Նորայր Նորիկյան

Իշխանությունները սկսել են մի գործընթաց, որը հակասահմանադրական է․ Նորայր Նորիկյան |factor.am|

factor.am: «Արդար Հայաստան» կուսակցության մի քանի անդամներ Կառավարության շենքի դիմաց բողոքի ակցիա են իրականացնում։ Նրանք հրապարակեցին կուսակցության հայտարարությունը՝ Հայաստանում վերջին օրերին ընթացող քաղաքական գործընթացների և Տավուշի մարզում իրականացվող սահմանազատման աշխատանքների հետ կապված։ Ըստ կուսակցության նախագահ Նորայր Նորիկյանի՝ իշխանությունները սկսել են մի գործընթաց, որը հակասահմանադրական է։ Նրա խոսքով՝ առանց ԱԺ կողմից վավերացման տեղի է ունենում սահմանազատման գործընթաց, որի շրջանակներում տեղադրվել է թվով 20 սահմանային սյուն։ «Ադրբեջանի հետ սահմանազատման և սահմանագծման վերաբերյալ ցանկացած համաձայնագիր կամ պայմանագիր ենթակա է վավերացման ԱԺ-ի կողմից։ Ընթացող գործընթացը միակողմանի զիջում է, Ադրբեջանը ստանում է տարածքներ, Հայաստանը՝ ոչինչ՝ ակնկալելով բացառապես Ալիևի ողորմածությունը: Այդպես հնարավոր է մի դեպքում, երբ գործող իշխանությունը հայտնվել է փակուղային իրավիճակում, չգիտի իր անելիքը, և փորձում է 6-ամյա ձախողումներն արդարացնել թավշյա խաղաղության շղարշի տակ»,- ասաց նա։ «Արդար Հայաստան» կուսակցության ղեկավարը հայտարարեց, որ կառավարությունից պահանջում են Տավուշի մարզում իրականացվող գործընթացը դադարեցնել, որը հղի է անկանխատեսելի հետևանքներով։ «Բավակա՛ն է, ի՞նչ է ձեր ուզածը, Նիկո՛լ, չե՞ք տեսնում, որ ձեզ մոտ ոչինչ չի ստացվում, որ դուք անկարող եք համակարգային որևէ խնդիր լուծել։ Չե՞ք հասկանում, որ դուք ի վիճակի չեք կատարել ձեր թիվ մեկ և հիմնական առաքելությունը, այն է՝ ապահովել երկրի տարածքային ամբողջականությունն ու ժողովրդի անվտանգությունը»,- հայտարարեցվ Նորիկյանը։ Կուսակցության հայտարարությունը ամբողջությամբ՝ ստորև․ «Հարգելի՛ հայրենակիցներ Ս.թ ապրիլի 19-ին Հայաստանի և Ադրբեջանի միջև պետական սահմանի սահմանազատման հարցերով պետական հանձնաժողովների ութերորդ հանդիպման արդյունքների վերաբերյալ հրապարակված հայտարարությամբ, ըստ էության, մեկնարկել է երկու երկրների միջև սահմանագծման ու սահմանազատման գործընթացը, թեև այն հանգամանքին, որ նույն հայտարարության մեջ ընդգծվել է, որ մինչև ս.թ. հուլիսի 1-ը դեռևս պետք է ավարտին հասցնել պետական սահմանի սահմանազատման հարցերով պետական հանձնաժողովների համատեղ գործունեության մասին կանոնակարգի նախագծի համաձայնեցման շուրջ աշխատանքները և մեկնարկել դրա ներպետական համաձայնեցման ու հաստատման գործընթացը՝ Կողմերի՝ պետությունների օրենսդրությամբ սահմանված կարգով և պահանջների համաձայն: Սա նշանակում է, որ նշված կանոնագրքի՝ Ազգային Ժողովի կողմից վավերացնելուց հետո նոր միայն պետք է իրականացվի սահմանազատման գործընթաց։ Թեև վերը նշվածին, Հայաստանի և Ադրբեջանի սահմանին գեոդեզիական չափումների հիման վրա, կոորդինատների ճշգրտման աշխատանքների շրջանակներում 2024 թվականի ապրիլի 25-ի դրությամբ տեղադրվել է թվով 20 սահմանային սյուն, այսինքն՝ առանց Ազգային Ժողովի կողմից վավերացված կանոնագրքի՝ այս պահին փաստացիորեն տեղի է ունենում սահմանազատման գործընթաց։ Հարգելի՛ հայրենակիցներ «Արդար Հայաստան» կուսակցությունը գտնում է, որ ՀՀ կառավարությունը վարչապետ Նիկոլ Փաշինյանի գլխավորությամբ, կոպտորեն խախտելով ՀՀ սահմանադրության 6-րդ, 116-և և 205-րդ հոդվածների պահանջները, դուրս են եկել իրենց լիազորությունների շրջանակից, ուստի ներկայումս Տավուշի մարզում ընթացող գործընթացն ամբողջությամբ հակասահմանադրական է։ Ադրբեջանի հետ պետական սահմանի սահմանազատման ու սահմանագծման վերաբերյալ ցանկացած համաձայնագիր կամ պայմանագիր ՀՀ սահմանադրության 116-րդ հոդվածով սահմանված կարգով ենթակա է վավերացման ՀՀ Ագային Ժողովի կողմից… «Միջազգային պայմանագրերի մասին» ՀՀ օրենքի 2-րդ կետի ուժով՝ Հայաստանի և Ադրբեջանի պետական սահմանների որոշման /Դելիմիտացիա/ և սահմանագծի անցկացման /Դեմարկացիա/ իրականացման վերաբերյալ ձեռք բերված համաձայնությունը միջազգային պայմանագիր է, որը շոշափում է թե՛ ռազմական, թե՛ քաղաքական բաղադրիչ, հետևաբար պարտադիր ենթակա է վավերացման ԱԺ-ի կողմից, որովհետև դրա հետևանքները, ըստ էության, վերաբերում են ՀՀ տարածքային ամբողջականությանը, անվտանգությանը, և ընդհանուր առմամբ ամբողջովին պաշտպանական համակարգին: Ուստի՝ ՀՀ կառավարության, կա՛մ վարչապետ Նիկոլ Փաշինյանի, կա՛մ փոխվարչապետի կողմից որևէ ստորագրված փաստաթուղթ Ադրբեջանի հետ դելիմիտացիա և դեմարկացիա իրականացնելու համար, ենթակա է վավերացման ՀՀ Ազգային Ժողովի կողմից, քանի որ հանդիսանում է միջազգային պայմանագիր: Ավելի՛ն, ՀՀ Ազգային ժողովը կարող է ոչ միայն վավերացնել, այլև ԿԱՍԵՑՆԵԼ կամ ՉԵՂՅԱԼ հայտարարել նշված միջազգային պայմանագիրը: Եթե ՀՀ կառավարությունն առանց Ազգային Ժողովի վավերացման, ձեռնարկել է սահմանզատման գործընթաց, ապա պարտավոր է հիմնավորել, որ ս.թ. ապրիլի 19-ին Հայաստանի և Ադրբեջանի միջև պետական սահմանի սահմանազատման հարցերով պետական հանձնաժողովների ութերորդ հանդիպման ընթացքում ձեռք բերված համաձայնությունը միջազգային պայմանագիր չէ։ Այդ դեպքում պետք է հիմնավորվի նաև, թե ՀՀ վարչապետը կամ փոխվարչապետը կոնկրետ ո՞ր իրավասությամբ են առաջնորդվում այդպիսի որոշումներ կայացնելիս կամ փաստաթուղթ ստորագրելիս, քանի որ ՀՀ սահմանադրության 6-րդ հոդվածով սահմանված կարգով ի իրավասու են կատարելու միայն այնպիսի գործողություններ, որոնց համար լիազորված են Սահմանադրությամբ կամ օրենքներով: Ավելի՛ն, պետք է հանրությանը հիմնավորվի, թե այդպիսի պայմանավորվածությունն իրավական առումով ի՞նչ կարգավիճակ ունի, եթե միջազգային պայմանագիր չէ: Սիրելի՛ հայրենակիցներ, «Արդար Հայաստան» կուսակցությունը պահանջում է ՀՀ կառավարությունից դադարեցնել Տավուշի մարզում իրականացվող հակասահմանադրական գործընթացը, որը հղի է անկանխատեսելի հետևանքներով։ Ընթացող գործընթացը միակողմանի զիջում է։ Ադրբեջանը ստանում է տարածքներ՝ Հայաստանը՝ ոչինչ՝ ակնկալելով բացառապես Ալիևի ողորմածությանը։ Այսպես հնարավոր է մի դեպքում, երբ գործող իշխանությունը հայտնվել է փակուղային իրավիճակում, չգիտի իր անելիքը և փորձում է վեցամյա գործունեության ձախողումներն արդարացնել «Խաղաղության դարաշրջանի» շղարշի տակ։ Նիկոլ Փաշինյանը շատ լավ գիտակցում է, որ իր կողմից ձեռնարկված այս խիստ կասկածելի, հակաօրինական ու որևէ կերպ չերաշխավորված գործընթացի տապալումը իր իշխանության տապալումն է։ Գործող իշխանության միակ «դաշնակիցը» մնացել է մինչև վերջ ողնաշարը ջարդված հասարակության անտարբերությունը, սակայն հասարակության լռությունը գործող իշխանության հետ համաձայն լինելը չէ։ Պարզապես եթե ժողովուրդն իսկապես խաղաղություն է ուզում, ապա գործող իշխանությունն այն շփոթել է պարտության հետ, ամեն ինչ հանձնելու հետ, հակառակորդի բոլոր պահանջները անվերապահորեն կատարելու հետ… Բավակա՛ն է։ Ի՞նչ է Ձեր ուզածը։ Չե՞ք տեսնում, որ Ձեզ մոտ ոչինչ չի ստացվում, որ Դուք անկարող եք համակարգային որևէ խնդիր լուծել, չե՞ք հասկանում, որ Դուք ի վիճակի չեք կատարել Ձեր թիվ մեկ ու հիմնական առաքելությունն ու սահմանադրական պարտականությունը՝ ապահովել Հայաստանի տարածքային ամբողջականությունն ու ժողովրդի անվտանգությունը։ Սիրելի՛ հայրենակիցներ Ադրբեջանի իրական նպատակը Սյունիքն է, Սյունիքով Նախիջևան մտնելը, վերջնահաշվում այն զավթելը՝ կործանելով Հայաստանի Հանրապետությունը։ Տավուշում հիմա ձայն չեն հանի, ավելի՛ն, լուռ կհետևեն, հանդես կգան խաղաղասերի դիրքերից, իբրև թե համաձայն են դելիմիտացիայի ու դեմարկացիայի գործընթացին, իրականում ստանալով հնարավորը՝ չեն զիջի ոչինչ։ Տավուշում կստանան իրենց ուզածը և ավելի սանձարձակ կդառնան Վայոց Ձորի ու Սյունիքի հատվածներում՝ վիժեցնելով իբրև թե ընթացող խաղաղ կարգավորման գործընթացը։ Չհասկանալ այս պարզ իողությունը, նշանակում է ոչինչ չհասկանալ տարածաշրջանի աշխարհաքաղաքական նշանակությունից, և մեծ խաղացողների հետապնդած ռազմավարական շահերից, կամ լինել սեփական շահերը ոտնակոխ անող «Խաղաղասեր»։ Սիրելի՛ հայրենակիցներ «Արդար Հայաստան» կուսակցությունը գտնում է, որ Հայաստանի և Ադրբեջանի միջև պետական սահմանի սահմանազատման գործընթացում պետք է հստակեցվի, թե՞. 1. Կողմերը ո՞ր թվականի քարտեզներով են առաջնորդվում։ 2. Ադրբեջանը պետք է աներկբայորեն հայտարարի, որ իր զորքերը հնարավորինս սեղմ ժամկետներում դուրս է բերում ՀՀ զավթված բոլոր տրածքներից։ 3. Մինչև Հայաստանի և Ադրբեջանի միջև պետական սահմանի սահմանազատման հարցերով պետական հանձնաժողովների համատեղ գործունեության մասին կանոնակարգի հաստատումը, ներկայումս ընթացող անօրինական գործընթացը պետք է դադարեցվի, իսկ կանոնագրքի հաստատումից հետո երկու կողմից էլ հնարավոր տարածքների վերադարձն ու հստակեցման գործընթացը պետք է տեղի է ունենա միաժամանակ։ Հարկ ենք համարում ընդգծել նաև, որ «Արդար Հայաստան» կուսակցությունը քննարկում է ՀՀ կառավարության ու ՀՀ վարչապետի՝ վերը նշված հարցերի կապակցությամբ ընդունված որոշումները ՀՀ սահմանադրական ու ՀՀ վարչական դատարաններում վիճարկելու իրավական հնարավորությունները»։

17:47 - 26 ապրիլի, 2024

Նիկոլ Փաշինյանն ու Նորայր Նորիկյանը քննարկել են կարողությունների և ներուժի համախմբումը

Արտախորհրդարանական քաղաքական ուժերի հետ խորհրդակցությունների շրջանակում վարչապետի պաշտոնակատար Նիկոլ Փաշինյանն ընդունել է «Արդար Հայաստան» կուսակցության նախագահ Նորայր Նորիկյանին: Այս մասին հայտնեցին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից: Նիկոլ Փաշինյան – Ինչքանով հնարավոր է՝ հետևել եմ Ձեր քարոզարշավին և լավ տպավորություններ ստացել: Ափսոսում եմ, որ չեք հավաքել անհրաժեշտ ձայներ խորհրդարան անցնելու համար, բայց կարծում եմ, որ դա է ընտրությունների առանձնահատկությունը: Կարևորն այն է, որ մեր ընտրություններն արձանագրել են մեր ժողովրդի կամարտահայտությունը, և մեր այսօրվա հանդիպման հիմնական օրակարգը հետևյալն է՝ կուզենայի լսել Ձեր պատկերացումները քաղաքական հետագա զարգացումների վերաբերյալ, նաև ի՞նչ պլաններ ունի Ձեր կուսակցությունը, ինչպե՞ս եք տեսնում կառավարության ու արտախորհրդարանական ուժերի հարաբերությունները, ինչպե՞ս, ի՞նչ բանաձևի վրա հենվելով կարող ենք ապահովել կոնսոլիդացիա, որը մեր երկիրն այս դժվար վիճակից հանելու կարևորագույն բաղադրիչն է: Եվ ի՞նչ անել, որպեսզի փոխադարձաբար լսելի լինենք՝ և՛ արտախորհրդարանական ուժերի, ձեր կուսակցության համար լսելի լինել կառավարությանը, և՛ կառավարության համար լսելի լինել արտախորհրդարանական ուժերին: Համոզված եմ՝ կան բազմաթիվ լավ գաղափարներ, մտքեր, հնարավորություններ և աղմուկի մեջ կորում են, մի ձև գտնել աղմուկի մեջից դուրս բերել: Եթե հնարավոր չէ աղմուկը կարգավորել, գոնե աղմուկի մեջից դուրս բերել ռացիոնալը, ինչը շատ կարևոր է և ինչի բացթողումը հնարավորության բացթողում է: Նորայր Նորիկյան – Շնորհակալ եմ, պարոն վարչապետ: Շնորհակալ եմ հրավերի համար: Ես, անկեղծ ասած, անկախ արդյունքներից, մեր նկատմամբ հանրության կողմից վստահությունից, թույլ տվեք ասել, որ կարևոր եմ համարում պատմական այս շրջափուլը Հայաստանի Հանրապետության Սահմանադրության 2-րդ հոդվածի համատեքսում՝ մեր ժողովրդի կողմից արտահայտված իրական տրամադրությունների առումով: Այնուամենայնիվ, շնորհավորում եմ մեր ժողովրդին և անձամբ Ձեզ: Հույս ունեմ, որ առաջիկա տարիներիներին թե՛ մեր օրենսդիր, թե՛ գործադիր իշխանությունը, բնականաբար, շատ կարևոր և պատասխանատու առաքելությամբ պետք է իրականացնեն խորքային գործընթացներ հանրային կյանքի բոլոր ոլորտներում՝ բեկում իրականացնելու և առաջ շարժվելու համար: Համաձայն եմ այն դիտարկման հետ, որ 2020թ. նոյեմբերից հետո, մեր երկիրը իսկապես գտնվում էր որոշակի ճգնաժամի մեջ: Դուք երեկ արձանագրեցիք, որ այդ քաղաքական ճգնաժամը հաղթահարված է: Համաձայն եմ այդ գնահատականի հետ: Տեսնում եմ առաջիկա տարիներին պետականաշինության լրջագույն անհրաժեշտություն՝ կառավարման համակարգի, պետական ինստիտուտների արդյունավետության բարձրացման: Պարոն վարչապետ, չգիտեմ, ինչքանով հնարավոր եք համարել հետևել իմ հրապարակային գործունեությանը: Ձեր իշխանության գալուց հետո մշտապես ուշադրության կենտրոնում եմ պահել դատաիրավական համակարգի հանգամանքը: Հիմա էլ կրկնում եմ, որ դատական համակարգը մեր պետության և հասարակության «աքիլեսյան գարշապարն» է: Ես խորապես, հիմա առավել ևս համոզված եմ, որ մեր սերնդի պարտքն է ուղղակիորեն այդ ոչ ֆորմալ բարքերն արմատախիլ անել այդ ոլորտից, իսկ ընդհանրապես պատասխանատու, անաչառ, ազնիվ դատական համակարգ կառուցել, և ընդհանրապես պետական ինստիտուտներում արդարության միջավայրը ձևավորել: Հավատում եմ այդ գաղափարին, ես իսկապես գտնում եմ, որ մենք արժանի հասարակություն ունենք: Գտնում եմ, որ կարող ենք այդ գործընթացը պատվով իրականացնել և տանել առաջ, առավել ևս, որ ուրիշ այլընտրանք էլ չունենք: Եթե մենք այս անգամ ձախողենք և հանրային կյանքի այդ ինստիտուտները չկարողանանք կարգի բերել, լրջագույն խնդիրներ կունենանք հետագայում: Այս քարոզարշավը նաև ինձ համար էր առաջին մեծ փորձը քաղաքականության մեջ առաջին դեմքով ներկայանալու համար: Անկեղծ եմ ասում՝ ինձ համար բացահայտումները շատ էին՝ մարդկային հարաբերությունների էությունը ճիշտ հասկանալու: Կուզենայի որպես քաղաքացի ուղղակի իմ դիտարկումներն անել: Ես տեսա վարչական ռեսուրսի օգտագործում ՏԻՄ մակարդակով և հասկացա, թե ինչպես կարող է սաբոտաժը ՏԻՄ համակարգերում աշխատել: Տեսա, թե նրանց կապը հանցավոր որոշակի շրջանակների հետ, ոնց է աշխատում այդ մեխանիզմը: Ցավոք, իմ կարծիքով, անկախ քաղաքական ինչպիսի իրադրություն էլ լինի, մենք ուղղակի պարտավոր ենք արմատախիլ անել այդ ոչ ֆորմալ ազդեցությունները: Ուղղակիորեն դա մեզ պատիվ չի բերում: Մեր հասարակությանը պատիվ չի բերում, որ ներողություն արտահայտությանս, հանրության մեջ, այսպես ասած, կասկածելի հեղինակություն ունեցող անհատները փորձում են ազդեցություն ունենալ և միջամտել ընտրական գործընթացներին: Տեսնում եմ շատ աշխատանք մեր առաջիկա գործընթացում: Ես երբեք չեմ դասվել այն մարդկանց շարքին, որ կուզենային պետական իշխանությունը ձախողել: Ճիշտ հակառակը՝ դա մեծ վնաս է հասցնում: Համարում եմ, որ սա շատ լավ հնարավորություն կարող է ստեղծել մեր հանրային կյանքում հանրային համերաշխություն ձևավորելու, մթնոլորտը ձևավորելու համար: Կներեք, կարող է այլ ընկալում լինել, բայց կարծում եմ, որ ընտրությունների այս արդյունքը կարող է շատ ավելի կարևոր է, քան անգամ 2018թ. դեկտեմբերյան արդյունքը, որովհետև սա նաև որոշակիորեն հանրության գիտակցված կոնկրետ գնահատական է: Հիմա տեսնենք՝ ի գործ, ի աշխատանք: «Արդար Հայաստան» կուսակցությունը նորաստեղծ է, ընդամենը չորս ամսվա: Մենք տեսնում ենք քաղաքական միջավայրը փոխելու, քաղաքական դաշտին նոր շունչ հաղորդելու անհրաժեշտություն: Պարոն վարչապետ, պատրաստակամ ենք մեր ուժերն ամբողջությամբ ներդնելու պետականաշինությամբ զբաղվելու համար: Շնորհակալ եմ: Հանդիպմանը զրուցակիցները քննարկել են կարողությունների և ներուժի համախմբմանը, ինչպես նաև հետագա համագործակցությանը հնարավորություններին վերաբերող հարցեր:

16:10 - 22 հունիսի, 2021