Սիրիա

Հալեպում ՀՀ գլխավոր հյուպատոսություն են այցելել Թուրքիայի գլխավոր հյուպատոսն ու փոխհյուպատոսը

Մարտի 26-ին Հալեպում ՀՀ գլխավոր հյուպատոսություն է այցելել Հալեպում Թուրքիայի գլխավոր հյուպատոս Մուամմեր Հաքան Ջենքիզը և փոխհյուպատոս Էրինը․ տեղեկացնում են Հալեպում ՀՀ գլխավոր հյուպատոսությունից։ «Ողջունելով հյուրերին Հալեպում ՀՀ գլխավոր հյուպատոս Արա Ավետիսյանը շնորհավորել է Մ. Ջենքիզին՝ նախ երկարաժամկետ դադարից հետո Թուրքիայի հյուպատոսության վերաբացման. ապա այդ պաշտոնում իր նշանակման և Ռամադան ամսվա կապակցությամբ: Նա տեղեկացրել է, որ ՀՀ գլխավոր հյուպատոսությունը գործում է Հալեպում ավելի քան 30 տարի և իր հիմնադրման օրվանից երբևէ չի դադարեցրել իր գործունեությունը, նույնիսկ Հալեպի պաշարման և պատերազմի օրերին: Ա. Ավետիսյանը շնորհակալություն է հայտնել վերջերս ՀՀ-ից Սիրիա մարդասիրական օգնության տեղափոխման հարցում թրքական կողմի աջակցության և այդ երկրով ավտոշարասյան անարգել անցման կապակցությամբ : Շնորհակալություն հայտնելով ընդունելության համար Մ. Ջենքիզը նշել է, որ ելնելով դիվանագիտական էթիկայի կանոններից՝ իր պարտքն է համարել այցելելու Հալեպում գործող միակ դիվանագիտական ներկայացուցչություն և ծանոթանալու իր հայ գործընկերոջը: ՀՀ գլխավոր հյուպատոսը հաջողություն է մաղթել թուրք գործընկերոջը իր դժվարին առաքելությունում է: Հանդիպման ավարտին Մ. Ջենքիզը ջերմ շնորհակալություն է հայտնել ընդունելության համար և հրավիրել է Ա. Ավետիսյանին Թուրքիայի գլխավոր հյուպատոսության բացմանը, ինչպես նաև հարմարության դեպքում այցելելու ԹՀ հյուպատոսության ժամանակավոր գրասենյակ՝ հրավերն ընդունվել է: Կողմերը պայմանավորվել են շարունակել գործակցությունը»,- ասված է հաղորդագրությունում։

18:10 - 26 մարտի, 2025

Հայաստանի կողմից մարդասիրական օգնությունը հասել է Հալեպ |civilnet.am|

civilnet.am: Հայաստանի կողմից մարդասիրական օգնությունը հասել է Սիրիայի Հալեպ քաղաք։ Այս մասին հայտնում է Սիրիայում լույս տեսնող «Գանձասար» պարբերականը։ Մարդասիրական օգնությունը Հալեպի փոխնահանգապետ Ֆավազ Հիլալիին է փոխանցել Սիրիայում ՀՀ դեսպան Ռուբեն Խարազյանը։ «Պատմությունը փաստում է, որ սիրիացի և հայ ժողովուրդները բարեկամական հարաբերություններ ու փոխադարձ աջակցություն են ունեցել։ Հուսով ենք, որ սիրիացի ժողովուրդը կհաղթահարի այս մարտահրավերները, և Սիրիան նորից կծաղկի»,- ասել է ՀՀ դեսպանը։ Հալեպի փոխնահանգապետն իր շնորհակալությունն ու երախտագիտությունն է հայտնել հայ ժողովրդին և Հայաստանի կառավարությանը՝ Սիրիա մարդասիրական օգնություն ուղարկելու համար։ Նա շեշտել է, որ Հայաստան-Սիրիա բարեկամական հարաբերություններն ամուր հիմքի վրա են։ Սիրիային ուղարկված մարդասիրական բեռը ներառում է սնունդ և բժշկական պարագաներ, որոնք կօգնեն մեղմել պատերազմի և ճգնաժամի հետևանքները բարեկամ սիրիացի ժողովրդի համար: Հումանիտար բեռները Սիրիա են մեկնել հայ-թուրքական սահմանի «Մարգարա» անցակետով։Հայաստանից Սիրիա հումանիտար օգնություն ուղարկելու նպատակով Հայաստան-Թուրքիա փակ սահմանի անցակետը բացվել է մարտի 21-ին՝ տասն օրով։

13:44 - 24 մարտի, 2025

Հայաստանից Սիրիա ուղարկված մարդասիրական օգնությունն իր մեջ ներառում է սնունդ և բժշկական պարագաներ

Հայաստանից Սիրիա ուղարկված մարդասիրական օգնությունն իր մեջ ներառում է սնունդ և բժշկական պարագաներ: Այս մասին նշված է ՀՀ ԱԳՆ-ի տարածած հաղորդագրության մեջ: «Սիրիային ուղարկված մարդասիրական բեռը ներառում է սնունդ և բժշկական պարագաներ, որոնք կօգնեն մեղմել պատերազմի և ճգնաժամի հետևանքները բարեկամ սիրիացի ժողովրդի համար: Մարդասիրական օգնությունը Սիրիա կառաքվի Հայաստանը Թուրքիային կապող «Մարգարա»-ի անցակետով, որն այս նպատակով բացվել է Թուրքիայի հետ երկկողմ պայմանավորվածության արդյունքում»,- նշում են ՀՀ ԱԳ նախարարությունից՝ շնորհակալություն հայտնելով նաև թուրքական կողմին՝ մարդասիրական բեռի առաքման սահուն կազմակերպմանն օժանդակելու համար։ Հայաստանի Հանրապետության ԱԳ նախարարի տեղակալ Վահան Կոստանյանի և Սիրիայի Արաբական Հանրապետության արտաքին գործերի և սփյուռքի նախարար Ասաադ Հասան Ալ-Շայբանիի՝ հունվարի 27֊ին կայացած հանդիպման ժամանակ ձեռք բերված պայմանավորվածության հիման վրա մարտի 21-ին Հայաստանի կողմից «Մարգարայի» անցակետով մարդասիրական օգնություն է ուղարկվել Սիրիա:

17:52 - 21 մարտի, 2025

Հայկական հումանիտար չորս բեռնատարները Թուրքիայի տարածքով ուղևորվել են Սիրիա |civilnet.am|

civilnet.am: Հայկական հումանիտար բեռները հայ-թուրքական սահմանի «Մարգարա» անցակետով ուղևորվել են Սիրիա։ Այսօր՝ մարտի 21-ին, տասն օրով բացվել է հայ-թուրքական սահմանի «Մարգարա» անցակետը։ Հայաստանից Թուրքիայի տարածքով Սիրիա է ուղարկվել չորս բեռնատար սնունդ, դեղորայք, հիգիենայի պարագաներ, առաջին անհրաժեշտության այլ իրեր: ՀՀ ԱԳ փոխնախարար Վահան Կոստանյանն X-ի իր միկրոբլոգում անդրադարձել է մարդասիրական օգնության հարցում թուրքական կողմի հետ համագործակցությանը։ «Կցանկանայի գնահատել նաև թուրք գործընկերների համագործակցային մոտեցումը մարդասիրական այս առաքելության վերաբերյալ»,- գրել է Կոստանյանը։ Մարտի 21-ից 31-ը «Մարգարա» անցակետի բացման մասին որոշումն ընդունվել է կառավարության մարտի 20-ի նիստում։ Հայ-թուրքական սահմանի «Մարգարա» անցակետը վերջին անգամ բացվել էր 2023-ի փետրվարին։ Հարավարևելյան Թուրքիայում փետրվարի 6-ի ավերիչ երկրաշարժից հետո Հայաստանը ցամաքային սահմանով փրկարարական խմբեր և մարդասիրականօգնություն էր ուղարկել այդ երկիր։ Հայաստանը և Թուրքիան 2022-ի հուլիսին պայմանավորվել էին բացել ցամաքային սահմանը երրորդ երկրների քաղաքացիների համար ամենասեղմ ժամկետներում: Սակայն մինչ օրս այդ որոշումն իրականություն չի դարձել։ Հայաստանի և Թուրքիայի միջև ցամաքային սահմանը փակ է 1993-ից:

14:08 - 21 մարտի, 2025

Սիրիա հումանիտար օգնություն հասցնելու լոգիստիկ հարցերը քննարկվել և համաձայնեցվել են Թուրքիայի հետ. ԱԳՆ խոսնակ |azatutyun.am|

azatutyun.am: Ցամաքային ճանապարհով Սիրիա հումանիտար օգնություն հասցնելու լոգիստիկ հարցերը քննարկվել և համաձայնեցվել են Թուրքիայի հետ գործող դիվանագիտական խողովակներով, «Ազատության» հարցին ի պատասխան՝ հատնում է ԱԳՆ խոսնակ Անի բադալյանը: «Ազատությանը» մասնավորապես հարցրել էր՝ արդյոք Երևան-Անկարա մակարդակում է ձեռք բերվել Մարգարայի անցակետը 10 օրով բացելու որոշումը: Հայաստանը Թուրքիային կապող՝ 32 տարի փակված Մարգարայի կամուրջը վաղվանից տասն օրով կբացվի՝ դարձյալ մարդասիրական օգնություն տեղափոխելու համար։ Կառավարության այսօր ընդունած որոշման համաձայն՝ Հայաստանը մարդասիրական օգնությունը Սիրիա է ուղարկելու։ Պաշտոնական Անկարան բազմիցս է հայտարարել՝ սահմանը կբացվի հայ - ադրբեջանական բանակցությունների դրական ելքի դեպքում՝ շեշտելով՝ հայ - թուրքական և հայ - ադրբեջանական հարաբերությունների կարգավորման գործընթացները փոխկապակցված են։

21:51 - 20 մարտի, 2025

Պուտինն ուղերձ հղել Սիրիայի նախագահին՝ համագործակցության զարգացման պատրաստակամություն հայտնելով |factor.am|

factor.am: ՌԴ նախագահ Վլադիմիր Պուտինն ուղերձ է հղել Սիրիայի ղեկավար Ահմեդ ալ-Շարաային, հայտնել է ՌԴ նախագահի մամուլի քարտուղար Դմիտրի Պեսկովը, գրում է ՌԻԱ Նովոստին։ «Ռուսաստանի նախագահ Վլադիմիր Պուտինն ուղերձ է հղել սիրիական պետության ղեկավար Ահմեդ ալ-Շարաային, որում աջակցել է երկրում իրավիճակի արագ կայունացմանն ուղղված ջանքերին՝ ի շահ նրա ինքնիշխանության, անկախության, միասնության և տարածքային ամբողջականության ապահովման»,- ասել է Կրեմլի խոսնակը։ Պեսկովը նշել է, որ Պուտինը հաստատել է երկու երկրների համագործակցությունը զարգացնելու իր պատրաստակամությունը։ «Հաստատվել է Ռուսաստանի անփոփոխ պատրաստակամությունը՝ զարգացնելու համագործակցությունը սիրիական ղեկավարության հետ երկկողմ օրակարգի հարցերի ամբողջ շրջանակով՝ ռուս-սիրիական ավանդական բարեկամական հարաբերություններն ամրապնդելու նպատակով»,- ասել է նա։ Հիշեցնենք, որ փետրվարին Պուտինն առաջին անգամ հեռախոսազրույց էր ունեցել Սիրիայի նոր ղեկավարի հետ։ Տապալումից հետո Սիրիայի նախկին նախագահ Բաշար Ասադն ընտանիքի անդամների հետ բնակվում է Մոսկվայում։

18:09 - 20 մարտի, 2025

Հայաստանը 10 օրով բացում է Թուրքիայի հետ սահմանի «Մարգարա» անցակետը

Հայ-թուրքական պետական սահմանի «Մարգարա» անցակետը մարտի 21-31-ը կբացվի՝ ՀՀ անունից Սիրիային ուղարկվելիք մարդասիրական օգնության համար նախատեսված բեռները Թուրքիայի տարածքով, ցամաքային ճանապարհով տեղափոխելու նպատակով: Համապատասխան որոշումը հավանության արժանացավ ՀՀ կառավարության նիստի ժամանակ:

12:40 - 20 մարտի, 2025

Լիբանանի և Սիրիայի ՊՆ ղեկավարները պայմանավորվել են դադարեցնել կրակը սահմանին |1lurer.am|

1lurer.am: Լիբանանի և Սիրիայի պաշտպանության նախարարներ Միշել Մենասան և Մուրհաֆ աբու Կասրան համաձայնության են եկել սահմանին կրակի դադարեցման շուրջ: Ինչպես հաղորդվում է Հանրապետության ՊՆ մամուլի ծառայության հայտարարության մեջ, լիբանանյան կողմի նախաձեռնությամբ ռազմական գերատեսչությունների ղեկավարների միջև տեղի է ունեցել հեռախոսազրույց: «Համաձայնագիրը նախատեսում է երկու կողմերի միջև համագործակցության ուժեղացում՝ սահմանամերձ շրջաններում իրավիճակի կայունացման նպատակով։ Մենք պատրաստ ենք շարունակել համագործակցությունը»,- նշվում է տեքստում։ Պաշտպանության նախարար գեներալ-մայոր Միշել Մենասան և նրա սիրիացի գործընկեր Մուրհաֆ աբու Կասրան համաձայնության են եկել լիբանանյան բանակի հետախուզական վարչության և սիրիական հետախուզության միջև համակարգման շուրջ: Նախարարներն ընդգծել են համատեղ ջանքերի անհրաժեշտությունը սահմանին իրավիճակի վատթարացումը կանխելու համար։ Ավելի վաղ հանրապետության առողջապահության նախարարությունը հայտնել էր, որ Լիբանանի հյուսիս-արևելյան շրջանների գնդակոծությունները հանգեցրել են քաղաքացիական բնակչության շրջանում զոհերի:

09:55 - 18 մարտի, 2025

Լաթաքիայում հզոր պայթյունի հետևանքով կան զոհեր և վիրավորներ. ԶԼՄ-ներ |1lurer.am|

1lurer.am: Սիրիայի Լաթաքիա քաղաքի հարավում գտնվող չորսհարկանի շենքում հզոր պայթյուն է որոտացել: Լրատվամիջոցները նշում են, որ նախնական տվյալներով՝ զոհվել է երեք մարդ, կան վիրավորներ։

20:18 - 15 մարտի, 2025

Երուսաղեմի Հայոց պատրիարքարանը միջազգային հանրության ուշադրությունն է հրավիրել Սիրիայի քրիստոնյաների վիճակի վրա |1lurer.am|

1lurer.am: «Երբ ականատես ենք Սիրիայում շարունակվող խժդժություններին և ավերիչ հակամարտություններին, մեր սրտերը լցվում են խոր վշտով և մտահոգությամբ՝ բոլոր տառապողների համար»,- նշված է Երուսաղեմի Հայոց պատրիարքության մամուլի ծառայության տարածած հաղորդագրության մեջ: Հայտարարության մեջ ասվում է. «Մեզ խորապես հուզում է մեր հայ քրիստոնյա եղբայրների և քույրերի ծանր վիճակը, ովքեր սերունդներ շարունակ ապրել են այդ հողում, որտեղ ապաստանել են 1915 թվականի սարսափելի Հայոց ցեղասպանությունից հետո։ Սիրիան եղել է վերապրածների և նրանց ժառանգների տունը, որոնց ներկայությունը այնտեղ քրիստոնյա հայի տոկունության և հավատքի վկայությունն է։ Այսօր Սիրիայում գտնվող բոլոր քրիստոնեական համայնքների անվտանգությունն ու պաշտպանվածությունը կրկին վտանգված է բռնության և քաոսի պատճառով, որը, ցավոք, պատուհասում է տարածաշրջանին։ Մենք բարձրացնում ենք մեր բողոքի ձայնը ոչ միայն բոլոր անմեղ կյանքերի պաշտպանության, այլև հատկապես այն հայերի համար, ովքեր 20-րդ դարի առաջին ցեղասպանությունը վերապրած ժողովրդի կենդանի վկաներն են։ Նրանք պարզապես էթնիկ խումբ կամ հավատացյալների համայնք չեն. նրանք գոյատևման, հաստատակամության և արժանապատվության համար շարունակվող պայքարի սուրբ վկաներն են՝ ցեղասպանական հալածանքների դեմ։ Սիրիայում գտնվող հայերը, որոնցից շատերը բնակվում են Հալեպում, Դամասկոսում և այլ քաղաքներում, արդեն բազմաթիվ փորձություններ են հաղթահարել։ Նրանք վերակառուցել են իրենց կյանքը ցեղասպանությունից հետո, ստեղծել կենսունակ համայնքներ և մեծապես նպաստել Սիրիայի սոցիալական, մշակութային և հոգևոր կառուցվածքին։ Սակայն այժմ նրանք կանգնած են իրենց կյանքի և ժառանգության վրա կախված նոր սպառնալիքի առաջ։ Նրանց եկեղեցիները, դպրոցները և տները հայտնվել են շարունակվող քաղաքացիական պատերազմի կրակի տակ, և կրկին առկա է տեղահանման վախ։ Կոչ ենք անում միջազգային հանրությանը, պետություններին, կրոնական կազմակերպություններին, մարդասիրական կառույցներին և անհատներին՝ անհապաղ կենտրոնացնել իրենց ուշադրությունը Սիրիայի բոլոր քրիստոնյաների պաշտպանության և պահպանման վրա։ Այս համայնքները պարզապես ազգային փոքրամասնություններ չեն, այլ Մերձավոր Արևելքում քրիստոնեական ներկայության կենսական մասն են. ներկայություն, որը գոյատևել է դարեր շարունակ։ Սիրիայում մեր քրիստոնյա եղբայրների և քույրերի անվտանգությունը չպետք է անտեսվի կամ դիտարկվի որպես երկրորդական հարց՝ տարածաշրջանի քաղաքական տեղաշարժերի ֆոնին։ Թող Աստված օրհնի հայ ժողովրդին և Սիրիայի բոլոր քրիստոնյա համայնքներին, և թող Նրա ողորմությունը խաղաղություն և պաշտպանություն բերի բոլոր նրանց, ովքեր տառապում են Սիրիայում և նրա սահմաններից դուրս։ Աղոթում ենք այն օրվա համար, երբ քրիստոնյաները, անկախ իրենց դավանանքից, կկարողանան ապրել իրենց համայնքներում խաղաղ և անվտանգ՝ առանց կրոնական հալածանքների»։

18:58 - 11 մարտի, 2025

Լավրովը հայտնել է, որ Ռուսաստանը մտահոգված է Սիրիայում տեղի ունեցող իրադարձություններով |armenpress.am|

armenpress.am: Ռուսաստանը մտահոգված է Սիրիայում տեղի ունեցող իրադարձություններով, այնտեղ բռնության բռնկումն անընդունելի է։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այս մասին հայտարարել է ՌԴ ԱԳ նախարար Սերգեյ Լավրովը։ «Իհարկե, մենք անհանգստացած ենք Սիրիայում տեղի ունեցող իրադարձություններով՝ հաշվի առնելով այն ջանքերը, որ մենք երկար տարիներ մեր գործընկերների, միջազգային հանրության անդամների հետ միասին գործադրել ենք՝ ապահովելու համար այս բարեկամ երկրի բոլոր քաղաքական և էթնոդավանանքային խմբերի անվտանգությունը, որպեսզի այն զերծ մնա ահաբեկչական սպառնալիքներից»,- ասել է նախարարը։ Նրա խոսքով՝ Մոսկվայի և Դամասկոսի նոր իշխանությունների միջև մինչ այժմ տեղի ունեցած շփումները ցույց են տվել, որ նրանք ըմբռնումով են վերաբերվում ազդանշաններին, որոնք փոխանցվել են ոչ միայն Մոսկվայից, այլև արաբական աշխարհից, ԱՄՆ-ից և արևմտյան երկրներից։ «Բռնության այս բռնկումը, իհարկե, անընդունելի է»,- հավելել է Լավրովը։ Սիրիայի Լաթաքիա և Տարտուս նահանգներում կատաղի բախումներ են տեղի ունեցել մի կողմից սիրիական անվտանգության ուժերի և բանակի, մյուս կողմից՝ Դամասկոսի նոր կառավարությանը դեմ հանդես եկող զինված խմբավորումների միջև։ Մարդու իրավունքների սիրիական դիտորդական կենտրոնի վերջին տվյալների համաձայն՝ 830 խաղաղ բնակիչներ՝ ալավիական համայնքի ներկայացուցիչներ, զոհվել են ափամերձ Սիրիայում բախումների արդյունքում։

18:46 - 11 մարտի, 2025

ՀՀ-ն միշտ էլ պատրաստ է համագործակցել Սիրիայի բարեկամ ժողովրդի կողմից ընտրված իշխանությունների հետ. ՀՀ գլխավոր հյուպատոսը՝ Հալեպի պաշտոնյաներին

Մարտի 10-ին Հալեպում ՀՀ գլխավոր հյուպատոսություն են այցելել Հալեպի նահանգապետի տեղակալ Ալի Հաննուրան, նահագապետի խորհրդական Ղասսան Ֆարրուհը, աշխատակազմի ղեկավար Աբդ ալ-Մունայիմ Ազադդինը, արտաքին և քաղաքական հարաբերությունների վարչության պետ Ահմադ Բադաուին և հասարակայնության հետ կապերի վարչության պետ Յասեր Մաուլոյը: Այդ մասին հայտնում են Հալեպում ՀՀ գլխավոր հյուպատոսությունից: «Փոխադարձ ճանաչողական զրույցից հետո ՀՀ գլխավոր հյուպատոս Ա. Ավետիսյանն անդրադարձել է հայ-արաբական պատմական կապերին, հայ և սիրիացի ժողովուրդների միջև ավանդական ջերմ հարաբերություններին, որը ազգամիջյան բարեկամության դասական օրինակ կարող է ծառայել և օգտակար լինել վերականգնելու հանդուրժողականությունը, ծառայելու և փարատելու ազգամիջյան թշնամանքը, աշխարհի բոլոր անկյուններում: Հյուրերն իրենց լիարժեք համաձայնություն են հայտնել այդ կապակցությամբ՝ հավելելով, որ իրենք Սիրիայի հայ քաղաքացիների և Հայաստանի հանդեպ ունեն մեծ ակնածանք և հարգանք ու այդ վերաբերմունքը շարունակական է լինելու: ՀՀ գլխավոր հյուպատոսը ներկայացրել է համագործակցության լայն շրջանակը, բոլոր ասպարեզներում, որ ավանդաբար գոյություն է ունեցել Հայաստանի և Սիրիայի միջև, հավելելով, որ Հայաստանը միշտ էլ պատրաստ է աջակցելու և համագործակցելու Սիրիայի բարեկամ ժողովրդի կողմից ընտրված իշխանությունների հետ: Գլխավոր հյուպատոսը հյուրերին է ներկայացրել վերջերս կայացած ՀՀ ԱԳ փոխնախարար Վ. Կոստանյանի այցը Դամասկոս և ձեռք բերված պայմանավորվածությունների կատարման ընթացքը: Նա համագործակցության իր տեսլականն է ներկայացրել հյուրերին՝ ակնկալելով նաև նրանց ցանկությունները և դիտարկումներն այդ ուղղությամբ: Նահանգապետի տեղակալը իրենց պատրաստակամությունն է հայտնել ամենայն աջակություն ցուցաբերելու Հալեպում ՀՀ գլխավոր հյուպատոսության աշխատանքներին: Կողմերը պայմանավորվել են փոխադարձաբար մշտական կապի մեջ լինել: Ա. Ավետիսյանն իր ջերմ ողջույններն է փոխանցել նահանգապետին և խոստացել մոտ ժամանակներս այցելել նահանգապետին»,- նշված է հաղորդագրության մեջ:

15:06 - 11 մարտի, 2025

Սիրիայի քրդերը համաձայնագիր են ստորագրել՝ դառնալով Սիրիայի նոր իշխանությունների անվտանգության ուժերի մաս |tert.am|

tert.am: Քրդական «Սիրիայի դեմոկրատական ուժեր»-ը համաձայնագիր են ստորագրել՝ միանալու Սիրիայի նոր իշխանություններին ենթակա անվտանգության ուժերին։ Այս մասին, ՏԱՍՍ-ի փոխանցմամբ, հայտնել է Սիրիայի նախագահ Ահմեդ ալ Շարաայի՝ անցումային շրջանի գրասենյակը Telegram-ի իր ալիքում։ Համապատասխան փաստաթուղթը ստորագրվել է ալ Շարաայի և «Սիրիայի դեմոկրատական ուժեր»-ի հրամանատար Մազլում Աբդիի հանդիպման ժամանակ։ Ըստ համաձայնագրի, որի տեքստը հրապարակել է Սիրիայի ղեկավարի գրասենյակը, «բոլոր քաղաքացիական և ռազմական օբյեկտները, որոնք տեղակայված են Սիրիայի հյուսիս-արևելքում, ինտեգրվելու են նոր իշխանությունների գլխավորած կառավարման համակարգին»։ Խոսքը, մասնավորապես, քրդական տարածքների բոլոր անցակետերի, ինչպես նաև այնտեղ գտնվող օդանավակայանի, գազի ու նավթի հանքավայրերի մասին է։ Բացի այդ, Դամասկոսի և «Սիրիայի դեմոկրատական ուժեր»-ի միջև համաձայնագիրը նախատեսում է հրադադար ամբողջ Սիրիայում և քուրդ բնակչությանը երաշխավորում է սահմանադրությամբ նախատեսված բոլոր իրավունքները, ներառյալ քաղաքացիության իրավունքը: Քրդերը, իրենց հերթին, խոստանում են աջակցել սիրիական նոր իշխանություններին՝ նախկին նախագահ Բաշար ալ Ասադի կողմնակիցների և Սիրիայի անվտանգությանն ու միասնությանը սպառնացող այլ տարրերի դեմ նրանց պայքարին: Համաձայնագիրը պետք է կյանքի կոչվի մինչև այս տարվա վերջ։

11:41 - 11 մարտի, 2025

«Կշարունակենք ամեն տեսակի աջակցություն ցուցաբերել մեր հարևան Սիրիային». Էրդողան |azatutyun.am|

azatutyun.am: Թուրքիայի նախագահը խոստացել է շարունակել աջակցությունը Սիրիայի նոր իշխանություններին՝ միաժամանակ դատապարտելով երկրի հյուսիս-արևմուտքում վերջին օրերին սկսված բռնությունները։ «Մենք կշարունակենք ամեն տեսակի աջակցություն ցուցաբերել մեր հարևան Սիրիային՝ վերականգնելու և պահպանելու իր տարածքային ամբողջականությունը և խաղաղության հասնելու իր բոլոր էթնիկ և աղանդավոր փոքրամասնությունների հետ», - ասել է Ռեջեփ Թայիփ Էրդողանը: Էրդողանը ողջունել է Սիրիայի առաջնորդի՝ բռնությունների պատասխանատուներին պատժելու խոստումը, հավելելով՝ Անկարան «ձեռնարկում է անհրաժեշտ բոլոր քայլերը՝ թույլ չտալու, որ անցանկալի իրադարձություններն ազդեն Թուրքիայի վրա»։ Անկարան Սիրիայում իշխանության եկած Ալ Շաարայի ամենամեծ աջակիցն է, և մի քանի հազար զինվոր է տեղակայել այդ երկրի հյուսիսում։

22:22 - 10 մարտի, 2025

ՀՀ ԱԳՆ-ն հետևում է Սիրիայում զարգացումներին |1lurer.am|

1lurer.am: ՀՀ ԱԳՆ-ն հետևում է Սիրիայում զարգացումներին: Տուժածների շրջանում ՀՀ քաղաքացիներ չկան: Այս մասին 1Lurer.am-ին հայտնել է ՀՀ ԱԳՆ մամուլի քարտուղար Անի Բադալյանը։ «Հալեպում ՀՀ գլխավոր հյուպատոսը կապի մեջ է տեղական իշխանությունների և համայնքային կառույցների հետ: Վերջին օրերին ՀՀ քաղաքացիների կողմից հյուպատոսությանն ուղղված դիմումների բովանդակության փոփոխություն չի գրանցվել. դրանք հիմնականում վերաբերել են ընթացիկ հյուպատոսական բնույթի հարցերի»,- ասել է Բադալյանը: Սիրիայի նոր իշխանությունների ռազմական օպերացիան նախկին նախագահ Բաշար ալ-Ասադի հավատարիմ ուժերի դեմ ավարտվել է՝ հայտարարել է երկրի պաշտպանության նախարարությունը: Մարդու իրավունքների սիրիական դիտորդական կենտրոնը հայտնել է, որ մարտի 6-ից ի վեր զոհվել է 1311 մարդ, այդ թվում՝ անվտանգության ուժերի և պաշտպանության նախարարության 231 ներկայացուցիչ, նախկին նախագահ Բաշար ալ-Ասադի 250 կողմնակից և 830 խաղաղ բնակիչ։Մի շարք երկրներ, այդ թվում Միացյալ Նահանգները, Ֆրանսիան և ՄԱԿ-ը կոչ են արել անկախ և թափանցիկ հետաքննություն անցկացնել՝ բացահայտելու տեղի ունեցած հանցագործությունները։

20:20 - 10 մարտի, 2025

Սիրիայի հայերի տարհանումն այս պահին անհնար է. Սփյուռքի հանձնակատարի խոսնակ |civilnet.am|

civilnet.am: Սիրիայի հայերի տարհանումն այս պահին անհնար է. այս մասին ՍիվիլՆեթի հետ զրույցում հայտնեց ՀՀ Սփյուռքի գործերի գլխավոր հանձնակատարի գրասենյակի մամուլի պատասխանատու Նելլի Ղուլյանը: Հարցին՝ արդյոք քայլեր ձեռնարկվում են հայերին տարհանելու կամ տեղափոխելու ուղղությամբ, Ղուլյանը նշեց, որ «անվտանգային պայմաններից ելնելով՝ տարհանումն այս պահին ուղղակի անհնար է, և տեղի հայերն էլ այդ հարցը ներկայում չեն բարձրացնում»։ «Բայց մենք կապի մեջ ենք նաև արտաքին գործերի նախարարության մեր գործընկերների հետ և իրավիճակի հանդարտման դեպքում, եթե մեր հայրենակիցների կողմից լինի ցանկություն, օրինակ, տեղափոխվելու, մենք համատեղ ուժերով ամեն կերպ կաջակցենք»,- ասաց Ղուլյանը։ Մարտի 9-ին Սիրիայի հայալեզու «Գանձասար» պարբերականը հայտնել էր, որ Լաթաքիա քաղաքում երկու հայ է զոհվել՝ հայր և որդի: Ղուլյանի խոսքով՝ Սիրիայում ռազմական գործողությունների հետևանքով հայերի շրջանում զոհերի մասին նոր տեղեկություն չկա, և Հանձնակատարի գրասենյակն մշտական շփումների մեջ է հայ համայնքի տարբեր ներկայացուցիչների հետ։ «Քանի որ իրավիճակը լարված է, մեր հայրենակիցներն իրենց տներից անգամ դուրս չեն գալիս։ Շատ հաճախ լինում են հոսանքի անջատումներ, կապի խնդիր, բայց առօրյա ֆորմատով կապը պահում ենք»,- ասաց Նելլի Ղուլյանը։ Մարտի 6-ին Սիրիայի արևմուտքում՝ Լաթաքիայի և Տարտուսի նահանգներում, Սիրիայի անվտանգության ուժերի՝ ալավի փոքրամասնության դեմ ձեռնարկած գործողությունների ընթացքում 1000-ից ավելի ալավի խաղաղ բնակիչ է սպանվել։

17:32 - 10 մարտի, 2025