Ուկրաինան հայտարարում է, որ օգոստոսի 15-ի դրությամբ երկրի ԶՈՒ-ն տարբեր ուղղություններով առաջ է շարժվել Կուրսկի շրջանում, և այժմ 1150 քառակուսի կիլոմետր տարածքի 82 բնակավայր գտնվում է ուկրաինական բանակի վերահսկողության տակ։ Այս մասին Զելենսկու հետ հրամանատարական շտաբի նիստում ասել է Ուկրաինայի զինված ուժերի գերագույն գլխավոր հրամանատար Ալեքսանդր Սիրսկին։

Ըստ Meduza-ի՝ Ուկրաինայի զինված ուժերը վերահսկում են Կուրսկի շրջանի 45-50 բնակավայրեր՝ 500-700 քառակուսի կիլոմետր տարածքով։

ՌԴ ՊՆ-ն էլ այսօր հայտարարել է, որ վերականգնել վերահսկողությունը Կուրսկի շրջանի Կրուպեց գյուղի վրա․ «Հակառակորդի կենդանի ուժի ոչնչացումն ավարտված է, գյուղի նկատմամբ վերահսկողություն է հաստատվել», - նշել է ՌԴ ռազմական գերատեսչությունը։ ՌԴ-ից պարբերաբար հայտարարում են, որ հակառակորդին հեռացնում են իրենց տարածքից։

Նշենք, որ և՛ Ուկրաինան, և՛ Ռուսաստանը պարբերաբար հայտարարում են գերիներ վերցնելու մասին, հրապարակում տեսանյութեր ու լուսանկարներ գերեվարումից։