azatutyun.am: Հայաստանի և Ադրբեջանի միջև սահմանազատման հանձնաժողովների հաջորդ հանդիպումը պետք է կայանա հունվարին, տեղական լրատվամիջոցներին տված հարցազրույցում ասել է Ադրբեջանի նախագահ Իլհամ Ալիևը։

«Ամեն դեպքում, մենք դա առաջարկել ենք», - ադրբեջանական լրատվամիջոցների փոխանցմամբ՝ ասել է նա։

Գարնանը Տավուշի հատվածի չորս գյուղերն Ադրբեջանին վերադարձնելուց հետո կողմերը վավերացրին սահմանազատման կանոնակարգը: Այս փաստաթղթի համաձայն՝ Երևանն ու Բաքուն պետք է համաձայնեցնեն, թե առաջիկայում որ հատվածներն են սահմանազատվելու:

Ալիևը նաև մի շարք հայտարարություններ է արել։ Խոսելով խաղաղության պայմանագրի մասին՝ նա նշել է, որ եթե այն Երևանին պետք չէ, Բաքվին էլ պետք չէ։

Երևանը բազմիցս է հայտնել խաղաղության պայմանագրի ստորագրման պատրաստակամությունը։

Հայաստանը, վարչապետ Փաշինյանի փոխանցմամբ, մոտ 60 օր առաջ է Բաքվին փոխանցել խաղաղության պայմանագրի 2 չհամաձայնեցված հոդվածների վերաբերյալ իր առաջարկները։ Պաշտոնապես մինչև այս պահը չի հայտարարվել, թե դրանց պատասխանը ստացվել է։

Թե՛ Երևանը, թե՛ Բաքուն հաստատել են՝ խաղաղության 17 կետանոց համաձայնագրի նախագծում 2 չհամաձայնեցված հոդվածների շուրջ են բանակցում։