Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

«Հայտարարություններն առ այն, թե Իրանը միջուկային զենք է ստեղծում, անհեթեթություն են»․ Զարիֆը՝ Ֆրանսիայի ԱԳ նախարարին |tert.am|

tert.am: Իրանի արտաքին գործերի նախարար Մոհամադ Ջավադ Զարիֆը նախօրեին հակադարձել է Ֆրանսիայի ԱԳ նախարար Ժան Իվ Լը Դրիանի հայտարարությանն այն մասին, որ Թեհրանը գտնվում է միջուկային զենքի ստեղծման փուլում՝ այդ հայտարարությունը որակելով «անհեթեթություն», գրում է Reuters գործակալությունը։Ժան Իվ Լը Դրիանը Journal du Dimanche պարբերականին տված հարցազրույցում, որը հրապարակվել է շաբաթ օրը, հայտարարել էր, որ Իրանը մեծացնում է իր միջուկային ներուժը, և որ Թեհրանն ու Վաշինգտոնը պետք է շտապ վերադառնան 2015 թվականի միջուկային համաձայնագրին:«Հարգելի գործընկեր, դուք նախարարների կաբինետում ձեր կարիերան սկսել եք սաուդցի ռազմական հանցագործներին զենք վաճառելով։ Խուսափեք Իրանի մասին անհեթեթություններ հնչեցնելուց»,- ի պատասխան Twitter-ում գրել է Զարիֆը՝ հավելելով․ «Փաստերի ստուգում. դուք ապակայունացնում եք մեր տարածաշրջանը։ Դադարե՛ք պաշտպանել հանցագործներին, որոնք շղթայաձև մաքրում են իրենց քննադատներին, և օգտագործում ձեր զենքը՝ Եմենում երեխաներին սպանելու համար»։2015 թվականի հուլիսի 14-ին «վեցյակը» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) և Իրանը հայտարարել են Գործողությունների համատեղ համապարփակ ծրագրի հաստատման մասին:

12:10 - 18 հունվարի, 2021

Իրանն ԱՄՆ-ին սպառնացել է ՄԱԿ-ի Միջազգային դատարան դիմել իրանցի դիվանագետներին հետապնդելու համար |tert.am|

tert.am: Իրանի արտաքին գործերի նախարարության մամուլի քարտուղար Սայիդ Ղաթիբզադեն հայտարարել է, որ Թեհրանը պաշտոնապես նախազգուշացնում է ԱՄՆ-ին, որ հայց կներկայացնի ՄԱԿ-ի Միջազգային դատարան, եթե Վաշինգտոնը շարունակի անօրինական գործողություններն ընդդեմ իրանցի դիվանագետների: Այս մասին գրում է իրանական Tasnim-ը:Ըստ Ղաթիբզադեի՝ Իրանն այս առնչությամբ հրապարակել է պաշտոնական հուշագիր և ներկայացրել այն Թեհրանում Շվեյցարիայի դեսպանատան միջոցով, որն Իրանում ներկայացնում է ԱՄՆ-ի շահերը:«Այդ հուշագրում ամերիկյան կողմին նախազգուշացրել ենք, որ Իրանն ԱՄՆ-ի դեմ հայց կներկայացնի Միջազգային դատարան, եթե Վաշինգտոնը չդադարի իր անօրինական գործողություններն ընդդեմ իրանցի դիվանագետների միջազգային կազմակերպություններում, ինչպես ՄԱԿ-ում, Համաշխարհային բանկում և Արժույթի միջազգային հիմնադրամում, որոնց գլխավոր գրասենյակները տեղակայված են ԱՄՆ տարածքում»,- պարզաբանել է մամուլի քարտուղարը:

11:17 - 18 հունվարի, 2021

Եվրոպական առաջատար երկրները Իրանին կոչ են անում դադարեցնել մետաղական ուրանի հարստացումը |1lurer.am|

1lurer.am։ Եվրոպական երեք երկրներն այսօր Իրանին զգուշացրել են մետաղական ուրանի հարստացման մեկնարկի մասին՝ ընդգծելով, որ դա հակասում է 2015-ին ստորագրված միջուկային համաձայնագրին, և այն ոչ թե քաղաքացիական, այլ՝ ռազմական կիրառման համար է: Այս մասին տեղեկացնում է Reuters գործակալությունը: «Իրանին հորդորում ենք դադարեցնել այս գործընթացն ու անհապաղ վերադառնալ միջուկային համաձայնագրով սահմանված իր լիազորությունների կատարմանը, եթե Իրանն իրոք ցանկանում է պահպանել այդ համաձայնագիրը»,-համատեղ հայտարարությամբ են հանդես եկել Ֆրանսիան, Մեծ Բրիտանիան ու Գերմանիան: ՄԱԿ-ի ատոմային էներգիայի միջազգային գործակալությունն ու Թեհրանը ավելի վաղ հայտարարել էին, որ վեց տերությունների հետ կնքված միջուկային գործարքի վերջին խախատումներից հետո Իրանն այս ոլորտում աշխատանքներ է սկսել: Իրանական կողմը կոչ է անում դադարեցնել երկրի նկատմամբ ամերիկյան պատժամիջոցները:

20:11 - 16 հունվարի, 2021

Իրանում ՀՀ դեսպանն ընդունել է կենցաղային սպասարկման ոլորտի սարքերի արտադրության «Radteb Naghsh-e Jahan» ընկերության տնօրեն Մեհդի Ղանադնիյային

Իրանի Իսլամական Հանրապետությունում (ԻԻՀ) ՀՀ արտակարգ և լիազոր դեսպան Արտաշես Թումանյանն ընդունել է կենցաղային սպասարկման ոլորտի սարքերի արտադրության «Radteb Naghsh-e Jahan» ընկերության տնօրեն Մեհդի Ղանադնիյային: Վերջինս ՀՀ դեսպանին տեղեկացրել է Հայաստանում տնտեսական գործունեություն սկսելու իր ծրագրերի մասին: Այս մասին հայտնում է դեսպանության մամուլի ծառայությունը։ Դեսպան Թումանյանը ներկայացրել է Հայաստանի գործարար միջավայրի առանձնահատկությունները, ԵԱՏՄ երկրների հետ առևտրային գործարքներ իրականացնելու հնարավորությունները: Ընկերության տնօրեն Ղանադնիյան հայտնել է, որ փետրվար ամսին ձեռնարկության պատվիրակությունը կմեկնի Հայաստան՝ տեղում ծանոթանալու տնտեսական գործունեության հնարավորություններին: ՀՀ դեսպանը պատրաստակամություն է հայտնել նախնական փուլում աջակցել անհրաժեշտ տեղեկատվության ապահովման հարցում:

16:41 - 16 հունվարի, 2021

Իրանում գրանցվել է 5.5 բալ ուժգնությամբ երկրաշարժ |1lurer.am|

1lurer.am: Այսօր՝ առավոտյան, Իրանի հարավային Հորմոզգան նահանգում երկրաշարժ է գրանցվել, որի ուժգնությունը եղել է 5.5 բալ՝ փոխանցում է Tasnim գործակալությունը: Ստորգետնյա ցնցումներն արձանագրվել են ծովափնյա շրջաններում, այդ թվում՝ Բանդար Կոնգ նավահանգստում և Պարսից ծոցի Քեշմ կղզում: Երկրաշարժը տեղի է ունեցել 19 կմ խորությամբ: Բնական աղետի հետևանքով զոհեր կամ տուժածներ չկան: Թեթև վնաս է հասցվել գյուղական բնակավայրերի տներին: Աղետի գոտում աշխատում է Իրանի Կարմիր մահիկի խումբը:

14:04 - 16 հունվարի, 2021

Իրանը բալիստիկ հրթիռներ է արձակել զորավարժությունների շրջանակում |armenpress.am|

armenpress.am: Իրանի Իսլամական հեղափոխության պահապանների կորպուսի ռազմատիեզերական ուժերը զորավարժությունների շրջանակում բալիստիկ հրթիռներով թիրախներ են խոցել Հնդկական օվկիանոսի հյուսիսային մասում: Այս մասին հայտնում է «Թասնիմ» լրատվական գործակալությունը: «Շաբաթ օրը առավոտյան, ռազմախաղի եզրափակիչ փուլի շրջանակներում, արձակվել են տարբեր տեսակի հեռահար բալիստիկ հրթիռներ, որպեսզի խոցեն պայմանական հակառակորդի ռազմանավերը, որոնք գտնվում են 1800 կմ հեռավորության վրա»,- ասված է հաղորդագրությունում: «Մեծ մարգարե 15» անվանումը կրող զորավարժություններն ամենամյա են, որոնք ներառում են նաև հրթիռներով և ԱԹՍ-ներով տարբեր օպերացիաներ:

13:24 - 16 հունվարի, 2021

«Երևան սիթի»-ում գնումներ կատարողները ոչ թե ադրբեջանցիներ են եղել, այլ Իրանի ՊՆ ներկայացուցիչներ |infocheck.am|

infocheck.am: Սոցցանցերում և մամուլում տեղեկություն է տարածվում այն մասին, թե իբր ժամեր առաջ Կոմիտասի «Երևան սիթի» սուպերմարկետների ցանցում ՀՀ պաշտպանության նախարարության աշխատակիցների ուղեկցությամբ 4 ադրբեջանցիներ գնումներ են կատարել։ Տեղեկությանը կից տարածվում է նաև լուսանկար։ Պաշտպանության նախարարությունը, անդրադառնալով լուրին, հայտնում է, որ այն չի համապատասխանում իրականությանը։ «Տարածվող լուսանկարում ոչ թե ադրբեջանցիներ են եղել, այլ Իրանի Իսլամական Հանրապետության Զինված ուժերի պատվիրակության ներկայացուցիչներ։ Վերջիններս ժամանել են Հայաստան աշխատանքային այցով, որի ընթացքում Ռազմական ոստիկանության աշխատակիցները ուղեկցել են նրանց»։

12:17 - 15 հունվարի, 2021

Իրանի Արևելյան Ադրբեջանի ղեկավարը ՀՀ-ի հետ սահմանային շուկա ստեղծելու պատրաստակամություն է հայտնել |armenpress.am|

armenpress.am: Իրանի Իսլամական Հանրապետության Արևելյան Ադրբեջան նահանգի ղեկավար Մոհամադ Ռեզա Փուր Մոհամադին հայտնել է, որ հաշվի առնելով երկրամասի բարձր առաջնահերթությունը` մեծացնել միջազգային առևտուրը, այն պատրաստ է սահմանային շուկա ստեղծել Հայաստանի հետ: Այս մասին հայտնում է ԻՌՆԱ գործակալությունը: «Եթե այդ սահմանային շուկան ստեղծելու ցանկությունն ունենա նաև Հայաստանը, ապա մենք կկարողանանք այն ստեղծել ամենամոտ ապագայում»,- Հայաստանում Իրանի դեսպանի և մասնավոր սեկտորի հետ հանդիպման ընթացքում ասել է Արևելյան Ադրբեջանի ղեկավարը: Նահանգի ղեկավարն, անդրադառնալով Հայաստանի և Ադրբեջանի միջև առկա հակամարտությանը, նշել է, որ վերջին բախումների ընթացքում Իրանը մնացել է չեզոք` ձգտելով խաղաղության և հանգստության:

12:03 - 15 հունվարի, 2021

ԱՄՆ-ն պատժամիջոցներ է սահմանել Իրանի երկու քաղաքացիների և 16 կազմակերպությունների նկատմամբ |shantnews.am|

shantnews.am: ԱՄՆ-ն պատժամիջոցներ է կիչառել լ Իրանի երկու քաղաքացիների և 16 կազմակերպությունների նկատմամբ։Հաղորդում է ՏԱՍՍ-ը։ ԱՄՆ ֆինանսների նախարարությունը հայտարարել է, որ միակողմանի սահմանափակումներ են մտցվում Իրանի երկու քաղաքացիների և 16 բիզնես ընկերությունների նկատմամբ՝ իսլամական հանրապետության ղեկավարության հետ առնչություն ունենալու պատճառով։ Բացի դրանից ,մեկ անձ էլ , Իրաքի քաղաքացի Միրջիրաշ ալ-Մուհամեդավը մեղադրվում է «Իսլամական պետություն» ահաբեկչական կազմակերպության հետ կապ ունենալու մեջ : ԱՄՆ ֆինանսների նախարարության պատժամիջոցների ցուցակում ընդգրկվելը նշանակում է ակտիվների սառեցում ԱՄՆ-ում,ինչպես նաև արգելք է սահմանվում ամերիկացի քաղաքացիների կամ ընկերությունների հետ բիզնես ներգրավվածության գործարքներ կնքելու համար։

20:59 - 13 հունվարի, 2021

Իրանը ռազմածովային հրթիռային վարժանքներ է սկսել Օմանի ծոցում |armenpress.am|

armenpress.am: Իրանական ռազմածովային ուժերը Օմանի ծոցում ձեռնամուխ են եղել հրթիռային վարժանքների: Այդ մասին հաղորդել Է Mehr լրատվական գործակալությունը: Նրա տվյալներով՝ վարժանքներն անցկացվելու են մյուս բանակային ստորաբաժանումների աջակցությամբ եւ տեւելու են երկու օր: Իրանը կանոնավոր կերպով զորավարժություններ Է անցկացնում: Ավելի վաղ Իսլամական հեղափոխության պահապանների զորակազմը (ԻՀՊԶ) ստորգետնյա հրթիռային բազա Է շահագործման հանձնել Պարսից ծոցի ափին: Հաղորդագրությունը հայտնվել Է ԱՄՆ-ի եւ Իրանի միջեւ հարաբերությունների սրման եւ մամուլում այն շահարկումների ֆոնին, թե Դոնալդ Թրամփի հեռացող վարչակազմը կարող Է հարված հասցնել Իրանին մինչեւ հունվարի 20-ին իշխանության իր ժամկետի լրանալը: ԱՄՆ-ի պաշտպանության նախարարի պաշտոնակատար Քրիս Միլլերն ավելի վաղ հայտնել Էր, որ ԱՄՆ-ն Իրանի սպառնալիքներից հետո տարածաշրջանում Է թողել «Նիմից» ավիակիրը, որը պլանավորվել Էր դուրս բերել այնտեղից: 2020 թվականի հունվարի սկզբին Իրանում գեներալ Քասեմ Սուլեյմանի զոհվելու տարելիցի լույսով սաստկացել Է հակամերիկյան հռետորաբանությունը եւ ավելի ու ավելի հաճախ են սկսել նախազգուշացումներ հնչել ԱՄՆ-ի հասցեին՝ գրոհի դեպքում: Այսպես, ըստ Tasnim գործակալության, Իրանի գերագույն առաջնորդի խորհրդական գեներալ-մայոր Յախյա Ռահիմ Սաֆարին կոչ Է արել ԱՄՆ-ին՝ խուսափել սխալներից, հայտարարելով, որ Իրանի զինվորականները կարող են ջրասույզ անել ամերիկյան ավիակիրները, հաղորդել Է ՌԻԱ Նովոստին:

17:51 - 12 հունվարի, 2021

ԵՄ-ը լրջորեն մտահոգված է Իրանի՝ ուրանի հարստացման գործողություններով |1lurer.am|

1lurer.am: Եվրամիությունը հայտարարություն է տարածել Իրանի հետ միջուկային ծրագրի և Իսլամական Հանրապետության այս ոլորտում վերջին ակտիվությունների վերաբերյալ՝ նշելով, որ իր հավատարմությունն է հայտնում և շարունակում է իր աջակցությունը միջուկային ծրագրի համատեղ գործողությունների համապարփակ ծրագրին: Այս ծրագիրը գլոբալ միջուկային զենքի չտարածման ճարտարապետության հիմնական տարրն է: «Մենք խորապես ցավում ենք վերջին երկու տարվա ընթացքում Իրանի ձեռնարկած մտահոգիչ քայլերի համար: ԵՄ-ն Իրանին բազմիցս կոչ է արել դադարեցնել բոլոր գործողությունները, որոնք չեն համապատասխանում Իրանի միջուկային համաձայնագրով ստանձնած պարտավորություններին: Ուրանի մինչև 20% հարստացումը խոր մտահոգության տեղիք է տալիս: Այս կարևոր փուլում Իրանի գործողությունը նաև ռիսկային է, ինչը կարող է խարխլել դիվանագիտական գործընթացին ուղղված ջանքերը: Իրանին հորդորում ենք զերծ մնալ հետագա սրացումից և անհապաղ դադարեցնել նման գործողությունները: Խիստ կարևոր է շարունակել լիարժեք համագործակցությունը Ատոմային էներգիայի միջազգային գործակալության հետ»,- ասվում է հայտարարության մեջ:

17:15 - 12 հունվարի, 2021

Իրանն արգելում է Covid-19-ի պատվաստանյութերի ներմուծումը Մեծ Բրիտանիայից և ԱՄՆ-ից |1lurer.am|

1lurer.am: Օտարերկրյա ընկերություններին թույլ չի տրվի Covid-19-ի պատվաստանյութեր փորձարկել Իրանի ժողովրդի վրա՝ հայտարարել է նախագահ Հասան Ռոհանին: Ավելի վաղ երկրի գերագույն ղեկավարն արգելել էր Միացյալ Թագավորությունում և ԱՄՆ-ում արտադրվող պատվաստանյութերի կիրառումն Իրանում՝ ասելով, որ դրանք «բոլորովին անվստահելի են»: Այս մասին հայտնում է france24-ը: «Արտասահմանյան ընկերությունները ցանկանում էին մեզ պատվաստանյութեր տալ, որպեսզի դրանք փորձարկվեն Իրանի ժողովրդի վրա: Բայց առողջապահության նախարարությունը կանխեց դա»,- ասել է Ռոհանին հեռուստատեսային ելույթում՝ չնշելով ընկերությունների անուններն ու չներկայացնելով այլ մանրամասներ: «Մեր ժողովուրդը չի լինի փորձարկման օբյեկտ՝ պատվաստանյութեր արտադրող ընկերությունների համար»,- հավելել է Ռոհանին: «Մենք ձեռք կբերենք օտարերկրյա անվտանգ պատվաստանյութեր»: Արձագանքելով Իրանի գերագույն առաջնորդի արգելքին՝ Առողջապահության համաշխարհային կազմակերպության արտակարգ իրավիճակների տնօրեն Մայքլ Ռայանը շեշտել է, որ համաշխարհային կազմակերպությունը բազմիցս կոչեր է արել «չքաղաքականացնել վիրուսը»:

14:49 - 11 հունվարի, 2021

Իրանի դեմ պատժամիջոցները չչեղարկելու դեպքում ՄԱԳԱՏԷ-ի դիտորդներին երկրից արտաքսելու և մինչև 20% ուրան հարստացնելու Թեհրանի որոշումը ԱՄՆ-ը շանտաժ է համարում |tert.am|

tert.am: ԱՄՆ-ը կարծում է, որ միջազգային հանրությունը պետք է դատապարտի Իրանի Մեջլիսի կոչերը երկրից ՄԱԳԱՏԷ-ի (Ատոմային էներգիայի միջազգային գործակալություն) դիտորդներին պատժամիջոցների չվերացվելու դեպքում վտարելու վերաբերյալ, ТАСС-ի փոխանցմամբ՝ հայտարարել է ԱՄՆ պետքարտուղար Մայք Պոմպեոն: «Իրանի իշխանությունները միջուկային ծրագիրը կրկին օգտագործում են միջազգային հանրությանը շանտաժի ենթարկելու և տարածաշրջանային անվտանգությունը սպառնալիքի տակ դնելու նպատակով»,- նշել է Պոմպեոն: Մինչ այդ Իրանի Մեջլիսի Գերագույն խորհրդի անդամ Ահմադ Ամիրաբադի Ֆարահանին հայտարարել էր, որ Թեհրանը կվտարի երկրից ՄԱԳԱՏԷ-ի դիտորդներին և կհրաժարվի գործակալության հետ հետագա աշխատանքից, եթե մինչև փետրվարի 21-ը Իրանի ֆինանսական, բանկային և նավթային ոլորտների նկատմամբ կիրառվող պատժամիջոցները չդադարեցվեն: 2020 թ. դեկտեմբերի 2-ին Սահմանադրության պահապանների խորհուրդը հավանություն էր տվել Իրանի Մեջլիսի ընդունած օրենքին, որով կառավարությունը պատրաստվում է բարձրացնել ուրանի հարստացման մակարդակը մինչև 20%-ի: Իրանցի օրենսդիրներն այս կերպ ակնկալում են, որ սա կստիպի չեղարկել հակաիրանական պատժամիջոցները:

10:17 - 10 հունվարի, 2021

Իրանի ավելի քան 700 նավեր նավարկության են դուրս եկել Պարսից ծոցում |1lurer.am|

1lurer.am: Հարյուրավոր ռազմանավեր ու մոտորանավակներ այսօր դուրս են եկել Պարսից ծոց: Ավելի քան 700 ծովային փոխադրամիջոցներ նավարկել են իրանական ռազմավարական նշանակության Ֆարսի կղզու շուրջը՝ փոխանցում է Tasnim լրատվական գործակալությունը: Ռազմանավերը պատկանում են Իսլամական հեղափոխության պահապանների կորպուսին: Գործողության հրամանատարի խոսքով՝ ռազմական ու քաղաքացիական նավերը Ֆարսի են ուղևորվել Բուշերի հարավարևմտյան ծովափերից: Իրանի նախաձեռնությունը կապված է 2016-ին ԱՄՆ ռազմածովային ուժերին պատկանող նավերի կալանման հետ, որոնք խախտել էին ջրային տարածքային սահմանները: Կալանվելու հաջորդ օրը նավերն ու անձնակազմն ազատ էին արձակվել ներողություն խնդրելուց և այն բանից հետո, երբ ստուգումները ցույց էին տվել, որ ամերիկյան նավերը սահմանը միտումնավոր չէին խախտել:

18:35 - 09 հունվարի, 2021

Իրանը չի բացառում ՄԱԳԱՏԷ-ի փորձագետների արտաքսումը |azatutyun.am|

azatutyun.am: «Եթե Վաշինգտոնի կողմից Իրանի դեմ սահմանված պատժամիջոցները չվերացվեն մինչև փետրվարի 21-ը, Թեհրանը կարող է արտաքսել ՄԱԿ-ի կազմում գործող Ատոմային Էներգիայի միջազգային գործակալության փորձագետներին»,- այսօր նման հայտարարությամբ է հանդես եկել Իրանի խորհրդարանի պատգամավոր Ահմադ Ամիրաբադի Ֆարահանին։ Իրանցի օրենսդրի խոսքով` պաշտոնական Թեհրանը նման քայլի կարող է դիմել՝ հիմք ընդունելով տարեվերջին ընդունված օրենքը, որի համաձայն եթե ֆինանսական, բանկային և նավթարդյունաբերության ոլորտներում ԱՄՆ կողմից սահմանված պատժամիջոցները չվերացվեն մինչև փետրվարի 21-ը, ապա Թեհրանն իրեն իրավունք կվերապահի արգելել Իսլամական Հանրապետության տարածքում գործող միջուկային օբյեկտներում Ատոմային էներգիայի միջազգային գործակալության կողմից իրականացվող տեսչական այցերը։

17:09 - 09 հունվարի, 2021

Իրանում ևս 7 կամավոր ստացել է Covid-19-ի դեմ տեղական պատվաստանյութը |armenpress.am|

armenpress.am: Իրանի առողջապահության ոլորտի պաշտոնյաներն անհրաժեշտ հաստատումներ են տվել ներքին մշակված COVID-19 պատվաստանյութով ևս 7 կամավորների ներարկելու համար: Ինչպես տեղեկացնում է IRNA-ն, այս մասին հայտնել է Թեհրանի բժշկական գիտության համալսարանի պաշտոնյան: Համեդ Հոսեինին IRNA-ին հայտնել է, որ ևս 7 կամավոր արդեն ստացել են COVIran-Barekat պատվաստանյութը: Առաջին 7 կամավորի առողջական վիճակը լավ է: Պաշտոնյայի խոսքով՝ պատվաստանյութի երկրորդ փորձարկումը կտևի երկու ամիս, որին կմասնակցի 56 կամավոր: Յուրաքանչյուր կամավոր պետք է երկու չափաբաժնով պատվաստում ստանա, երկրորդը՝ առաջին պատվաստումը ստանալուց 14 օր հետո:

16:37 - 09 հունվարի, 2021