ՌԴ նախագահ Վլադիմիր Պուտինը շնորհավորել է Հայաստանի նախագահ Վահագն Խաչատրյանին և վարչապետ Նիկոլ Փաշինյանին Հայաստանի՝ Ռուսաստանի Դաշնության հետ դիվանագիտական ​​հարաբերությունների հաստատման 30-ամյակի կապակցությամբ և նշել, որ երկու երկրները բոլոր ոլորտներում համագործակցության զգալի փորձ են կուտակել։

«Ռուսաստանի և Հայաստանի միջև ընթանում է բովանդակալից քաղաքական երկխոսություն, զարգանում է արդյունավետ համագործակցություն առևտրային, տնտեսական, գիտական, տեխնիկական, հումանիտար և շատ այլ ոլորտներում»,- ՏԱՍՍ-ի հաղորդմամբ՝ ասվում է Կրեմլի կայքում տեղադրված շնորհավորական հեռագրում։

«Մոսկվան և Երևանը համակարգում են ջանքերը ՀԱՊԿ–ի, ԵԱՏՄ-ի, ԱՊՀ–ի և այլ միջազգային կառույցների շրջանակում։ 2020 և 2021 թվականներին ձեռք բերված եռակողմ պայմանավորվածությունների հետևողական կատարումը նպաստում է Անդրկովկասյան տարածաշրջանում անվտանգության և կայունության ամրապնդմանը»։

Բացի այդ, Պուտինը վստահություն է հայտնել, որ ռուս-հայկական բարեկամական, դաշնակցային կապերի հետագա ամրապնդումը համապատասխանում է երկու երկրների ժողովուրդների հիմնարար շահերին։

Հայաստանն ու Ռուսաստանը ուղիղ 30 տարի առաջ՝ 1992թ. ապրիլի 3-ին, հուշագիր ստորագրեցին դիվանագիտական ​​հարաբերությունների հաստատման մասին։

Գլխավոր լուսանկարը՝ ՏԱՍՍ-ի