Հռոմի Պապ

Ֆրանցիսկոս պապը փետրվարի 14-ից հետո առաջին անգամ ներկայացել է Վատիկանի Սուրբ Պետրոս հրապարակում |armenpress.am|

armenpress.am: Սուրբ Պետրոս հրապարակում Հիվանդների ու առողջապահական գործիչների հոբելյանական սուրբ պատարագի ավարտին, որը մատուցել է Գերապ. Ռինո Ֆիզիքելլան՝ կարդալով այս առիթով Սրբազան Պապի պատրաստած քարոզը, Նորին Սրբությունը անակնկալ կերպով ներկայացել է հրապարակ՝ նախքան վերջին օրհնությունը։ Vaticannews-ը տեղեկացնում է, որ Հռոմի պապը Սուրբ Պետրոս հրապարակում զետեղված ամբիոնից պատարագիչ Գերապայծառի հետ միասին բոլոր ներկաներին շնորհել է իր առաքելական օրհնությունը, ապա տկար, բայց հստակ ձայնով բոլորին մաղթել բարի կիրակի։ «Բարի կիրակի բոլորիդ և շնորհակալություն», - ասել է Սրբազան Պապը, և, հասկանալով, որ իր առաջին ողջույնի խոսքը լսելի չէ եղած բոլորին, մեկ անգամ ևս կրկնեց իր ողջույնը, մինչ Սուրբ Պետրոս հրապարակում գտնվող հազարավոր հավատացյալները հուզումնալից ծափահարությամբ ընկալել են Քահանայապետին ու նրա ողջույնի խոսքերը։ Այս առաջին անգամն էր, որ Նորին Սրբությունը փետրվարի 14-ից հետո հայտնվել է Սուրբ Պետրոս հրապարակում և խոսք ուղղել հավատացյալներին։ Հունվարին Ֆրանցիսկոս պապը հիվանդացել էր բրոնխիտով. փետրվարի 14-ին նրան տեղափոխել են Հռոմի «Gemelli» կլինիկա, քանի որ հիվանդությունը քրոնիկ էր դարձել։ Ռենտգենից և լաբորատոր հետազոտություններից հետո քահանայապետի մոտ հայտնաբերվել էր նաև երկկողմանի թոքաբորբ։ Հռոմի Ֆրանցիսկոս պապը 88 տարեկան է:

10:01 - 07 ապրիլի, 2025

Հռոմի պապի որոշմամբ՝ Հայոց ցեղասպանության նահատակ Երանելի Իգնատիոս Մալոյանը կսրբադասվի |armenpress.am|

armenpress.am: Հռոմի Ֆրանցիսկոս Պապի որոշմամբ՝ երեք երանելիներ, այդ թվում՝ Հայոց ցեղասպանության ժամանակ նահատակված հայ կաթոլիկ արքեպիսկոպոս Երանելի Իգնատիոս Շուքրալահ Մալոյանը կսրբադասվեն։ Այս մասին հայտնում է Վատիկանի տեղեկատվական կայքը՝ մանրամասնելով, որ կսրբադասվեն նաև Երկրորդ համաշխարհային պատերազմի ժամանակ սպանված Պապուա Նոր Գվինեայի աշխարհական կաթողիկոսը և վենեսուելացի կրոնական մի քույր, որը իր կյանքը նվիրել է կրթությանը և աղքատներին։ Աղբյուրի փոխանցմամբ՝ այս որոշումը Հռոմի Ֆրանցիսկոս պապը կայացրել է մարտի 28-ին։ Երանելի Իգնատիոս Մալոյանը ծնվել է 1869 թվականի ապրիլի 19-ին, ներկայիս Թուրքիայի Մարդին քաղաքում։ 14 տարեկանում նա մտել է Լիբանանի Զմմաու վանքի կղերական միաբանություն և ձեռնադրվել է 1896 թվականին՝ ստանալով Իգնատիուս անունը։ Նա Ալեքսանդրիայում փայլել է իր քարոզներով ինչպես արաբերենով, այնպես էլ թուրքերենով։ Այնուհետև նշանակվել է Կահիրեի Պատրիարքական փոխանորդ, բայց դրան հաջորդող տարում վերադարձել է Ալեքսանդիա՝ տեսողական խնդիրների պատճառով։ 1911 թվականին նշանակվել է Մարդինի Պատրիարքական Փոխանորդ։ Հայոց ցեղասպանության ժամանակ նա ձերբակալվել է տասնյակ քրիստոնյաների հետ և բերվել դատարան: Երբ նրան ասել են, որ կյանքը կարող են խնայել իսլամ ընդունելու պարագայում, Իգնատիոս Շուքրալահ Մալոյանը հայտարարել է. «Մենք երբեք անհավատարիմ չենք եղել պետությանը… բայց, եթե դուք մեզ խնդրում եք անհավատարիմ լինել մեր կրոնին, դա երբեք չի լինելու»: Դրանից հետո նրան խոշտանգել են և կարճ ժամանակ անց մահապատժի են ենթարկել։ Նա երանելի է հռչակվել է Սուրբ Հովհաննես Պողոս II պապի կողմից 2001 թվականին։

16:23 - 01 ապրիլի, 2025

Ֆրանցիսկոս Պապը ողջունել է Հայաստան-Ադրբեջան խաղաղության համաձայնագրի փաստաթղթի վերջնական ձևավորումը

Տարածվել է Նորին Սրբություն Հռոմի Ֆրանցիսկոս պապի մարտի 23-ի կիրակնօրյա Մարեմյան աղոթքի գրավոր խորհրդածությունը, որտեղ նա վիշտ է հայտնել Գազայի վրա ռմբակոծումների համար, ուրախություն` Հայաստան-Ադրբեջան խաղաղության համաձայնագրի վերջնական ձևավորման շուրջ համաձայնության համար, աղոթք ու կոչ է ուղղել խաղաղության ու անմիջական զինադադարի ի նպաստ և շնորհակալություն հայտնել բժիշկներին, առողջապահական գործիչներին։ «Ուրախ եմ` որ Հայաստանն ու Ադրբեջանը համաձայնության եկան խաղաղության համաձայնագրի վերջնական ձևի վրա։ Հուսով եմ, որ այն կստորագրվի որքան հնարավոր է շուտ և կարողանա նպաստել Հարավային Կովկասում կայուն խաղաղության հաստատմանը», - «Արմենպրես»-ի փոխանցմամբ, եղել է Ֆրանցիսկոս Պապի մաղթանքներից մեկը։

17:25 - 23 մարտի, 2025

Հռոմի պապը հոսպիտալացվելուց ի վեր առաջին անգամ ներկայացել է հանրությանը |azatutyun.am|

azatutyun.am: Հռոմի պապ Ֆրանցիսկոսը, որ շաբաթներ շարունակ հոսպիտալացված էր, այսօր առաջին անգամ հայտնվել է հանրության առջև: Հիվանդանոցից դուրս գրվելուց րոպեներ հետո նա մի քանի րոպե հայտնվել է պատշգամբում և ողջունել հավաքվածներին: 88-ամյա Ֆրանցիսկոս Պապը հիվանդանոցում էր հայտնվել փետրվարի 14-ին ծանր շնչառական վարակով, որը նրա գործունեության 12 տարիների ընթացքում առողջության համար ամենալուրջ բարդությունն էր: Բժիշկները շաբաթ օրը հայտարարել են, որ դեռ «երկար ժամանակ» կպահանջվի լիարժեք ապաքինվելու համար: Նրանք Հռոմի պապին նշանակել են ևս երկու ամիս հանգիստ Վատիկանում: Լուսանկարը՝ Alessandra Tarantino/AP

16:49 - 23 մարտի, 2025

Վատիկանը հոսպիտալացումից հետո առաջին անգամ հրապարակել է Հռոմի Ֆրանցիսկոս պապի լուսանկարը |tert.am|

tert.am: Վատիկանը հոսպիտալացումից հետո առաջին անգամ հրապարակել է Հռոմի Ֆրանցիսկոս պապի լուսանկարը։ Այս մասին փոխանցում է bbc.com-ը։ Լուսանկարում Ֆրանցիսկոս պապը կրում է պահքի պատարագի զգեստներ՝ նստած հիվանդանոցի մատուռի զոհասեղանի դիմաց: Ավելի վաղ Հռոմի Gemelli հիվանդանոցում գտնվող Հռոմի պապ Ֆրանցիսկոսն իր ուղերձում ասել է, որ այժմ «փորձության շրջան» է անցնում, ինչպեսև մյուս հիվանդները:

10:13 - 17 մարտի, 2025

ՀՀ նախագահը շնորհավորել է Հռոմի Պապ Ֆրանցիսկոսին Հռոմի Սրբազան Քահանայապետ ընտրվելու 12-րդ տարեդարձի առթիվ |armenpress.am|

armenpress.am: Հայաստանի Հանրապետության նախագահ Վահագն Խաչատուրյանը Հռոմի Սրբազան Քահանայապետ ընտրվելու 12-րդ տարեդարձի կապակցությամբ Հռոմի Պապ Ֆրանցիսկոսին շնորհավորական նամակ է հղել։ Այս մասին նշված է Սուրբ Աթոռում Հայաստանի դեսպանության տարածած հաղորդագրության մեջ, որտեղ, մասնավորապես, նշված է, որ ՀՀ նախագահը Հռոմի Ֆրանցիսկոս Պապին մաղթել է շուտափույթ ապաքինում։ «Մաղթում եմ շուտափույթ ապաքինում և Ձերդ Սրբության առողջության համար համայն աշխարհից հնչող աղոթքներին։ Վերահաստատում եմ Հայաստանի հանձնառությունը պատմական սերտ կապերի, նույնակունք արժեքների, հոգևոր և մշակութային ժառանգության վրա խարսխված միջպետական հարաբերությունների զարգացման ու խորացման գործում։ Երախտապարտ ենք Ձերդ Սրբության խաղաղության ուղերձների համար՝ ուղղված հայ ժողովրդին։ Աշխարհում ահագնացող պատերազմների և բռնությունների պայմաններում, առավել քան երբևէ, պետք է հետևել արդարության և համերաշխության, ժողովուրդների հաշտեցման Ձերդ Սրբության կոչերին»,-նշված է ուղերձում։ ՀՀ նախագահն իր ուղերձում նաև վստահություն է հայտնել, որ Հռոմի կաթոլիկ եկեղեցու նվիրական ու վեհ առաքելությունը կնպաստի աշխարհում խաղաղության հաստատմանը։ «Ընդունեք, խնդրեմ, Ձերդ Սրբություն, խորին հարգանքիս հավաստիքը»,-ասված է ուղերձում։

17:02 - 13 մարտի, 2025

Հռոմի պապի կլինիկական վիճակը կայուն է. նա շարունակում է բուժում ստանալ երկկողմանի թոքաբորբի դեմ |tert.am|

tert.am: Հռոմի Ֆրանցիսկոս պապի կլինիկական վիճակը կայուն է, նա շարունակում է Հռոմի Gemelli հիվանդանոցում բուժում ստանալ երկկողմանի թոքաբորբի դեմ, հայտնում է Վատիկանի մամուլի ծառայությունը:Նշվում է, որ անցած օրը պոնտիֆիկոսը շնչառական անբավարարության կամ բրոնխոսպազմի նոպաներ չի ունեցել: Նա չի ջերմել և գտնվում է գիտակից վիճակում, գրում է vaticannews.va կայքը: Հռոմի պապն անցել է բարձր հոսքի թթվածնային թերապիա, շնչառական ֆիզիոթերապիա։ Բժիշկների կանխատեսումը մնում է «զգուշավոր», քանի որ ընդհանուր առմամբ պոնտիֆիկոսի վիճակը բարդ է: Պոնտիֆիկոսը հոսպիտալացվել էր փետրվարի 14-ին՝ բրոնխիտով: Այժմ նրա մոտ ախտորոշվել է երկկողմանի թոքաբորբ: Պապի մոտ նկատվել են նաև երիկամային անբավարարության նշաններ:

10:34 - 05 մարտի, 2025

Չնայած Պապի վիճակը շարունակում է ծայրահեղ ծանր մնալ, բայց «թեթև բարելավում կա»․ Վատիկան |azatutyun.am|

azatutyun.am: Հռոմի Ֆրանցիսկոս պապը շարունակում է հիվանդանոցում բուժում ստանալ։ Վատիկանից հայտնում են, որ չնայած պոնտիֆիկոսի վիճակը շարունակում է ծայրահեղ ծանր մնալ, բայց «թեթև բարելավում կա», և, որ «Պապը լավ հանգստացել է ամբողջ գիշեր»։ Վատիկանը հավելում է նաև, որ Ֆրանցիսկոսի երիկամների թեթև խնդիրներն «անհանգստություն չեն առաջացնում» և, որ թթվածնային թերապիան շարունակվում է։ Հռոմի Պապը Ջեմելի հիվանդանոց է տեղափոխվել փետրվարի 14-ին, քանի օր շնչառության հետ կապված դժվարություններ է ունեցել, դրանից հետո նրա մոտ երկկողմանի թոքաբորբ է ախտորոշվել: Հազարավոր մարդիկ երկուշաբթի երեկոյան հավաքվել էին Սուրբ Պետրոսի հրապարակում՝ աղոթելու Հռոմի պապի ապաքինման համար։

16:46 - 25 փետրվարի, 2025

Հռոմի պապի վիճակը «կրիտիկական է». Վատիկան |azatutyun.am|

azatutyun.am: Վատիկանը շաբաթ օրը հայտարարել է, որ վերջին 24 ժամվա ընթացքում Ֆրանցիսկոս պապի առողջական վիճակը վատացել է, և առաջին անգամ նրա վիճակը բնութագրել է որպես «կրիտիկական»: Հռոմի պապին, որ շուրջ 10 օր հոսպիտալացված է, լրացուցիչ թթվածին և արյան փոխներարկում է անհրաժեշտ եղել: Հռոմի Պապը Ջեմելի հիվանդանոց է տեղափոխվել փետրվարի 14-ին, քանի օր շնչառության հետ կապված դժվարություններ է ուներ, դրանից հետո նրա մոտ երկու թոքերում էլ թոքաբորբ է ախտորոշվել:Լուսանկարում՝ Հռոմի պապն է/EPA/MASSIMO PERCOSSI /MaxPPP

11:32 - 23 փետրվարի, 2025

Հռոմի պապի մոտ երկկողմանի թոքաբորբ է սկսվել․ Վատիկան |azatutyun.am|

azatutyun.am: Հռոմի պապի մոտ երկկողմանի թոքաբորբ է սկսվել, հաղորդում է Վատիկանը՝ նշելով, որ թոքաբորբը բարդացնում է 88-ամյա պոնտիֆիկոսի բուժումը և վկայում նրա փխրուն առողջության հետագա վատթարացման մասին։ Ֆրենցիսկոս պապը մեկ շաբաթից ավելի է պայքարում էր բարդ շնչառական վարակի դեմ, փետրվարի14-ից գտնվում է Հռոմի Գեմելի հիվանդանոցում, երեկ թոքերի համակարգչային ստուգում է իրականացվել, ինչը ցույց է տվել, որ Պապի մոտ երկկողմանի թոքաբորբ է սկսվել։ Նախօրեին Վատիկանը հաղորդեց, որ Հռոմի պապի մասնակցությամբ այս շաբաթավերջին սպասվող միջոցառումները չեղարկվել են, իսկ կիրակի օրվա պատարագը կմատուցվի, բայց ոչ Պապի կողմից։

10:34 - 19 փետրվարի, 2025

Հռոմի պապը հոսպիտալացվել է |tert.am|

tert.am: Հռոմի պապ Ֆրանցիսկոսը տեղափոխվել է հիվանդանոց բրոնխիտի բուժման համար: Վատիկանի հայտարարության մեջ նշվում է, որ պոնտիֆիկոսը Հռոմում բուժզննում կանցնի ու կշարունակի բուժումը: Այս մասին գրում է Sky News-ը: 88-ամյա հովվապետի մոտ բրոնխիտ էր ախտորոշվել նախորդ շաբաթ, սակայն նրա շարունակել էր հավատացյալների հետ հանդիւպումներն ու մյուս գործերը: Այս շաբաթ Վատիկանում ելույթի ժամանակ Հռոմի պապ Ֆրանցիսկոսն օգնականին խնդրել էր կարդալ իր պատրաստած խոսքը: «Ես, իմ բրոնխիտով, դեռ չեմ կարող կարդալ: Հուսով եմ, որ հաջորդ անգամ կկարողանամ»,- ասել էր նա։

15:16 - 14 փետրվարի, 2025

Վարչապետը Ֆրանցիսկոս Պապին շնորհակալություն է հայտնել Սուրբ Աթոռի կողմից հայ գերիներին ազատ արձակելու շարունակական ջանքերի համար

Սուրբ Աթոռ կատարած աշխատանքային այցի շրջանակում տեղի է ունեցել վարչապետ Նիկոլ Փաշինյանի առանձնազրույցը Նորին Սրբություն Ֆրանցիսկոս Պապի հետ: Այս մասին հայտնում են ՀՀ վարչապետի աշխատակազմից։ Վարչապետ Փաշինյանը շնորհակալություն է հայտնել հանդիպման համար և նշել, որ իր համար մեծ պատիվ է առաջին անգամ գտնվել Առաքելական պալատում։ ՀՀ վարչապետի խոսքով` բարձր ու բարձրագույն մակարդակով շարունակվող փոխայցերը գալիս են փաստելու Հայաստանի և Սուրբ Աթոռի միջև առանձնահատուկ միջպետական հարաբերությունների մասին: Նիկոլ Փաշինյանը հավելել է, որ Հայաստանում ռեզիդենտ Առաքելական նվիրակի նշանակումը զգալի առաջընթաց կլինի բարեկամական հարաբերություններում։ Միաժամանակ, վարչապետն ընդգծել է Հայաստանի լիակատար աջակցությունը Սուրբ Աթոռին՝ միջազգային հարթակներում խաղաղության օրակարգի սպասարկման և այս ուղղությամբ համատեղ հանդես գալու և գործելու հարցում։ Նիկոլ Փաշինյանը Նորին Սրբությանը տեղեկացրել է Հայաստան-Ադրբեջան խաղաղության գործընթացի վերջին զարգացումների մասին և վերահաստատել Հայաստանի Կառավարության հավատարմությունը Խաղաղության օրակարգին։ Նաև ընդգծել է, որ Հայաստանի Հանրապետությունը հանուն խաղաղության իր բաժին ներդրումն ունենալու հարցում վճռական է։ Վարչապետը Նորին Սրբությանը շնորհակալություն է հայտնել Սուրբ Աթոռի կողմից հայ գերիներին ազատ արձակելու շարունակական ջանքերի համար։ Զրուցակիցները քննարկել են նաև երկուստեք հետաքրքրություն ներկայացնող այլ հարցեր:Առանձնազրույցից հետո Ֆրանցիսկոս Պապը ողջունել է վարչապետի տիկին Աննա Հակոբյանին, դստերը և վարչապետին ուղեկցող պատվիրակության անդամներին:

16:39 - 18 նոյեմբերի, 2024

Սուրբ Աթոռ կատարած այցի շրջանակում առանձնազրույց ունեցա Ֆրանցիսկոս Պապի հետ. վարչապետ

Սուրբ Աթոռ կատարած աշխատանքային այցի շրջանակում առանձնազրույց ունեցա Նորին Սրբություն Ֆրանցիսկոս Պապի հետ: Այդ մասին Տելեգրամի իր էջում գրել է վարչապետ Նիկոլ Փաշինյանը և կից լուսանկարներ հրապարակել:

14:54 - 18 նոյեմբերի, 2024

Նիկոլ Փաշինյանն աշխատանքային այցով մեկնել է Սուրբ Աթոռ

Վարչապետ Նիկոլ Փաշինյանը տիկնոջ՝ Աննա Հակոբյանի հետ, աշխատանքային այցով մեկնել է Սուրբ Աթոռ (Վատիկան): Այս մասին հայտնում են ՀՀ վարչապետի աշխատակազմից: Այցի շրջանակում վարչապետը հանդիպում կունենա Նորին Սրբություն Ֆրանցիսկոս Պապի հետ:

09:13 - 18 նոյեմբերի, 2024

Զելենսկին Վատիկանում Հռոմի պապի հետ հանդիպմանը խնդրել է օգնել ՌԴ-ում գերության մեջ գտնվողների ազատ արձակմանը |factor.am|

factor.am: Ուկրաինայի նախագահ Վլադիմիր Զելենսկին Վատիկանում հանդիպել է Հռոմի Ֆրանցիսկոս պապի հետ։ Reuters-ի փոխանցմամբ՝ հանդիպումը տևել է 35 րոպե։ Գործակալությունը հիշեցնում է, որ սա Զելենսկիի և Ֆրանցիսկոս պապի երկրորդ հանդիպումն է վերջին մի քանի ամիսների ընթացքում։ Ըստ ANSA-ի՝ Հռոմի Ֆրանցիսկոս պապը Զելենսկիին նվիրել է ծաղկի բրոնզե հարթաքանդակ՝ «Խաղաղությունը փխրուն ծաղիկ է» մակագրությամբ։ Ուկրաինայի նախագահը քահանայապետը նվիրել է յուղաներկ «Ջարդ Բուչայում. Մարիչկայի պատմությունը», որը պատկերում է մի աղջկա՝ Կիևի մերձակայքում գտնվող Բուչա քաղաքի ավերակների մեջ։ Տեղեկացվում է, որ Զելենսկին Հռոմի պապին խնդրել է օգնել Ռուսաստանի կողմից գերության մեջ գտնվող ուկրաինացիների ազատ արձակման հարցում:

17:32 - 11 հոկտեմբերի, 2024

Հռոմի պապը դատապարտել է ռուսական ուղղափառ եկեղեցու հետ կապված Ուկրաինայի որոշումը |azatutyun.am|

azatutyun.am: Հռոմի Ֆրանցիսկոս պապը օգոստոսի 25-ին դատապարտել է Կիևի որոշումը, որն արգելում է Ուկրաինայում Ռուս ուղղափառ եկեղեցու հետ կապեր ունեցող կրոնական կազմակերպությունների գործունեությունը: «Ոչ մի քրիստոնեական եկեղեցի չի կարող ուղղակիորեն կամ անուղղակիորեն վերացվել: Եկեղեցիներին չպետք է դիպչել»,- ասել է Հռոմի պապն իր ամենշաբաթյա աղոթքի ժամանակ: «Մտածելով Ուկրաինայում վերջերս ընդունված օրենքի մասին՝ ես վախենում եմ աղոթողների ազատության համար», - ասել է Ֆրանցիսկոսը Սուրբ Պետրոսի հրապարակում։ Նա հավաքված ժողովրդին ասաց, որ «աղոթելով չարություն չի գործում, եթե ինչ-որ մեկը իր ժողովրդին վատություն է անում, նա մեղավոր է, բայց նա չի կարող որևէ վատ բան անել աղոթելով»։ Օգոստոսի 24-ին օրենսդրությունը ստորագրելիս Զելենսկին ընդգծել է, ինչպես նա անվանել է ուկրաինացի ժողովրդի հոգևոր անկախությունը՝ ասելով, որ Ուկրաինայի ուղղափառ եկեղեցին «այսօր քայլ է անում դեպի ազատագրում Մոսկվայի սատանաներից»: Ռուսաստանի հետ կապված ուկրաինական ուղղափառ եկեղեցին հայտարարեց, որ խզել է բոլոր կապերը Մոսկվայի պատրիարքարանի հետ 2023 թվականին՝ Ռուսաստանի կողմից Ուկրաինա լայնամասշտաբ ներխուժման պատճառով: Այնուամենայնիվ, ուկրաինական իշխանությունները նրան մեղադրում են կապեր պահպանելու մեջ: Պապը նաև ասել է, որ շարունակում է «ցավով» հետևել Ուկրաինայի մարտերին։

11:33 - 26 օգոստոսի, 2024