Արթուր Խաչատրյան

8-րդ գումարման Ազգային ժողովի պատգամավոր՝ «Հայաստան» խմբակցությունից։

Ծնվել է 1972թ. հուլիսի 17-ին Երևանում:

1994թ. ավարտել է ԵՊՀ ֆիզիկայի ֆակուլտետը: Ֆիզիկոս:

1996թ.՝ Հայաստանի ամերիկյան համալսարանը: Գործարար վարչարարության մագիստրոս: 1997թ.՝ ՀՀ ԳԱԱ ռադիոֆիզիկայի և էլեկտրոնիկայի ինստիտուտի ասպիրանտուրան: 2001թ.՝ Լոնդոնի Կայսերական քոլեջը: Գործարար վարչարարության մագիստրոս: Ֆիզիկամաթեմատիկական գիտությունների թեկնածու: Պահեստազորի ավագ լեյտենանտ:

1994-2005թթ. եղել է ԵՊՀ ֆիզիկայի ֆակուլտետի գիտաշխատող: 1997-2000թթ.՝ ԱՄՆ միջազգային զարգացման գործակալության (USAID) տնտեսության վերակառուցման և էներգետիկայի տնօրենի ֆինանսական գծով օգնական, ֆինանսական ծրագրերի կառավարող: 2002-2003թթ.՝ ԱՄՆ ՄԶԳ-ի «Հայաստան. օրենսդրի հզորացման ծրագիր»՝ բյուջետային գործընթացի մասնագետ: 2003-2005թթ.՝ Եվրոպայում անվտանգության և համագործակցության կազմակերպության ծրագրերի համակարգող: 2005-2007թթ.՝ Երևանում Կալիֆոռնիայի միջազգային առևտրի և ներդրումների գրասենյակի տնօրեն: 2008-2010թթ.՝ «Մենեջմենթ Միքս» ՍՊԸ խորհրդատվական ուղղության ղեկավար: 2011-2013թթ.՝ «Հայաստանում ֆրանսիական համալսարան» հիմնադրամի ֆինանսների և հաշվապահության ամբիոնի վարիչ, կառավարման ֆակուլտետի մանկավարժական համակարգող (դեկան), 2011թ.՝ նույն հիմնադրամի ֆինանսների և հաշվապահության ամբիոնի դասախոս: 2011-2013թթ. և 2015-2016թթ.՝ «Վիվատ Քոնսալթինգ» ՍՊԸ տնօրեն:

2013-2014թթ.՝ «Արդշինբանկ» ՓԲԸ գործառնական տնօրենի տեղակալ, անձնակազմի կառավարման վարչության պետ: 2016-2017թթ.՝ ՀՀ տարածքային կառավարման և զարգացման նախարարի տեղակալ: 2017-2018թթ.՝ ՀՀ Շիրակի մարզպետ: 2018թ.՝ ՀՀ գյուղատնտեսության նախարար, 2019թ.՝ «Բիզնես Արմենիա» հիմնադրամի հոգաբարձուների խորհրդի նախագահ: 2020թ.՝ ՀՀ պետական կառավարման ակադեմիայի գործարար վարչարարության և մարդկային ռեսուրսների կառավարման ֆակուլտետների դասախոս:

1991 թվականից ՀՅԴ անդամ է:

2021թ. հունիսի 20-ին ԱԺ պատգամավոր է ընտրվել «Հայաստան» կուսակցությունների դաշինքի համապետական ընտրական ցուցակով:

ԱՆԻՖ-ով բացահայտում չկա, որովհետև կա՛մ այն ուղիղ տանում է Նիկոլ Փաշինյանի, կա՛մ նրա մոտ մարդկանց վրա. Աննա Գրիգորյան

«Սրանք այն երկու կաղ, կույր, խուլ և խելքից պակաս փղերն են, որոնց վրա նրանք կառուցում են իրենց թեզերը»,-ԱԺ ճեպազրույցների ժամանակ ասաց «Հայաստան» խմբակցության պատգամավոր Արթուր Խաչատրյանը՝ անդրադառնալով իշխող քաղաքական ուժի այն պնդմանը, թե Հայաստանի տնտնեսությունում առաջընթաց կա, իսկ Հայաստանը երբեք այնքան անվտանգ չի եղել, ինչքան հիմա։ Պատգամավորը նշեց, որ 2025 թվականի բյուջեի նպատակներն անիրատեսական են նույնիսկ այն կառավարության կողմից վերանայելուց և աճը նախնական տարբերակից 10%-ով նվազեցնելուց հետո, իսկ պետական պարտքը հասցրել են աստղաբաշխական չափերի։ «Գործող կառավարությունը միայն պարտքի սպասարկման վրա ավելի շատ փող է տալիս, քան Առողջապահության, Արդարադատության, ԱԳ նախարարություններին, բոլոր մարզպետարաններին։ Երեք օրում Գյումրու բյուջեից ավելի շատ փողեր ենք դուրս տալիս պարտքի սպասարկման համար, իսկ արդյունքում ունենք ընդամնեը 5 % տնտեսական աճ, չնայած խոստացել էին առնվազը 7 %»,-ասաց Արթուր Խաչատրյանը։ Անդրադառնալով անվտանգային խնդիրներին՝ «Հայաստան» խմբակցության պատգամավոր Աննա Գրիգորյանն էլ նշեց. «Ինչպես տեսնում ենք՝ խաղաղության պայմանագիր չկա, ավելին հերթական առաջադրված պահանջներն ենք մենք տեսնում, որոնք տարիներ առաջ երևի անհնար կլիներ պատկերացնել, որ նման պահանջներ կհնչեն ՀՀ-ի նկատմամբ»։Պատգամավորն անթուլատրելի համարեց, որ հայ ժողովուրդը և պատգամավորները տեղյակ չեն թե ինչ է բանակցվում Բաքվի հետ։Գրիգորյանն աբսուրդային համարեց, որ քննարկման թեմա է դարձվում Հովիկ Աղազարյանի թեման և անդրադարձ չկա Ադրբեջանի հայտարարությանը, որ ադրբեջանցիները պետք է գան Հայաստան՝ հիշեցնելով, որ իշխանություններն ընդդիմության համար խոչընդոտներ էին ստեղծում Արցախցիների վերադարձի հարցող քննարկում կազմակերպելու համար, իսկ Ադրբեջանում ամենաբարձր մակարդակով համաժողով են անում և հայտարարում Հայաստան ադրբեջանցիների գալու մասին։ Արթուր Խաչատրյանն էլ նկատեց, որ իշխանությունները անընդհատ հայտարարում էին, թե խաղաղության պայմանադրում 16 կետ կա,բայց նախորդ օրը Արարատ Միրզոյանը հայտարարել է 17-րդ կետի մասին և նշեց, թե գործող իշխանություններն ինչքան կռանում են ադրբեջանցիների կոշիկների մոտ, այնքան պահանջները շատանում են։ Պատասխանելով կոռուպցիոն գործերի շուրջ հետևողական քայլեր անելու մասին լրագրողի հարցին, Աննա Գրիգորյանն ասաց. «Դրանք իմ անձնական պատկերացումները չեն, այլ փաստաթղթավորված իրողություններ են։ Բոլորը գիտեն, որ ԱՆԻՖ հիմնադրամում 10 մլրդ դրամի մսխում է եղել։ ՊՎԾ-ն ուսումնասիրություններ է իրականացրել, բայց ինձ չեն տալիս դրանք ծանոթանալու՝ ասելով թե նախատեսված չէ ինձ ներկայացնելու համար, այլ վարչապետի համար է։ Այսինքն, առնվազը 2 տարի վարչապետի սեղանին է դրված բոլոր մանրամասնություններով, վատնումներով և բոլոր կոռուպցիոն սխեմաներով։ Մոտ երկու տարի է անցել՝ հակակառուպցիոնում գործը կա,այլ տեղերում էլ, Քննչականում էլ գործը կա, բայց որևէ բացահայտում չկա, ինչու, որովհետև կամ այն առնվազը տանում է Նիկոլ Փաշինյանի վրա և ինքը չի ուզում որպեսզի այն բացահայտվի, կամ այդ գործը տանում է մարդկանց վրա, ում Փաշինյանն ուզում է պահի, որ հրապարակային չլինի»։

14:04 - 06 դեկտեմբերի, 2024

Ներկայում քննարկվող հարկային փոփոխությունների նախագծով 13 հազար սուբյեկտի հարկային բեռն ավելանալու է․ Ֆինանսների նախարար |armenpress.am|

armenpress.am: Ներկայում քննարկվող հարկային փոփոխությունների նախագիծը կանդրադառնա շուրջ 13 հազար տնտեսվարողի վրա, սակայն վերջնական բանաձևը դեռևս քննարկման փուլում է։ Այս մասին ասաց ՀՀ ֆինանսների նախարար Վահե Հովհաննիսյանը՝ պատասխանելով «Հայաստան» խմբակցության պատգամավոր Արթուր Խաչատրյանի հարցին, թե հարկային օրենսգրքում փոփոխությունների արդյունքում քանի՞ տնտեսվարողի հարկային բեռը կկրճատվի, և քանիսի՞ դեպքում՝ կավելանա։ «Վերջին տարիներին եկամտահարկը և շահութահարկը նվազել են, ինչն ազդել է հարյուր հազարավոր մարդկանց վրա։ Ներկայում քննարկվող փոփոխությունները վերաբերելու են 13 հազար տնտեսվարողի, թեև վերջնական բանաձևը, կարծես թե, չի ընդունվել, և քննարկման փուլում է, թե ինչ բանաձևով այն առաջ կգնա»,- ասաց Հովհաննիսյանը։ Վահե Հովհաննիսյանը նշեց, որ ներկայացված նախագծով 13 հազար սուբյեկտի հարկային բեռը կավելանա, այսինքն՝ նրանք այլևս չեն օգտվի նախկինում ունեցած արտոնություններից։ «Ներկայացված նախագծով 13 հազար սուբյեկտի հարկային բեռը ավելանալու է։ Այսինքն՝ այն արտոնությունը, որից օգտվում էին այդ սուբյեկտները, էլ չեն օգտվելու։ Մենք արդեն ներկայացրել ենք, որ այն գնահատականները, որոնք տարբեր մարդիկ հնչեցնում են հարկային բեռի բարձրացման չափի վերաբերյալ, գերագնահատված են, որովհետև ունենք ոլորտների միջինացված տվյալներ։ Այո, մեկ-երկու տնտեսվարողի համար հարկային բեռը կարող է բավականին բարձրանալ, բայց ընդհանուր առմամբ բարձրանալու է այնքան, որքան ասել ենք»,- եզրափակեց Հովհաննիսյանը։

11:31 - 03 դեկտեմբերի, 2024

Ընդդիմադիր պատգամավորները դատական հայց են ներկայացրել ընդդեմ կառավարության և ԱԳՆ-ի

Ընդդիմադիր պատգամավորները դատական հայց են ներկայացրել ընդդեմ կառավարության և ԱԳՆ-ի: Այս մասին տեղեկանում ենք ԱԺ «Հայաստան» խմբակցության անդամ Քրիստինե Վարդանյանի ֆեյսբուքյան էջից: «Սիրելի հայրենակիցներ, ԶԼՄ հարգելի գործընկերներ, գործընկերներ Աննա Գրիգորյանի, Գեղամ Մանուկյանի և Արթուր Խաչատրյանի հետ համատեղ դատական հայց ենք ներկայացրել ընդդեմ կառավարության և ԱԳՆ֊ի՝ պահանջելով ոչ իրավաչափ համարել ՀՀ արտգործնախարարի 2024 թ. մարտի 14-ի գրությունը, որով մեզ արգելվել էր ծանոթանալ Ադրբեջանի հետ քննարկվող պայմանագրի փոխանակվող նախագծերին։ Դատարանը՝ դատավոր Ռոբերտ Մաքեյանի նախագահությամբ, հայցադիմումը վարույթ ընդունելու որոշում է կայացրել։ Նշանակվել է նաեւ նախնական դատական նիստի օր, որը տեղի կունենա 2025 թվականի հունվարի 14-ին։ Մենք հետեւողական են լինելու այս կամայական որոշումը չեղարկելու ու հանրության համար հույժ կարեւոր փաստաթղթին ծանոթանալու մեր իրավունքը վերականգնելու հարցում»,- գրել է Վարդանյանը։

11:17 - 02 դեկտեմբերի, 2024

Եթե այսօր գերիները չվերադարձվեն, հետագայում այդ հավանականությունը ձգտում է զրոյի. Արթուր Խաչատրյան |news.am|

16:38 - 12 նոյեմբերի, 2024

Ադրբեջանը կարող է ասել, որ Երևանում «Վազգեն Սարգսյանի» փողոցի առկայությունը ռևանշիզմի դրսևորում է. Խաչատրյան |panorama.am|

panorama.am: v class="w-full prose dark:prose-invert prose-base prose-slate prose-a:text-blue-600 prose-blockquote:relative prose-blockquote:my-14 prose-blockquote:border-0 prose-blockquote:pl-6 prose-blockquote:font-heading prose-blockquote:text-lg prose-blockquote:italic prose-figcaption:text-sm prose-figcaption:text-slate-400 prose-strong:leading-[unset] mt-7"> «Երեկ Ազգային ժողովում Նիկոլ Փաշինյանից փորձում էինք հասկանալ, թե ինչ թուղթ է դրված սեղանին, որն ուզում է ստորագրել այն Փաշինյանը, ով երդվում էր, որ ժողովրդի թիկունքում որևէ բան չի անելու։ Ու ինքը դա հիմնավորում է կոռեկտությամբ»,- խորհրդարանական ճեպազրույցների ժամանակ ասաց «Հայաստան» խմբակցության պատգամավոր Արթուր Խաչատրյանը։ Նա նշեց, որ «մարդ ուզում է կոռեկտ լինել Ալիևի նկատմամբ, բայց կոռեկտ չէ սեփական ժողովրդի նկատմամբ»։ «Միգուցե սեփական ժողովուրդը չի ուզում այդ փաստաթուղթը։ Ակնհայտ է, որ այս իշխանությունները շարունակում են իրենց՝ ինչ ուզում ենք, դա էլ բանակցում ենք քաղաքականությունը։ Թղթի կտոր, վրան գրված խաղաղություն, իսկ ինչ է մեջը, չեն ասում, գաղտնի են պահում սեփական ժողովրդից»,- ասաց ընդդիմադիր պատգամավորը։ Ա.Խաչատրյանը նշեց, որ «Հայաստանի իշխանությունները խոնարհ հարսի պես Ալիևի բոլոր նվաստացումներին դիմանում են», բանակցային գործընթաց չկա, կա Ադրբեջանի կողմից պահանջ, հրահանգ և այս իշխանությունները մաս-մաս ընդունում են, գալիս են ժողովրդին բացատրում, թե իրենց լավ շահերից է բխում։ Հարցին՝ արդյո՞ք անհանգստություն ունեն, որ Բաքուն ռևանշիզմի բացառում և ադրբեջանցիների վերաբնակեցում հարցերը, որոնց մասին պարբերաբար բարձրաձայնում է Ադրբեջանը, դարձրել է խաղաղության պայմանագրում ձևակերպված պահանջ, Ա.Խաչատրյանն ասաց. «Ադրբեջանը ծանր պահանջներ է դրել ու դրանք կարող են վերաբերել նաև ռևանշիզիմին։ Օրինակ, Վազգեն Սարգսյանի փողոցի առկայությունը Երևանի կենտրոնում ռևանշիզմ դրսևորում է։ Բացարձակապես չեմ բացառում։ Այդպես է, ինչքան զիջում ես, թշնամին այդքան առաջ է գալիս։ Ինչպես կսահմանեն ռևանշիզմը, արդեն Ադրբեջանի ղեկավարության անսահմանափակ սադիզմի տիրույթում է գտնվում»։

14:57 - 03 հոկտեմբերի, 2024

Արցախի հարցով ԱԺ քննիչ հանձնաժողովը կգործի, նախագահն էլ Արթուր Խաչատրյանն է․ Արծվիկ Մինասյան |aravot.am|

aravot.am: Թեեւ երեկ իշխանական «Քաղաքացիական պայմանագիր» խմբակցությունը տապալեց «Բռնի տեղահանված և ՀՀ տեղափոխված Արցախի հանրապետության ժողովրդի կենսագործունեության պայմաններն ուսումնասիրելու նպատակով ԱԺ քննիչ հանձնաժողովի» անդամների թիվը սահմանելու մասին որոշման նախագիծը, որի հեղինակը ԱԺ «Հայաստան» եւ «Պատիվ ունեմ» խմբակցություններինն էին, այսօր խորհրդարանական ճեպազրույցներում, «Հայաստան» խմբակցության պատգամավոր Արծվիկ Մինասյանը հայտարարեց, որ իրավունքի ուժով քննիչ հանձնաժողովը ստեղծվում է, նախագահն էլ Արթուր Խաչատրյանն է։ Հանձնաժողովը, ըստ Արծվիկ Մինասյանի, իրականացնելու է ամբողջ աշխատանքը եւ հորդորեց արցախցիներին՝ իրենց հուզող հարցերով դիմել հանձնաժողովին։ «Հայաստան» խմբակցության պատգամավոր Արթուր Խաչատրյանն էլ անդրադարձավ երեկ խորհրդարանում կառավարության հետ տեղի ունեցած հարցուպատասխանի նիստին՝ հայտարարելով՝ այս իշխանությունը շարունակում է՝»ինչ ուզում ենք, այն էլ բանակցում ենք» քաղաքականությունը․ «Իրենք խոստովանում են, որ պատերազմը վաղը կարող է կրկնվել, բայց չեն փոխում քաղաքականությունը․ հավանաբար պարտավորություններ ունեն»։ Հարցին՝ ո՞րն է կետը, որտեղ Երեւանն ու Բաքուն համաձայնության չեն եկել «Խաղաղության պայմանագրում», ռեւանշիզմը եւ ադրբեջանցիների վերադա՞րձը, ինչը երեկ կարմիր թելի նման անցնում էր ընդդիմադիրների հարցերում, Արթուր Խաչատրյանը պատասխանեց՝ չի բացառում։ «Բացարձակապես չեմ բացառում, որ օրինակ, Վազգեն Սարգսյանի անվան փողոցի առկայությունը Երեւանում ռեւանշիզմի դրսեւորում է»,- ասաց նա։

12:08 - 03 հոկտեմբերի, 2024

Խաղաղության պայմանագրի նախագծի մեջ միջազգային դիվանագիտական պրակտիկայից անհայտ որևէ բան չկա. Փաշինյան |1lurer.am|

1lurer.am: Խաղաղության պայմանագրի նախագծի մեջ միջազգային դիվանագիտական պրակտիկայից անհայտ որևէ բան չկա: Հիմա ես էլի կարող եմ ասել, որ, ըստ էության, ամբողջ բովանդակությունը առնվազն հայեցակարգային մակարդակով, որը ճշգրիտ արտահայտում է տեքստային մակարդակը, ժողովրդի համար բացահայտված է: Այդ մասին Ազգային ժողով-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ արձագանքելով «Հայաստան» խմբակցության պատգամավոր Արթուր Խաչատրյանի դիտարկմանը, թե Հայաստանի և Ադրբեջանի միջև խաղաղության գործընթացին առնչվող փաստաթուղթը գաղտնի է պահվում հասարակությունից ու ընդդիմությունից: Փաշինյանը նախ նշեց, որ գաղտնի պահելու հարց չկա, այլ դիվանագիտության կոռեկտության հարց կա, որ երբ երկրորդ կողմի հետ աշխատում ես, կոռեկտ չէ միակողմանի հրապարակելը: Անդրադառնալով ժողովրդի հետ քննարկումներին՝ վարչապետը հիշեցրեց, որ անընդհատ տարբեր մարզեր է այցելում, հանդիպումներ ու քննարկումներ է ունենում, և այդ քննարկումների առանցքային կետերից մեկը հենց խաղաղության գործընթացն է: «Ինչ վերաբերում է բովանդակության հրապարակմանը, բովանդակությունը հրապարակված է ամբողջապես... էլ չեմ ասում, որ նույն տեմպով քննարկում ենք նաև սահմանազատման գործընթացը: Սահմանազատման գործընթացը հրապարակվե՞ց, հրապարակվեց, գնա՞ց ՍԴ, գնաց, ՍԴ-ն որոշում կայացրե՞ց, կայացրեց, կգա՞ ԱԺ, կգա: Այսինքն՝ պետական ինստիտուցիոնալ մակարդակում միշտ էլ կա բուֆերներ դնելու և ժողովրդի համար անցանկալի զարգացումները կանխելու հնարավորություն: Միշտ կա դա: Այնպես որ, ժողովրդի հետ քննարկումը չի նշանակում՝ միայն ժողովրդի տված մանդատը պիտի դնենք մի կողմ և մեր բեռները մեր ուսերից դնենք ժողովրդի վրա: Ժողովուրդը դրել է պատասխանատվությունը մեզ վրա, պետք է այդ պատասխանատվությունը կրենք, իհարկե՝ պատշաճ տեղյակ պահելով»,- ասաց նա:

17:00 - 02 հոկտեմբերի, 2024

Ստում եք, թե Շարժումը ֆինանսավորվում է դրսից, բա այն, որ Սախալինից ձեր հեղափոխության համար փող էր գալիս, դրա մասին ի՞նչ կասեք․ Արթուր Խաչատրյանը՝ իշխանությանը |tert.am|

tert.am: Այս իշխանությունները 2 մեծ մեգասուտ են հորինել և փորձում են հրամցնել։ Այս մասին ԱԺ-ում ելույթի ժամանակ հայտարարեց «Հայաստան» խմբակցության պատգամավոր Արթուր Խաչատրյանը։ «Սուտ մեկ․ ինչը, որ տեղի է ունենում, դրսից ֆինանսավորված է։ Իրենց նշանակած Գլխավոր դատախազին ասում ես՝ դրսից ֆինանսավորման որևէ փաստ կա՞, ասում է չկա, Քննչական կոմիտեի տեղակալին հարցնում ես, ասում է՝ չկա, անվտանգության մարմինները ձայն չեն հանում, որովհետև եթե կա դրսից ֆինանսավորում, այդ մարդիկ պետք է պատասխան տան։ Բա այդ ստերը հիմնավորող մի բան բերեք, ասեք դրսից մի կոպեկ է ստացել, մենք էլ կասենք բա այն, որ Սախալինից ձեր հեղափոխության համար փող էր գալիս, բա դրա մասին ի՞նչ կասեք, թե՞ մոռացել եք, թե՞ փորձում եք ձեր դրսից ֆինանսավորվելը ուրիշների վրա փաթաթել»,- ասաց նա։ Տեղից արձագանքներին Խաչատրյանը պատասխանեց՝ չգիտե՞ք։ «Բա ձեր ղեկավարի՝ 2018 թվականի հուլիսի 27-ի հայտարարությունները լսեք, թիվն էլ է ասել, բայց դա էլ դուք կարդացեք, ես ձեր փոխարեն «տնայինը» չեմ անելու։ Մյուսը՝ այդ բրինձը, գաղտնալսումները, որ լսում եք, որտեղի՞ց եք լսում։ ԱԱԾ-ն գալիս ձեզ հետ գաղտնալսման մասին է խոսո՞ւմ։ Հա ԱԱԾ-ն բրնձի մասին է հրապարակել, վըննամանի մասին էլ է հրապարակել, բա այդ ստի տակից ո՞նց եք դուրս գալու»,- ասաց նա։ Նրա այս խոսքերից հետո ՔՊ-ական պատգամավորները կրկին տեղից արձագանքեցին, ինչին ի պատասխան Խաչատրյանն ասաց․ «Չմեկնաբանե՛ք էլ իմ խոսքերը, այստեղ ֆուտբոլային մեկնաբա՞ն է նստել, մեկնաբանում է խոսքերս»։ Ապա` ԱԺ նախագահ Ալեն Սիմոնյանն ասաց, որ անջատեն Խաչատրյանի խոսափողը, և հավելեց, որ ելույթն ավարտվել է։

12:00 - 11 հունիսի, 2024

«Եթե ես մի օր որոշեմ բիզնեսով զբաղվել, երբեք հատուկ հարկման համակարգում չեմ գործի»․ Ռուստամ Բադասյան |aravot.am|

aravot.am: Ազգային ժողովի մշտական հանձնաժողովների նիստում «Հայաստանի Հանրապետության 2023 թվականի պետական բյուջեի կատարման մասին» տարեկան հաշվետվության նախնական քննարկման ժամանակ «Հայաստան» խմբակցության պատգամավոր Արթուր Խաչատրյանը հարցրեց ՊԵԿ նախագահ Ռուստամ Բադասյանին․ «Որպես կանոն՝ երբ կառավարությունը խոսում է շրջհարկը հանելու կամ շեմը նվազեցնելու մասին, օրինակ են բերում ոչ պատշաճ տնտեսվարողներին։ Այսինքն՝ եթե կան մի քանի հոգի, ովքեր տեղավորվում են այս շեմի տակ, եւ դրա դեմ չեք կարողանում պայքարել, ուրեմն պետք է ընդհանրապես վերացնե՞լ այդ հարկային համակարգը, ինչը խորքի մեջ ընդունելի չէ։ Դուք 36 մլրդ դրամի մասին խոսեցիք, ովքեր թաքնվել են այդ շեմի տակ, իսկ ընդհանրապես այդ 36 մլրդ-ն ամբողջ ծավալի որ տոկոսն է կազմում։ Որովհետեւ 36 մլրդ-ի վրա հղում կատարելով՝ դուք բավական մեծ բեռ եք դնում պատշաճ տնտեսվարողների վրա»։ Ռուստամ Բադասյանն ասաց, որ մեր երկրում շրջհարկի շեմը բարձր է անգամ ԵՄ երկրների համեմատ։ Բայց խնդիրը շեմը չէ, այլ այն է, թե հատուկ հարկման համակարգերը ստեղծվում են ՓՄՁ աջակցման համար, թե՞ դա հնարավորություն է տալիս խոշոր հարկի վճարողներին որոշակի հարկային ագրեսիվ պլանավորումներ իրականացնել։ «Ես խնդիրն այդտեղ չեմ տեսնում, խնդիրը երկու տեղ եմ տեսնում,որ առհասարակ մենք կարող ենք առանց փաստաթղթավորման խրախուսել գործունեությունը հատուկ հարկման համակարգում։ Եվ երկրորդը, տեսել եմ, որ ԱԱՀ վճարողները, որոնք վճարում են ԱԱՀ եւ շահութահարկ, արհեստականորեն ստեղծում են ընկերություններ, որոնք գործում են հատուկ հարկման համակարգում, դուրս են գրում տարատեսակ ծառայությունների հաշիվներ, խուսափում են ընդհանուր հարկման համակարգում շահութահարկի մասով։ Եվ եթե ընդհանուր պետական բյուջեի եկամուտների մեջ դա 0,00 եւ այլ տոկոս է, բայց եթե նայենք այն վարչարարական ջանքը, որն ամեն տարի ՊԵԿ-ը գործադրում է, ինքը բավական նշանակալի գումար է։ Բայց առհասարակ, եթե ես մի օր որոշեմ բիզնեսով զբաղվել, ես երբեք հատուկ հարկման համակարգում չեմ գործի, որովհետեւ իմ կարծիքով բիզնեսի պատշաճ զարգացումը հնարավոր է ընդհանուր հարկման համակարգում, հստակ հաշվառման եւ պլանավորման դեպքում»,- նշեց Բադասյանը։ ՊԵԿ նախագահն ասաց, որ այս ոլորտում հաջորդ տարվա հունվարի մեկից չափագրման գործիքակազմ է ներդրվելու, որպեսզի պարզեն՝ շրջհարկի համակարգում գործող սուբյեկտները խախտում թույլ տալիս են, թե՞ ոչ։

11:32 - 31 մայիսի, 2024

Դուք ասում եք՝ «կեղծիքը լեգիտիմություն է», «զիջումը՝ նվաճում», «կապիտուլյացիան՝ հաղթանակ». Արթուր Խաչատրյանը՝ ՔՊ-ականներին |panorama.am|

panorama.am: «Պարոնայք և տիկնայք ՔՊ-ականնե՛ր, դուք սխա եք հասկացել Ջորջ Օրուելի վեպը։ Նա այդ վեպը գրևել է, որպես նախպազգուշացում»,-ԱԺ-ում ելույթ ունենալով՝ հայտարարեց «Հայաստան» խմբակցության պատգամավոր Արթուր Խաչատրյանը։ Նա հայտնեց, որ «Անասնաֆերմա» վեպը գրվել է, որպես նախազգուշացում դիկտատուրայի, վոլյունտարիզմի, տոտալիտարիզմի դեմ։«Օրուելը այն չէր գրել որպես պետական կառավարման ուղեցույց...Դուք ասում եք՝ «կեղծիքը լեգիտիմություն է», «զիջումը նվաճում է» և շեդևր՝ «կապիտուլյացիան հաղթանակ է»։ Ասում է՝ մենք ոչ թե 4 գյուղ հանձնել ենք, այլ գրավել ենք, Ադրբեջանից խլել ենք մեր դեմ կռիվ սկսելու լեգիտիմությունը»,-հայտարարեց Արթուր Խաչատրյանը և հարցնելով, թե Ադրբեջանը ե՞րբ է լեգիտիմություն փնտրել պատերազմ սկսելու համար, հավելեց.«Ձեր միակ լեգիտիմույունը, որը փնտրում եք՝ Ադրբեջանի բարեհաճ վերաբերմուքն է։ Ադրբեջանին կարգել եք Լեգիտիմության և անվտանգության երաշխավոր»։Հայտնելով, որ իր կերդոյին համապատասխան ՔՊ-ն կրկին բացի իրենից մեղավոր է տեսնում բոլորին՝ ընդդիմադիր պատգամավորն ասաց. «Ասում են կիրանցեցիներն են մեղավոր, այ եթե կիրանցեցիները չբողոքեին, չընդվզեին, որ իրենց երկիրը, հողը տալիս են թուրքին՝ քարտեզան ավելի լավը կլիներ։ Դրանով գիտե՞ք ինչ եք անում ՝ ավանսով ինդուլգենցիա եք առնում, որովհետև հայտարարում եք, որ սահմանազտումը տեղի է ունենում նույն սկզբունքով, իսկ նույն սկզբունքը՝ կապիտուլյացիան է»,- ասաց Խաչատրյանը։

13:02 - 22 մայիսի, 2024

Այն, ինչ երեկ տեղի ունեցավ, արդեն սահմանազատում չէ, մանր ջեբկիրություն է․ Արթուր Խաչատրյան |tert.am|

tert.am: Այն ամեն ինչը, ինչ տեղի է ունենում ՀՀ սահմաններում, կարելի է կոչել ամեն ինչ բացի սահմանազատումից։ Այս մասին ԱԺ նիստին մտքերի փոխանակության ժամանակ ասաց «Հայաստան» խմբակցության պատգամավոր Արթուր Խաչատրյանը։ «Իշխանություններն, այո, մեր այդ խորհրդին հետևեցին, սահմանազատումից առաջ սկսեցին տրագիկոմիկ մակդիրներ դնել՝ ժամանակավոր սահմանազատում, պիլոտային սահմանազատում, բայց այն, ինչ երեկ տեղի ունեցավ, արդեն սահմանազատում չէ, դա մանր ջեբկիրություն է, մանր գողություն, սովետի լավագույն ավանդույթներից եկած ինչ-որ մի բան է»,- ասաց նա։ Խաչատրյանը շեշտեց՝ մենք սխալվել ենք, պարզվում է՝ երբ ՀՀ-ն կադաստրի վկայական է տվել մեր հայրենակիցներին, իրենք սխալվել են և, բնականաբար, սխալվել են ի վնաս մեր հայրենակիցներ։ «Ինչի՞ եմ ասում ջեբկիրություն ու մանր գողություն, սովետում էլ էր այդպես․ այ իշխանություններն ի վնաս մեր հայրենակիցների սխալվել են կադաստրի քարտեզները գծելով, բա սխալվեիք, մի 100 մետր էլ Ադրբեջանից վերցնեիք, թե՞ վախենում եք։ Բա սխալվեիք, այդ սահմանազատումը Ջերմուկից սկսեիք, թե՞ վախենում էիք։ Դե վե՛ր կացեք, ասե՛ք՝ վախենում ենք, այստեղ սխալ չկա։ Կամ ընդունեք, որ մանր գողություն եք անում։ Իսկ կլինի՞ Ադրբեջանից վախենալու փոխարեն սեփական ժողովրդից վախենաք»,- ասաց նա։

10:34 - 21 մայիսի, 2024

«Հայաստան» խմբակցությունը վայր կդնի մանդատները ու կգնա արտահերթ ընտրության, եթե Փաշինյանը այդ ընթացքում չլինի վարչապետի պաշտոնակատար․ |arm.sputniknews.ru|

arm.sputniknews.ru: ՀՀ ԱԺ «Հայաստան» խմբակցությունը վայր կդնի մանդատները ու կգնա արտահերթ ընտրության, եթե Նիկոլ Փաշինյանը այդ ընթացքում չլինի վարչապետի պաշտոնակատար։ Այս մասին այսօր խորհրդարանական ճեպազրույցների ժամանակ հայտարարեց «Հայաստան» խմբակցության պատգամավոր Արթուր Խաչատրյանը։ «Նա չպետք է մնա որպես պաշտոնակատար և օգտագործի բոլոր վարչական ռեսուրսներն ընտրություններում ձայներ ապահովելու համար։ Իրենք ասում են` վարչապետը երկու անգամ հրաժարական է տվել։ Լավ, հրաժարական է տվել, բայց մնացել է պաշտոնակատար նույն լծակներով, ի՞նչ տարբերություն` տվե՞լ է հրաժարական, թե՞ ոչ»,– ասաց նա։ Ըստ պատգամավորի` ընտրությունները պետք է լինեն արդար, իսկ արդարության միակ պայմանը վերոհիշյալն է։ Ինչ վերաբերում է իմպիչմենտի գործընթացին, ապա պատգամավորը նշեց, որ դրա համար պետք է ժողովրդական պոռթկման բավարար զանգված։ Գործընթացն առանց դրա պարզապես չի հաջողվի։

12:42 - 07 մայիսի, 2024

Արթուր Խաչատրյանը հանցագործության մասին հաղորդում է ներկայացրել՝ ապրիլի 27-ի միջադեպի առնչությամբ

Տեղեկացնում եմ, որ այսօր գլխավոր դատախազություն հանցագործության մասին հաղորդում եմ ներկայացրել։ Այս մասին ֆեյսբուքյան իր էջում գրել է ԱԺ «Հայաստան» խմբակցության պատգամավոր Արթուր Խաչատրյանը: «Ինչպես հավանաբար տեղյակ եք, ուրբաթ օրն՝ ապրիլի 27-ին, Երևան-Սևան մայրուղու Հրազդանի հատվածից մի խումբ ոստիկաններ, առանց որևէ օրինական պահանջ ներկայացնելու, թեժացնելով և սադրելով լարված իրավիճակը, իմ նկատմամբ բռնություն են կիրառել, ապօրինաբար զրկել են ազատությունից և ոստիկանական մեքենայով՝ չորս ոստիկանի ուղեկցությամբ տեղափոխել են Կոտայքի մարզի Հրազդանի ոստիկանական բաժանմունք։ Հրաման տվողն ու քաշքշուկ հրահրողը ՀՀ ոստիկանության Կոտայքի մարզային վարչության պետ Ռուբեն Դավթյանն էր։ Վստահ եմ, որ հատկապես Ռ. Դավթյանը քաջատեղյակ էր, որ ես ԱԺ պատգամավոր եմ: Ի դեպ, Դավթյանը քաղաքացիական հագուստով էր և չէր ներկայացել։ Ճանապարհին ես իմ զարմանքն ու ընդվզումն էի արտահայտում, հատկապես պայմանավորված այն հանգամանքով, որ իրենք իրավունք չունեն ԱԺ պատգամավորին ազատությունից զրկելու և բերման ենթարկելու, սակայն ինձ չէին արձագանքում: Արդեն բաժանմունքում ինձ տեղեկացրեցին, որ ես բերման չեմ ենթարկվել։ Խոսքերն ավելորդ են։ Այն ինչ տեղի ունեցավ ուրբաթ օրը, ոստիկանապետության ամենացցուն դրսևորումն էր։ Փաստորեն, Հայաստանում ոստիկանն իրեն օրենքից վեր է դասում, իրեն իրավունք է տալիս խախտել երկրի Սահմանադրությունը։ Հույս ունեմ, որ հանցագործությունն անպատիժ չի մնա։ Այլապես, այսօրվա իշխանություններին էլ ավելի բարդ կլինի հերքել, որ ոստիկանական ապօրինությունները կատարվում են իրենց անմիջական հրամանով»,- գրել է նա։

17:41 - 29 ապրիլի, 2024

Ոստիկանությունը հերքում է լուրերը, թե պատգամավոր Արթուր Խաչատրյանը բերման է ենթարկվել

ՆԳՆ ոստիկանությունից «Ինֆոքոմի» հետ զրույցում հայտնեցին, որ «Հայաստան» խմբակցության պատգամավոր Արթուր Խաչատրյանը բերման չի ենթարկվել։ Ավելի վաղ Tert.am-ի հետ զրույցում Խաչատրյանն ինքը հաստատել էր, որ բերման է ենթարկվել և Հրազդանի ոստիկանաության բաժանմունքում է։ Հիշեցնենք, որ քաղաքացիները փակել էին Երևան-Սևան մայրուղին՝ Հրազդան քաղաքի հատվածում։ Այնտեղ էին նաև «Հայաստան» դաշինքի պատգամավորներ Արման Ղազարյանը ու Արթուր Խաչատրյանը։ Արթուր Խաչատրյանը բանավիճում էր ոստիկանների ու նրանց կողքին կանգնած քաղաքացիական հագուստով մի անձի հետ, որը հայտարարում էր, թե ինքը եկել է հասարակական կարգը պահելու։ Բանավեճի ընթացքում վերջինս սկսեց քաշքշել պատգամավորին, ինչից հետո ոստիկանները հրելով հեռացրին Խաչատրյանին տարածքից։

18:09 - 26 ապրիլի, 2024

Լարված իրավիճակ Երևան-Սևան մայրուղում

Քիչ առաջ քաղաքացիները փակել են Երևան-Սևան մայրուղին՝ Հրազդան քաղաքի հատվածում։ Ոստիկանները պահանջում են բացել ճանապարհը, քաղաքացիները նշում՝ խաղաղ ակցիա են իրականացնում։ Իրավիճակը լարվեց․ քաղաքացիների ու ոստիկանների միջև քաշքշուկ սկսվեց։ Այնտեղ էին նաև «Հայաստան» դաշինքի պատգամավորներ Արման Ղազարյանը ու Արթուր Խաչատրյանը։ Արթուր Խաչատրյանը բանավիճում էր ոստիկանների ու նրանց կողքին կանգնած քաղաքացիական հագուստով մի անձի հետ, որը հայտարարում էր, թե ինքը եկել է հասարակական կարգը պահելու։ Բանավեճի ընթացքում վերջինս սկսեց քաշքշել պատգամավորին, ինչից հետո ոստիկանները հրելով հեռացրին Խաչատրյանին տարածքից։ Ոստիկանները բերման ենթարկեցին ակցիայի մասնակից քաղաքացիների։

17:07 - 26 ապրիլի, 2024