31-ին:

1995թ. հունվարին Հայաստանը դեսպանություն է բացել Կանադայում:

1997թ. Կանադան պատվո հյուպատոս է նշանակել Հայաստանում:

Երկրների խորհրդարաններում գործում են միջխորհրդարանական բարեկամության խմբեր:

Կանադայի խորհրդարանի հանձնաժողովում կքննարկվի Ադրբեջանի կողմից Լաչինի միջանցքի արգելափակումը |armenpress.am|

armenpress.am: Կանադայի խորհրդարանի արտաքին հարաբերությունների հանձնաժողովում այս շաբաթ լսումներ կկայանան Լաչինի միջանցքի արգելափակման վերաբերյալ: Այս մասին հայտնել է Կանադայի համայնքների պալատի անդամ Գարնեթ Ջենուիսը: «Կանադայի խորհրդարանի արտաքին հարաբերությունների հանձնաժողովի պահպանողական անդամներն աշխատում են այլ ընդդիմադիր կուսակցությունների հետ՝ շտապ լսումներ հրավիրելու Արցախի (Լեռնային Ղարաբաղի) Լաչինի միջանցքի շրջափակման վերաբերյալ»,- գրել է պատգամավորն Twitter-ի իր էջում: Գարնեթ Ջենուիսն իր գրառմանը կցել է մեկ այլ պատգամավորի՝ Ստեֆան Բերժերոնի գրառումը, ըստ որի՝ «Քվեբեկի դաշինք» կուսակցության անդամների նախաձեռնությամբ և պահպանողականների ու նոր դեմոկրատների աջակցությամբ Արտաքին հարաբերությունների հանձնաժողովում քննարկում տեղի կունենա «Ադրբեջանի կողմից Լեռնային Ղարաբաղը Հայաստանին կապող միջանցքի արգելափակման վերաբերյալ»:

10:57 - 16 հունվարի, 2023

Կանադան Ուկրաինային կցուցաբերի ձմռան համար անհրաժեշտ ամբողջ օգնությունը |azatutyun.am|

azatutyun.am: Կանադայի վարչապետ Ջասթին Թրյուդոն Ուկրաինայի նախագահ Վլադիմիր Զելենսկու հետ հեռախոսազրույցի ընթացքում խոստացել է ուկրաինացիներին ցուցաբերել ձմռան համար անհրաժեշտ ամբողջ օգնությունը։ «Մեր աջակցությունը Ուկրաինային և ուկրաինացիներին մնում է անփոփոխ: Ես դա պարզ ասացի նախագահ Զելենսկուն այսօր, երբ մենք խոսեցինք հեռախոսով, և ես հասկացրեցի նրան, որ մենք կհոգանք, որ նրանք ունենան այն ամենը, ինչ անհրաժեշտ է ձմռան համար՝ այնքան, որքան անհրաժեշտ կլինի», - գիշերը Թվիթերում գրել է Թրյուդոն։ Երեկոյան ուղերձում Վլադիմիր Զելենսկին շնորհակալություն է հայտնել Կանադայի իշխանություններին աջակցության համար և ասել, որ Թրյուդոյի հետ զրույցը չորրորդ միջազգային զանգն է, որ նա կատարել է տարվա սկզբից։ Ուկրաինայի նախագահն արդեն հասցրել է շփվել նաև Նիդերլանդների, Մեծ Բրիտանիայի և Նորվեգիայի վարչապետների հետ։

12:37 - 04 հունվարի, 2023

Բաքուն արձագանքել է Լաչինի միջանցքը բացելու՝ Կանադայի ԱԳՆ-ի հայտարարությանը |factor.am|

factor.am: Ադրբեջանի ԱԳՆ-ն պատասխանել է Կանադայի ԱԳՆ-ի՝ Լաչինի միջանցքը բացելու կոչին, այն որակելով որպես կողմնակալ։ Ադրբեջնական լրատվամիջոցները տարածել են գերատեսչության հաղորդագրությունը, որում ասված է․ «Կտրականապես մերժում ենք Կանադայի ԱԳՆ-ի կողմնակալ հայտարարությունը Լաչինի ճանապարհը բացելու կոչով։ Կանադան ավելի կլինի կլիներ՝ աջակցեր խաղաղության գործընթացին՝ կոչ անելով Հայաստանին դադարեցնել Լաչինի ճանապարհի «չարաշահումը անօրինական ռազմական և տնտեսական գործունեության համար», ներառյալ 2021 թվականին «Հայաստանում արտադրված ականների տեղափոխման և տեղադրման»»,-ասվում է Ադրբեջանի ԱԳՆ թվիթերյան գրառման մեջ։ Արդեն ութերորդ օրն է՝ Ադրբեջանը շարունակում է փակ պահել Արցախը Հայաստանին կապող միակ ճանապարհը: 1100 քաղաքացի, որից 270-ը անչափահաս, տուն վերադառնալու հնարավորություն չունի: Միջանցքը փակած ադրբեջանցիներն իրենց անվանում են անկախ բնապահպաններ, ճանապարհի հենց մեջտեղում վրաններ են տեղադրել։ Միջանցքը փակ է նաև շտապօգնության մեքենաների համար։ Հիվանդանոցները չեն ստանում անհրաժեշտ բժշկական ապրանքներ ու դեղորայք, մթերային խանութների դարակները կիսադատարկ են։ Ադրբեջանը դեկտեմբերի 13-ին խափանել էր նաեւ Արցախի գազամատակարարումը, որ օրեր անց վերականգնեց։

13:13 - 19 դեկտեմբերի, 2022

Մենք կոչ ենք անում Ադրբեջանի իշխանություններին վերաբացելու միջանցքը և ապահովելու ազատ տեղաշարժը․ Կանադայի ԱԳՆ

Կանադայի ԱԳՆ-ն անդրադարձել է Լաչինի միջանցքում ստեղծված իրադրությանը՝ ընդգծելով, որ ուշադրությամբ հետևում է միջանցքի փակմանը։ «Մենք կոչ ենք անում Ադրբեջանի իշխանություններին վերաբացելու միջանցքը և ապահովելու ազատ տեղաշարժը՝ հնարավոր հումանիտար հետևանքներից խուսափելու համար»,- նշված է կանադական գերատեսչության թվիթերյան գրառման մեջ։ Հիշեցնենք, որ արդեն չորրորդ օրն է, ինչ Ադրբեջանը շարունակում է արգելափակված պահել Արցախը Հայաստանին կապող միակ ճանապարհը։ Դեկտեմբերի 12-ի առավոտյան ժամը 10:30 -ից մի խումբ ադրբեջանցիներ` բնապահպանական պատճառաբանություններով, փակել են Ստեփանակերտ-Գորիս մայրուղու Շուշի-Քարին տակ հատվածը։ Հարյուրավոր քաղաքացիներ, այդ թվում`անչափահասներ, չեն կարողանում տուն վերադառնալ: Ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի տրանսպորտային կապը մայրաքաղաք Ստեփանակերտի հետ։ Ադրբեջանը դեկտեմբերի 13-ից դադարեցրել է նաև Արցախի Հանրապետության գազամատակարարումը:

10:38 - 15 դեկտեմբերի, 2022

Արարատ Միրզոյանը Կանադայի ԱԳ նախարարի հետ հանդիպմանն ընդգծել է Հայաստանի ինքնիշխան տարածքից ադրբեջանական զորքերի դուրսբերման կարևորությունը

Դեկտեմբերի 1-ին ԵԱՀԿ նախարարական համաժողովի շրջանակներում ՀՀ ԱԳ նախարար Արարատ Միրզոյանը հանդիպել է Կանադայի ԱԳ նախարար Մելանի Ժոլիին: Հայաստանի և Կանադայի ԱԳ նախարարները քննարկել են հայ-կանադական հարաբերությունների զարգացման հնարավորությունները: Այս առումով ընդգծվել է Երևանում դեսպանություն բացելու Կանադայի որոշումը։ Զրուցակիցները կարևորել են Հայաստանում ժողովրդավարական բարեփոխումների առաջմղման հարցում երկու կառավարությունների համագործակցության հետագա ամրապնդումը։ Անդրադառնալով Ադրբեջանի կողմից Հայաստանի Հանրապետության տարածքային ամբողջականության դեմ սանձազերծված ագրեսիային՝ նախարար Միրզոյանն ընդգծել է ՀՀ ինքնիշխան տարածքից ադրբեջանական զորքերի դուրսբերման կարևորությունը: ՀՀ ԱԳ նախարարը գործընկերոջն է ներկայացրել նաև Հայաստան-Ադրբեջան հարաբերությունների կարգավորման, Լեռնային Ղարաբաղի հիմնախնդրի շուրջ վերջին զարգացումները: Մելանի Ժոլին կարևորել է ՀՀ-ում ԵՄ դիտորդական առաքելության դերը տարածաշրջանում կայունության պահպանման հարցում և աջակցություն է հայտնել առաքելությանը։

15:49 - 02 դեկտեմբերի, 2022

Արարատ Միրզոյանը Էլիսոն ԼըՔլերի հետ հանդիպմանը ողջունել է Երևանում դեսպանություն բացելու Կանադայի կառավարության որոշումը

ՀՀ ԱԳ նախարար Արարատ Միրզոյանն այսօր ընդունել է ՀՀ-ում Կանադայի դեսպան Էլիսոն ԼըՔլերին (նստավայրը՝ Մոսկվա): Կողմերը կարևորել են ընդհանուր ժողովրդավարական արժեքների և փոխադարձ վստահության վրա հիմնված հայ-կանադական հարաբերությունների հետագա զարգացումը: Այս համատեքստում ՀՀ ԱԳ նախարարը ողջունել է Երևանում դեսպանություն բացելու Կանադայի կառավարության որոշումը և համոզմունք հայտնել, որ այդ քայլը նոր ազդակ կհաղորդի երկկողմ համագործակցությանը: Հաշվի առնելով, որ այս տարի նշվում է Հայաստանի և Կանադայի միջև դիվանագիտական հարաբերությունների հաստատման հոբելյանական 30-ամյակը, զրուցակիցները գոհունակությամբ արձանագրել են քաղաքական երկխոսության առկա մակարդակն ու միջպետական շփումների դինամիկան: Նշվել է Կանադայի կառավարության պատրաստակամությունը՝ աջակցելու Հայաստանում ժողովրդավարության ամրապնդմանը: Արարատ Միրզոյանը և Էլիսոն ԼըՔլերը կարևորել են հայ-կանադական առևտրատնտեսական կապերի ընդլայնումը: Հայկական կողմը ներկայացրել է ՀՀ տարածքային ամբողջականության և ինքնիշխանության նկատմամբ ադրբեջանական վերջին ագրեսիայի հետևանքները: Նախարար Միրզոյանն ընդգծել է, որ Ադրբեջանն իր առավելապաշտական դիրքորոշմամբ և ագրեսիվ գործողություններով խոչընդոտում է տարածաշրջանում խաղաղության և կայունության հաստատումը:

19:20 - 25 նոյեմբերի, 2022

Նիկոլ Փաշինյանը և Ջասթին Թրյուդոն քննարկել են հայ-կանադական հարաբերությունների հետագա զարգացմանը վերաբերող հարցեր

Վարչապետ Նիկոլ Փաշինյանը Թունիսի Ջերբա քաղաքում անցկացվող Ֆրանկոֆոնիայի միջազգային կազմակերպության 18-րդ գագաթնաժողովի շրջանակում հանդիպում է ունեցել Կանադայի վարչապետ Ջասթին Թրյուդոյի հետ: Այս մասին հաղորդում են ՀՀ վարչապետի աշխատակազմից։Զրուցակիցները քննարկել են հայ-կանադական հաարբերությունների հետագա զարգացմանն առնչվող տարբեր հարցեր: Այս առումով, Նիկոլ Փաշինյանը և Ջասթին Թրյուդոն կարևորել են Հայաստանում Կանադայի դեսպանություն բացելու կանադական կառավարության որոշումը: Կողմերը վստահություն են հայտնել, որ Երևանում դեսպանատան գործունեությունը նոր թափ կհաղորդի երկկողմ քաղաքական ու տնտեսական կապերի ընդլայնմանն ու խորացմանը:Վարչապետ Փաշինյանը կարևորել է Հայաստանում ժողովրդավարության զարգացմանն ու ամրապնդմանն ուղղված բարեփոխումների օրակարգին կանադական կողմի շարունակական օժանդակությունը:Ջասթին Թրյուդոն հայտնել է իր գլխավորած կառավարության պատրաստակամությունն ու շահագրգռվածությունը` նպաստելու մեր երկրում ինստիտուցիոնալ բարեփոխումների արդյունավետ իրականացմանն ու երկկողմ փոխգործակցության զարգացմանը:Հանդիպմանը քննարկվել են նաև ՀՀ-ում կանադական ներդրումների ընդլայնմանը վերաբերող հարցեր:Վարչապետ Փաշինյանը Ջասթին Թրյուդոյին է ներկայացրել Հայաստանի ինքնիշխան տարածքի նկատմամբ ադրբեջանական ագրեսիայի հետևանքներն ու դրանց վերացման ուղղությամբ հայկական կողմի դիրքորոշումները: Մտքեր են փոխանակվել Լեռնային Ղարաբաղի հիմնախնդրի, Հարավային Կովկասում տեղի ունեցող գործընթացների, ինչպես նաև փոխադարձ հետաքրքրություն ներկայացնող տարբեր հարցերի շուրջ:

18:00 - 19 նոյեմբերի, 2022

Ադրբեջանցի զինծառայողների՝ հայ ռազմագերիներին մահապատժի ենթարկելու մասին հաղորդագրությունները խորապես մտահոգիչ են․ Կանադայի ԱԳ նախարար

Ադրբեջանցի զինծառայողների՝ հայ ռազմագերիներին մահապատժի ենթարկելու մասին հաղորդագրությունները խորապես մտահոգիչ են։ Այս մասին իր թվիթերյան էջում գրել է Կանադայի ԱԳ նախարար Մելանի Ժոլին։ «Նման բռնության հեղինակները պետք է պատասխանատվության ենթարկվեն, իսկ տարածաշրջանը պետք է վերադառնա կայունության միջավայր»,- նշել է նա։

10:23 - 04 հոկտեմբերի, 2022

Միրզոյանը Կանադայի ԱԳ նախարարի հետ զրույցում ընդգծել է Ադրբեջանի նկատմամբ միջազգային հանրության հասցեական արձագանքի անհրաժեշտությունը

Սեպտեմբերի 15-ին ՀՀ ԱԳ նախարար Արարատ Միրզոյանը հեռախոսազրույց է ունեցել Կանադայի ԱԳ նախարար Մելանի Ժոլիի հետ։ Նախարար Միրզոյանն իր գործընկերոջն է ներկայացրել Ադրբեջանի կողմից Հայաստանի Հանրապետության ինքնիշխան տարածքի նկատմամբ սանձազերծված ագրեսիայի հետևանքով ստեղծված իրավիճակը: ՀՀ ԱԳ նախարարը խոստորեն դատապարտել է ադրբեջանական զինված ուժերի կողմից միջազգային և հումանիտար իրավունքի կոպտագույն խախտումները, խաղաղ բնակչության և քաղաքացիական ենթակառուցվածքների դիտավորյալ թիրախավորման դեպքերը։ Երկուստեք շեշտվել է Հայաստանի Հանրապետության տարածքային ամբողջականության անվերապահ պահպանման և ուժի կիրառման անթույլատրելիության անհրաժեշտությունը։ Հրադադարի ռեժիմի պահպանման, ադրբեջանական ագրեսիայի հետևանքերի վերացման և նոր ագրեսիայի հավանականության բացառման համատեքստում նախարար Միրզոյանը ընդգծել է Ադրբեջանի նկատմամբ միջազգային հանրության հստակ, հասցեական ու համարժեք արձագանքի կարևորությունը և տարածաշրջանում խաղաղության ու կայունության վերականգնման նպատակով գործուն քայլերի իրականացման անհրաժեշտությունը։

22:55 - 15 սեպտեմբերի, 2022

Կանադան անհանգստացած է Ադրբեջանի կողմից Հայաստանի բնակավայրերի վրա հարվածների առնչությամբ. ԱԳ նախարար Ջոլի |armenpress.am|

armenpress.am: Կանադան իր մտահոգությունն է հայտնել Հայաստանի և Ադրբեջանի միջև ռազմական գործողություններով, այդ թվում՝ Ադրբեջանի կողմից Հայաստանում բնակավայրերին, քաղաքացիական ենթակառուցվածքներին հարվածների առնչությամբ: Այս մասին «Թվիթեր»-ի իր էջում հայտարարել է Կանադայի արտգործնախարար Մելանի Ջոլին: «Կանադան խիստ անհանգստացած է Հայաստանի և Ադրբեջանի միջև ռազմական գործողությունների սկսմամբ, այդ թվում՝ Հայաստանի ներսում բնակավայրերին և քաղաքացիական ենթակառուցվածքներին հարվածների առնչությամբ: Մենք դեէսկալացիայի, հրադադարի լիարժեք հարգման և ԵԱՀԿ-ի միջոցով բովանդակալից երկխոսության վերադառնալու կոչ ենք անում»,-ընդգծել է նախարար Ջոլին:

00:03 - 14 սեպտեմբերի, 2022

Կանադայում զինված հարձակումներ գործած երկրորդ անձն է հայտնաբերվել |hetq.am|

13:17 - 08 սեպտեմբերի, 2022

Կանադայում զանգվածային սպանությունների մեջ մեղադրվողներից մեկը մահացած է հայտնաբերվել. երկրորդին դեռևս որոնում են |hetq.am|

hetq.am: Կանադայի ոստիկանությունը հայտնել է, որ Սասկաչևան նահանգում զանգվածային սպանությունների իրագործման մեջ կասկածվող անձանցից մեկը մահացած է հայտնաբերվել։ BBC-ն, հղում անելով Կանադայի ոստիկանությանը, գրում է, որ 31-ամյա Դեմիեն Սանդերսոնի մարմինը հայտնաբերվել է բնիկ հնդկացիների Ջեյմս Սմիթ ռեզերվացիայի տարածքում, որտեղ բնակվում էին զոհերի մեծ մասը։ Ըստ նախնական տվյալների՝ կասկածյալները եղբայրներ են եղել։ Ոստիկանությունը հայտնում է, որ Մայլզ Սանդերսոնը դեռևս ազատության մեջ է, և, ենթադրաբար, գտնվում է Սասկաչևանի մայրաքաղաք Ռեջայնա քաղաքում։ Հիշեցնենք, որ կիրակի օրը 10 մարդ էր զոհվել և ևս 15-ը վիրավորվել Կանադայի Սասկաչևան նահանգում տեղի ունեցած զինված մի քանի հարձակումների հետևանքով, ինչը դարձել էր Կանադայի նորագույն պատմության բռնության ամենաարյունալի դեպքը։ Ոստիկանապետի օգնական Ռոնդա Բլեքմորը տեղի ունեցած մամուլի ասուլիսի ժամանակ հայտարարել է, որ Դեմիենի մարմինը հայտնաբերվել է բաց երկնքի տակ, տներից մեկի մոտ գտնվող խիտ խոտածածկ հատվածում, որտեղ ոստիկանությունը խուզարկություն էր իրականացրել։ Նրա խոսքով՝ Դեմիենի մարմնի վրա վնասվածքի հետքեր են եղել։ Ոստիկանությունը հայտնել է, որ նրա եղբայրը՝ Մայլզը դեռևս փախուստի մեջ և մարդկանց կոչ արել աչալրջություն պահպանել։ Մայլզ Սանդերսոնն ունի դատվածության մի քանի դեպք և բազմիցս ենթարկվել է պատասխանատվության՝ անձի և սեփականության դեմ հանցագործությունների համար: Սպանությունները ցնցել էին Սասկաչևան նահանգը, որտեղ ոստիկանությունը հետաքննություն է իրականացնում 13 առանձին վայրերում հարձակումների վերաբերյալ։ «Այսպիսի կամ ցանկացած այլ բռնություն տեղ չունի մեր երկրում»,- երկուշաբթի՝ սեպտեմբերի 5-ին, հայտարարել էր Կանադայի վարչապետ Ջասթին Թրյուդոն։

12:56 - 06 սեպտեմբերի, 2022

Կանադայի Սասկաչևան նահանգում հարձակման հետևանքով առնվազն 10 մարդ է զոհվել, կան վիրավորներ |azatutyun.am|

azatutyun.am: Կանադայի կենտրոնական Սասկաչևան նահանգում տեղի ունեցած հարձակման հետևանքով առնվազն 10 մարդ է զոհվել, ևս 15-ը վիրավորվել, հայտնում է ոստիկանությունը։ Հարձակվողները փախել են և որոնվում են։ Ոստիկանությունը հայտարարել է, որ նրանք զինված են և վտանգավոր ու դեռ փախուստի մեջ են: Զոհերը հայտնաբերվել են 13 տարբեր վայրերում։ Ոստիկանությունը հայտնել է, որ հարձակումների մեջ երկու տղամարդու են կասկածում։

11:39 - 05 սեպտեմբերի, 2022

Կանադան Ուկրաինային 350 մլն ԱՄՆ դոլարի վարկ է տրամադրել |factor.am|

factor.am: Ուկրաինան Կանադայից 450 միլիոն կանադական դոլար (350 միլիոն ԱՄՆ դոլար) արտոնյալ վարկ է ստացել։ Այս մասին գրում է BBC-ի ռուսական ծառայությունը։ Կանադայում Ուկրաինայի դեսպան Յուլիա Կովալևան ասել է, որ հատկացված միջոցները կուղղվեն բնական գազի գնմանը՝ ջեռուցման սեզոնին աջակցելու համար։ Ուկրաինայի Ֆինանսների նախարարության մամուլի հաղորդագրության համաձայն՝ Կանադայից ստացված վարկերի ընդհանուր գումարը հասել է 1,2 մլրդ ԱՄՆ դոլարի։

16:51 - 18 օգոստոսի, 2022

Կանադացի սենատորը դատապարտել է Ադրբեջանի ագրեսիան |armenpress.am|

armenpress.am: Քվեբեկից կանադացի սենատոր Լեո Հուսակոսը դատապարտել է Ադրբեջանի ագրեսիան` կոչ անելով Կանադային և միջազգային հանրությանը խստորեն դատապարտել այն: Այս մասին նա գրել է «Թվիթերի» իր միկրոբլոգում: «Արցախի ժողովրդի վրա Ադրբեջանի հարձակումը 2020 թվականի նոյեմբերի հրադադարի համաձայնագրի վերջին խախտումն է։ Ես անհանգստացած եմ Ադրբեջանի վերսկսված ագրեսիայի առիթով և կոչ եմ անում Կանադային ու միջազգային հանրությանը խստորեն դատապարտել այն»,- գրել է նա:

19:17 - 09 օգոստոսի, 2022

Կանադան ընդլայնում է Ռուսաստանի նկատմամբ պատժամիջոցների ցանկը |armenpress.am|

armenpress.am: Կանադայի կառավարությունը հայտարարել է Ռուսաստանի նկատմամբ պատժամիջոցների ցանկի ընդլայնման մասին, ավելացվել են 43 ֆիզիկական և 17 իրավաբանական անձանց անուններ: Այս մասին հայտնում է «ՌԻԱ Նովոստի »-ն՝ վկայակոչելով երկրի կառավարության կայքը։ Հրապարակված ցուցակի համաձայն՝ ռուս զինվորականները, որոնք նախկինում Ուկրաինայի պաշտպանության նախարարության կողմից մեղադրվում էին Բուչայում տեղի ունեցած իրադարձություններում ներգրավված լինելու համար, հայտնվել են պատժամիջոցների ցուցակում։ Պատժամիջոցների կիրառման հիմքերը չեն նշվում։

18:04 - 02 օգոստոսի, 2022