Շրջակա միջավայրի նախարարություն

ՀՀ շրջակա միջավայրի նախարարությունը գործադիր իշխանության հանրապետական մարմին է, որը մշակում եւ իրականացնում է ՀՀ շրջակա միջավայրի պահպանության եւ բնական ռեսուրսների բանական օգտագործման բնագավառներում պետական քաղաքականությունը: 

ՀՀ ՇՄ նախարարն է Ռոմանոս Պետրոսյանը, տեղակալներն են Աննա Մազմանյանը եւ Տիգրան Սիրմոնյանը։

2019 թվականին ՀՀ բնապահպանության նախարարությունը վերանվանվել է Շրջակա միջավայրի նախարարության։

Իսպանացի արշավորդը պատմել է՝ ինչպես են Արագածում մնացել ձնահյուսի տակ ու 400 մետր ցած գլորվել |news.am|

Իսպանացի արշավորդը պատմել է՝ ինչպես են Արագածում մնացել ձնահյուսի տակ ու 400 մետր ցած գլորվել |news.am|

news.am: Արագած լեռան հյուսիսային գագաթին տեղի ունեցած ձնահյուսի հետևանքով տուժած Իսպանացի արշավորդներից մեկը NEWS.am–ի հետ զրույցում մանրամասներ է հայտնել տեղի ունեցածից։ «Մենք հասնում էինք գագաթ, երբ ձնահյուս սկսվեց։ Այդ ողջ ձյունը լցվեց մեզ վրա, և մոտ 400 մետր ձնահյուսի մեջ գլորվել ենք դեպի ներքև։ Չգիտեմ՝ ինչ ասել... Ուզում եմ միայն շնորհակալությունս հայտնել մեզ փրկելու համար։ Այսօր վատ օր էր մեզ համար»,–ասաց նա՝ նշելով որ Հայաստան էին եկել դահուկներով սահելու։ Նշենք, որ Արագած լեռան հյուսիսային գագաթին տեղի ունեցած ձնահյուսի հետևանքով տուժել է 8 անձ: ՀՀ առողջապահության նախարարությունից հայտնում են, որ բժիշկների կողմից նախնական ախտորոշվել է պոլիտրավմաներ (միջին և թեթև): Ավելի վաղ հայտնել էինք, որ մարտի 11-ին՝ ժամը 15:26-ին, Արագածոտնի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Արագած լեռան հյուսիսային գագաթին տեղի է ունեցել ձնահյուս․ 9 անձից բաղկացած արշավախումբը մնացել է ձնահյուսի տակ, 8 անձ դուրս է եկել, իսկ 1-ն անհետ կորել է։  ՆԳՆ Փրկարար ծառայությունից հայտնում են, որ մեկ քաղաքացի շարունակում է մնալ անհայտ կորած։ Որոնողափրկարարական աշխատանքները շարունակվում են։  Որոնողափրկարարական աշխատանքներին ներգրավվել են 51 փրկարարական ծառայող և «ԱՐՄԵՆԻԱՆ ՀԵԼԻՔՈՓԹԵՐՍ» ընկերության երկու ուղղաթիռ։
09:47 - 12 մարտի, 2025
Խուսափել լեռներ այցելություններից. որոշ լեռնալանջերում ձնահյուսերի հավանականությունը մեծանալու է

Խուսափել լեռներ այցելություններից. որոշ լեռնալանջերում ձնահյուսերի հավանականությունը մեծանալու է

Շրջակա միջավայրի նախարարությունը տեղեկացնում է, որ հանրապետությունում դիտվող բարձր ջերմաստիճանի պայմաններում, արևի ճառագայթների ազդեցությամբ ձյան զանգվածները լեռնային շրջաններում սկսում են ակտիվորեն հալչել, դրանց ջրապարունակությունը և զանգվածը մեծանում է, ինչը հանգեցնում է ձնահյուսերի վտանգի հավանականության բարձրացման: «Մարտի 11-18-ը հանրապետությունում կանխատեսվում է օդի ջերմաստիճանի բարձրացում 6-10 աստիճանով, ինչով պայմանավորված հանրապետության լեռնային և բարձրալեռնային շրջաններում (2500 մետրից ավել բարձրություններում) մեծ թեքություն ունեցող լեռնալանջերում մեծանալու է ձնահյուսերի առաջացման հավանականությունը։ Անվտանգությունից ելնելով կոչ ենք անում խուսափել լեռներ այցելություններից»,- ասված է հաղորդագրությունում։
17:27 - 11 մարտի, 2025
ԹԻՀԿ-ը կրկին ահազանգում է Հատիս լեռան կառուցապատման ծրագրի անօրինականության մասին

ԹԻՀԿ-ը կրկին ահազանգում է Հատիս լեռան կառուցապատման ծրագրի անօրինականության մասին

Թրանսփարենսի Ինթերնեշնլ հակակոռուպցիոն կենտրոնը կրկին դիմել է ՀՀ շրջակա միջավայրի նախարարությանը՝ բարձրաձայնելով Հատիս լեռան վրա իրականացվող «Հիսուս Քրիստոսի մոնումենտալ արձան-համալիրի» կառուցման ծրագրի անօրինականության մասին։ Նախկինում ներկայացված դիտարկումներին ավելացվել են նոր փաստեր, որոնք մատնանշում են Շրջակա միջավայրի վրա ազդեցության գնահատման (ՇՄԱԳ) հաշվետվության թերությունները և ծրագրի փաստաթղթային անճշտությունները։ «Փետրվարի 6-ին ՀՀ շրջակա միջավայրի նախարարության կայքում հրապարակվել է «Գագիկ Ծառուկյան» բարեգործական հիմնադրամի կողմից նախաձեռնված այս նախագծի ՇՄԱԳ հաշվետվությունը, իսկ փետրվարի 26-ին Կոտայքի մարզի մի շարք համայնքներում անցկացվել են հանրային լսումներ։ ԹԻՀԿ-ի կողմից կատարված ուսումնասիրությունները ցույց են տվել, որ ՇՄԱԳ հաշվետվությունը մի շարք առումներով թերի է և չի համապատասխանում ՀՀ «Շրջակա միջավայրի վրա ազդեցության գնահատման և փորձաքննության մասին» օրենքի պահանջներին։ Մասնավորապես՝ Չի ներկայացվել հիմնավորող որևէ ռազմավարական փաստաթուղթ, որը կվկայեր նախագծի տնտեսական կամ զբոսաշրջային նշանակության մասին։ Հաշվետվությունը կենտրոնանում է միայն շինարարության փուլում շրջակա միջավայրի վրա ազդեցության վրա՝ ամբողջությամբ շրջանցելով շահագործման փուլի հնարավոր հետևանքները։ Չի կատարվել այցելուների ակնկալվող մեծ հոսքերի և դրանց սոցիալ-տնտեսական ազդեցության պատշաճ գնահատում։ Չի ուսումնասիրվել Հատիս լեռան սեյսմիկ անվտանգությունը՝ հաշվի առնելով, որ այնտեղ նախատեսվում է տեղադրել մեծամասշտաբ կոնստրուկցիա։ Չի ներկայացվել բնապահպանական կառավարման պլան՝ նախատեսվող գործունեության ամբողջական ազդեցությունը կանխարգելելու կամ նվազեցնելու համար։ Ակնհայտ է, որ բնապահպանական փորձաքննությունը թերի փաթեթով է ընդունվել, ինչը խախտում է օրենքի պահանջները։ Հանրային լսումների ընթացքում ԹԻՀԿ-ի և գործընկեր կազմակերպությունների կողմից բարձրացված հարցերին ձեռնարկողն ու նախարարության ներկայացուցիչները սպառիչ պատասխաններ չեն տրամադրել։ Փոխարենը, փորձաքննության գործընթացում նախագծին ցուցաբերվել է ակնհայտ աջակցություն։ ԹԻՀԿ-ը պահանջում է, որպեսզի ՀՀ շրջակա միջավայրի նախարարությունը պատշաճ կերպով ուսումնասիրի ներկայացված դիտարկումները և ապահովի օրենքի գերակայությունը։ Հակառակ դեպքում, կստացվի, որ պետական մարմինները դիտավորյալ խախտում են օրենսդրական պահանջները՝ անտեսելով հասարակության շահերը և շրջակա միջավայրի պաշտպանության կարևորությունը»,- ասված է հաղորդագրությունում։ Լուսանկարը՝ Ալեքսանդր Պատրինի
17:45 - 07 մարտի, 2025
Որքան է կազմել տեղումների քանակը ՀՀ-ում. մանրամասնում է Շրջակա միջավայրի նախարարությունը

Որքան է կազմել տեղումների քանակը ՀՀ-ում. մանրամասնում է Շրջակա միջավայրի նախարարությունը

Հայաստանի շրջակա միջավայրի նախարարությունը ներկայացրել է, թե որքան է կազմել Հայաստանում տեղումների քանակը փետրվարի 20-ին և 21-ի գիշերը։ ՀՀ շրջակա միջավայրի նախարարության տարածած հաղորդագրությունը ներկայացնում են ստորև․  «Ինչպես և կանխատեսվել էր հզոր ցիկլոնով պայմանավորված փետրվարի 20-ին և 21-ի գիշերը ողջ հանրապետությունում դիտվել է ձյուն, առանձին հատվածներում շատ ուժեղ։ Դիտվել է նաև բուք, ցածր հորիզոնական տեսանելիություն։ Հանրապետության ճանապարհներին մերկասառույց։  Տեղումների քանակը կազմել է․  Շիրակում 10-24մմ, ձյան ծածկի բարձրությունը հասել է 22-40սմ, Գեղարքունիքում՝ տեղումներ- 10-40մմ, ձյան ծածկի բարձրություն՝ 15-40սմ,  Լոռիում՝ տեղումներ- 13-27մմ, ձյան ծածկի բարձրություն՝ 30-36սմ,  Տավուշում՝ տեղումներ- 9-30մմ, ձյան ծածկի բարձրություն՝ 30-45սմ (Բագրատշեն՝ մինչև 5սմ),  Արագածոտնի լենային շրջաններում՝ տեղումներ- 10-27մմ, ձյան ծածկի բարձրություն՝ 50-70սմ, Արագածոտնի բարձր լենային շրջաններում՝ տեղումներ- 10-27մմ, ձյան ծածկի բարձրություն՝ 60-120սմ,  Արագածոտնի նախալենային շրջաններում՝ տեղումներ- 9-15մմ, ձյան ծածկի բարձրություն՝ 5-12սմ,  Կոտայքի լեռնային շրջաններում՝ տեղումներ- 15-28մմ, ձյան ծածկի բարձրություն՝ 40-70սմ, Կոտայքի նախալեռնային շրջաններում՝ տեղումներ- 20-50մմ, ձյան ծածկի բարձրություն՝ 10-15սմ,  Արարատ, Արմավիրում տեղումներ- 14-17մմ, ձյան ծածկի բարձրություն՝ 15-20սմ, Վայոց ձորի լեռնային շրջաններում՝ տեղումներ- 8-10մմ, ձյան ծածկի բարձրություն՝ 40-60սմ,  Վայոց ձորի նախալեռնային շրջաններում՝ տեղումներ- 6-9մմ, ձյան ծածկի բարձրություն՝ 8-10սմ,  Սյունիքի հովտային շրջաններում՝ տեղումներ- 2-6մմ, ձյան ծածկի բարձրություն՝ 1-4սմ, Սյունիքի նախալեռնային շրջաններում՝ տեղումներ- 3-5մմ, ձյան ծածկի բարձրություն՝ 4-6սմ,  Երևանում՝ տեղումներ-15մմ, ձյան ծածկի բարձրություն՝ 15-18սմ։ Առանձին հատվածներում թափվել են ամսական նորմայի չափ տեղումներ։ Վերջին անգամ նման հզոր ցիկլոնային շրջանառություն հանրապետությունում ունեցել էինք 2016 թվականի հունվարի 1-2-ին, երբ Երևանում ձնածածկույթի բարձրությունը հասել է 40-50սմ, ինչից հետո հարավ արևմտյան նմանատիպ ցիկլոնի ելք չէր դիտվել։ Պետք չէ շփոթել ձյան ծածկույթի բարձրությունը, տեղումների քանակի հետ: Ձնածածկույթի բարձրությունը որոշվում է ձնաչափական ձողի օգնությամբ, որի վրա գծված են սանտիմետրական բաժանմունքներ և չափման միավորն է` սմ։ Տեղումների քանակը ջրի շերտի (տվյալ դեպքում ձյան հալքից) բարձրությունն է միլիմետրերով, որը կառաջանար երկրի մակերևույթի վրա, եթե այն լիներ հարթ, այսինքն՝ տեղումները չհոսեին, չներծծվեին հողի մեջ և չգոլորշիանար, այն չափվում է տեղումնաչափի միջոցով։
11:29 - 21 փետրվարի, 2025
Այս պահին թե՛ դատական, թե՛ իրավական փաստ կամ հիմք չկա՝ Ամուլսարի շահագործման գործընթացը կասեցնելու. Սիմիդյան
 |news.am|

Այս պահին թե՛ դատական, թե՛ իրավական փաստ կամ հիմք չկա՝ Ամուլսարի շահագործման գործընթացը կասեցնելու. Սիմիդյան |news.am|

news.am: «Լիդիան Արմենիան» հանքը շահագործելու բոլոր թույլտվություններն ունի: Մասնավորապես, ՇՄԱԳ (շրջակա միջավայրի վրա ազդեցության գնահատում) թույլտվության մասով Ամուլսարը, եթե չեմ սխալվում, երկու փորձաքննություն է անցել՝ 2014 և 2016 թվականներին: Այդ մասին 2024 թվականի աշխատանքներն ամփոփող ասուլիսի ժամանակ ասաց ՀՀ շրջակա միջավայրի նախարար Հակոբ Սիմիդյանը: «Ամուլսարն ունի թույլտվություններ՝ հանքը շահագործելու, և այս պահին թե՛ դատական, թե՛ իրավական փաստ կամ հիմք չկա՝ այս գործընթացը որևէ ձևով կասեցնելու»,- հայտարարեց նախարարը և հավելեց՝ դա քննությունն է ասում: Ինչ վերաբերում է հանքը շահագործելու ռիսկերին, ապա, ըստ Սիմիդյանի, ընդերքօգտագործման դեպքում բնության համար միշտ ռիսկեր գոյանում են: Բայց ժամանակակից աշխարհում ժամանակակից գործիքներ ու նոր տեխնոլոգիաներ կան, որոնք որևէ գործունեության պարագայում կարող են օգնել, որպեսզի նվազեցվի կամ չեզոքացվի շրջակա միջավայրի վրա ազդեցությունը: «Եթե մենք որևէ գործունեության տեսակ, որը համարում ենք, որ բնությանը կարող է վնաս հասցնել, ազդեցության գնահատման փորձաքննություն ենք իրականացնում, և, ըստ էության, եթե գործունեության տեսակը, վայրը և մնացած պայմանները թույլատրելի են, գործունեության ընթացքում պայմաններ ենք ներկայացնում, այդ թվում՝ ասում ենք՝ հարկ կվճարես, որ սուբվենցիա անենք, որպեսզի նվազեցնենք ազդեցությունը շրջակա միջավայրի, մարդու առողջության վրա»,- ասաց նախարարը և հավելեց, որ այս քաղաքականությունը գործելու է նաև Ամուլսարի պարագայում:
17:22 - 10 հունվարի, 2025
Վերջին տարիներին Երևանում օդի աղտոտվածության մեծ փոփոխություն չի գրանցվել. Սիմիդյան |armenpress.am|

Վերջին տարիներին Երևանում օդի աղտոտվածության մեծ փոփոխություն չի գրանցվել. Սիմիդյան |armenpress.am|

armenpress.am: Ըստ տարեկան դիտարկումների՝ վերջին տարիներին Երևանում օդի աղտոտվածության մեծ փոփոխություն չի գրանցվել: Այս մասին հունվարի 10-ին ասուլիսի ժամանակ ասաց ՀՀ շրջակա միջավայրի նախարար Հակոբ Սիմիդյանը: «Վերջին տարիներին Երևանում օդի աղտոտվածության մեծ փոփոխություն, ըստ տարեկան դիտարկումների, չի գրանցվել: 2024 թվականի ամռան շրջանում, ըստ էության, դիտվել է փոշու կոնցենտրացիայի նվազում, 2024 թվականի նոյեմբեր-դեկտեմբեր ամիսների տվյալները շատ չեն տարբերվում 2022-23 թվականների տվյալներից»,- ասաց Սիմիդյանը: Նա նշեց՝ Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի կողմից մթնոլորտային օդի մասով դիտարկվում են մթնոլորտային օդում ծծմբի երկօքսիդի, ազոտի երկօքսիդի, գետնամերձ օզոնի և ըստ բաղադրության չտարբերակված փոշու պարունակությունները: Ըստ նախարարի՝ սա այն կարողություն է, որ  այս պահին նախարարությունն ունի: Իսկ դիտարկումներն իրականացնում են Երևան քաղաքում 5 անշարժ և 45 շարժական դիտակետերում՝ շաբաթական կտրվածքով: 5 անշարժ դիտակետերը վերը նշված բաղադրիչներն ուսումնասիրելու, իսկ շարժականները միայն ծծմբի և ազոտի երկօքսիդի տվյալներն ուսումնասիրելու նպատակով են: «Մոնիթորինգի այն համակարգը, որը մենք ունենք այս պահին,  նոր անհանգստացնող տվյալներ չի գրանցել, քան նախկինում կար: Մեր համոզմամբ՝ անհանգստությունները, որոնք այս պահին ունենք, ձևավորվել են  Երևանի քաղաքապետարանի կողմից սենսորային սարքերի տեղադրման արդյունքում, որոնք տեղադրված են հիմնականում շինհրապարակներում: Ինչպես նաև որոշակի անհանգստացնող թվեր են ներկայացնում շվեյցարական կազմակերպության կայքի տվյալները: Նշեմ, որ միջազգային ստանդարտների համաձայն՝ դեռևս չկա հավաստում, որ այս սարքերի տվյալները ճշգրիտ են, դրանք կարող են մինչ 40 տոկոս շեղում գրանցել: Դրանք ավելի շատ օժանդակող սարքեր են այն արդիական համակարգի համար, որը մենք առաջիկայում ուզում ենք ձեռք բերել»,- նշեց Սիմիդյանը:
17:18 - 10 հունվարի, 2025
Նոյեմբերի 15-ից դեկտեմբերի 9-ը ստուգայցի ընթացքում առգրավվել է 1215 կգ «սիգ» տեսակի ձուկ

Նոյեմբերի 15-ից դեկտեմբերի 9-ը ստուգայցի ընթացքում առգրավվել է 1215 կգ «սիգ» տեսակի ձուկ

Այսօր նախարար Հակոբ Սիմիդյանի գլխավորությամբ Սևանա լճում սիգի ձվադրման ժամանակահատվածում իրականացվող համատեղ միջոցառումների կողմ գերատեսչությունների ներկայացուցիչների մասնակցությամբ քննարկվել է իրականացվող վերահսկողության համատեղ միջոցառումների ծրագրի իրականացման ընթացքը:   «Այսպիսով՝ 2024 թվականի նոյեմբերի 15-ից դեկտեմբերի 9-ը ընկած ժամանակահատվածում իրականացվել է 1698 ստուգայց, որի ընթացքում արձանագրվել է ձկնագողության` 12, ապօրինի վաճառքի` 72 դեպք, առգրավվել է 1215 կգ «սիգ» տեսակի ձուկ, 21 լողամիջոց և 2 ձկնորսական ցանց։   Նախապատրաստվում են նյութեր Վարչական իրավախախտումների վերաբերյալ ՀՀ օրենսգրքի (թվով 18) և ՀՀ քրեական օրենսգրքի (թվով 10) համապատասխան հոդվածներով։   Զեկուցվել է նաև, որ շարունակվում են հանդիպումները ձկնորսների հետ`բացատրելու ձվադրման ժամանակահատվածում որսի արգելքի կարևորությունը։   Հանդիպման ընթացքում քննարկվել են խստացված միջոցառումների ժամանակացույցի և ստուգայցերի ձևաչափի վերաբերյալ մի շարք հարցեր։   Նախարարը հույս է հայտնել, որ իրականացվող գործողությունները չեն հանդիպի ապօրինի դիմադրության և մեր քաղաքացիները կշարունակեն ըմբռնումով մոտենալ իրականացվող միջոցառումներին»,- ասված է Շրջակա միջավայրի նախարարության տարածած հաղորդագրության մեջ։  
19:42 - 10 դեկտեմբերի, 2024
Հրապարակվել է Ամուլսարի գործով 2015թ-ից ի վեր ընթացող դատական գործի վճիռը

Հրապարակվել է Ամուլսարի գործով 2015թ-ից ի վեր ընթացող դատական գործի վճիռը

2024թ-ի դեկտեմբերի 2-ին ՀՀ վարչական դատարանը՝ ի դեմս դատավոր Կարեն Զարիկյանի, կայացրեց թերևս աննախադեպ մի վճիռ, որով 9 տարի տևած դատական գործընթացից հետո մեծ մասամբ բավարարվեց Ամուլսարում ոսկու հանք շահագործելու ծրագրի վերաբերյալ ՀՀ քաղաքացիների բողոքը։ Այս մասին հայտնում են Հայկական բնապահպանական ճակատ կամավորական նախաձեռնությունից։  Հաղորդագրության մեջ նշվում է, որ դեռևս 2015 թվականին Գնդեվազ գյուղի 11 բնակիչներ և 2 հասարակական կազմակերպություններ դատարան էին դիմել՝ պահանջելով ոչ իրավաչափ ճանաչել Ամուլսարի ծրագրին կանաչ լույս տված մի շարք իրավական ակտեր։ Երկարատև դատական գործընթացի մանրամասների մեջ չխորանալով՝ այս պահին կարևոր ենք համարում արձանագրել դատարանի կայացրած այս, թերևս պատմական, որոշումը, որով արձանագրվում է բապահպանական փորձաքննական եզրակացության օրենքի խախտումով ձեռք բերած լինելու և այդ գործընթացի ձևական բնույթ կրելու փաստերը։ Այս խնդիրը բազմիցս բարձրացրել են բնապահպանական հանրությունն ու հանքերին ընդդիմացող համայքները, ոչ միայն Ամուլսարի, այլ բազմաթիվ այլ ծրագրերի դեպքում։ Վճիռն ամբողջությամբ կարելի է գտնել այստեղ։ Նախաձեռնությունը մի քանի մեջբերում է կատարել դատական ակտի վճռից և Դատարանի վերլուծություն բաժնից, որը ներկայացնում ենք ստորև․ Դատարանը Վ Ճ Ռ Ե Ց. 1) ․․․հայցն ընդդեմ Տարածքային կառավարման և ենթակառուցվածքների նախարարության բավարարել մասնակի. 2) անվավեր ճանաչել Ընդերքի տեղամասի ընդլայնման և թույլտվության ժամկետի փոփոխության մասին Էներգետիկայի և բնական պաշարների նախարարի 24.11.2014 թվականի թիվ 286-Ա հրամանը, 2012 թվականի սեպտեմբերի 26-ին վերաձևակերպված լեռնահատկացման ԼՎ-245 ակտի 25.11.2014 թվականի փոփոխությունը և Օգտակար հանծոների արդյունահանման 2012 թվականի սեպտեմբերի 26-ին վերաձևակերպված թիվ ՇԱԹՎ-29/245 թույլտվության 29.11.2014 թվականի փոփոխությունը.․․ *** Լիազորված մարմնի փորձաքննական եզրակացությունը հիմնականում նկարագրողական բնույթ ունի: Այն գերազանցապես վերարտադրում է դիմողի կողմից իրականացված շրջակա միջավայրի վրա ազդեցության գնահատման արդյունքները՝ հղում տալով դրանց վերաբերյալ տարբեր կազմակերպությունների ներկայացրած կարծիքներին: Սակայն վերը նշված հարցերի վերաբերյալ սեփական վերլուծություն տվյալ փաստաթուղթը չի պարունակում: Եվ դա պատահական չէ, քանի որ լիազորված մարմնի փորձաքննական եզրակացությունը ստորագրած երեք անձանցից երկուսը (Ա. Մինասյան, Զ. Զուռնաչյան) վկայի կարգավիճակով հարցաքննվել են 12.02.2024թ. դատական նիստում և հայտնել են, որ չունեն բավարար մասնագիտական գիտելիքներ տվյալ գործունեության շրջակա միջավայրի վրա ազդեցությունը գնահատելու համար: Ըստ վկաների ցուցմունքների՝ նրանք միայն հավաքագրել են նախագծի վերաբերյալ տարբեր գերատեսչությունների կարծիքները և կազմակերպել են շահագրգիռ քննարկումներ, սակայն եզրակացությունում նշված հանգամանքների վերաբերյալ սեփական դատողություններ անելու փորձաքննական պատրաստվածություն, ըստ էության, չունեն: Իսկ լիազորված մարմնի փորձաքննական եզրակացությունը ստորագրած մյուս անձը (Հ. Գրիգորյան), ըստ վկա Մինասյանի, եղել է Բնապահպանական Փորձաքննություն պետական ոչ առևտրային կազմակերպության փոխտնօրենը և բովանդակային առումով չի մասնակցել փորձաքննությանը: Դատարանը գտնում է, որ շրջակա միջավայրի վրա ազդեցության փորձաքննությունը չի ենթադրում վկաների նկարագրած կազմակերպչական աշխատանքները: ՀՕ-21 օրենքի 16-րդ հոդվածի 2-րդ մասի գ կետով լիազորված մարմինը շրջակա միջավայրի վրա ազդեցության փորձաքննություն շրջանակում իրավասու է հրավիրել փորձագետների, որոնց մասնագիտական գիտելիքները հնարավորություն կտան լիարժեքորեն լուծել ՀՕ-21 օրենքի 3-րդ հոդվածով սահմանված՝ շրջակա միջավայրի վրա ազդեցության փորձաքննության խնդիրները, նպատակ ունենալով պաշտպանել ՀՕ-21 օրենքի 2-րդ հոդվածով սահմանված շահերը, այդ թվում՝ ապահովել նույն հոդվածի 2-րդ մասով սահմանված՝ առողջության, բնականոն ապրելու և ստեղծագործելու համար բարենպաստ շրջակա միջավայր ունենալու մարդու իրավունքը, հիմնվելով նույն հոդվածի 3-րդ մասով սահմանված սկզբունքների, այդ թվում՝ գիտական հիմնավորվածության և օրինականության, վրա: Եթե շրջակա միջավայրի վրա ազդեցության փորձաքննությանը ներգրավված անձինք չեն ունեցել համապատասխան մասնագիտական գիտելիքներ, օրենքի վերը նշված պահանջները սկզբունքորեն հնարավոր չէ համարել կատարված: *** Դատարանը գործի քննության ընթացքում ձեռք է բերել նաև Քննչական կոմիտեի հատկապես կարևոր գործերի քննության գլխավոր վարչության կողմից հարուցված թիվ 69104218 քրեական գործով Էլարդ ընկերության փորձագետների կողմից իրականացված փորձաքննության եզրակացությունը (22.07.2019թ.), որտեղ ևս փորձագետները մի շարք բնապահպանական ռիսկեր են արձանագրել: Դրանք ներառում են, ի թիվս այլնի, հետևյալ խնդիրները՝ ստորգետնյա ջրերի վրա ներգործությունը, թթվային ապարների դրենաժի թթվային միջավայրի ազդեցությունը, մակերևութային ջրերի որակի ոչ բավարար լինելը, սիմուլացիայի մեջ հաշվարկված ջրերի հոսքի ցածր հզորությունը և տեղաշարժը, բացահանքերից առաջացող ստորգետնյա ջրերի պոտենցիալ աղտոտում, դատարկ ապարների լցակույտի համար նախագծված պասիվ մաքրման համակարգի տարբեր թերություններ, կույտային տարրալվացման գործընթացների լուծույթների հետ կապված խնդիրները, ծրագրի տարածքի համար սեյսմիկ վտանգի բարձր ռիսկը, հետփակման ծախսերի մեծ մասի անհիմն լինելը, շրջակա միջավայրի մոնիթորինգային ծրագրի անբավարարությունը, գեոլոկացիոն տվյալների և դրանց սինթեզի բացակայությունը որպես կենսաբազմազանության գնահատման հիմնական թույլ կողմ և օդի որակի որոշակի խնդիրներ: *** Նման պայմաններում, երբ շրջակա միջավայրի վրա ազդեցության փորձաքննական եզրակացությունը, ի խախտումն ՀՕ-21 օրենքի 11-րդ հոդվածի 1-ին մասի, հիմնված չէ մասնագիտական իրավասության հավաստագրեր ստացած լիազորված անձանց մասնագիտական եզրակացության վրա, ինչպես նաև դրանով չեն լուծվել նույն օրենքի 3-րդ հոդվածով սահմանված խնդիրները և չեն գնահատվել նույն օրենքի 5-րդ հոդվածով սահմանված հարցերը, օգտակար հանածոյի արդյունահանման նպատակով տրամադրված ընդերքի տեղամասի ընդլայնման հետևանքով առաջացող բնապահպանական ռիսկերը, ՀՕ-21 օրենքով սահմանված կարգով իրականացվող շրջակա միջավայրի վրա ազդեցության փորձաքննության իմաստով, կառավարելի չեն կարող որակվել: Ընդ որում, խոսքը բացառապես վիճարկվող ակտերով թույլատրված ընդլայնման մասին է, և դատարանի եզրահանգումը չի վերաբերում մինչ այդ երրորդ անձին տրամադրված իրավունքի իրավաչափությանը, որի վերաբերյալ վարչական ակտերը չեն վիճարկվում այս գործով: *** Դատարանն ընդգծում է նաև, որ վերը նշված իրավական դիրքորոշման պայմաններում նշանակություն չունի Լիդիան Արմենիա բաց բաժնետիրական ընկերության ներկայացրած այն տվյալները, որոնք, ըստ վերջինիս, հերքում են նախագծով նախատեսված գործունեության բնապահպանական ռիսկերը: Նշված ռիսկերը պետք է գնահատվեին ՀՕ-21 օրենքով սահմանված կարգով և չափանիշներով իրականացվող շրջակա միջավայրի վրա ազդեցության փորձաքննության շրջանակում, որը տվյալ դեպքում տեղի չի ունեցել: Դատարանը չի կարող օգտակար հանածոյի արդյունահանման նպատակով տրամադրված ընդերքի տեղամասի ընդլայնման հետևանքով առաջացող բնապահպանական ռիսկերը համարել կառավարելի, քանի դեռ դրանք օրենքով սահմանված կարգով վերլուծության չեն ենթարկվել լիազորված մարմնի կողմից: *** Դատարանը այս հարցում ուշագրավ է համարում նաև լիազորված մարմնի (Բնապահպանության նախարարություն, վերանվանված՝ Շրջակա միջավայրի նախարարության)՝ որպես գործով երրորդ անձի, դատավարական պասիվությունը: Երրորդ անձն, ըստ էության, որևէ փաստարկով չի փորձել պաշտպանել իր կողմից կազմված փորձաքննական եզրակացությունն այն պայմաններում, երբ հայցվորները հիմնականում վիճարկում են այդ փաստաթղթի համապատասխանությունը օրենքով սահմանված պահանջներին: Ընդ որում, դատարանը այս խնդիրը բարձրաձայնել է Բնապահպանության նախարարին ուղղված 18.04.2019թ. գրությամբ, որից հետո ևս նախարարությունից չի ստացվել փորձաքննական եզրակացությունը պաշտպանող փաստարկներ: *** Ամբողջ վերը շարադրվածի հիման վրա դատարանը եզրակացնում է, որ տվյալ գործով օգտակար հանածոյի արդյունահանման նպատակով տրամադրված ընդերքի տեղամասի ընդլայնման հետևանքով շրջակա միջավայրի վրա ազդեցության փորձաքննությունը տեղի է ունեցել ՀՕ-21 օրենքի վերը նշված դրույթների խախտմամբ, որի հետևանքով չի ապահովվել նույն օրենքի 2-րդ հոդվածի 1-ին մասում ամրագրված՝ առողջության, բնականոն ապրելու և ստեղծագործելու համար բարենպաստ շրջակա միջավայր ունենալու հայցվորների իրավունքը: Օգտակար հանածոյի արդյունահանման նպատակով տրամադրված ընդերքի տեղամասի ընդլայնման հետևանքով առաջացող բնապահպանական ռիսկերը օրենքով սահմանված կարգով և չափանիշներով գնահատված չլինելու պայմաններում շրջակա միջավայրի վրա ազդեցության փորձաքննական դրական եզրակացություն է տրվել՝ առանց պարզելու, թե արդյոք տվյալ գործունեության հետևանքով չեն առաջանա հայցվորների առողջ և բարեկեցիկ ապրելու համար անհամատեղելի պայմաններ։ *** Դատարանն ընդգծում է, որ բոլոր հայցվորները Գնդևազ համայնքի բնակիչներ են, որը ՀՕ-110-Ն օրենքի 4-րդ հոդվածի 1-ին մասի 16-րդ և 17-րդ կետերի իմաստով ներառում է շրջակա միջավայրի վրա հիմնադրույթային փաստաթղթի գործողության կամ նախատեսվող գործունեության իրականացման հնարավոր ազդեցության ենթակա բնակավայր: Հաշվի առնելով նախատեսվող գործունեության փոքր հեռավորությունը հայցվորների բակավայրից, ըստ այդմ՝ այն ազդակիր համայնք ճանաչելու հանգամանքը, առողջության, բնականոն ապրելու և ստեղծագործելու համար բարենպաստ շրջակա միջավայր ունենալու հայցվորների իրավունքը էլ ավելի վտանգված է վիճարկվող ակտերով թույլատրված՝ օգտակար հանածոյի արդյունահանման նպատակով տրամադրված ընդերքի տեղամասի ընդլայնման հետևանքով: Քանի դեռ նախատեսվող գործունեությունը չի գնահատվել շրջակա միջավայրի վրա ազդեցության՝ օրենքով սահմանված կարգով և չափանիշներով, հնարավոր չէ բացառել հայցվորների առողջ և բարեկեցիկ ապրելու համար անհամատեղելի պայմաններ ստեղծվելու իրական ռիսկը: *** Նման պայմաններում օգտակար հանածոյի արդյունահանման նպատակով տրամադրված ընդերքի տեղամասի ընդլայնման վերաբերյալ վարչական ակտերն ընդունվել են օրենքի խախտմամբ ձեռք բերված շրջակա միջավայրի վրա ազդեցության փորձաքննական եզրակացության հիման վրա, որի հետևանքով խախտվել է ՀՕ-21 օրենքի 2-րդ հոդվածի 1-ին մասում ամրագրված՝ առողջության, բնականոն ապրելու և ստեղծագործելու համար բարենպաստ շրջակա միջավայր ունենալու հայցվորների իրավունքը: Ուստի նշված վարչական ակտերը, ըստ Օրենքի 63-րդ հոդվածի 1-ին մասի ա կետի, անվավեր են: *** Այսպիսով, հայցը՝ Ընդերքի տեղամասի ընդլայնման և թույլտվության ժամկետի փոփոխության մասին Էներգետիկայի և բնական պաշարների նախարարի 24.11.2014 թվականի թիվ 286-Ա հրամանը, 2012 թվականի սեպտեմբերի 26-ին վերաձևակերպված լեռնահատկացման ԼՎ-245 ակտի 25.11.2014 թվականի փոփոխությունը և Օգտակար հանծոների արդյունահանման 2012 թվականի սեպտեմբերի 26-ին վերաձևակերպված թիվ ՇԱԹՎ-29/245 թույլտվության 29.11.2014 թվականի փոփոխությունը վերացնելու պահանջի մասով, հիմնավոր է և ենթակա է բավարարման, իսկ Կոորդինատային համակարգի փոփոխության մասին Էներգետիկայի և բնական պաշարների նախարարի 11.11.2014 թվականի թիվ 188-Ա հրամանը, Օգտակար հանածոների արդյունահանման 2012 թվականի սեպտեմբերի 26-ին վերաձևակերպված թիվ ՇԱԹՎ-29/245 թույլտվության 12.11.2014 թվականի փոփոխությունը և 2012 թվականի սեպտեմբերի 26-ին վերաձևակերպված լեռնահատկացման ԼՎ-245 ակտի 12.11.2014 թվականի փոփոխությունը վերացնելու պահանջի մասով՝ առարկայազուրկ և մերժման ենթակա:
10:51 - 04 դեկտեմբերի, 2024
Շրջակա միջավայրի նախարարը ներկայացրել է Էկոպարեկային ծառայության գործունեությունը

Շրջակա միջավայրի նախարարը ներկայացրել է Էկոպարեկային ծառայության գործունեությունը

Ազգային ժողովի, Կառավարության, միջազգային և տեղական հասարակական կազմակերպությունների, տեղական ինքնակառավարման մարմինների, զբոսաշրջային ոլորտի ներկայացուցիչների և լրագրողների մասնակցությամբ տեղի է ունեցել Շրջակա միջավայրի նախարարության Էկոպարեկային ծառայության ներկայացման միջոցառում։ Այս մասին հայտնում են ՀՀ Շրջակա միջավայրի նախարարությունից։ Միջոցառմանը բացման խոսքով հանդես է եկել նախարար Հակոբ Սիմիդյանը և անդրադարձել ծառայության գործարկման նախապատմությանը․ «2024 թվականի հունվարի 1-ից գործում է Էկոպարեկային ծառայության մասին նոր օրենքը և օրենսդրության գործարկումից հետո մենք ձեռնամուխ ենք եղել ծառայության կայացման գործընթացին։ Բավականին ծավալուն օրենսդրական աշխատանքից հետո արդեն հասել ենք ծառայության համալրման գործընթացին»։ Նախարարն անդրադարձել է բնության պահպանության գործառույթի կատարմանը տարբեր ժամանակներում և հիշեցրել, որ անտառային հողերում և բնության հատուկ պահպանվող տարածքներում պահպանությունը իրականացվել է տարբեր մարմինների կողմից և ոչ 24-ժամյա գրաֆիկով, ինչը շատ դեպքերում արդյունավետ չի եղել, ինչն էլ հիմք է հանդիսացել միավորելու այդ մարմինները և գործառույթները։ «Հույս ունեմ` այս ծառայության շնորհիվ կկարողանանք կրճատել ապօրինությունների շղթան, որն ունենք մեր անտառների, կենդանական և բուսական աշխարհի հանդեպ»,-նշել է նախարարը։ Ելույթներով հանդես են եկել Էկոպարեկային ծառայության պետ Վլադիմիր Կիրակոսյանը և ծառայության գլխավոր քարտուղար Լուսինե Ալեքսանյանը։ Ներկայացվել են ծառայության կառուցվածքը, գործառույթները, հաստիքների համալրման ընթացակարգը և ծառայության վերաբերյալ այլ մանրամասներ։   Ելույթներին հաջորդել է հարցուպատասխան և միջոցառման մասնակիցները հնարավորություն են ունեցել պատասխանատուներին ուղղել իրենց հուզող հարցերը։ Ամփոփելով միջոցառումը նախարար Սիմիդյանը նշել է, որ ծառայության վերաբերյալ իրազեկման հանդիպումները լինելու են շարունակական և հորդորել քաղաքացիներին դիմել և մասնակցել հայտարարաված թափուր հաստիքների համալրման մրցույթներին։
18:24 - 30 նոյեմբերի, 2024
Ծառուկյանի բիտումի և քսայուղերի գործարանի ՇՄԱԳ նախագծին բացասական եզրակացություն է տրվել
 |hetq.am|

Ծառուկյանի բիտումի և քսայուղերի գործարանի ՇՄԱԳ նախագծին բացասական եզրակացություն է տրվել |hetq.am|

hetq.am: «Բարգավաճ Հայաստան» կուսակցության առաջնորդ Գագիկ Ծառուկյանին և իրանահայ գործարարներին պատկանող «Արմօյլ» ՓԲԸ-ի՝ շրջակա միջավայրի վրա ազդեցության գնահատման (ՇՄԱԳ) նախագծին բացասական եզրակացություն է տրվել։ Շրջակա միջավայրի նախարարության փորձաքննական կենտրոնը եզրակացրել է, որ Եղվարդ քաղաքի Նատի թաղամասում «Արմօյլ» ՓԲԸ-ի կառուցած բիտումի և քսայուղերի գործարանը կառուցվել է մի շարք խախտումներով և նախատեսվող գործունեությունը անվտանգ չէ շրջակա միջավայրի համար։ Շրջակա միջավայրի վրա ազդեցության գնահատման նախագիծը «Արմօյլ» ՓԲԸ-ն ՇՄՆ փորձաքննական կենտրոն էր ներկայացրել 2024 թվականի օգոստոսին։ Կենտրոնը եզրակացությունը տվել է երկու ամիս անց՝ հոկտեմբերի 23-ին։  Ըստ փորձաքննական կենտրոնի եզրակացության՝ նախատեսվող գործունեության համար պահպանված չեն սանիտարապաշտպանական գոտիների համար սահմանված նորմերը։ Համաձայն հաշվետվության՝ մոտակա բնակելի տունը գտնվում է 140 մետր հեռավորության վրա, ճանապարհը՝ 74, իսկ 49 և 59 մետր հեռավորության վրա առկա են այգիներ։ Մինչդեռ ըստ քաղաքաշինական նորմերի՝ բիտումի արտադրության համար նախատեսված է 1000 մ սանիտարապաշտպանական գոտի, բիտումային տեղակայանքների համար՝ 300 մ, իսկ անմշակ նավթի, բիտումի, մազութի և այլ մածուծիկ նավթամթերքների համար՝ 500 մետր սանիտարապաշտպանական գոտի։ Փորձաքննական կենտրոնը խնդրահարույց է համարել նաև նախատեսվող գործունեության ընթացքում ծծմբի երկօքսիդի արտանետման քանակությունը, ինչն ըստ հաշվետվության՝ անխուսափելիորեն բացասական ազդեցություն է թողնելու հարակից տարածքների վրա և մեծացնելու է թափվող անձրևների թթվայնությունը։ ՇՄԱԳ հաշվետվությամբ նաև ներկայացված չի եղել բնական գազի այրումից առաջացող ածխածնի երկօքսիդի և մրի արտանետման և ցրման հաշվարկները։ Փորձաքննության ընթացքում կտարված հաշվարկը ցույց է տվել, որ բնական գազի այրումից տարեկան արտանետվելու է 790 տ ածխածնի երկօքսիդ, ինչի մասին «Արմօյլ» ՓԲԸ-ի ներկայացրած հաշվետվության մեջ չի նշվել։ Ավելի մանրամասն՝ սկզբնաղբյուրում։ 
19:50 - 25 նոյեմբերի, 2024
Քննարկվել են խնդիրները՝ կապված առգրավված ձկնապաշարի պահման հետ. ՇՄ նախարար

Քննարկվել են խնդիրները՝ կապված առգրավված ձկնապաշարի պահման հետ. ՇՄ նախարար

ՇՄ նախարար Հակոբ Սիմիդյանը քննարկել է սիգի ձվադրման ժամանակահատվածով պայմանավորված հսկողության ուժեղացված միջոցառումների ընթացիկ աշխատանքները։   «Այսօր ընդլայնված կազմով քննարկել ենք Սևանա լճում սիգի ձվադրման ժամանակահատվածում իրականացվող համատեղ միջոցառումների ծրագրի իրականացման ընթացքը, միջոցառումների կողմ գերատեսչությունները զեկուցել են արդեն իսկ կատարված աշխատանքերի մասին, ներկայացրել խնդիրները։   Զեկուցվեց, որ շարունակվում են հանդիպումները ձկնորսների հետ`բացատրելու ձվադրման ժամանակահատվածում որսի արգելքի կարևորությունը։   Պետք է նշեմ, որ այս տարի մեր քաղաքացիները Սևանա լճից և «Սևան» ազգային պարկի տարածքից շարունակում են կամովին դուրս բերել իրենց լողամիջոցները, որսագործիքները և ժամանակավոր կացարանները։   Պատասխանատուներին խնդրել եմ ուշադրության կենտրոնում պահել և մշտադիտարկումներ անցկացնել, որ այս դրական տենդենցները շարունակվեն։   Հատուկ խնդիր եմ ձևակերպել շուկաներում և վաճառքի կետերում ուժեղացնել վերահսկողությունը»,- ասել է Սիմիդյանը։   Հանդիպման ընթացքում քննարկվել են նաև առկա խնդիրները՝ կապված առգրավված ձկնապաշարի պահման և գիտական համայնքի կողմից իրականացվող ուսումնասիրությունների վերաբերյալ։   «Հարգելի քաղաքացիներ, ևս մեկ անգամ հորդորում եմ աչալրջությամբ ու սրտացավությամբ մոտեցեք համազգային կարևորության այս խնդրին և աջակցեք որսի արգելքի միջոցառումների իրականացմանը»,- ասել է նախարարը:
18:03 - 25 նոյեմբերի, 2024
Հայաստանը պատրաստ է հյուրընկալել COP-17-ը. Հակոբ Սիմիդյան |1lurer.am|

Հայաստանը պատրաստ է հյուրընկալել COP-17-ը. Հակոբ Սիմիդյան |1lurer.am|

1lurer.am: ՀՀ շրջակա միջավայրի նախարար Հակոբ Սիմիդյանը խորհրդարանում ելույթը սկսեց շատ կարևոր անդրադարձով՝ Կոլումբիայում հոկտեմբերի 21-ից նոյեմբերի 1-ը տեղի ունեցած Կենսաբազմազանության մասին ՄԱԿ-ի կոնվենցիայի (CBD) կողմերի 16-րդ համաժողովում Հայաստանը հոկտեմբերի 31-ին փակ-գաղտնի քվեարկությամբ ընտրվեց բնապահպանության ոլորտի ամենախոշոր իրադարձություններից մեկի՝ Կենսաբազմազանության կողմերի 17-րդ համաժողովի հյուրընկալող երկիր: «Ընտրությունը Հայաստանի և Ադրբեջանի միջև էր: 123 երկրից 65 ձայնով ընտրվեց Հայաստանը: Հայաստանը պատրաստ է հյուրընկալել COP17-ը»,- տեղեկացրեց Հակոբ Սիմիդյանը: Նախարարի խոսքով քանի որ բյուջետային հանձնաժողովների համատեղ նիստում ներկայացրել է 2025-ի բյուջեի նախագծով հատկացումների շրջանակը, անդրադարձ կկատարի բյուջետային հիմնական ծրագրերին, բարեփոխումներին և շրջակա միջավայրի ոլորտում իրականացվելիք նախաձեռնություններին:  Շրջակա միջավայրի նախարարության կողմից իրականացվող բյուջետային 6 ծրագրի ներքո ընդգրկված 23 միջոցառման համար ֆինանավորման ծավալը նախատեսվում է 13,5 միլիարդ դրամ, որը 2024-ի հաստատված բյուջեից ավելի է շուրջ 3,7 միլիարդ դրամով, ինչն էլ հիմնականում կապված է էկոպարեկային ծառայության կայացմանն ուղղված աշխատանքներով, ինչպես նաև ազդակիր համայնքներին տրամադրվող բնապահպանական սուբվենցիաների ավելացմամբ:  «Համակարգի կայացման նպատակով այս տարվա ճշտված բյուջեի համեմատ մոտ 3,6 միլիարդ դրամով ավելացել են ընդհանուր բյուջետային հատկացումները՝ կազմելով մոտ 6,4 միլիարդ դրամ, որից 5,7 միլիարդ դրամը կտրամադրվի պահպանման ընթացիկ ծախսերին, իսկ 699,4 միլիոն դրամը՝ կապիտալ բնույթի ծախսերին»,- հայտնեց Հակոբ Սիմիդյանը:  Սևանի իշխանի պաշարների վերականգնման և ձկնաբուծության զարգացման հիմնադրամին կտրամադրվի 495,7 միլիոն դրամ: Միջոցառման շրջանակում կապահովվի անհետացման եզրին գտնվող արժեքավոր ձկնատեսակների՝ Սևանի իշխանի երկու ենթատեսակների արհեստական վերարտադրությունը:  ՇՄ նախարարը տեղեկացրեց նաև՝ կարևորելով Սևանա լճի էկոհամակարգի վերականգնումը՝ նախարարությունն իրականացրել է նաև Սևանի կողակի պաշարների վերականգնման աշխատանքներ:  «Տեղեկացնեմ, որ կան ուշագրավ հաջողություններ, աճեցվել է մայրական կազմ, որի թիվը հասնում է 2000-ի»,- տեղեկացրեց Սիմիդյանը: Հիշեցնենք՝ Հայաստանը հյուրընկալելու է Կենսաբազմազանության կողմերի համաժողովը՝ COP-17-ը, 2026-ին։
11:52 - 14 նոյեմբերի, 2024
Նոյեմբերի 15-ից վերահսկողության ուժեղացված միջոցառումներ կիրականացվեն Սևանա լճում և Հայաստանի ողջ տարածքում

Նոյեմբերի 15-ից վերահսկողության ուժեղացված միջոցառումներ կիրականացվեն Սևանա լճում և Հայաստանի ողջ տարածքում

Սիգի ձվադրման ժամանակահատվածով պայմանավորված՝ նոյեմբերի 15-ից վերահսկողության ուժեղացված միջոցառումներ կիրականացվեն Սևանա լճում և Հայաստանի ողջ տարածքում: Այս մասին տեղեկացնում են շրջակա միջավայրի նախարարությունից:   Վերահսկողության միջոցառումների շրջանակում պատասխանատու գերատեսչությունների ներկայացուցիչները համատեղ իրականացնելու են հանդիպումներ Սևանա լճի հարակից բնակավայրերի ղեկավարների, ձկնորսների և քաղաքացիների հետ,   «Բացատրական աշխատանքներ են տարվելու միջոցառման նպատակի ու իրականացվելիք գործողությունների վերաբերյալ, որն է՝ արգելել Սևանա լճում սիգի որսը՝ ձկնատեսակի ձվադրման ժամանակահատվածով պայմանավորված:   Այս համատեքստում «Սևան» ազգային պարկի տարածքից դուրս են բերվելու լողամիջոցներ, որսագործիքներ և ձկնորսների ժամանակավոր կացարաններ.   արգելվելու է բոլոր տեսակի որսագործիքների և լողամիջոցների մուտքը Սևանա լիճ.   Սևանա լիճը գոտևորող բոլոր անտառային ճանապարհների վրա խիստ վերահսկողություն սահմանում, մարզից դուրս եկող հիմնական ճանապարհների ելքերի մոտ հսկիչ կետերի տեղակայում.   «Սևան» ազգային պարկի տարածքում շուրջօրյա հերթապահություն կսահմանվի.   Երևանի և ՀՀ մարզերի շուկաներում սիգի ձկնկիթի և ձկան վաճառքը բացառելու համար կկազմակերպվեն ստուգայցեր։   Քաղաքացիները, ձկնորսությամբ զբաղվող մեր հայրենակիցները պետք է հստակ գիտակցեն, որ նման միջոցառումներն ունեն մեկ նպատակ՝ ձկնապաշարների վերականգնման միջոցով վերականգնել Սևանա լճի էկոհամակարգը, որը բխում է ՀՀ յուրաքանչյուր քաղաքացու շահերից։   Հարգելի՛ քաղաքացիներ, հորդորում ենք արգելքի ժամանակահատվածում զերծ մնալ ձկան ապօրինի որսից և վաճառքից: Սիգ ձուկը Հայաստանի Հանրապետության պարենային անվտանգության կարևորագույն մասն է և պետք է խնդրին մոտենալ այդ գիտակցումով։ Բնապահպանության ոլորտում ակտիվ գործունեություն ծավալող կազմակերպություններին կոչ ենք անում աչալրջությամբ ու սրտացավությամբ մոտենալ համազգային կարևորության այս խնդրին և աջակցել որսի արգելքի միջոցառումների իրականացմանը»,- ասված է հաղորդագրության մեջ։   Սևանա լճում սիգի որսը կթույլատրվի միայն 2025 թվականի համար նախատեսված արդյունագործական որսի չափաքանակների որոշումից և նոր պայմանագրերի կնքումից հետո։
19:44 - 13 նոյեմբերի, 2024