«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

Ավարտվեց Գյումրիի փրայմըրիզին հայտ ներկայացնելու վերջնաժամկետը. առայժմ հայտնի է 5 մասնակցի անուն |azatutyun.am|

azatutyun.am: Գյումրվա փրայմըրիզին հայտ ներկայացնելու վերջնաժամկետը լրացավ այսօր կեսօրին։ Այս պահին հայտնի է 5 մասնակցի անուն՝ վարչապետի տիկնոջ ազգական, Գյումրի նախկին փոխքաղաքապետ Վահագն Մկրտչյանը, ՔՊ-ական 2 պատգամավորներ՝ Դավիթ Առուշանյանն ու Կարեն Սարուխանյանը, Գյումրիի ավագանու ՔՊ-ական անդամ Շավարշ Արամյանն ու ՔՊ համակիր Արտյոմ Թումանյանը։ «Քաղաքացիական պայմանագիրը» մասնակիցների վերջնական ցանկը վաղը կհրապարակի։ Քանի որ հայտերն էլեկտրոնային տարբերակով էին ընդունվելու, չի բացառվում, որ շրջանառվող անուններից բացի այլ մասնակիցներ էլ լինեն։ Իշխող ուժը դեռ հրապարակային չի բացատրել, թե ինչ մեխանիզմով է ընդամենը մի քանի օրից՝ դեկտեմբերի 8-10-ն անցկացնելու փրայմըրիզը, որի հաղթողը կդառնա Գյումրիի ժամանակավոր քաղաքապետը։ Մինչ այդ, մեկ այլ զուգահեռ գործընթաց է սկսվել, որ վարչապետը օրենքով իրավունք ստանա փրայմըրիզի հաղթողին նշանակել ժամանակավոր կառավարիչ։ Հիմա օրենքն արգելում է։ Իշխող ուժը պատրաստվում է փոփոխել ՏԻՄ օրենքն ու Վանաձորի օրինակով վարչապետին տալ այդ լիազորությունը։

Այսօր 17:21

Խոր ափսոսանքով եմ նշում, որ ստիպված եմ մերժել մանդատը վայր դնելու վերաբերյալ ՀՀ վարչապետի խնդրանքը․ Հովիկ Աղազարյան

Խոր ափսոսանքով եմ նշում, որ ստիպված եմ մերժել մանդատը վայր դնելու վերաբերյալ ՀՀ վարչապետի խնդրանքը։ Այս մասին 24news.am-ի հետ զրույցում ասել է ՔՊ պատգամավոր Հովիկ Աղազարյանը։ Աղազարյանի խոսքով՝ իր կյանքի ծանրագույն որոշման համար՝ ի թիվս այլ հիմնավորումների, որոնք կարող են սուբյեկտիվ լինել, հիմք են հանդիսացել երկու հանգամանք։ «ԱԺ լսումների ժամանակ Արգիշտի Քյարամյանը հրապարակավ հայտարարեց, որ իրեն միջնորդել եմ որդուս որդուս մասնակցությամբ քրեական գործով, այդ միջադեպի առիթով նախաձեռնված է քրեական վարույթ, Քրեական վարույթ է նախաձեռնվախ նաև մանր եղջերավոր անասունների արտահանման հետ կապված ինչ-որ գործով, որտեղ ես ներգրավված եմ որպես վկա։ Հետևաբար, եթե ես ընդունեի վարչապետի առաջարկը, և հետագայում պարզվի, որ ես մեղավորություն չունեմ, ապա հասարակության մեջ կարող է տպավորություն ստեղծվել, որ ինձ ինչ-որ գործարք է առաջարկվել, և ես գնացել եմ այդ գործարքին։ Իսկ եթե վարույթներից գոնե մեկի ավարտի արդյունքում պարզվի, որ ես մեղավոր եմ, բնականաբար կզրկվեմ պատգամավորական մանդատից»,- նշել է պատգամավորը։

Այսօր 16:30

Կարեն Սարուխանյանը ինքնառաջադրվել է որպես Գյումրիի համայնքապետի ժամանակավոր պաշտոնակատարի թեկնածու

Կարեն Սարուխանյանը ինքնառաջադրվել է որպես Գյումրիի համայնքապետի ժամանակավոր պաշտոնակատարի թեկնածու: «Հաշվի առնելով ձեզանից շատերի հորդորը և պահանջը, ինչպես նաև ՔՊ կուսակցության Գյումրու տարածքային կազմակերպության անդամների մեծամասնության աջակցությունը, այսօր որոշել և ինքնաառաջադրվել եմ ՀՀ վարչապետ Նիկոլ Փաշինյանի առաջարկած փրայմերիզին որպես Գյումրի համայնքի ղեկավարի ժամանակավոր պաշտոնակատարի թեկնածու»,- գրել է Սարուխանյանը իր ֆեյսբուքյան էջում: Նշենք, որ որպես քաղաքապետի թեկնածու ՔՊ-ն ի սկզբանե հայտարարել էր հենց Սարուխանյանի թեկնածության մասին։ Հետո, սակայն, մամուլում շրջանառվել են տեղեկություններ, թե Սարուխանյանի արյան մեջ թմրանյութի առկայության թեստը դրական է եղել, ինչը վերջինս հերքել է՝ նշելով. «Ես թմրանյութի հետ բացարձակ կապ չեմ ունեցել և չունեմ»: Փրայմերիզին մասնակցելու մասին հայտարարել են նաև Գյումրու նախկին փոխքաղաքապետ Վահագն Մկրտչյանը, պատգամավոր Դավիթ Առուշանյանը, գործող ավագանու անդամ Շավարշ Արամյանը, երգիչ Արտյոմ Թումանյանը։

Այսօր 09:36

Վարչապետը ՔՊ խմբակցության հետ քննարկել է պատգամավոր Հովիկ Աղազարյանի հարցը |armenpress.am|

armenpress.am: ՀՀ վարչապետ Նիկոլ Փաշինյանը «Քաղաքացիական պայմանագիր» խմբակցության հետ հանդիպման ընթացքում, ի թիվս այլ հարցերի, քննարկել է նաև խմբակցության պատգամավոր Հովիկ Աղազարյանի հարցը։ «Արմենպրես»-ի հաղորդմամբ՝ հանդիպումից հետո լրագրողների հետ ճեպազրույցում Աղազարյանը նշել է, որ իր անձին անդրադարձ եղել է, սակայն հրաժարվել է մանրամասնել քննարկման բովանդակությունը։ «Չեմ կարող ասել, թե ինչ անդրադարձ է եղել։ Ինձ հարցեր չեն տվել, ես հարցերին չեմ պատասխանել»,- ասել է նա։ Լրագրողների հարցին, թե արդյոք ճնշումներ կան, որ նա վայր դնի մանդատը, Աղազարյանը կտրուկ արձագանքել է․ «Ոչ»։ Այնուամենայնիվ, պատգամավորը պարզաբանել է, որ վարչապետ Նիկոլ Փաշինյանը հրապարակավ խնդրել է իրեն հրաժարվել մանդատից։ «Դուք չգիտեք ի՞նչ է տեղի ունենում, տեղյակ չե՞ք, որ վարչապետը հրապարակավ խնդրել է, որ մանդատս վայր դնեմ։ Դուք համարում եք սա սովորական հա՞րց, մտահոգ էլ չլինե՞մ»,- ասել է նա։ Հանդիպման այլ մանրամասներ ու Աղազարյանի հետագա քայլերը դեռևս անհայտ են։

20:55 - 29 նոյեմբերի, 2024

ԱԺ-ում առաջարկում են արգելել էներգետիկ ըմպելիքների վաճառքը 18 տարին չլրացած անձանց |armenpress.am|

armenpress.am: Ազգային ժողովի «Քաղաքացիական պայմանագիր» խմբակցության մի խումբ պատգամավորներ առաջարկում են Հայաստանում արգելել էներգետիկ ըմպելիքների վաճառքը 18 տարին չլրացած անձանց։ Ազգային ժողովի տնտեսական հարցերի մշտական հանձնաժողովի նոյեմբերի 27-ի նիստում «Առևտրի և ծառայությունների մասին» ՀՀ օրենքում լրացումներ կատարելու մասին նախագծերի փաթեթը ներկայացրեց «Քաղաքացիական պայմանագիր» խմբակցության պատգամավոր Ալխաս Ղազարյանը։ Ինչպես նշեց նախագծի հիմնական զեկուցողը, առաջարկվող փոփոխությունները նպատակ ունեն պաշտպանել մինչև 18 տարեկան անձանց առողջությունը և նվազեցնել էներգետիկ ըմպելիքների բացասական ազդեցության ռիսկերը։ «Առողջապահության նախարարության տվյալներով՝ դեռահասների մոտ 40 տոկոսն օգտագործում է էներգետիկ ըմպելիքներ։ Չնայած այս ըմպելիքների՝ առողջության վրա ունեցած ազդեցությունը լիովին ուսումնասիրված չէ՝ դրանց պարբերաբար օգտագործումն ունի բացասական հետևանքներ։ Առողջության համաշխարհային կազմակերպության ուղեցույցներով նման ըմպելիքները չպետք է գովազդվեն երեխաների համար։ Որոշ երկրներ արդեն սահմանափակել են էներգետիկ ըմպելիքների վաճառքն ու գովազդը, և մենք նույնպես պետք է քայլեր ձեռնարկենք»,- ասաց Ղազարյանը։ Նախագծով առաջարկվում է արգելել 18 տարին չլրացած անձանց էներգետիկ ըմպելիքների վաճառքը, արգելել նման ըմպելիքների վաճառքն ավտոմատ սարքավորումներով, սահմանափակել էներգետիկ ըմպելիքների գովազդի հնարավորությունը, սահմանել վարչական պատասխանատվություն՝ օրենքի պահանջները խախտելու համար։ Պատգամավորի խոսքով՝ նախագիծը ոչ միայն անդրադառնում է էներգետիկ ըմպելիքներին, այլև լրացնում է ալկոհոլային խմիչքների վաճառքի առնչությամբ առկա օրենսդրական բացերը։ Պատգամավորը պարզաբանեց, որ գործող օրենսդրությամբ մինչև 18 տարեկան անձանց ալկոհոլային խմիչքների վաճառքի համար սահմանված է վարչական պատասխանատվություն, սակայն «Առևտրի և ծառայությունների մասին» օրենքում անչափահասներին ալկոհոլային խմիչք վաճառելու արգելք սահմանված չէ։ «Մենք լրացնում ենք նաև այս բացը»,- հավելեց Ղազարյանը։ Նախագիծը քննարկվել է շահագրգիռ կողմերի հետ և կառավարությունում, դրա ընդունումը կնպաստի դեռահասների առողջության պահպանմանը, ինչպես նաև համահունչ կլինի միջազգային փորձին։ Հանձնաժողովը հավանություն տվեց «Առևտրի և ծառայությունների մասին» ՀՀ օրենքում լրացումներ կատարելու մասին նախագծերի փաթեթին։

12:14 - 27 նոյեմբերի, 2024

ՔՊ վարչության նիստում Արգիշտի Մեխակյանն առաջադրվել է Արմավիրի մարզպետի թեկնածու

ՔՊ վարչության հերթական նիստում հաստատեցինք Վայքի, Իջևանի, Վեդիի տ/կ խորհուրդների նախագահներին, ֆեյսբուքյան էջում գրել է ՀՀ վարչապետ Նիկոլ Փաշինյանը՝ կից տեսանյութ հրապարակելով։ «Վարչությունը նաև որոշեց Խոյ խոշորացված համայնքի ղեկավար Արգիշտի Մեխակյանին առաջադրել Արմավիրի մարզպետի թեկնածու»,- գրել է նա։

21:03 - 26 նոյեմբերի, 2024

«Ավելի լավ էր՝ սպառնար, քան էն, որ ինքը իմ հետ խոսեց». Աղազարյանը՝ Ալեն Սիմոնյանի հետ հանդիպման մասին

ԱԺ «Քաղաքացիական պայմանագիր խմբակցության» պատգամավոր Հովիկ Աղազարյանը պատգամավորական մանդատը դեռևս վայր չի դնում, քանի որ ընկերն է խնդրել. «Երեկ Մոսկվայից հեռախոսազանգ եմ ստացել իմ մանկական, դպրոցական ու ուսանողական ընկերոջից, ասել է՝ շատ կնեղանա ինձանից, եթե արձագանքեմ վարչապետի խնդրանքին առանց իրեն տեսնելու, հիմա սպասում եմ իր գալուն: Պատգամավորը պատասխանեց նաև այն հարցին, թե թիմից ճնշումներ կա՞ն իր վրա. «Իմ ընկներները ճնշում են, մեկն ասում է՝ դիր, մյուսն ասում է՝ մի դիր»: Նա նաև հաստատեց, որ երեկ հանդիպել է ԱԺ նախագահ Ալեն Սիմոնյանին, բայց հանդիպումից մանրամասներ չհայտնեց։ Անդրադառնալով դիտարկմանը, որ մամուլը գրել է՝ Սիմոնյանը սպառնալիքներ է հնչեցրել՝ ուղղված Աղազարյանին, վերջինս ասաց. «Ես կուզեի՝ Ալեն Սիմոնյանը ինձ սպառնար, քան էն որ ինքը արեց իմ գլխին: Ավելի լավ էր՝ սպառնար, քան էն, որ ինքը իմ հետ խոսեց: Վատ բան չի ասել, ուղղակի ճնշել ա ինձ ուրիշ իմաստով»: Հարցին՝ ինչ-որ կոմպրոմատնե՞ր ունեն իր դեմ, որով ճնշում են, Աղազարյանը պատասխանեց. «Հեռախոսս առգրավված ա: Ինչքան կոմպրոմատ ասես էնտեղ կա»: Ապա նա բացատրեց, որ հեռախոսը ոչ թե առգրավել են, այլ ինքն է տվել քննիչին: Աղազարյանը կարծիք հայտնեց, որ այն, ինչ կատարվում է իր հետ, տեղավորվում է ժողովրդավարական արժեքների մեջ, նա բացատրեց, որ լրագրողները վարչապետի ինստիտուտը խառնում են կուսակցության ղեկավարի ինստիտուտի հետ՝ նշելով, որ Նիկոլ Փաշինյանը՝ որպես կուսակցության ղեկավար, իրավունք ունի իրեն մանդատը վայր դնելու խնդրանքով դիմել: Հիշեցնենք, որ Հանրային հեռուստաընկերությանը տված հարցազրույցում Նիկոլ Փաշինյանը հայտնել էր, որ մանդատը վայր դնելու խնդրանքով դիմել է Նարեկ Զեյնալյանին եւ Հովիկ Աղազարյանին։ Հովիկ Աղազարյանը արձագանքել էր, որ մանդատը վայր դնել-չդնելու հետ կապված արդեն որոշում է կայացրել՝ ասելով, որ որոշումը կհայտնի նոյեմբերի 25-ին։ Ավելի ուշ Աղազարյանը հայտարարեց, որ որոշման հրապարակումը մեկ-երկու օր հետաձգում է։

13:57 - 26 նոյեմբերի, 2024

«Հորդոր չի եղել, խնդրանք է եղել, իսկ խնդրանքը սահմանադրական կատեգորիա չի». Զեյնալյանը՝ մանդատը վայր դնելու մասին |news.am|

news.am: Իմ որոշմամբ ես դիմում եմ ներկայացրել Ազգային ժողովի նախագահին պատգամավորական գործառույթներս դատարեցնելու մասին. դիմումը գրվել է: Այս մասին, այսօր՝ նոյեմբերի 26-ին, ԱԺ-ում լրագրողների հետ զրույցում նշեց ՔՊ խմբակցության պատգամավոր Նարեկ Զեյնալյանը՝ անդրադառնալով մանդատը վայր դնելու որոշմանը: Անդրադառնալով նրան, որ մանդատից հրաժարվել է վարչապետ Նիկոլ Փաշինյանի հորդորով, նա ասաց. «Հորդոր չի եղել, եղել է խնդրանք, և ես կայացրել եմ որոշում»: Դիտարկմանը, որ վարչապետը դրանով միջամտել է օրենսդիր իշխանության գործերին, ինչը հակասահմանադրական է, Զեյնալյանն ասաց. «Խնդրանքը սահմանադրական կատեգորիա չի և խնդրանքի արդյունքում ես կայացրել եմ որոշում: Սահմանադրության ոտնահարում չի եղել»: Հիշեցնենք, որ նման «խնդրանքով» Փաշինյանը դիմել էր նաեւ Հովիկ Աղազարյանին, սակայն վերջինս դեռեւս մանդատը վայր դնելու որոշում չի կայացրել:

13:00 - 26 նոյեմբերի, 2024

«Պարտադրանք չի եղել, իմ որոշումն է». Նարեկ Զեյնալյանը՝ մանդատից հրաժարվելու մասին |azatutyun.am|

azatutyun.am: Ազգային ժողովի իշխող «Քաղաքացիական պայմանագիր» խմբակցության պատգամավոր Նարեկ Զեյնալյանը պնդում է՝ որևէ մեկի պարտադրանքով չի հրաժարվել պատգամավորի մանդատից։ Նա նաև հերքեց տեղեկություններն այն մասին, թե կարող է նշանակվել Առողջապահության նախարարի պաշտոնում՝ նշելով, թե «դա իրականության հետ կապ չունի»։ Նարեկ Զեյնալյանը մանդատից հրաժարվելու դիմում է այսօր ներկայացրել Ազգային ժողովի նախագահ Ալեն Սիմոնյանին։ Օրենքի համաձայն` եթե հրաժարականի հրապարակումից հետո՝ մեկ շաբաթվա ընթացքում, Զեյնալյանը գրավոր դիմումով հետ վերցնի հրաժարականի մասին իր դիմումը, ապա Ազգային ժողովի նախագահն այդ մասին հանդես կգա հայտարարությամբ, եթե այն հետ չվերցնի, ապա նրա լիազորությունների դադարեցման մասին արձանագրություն կկազմվի, որը կստորագրի և կհրապարակի Ազգային ժողովի նախագահը: Արձանագրության հրապարակման պահից հրաժարականը կհամարվի ընդունված։ Մանդատը վայր դնելու մասին Զեյնալյանը հայտարարեց նոյեմբերի 19-ին։

17:08 - 22 նոյեմբերի, 2024

Ի՞նչ են փորձել պարզել իրավապահները. Աղազարյանին հինգ ժամ քննել են ու հեռախոսը վերցրել |azatutyun.am|

azatutyun.am: Իշխող խմբակցության պատգամավոր Հովիկ Աղազարյանին երեկ Հակակոռուպցիոն կոմիտեում հարցաքննել են Քննչական կոմիտեի նախկին ղեկավարի հետ միջադեպի գործով։ Նրան գրեթե հինգ ժամ հարցաքննել են, ապա հեռախոսը առգրավել։ «Մի ժամից մի քիչ ավելի տևեց հեռախոսի առգրավման պրոցեսը», - «Ազատության» հետ զրույցում ասաց նա։ Շաբաթներ առաջ Արգիշտի Քյարամյանն Աղազարյանի հետ վիճաբանության ժամանակ Ազգային ժողովում հայտարարել էր, թե նա միջամտել է որդու առնչությամբ հարուցված քրեական գործին։ Այս հայտարարությունից հետո վարույթ հարուցվեց։ Հակակոռուպցիոն կոմիտեն փորձում է պարզել՝ պատգամավորը չարաշահե՞լ է պաշտոնեական դիրքը, թե՞ ՔԿ արդեն նախկին ղեկավարը ստում էր։ «Ես պնդում եմ, որ իմ որդու հարցով չեմ դիմել Քյարամյանին», - հայտարարեց իշխանական պատգամավորը։ Այդ դեպքում ինչի հիման վրա էր Քննչականի ղեկավարը խորհրդարանում հրապարակային այդպիսի մեղադրանք հնչեցնում, և ի՞նչ պարզվեց երեկ. Հովիկ Ազարյանը միայն նշեց՝ հարցաքննության մանրամասները ներկայացնելն անթույլատրելի է։ Նա շարունակում է պնդել, թե իր որդուն առնչվող գործի հարուցումից հետո ոչ մեկին չի դիմել։ Իսկ մամուլում լուրեր կան, որ նա Քյարամյանի տեղակալ Արսեն Այվազյանին է դիմել։ Իշխանական պատգամավորը Այվազյանի հետ զրուցելու փաստը չհերքեց, բայց չցանկացավ նախաքննության փուլում բովանդակությունը գաղտնազերծել։ Մինչև նախաքննության ավարտն արդեն լուրեր կան, որ վարչապետ Փաշինյանը հորդորել է Աղազարյանին վայր դնել մանդատը։ Նա հերքում է, որ վերևից նման հորդոր է իջել։ Վստահեցրեց՝ թիմակիցներն էլ նման պահանջ չեն դրել։ Հովիկ Աղազարյանը հավելեց՝ մանդատից հրաժարվելու մտադրություն չունի, ասաց՝ պայքարելու է մինչև վերջ, որ ապացուցի իր անմեղությունը, իսկ դիմումն ինքնակամ կգրի, եթե ապացուցեն, որ չարաշահել է պաշտոնական դիրքը։ Հարցին՝ հնարավո՞ր է դատախազը գա իր հետևից, զրկեն պատգամավորական անձեռնմխելիությունից, Աղազարյանը պատասխանեց. - «Ես դա ո՞նց կարող եմ բացառել, երբ դա նույնպես իրավական գործընթաց է»։ Պատգամավորի շաբաթը սկսվել ու ավարտվում է հարցաքննությամբ։ Շաբաթվա սկզբին էլ հարազատ կուսակցությունում էին կանչել հարցաքննության, Քյարամյանի հետ միջադեպով մի վարույթ էլ այստեղ կա։ Վաղն էլ մանր եղջերավորների գործով է դարձյալ Հակակոռուպցիոն կոմիտե գնալու։ Այստեղ հարուցված գործով էլ կասկած կա, թե ոչխարների բիզնես է հովանավորել։ Այս գործն էլ, ըստ նրա, ավարտական փուլում է, ինքը վկայի կարգավիճակում է։

16:07 - 22 նոյեմբերի, 2024

ՀՀ ԱԺ նախագահի հայտարարությունն ԱԺ պատգամավոր Նարեկ Զեյնալյանի հրաժարականի դիմումի մասին

««Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Նարեկ Զեյնալյանը 2024 թվականի նոյեմբերի 22-ին հրաժարականի դիմում է ներկայացրել: «Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»,- նշված է ՀՀ ԱԺ նախագահի տեղակալ, ԱԺ նախագահի պարտականությունները ժամանակավոր կատարող Հակոբ Արշակյանի ստորագրած հայտարարության մեջ:

13:24 - 22 նոյեմբերի, 2024

Իմ օրակարգում մանդատը դնելու հարց չկա. Աղազարյան |armtimes.com|

armtimes.com: ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը ԱԺ-ում լրագրողների հետ զրույցում հայտարարել է, որ իր օրակարգում մանդատը դնելու հարց չկա: Երեկ ՔՊ վարչությունը քննարկել է իր հարցը, հետաքրքրվել, թե ինչո՞ւ է Արգիշտի Քյարամյանին «արա»-ով դիմել: Աղազարյանի խոսքով՝ ինքը պատասխանել է բոլոր հարցերին ու դուրս եկել, և թե վարչությունը ի՞նչ որոշում կկայացնի, տեղյակ չէ։ «ՔՊ վարչության նիստին պարզաբանում եմ տվել ԱԺ միջադեպի մասով, Քյարամյանը երբ հիմնավորի, մանդատս կդնեմ»,- եզրափակել է պատգամավորը։ «Քաղաքացիական պայմանագիր» կուսակցության վարչությունում հարուցված կարգապահական վարույթ կա, որը դեռ ծագել էր խորհրդարանական լսումներից հետո: Այս մասին խորհրդարանական ճեպազրույցների ժամանակ ասել էր «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով խմբակցության պատգամավորներ Հովիկ Աղազարյանի և Նարեկ Զեյնալյանի՝ պատգամավորական մանդատները վայր դնելու մասին լուրերին: Զեյնալյանը հայտարարել է, որ վայր է դնում մանդատը:

13:40 - 20 նոյեմբերի, 2024

Իմ նախաձեռնությամբ դադարեցնում եմ պատգամավորական լիազորություններս․ Նարեկ Զեյնալյան

Նարեկ Զեյնալյանը ֆեյսբուքյան իր էջում գրել է, որ վայր է դնում պատգամավորական մանդատը: «Սիրելի հայրենակիցներ, իմ նախաձեռնությամբ դադարեցնում եմ պատգամավորական լիազորություններս։ Ինչպես մինչ այսօր, այսուհետև ևս, գիտելիքներս և փորձս շարունակելու եմ ծառայեցնել Հայաստանի Հանրապետությանը։ Հակիրճ ներկայացնեմ իմ կատարած աշխատանքը այս տարիների ընթացքում. 2019-ից մինչ օրս, հանդիսանալով ԱԺ մշտական հանձնաժողովի նախագահ, իմ կողմից մշակվել և ամբողջությամբ ընդունվել է թվով 49 օրենսդրական նախաձեռնություն, ունեցել եմ ավելի քան 50 ելույթ, կազմակերպել եմ բազմաթիվ քննարկումներ տարբեր թեմաներով, ընտրվել եմ Global TB Caucus-ի Արևելյան Եվրոպայի և Կենտրոնական Ասիայի տարածաշրջանի համանախագահ, Եվրոպական Պառլամենտական ֆորումի վերականգնողական իրավունքի հայաստանյան պատվիրակության ղեկավար, ԱՊՀ միջխորհրդարանական վեհաժողովի սոցիալական քաղաքականության և մարդու իրավունքների մշտական հանձնաժողովի նախագահի տեղակալ։ Միջազգային տարբեր հարթակներում մասնակցել եմ առողջապահական համակարգի հետ կապված բազմաթիվ քննարկումների։ Իմ քաղաքական թիմի հետ հաղթահարել ենք բավականին ծանր փորձություններ, և վստահ եմ, որ իմ գործընկերները կշարունակեն պահպանել մեր հռչակած արժեքները, կշարունակեն պատվով հաղթահարել Հայաստանի Հանրապետության առջև ծառացած բոլոր մարտահրավերները և իրականություն կդարձնեն մեր երազանքները»,- ասված է գրառման մեջ։

17:08 - 19 նոյեմբերի, 2024

Երևանի ավագանու ՔՊ խմբակցության անդամ Լուսինե Գևորգյանի մանդատը տրվեց Արեգ Գևորգյանին

Երևանի ավագանու՝ նոյեմբերի 19-ի նիստին քաղաքապետ Տիգրան Ավինյանը հայտարարեց, որ Երևանի «Քաղաքացիական պայմանագիր» խմբակցության անդամ Լուսինե Գևորգյանը դիմում է ներկայացրել ավագանու անդամի լիազորությունները վաղաժամկետ դադարեցնելու վերաբերյալ։ Կենտրոնական ընտրական հանձնաժողովի արձանագրության համաձայն՝ ավագանու մանդատը տրվել է Քաղաքացիական պայմանագիր կուսակցության ընտրական ցուցակի հերթական հաջորդ անդամ Արեգ Գևորգյանին:

11:00 - 19 նոյեմբերի, 2024

Հովիկ Աղազարյանի մասով կա հարուցված կարգապահական վարույթ, որը կունենա հետևանք. ՔՊ-ական պատգամավոր |tert.am|

tert.am: Դուք գիտեք, որ «Քաղաքացիական պայմանագիր» կուսակցության վարչությունում հարուցված կարգապահական վարույթ կա այս հարցի վերաբերյալ, որը դեռ ծագել էր խորհրդարանական լսումներից հետո, և այդ վարույթը պիտի քննարկվի, և քննարկման արդյունքում արդեն հետևանքների և որոշումների մասին պատշաճ կերպով կծանուցենք նաև ձեզ: Այս մասին խորհրդարանական ճեպազրույցների ժամին ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով ՔՊ-ական պատգամավոր Հովիկ Աղազարյանի՝ մանդատը վայր դնելու մասին լուրերին: Ճշտող հարցին՝ այսինքն չի՞ բացառվում, որ Հովիկ Աղազարյանն ու Նարեկ Զեյնալյանը դնեն իրենց մանդատները, ՔՊ-ական մեկ այլ պատգամավոր՝ Վահագն Ալեքսանյանը պատասխանեց, որ կա հարուցված կարգապահական վարույթ, որը, բնականաբար, կունենա հետևանքներ: «Կարգապահական վարույթի հարուցումն ինքնին նշանակում է, որ կա այդ վարույթը հարուցելու համար առնվազն բավարար հիմք, իսկ թե ինչ հետևանքներ կլինեն, դրա մասին արդեն լրացուցիչ կծանոթանաք»,- ասաց նա: Հիշեցնենք, որ մամուլում շրջանառվում էին լուրեր, որ Հովիկ Աղազարյանը պատրաստվում է վայր դնել պատգամավորական մանդատը։ Վերջինս, սակայն, հերքել էր։ Ըստ լուրերի՝ պատգամավորական մանդատը վայր կդնի նաև «Քաղաքացիական պայմանագիր» խմբակցության պատգամավոր Նարեկ Զեյնալյանը, որը դեռևս չի մեկնաբանել լուրը։ Նշենք, որ ՀՀ կառավարությունում կադրային լուրջ փոփոխություններ են տեղի ունենում։ Այսօր արդեն ազատման դիմում են ներկայացրել ԲԴԽ նախագահ Կարեն Անդրեասյանը և Հակակոռուպցիոն կոմիտեի ղեկավար Սասուն Խաչատրյանը, ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը։ Հրաժարականների դիմումներին անդրադարձել է վարչապետ Նիկոլ Փաշինյանը՝ նշելով, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները․ «Նման խնդրանքով դիմելու պատճառները անձնավորված չեն, այլ համակարգային, որոնց մասին հրապարակային խոսել եմ»,- գրել է վարչապետը։ Ընդդիմադիր «Պատիվ ունեմ» խմբակցության պատգամավոր Տիգրան Աբրահամյանըպաշտոնանկությունները դիտարկում է նախընտրական տրամաբանությունների ներքո, իսկ ԱԺ ՔՊ խմբակցության պատգամավորները նշում են, որ պաշտոնանկությունները ուղիղ կերպով վերաբերում են ՀՀ վարչապետի խոսքին և դժգոհություններին:

12:47 - 18 նոյեմբերի, 2024

ՔՊ խմբակցությունում խնդիր չեն տեսնում ԲԴԽ նախագահի հրաժարականի մեջ

ԱԺ «Քաղաքացիական պայմանագիր» խմբակցությունում խնդիր չեն տեսնում ԲԴԽ նախագահի հրաժարականի մեջ: Այդ մասին խորհրդարանական ճեպազրույցի ժամանակ հայտնեցին Հայկ Կոնջորյանն ու Վահագն Ալեքսանյանը: Ճեպազրույցի ժամանակ Factor.am-ի լրագրողի հարցին, թե խնդրահարույց չէ՞, արդյոք չի՞ նշանակում, որ օրենսդիրից ճնշում կա անկախ մարմնի վրա, որ «վարչապետի հայտարարությունից հետո անկախ մարմին համարվող ԲԴԽ նախագահն է ստատուս գրում, որ սկանդալներից հեռու մնալու համար հրաժարական է տալիս», Վահագն Ալեքսանյանը պատասխանեց. «Վարչապետի ելույթը հայեցակարգային էր իր բնույթով, և ես կարծում եմ՝ անկախ մարմինների ղեկավարները իրենք են հետևություններ արել այդ ելույթից՝ հաշվի առնելով այն հանգամանքը, որ այդ ելույթը առնվազն շատ ծանրակշիռ հիմքեր ուներ: Առնվազն նաև տեսանելի էր հանրության շատ լայն շերտերի համաձանությունը վարչապետի այդ ելույթի հետ, և շատ տրամաբանական էր, որ մի շարք պաշտոնյաների պիտի հենց իրենք հետևություն անեին այդ ելույթից»: Կոնջորյանն էլ կարծիք հայտնեց, որ որևէ ճնշման մասին խոսք չկա: «Վարչապետը հստակ և խիստ գնահատականներ է տալիս իրավապահ, դատաիրավական համակարգի վերաբերյալ, և շատ նբորմալ է, որ վարչապետի գնահատականներին պիտի լինեն արձագանքներ: Եվ այս դեպքում արձագանքներ են եղել նաև հրաժարականների տեսքով: Կարծում եմ՝ սա ևս շատ կարևոր գնահատական է»,- հավելեց նա: Հայկ Կոնջորյանի խոսքով ժողովրդավարական երկրներում հրապարակային քաղաքականության մեջ շատ նորմալ է, որ լինեն հայտարարություններ, դրանց լինեն արձագանքներ. «Եվ ես կարծում եմ՝ բոլորս արդեն համոզվել ենք, որ նման հարցերում ճնշումների կոմպոնենտ չկա: կա հակառակը երբեմն հավելյալ ոմանք ասում են չափից ավելի մեծ թափանցիկություն ու հաշվետվողականություն, բայց ես կարծում եմ, որ այն չափից շատ չի լինում: Ամեն ինչ տեղի է ունեցել ձեր աչքի առջև, և որևէ խնդիր չեմ տեսնում»,- եզրափակեց ՔՊ խմբակցության պատգամավորը: Նշենք, որ ՀՀ կառավարությունում կադրային լուրջ փոփոխություններ են տեղի ունենում։ Այսօր արդեն ազատման դիմում են ներկայացրել ԲԴԽ նախագահ Կարեն Անդրեասյանը և Հակակոռուպցիոն կոմիտեի ղեկավար Սասուն Խաչատրյանը, ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը։ Հրաժարականների դիմումներին անդրադարձել է վարչապետ Նիկոլ Փաշինյանը՝ նշելով, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները․ «Նման խնդրանքով դիմելու պատճառները անձնավորված չեն, այլ համակարգային, որոնց մասին հրապարակային խոսել եմ»,- գրել է վարչապետը։

12:30 - 18 նոյեմբերի, 2024