ՌԴ - infocom.am

ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Երևանում մեկնարկել է Հայ-ռուսական 9-րդ համաժողովը՝ նվիրված մոր և մանկան առողջության հարցերին |armenpress.am|

armenpress.am: Հայաստանի առողջապահության նախարար Անահիտ Ավանեսյանի և Ռուսաստանի առողջապահության նախարար Միխայիլ Մուրաշկոյի գլխավորությամբ Երևանում մեկնարկել է Հայ-ռուսական 9-րդ համաժողովը: Համաժողովը նվիրված է մոր և մանկան առողջության հարցերին: Անահիտ Ավանեսյանը, ողջունելով ներկաներին, ընդգծեց՝ Հայաստանին և Ռուսաստանին միավորում են ոչ միայն ընդհանուր պատմությունն ու մշակույթը, այլև բժշկական ծառայությունների բարձր որակի ապահովման և քաղաքացիների կյանքի պայմանների բարելավման ընդհանուր ձգտումը: «Առողջապահության ոլորտում համատեղ համաժողովների անցկացումը դարձել է բարի ավանդույթ, որը հանդիսանում է կարևոր հարթակ՝ փորձի, գիտելիքների փոխանակման, ինչպես նաև խնդիրներին համատեղ լուծման տարբերակներ գտնելու համար: Այս տարի մեր համաժողովն առանձնահատուկ կարևորություն ունի, քանի որ այն նվիրված է մի առանցքային ու զգայուն թեմայի՝ մոր և մանկան առողջապահության հարցերին: Այս ուղղությունները առաջնահերթ են ցանկացած պետության համար, քանի որ մայրերի և երեխաների առողջությունը հասարակության կայուն զարգացման և մեր բոլորի բարեկեցիկ ապագայի երաշխիքն է: Այսօր մեր համաժողովը ևս մեկ քայլ է երկկողմ հարաբերությունների ամրապնդման և առողջապահության ոլորտում գործընկերության զարգացման ուղղությամբ»,- նշեց Ավանեսյանը: ՀՀ առողջապահության նախարարն ընդգծեց՝ ժամանակակից առողջապահական մարտահրավերները պահանջում են առավել սերտ համագործակցություն և ջանքերի կոորդինացում: Ըստ նրա՝ Հայաստանը և Ռուսաստանն ունեն հարուստ փորձ և ներուժ, և այս համաժողովը բացառիկ հնարավորություն է քննարկելու լավագույն պրակտիկաները և համատեղ աշխատանքի ուղիները, որոնք ուղղված են մայրական և մանկական հիվանդացության նվազեցմանը, կանխարգելիչ միջոցների բարելավմանը և բժշկական օգնության հասանելիության ապահովմանը: «Վստահ եմ, որ մեր քննարկումներն ու աշխատանքային հանդիպումները արդյունավետ կլինեն և կօգնեն հիմք դնել նոր նախաձեռնությունների և ծրագրերի, որոնք կլուծեն մայրական և մանկական առողջության ոլորտի կարևորագույն խնդիրները»,-նշեց նա: ՌԴ առողջապահության նախարար Միխայիլ Մուրաշկոն, կարևորելով նման համաժողովները, նշեց, որ Հայաստանը և Ռուսաստանը հաջողությամբ համագործակցում են բժշկության մի շարք կարևոր ուղղություններով: Նրա խոսքով՝ համաժողովի ամենամյա անցկացումը ոչ միայն հնարավորություն է տալիս փորձի փոխանակման, այլև թույլ է տալիս նախանշել զարգացման որոշակի ուղղություններ։ ՌԴ առողջապահության նախարարը կարևորեց օնկոլոգիայի ոլորտում համագործակցության հաջող զարգացումը: Քննարկվում են նաև վիրաբուժական միջամտությունների և տրավմատոլոգիայի ոլորտներում համագործակցության հարցեր։ Մուրաշկոն ընդգծեց, որ հաճախակի դարձած ռազմական գործողությունները մեծացնում են տրավմատոլոգիայի զարգացման անհրաժեշտությունը։ Ըստ մասնագետի՝ այս ուղղության զարգացումը հնարավորություն է տալիս փրկել բազմաթիվ կյանքեր և կանխել հաշմանդամությունը։ «Այսօրվա համաժողովի թեման մանկական մահացության խնդիրներն ու վերարտադրողական առողջությունն են։ Անցած 5 տարիների ընթացքում այս ուղղությամբ մեծ աշխատանք է տարվել, մեր երկրների միջև իրականացվում են արդյունավետ կրթական ծրագրեր։ Միայն այս տարի Ռուսաստանում որակավորման բարձրացում է անցել ավելի քան 40 մասնագետ Հայաստանից։ Մենք շատ ուրախ ենք այս փոխադարձ գիտելիքների հարստացմամբ»,- ասաց նախարարը։ Նա կարևոր է համարել նաև նորածինների սկրինինգային ծրագրերը, ինչպես նաև գենետիկայի ոլորտում իրականացվող ծրագրերը։ Ընդհանուր առմամբ, այս ամենը հսկայական ներդրում է կատարում և նպաստում է երեխաների առողջությանը՝ նվազեցնելով մանկական մահացության ցուցանիշները։

15:41 - 16 դեկտեմբերի, 2024