ՀԱՄԱՍ

Իսրայելը տասնյակ հազարավոր պահեստազորայինների է զորակոչում «Համաս»-ի դեմ գործողություններն ընդլայնելու համար |azatutyun.am|

azatutyun.am: Իսրայելը հայտարարել է տասնյակ հազարավոր պահեստազորայինների զորակոչի մեկնարկի մասին՝ Գազայի հատվածում պաղեստինյան «Համաս» խմբավորման դեմ գործողությունները «ամրապնդելու և ընդլայնելու» համար: Իսրայելի Պաշտպանության բանակը շեշտել է, որ մտադիր է սաստկացնել ճնշումը Գազայի հատվածից պատանդներին վերադարձնելու համար և զինյալներին ոչնչացնելու գործողությունները։ Իսրայելցի զինվորականները նշել են, որ բանակը գործելու է նոր տարածքներում՝ ոչնչացնելու Արեւմուտքի կողմից ահաբեկչական կառույց ճանաչված «Համաս»-ի բոլոր ենթակառուցվածքները՝ թե՛ գետնի տակ, թե՛ գետնի վրա: Նոր հրադարար հաստատելու և 59 իսրայելցի պատանդներին ազատ արձակելու հարցով միջազգային միջնորդների մասնակցությամբ բանակցություններում Իսրայելն ու պաղեստինյան խմբավորումը համաձայնության չեն հասել։ Հրադադարի շուրջ նախորդ պայմանավորվածությունը խախտվել է շաբաթներ անց՝ մարտի 18-ին, երբ Իսրայելը վերսկսել է ռազմական գործողությունները նորանոր տարածքներ գրավելով Գազայի հատվածում:

09:24 - 06 մայիսի, 2025

«Համաս»-ը շարունակում է ազատ արձակել իսրայելցի պատանդներին |azatutyun.am|

azatutyun.am: Գազայի հատվածը վերահսկող պաղեստինայն «Համաս» շարժումն այսօր ևս երեք իսրայելցի պատանդ է ազատ արձակել՝ Նուսերյաթ բնակավայրում կայացած արարողության ժամանակ նրանց փոխանցելով Կարմիր խաչի միջազգային կոմիտեի ներկայացուցիչներին։ Ազատ արձակված Էլիա Քոենը, Օմեր ՇԵմ-Տովը և Օմեր Վենկերտը գերեվարվել էին 2023-ի հոկտեմբերի 7-ին՝ Իսրայելի դեմ «Համաս»-ի հարձակման ընթացքում։ Այսօր ավելի վաղ Ռաֆահում ազատ են արձակվել ևս երկու իսրայելցի պատանդներ՝ 2023-ին գերեվարված Թալ Շոխամը և 2014 թվականից Գազայում գտնվող Ավերա Մենգիստուն։Լուսանկարում՝ երեք նոր ազատ արձակված իսրայելցի պատանդներն են/AFP

16:48 - 22 փետրվարի, 2025

Իսլամական հեղափոխության առաջնորդը Թեհրանում հանդիպել է ՀԱՄԱՍ–ի ղեկավարների հետ |armenpress.am|

armenpress.am: Իրանի Իսլամական հեղափոխության առաջնորդ Այաթոլլահ Սեյյեդ Ալի Խամենեին Թեհրանում հանդիպել է ՀԱՄԱՍ-ի բարձրաստիճան ղեկավարների հետ: Այս մասին հայտնում է IRNA-ն: Հանդիպումը տեղի է ունեցել փետրվարի 8-ի առավոտյան: Այաթոլլահ Խամենեին բանակցություններ է վարել ՀԱՄԱՍ-ի Շուրայի խորհրդի նախագահի և անդամների հետ: Համասի Շուրայի խորհուրդն այժմ գլխավորում է Մուհամմադ Իսմայիլ Դարվիշտ, որը հայտնի է նաև որպես Աբու Օմար Հասան:

14:33 - 08 փետրվարի, 2025

Իսրայելն այսօր ազատ է արձակել 183 պաղեստինցի բանտարկյալի |1lurer.am|

1lurer.am: Իսրայելն այսօր ազատ է արձակել 183 պաղեստինցի բանտարկյալի՝ պաղեստինյան ՀԱՄԱՍ խմբավորման հետ պատանդների փոխանակման շրջանակում: Ազատ արձակված 18 պաղեստինցի դատապարտված է եղել ցմահ ազատազրկման։ Փետրվարի 1-ին ՀԱՄԱՍ-ն էլ Կարմիր խաչի միջոցով Իսրայելին է փոխանցել երեք գերու։ Իսրայելի և ՀԱՄԱՍ-ի միջև Գազայի հատվածում հրադադարի և գերիների վերադարձի մասին գործարքն ուժի մեջ է մտել հունվարի 19-ին: Այն ստորագրվել է ԱՄՆ-ի, Եգիպտոսի և Կատարի միջնորդությամբ: Իսրայելական ԶԼՄ-ների տվյալով՝ գործարքի առաջին փուլը կտևի 42 օր: Այդ ընթացքում խմբավորումը կազատի 33 իսրայելցի պատանդի՝ ավելի քան 1890 պաղեստինցի բանտարկյալի դիմաց:

19:57 - 01 փետրվարի, 2025

«Համաս»-ը ԿԽՄԿ-ին է փոխանցել չորս իսրայելցի պատանդի |tert.am|

tert.am: «Համաս»-ը Կարմիր խաչի միջազգային կոմիտեին ուղիղ եթերում փոխանցել է չորս իսրայելցի զինծառայող պատանդնի: Չորս կանանց դուրս են բերել Գազայի կենտրոնական հատված՝ շրջապատված պաղեստինցիների մեծ բազմությամբ և «Համաս»-ի տասնյակ զինյալներով։ Այնուհետև նրանց նստեցրել են ԿԽՄԿ-ի մեքենաները, որոնք պատանդներին արդեն իսկ հասցրել են իսրայելական ուժերի մոտ: Իսրայելը 4 պատանդի դիմաց կազատի 200 պաղեստինցիների։ Հիշեցնենք, որ Գազայում հրադադարի համաձայնություն էր ձեռք բերվել։

15:16 - 25 հունվարի, 2025

Գազայում հրադադարն ուժի մեջ է

Գազայի հատվածում հրադադարն այժմ ուժի մեջ է։ Այս մասին տեղեկանում ենք Իսրայելի վարչապետի գրասենյակի հաղորդագրության մեջ։ Զինադադարը սկսվել է ժամը 13:15-ին: Այն հետաձգվել էր գրեթե երեք ժամով այն բանից հետո, երբ ՀԱՄԱՍ-ը հայտարարեց, որ «տեխնիկական» ուշացում կա երեք պատանդների անունները հանձնելու հարցում, որոնք պետք է ազատ արձակվեն: Ավելի ուշ, «Համաս»-ը 3 իսրայելցի գերու անուն է հրապարակել, որոնք ազատ են արձակվելու այսօր. այն փոխանցվել է միջնորդներին։ Հիշեցնենք, որ սա հրադադարի մեկնարկի պայմանն էր Իսրայելի կողմից։Լուսանկարում՝ տեղահանված պաղեստինցիներն անցնում են փլատակների կողքով՝ փորձելով կիրակի օրը վերադառնալ Գազայի հյուսիսում գտնվող իրենց տները / Դաուդ Աբու Ալկաս / Reuters

13:57 - 19 հունվարի, 2025

Իսրայելի կառավարությունը կողմ է քվեարկել հրադադարին Գազայի հատվածում |news.am|

news.am: Իսրայելի կառավարությունը հավանություն է տվել պաղեստինյան ՀԱՄԱՍ խմբավորման հետ զինադադարի համաձայնագրին այն բանից հետո, երբ ուրբաթ օրը անվտանգության կաբինետն աջակցություն է հայտնել այդ գործարքին։ Այս մասին հայտնել է Times of Israel-ը։ Իսրայելի վարչապետի գրասենյակը հայտարարություն է տարածել՝ հաստատելով, որ կառավարությունը հավանություն է տվել համաձայնագրին։ Ըստ իսրայելական լրատվամիջոցների՝ կողմ է քվեարկել 24, դեմ՝ ութ նախարար։ Հայտարարությունում նշվել է նաև, որ գործարքն ուժի մեջ կմտնի կիրակի օրը, երբ ազատ արձակվեն իսրայելցի առաջին երեք պատանդները: Գործարքի առաջին՝ 42-օրյա փուլում պետք է ազատ արձակվի 33 պատանդ։ Այժմ, երբ Իսրայելի կառավարությունը հավանություն է տվել գործարքին, ընդդիմադիրները կարող են դիմել արդարադատության բարձր դատարան՝ ընդդեմ պաղեստինցի բանտարկյալների ազատ արձակման: Նշվում է, որ դատարանը դժվար թե միջամտի:

10:46 - 18 հունվարի, 2025

ՀԱՄԱՍ-ը համաձայնություն է տվել Գազայի հատվածում հրադադարի հաստատմանն ու գերիների փոխանակմանը |armenpress.am|

armenpress.am: Պաղեստինյան ՀԱՄԱՍ արմատական շարժման պատվիրակությունը միջնորդներին համաձայնություն է տվել համաձայնագիր կնքել Գազայի հատվածում հրադադարի և գերիների փոխանակման վերաբերյալ։ Այս մասին հայտնել է Al Jazeera հեռուստաալիքը՝ հղում կատարելով շարժման հայտարարությանը։ «Շարժման պատվիրակությունը միջնորդներին է փոխանցել շարժման համաձայնությունը՝ հրադադարի և գերիների փոխանակման մասին համաձայնագրի վերաբերյալ»,- նշված է ՀԱՄԱՍ-ի հայտարարության մեջ։ Ավելի վաղ հաղորդվել էր, որ պաղեստինյան ՀԱՄԱՍ արմատական շարժումը Գազայի հատվածում հրադադարի շուրջ համաձայնագրի առաջին փուլում ազատ կարձակի 33 պատանդի, եթե այդ համաձայնագիրը հաստատվի Իսրայելի և շարժման կողմից։ 2023 թ. հոկտեմբերի 7-ին ՀԱՄԱՍ-ի հարձակման հետևանքով Իսրայելում զոհվել է 1200 մարդ, գերեվարվել՝ 251 մարդ, որոնց մի մասը վերադարձվել է 2023 թ. նոյեմբերին հաստատված մեկշաբաթյա հրադադարի ընթացքում։ Դրա դիմաց Իսրայելը ՀԱՄԱՍ-ին է վերադարձրել 240 պաղեստինցի բանտարկյալի։ Իսրայելի պատասխան ռազմական գործողությունների հետևանքով Գազայի հատվածում զոհերի թիվը հասել է 46 600-ի։

22:46 - 15 հունվարի, 2025

Իսրայելը հարվածներ է հասցրել Գազայի կենտրոնում գտնվող մարդասիրական ավտոշարասյանը |shantnews.am|

shantnews.am: Գազայի հատվածում իսրայելական զինվորականները ռմբակոծել են հումանիտար ավտոշարասյունը, ինչի հետևանքով զոհվել է առնվազն չորս մարդ։ Այս մասին հայտնում է քաթարական Al Jazeera հեռուստաալիքը։ Դեյր էլ-Բալահում սովահար պաղեստինցիների համար օգնություն տեղափոխող ավտոշարասյանը իսրայելական անօդաչու թռչող սարքի հարվածի հետևանքով սպանվել է անվտանգության չորս աշխատակից՝ վերջին 24 ժամվա ընթացքում իսրայելական հարձակումների հետևանքով զոհվածների ընդհանուր թիվը հասցնելով 26-ի, նշում է հեռուստաալիքը։ Առնվազն երեք մարդ վիրավորվել է։

10:03 - 24 դեկտեմբերի, 2024

Թուրքիայի ԱԳ նախարարը հանդիպել է ՀԱՄԱՍ-ի քաղբյուրոյի անդամների հետ |armenpress.am|

armenpress.am: Թուրքիայի արտաքին գործերի նախարար Հաքան Ֆիդանը Ստամբուլում հանդիպել է պաղեստինյան ՀԱՄԱՍ շարժման քաղբյուրոյի անդամների հետ և քննարկել Գազայում հրադադարի վերաբերյալ բանակցությունների շուրջ վերջին իրավիճակը։ Այս մասին հայտնում է թուրքական արտաքին քաղաքական գերատեսչությունը: Նշվում է, որ հանդիպման ընթացքում քննարկվել է հրադադարի շուրջ համաձայնության հասնելու բանակցությունների վերջին արդյունքները որոնք թույլ կտան փոխանակել պատանդներին և բանտարկյալներին:

12:39 - 19 հոկտեմբերի, 2024

Հանիեն սպանվել է մոտ 7 կգ կշռող մարտագլխիկով կարճ հեռահարության արկից․ Իսլամական հեղափոխության պահապանների կորպուս |shantnews.am|

shantnews.am: Իրանի Իսլամական հեղափոխության պահապանների կորպուսը հայտնել է, որ Իսմայիլ Հանիեն սպանվել է «մոտ 7 կգ կշռող մարտագլխիկով կարճ հեռահարության արկից»։ Նշվել է, որ սպանությունը կազմակերպել է Իսրայելը՝ ԱՄՆ-ի աջակցությամբ։ Իրանը նաև խոստացել է վրեժխնդիր լինել Հանիեի մահվան համար «պատշաճ ժամանակին, համապատասխան տեղում և պատշաճ ձևով»: Իսլամական հեղափոխության պահապանների կորպուսը նշել է, որ սպանությունը կազմակերպվել է Իսրայելի կողմից՝ ԱՄՆ-ի աջակցությամբ։

16:15 - 03 օգոստոսի, 2024

Թուրքիայի ԱԳ նախարարը հանդիպել է «Համաս»-ի առաջնորդ Իսմայիլ Հանիյայի հետ |azatutyun.am|

azatutyun.am: Թուրքիայի ԱԳ նախարար Հաքան Ֆիդանը հանդիպել է «Համաս»-ի առաջնորդ Իսմայիլ Հանիյայի հետ։ «Համաս»-ն ԱՄՆ-ի և ԵՄ-ի կողմից ճանաչվել է ահաբեկչական կազմակերպություն։ «Անադոլու» գործակալությունը, վկայակոչելով դիվանագիտական աղբյուրները, հաղորդում է, որ նրանք մտքեր են փոխանակել Գազայի հատվածում կրակի դադարեցման ռեժիմ հաստատելու հնարավորության շուրջ։ Քննարկվել են հումանիտար օգնության ծավալները մեծացնելու և պատանդներին ազատ արձակելու հարցերը։ Շոշափվել է երկու պետություն ստեղծելու հիման վրա հակամարտությունը կարգավորելու թեման՝ տարածաշրջանում կայուն խաղաղություն հաստատելու համար։

18:35 - 21 հունվարի, 2024

Իսրայելի ԱԳ նախարարը Էրդողանին Հայոց ցեղասպանության մասին է հիշեցրել

Իսրայելի ԱԳ նախարար Իսրայել Կացը Թուրքիայի նախագահ Ռեջեփ Թայիփ Էրդողանին հիշեցրել է Հայոց ցեղասպանության մասին՝ ի պատասխան վերջինիս հայտարարության։ Հիշեցնենք, որ Թուրքիայի նախագահը հայտարարել էր, որ Հաագայի դատարան է փոխանցել Իսրայելին ցեղասպանության մեջ մեղադրող նյութեր։ Իսրայել Կացը նշում է, որ Թուրքիայի նախագահն այժմ պարծենում է նրանով, որ անհիմն պնդումներով թիրախավորում է Իսրայելը՝ իր անցյալում ունենալով Հայոց ցեղասպանությունը։ «Մենք հիշում ենք հայերին ու քրդերին։ Ձեր պատմությունը ինքնին խոսում է։ Ձեր բարբարոս դաշնակիցների դեմ Իսրայելը կանգնած է պաշտպանվելու, ոչ թե կործանելու»,- X-ի իր էջում գրել է Կացը։ Էրդողանն ավելի վաղ ասել էր, թե իրենց ներկայացրած փաստաթղթերը (ցեղասպանության ապացույցները) օգտակար են Հաագայի համար․ «Իսրայելի վարչապետ Բենիամին Նեթանյահուն թաքնվելու տեղ չունի, և պաշտպանություն չկա Գազայի հատվածում ՀԱՄԱՍ-ի դեմ սկսված գործողության համար»։

11:53 - 13 հունվարի, 2024

Պատերազմի սկզբից ի վեր Գազայում զոհվել է 15 500-ից ավելի մարդ

Գազայում «ՀԱՄԱՍ»-ի ղեկավարած առողջապահության նախարարությունը հայտնում է, որ պատերազմի սկզբից ի վեր Գազայում սպանվել է 15523 մարդ: Ըստ Գազայի առողջապահության նախարարության, հոկտեմբերի 7-ին սկսված հակամարտության ընթացքում զոհվել է 291 բուժաշխատող, ոչնչացվել է շտապօգնության 56 մեքենա և նույնքան բուժհաստատություն: Ըստ իսրայելական կողմի՝ զոհված իսրայելցիների թիվը մոտ 1200 է: Գլխավոր լուսանկարում՝ Գազայի հյուսիսը/Al Jazeera

21:51 - 03 դեկտեմբերի, 2023

Լավրովն ու Աբդոլլահիանը քննարկել են Գազայում տիրող իրավիճակը

Հեռախոսազրույց են ունեցել Ռուսաստանի և Իրանի ԱԳ նախարարներ Սերգեյ Լավրովն ու Հոսեյն Ամիր Աբդոլլահիանը։ Այս մասին հայտնում են ՌԴ ԱԳՆ-ից։ «Զրույցի ընթացքում հիմնական ուշադրությունը դարձվել է պաղեստինա-իսրայելական հակամարտության գոտում տիրող իրավիճակին, ընդհանուր մտահոգություն է արտահայտվել Գազայի հատվածում շարունակվող զինված դիմակայության առնչությամբ։ Շեշտվել է շուտափույթ հրադադարի և տուժած խաղաղ բնակչությանը հրատապ օգնություն տրամադրելու անհրաժեշտությունը », - ասվում է գերատեսչության հաղորդագրության մեջ: Նշվում է, որ նախարարներն անդրադարձել են նաև երկկողմ և միջազգային օրակարգի մի շարք այլ հրատապ հարցերի։

20:40 - 19 նոյեմբերի, 2023

ՌԴ ԱԻՆ-ը Եգիպտոս է տեղափոխել Գազայի բնակչության համար նախատեսված մարդասիրական օգնության 6-րդ խմբաքանակը |armenpress.am|

armenpress.am: Ռուսաստանի արտակարգ իրավիճակների նախարարության հատուկ ինքնաթիռը Եգիպտոս է տեղափոխել Գազայի հատվածի բնակչության համար նախատեսված մարդասիրական օգնության հերթական բեռը: Այս մասին հայտնում է «Ինտերֆաքս»-ը՝ վկայակոչելով նախարարության մամուլի ծառայությունը: Հաղորդագրության մեջ նշվում է, որ ընդհանուր առմամբ ռուսական կողմից փոխանցվել է ավելի քան 190 տոննա մարդասիրական օգնություն: Բեռները ներառում են ներքնակներ, բարձեր, անձնական խնամքի միջոցներ, սնունդ՝ ներառյալ մանկական: Գերատեսչությունում հավելել են, որ բեռը կփոխանցվի Կարմիր մահիկի եգիպտական ընկերության ներկայացուցիչներին: Նրանք Ռուսական օգնություն կհասցնեն Գազայի խաղաղ բնակչությանը: Սա Գազայի հատվածի բնակչության համար մարդասիրական օգնության արդեն վեցերորդ խմբաքանակն է:

14:58 - 18 նոյեմբերի, 2023