ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Կիևը համաձայնել է նախագահական ընտրություններ անցկացնել․ Ուիթքոֆ |azatutyun.am|

azatutyun.am: Ուկրաինայի իշխանությունները համաձայնել են նախագահական ընտրություններ անցկացնել։ Այս մասին հայտնել է ԱՄՆ նախագահի հատուկ բանագնաց Սթիվ Ուիթքոֆը։ Լրագրող Թաքեր Կարլսոնին տված հարցազրույցում նա նաև ասել է, որ ռուս - ուկրաինական պատերազմում ամենամեծ խնդիրը Ղրիմի կարգավիճակն է և Դոնեցկի, Զապորոժիեի, Լուգանսկի և Խերսոնի շրջանները, որոնց տարածքների մի մասը նույնպես ռուսական հսկողության տակ է։ «Դրանք ռուսալեզու տարածքներ են, այնտեղ հանրաքվեներ են անցկացվել, մարդկանց մեծամասնությունը կողմ է եղել ռուսական իշխանության ներքո մնալուն, իմ կարծիքով՝ սա է կոնֆլիկտի հանգուցային կետը», - ասել է ԱՄՆ բանագնացը, միաժամանակ հարցադրում արել, իսկ աշխարհը կճանաչի՞, որ դրանք ռուսական տարածքներ են։ Ուկրաինայում նախագահական ընտրությունները պետք է տեղի ունենային անցած տարվա գարնանը, սակայն օրենքն արգելում է ռազմական դրության ժամանակ ընտրություններ անցկացնել: Զելենսկու հետ բանակցելուց հրաժարվող Ռուսաստանը հենց սա է մատնացույց անում՝ պնդելով, թե նա լեգիտիմ նախագահ չէ: Վաշինգտոնը ևս կարծում է, որ Ուկրաինայում ընտրություններ պետք է անցկացվեն:

13:55 - 22 մարտի, 2025

Անդրադարձել ենք մեր առաջիկա հանդիպումներին. Միրզոյանն ու Լավրովը հեռախոսազրույց են ունեցել

ՀՀ ԱԳ նախարար Արարատ Միրզոյանը հեռախոսազրույց է ունեցել Ռուսաստանի արտգործնախարար Սերգեյ Լավրովի հետ։ Այս մասին նա գրել է X-ի իր միկրոբլոգում։ «Անդրադարձել ենք մեր երկկողմ քաղաքական երկխոսության շրջանակներում առաջիկա հանդիպումներին: Շնորհավորել եմ նրան ծննդյան օրվա կապակցությամբ»,- գրել է Միրզոյանը:

22:07 - 21 մարտի, 2025

Թրամփը հայտարարել է Ուկրաինայում «տարածքների բաժանման» քննարկման մասին |factor.am|

factor.am: ԱՄՆ նախագահ Դոնալդ Թրամփը հայտարարել է, որ ՌԴ նախագահ Վլադիմիր Պուտինի և Ուկրաինայի նախագահ Վլադիմիր Զելենսկիի հետ լավ բանակցություններ է անցկացրել։ Նա հավելել է՝ Վաշինգտոնը մոտ է Կիևի և Մոսկվայի միջև հակամարտությունը դադարեցնելու համաձայնությանը: «Կարծում եմ՝ մենք գործարքի սահմաններ ունենք»,- ասել է Թրամփը։ ԱՄՆ նախագահը նշել է, որ փնտրում է պատերազմի լուծում՝ դադարեցնելու մարտադաշտում սպանությունները և խնայելու Վաշինգտոնի փողերը, որոնք ծախսվել են Ուկրաինային ռազմական օգնություն տրամադրելու համար: «Կարծում եմ՝ շատ շուտով մենք կհասնենք ամբողջական հրադադարի, հետո կունենանք համաձայնագիր։ Այս հարցը քննարկվում է հենց հիմա, մենք խոսում ենք հողերի բաժանման և այլնի մասին»,- ասել է Թրամփը։

21:30 - 21 մարտի, 2025

Մեզ չեն կարող չանհանգստացնել Հայաստանի և Ադրբեջանի սահմանին լարվածության մասին լուրերը. Զախարովա |armenpress.am|

armenpress.am: Ռուսաստանի Դաշնության Արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվային չեն կարող չանհանգստացնել խաղաղության համաձայնագրի շուրջ առաջընթացի լուրերի ֆոնին հաճախակիացած Հայաստանի և Ադրբեջանի սահմանին լարվածության մասին լուրերը։ Զախարովան նաև նշել է, որ այդ համատեքստում Մոսկվան հանդես է գալիս Երևանի ու Բաքվի կողմից անհապաղ եռակողմ պայմանավորվածություններն իրագործելու կոչով։ «Մենք հետևողականորեն կոչ ենք անում կողմերին զսպվածություն ցուցաբերել, խույս տալ էսկալացիայի տանող ցանկացած գործողությունից, ծագող բոլոր հարցերը լուծել բացառապես խաղաղ, քաղաքական-դիվանագիտական ճանապարհով»,- ասել է ռուս պաշտոնյան: Անդրադառնալով Հայաստանի դեմ Ադրբեջանի կողմից հնարավոր ագրեսիայի դեպքում ՀԱՊԿ հնարավոր աջակցության մասին հարցին՝ Մարիա Զախարովան նշել է, որ ՀԱՊԿ շրջանակում Ռուսաստանի պարտավորությունները Հայաստանի նկատմամբ ուժի մեջ են, բայց ՀՀ կողմից դրա սառեցումը չի նպաստում անվտանգության ամրացմանը։ Զախարովան նաև նշել է, որ Մոսկվան ողջունում է առաջընթացը, որ արձանագրվել է Երևանի ու Բաքվի միջև խաղաղության գործընթացում՝ համաձայնագրի տեքստի շուրջ բանակցությունների ավարտի հետ կապված: «Խաղաղության օրակարգում կան մի շարք կարևոր գլոբալ հարցեր, որոնք լուծման են սպասում, դա ճանապարհային, տնտեսական կապերի ապաշրջափակումն է տարածաշրջանում, դելիմիտացիան և հումանիտար բլոկը։ Հաստատում ենք նաև մեր պատրաստակամությունը բոլոր ուղղություններով աջակցություն ցուցաբերելու մեր գործընկերներին»,- ասել է Զախարովան և ավելացրել, որ ՌԴ արտաքին գործերի նախարարի հատուկ ներկայացուցիչ Իգոր Խովաևը պատրաստ է մեկնել տարածաշրջան` համապատասխան կոնսուլտացիաներ անցկացնելու նպատակով։

20:51 - 20 մարտի, 2025

Զախարովան անդրադարձել է ԱՄՆ-ից Հայաստան տեխնիկա տեղափոխելու մասին լրատվամիջոցների հրապարակումներին |1lurer.am|

1lurer.am: Մոսկվան տեղեկատվություն է խնդրել Երևանից Պենտագոնի կողմից Հայաստան տեխնիկա տեղափոխելու մասին լրատվամիջոցների հրապարակումների վերաբերյալ՝ ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: «Մենք տեսել ենք այդ հրապարակումները և օպերատիվ հարցում ենք արել հայ գործընկերներին։ Մեզ տեղեկացրել են, որ Վաշինգտոնից նման պաշտոնական հարցումներ չեն ստացվել։ Այնուամենայնիվ, եթե տեղեկությունը հաստատվի, ապա դա, իհարկե, ապակայունացնող գործոն կդառնա Հարավային Կովկասում կայունության և անվտանգության համար»,- ասել է Զախարովան։ Նա հիշեցրել է Մոսկվայի դիրքորոշումը, որ Հարավային Կովկասի երկրների խնդիրները պետք է լուծվեն հենց տարածաշրջանի շրջանակում:

19:44 - 20 մարտի, 2025

Պուտինն ուղերձ հղել Սիրիայի նախագահին՝ համագործակցության զարգացման պատրաստակամություն հայտնելով |factor.am|

factor.am: ՌԴ նախագահ Վլադիմիր Պուտինն ուղերձ է հղել Սիրիայի ղեկավար Ահմեդ ալ-Շարաային, հայտնել է ՌԴ նախագահի մամուլի քարտուղար Դմիտրի Պեսկովը, գրում է ՌԻԱ Նովոստին։ «Ռուսաստանի նախագահ Վլադիմիր Պուտինն ուղերձ է հղել սիրիական պետության ղեկավար Ահմեդ ալ-Շարաային, որում աջակցել է երկրում իրավիճակի արագ կայունացմանն ուղղված ջանքերին՝ ի շահ նրա ինքնիշխանության, անկախության, միասնության և տարածքային ամբողջականության ապահովման»,- ասել է Կրեմլի խոսնակը։ Պեսկովը նշել է, որ Պուտինը հաստատել է երկու երկրների համագործակցությունը զարգացնելու իր պատրաստակամությունը։ «Հաստատվել է Ռուսաստանի անփոփոխ պատրաստակամությունը՝ զարգացնելու համագործակցությունը սիրիական ղեկավարության հետ երկկողմ օրակարգի հարցերի ամբողջ շրջանակով՝ ռուս-սիրիական ավանդական բարեկամական հարաբերություններն ամրապնդելու նպատակով»,- ասել է նա։ Հիշեցնենք, որ փետրվարին Պուտինն առաջին անգամ հեռախոսազրույց էր ունեցել Սիրիայի նոր ղեկավարի հետ։ Տապալումից հետո Սիրիայի նախկին նախագահ Բաշար Ասադն ընտանիքի անդամների հետ բնակվում է Մոսկվայում։

18:09 - 20 մարտի, 2025

Ռուսաստանն անկայունություն է հրահրում Եվրոպայի հարևանությամբ. ԵՄ-ն հրապարակել է Եվրոպայի պաշտպանության վերաբերյալ փաստաթուղթը |1lurer.am|

1lurer.am: Եվրոպական հանձնաժողովը և ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը հրապարակել են «Եվրոպայի պաշտպանության պատրաստության վերաբերյալ համատեղ Սպիտակ գիրք 2030» փաստաթուղթը, որում արձանագրվել են ԵՄ-ի անվտանգության հիմնական մարտահրավերները։ Նշվում է, որ Ռուսաստանը կշարունակի մեծացնել իր պատերազմական տնտեսությունը՝ Բելառուսի, Հյուսիսային Կորեայի և Իրանի աջակցությամբ, և կշարունակի լինել Եվրոպայի անվտանգության հիմնական սպառնալիքը: «Ռուսաստանը համառորեն հրահրում է լարվածություն և անկայունություն Եվրոպայի հարևանությամբ՝ լինի դա Արևմտյան Բալկաններում, Վրաստանում, Մոլդովայում կամ Հայաստանում, և աճող ապակայունացնող ազդեցություն ունի Աֆրիկայում»,- ասված է փաստաթղթում։ Փաստաթղթում շարադրված է նաև մինչև 2030 թվականը դաշինքի պաշտպանական ներուժի ամրապնդմանն ու ավելի հզոր ռազմարդյունաբերական բազայի ստեղծմանն ուղղված քաղաքականությունը: Նշվում է, որ ԱՄՆ-ը Եվրոպային դրդում է ավելի մեծ պատասխանատվություն ստանձնել սեփական պաշտպանության համար: Փաստաթղթում առաջարկվում է, որ անդամ պետությունները կենտրոնանան յոթ առաջնահերթ ոլորտի վրա։ Դրանք ներառում են հակաօդային և հակահրթիռային պաշտպանությունը:

12:06 - 20 մարտի, 2025

Զելենսկին հաստատել է Ռուսաստանի հետ ռազմագերիների փոխանակումը |1lurer.am|

1lurer.am: Ուկրաինայի նախագահ Վոլոդիմիր Զելենսկին հայտնել է, որ Ուկրաինան ռուսական գերությունից վերադարձրել է 175 մարդու։ «Եվս 22 պաշտպան տուն է վերադառնում ոչ փոխանակման գործողություններով: Նրանք ծանր վիրավորներ են և զինվորներ, որոնց Ռուսաստանը հետապնդել է մտացածին հանցագործությունների համար»,- գրել է Զելենսկին։ Նա հավելել է, որ վերադարձած զինծառայողների թվում կան զինված ուժերի, ռազմածովային ուժերի, ազգային գվարդիայի, տարածքային պաշտպանության ուժերի և սահմանապահ ծառայության զինծառայողներ, սերժանտներ ու սպաներ։ Զելենսկին նաև շնորհակալություն է հայտնել Արաբական Միացյալ Էմիրություններին փոխանակմանը միջնորդելու համար։ Ավելի վաղ 175-ը՝ 175-ի դիմաց փոխանակման մասին էր հայտարարել նաև ՌԴ ՊՆ-ն։

20:05 - 19 մարտի, 2025

Փոխվարչապետերի եռակողմ աշխատանքային խումբը «փաստացի հիմա քնած վիճակում է»․ Օվերչուկ |azatutyun.am|

azatutyun.am: Մոսկվայի, Երևանի և Բաքվի եռակողմ աշխատանքային խումբը չի փակվել, եթե գործընկերները դիմեն, Ռուսաստանը սիրով կշարունակի աշխատել, ՏԱՍՍ-ի փոխանցմամբ, նախօրեին լրագրողներին ասել է Ռուսաստանի փոխվարչապետ Ալեքսեյ Օվերչուկը, ով նաև Հարավային Կովկասում տրանսպորտային ուղիների ապաշրջափակման հարցով եռակողմ աշխատանքային խմբի համանախագահն է: «Ինչ վերաբերում է փոխվարչապետերի եռակողմ աշխատանքային խմբին, փաստենք, որ հիմա այն քնած վիճակում է։ Բայց գիտենք, որ այս թեմայով շփումներ են իրականացվում գործընկերների միջև», - ասել է Օվերչուկը՝ շարունակելով․ - «Ոչ ոք այն չի փակել, և եթե գործընկերները կապվեն մեզ հետ և մենք կարող ենք ինչ-որ կերպ օգտակար լինել, իսկ մենք կարող ենք, ապա, իհարկե, ուրախ կլինենք շարունակել այս աշխատանքը: Բայց դա կախված է գործընկերներից»։ 2022-ի հունվարի 11-ին Մոսկվայում Ռուսաստանի, Հայաստանի և Ադրբեջանի ղեկավարների հանդիպմանը պայմանավորվածություն ձեռք բերվեց ապաշրջափակել տարածաշրջանային հաղորդակցությունները։ Այնուհետև այդ նպատակով աշխատանքային խումբ ստեղծվեց երեք երկրների փոխվարչապետերի մակարդակով։

10:13 - 19 մարտի, 2025

ԱՄՆ-ն և ՌԴ-ն քննարկել են ռազմավարական սպառազինությունների չտարածման անհրաժեշտությունը. Սպիտակ տուն |arm.sputniknews.ru|

arm.sputniknews.ru: Ուկրաինայի հակամարտությունը դեռ վաղուց պետք է ավարտված լիներ։ Այս մասին նշված է Սպիտակ տան` Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հեռախոսազրույցի արդյունքներով տարածած հայտարարության մեջ: Հայտարարության մեջ նշվում է՝ երկու երկրների ղեկավարները համաձայնել են, որ Ուկրաինայում կարգավորման գործողությունը սկսվի էներգետիկայի և ենթակառուցվածքների օբյեկտների ուղղությամբ հրադադարով: Նրանք նշել են, որ ԱՄՆ-ի և Ռուսաստանի միջև երկկողմ հարաբերությունների բարելավումով ապագան հսկայական ներուժ ունի: «Ռուսաստանի և ԱՄՆ-ի երկկողմ հարաբերությունների ապագան ներառում է մեծ տնտեսական գործարքներ և աշխարհաքաղաքական կայունություն»,- նշել են Սպիտակ տանը։ Պայմանավորվածություն է ձեռք բերվել նաև Սև ծովում զինադադարի շուրջ բանակցություններ սկսելու մասին։ Սպիտակ տան հայտարարության մեջ նշվում է, որ դրանք անհապաղ կմեկնարկեն Մերձավոր Արևելքում: Առաջնորդները քննարկել են ռազմավարական սպառազինությունների տարածումը դադարեցնելու անհրաժեշտության հարցը: Պուտինն ու Թրամփը զրույցի ընթացքում համակարծիք են եղել, որ Իրանը երբևէ չպետք է հայտնվի այնպիսի դիրքում, որ կարողանա ոչնչացնել Իսրայելը:

22:10 - 18 մարտի, 2025

Պուտինը կողմ է արտահայտվել Թրամփի՝ Ուկրաինայում 30 օրով հրադադարի գաղափարին․ Կրեմլ |tert.am|

tert.am: Պուտինը կողմ է արտահայտվել Ռուսաստանի և Ուկրաինայի կողմից էներգետիկ ենթակառուցվածքներին փոխադարձ հարվածներից 30 օրով հրաժարվելու մասին Թրամփի գաղափարին և նման հրաման է տվել զինվորականներին։ Այս մասին հայտնում է Կրեմլը։ Նշվում է նաև, որ Պուտինը Թրամփին տեղեկացրել է, որ մարտի 19-ին ռուսական և ուկրաինական կողմերի միջև կիրականացվի գերիների փոխանակում՝ հավասար սկզբունքով՝ 175 հոգի։ Բացի այդ՝ Ռուսաստանը և ԱՄՆ-ն ուկրաինական կարգավորման հարցով փորձագիտական խմբեր կստեղծեն։ 30-օրյա զինադադար հաստատելու ԱՄՆ նախագահի նախաձեռնության համատեքստում ռուսական կողմը նախանշել է մի շարք կարևոր կետեր, դրանք են՝ շփման գծի ողջ երկայնքով հնարավոր հրադադարի արդյունավետ վերահսկողության ապահովում, Ուկրաինայում հարկադիր մոբիլիզացիան դադարեցնելու անհրաժեշտություն և ուկրաինական զինված ուժերի վերազինման վտանգը։

21:34 - 18 մարտի, 2025

Պուտին-Թրամփ հեռախոսազրույցն ընթանում է արդեն մեկ ժամ. Սպիտակ տուն

Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հեռախոսազրույցն ընթանում է արդեն մեկ ժամ, ընթացքը լավ է՝ հայտնել են Սպիտակ տնից: «Զրույցը դեռ ընթացքի մեջ է և լավ է ընթանում»,- հայտնել է Սպիտակ տան աշխատակազմի ղեկավարի տեղակալ Դան Սքավինոն։

19:38 - 18 մարտի, 2025

Պուտինը պահանջել է դադարեցնել Ուկրաինային զենքի մատակարարումը հրադադարի ընթացքում. Bloomberg |azatutyun.am|

azatutyun.am: ՌԴ նախագահ Վլադիմիր Պուտինը պահանջել է դադարեցնել Ուկրաինային զենքի մատակարարումը 30-օրյա հրադադարի ընթացքում, այս մասին հայտնում է Bloomberg -ը` հղում անելով իր աղբյուրներին։ Ըստ լրատվամիջոցի՝ սա հրադադարի համաձայնությունը ստորագրելու Պուտինի պարտադիր նախապայմանն է։ Նույն աղբյուրները հայտնել են, որ ՌԴ նախագահի նվազագույն պլանն այն է, որ դադարեցվի գոնե ռազմական աջակցությունը ԱՄՆ-ի կողմից։ Եվրոպացի բարձրաստիճան պաշտոնյան Bloomberg-ին ասել է, որ այս նախապայմանի իրագործումը կարող է բերել նրան, որ Ռուսաստանը ռազմական գործողությունների դադարի ընթացքում կվերազինվի։ Այսօր նախատեսված է ԱՄՆ և Ռուսաստանի նախագահների հեռախոսազրույցը: Նրանք քննարկելու են քննարկելու Ուկրաինայում ռուսական զորքի գրաված տարածքների և էլեկտրակայանների հարցը: Կրեմլի խոսնակ Դմիտրի Պեսկովն ասել է, որ Ուկրաինայից բացի առաջնորդները քննարկելու են նաև երկու երկրների հարաբերությունների կարգավորումը: Հեռախոսազրույցը տեղի կունենա Երևանի ժամանակով 17:00 -19:00-ի սահմաններում:

18:11 - 18 մարտի, 2025

Մատվիենկոն պաշտոնական այցով Բաքվում է |azatutyun.am|

azatutyun.am: Ռուսաստանի Դաշնային ժողովի Դաշնության խորհրդի նախագահ Վալենտինա Մատվիենկոն պաշտոնական այցով կիրակի օրը ժամանել է Ադրբեջան։ Ըստ ռուսական պետական ՏԱՍՍ գործակալության՝ Մատվիենկոյին երեկ ընդունել է Ադրբեջանի փոխնախագահ Մեհրիբան Ալիևան, քննարկել երկկողմ հարցերի լայն շրջանակ, այդ թվում՝ մշակութային և հումանիտար համագործակցությունը։ Ադրբեջանական լրատվամիջոցները նշում են, որ Մատվիենկոն ու Ալիևան ընդգծել են միջխորհրդարանական հարաբերությունների և խորհրդարանական պատվիրակությունների փոխայցելությունների կարևորությունը՝ երկրների միջև բարեկամական հարաբերությունների ամրապնդման գործում։ Կողմերը նաև նշել են, թե Բաքվի և Մոսկվայի հարաբերությունները կրում են ռազմավարական դաշնակցային բնույթ։ Մատվիենկոն, նախնական պայմանավորվածությամ, հունիսի 5-ից 6-ը կժամանի Երևան։ ՏԱՍՍ-ը նշել էր, որ Մատվիենկոն կայցելի Երևան՝ «ռուս-հայկական միջպետական հարաբերություններին նոր լիցք հաղորդելու համար»։

11:02 - 17 մարտի, 2025

Թրամփը հայտնել է, որ երեքշաբթի Պուտինի հետ քննարկելու է ուկրաինական պատերազմի ավարտը |factor.am|

factor.am: ԱՄՆ նախագահ Դոնալդ Թրամփը հայտարարել է, որ ծրագրում է երեքշաբթի օրը խոսել ՌԴ նախագահ Վլադիմիր Պուտինի հետ՝ քննարկելու Ուկրաինայում պատերազմի ավարտը Մոսկվայում ԱՄՆ-ի և Ռուսաստանի պաշտոնյաների միջև դրական բանակցություններից հետո, գրում է Reuters-ը։ «Ես երեքշաբթի կխոսեմ նախագահ Պուտինի հետ։ Շատ աշխատանք է կատարվել հանգստյան օրերին», – ասել է Թրամփը լրագրողներին Air Force One ինքնաթիռում Ֆլորիդայից Վաշինգտոնի շրջան վերադառնալու ժամանակ ու հավելել ․ «Մենք ուզում ենք տեսնել, թե արդյոք կարող ենք վերջ տալ պատերազմին։ Միգուցե, մենք կարող ենք, գուցե, չենք կարող, բայց ես կարծում եմ, որ մենք շատ լավ հնարավորություններ ունենք»։ ԱՄՆ նախագահը փորձում է ստանալ Պուտինի համաձայնությունը 30-օրյա հրադադարի առաջարկին, որն Ուկրաինան ընդունել է անցած շաբաթ։ Հարցին, թե ինչ զիջումներ են քննարկվում հրադադարի շուրջ բանակցություններում, ԱՄՆ նախագահը պատասխանել է. «Մենք խոսելու ենք հողի մասին, մենք խոսելու ենք էլեկտրակայանների մասին։ Կարծում եմ, որ մենք շատ բան արդեն քննարկել ենք երկու կողմերի՝ Ուկրաինայի և Ռուսաստանի հետ: Մենք արդեն խոսում ենք դրա մասին, որոշակի ակտիվների բաժանման մասին»։

10:55 - 17 մարտի, 2025

Ռուբիոն ու Լավրովը հեռախոսազրույց են ունեցել |azatutyun.am|

azatutyun.am: ԱՄՆ պետքարտուղար Մարկո Ռուբիոն և Ռուսաստանի արտգործնախարար Սերգեյ Լավրովը նախօրեին հեռախոսազրույց են ունեցել։ Ռուսաստանի արտգործնախարարությունը նշում է, որ հեռախոսազրույցը կայացել է ամերիկյան կողմի նախաձեռնությամբ։ Ըստ Պետդեպարտամենտի՝ Ռուբիոն Լավրովին պատմել է Եմենում հութիների դեմ ԱՄՆ ռազմական գործողությունների մասին։ Ռուսաստանի արտաքին քաղաքական գերատեսչության փոխանցմամբ, Լավրովն ընդգծել է ուժի կիրառման անհապաղ դադարեցման անհրաժեշտությունը, քաղաքական երկխոսություն սկսելու կարևորությունը։ Ամերիկյան կողմը նաև նշում է, որ Ռուբիոն և Լավրովը քննարկել են փետրվարին Սաուդյան Արաբիայում կայացած հանդիպումներից հետո հետագա համագործակցությունը։ Կողմերը պայմանավորվել են շարունակել աշխատանքը Վաշինգտոնի և Մոսկվայի միջև հարաբերությունների վերականգնման ուղղությամբ։ Միացյալ Նահանգների զինված ուժերը մարտի 16-ին լայնամասշտաբ հարձակում են ձեռնարկել Եմենում հութի զինյալների դեմ և զգուշացրել Իրանին՝ անհապաղ դադարեցնել աջակցությունը Վաշինգտոնի կողմից ահաբեկչական ճանաչված խմբավորմանը։ Սա Միացյալ Նահանգների ամենամասշտաբային ռազմական գործողությունն է հունվարի 20-ից՝ Դոնալդ Թրամփի՝ երկրի նախագահի պաշտոնը ստանձնելուց ի վեր։ Հութի պաշտոնյաները հաղորդել են ամերիկյան հարձակման հետևանքով քաղաքացիական անձանց զոհվելու մասին, այդ տվյալը հնարավոր չէ հաստատել անկախ աղբյուրի օգնությամբ։ Հութիները նաև խոստացել են վրեժխնդիր լինել՝ առանց մանրամասնելու։

10:49 - 17 մարտի, 2025