hy.armradio.am: Հունվարի 17-ին Բաքվում սկսվող քրեական դատավարություններն ընդդեմ Լեռնային Ղարաբաղի նախկին բարձրաստիճան պաշտոնյաների արդեն իսկ կանխորոշված են, իր պաշտոնական կայքում հրապարակված հոդվածում գրել է Միջազգային քրեական դատարանի նախկին գլխավոր դատախազ Լուիս Մորենո Օկամպոն՝ անդրադառնալով Ադրբեջանի նախագահ Իլհամ Ալիևի ռեժիմի կողմից կազմակերպված ցուցադրական դատավարություններին։

Ադրբեջանի նախագահ Ալիևն իր թշնամիներին վերացնելու համար օգտագործում է Ստալինյան մարտավարությունը, ցուցադրական դատավարությունները: 1930-ականներին Ստալինը խոշտանգել և մահապատժի է ենթարկել իր հին ընկերներին ՝ բոլշևիկներին, առանցքային գեներալներին և գաղտնի ոստիկանության գործակալներին, գրել է նա։

Օկամպոն նշել է, որ ցուցադրական դատավարությունները Ալիևի վարչակարգի կողմից օգտագործվում են Լեռնային Ղարաբաղի հայերին ճնշելու և Ադրբեջանի բռնապետական իշխանությունը պահպանելու համար։

«Հունվարի 17-ին Ադրբեջանը քրեական դատավարություններ է սկսելու Լեռնային Ղարաբաղի հայերի, այդ թվում՝ նախկին նախագահների և քաղաքացիական անձանց, նաև  նախկին պետնախարար Ռուբեն Վարդանյանի նկատմամբ՝ առանձին դատավարությամբ։ Այս վարույթները կանխորոշված ​​են, նրանք արդեն դատապարտված են։ Ադրբեջանի կեղծ մեղադրանքները քողարկում են Լեռնային Ղարաբաղի ժողովրդի, այդ թվում ՝ բանտարկյալների դեմ կատարված հանցագործությունները», -գրել է Օկամպոն: