hetq.am: Բելառուսի նախագահ Ալեքսանդր Լուկաշենկոն Մինսկում ԱՊՀ երկրների անվտանգության մարմինների և հետախուզական ծառայությունների ղեկավարների հետ 19-րդ խորհրդակցության ժամանակ հայտարարել է, որ Ադրբեջանի նախագահ Իլհամ Ալիևի հետ Դուբայում քննարկել է Լեռնային Ղարաբաղում գտնվող հայերի հարցը։ 

«Նրա հետ Դուբայում շփվել ենք նաև Ղարաբաղում գտնվող մարդկանց մասին (նկատի ունի այնտեղ մնացած փոքրաթիվ հայերի, խմբ.)։ Ասում է՝ ոչ մեկին չենք դիպչի։ Մենք, ընդհակառակը, այնպես կանենք, որ բոլորը հասկանան, որ մենք քաղաքակիրթ երկիր ենք»,- TACC գործակալության փոխանցմամբ Ալիևին մեջբերել է Լուկաշենկոն։

Նրա խոսքով՝ ինքը ծանոթ է Ադրբեջանում առկա իրավիճակին։ «Ես գիտեմ Ադրբեջանում տիրող իրավիճակը, իշխանությունն այնտեղ ուժեղ է, կարող են դա անել՝ աջակցել և օգնել մարդկանց»,- նշել է Բելառուսի նախագահը։ 

Լուկաշենկոն անդրադարձել է նաև տաջիկ-ղրղզական սահմանային հիմնախնդրին։ Ըստ նրա՝ Տաջիկստանն ու Ղրղզստանը հաջորդ տարի կարող են ստորագրել սահմանների մասին պայմանագիր։ 

«Ես ողջ ժամանակ գովաբանում եմ ղեկավարներին (Տաջիկստանի ու Ղրղզստանի-խմբ.)։ Դե, պարզապես կեցցեն իրենք, սահմանների ավելի քան 90%-ը համաձայնեցվել է: Եվ ես վստահ եմ, որ հաջորդ տարի նրանք կստորագրեն սահմանի մասին պայմանագիր»,- հավելել է Լուկաշենկոն։

Ղրղզստանն ու Տաջիկստանը ՀԱՊԿ անդամ պետություններ են, սակայն այս հանգամանքը չի խանգարում, որ երկու երկրների սահմանին գրանցվեն զինված բախումներ։