Օլաֆ Շոլց

Շոլցն ու Թրամփը պատրաստակամություն են հայտնել համագործակցել հանուն Եվրոպայի խաղաղության |armenpress.am|

armenpress.am: Գերմանիայի կանցլեր Օլաֆ Շոլցը և ԱՄՆ-ի ընտրված նախագահ Դոնալդ Թրամփը հեռախոսազրույցի ընթացքում համաձայնության են եկել, որ համագործակցելու են Եվրոպայում խաղաղություն ապահովելու շուրջ: Այս մասին հաղորդում է Deutsche Welle-ն՝ վկայակոչելով Գերմանիայի կառավարության պաշտոնական ներկայացուցիչ Շտեֆեն Հեբեշտրայթին։ Շոլցը հեռախոսազրույցի ընթացքում ընդգծել է Ուկրաինային աջակցությունը շարունակելու կարևորությունը։ Կողմերը պայմանավորվել են «միասին աշխատել խաղաղությունը Եվրոպա վերադարձնելու ուղղությամբ»։ Նրանք նաև կարծիքներ են փոխանակել Գերմանիայի և ԱՄՆ-ի հարաբերությունների և առկա աշխարհաքաղաքական մարտահրավերների շուրջ։ Հեբեշտրայթի խոսքով՝ Շոլցը նաև «ընդգծել է Գերմանիայի կառավարության պատրաստակամությունը՝ շարունակելու երկու երկրների կառավարությունների միջև երկար տարիների հաջող համագործակցությունը»: Սա նոյեմբերի 5-ին կայացած նախագահական ընտրություններում Դոնալդ Թրամփի հաղթանակից հետո նրա առաջին հեռախոսազրույցն էր Օլաֆ Շոլցի հետ։ Նոյեմբերի 10-ին կայացած հեռախոսազրույցից հետո Շոլցը հյուրընկալվել է ARD հանրային հեռարձակողի եթերում և խոսել Թրամփի հետ ապագա համագործակցության հեռանկարների մասին։ «Իմ սկզբունքը միշտ հետևյալն է, եթե կարելի է դա ասել պարզ բառերով, դու պարում ես այն մարդկանց հետ, ովքեր սենյակում են։ Դա նաև վերաբերում է ԱՄՆ ապագա նախագահին», - ասել է նա։ Նոյեմբերի 10-ին ԱՄՆ ընտրված նախագահ Դոնալդ Թրամփն Ուկրաինայի թեման քննարկել է նաև ՌԴ նախագահ Վլադիմիր Պուտինի հետ հեռախոսազրույցի ընթացքում։

11:32 - 11 նոյեմբերի, 2024

Ալիևը Շոլցին ասել է՝ Երևանն ու Բաքուն մոտ են խաղաղության պայմանագրի շուրջ վերջնական համաձայնությանը |azatutyun.am|

azatutyun.am: Գերմանիայի կանցլերի հետ հեռախոսազրույցում Ադրբեջանի նախագահ Իլհամ Ալիևը կրկին շեշտել է, թե «Ադրբեջանի նկատմամբ Հայաստանի Սահմանադրությամբ ամրագրված տարածքային պահանջները դեռևս պահպանվում են»։ Միաժամանակ Իլհամ Ալիևն Օլաֆ Շոլցին ասել է, որ կողմերը մոտ են փաստաթղթի տեքստի շուրջ վերջնական համաձայնության գալուն, և բանակցությունները կշարունակվեն COP-ի ավարտից հետո, փոխանցում են ադրբեջանական ԶԼՄ-ները։ Հայտարարելով, որ Գերմանիան աջակցում է Երևանի և Բաքվի միջև խաղաղության և բարիդրացիական հարաբերությունների հաստատմանը, Օլաֆ Շոլցն ընդգծել է՝ Բեռլինը կողմերին կոչ է անում համարձակ քայլեր ձեռնարկել։ Գերմանիայի կանցլերը փոխանցել է, որ չի մասնակցելու Ադրբեջանում COP29-ի գագաթնաժողովին։

10:48 - 10 նոյեմբերի, 2024

Գերմանիայի կանցլերը չի մասնակցի Բաքվում կայանալիք COP29 կլիմայի գագաթնաժողովին |armenpress.am|

armenpress.am: Գերմանիայի կանցլեր Օլաֆ Շոլցը չի մասնակցի Բաքվում կայանալիք COP29 կլիմայի գագաթնաժողովին։ «Արմենպրես»-ի հաղորդմամբ՝ այս մասին հայտնում է Bloomberg-ը։ Շոլցը, ով պետք է ներկա գտնվեր գագաթնաժողովի առաջնորդների հանդիպմանը, չեղարկել է իր մասնակցությունը՝ Գերմանիայում քաղաքական ճգնաժամը հաղթահարելու նպատակով։ Եվրոպական հանձնաժողովի նախագահ Ուրսուլա ֆոն դեր Լայենը նույնպես չի մասնակցի, քանի որ կենտրոնացած է իր երկրորդ ժամկետին անցնելու վրա։ Ֆրանսիայի նախագահ Էմանուել Մակրոնը նույնպես բաց կթողնի գագաթնաժողովը՝ ըստ ելույթների ցուցակի։ Այս բացակայությունները կարող են ազդեցություն ունենալ գագաթնաժողովի բանակցությունների վրա, որտեղ Եվրոպան ավանդաբար կարևոր դեր է խաղում կլիմայի փոփոխության դեմ պայքարում։

21:45 - 07 նոյեմբերի, 2024

Քանի դեռ Վրաստանը չի փոխել ներկայիս կուրսը, չենք կարողանա աջակցել ԵՄ անդամակցության բանակցությունների մեկնարկին. Մակրոնի, Շոլցի, Տուսկի հայտարարությունը |tert.am|

tert.am: Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը և Լեհաստանի վարչապետ Դոնալդ Տուսկը համատեղ հայտարարություն են տարածել Վրաստանում քաղաքական իրավիճակի վերաբերյալ, հայտնում է eadaily.com կայքը։«Քանի դեռ Վրաստանը չի փոխել իր ներկայիս կուրսը և ջանքեր չի ցուցաբերել շոշափելի բարեփոխումների առումով, մասնավորապես՝ հետ կանչելով եվրոպական արժեքներին և սկզբունքների հակասող օրենքները, մենք չենք կարողանա աջակցել ԵՄ անդամակցության բանակցությունների մեկնարկին»,- ասել են եվրոպացի առաջնորդները:ԱՄՆ-ն և ԵՄ-ն դժգոհ են այսպես կոչված «օտարերկրյա գործակալների» և ԼԳԲՏ քարոզչության արգելքի մասին «Վրացական երազանք»-ի ընդունած օրենքներից:

13:02 - 07 նոյեմբերի, 2024

Գերմանիայի իշխող կոալիցիան կազմալուծվել է. Շոլցը Բունդեսթագից վստահության քվե կխնդրի |armenpress.am|

armenpress.am: Գերմանիայում իշխող «լուսացույցի կոալիցիան», կազմված Գերմանիայի Սոցիալ-դեմոկրատական կուսակցությունից, Ազատ դեմոկրատական կուսակցությունից և «Միություն 90»-ից (կանաչներ), կազմալուծվել է։ Գերմանիայի կանցլեր Օլաֆ Շոլցը հունվարի 15-ին Բունդեսթագից վստահության քվե կխնդրի իր կառավարության համար, որպեսզի կարողանա մարտին արտահերթ ընտրություններ անցկացնել։ Այս մասին հաղորդում է Deutsche Welle-ն։ «Մեզ հարկավոր է մի կառավարություն, որը կարող է գործել, որն ուժ ունի՝ մեր երկրի համար անհրաժեշտ որոշումներ կայացնելու», - ասել է Շոլցը լրագրողներին: Դրա հետ մեկտեղ նա հայտարարել է, որ պաշտոնից ազատում է իշխող կոալիցիայի կազմում Ազատ դեմոկրատական կուսակցությունից ֆինանսների նախարար Քրիստիան Լինդներին, որը նաև կուսակցության ղեկավարն է։ Շոլցը պարզաբանել է, որ նախարարը կառուցողական չի գործել բյուջետային հարցերում և արգելափակել է անհրաժեշտ օրենքների ընդունումը։ Իր հերթին Լինդները Շոլցին մեղադրել է կարմիր-կանաչ-դեղին (կուսակցությունների գույները) կոալիցիայի կազմալուծման համար։ Շոլցի և Լինդների միջև լուրջ տարաձայնություններ կան տնտեսական, ֆինանսական և սոցիալական քաղաքականության հետ կապված, որի պատճառով նրանք չեն կարողանում ընդունել 2025 թվականի բյուջեն։

12:04 - 07 նոյեմբերի, 2024

Բայդենը, Շոլցը, Մակրոնը և Սթարմերը քառակողմ հանդիպում են անցկացրել |1lurer.am|

1lurer.am: ԱՄՆ նախագահ Ջո Բայդենը ուրբաթ՝ 18 հոկտեմբերին, կոչ է արել Արևմուտքին պահպանել իր աջակցությունն Ուկրաինային, քանի որ Կիևին սպասում է խստաշունչ ձմեռ, իսկ ԱՄՆ նախագահի ընտրությունը մտահոգություններ է առաջացնում Վաշինգտոնի վճռականության հարցում: Բայդենը Բեռլին կատարած մեկօրյա այցի ժամանակ Գերմանիայի կանցլեր Օլաֆ Շոլցի հետ փակ բանակցություններ է վարել՝ քննարկելու հարցեր, սկսած Ուկրաինայից մինչև Մերձավոր Արևելքում ընդլայնվող հակամարտությունը: Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը կեսօրին միացել են Բայդենին և Շոլցին՝ «քառյակի հանդիպմանը», որը հիմնականում կենտրոնացած է եղել այն հարցի ուղղությամբ, թե ինչպես դադարեցնել մարտերն Ուկրաինայում, քանի դեռ ռուսական ուժերը առաջ են շարժվում:

21:01 - 18 հոկտեմբերի, 2024

Գերմանիայում կկայանա Բայդենի, Մակրոնի, Շոլցի և Սթարմերի հանդիպումը․ CNN |tert.am|

tert.am: ԱՄՆ նախագահ Ջո Բայդենն այս շաբաթ Գերմանիա այցի ընթացքում կհանդիպի Գերմանիայի կանցլեր Օլաֆ Շոլցի, Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Քիր Սթարմերի հետ, հայտնում է CNN-ը՝ հղում անելով աղբյուրներին։ Ղեկավարները պետք է բանակցություններ վարեին հոկտեմբերի 12-ին «Ռամշտայն» բազայում և քննարկեին Ուկրաինային օգնություն տրամադրելու հարցը, սակայն ԱՄՆ նախագահը չեղարկել էր այցը ԱՄՆ-ն պատուհասած «Միլթոն» փոթորիկի պատճառով։ CNN-ը չի հստակեցրել Բեռլինում նախատեսված հանդիպման մանրամասները։ Գերմանական լրատվամիջոցները գրել են, որ Ջո Բայդենի այցի ծրագիրը «էականորեն կրճատվել է»՝ ի սկզբանե նախատեսվածի համեմատ։ Նշվում էր, որ հոկտեմբերի 18-ին ԱՄՆ նախագահը պետք է հանդիպի Օլաֆ Շոլցի և Գերմանիայի նախագահ Ֆրանկ Վալտեր Շտայնմայերի հետ։

10:07 - 16 հոկտեմբերի, 2024

Վահագն Խաչատուրյանը մասնակցել է Համբուրգի կայունության համաժողովի բացմանը

Գերմանիայի Դաշնային Հանրապետություն կատարած աշխատանքային այցի ընթացքում Հանրապետության նախագահ Վահագն Խաչատուրյանը մասնակցել է Համբուրգի կայունության համաժողովի պաշտոնական բացման հանդիսավոր արարողությանը: Համաժողովի բացմանը հաջորդել է Հանրապետության նախագահի և մասնակից երկրների նախագահների աշխատանքային ճաշը Գերմանիայի կանցլեր Օլաֆ Շոլցի հետ: Աշխատանքային ճաշի ընթացքում քննարկվել են գլոբալ խաղաղության, կայունության, անվտանգության ու զարգացման մարտահրավերներին դիմագրավելու հնարավորությունների և ուղիների վերաբերյալ հարցեր: Ընդգծվել է հանուն վերոնշյալ նպատակների իրականացման համընդհանուր ջանքերի մեկտեղման կարևորությունը:

18:47 - 07 հոկտեմբերի, 2024

Զելենսկին քննարկում է ունեցել Շոլցի հետ |armenpress.am|

armenpress.am: Ուկրաինայի նախագահ Վլադիմիր Զելենսկին հանդիպել է Գերմանիայի կանցլեր Օլաֆ Շոլցին՝ քննարկելու Ուկրաինայի հարցով խաղաղության երկրորդ գագաթնաժողովի նախապատրաստական աշխատանքները։ «Արմենպրես»-ի փոխանցմամբ՝ այս մասին հայտնում է Reuters–ը: «Ես մեծապես գնահատում եմ արդար խաղաղությանն ուղղված մեր ջանքերը կիսելը»,–գրել է Զելենսկին X-ի իր միկրոբլոգում:

19:54 - 06 սեպտեմբերի, 2024

Սթարմերն ու Շոլցը երկկողմանի պայմանագրով ձգտում են վերականգնել Բրիտանիա–ԵՄ հարաբերությունները |armenpress.am|

armenpress.am: Մեծ Բրիտանիայի վարչապետ Քեյր Սթարմերը և Գերմանիայի կանցլեր Օլաֆ Շոլցը Բեռլինում պայմանավորվել են աշխատել հավակնոտ պայմանագրի ուղղությամբ, որը կընդգրկի պաշտպանության ոլորտից մինչև առևտրին վերաբերող հարցեր, և կկազմի Եվրամիության հետ Մեծ Բրիտանիայի հարաբերությունների վերականգնման մի մաս: Այս մասին հայտնում է Reuters–ը: Նշվում է, որ Եվրամիության մեծ երկրներ՝ Գերմանիա և Ֆրանսիա, վարչապետ Քեյր Սթարմերի այցի նպատակն է օգնել Մեծ Բրիտանիային՝ դուրս գալու եվրոպական դաշնակիցների հետ նախկին պահպանողական կառավարության դյուրագրգիռ հարաբերություններից: Նոր պայմանագիրը կխորացնի համագործակցությունը գիտության, տեխնոլոգիաների, բիզնեսի և մշակույթի ոլորտներում՝ միաժամանակ ավելացնելով առևտուրը: Սթարմերը շեշտել է, որ աճը իր կառավարության թիվը մեկ առաքելությունն է: «Եվ այն, ինչ մենք հստակ հասկանում ենք, այն է, որ Գերմանիայում և ամբողջ Եվրոպայում մեր գործընկերների հետ հարաբերություններ հաստատելը կարևոր նշանակություն ունի դրան հասնելու համար», -ասել է նա:

18:40 - 28 օգոստոսի, 2024

2024 թվականը կարող է խաղաղության տարի լինել Հայաստանի և Ադրբեջանի համար. Շոլց |news.am|

news.am: 2024 թվականը կարող է խաղաղության տարի դառնալ Հայաստանի և Ադրբեջանի համար, ասել է Գերմանիայի կանցլեր Օլաֆ Շոլցը։ «Այստեղ ես շատ այլ քննարկումներ եմ ունեցել։ Ինձ համար կարևոր է նաև զրույցը Հայաստանի վարչապետ պարոն Փաշինյանի և Ադրբեջանի նախագահ պարոն Ալիևի հետ։ Այս տարին չափազանց կարևոր է այս տարածաշրջանի համար։ Այն կարող է դառնալ խաղաղության տարի, եթե կողմերը շարունակեն արդյունավետ և համարձակ քայլեր ձեռնարկել միմյանց նկատմամբ, նշել է Շոլցը Լոնդոնում Եվրոպական քաղաքական համայնքի 4-րդ գագաթնաժողովի արդյունքներով մամուլի ասուլիսում։ Գերմանիայի կանցլերը, օգտվելով գագաթնաժողովի առիթից, հորդորել է կողմերին անել դա։ «Եվրոպան, որպես ամբողջություն, կուղեկցի Հայաստանին և Ադրբեջանին միմյանց հետ խաղաղության հաստատման ճանապարհին, որը երկար կտևի և կապահովի այս երկու հարևան երկրների միջև երկարաժամկետ լավ համագործակցությունը»,- ասել է Շոլցը։

18:01 - 19 հուլիսի, 2024

«Անհրաժեշտ է, որ փոփոխվեն ՀՀ Սահմանադրության մեջ Ադրբեջանի տարածքային ամբողջականության նկատմամբ պահանջներ պարունակող դրույթները»․ Ալիևը ՝ Շոլցին |factor.am|

12:07 - 19 հուլիսի, 2024