Ավետիք Չալաբյան

«Հայաքվե»-ն փակել էր Երևան-Թբիլիսի միջպետական ճանապարհը՝ Ալավերդու հատվածում. ոստիկանների հորդորով ճանապարհը բացվեց

«Հայաքվե» նախաձեռնությունը փակել էր Երևան-Թբիլիսի միջպետական ճանապարհը՝ Ալավերդու հատվածում։ Ոստիկանների հորդորով ճանապարհը մասամբ բացվեց, որ կուտակված մեքենաները կարողանան անցնել։ «Ակցիան իրականացվում է՝ հաջակցություն Տավուշի մեր հայրենակիցների, որոնք այս պահին Կիրանց, Ոսկեպար, Բաղանիս, Բերքաբեր գյուղերում փորձում են պաշտպանել մեր բոլորի հայրենիքը, մեր բոլորի տարածքները», - նշեց «Հայաքվե» նախաձեռնության համակարգող Ավետիք Չալաբյանը։

15:16 - 22 ապրիլի, 2024

«Հայաքվեի» 2-րդ փուլին անցնելուց առաջ պետք է վիճարկենք «Հանրաքվեի» մասին օրենքը. Չալաբյան |panorama.am|

panorama.am: ««Հայաքվեի» երկրորդ փուլի հետ կապված գոյություն ունի մի առանցքային խոչընդոտ՝ «Հանրաքվեի» մասին օրենքի առերևույթ հակասահմանադրական բնույթը»,- ասուլիսում ասաց «Հայաքվե» նախաձեռնության համակարգող Ավետիք Չալաբյանը։ Նա նշեց, որ ՀՀ Սահմանադրության 204-րդ հոդվածն է կարգավորում քաղաքացիական նախաձեռնությամբ հանրաքվե հրավիրելու հնարավորությունը. նախատեսում է կոնկրետ խնդրի շուրջ 300 հազար քաղաքացիների ստորագրություն հանրաքվե հրավիրելու պահանջով ԿԸՀ դիմելու համար։ Այդ դեպքում, ԿԸՀ-ն վավերացնելով այդ ստորագրությունների ճշմարտացիությունը, օրենքի ուժով պետք է հրավիրի հանրավքե։ «Հանրավքեի» մասին օրենքը, որն ուժի մեջ է մտել 2018-ի մարտին, Չալաբյանի խոսքով, իրենց տեսանկյունից, բազմաթիվ ապօրինի և հակասահմանադրական խոչընդոտներ է ստեղծել այդ իրավունքի իրացման համար. պարտադրում է ստորագրահավաքը տեղի ունենա ՏԻՄ տարածքում, աշխատանքային օրերին, աշխատանքային ժամերին, ՏԻՄ աշխատակցի անմիջական մասնակցությամբ։ «Առաջին փուլով անցել ենք ու տեսել, որ այդ սահմանափակումները տաս անգամ սահմանափակում է մեր հնարավորությունը գործընթացի մեջ քաղաքացիներին ներգրավելու համար։ Եկել ենք այն եզրակացության, որ սկզբում պետք է վիճարկենք այս օրենքի սահմանադրականությունը։ Պատրաստվում ենք՝ կամ մեր փաստարկների հիման վրա օրենքը փոխվի Ազգային ժողովում, կամ եթե դա տեղի չունենա, դրա հավականությունը մեծ է, քանի որ այս ԱԺ-ն որևէ խելամիտ փաստարկի ունկնդիր չի լինում, դիմել Սահմանադրական դատարան՝ փոխելու օրենքը։ Այսինքն, երկրորդ փուլի գնալուց առաջ միջանկյալ խնդիր է առաջանում, որպեսզի կարողանանք երկրորդ փուլի հաջողության շանսերը բարձրացնել»,- ասաց Ա. Չալաբյանը։ Նա նաև հայտարարեց, որ «Հայաքվեն» որպես նախաձեռնությունը, ընտրությունների մասնակցելու որևէ նպատակ չի հետապնդում. «Շատ դժվար է ասել, թե որտեղից է արտահերթ ընտրությունների թեզը մտել շրջանառության մեջ. «Հայաքվեն» որպես նախաձեռնությունը, որպես այդպիսին, ընտրությունների մասնակցելու որևէ նպատակ չի հետապնդում, նրա նպատակը քաղաքացիական դաշտում է»։ Նա նշեց, որ եթե այդպիսի ընտրություններ տեղի ունենան, «Հայաքվեի» մասնակից առանձին անձինք, որոնք ունեն քաղաքական հավակնություններ, կարող են այդ ընտրություններին տարբեր ձևաչափերով մասնակցել, բայց դա ապագայի հարց է: «Երբ որոշակիություն կառաջանա այդ ընտրությունների հետ կապված, որովհետև այս պահին դրանք սպեկուլյացիաներ են՝ կլինի ընտրություն, թե չի լինի, «Հայաքվեի» ամեն մի մասնակից իր դիրքորոշումը դրա հետ կապված կհայտնի: «Հայաքվեն» ոչ ընտրություններին մասնակցելու լիազորություն ունի, ոչ էլ մանդատ»,-ասաց Ա.Չալաբյանը։ Հիշեցնենք, որ «Հայաքվե»-ն քաղաքացիական-օրենսդրական նախաձեռնություն է, որն առաջարկում է քրեականցնել Հայաստանի Հանրապետության անունից Արցախն այլ պետության մաս ճանաչող ցանկացած գործողություն: Նախագծում կա ևս մեկ կետ՝ Հայոց ցեղասպանության նշանակությունը նսեմացնող գործողությունների քրեականացում: Քայլեր1. Նախաձեռնվում է ստորագրահավաք՝ նախատեսված Սահմանադրությամբ և Հանրաքվեի մասին օրենքով:Կենտրոնական ընտրական հանձնաժողովը սահմանում է ստորագրահավաքի անցկացման 60-օրյա ժամանակահատվածը:2. Երբ հավաքվի 50 հազար ստորագրություն,օրինագիծը պարտադիր մտնում է ԱԺ օրակարգ և դրվում քվեարկության:3. Եթե ազգային ժողովը անտեսի ժողովրդի կամքը և մերժի նախագիծը, ապա ևս 300 հազար ստորագրություն կհավաքվի,և այս նախագիծը կդրվի հանրաքվեի:Հանրաքվեով բավարար ձայներ ստանալու դեպքում նախագիծը անմիջապես հրապարակվում ու դառնում է օրենք: Հետագայում այն կարող է փոխվել ՄԻԱՅՆ ՀԱՆՐԱՔՎԵՈՎ: Առաջին փուլով Հայաստանի 50 հազարից ավելի քաղաքացի ստորագրել է՝ պահանջելով քրեականացնել Հայոց ցեղասպանության միջազգային ճանաչումից հրաժարվելն ու Արցախն այլ պետության կազմում ճանաչելը։ Սակայն դեկտեմբերի 4-ին Ազգային ժողովի պետաիրավական հարցերի մշտական հանձնաժողովը, 7-ն ընդդեմ 3-ի ձայների հարաբերակցությամբ, բացասական եզրակացություն է հայտնել «ՀայաՔվե» քաղաքացիական օրենսդրական նախաձեռնության օրենքի նախագծի վերաբերյալ։ Դեկտեմբերի 5-ին ԱԺ ՔՊ խմբակցությունը դեմ է քվեարկել օրենքի նախագիծն ԱԺ լիագումար նիստերի օրակարգ ընդգրկելուն։

15:54 - 25 դեկտեմբերի, 2023

Այս քայլով դատարանը կատարում է իշխող վարչախմբի ակնհայտ պատվերը. «ՀայաՔվե»-ն՝ Չալաբյանի վճռի մասին

Այս քայլով դատարանը կատարում է իշխող վարչախմբի ակնհայտ պատվերը: «ՀայաՔվե» քաղաքացիական նախաձեռնության համակարգող խորհուրդը հայտարարություն է տարածել Ավետիք Չալաբյանի վճռի մասին: «Երևան քաղաքի ընդհանուր իրավասության քրեական դատարանը (դատավոր՝ Մնացական Մարտիրոսյան) հասարակական-քաղաքական գործիչ, «ՀայաՔվե» քաղաքացիական օրենսդրական նախաձեռնության համակարգող Ավետիք Չալաբյանին մեղավոր ճանաչեց և նախադեպը չունեցող աբսուրդային արգելք դրեց նրա հանրային-քաղաքական գործունեության վրա՝ պարտավորեցնելով 2 տարի 6 ամսով չկազմակերպել հավաքներ և չմասնակցել դրանց։ Համարում ենք, որ այս քայլով դատարանը կատարում է իշխող վարչախմբի ակնհայտ պատվերը՝ հանրային կյանքից ու քաղաքական գործընթացներից մեկուսացնելու իր առավել հետևողական ընդդիմախոսներին։ Ավետիք Չալաբյանի հանդեպ շինծու, պատվերով քրեական գործ հարուցելու, նախաքննության, դատաքննության ողջ ապօրինի ընթացքն ու արդյունքը ՀՀ-ում դատաիրավական համակարգի՝ բռնազավթված լինելու անհերքելի վկայությունն է։ Նիկոլ Փաշինյանը այն դարձրել է իր գործիքը՝ թույլ չտալու Հայաստանում քաղաքացիական հասարակության և նոր, կենսունակ ազգային քաղաքական ուժերի ձևավորումը։ Սրանով նա, ի թիվս այլոց, երկու հարց է փորձում լուծել՝ կատարել իր գործընկեր Իլհամ Ալիևի՝ Հայաստանում ազգային ուժերին խեղդելու պահանջը, և է՛լ ավելի ամրապնդել իր բռնատիրական ռեժիմը՝ ազատազրկմամբ ու այլ ճնշումներով փորձելով ահաբեկել ընդդիմադիր կեցվածք ունեցող բոլոր գործիչներին ու արժանապատիվ քաղաքացիներին։ Խստորեն դատապարտում ենք մարդու քաղաքական ու քաղաքացիական իրավունքների ոտնահարման այս աղաղակող դրսևորումը։ Զորակցություն ենք հայտնում մեր գործընկերոջը և հավաստում, որ մեզ ոչ մի բռնություն հետ չի պահելու Արցախի և ընդհանրապես՝ հայ ժողովրդի ազգային իրավունքների համար պայքարի, և խաբեությամբ բռնազավթված իշխանությունը ժողովրդին վերադարձնելու մեր ուղուց։ Շնորհակալություն ենք հայտնում նաև մեր բոլոր աջակիցներին՝ Ավետիք Չալաբյանին ողջ այս ընթացքում սատար լինելու համար»,- ասված է հայտարարության մեջ։ Երեւանի ընդհանուր իրավասության դատարանը՝ նախագահությամբ դատավոր Մնացական Մարտիրոսյանի, այսօր՝ դեկտեմբերի 21-ին, հասարակական–քաղաքական գործիչ Ավետիք Չալաբյանի վերաբերյալ կայացրեց դատավճիռ։

18:58 - 21 դեկտեմբերի, 2023

Ավետիք Չալաբյանի ազատությունը սահմանափակվեց 1 տարի 11 ամսով. դատարանը հրապարակեց վճիռը |armeniasputnik.am|

armeniasputnik.am: Հասարակական–քաղաքական գործիչ Ավետիք Չալաբյանի ազատությունը սահմանափակվեց 1 տարի 11 ամիս 5 օր ժամկետով։ Այսօր Երևանի ընդհանուր իրավասության դատարանը՝ նախագահությամբ դատավոր Մնացական Մարտիրոսյանի, հրապարկեց դատավճիռը։ «Չալաբյանին արգելվում է մասնակցել հավաքների և այլ հանրային միջոցառումների, ինչպես նաև առանց նրա վարքագծի նկատմամբ վերահսկողություն իրականացնող իրավասու մարմնի համաձայնության վայրը փոփոխել»,–վճիռը կարդաց Մարտիրոսյանը։ Դատավճռի հրապարակումից հետո փաստաբան Արթուր Հարությունյանը լրագրողների հետ զրույցում հայտնեց, որ որոշումը բողոքարկվելու է Վերաքննիչ դատարանում։ Նրա խոսքով` իրենց կանխատեսումներն ու ենթադրությունները իրականություն դարձան վերջնական դատավճռով։ «Ավետիք Չալաբյանին փորձում են հեռու պահել քաղաքական գործընթացներից, որպեսզի նա չմասնակցի որևէ հավաքի կամ համանման միջոցառման, ինչը և ուղիղ հավաստում է, որ այստեղ քրգործ ի սկզբանե չի եղել, այլ իրականացվել է քրեական հետապնդում, զուտ նրան մեկուսացնելու և քաղաքական գործընթացներից վերջնականապես հեռու պահելու համար»,– ասաց փաստաբանը։

18:53 - 21 դեկտեմբերի, 2023

Եթե ՔՊ-ն հրաժարվում է մեր ներկայացրած օրենքի նախագծին կողմ քվեարկել, փաստորեն դեմ է քվեարկում իր կառավարության ծրագրին. Չալաբյան |panorama.am|

11:20 - 04 դեկտեմբերի, 2023

Հայաքվեն օրենսդրական նախաձեռնությունը մուտքագրեց Ազգային ժողով

«Հայաքվեն» օրենսդրական նախաձեռնությունը մուտքագրեց Ազգային ժողով։ Հիշեցնենք, որ ԿԸՀ-ն բավարարել է «Հայաքվե» նախաձեռնող խմբի դիմումը 50 հազար ստորագրություն հավաքելու և Ազգային ժողով օրենսդրական նախաձեռնություն ներկայացնելու դիմումին։ Ստորագրահավաքի համար սահմանվել է 60-օրյա ժամկետ՝ 2023 թվականի հունիսի 21-ից օգոստոսի 19-ը։ Նշենք, որ խումբը հանդես է գալիս առաջարկությամբ՝ նախատեսելու խիստ պատիժ ԼՂ ինքնորոշումից հրաժարվելու և Հայոց ցեղասպանության նշանակությունը նսեմացնելու համար։

12:03 - 11 հոկտեմբերի, 2023

«ՀայաՔվե»-ի նախաձեռնող խումբն օրինագիծը վաղը պաշտոնապես կմուտքագրի Ազգային ժողով

«ՀայաՔվե»-ի նախաձեռնող խումբն օրինագիծը պաշտոնապես կմուտքագրի Ազգային ժողով։ «Արցախի Հանրապետությունը, չնայած հայաթափված և զավթված է, իրավաբանորեն շարունակում է գոյություն ունենալ: Եվ «ՀայաՔվե»-ն առավել քան հաստատակամ է` իր սկսած գործն ավարտին հասցնելու և արգելափակելու նոր կապիտուլյացիոն պայմանագրի կնքումը, որով Արցախը կարող է ճանաչվել Ադրբեջանի կազմում: Վաղը՝ հոկտեմբերի 11-ին՝ ժամը 11:00-ին, «ՀայաՔվե»-ի նախաձեռնող խումբն օրինագիծը պաշտոնապես կմուտքագրի ԱԺ: Միացե´ք մեզ», - ասվում է հաղորդագրությունում։

14:49 - 10 հոկտեմբերի, 2023

Շարունակում ենք «Հայաքվե»-ի օրենսդրական նախաձեռնությունը. Ավետիք Չալաբյան

Արցախում տեղի ունեցած ողբերգական իրադարձություններից հետո շատերը մեզ հարցնում են, թե ինչ է տեղի ունենալու «Հայաքվե»-ի հետ, արդյոք այն այլևս ժամանակավրեպ չի, արդյոք ամռան ընթացքում ստորագրահավաքի վրա դրված մեր աջակիցների ջանքերը ապարդյուն չէին: Այս մասին Facebook-ի իր էջում գրել է Հասարակական-քաղաքական գործիչ Ավետիք Չալաբյանը: Նա նաեւ նշել է. «Որքան էլ որ ցավալի լինեն մեր կորուստները և Արցախի փաստացի հայաթափումը, մեր ազգի բազմադարյան պատմությունը ցույց է տալիս, որ պարբերաբար մեր տարածաշրջանում առաջանում են բարենպաստ իրավիճակներ, և մեր պայքարը հնարավորություն է տալիս ետ բերել կորսվածը, եթե մենք այդ պայքարից չենք հրաժարվում, թևաթափ չենք լինում, և չենք տրվում պահի պարտադրանքին: Թեև Արցախի Հանրապետությունը այս պահին փաստացի օկուպացված է թշնամու կողմից, իրավաբանորեն այն շարունակում է պահպանել իր գոյությունը, իսկ նրա բնակչությունը շարունակում է պահպանել իր հավաքական իրավունքները։ Մեզ որևէ դեպքում չի կարելի հրաժարվել հայկական Արցախի գաղափարից և նրան երբևէ վերատիրելու համար պայքարից, քանի որ դրանով մենք աստիճանական վերացման կդատապարտենք նաև բուն Հայաստանի Հանրապետությունը: Արդեն այսօր Ադրբեջանի բռնապետը, օկուպացնելով Արցախը, այլևս չի ճանաչում ՀՀ տարածքային ամբողջականությունը, ՀՀ-ին անկլավների և միջանցքի անվան տակ նոր զիջումներ է պարտադրում, սպառնում նոր ներխուժումներով, հետևաբար՝ ուժային շանտաժի այս մթնոլորտում ՀՀ-ն և նրա անունից որևէ մեկը իրավասու չէ միակողմանիորեն ճանաչելու Ադրբեջանի տարածքային ամբողջականությունը, դա միայն նոր ողբերգություններ և կորուստեր է բերելու մեր ժողովրդին: Այս իսկ պատճառով մենք շարունակում ենք «Հայաքվե»-ի օրենսդրական նախաձեռնությունը, և վճռական ենք տրամադրված այն պաշտպանելու ՀՀ Ազգային ժողովում: Վաղը, հոկտեմբերի 11-ին, ժամը 11:00, մեր նախաձեռնող խումբը պաշտոնապես մուտք կանի օրենքի նախագիծը ՀՀ Ազգային ժողով, և դրանով կշարունակի իր բաժին պայքարը՝ Արցախը ազատագրված, և Հայաստանը նորից հզոր և անվտանգ տեսնելու համար: Մեզ աջակցած բազմահազար քաղաքացիներին ևս խնդրում ենք չվհատվել, այս դժվարին օրերին պաշտպանել մեր երկիրը, և շարունակել պայքարը նրա հզոր և անվտանգ ապագայի համար»։

09:33 - 10 հոկտեմբերի, 2023

Ցուցարարները երթով հասան Ոստիկանություն, Չալաբյանը ոստիկաններին հորդորեց բռնության չդիմել

Հանրապետության հրապարակից երթով դեպի Ոստիկանություն շարժվող քաղաքացիները քաղաքացիները ՀՀ ազգային անվտանգության ծառայության շենքի մոտ բղավեցին՝ «Ձերբակալե՛ք Նիկոլին»։ Այնուհետև երթն առաջ շարժվեց։ Ոստիկանություն հասնելուց հետ քաղաքացիները սկսեցին գոչել՝ «Նիկոլ՝ թշնամի», «Նիկոլ՝ դավաճան»։ Ոստիկանության բոլոր մուտքերի առաջ ոստիկանության ծառայողներ են, քաղաքացիները կանգնում էին մուտքերի մոտ ու բղավում՝ «Ամոթ»։ Ավետիք Չալաբյանը կոչ արեց ոստիկաններին չդիմել բռնության։ Նա նշեց, որ իրենց հետ հավասար պետք է պաշտպանեն պետությունը։ «Չենք եկել ձեզ վնասել։ Մեր թշնամին մի մարդ է։ Դրա համար երկու բան եմ ուզում խնդրել․ մի՛ դիմեք բռնության, ցանկացած բռնություն բումերանգի պես ձեր երեխի առաջ է շուրջ գալու, եթե զգում եք՝ չեք դիմանում, դիմո՛ւմ գրեք, դո՛ւրս եկեք։ Երբ իշխանությունը փոխվի, դիմում գրածներին հետ կընդունենք»,- ասաց Չալաբյանը։ Քաղաքացիներն այժմ Կորյունի փողոցով շարժվում են Ֆրանսիայի հրապարակ, որտեղ էլ կավարտվի այսօրվա երթը։

20:58 - 24 սեպտեմբերի, 2023

Պատրաստ եղեք երկար կռվի, վաղը պարալիզացնում ենք քաղաքը. Ավետիք Չալաբյան |armeniasputnik.am|

armeniasputnik.am: Արցախահայությանը պաշտպանելու միայն մեկ տարբերակ կա` փոխել Հայաստանում իշխանությունն ու զենքը ձեռքին պաշտպանել Արցախը և Հայաստանը։ Հանրապետության հրապարակում բողոքի ակցիայի ժամանակ այս մասին հայտարարեց «ՀայաՔվե» նախաձեռնության համահիմնադիր Ավետիք Չալաբյանը։ Նա վստահ է, որ եթե այսօր ոտքի չկանգնենք ու չպաշտպանենք մեր երկիրը, ապա վաղը մեզնից յուրաքանչյուրը հայտնվելու է արցախցու վիճակում։ Նա հիշեցրել է, որ ՄԱԿ–ի ԳԱ–ում Թուրքիայի նախագահ Էրդողանն այսօր խոսել է «Զանգեզուրի միջանցքի» մասին։ Մասնավորաբար, Էրդողանն ասել է` հուսով է, որ Հայաստանն իր խոստումը կկատարի և կբացի «Զանգեզուրի միջանցքը»։ Չալաբյանը շեշտում է` Էրդողանին ոչ թե Արցախը, այլ Հայաստանն է պետք, ուստի առաջարկում է այսօր տուն չգնալ ու վաղը պարալիզացնել քաղաքը։ «Պատրաստ եղեք երկար կռվի։ Հոգնել չկա, պարտվել չկա, հիասթափվել չկա։ Շարունակում ենք մնալ այստեղ ու վաղը պարալիզացնում ենք ամբողջ քաղաքը։ Այս իշխանությունը պետք է ծնկի գա»,– հայտարարեց Չալաբյանը։ Նա վստահ է՝ ինչքան շուտ կարողանանք փոխել իշխանությունը, այնքան արագ կկարողանանք անցնել երկրի պաշտպանությանը։ Չալաբյանը շեշտեց՝ Արցախին այսօր պաշտպանություն է պետք։ Ակնհայտ է, որ եթե ՀՀ–ն Արցախը չպաշտպանի, ուրիշ ոչ մի պետություն դա չի անի, և 120 հազար հայությունը կենթարկվի ցեղասպանության։

23:06 - 19 սեպտեմբերի, 2023

Տարածված հոռետեսական կարծիքը, որ Հայաստանում ընտրություններով հնարավոր չի իշխանություն փոխել, վերջապես հօդս ցնդեց. Չալաբյան

«Հայաքվե» նախաձեռնության համակարգող Ավետիք Չալաբյանը իր ֆեյսբուքյան էջում գրառում է կատարել: «Սիրելի բարեկամներ, Համոզված եմ, որ բոլորդ արդեն գիտեք Երևանի ավագանու ընտրությունների նախնական արդյունքների մասին: Որպես դիտորդական առաքելության համակարգող, ես իրավունք չունեմ դեռևս քաղաքական գնահատականներ տալ, սակայն երեկվա լարված օրվանից հետո, կարող եմ հիմա արձանագրել մի քանի կարևոր իրողություն՝ ա) մասնակցությունը այս ընտրություններին աննախադեպ ցածր էր, սա ցավալի փաստ է, սակայն և հստակ ուղերձ է բոլոր քաղաքական ուժերին, որ քաղաքացին իրենցից որակապես ավելի բարձր ակնկալիքներ ունի, բ) իշխող քաղաքական ուժը, վարչական ռեսուրսների համատարած գործադրման պայմաններում, այս ընտրություններին Երևանում ստացել է 2.5 անգամ ավելի քիչ ձայն, քան 2021 թ համապետական ընտրություններին, սա ինքնին շատ բան է ասում այդ ուժի հանրային հեղինակության մասին, գ) տարածված հոռետեսական կարծիքը, որ Հայաստանում ընտրություններով հնարավոր չի իշխանություն փոխել, վերջապես հօդս ցնդեց՝ հնարավոր է, և դա ճանապարհ է բացում մեր երկրում քաղաքական մենաշնորհների վերացման և իրապես ժողովրդավարական զարգացման համար, դ) երեկ բավական որակյալ աշխատանք են իրականացրել ընտրական հանձնաժողովների մեծ մասը և դիտորդական առաքելությունները (մասնավորապես մեր «Հայաքվե» առաքելությունը), դա հավելյալ գործոն է դառնում, որպեսզի մեր քաղաքացին համոզված լինի, որ ի վերջո մեր երկրում իր ձայնն է որոշելու, և արժևորի իր այդ մեկ կարևոր ձայնը, ե) անկախ նրանից, թե Երևանի ավագանում հիմա ինչ կոնֆիգուրացիա կձևավորվի, այն խիստ մրցակցային է լինելու, և դրանից միայն կշահի մեր քաղաքը և քաղաքացին: Այլապես, դեռ շատ անելիք կա՝ առողջացնելու մեր քաղաքական համակարգը, և վերականգնելու նրա նկատմամբ մարդկանց վստահությունը: Բայց մենք վճռական ենք՝ գնալու այդ ճանապարհով, և համոզված ենք, որ այդ ճանապարհին նոր հաջողություններ են մեզ սպասում: Մինչ այդ, շնորհակալություն եմ հայտնում բոլոր այն գործընկերներին, ովքեր երեկ անձնվիրաբար աշխատեցին մեզ հետ ընտրական տեղամասերում, և պաշտպանեցին ձեզնից յուրաքանչյուրի ձայնը»,- գրել է նա:

11:25 - 18 սեպտեմբերի, 2023

Յուրաքանչյուրը, որ իր ստորագրությամբ միացել է «Հայաքվե»-ին, պետք է տեր կանգնի դրան․ Չալաբյանը կոչ արեց նախագծի՝ ԱԺ մտնելու օրը գնալ ԱԺ շենքի մոտ

Երևանի Ազատության հրապարակում ի պաշտպանություն Արցախի հանրահավաքի ընթացքում ելույթ ունեցավ նաև «Հայաքվե» նախաձեռնող խմբի անդամ Ավետիք Չալաբյանը՝ նշելով՝ յուրաքանչյուրը, որ իր ստորագրությամբ միացել է «Հայաքվե»-ին, պետք է տեր կանգնի դրան։ «Սրանից 1 ամիս հետո օրենքի մեր նախագիծը մտնելու է Ազգային ժողով, ես ձեզ խնդրում եմ՝ բոլորդ միահամուռ, ինչպես այստեղ եք եկել, այդ օրը եկեք ԱԺ առաջ։ Էսօր մեզ ասում են՝ դե գիտեք՝ մեկ ա ՔՊ-ն դեմ ա քվեարկելու, ՔՊ-ն, որ մեզ տեսնի, ո՞նց ա դեմ քվեարկելու։ Մենք ամեն ինչ պետք է անենք, որ իշխող խմբակցությունն էլ հասկանա, որ դա իրենց վերջին շանսն ա, որ պետք ա վերադառնան ժողովրդին․ իրենք ժողովրդից Արցախը հանձնելու մանդատ չեն ստացել, ժողովուրդը այս նախագծով իրենց փրկօղակ է նետում, կարող են մաքրվել դավաճանի խարանից։ Հենց մենք այդ օրենքն ընդունենք, հաջորդ քայլով սկսելու ենք Արցախի 2-րդ ազատագրումը։ Մենք հասնելու ենք նրան, որ և դիվանագիտական ճանապարհով, և եթե անհրաժեշտ լինի, նաև մարտի դաշտում, նորից Արցախն ազատագրենք», - նշեց Չալաբյանը։

20:54 - 02 սեպտեմբերի, 2023

«Արցախցին չի՛ պոկվելու իր հողից». ակցիա ՀՀ-ում Արցախի մշտական ներկայացուցչության մոտ |armeniasputnik.am|

armeniasputnik.am: Արցախի Անկախության օրվա առիթով քաղաքական, հասարակական գործիչներ, քաղաքացիներ այցելել են Հայաստանում Արցախի Հանրապետության մշտական ներկայացուցչություն։ «Այս օրը մենք դիմավորում ենք մի պայմաններում, երբ Արցախի Հանրապետությունն արդեն 9 ամիս դաժան շրջափակման մեջ է՝ լքված ՀՀ իշխանությունների կողմից՝ համարյա միայնակ շարունակելով իր պայքարն Արցախը պաշարած թշնամական ուժերի դեմ։ Մենք այստեղ ենք, որ մեր ներկայությամբ նախ զորավիգ կանգնենք Արցախի մեր քույրերին և եղբայրներին, հստակ ուղերձ հղենք, որ ՀՀ-ն միայն իր ժամանակավոր և, հուսով եմ, մոտ ապագայում հեռացող իշխանությունները չեն, այլ հայ ժողովուրդն է, որը մշտապես տեր է լինելու մեր հայրենիքի Արցախի հատվածին»,- լրագրողների հետ զրույցում նշեց «ՀայաՔվե» նախաձեռնության համակարգող Ավետիք Չալաբյանը։ Նա վստահ է, որ մեր ապագա սերունդները պետք է կարողանան այդ խնդիրը լուծել՝ ունենալ միացյալ և հզոր հայրենիք։ Չալաբյանի խոսքով՝ այսօր յուրաքանչյուրիս պարտքն է կանգնել արցախցիների կողքին, ցույց տալ, որ մենք մի ազգ ենք։ Նա հիշեցրեց, որ 2 օր առաջ ԿԸՀ են հանձնվել «ՀայաՔվեի» առաջին փուլի ստորագրությունները։ Շեշտեց՝ հետամուտ են լինելու, որ օրենքի ուժով արգելվի Արցախի հանձնումը ցանկացած այլ պետության։ «Ես միշտ հպարտացել եմ արցախցիներով, երջանիկ եմ եղել, որ ապրել և օգնել եմ նրանց այդ պայքարին, գիտեմ՝ արցախցին երբեք չի պոկվելու իր հողից։ Արցախցին ձեռք է բերել, արժանացել է իր ինքնորոշմանը, իր կյանքը տնօրինելու իրավունքին, և որևէ արհեստածին երևույթ չի կարող խանգարել դրան»,- իր հերթին նշեց ՀՀ զինված ուժերի գլխավոր շտաբի պետի նախկին տեղակալ Տիրան Խաչատրյանը։ Մշտական ներկայացուցչություն այցելած գործիչներին և քաղաքացիներին դիմավորեց Արցախի ԱԳ նախարար Սերգեյ Ղազարյանը։ Նա հույս հայտնեց, որ հաջորդ տարի այս օրն արդեն Արցախում կդիմավորեն։ Խորհրդանշական կերպով դրոնով երկինք բարձրացվեց Արցախի պետական դրոշը։ Շարունակությունը՝ սկզբնաղբյուր կայքում

14:02 - 02 սեպտեմբերի, 2023

Այս ստորագրահավաքով ոչ թե «Հայաքվե»-ն ավարտվեց, այլ միայն նոր է սկսվում. Չալաբյան

11:10 - 31 հուլիսի, 2023

«ՀայաՔվեին» արդեն 54 800 քաղաքացի է միացել. նախաձեռնությունը ստորագրահավաքը կավարտի վաղաժամ |armeniasputnik.am|

armeniasputnik.am: «ՀայաՔվե» նախաձեռնությանն արդեն միացել է 54 հազար 800 քաղաքացի։ Այսօր ասուլիսի ժամանակ տեղեկությունը հայտնեց նախաձեռնության համակարգող Ավետիք Չալաբյանը։ «Պետության ինքնիշխանության, սահմանադրական կարգի պաշտպանության, արժանապատվության համար սկսված այս շարժումն արդեն անկասելի է։ Իշխանության բոլոր հնարքները միայն հակառակ արդյունք են ցույց տալիս, և նրանց գործողությունները ձախողվել են։ Դա փաստում է նաև մեր նախաձեռնությանը միացող անձանց քանակը։ Այս շաբաթվա ընթացքում մեզ միացել է ավելի քան 16 հազար քաղաքացի։ Այս պահին ունենք 54 800 քաղաքացի, որոնք միացել են «ՀայաՔվեին», նրանցից 24 660–ը` Երևանում, 29 380-ը` մարզերում, իսկ 760-ը միացել են էլեկտրոնային տարբերակով»,– ասաց Չալաբյանը։ Չալաբյանը վստահեցրեց, որ դա ռեկորդային թիվ է «ՀայաՔվեի» 4 շաբաթվա ընթացքում։ Նախաձեռնության համակարգողը շեշտեց, որ ստորագրահավաքը պետք է 8 շաբաթ տևի, սակայն ստորագրահավաքի 1-ին շաբաթը Երևանի քաղաքապետարանը «գողացել էր» իրենցից։ Նա ընդգծեց, որ չնայած դրան` անհրաժեշտ ստորագրությունների նվազագույն շեմը 4 շաբաթում գերազանցել են։ Չալաբյանը նշեց, որ ստորագրահավաքը կավարտեն հաջորդ շաբաթվա վերջին։ «Պաշտոնական ժամկետը մինչև օգոստոսի 19-ն է, մենք կշարունակենք մինչև օգոստոսի 4-ը ներառյալ։ Վերջին 2 շաբաթը կօգտագործենք արդյունքների ամփոփման, վերլուծությունների համար։ Խնդրում ենք մեր քաղաքացիներին, որոնք դեռևս չեն հասցրել միանալ «ՀայաՔվեին», այս ընթացքում միանալ, իսկ ովքեր չեն կարողանա միանալ այս ընթացքում, կարող են դա անել հաջորդ փուլերին»,- ասաց Չալաբյանը։ Նա շեշտեց, որ ստորագրահավաքի հաջորդ փուլով ԱԺ–ում պետք է քննարկվի նախագիծը, որը պահանջելու է հանրային մեծ ներգրավում։ Հիշեցնենք` հունիսի 20-ին հայտնի դարձավ, որ ՀՀ կենտրոնական ընտրական հանձնաժողովը բավարարել է «Հայաքվե» նախաձեռնության դիմումը` 50 հազար ստորագրություն հավաքելու և Ազգային ժողով օրենսդրական նախաձեռնություն ներկայացնելու համար։ Նախաձեռնության անդամները ցանկանում են հանրաքվեի միջոցով Լեռնային Ղարաբաղի ինքնորոշումից հրաժարվելու և Հայոց ցեղասպանության նշանակությունը նսեմացնելու համար օրենքով խիստ պատիժ նախատեսել։ Ստորագրահավաքի համար սահմանվել է 60-օրյա ժամկետ՝ 2023 թվականի հունիսի 21-ից օգոստոսի 19-ը։

11:42 - 29 հուլիսի, 2023

Չալաբյանը պարզաբանեց՝ ինչու արցախցիների ակցիաներում «ՀայաՔվեն» ներգրավված չէ |panorama.am|

panorama.am: «Արցախում հումանիտար ճգնաժամ է, օր օրի սրվում է, մոտենում է այն պահը, երբ որ իրավիճակը կարող է դուրս գալ վերահսկողությունից և վերաճել նոր մեծ ողբերգության»,-ասուլիսում ասաց «Հայաքվե» նախաձեռնության համակարգող Ավետիք Չալաբյանը։ Նա նշեց, որ այս ֆոնին «Հայաքվեի» հիմնական գաղափարն ու հիմնական ուղերձը դառնում է ծայրահեղ արդիական. «Մարդիկ սկսում են հասկանալ, որ այս նախաձեռնությունը մենք սկսել ենք ոչ թե վերացական իրականությունից կտրված օրենքի փոփոխությունների համար, այլ նրա համար, որպեսզի այն իրավիճակը, որ մենք ունենք այսօր, որը հետևանք է գործող իշխանության բազմաթիվ սխալների ու ձախողումների, փակուղու, կարողանանք իրավիճակը հանգուցալուծենք, լուծումը գտնենք»,- ասաց Ա. Չալաբյանը։ Ա. Չալաբյանը նշեց, որ գործող իշխանությունը հայտարարում է, որ Ադրբեջանն Արցախի հայ ժողովրդի ցեղասպանություն է պալանավորում, միաժամանակ նույն իշխանությունը հայտարարում է, որ Արցախը պատրաստ է ճանաչել Ադրբեջանի կազմում. «Սա դասական շիզոֆրենիա է։ Այսինքն՝ գործող իշխանությունը պատրաստ է Արցախը հանձնել Ադրբեջանին, որպեսզի Ադրբեջանը իրականացնի Արցախում ապրող հայ բնակչության ցեղասպանություն։ Տրամաբանական կապն այդպիսին է»։ Ըստ Ա. Չալաբյանի, 1918թ․ ի վեր, երբ օսմանյան զորքերը ներխուժեցին Արևելյան Հայաստան, երբևիցե այդքան մոտ չենք եղել իրական ցեղասպանության, որքան այսօր է։ «Արցախում հումանիտար ճգնաժամն այնպես է սրվել, որ սպառնում է արդեն մարդկանց մասսայական մահացություն։ Այդ պայմաններում գործող իշխանությունը փոխանակ իր ջանքերը կենտրոնացնի մեր հայրենակիցների ողբերգությունը կանխելու վրա, իր ողջ ջանքերն ուղղել է «Հայաքվե»-ի դեմ։ Հարց է առաջանում՝ ո՞րն է ձեր նպատակը, ո՞ր ժողովրդին եք ծառայում, ներկայացնում, ինչո՞ւ եք այդ ամենն անում», - նշեց նա։ Ա.Չալաբյանն ասաց, որ դիմադրության բոլոր օջախները միասնական օրակարգ պետք է ձևավորեն, համատեղեն ուժերը, կանխեն հայկական նոր ցեղասպանությունը, նոր կապիտուլացիան, որը նոր ողբերգություն է լինելու մեր ազգի համար։ «Դա մեր ուժերից վեր չէ։ «Հայաքվեի» շրջանակներում մեր կատարած ողջ աշխատանքը ցույց է տալիս, որ մեր ժողովրդի ճնշող մեծամասնությունը, զգալով վերահաս վտանգը, սկսել է համախմբել, դիմադրել այն աղետին, որ մեր գլխին բերել են այս իշխանությունները»,- նշեց «Հայաքվե» նախաձեռնության համակարգող Ավետիք Չալաբյանը։ Հարցին, թե ինչո՞ւ արցախցիների ակցիաներում «ՀայաՔվեն» ներգրավված չէ, նա ասաց. ««Կարծում ենք, որ դեսպանությունների դիմաց իրականացվող գործողություններն արդյունավետ չեն։ Արցախում տեղի ունեցող ողբերգության հիմնական պատճառը ՀՀ իշխանությունն է։ Արցախյան գործընկերների հետ որոշակի երկխոսության մեջ ենք, փորձում ենք իրենց բացատրել, որ ակցիաների թիրախը շատ հստակ պետք է լինի, և գործողություններ պետք է պահանջել հիմնական շահառուից՝ ՀՀ իշխանություններից, ոչ թե ՄԱԿ-ից, ինչ որ դեսպանություններից։ Փառք Աստծո, Հյայաստանն Արցախն Ադրբեջանի մաս դեռ չի ճանաչել, ընդամենը բանավոր խոսք է, չկա որևէ փաստաթուղթ, հիմա պետք է ամեն ինչ անել, այդ բանավոր խոսքն ընդհանրապես դուրս բերվի շրջանառությունից։ Մեր Արցախի գործընկերները պետք է իրենց ռեսուրսները մոբիլիզացնեն հենց այդ ուղղությամբ, երբ դա տեղի ունենա, մենք նրանց կաջակցենք», - ասաց նա։

13:06 - 22 հուլիսի, 2023