2023-ի առաջին կիսամյակի համեմատ ԶՊՄԿ-ի հարկերն այս տարի ավելացել են մոտ 84 տոկոսով։

Այս տարվա առաջին կիսամյակում երկրորդ ամենամեծ հարկատուն «Մոբայլ սենթր»-ն է՝ վճարած 32,3 միլիարդով։ «Մոբայլ սենթր»-ը զբաղվում է հեռախոսների, տեխնիկայի ներմուծմամբ ու արտահանմամբ։ Ընկերության հարկերը շուրջ երկու տարի կտրուկ աճել են՝ Ռուսաստան իրականացվող վերաարտահանման արդյունքում։ Եթե 2023-ի առաջին կիսամյակում «Մոբայլ սենթր»-ի վճարած հարկերի ծավալը մոտ 16 միլիարդ էր, այժմ այդ թիվը կրկնապատկվել է։

2024-ի առաջին կիսամյակում ամենաշատ հարկ վճարած երրորդ ընկերությունը «Գազպրոմ Արմենիա»-ն է, որը վճարել է 27,5 միլիարդի հարկեր՝ 3,1 միլիարդով պակաս անցած տարվա նույն ժամանակահատվածից։ «Գրանդ տոբակո»-ն վճարած 23,5 միլիարդ դրամով չորրորդն է։

Կենցաղային տեխնիկայի ներմուծմամբ, վաճառքով, արտահանմամբ զբաղվող «Փրիթի ուեյ» ընկերությունը, որ առավել հայտնի է որպես Vesta խանութների ցանց, հինգերորդ ամենամեծ հարկատուն է։ Անցած տարվա նույն ժամանակահատվածի համեմատ «Փրիթի ուեյ»-ի հարկերն ավելացել են մոտ 2 միլիարդով։

Նախորդ տարվա առաջին 6 ամիսներին 1 000 խոշոր հարկատուների վերին հորիզոնականներում էր «Արդշինբանկ»-ը՝ մոտ 19 միլիարդի հարկերով։ Այս տարվա առաջին կիսամյակում բանկը հարկերը նվազեցրել է մոտ 69 տոկոսով, վճարել է 5,9 միլիարդ դրամ։ Հարկերի ծավալը նվազեցրել է նաև «Ամերիաբանկ»-ը, եթե անցած տարվա համադրելի ժամանակահատվածում ընկերությունը վճարել էր 19,8 միլիարդ դրամ, այժմ այդ թիվը 17,5 միլիարդ է։

66 տոկոսով հարկերի ծավալը մեծացրել է Վիգեն և Վահե Բադալյաններին պատկանող «Սոֆտ կոնստրակտ» ընկերությունը՝ ավելի հայտնի որպես Vivaro, որը նաև տեխնոլոգիական ուղղվածություն ունի։ Այս տարվա առաջին կիսամյակում ընկերությունը վճարել է 9,3 միլիարդ դրամի հարկեր։