Մոսկվան Անկարային կոչ է արել հրաժարվել Սիրիայի հյուսիսում ռազմական գործողություն իրականացնելու գաղափարից։ Այս մասին, ՏԱՍՍ-ի փոխանցմամբ, հայտնել է Ռուսաստանի նախագահի՝ սիրիական կարգավորման հարցերով հատուկ ներկայացուցիչ Ալեքսանդր Լավրենտևը։
«[Գործողության] անցկացման մասին վերջնական որոշում դեռ չի կայացվել, այդ պատճառով էլ մենք դիմել ենք և դիմում եմ մեր թուրք գործընկերներին, որպեսզի նրանք զերծ մնան Սիրիայի տարածքում ուժային գործողությունների իրականացումից», - ասել է նա։
Լավրենտևը նշել է, որ դա կարող է հանգեցնել իրավիճակի հետագա սրման, այդ թվում՝ զինված դիմակայության։
«Դա կարող է խթանել անջատողական տրամադրությունները Սիրիայի հյուսիս-արևելքի այսպես կոչված ինքնավար վարչակազմում, այս հարցում շահագրգռված չեն ոչ Թուրքիան, ոչ Ռուսաստանը, ոչ Իրաքը, ոչ Իրանը», - ընդգծել է նա։
Լավրենտևի խոսքով՝ պետք է փորձել խնդրին այլ լուծում տալ՝ առանց ուժային մեթոդների։ Սիրիայի հյուսիսում նոր ռազմական գործողության անցկացման հաշվին Թուրքիան ամբողջությամբ չի լուծի իր ազգային անվտանգության խնդիրները։
«Թուրքիայի ազգային անվտանգության խնդիրները կարելի է լուծել, կարծում եմ, միայն սիրիական կառավարական զորքերի կողմից տարածքների սահմանների նկատմամբ լիակատար վերահսկողության սահմանման հաշվին։ Ցավոք, այդպիսի բան դեռ չի նկատվում, այնտեղ դեռևս իրոք հիմնականում գտնվում են ինքնապաշտպանության քրդական ջոկատները», - ասել է Լավրենտևը։
Նորա Վանյան
Հետևե՛ք մեզ նաև Telegram-ում
comment.count (0)