azatutyun.am: Չինաստանը պատասխան հարված է հասցնում ԱՄՆ նախագահ Դոնալդ Թրամփի կողմից սահմանված նոր սակագներին՝ ընդունելով մի շարք հակաքայլեր:

Չինաստանը 34 տոկոս մաքսատուրք է սահմանել ամերիկյան ապրանքների համար, ինչպես նաև որոշ հազվագյուտ հանածոների արտահանման սահմանափակումներ: Չինաստանից ներկրվող ապրանքների նկատմամբ ԱՄՆ-ն ընդհանուր 54 տոկոս մաքսատուրք է սահմանել (սկզբում 20 տոկոս, իսկ այսօր արդեն 34 տոկոս):

Պեկինը նաև սահմանափակումներ է մտցրել մոտ 30 ամերիկյան կազմակերպությունների նկատմամբ, հիմնականում պաշտպանության հետ կապված ոլորտներում: Նա հայցադիմում է ներկայացրել Առևտրի համաշխարհային կազմակերպություն՝ պահանջելով վերացնել մաքսատուրքերը, քանզի դրանք «լրջորեն խախտում են կազմակերպության կանոնները»:

«Դա տիպիկ միակողմանի ահաբեկման պրակտիկա է, որը վտանգում է համաշխարհային տնտեսական և առևտրային կարգի կայունությունը: Չինաստանը կտրականապես դեմ է դրան», - հայտարարել է պաշտոնական Պեկինը:

Արժույթի միջազգային հիմնադրամի գործադիր տնօրենն, իր հերթին, հայտարարել է, որ նոր մաքսատուրքերը «դանդաղ աճի ժամանակ ակնհայտորեն զգալի ռիսկ են ներկայացնում համաշխարհային հեռանկարի համար»: Կրիստալինա Գեորգիևան նշել է, որ ԱՄՀ-ը դեռ ուսումնասիրում է միջոցառումների «մակրոտնտեսական հետևանքները», և ընդգծել է, որ անհրաժեշտ է խուսափել այնպիսի գործողություններից, որոնք կարող են ավելի մեծ վնաս հասցնել համաշխարհային տնտեսությանը: