«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

Խոսուն է այն փաստը, որ որևէ քաղաքական ուժ չի բողոքարկել ընտրությունների արդյունքները. Տիգրան Ավինյան |armenpress.am|

armenpress.am: Երևանի քաղաքապետի՝ «Քաղաքացիական պայմանագիր» խմբակցության թեկնածու Տիգրան Ավինյանը վստահեցնում է, որ սեպտեմբերի 17-ի ավագանու ընտրությունների արդյունքները ճշգրիտ են արտահայտում ընտրական տեղամասեր գնացած քաղաքացիների քվեարկության պատկերը: Ավինյանը նման դիրքորոշում հայտնեց Երևանի ավագանու նիստում իր թեկնածության հարցի քննարկմանը: Ըստ Ավինյանի՝ ընտրությունների արդյունքները շատ հարցերի շուրջ մտածելու տեղիք են տալիս, սակայն դրանք տվել են նաև մի շարք սկզբունքային հարցերի պատասխաններ և արձանագրել կարևոր իրողություններ: «Ընտրությունների պաշտոնական արդյունքները ճշգրիտ են արտահայտում ընտրական տեղամասեր գնացած քաղաքացիների քվեարկության պատկերը՝ այն աստիճանի, որ մանդատների բաշխման քարտեզը սկզբունքային այլ տեսք կունենար, եթե ընդամենը 53 քվեներ մի փոքր այլ կերպ բաշխվեին: Խոսուն է նաև այն փաստը, որ որևէ քաղաքական ուժ չի բողոքարկել ընտրության արդյունքները: Ընտրությունների արդյունքները, քարոզարշավի և քվեարկության ընթացքում էական խախտումների բացակայությունը 2018թ․ ժողովրդավարական, ոչ բռնի թավշյա հեղափոխության արժեքներին մեր կուսակցության որդեգրած սկզբունքների ապացույցն է»,- ասաց Ավինյանը: Քաղաքապետի թեկնածուն հավելեց՝ միևնույն ժամանակ պետք է արձանագրել, որ 2018թ. հեղափոխության արժեքների պաշտպանության դիրքերից հանդես եկող ուժերն ընտրությունների արդյունքներով ստացել են ձայների գերակշիռ մեծամասնությունը: «Եվ անկախ այն բանից, թե այդ ուժերը նախընտրական շրջանում ինչ կարծիք են հայտնել միմյանց նկատմամբ, ընտրողների առաջ նրանք հանդես են եկել որպես հեղափոխության արժեքների կրող և պաշտպան: Եվ, հետևաբար, քաղաքացիների գերակշիռ մեծամասնությունն իր ձայնը տվել է հեղափոխությանը և հեղափոխության մեծագույն ձեռքբերում հանդիսացող ժողովրդավարությանը: Ուստի ցանկացած փորձ՝ այն ձայները կիսելու, ապապետական, կոռումպացված, հակաժողովրդավարական ուժերի հետ, կնշանակի քաղաքացիների տված քվեի բռնազավթում հակաժողովրդավարական ուժերի կողմից»,-ասաց նա՝ վստահեցնելով, որ «Քաղաքացիական պայմանագիր» խմբակցությունը երբեք նման քայլի գնալ չէր կարող: Խմբակցության դիրքորոշումն այն է, որ ընտրությունների արդյունքներով հեղափոխությանը տրված վստահության քվեն պետք է արտահայտվի: Ավինյանը դա կարևորեց ոչ միայն հեղափոխությանը քվեարկած ընտրողների ձայները հակահեղափոխության դիրքերից հանդես եկողների, ՀՀ անկախությունն ու ինքնիշխանությունը կասկածի տակ դնողների նպատակներին չծառայեցնելու, այլ նաև Երևանում սկիզբ առած լայնածավալ կապիտալ ներդրումների, բարեփոխումների բնականոն ընթացքն ապահովելու համար: Նա սա կարևորեց նաև ՀՀ պետականության շուրջ համախմբվելու, Երևանը արտաքին աշխարհից թելադրվող անկայունության թատերաբեմ չդարձնելու տեսակետից: Տիգրան Ավինյանի խոսքով «Քաղաքացիական պայմանագիր» խմբակցությունը երբեք չի խուսափել արտահերթ ընտրություններից, և ընդունել է այն արդյունքները, որոնք ձևավորվել են քաղաքացիների ազատ կամարտահայտման արդյունքում: «Երկրում ստեղծված իրավիճակը, հազարավոր մեր հայրենակիցների՝ Լեռնային Ղարաբաղից բռնի տեղահանումը, բոլորիս պետք է համախմբի ամեն կերպ նրանց աջակցելու, նրանց կարիքները հոգալու և սատարելու գործում: Իսկ նոր ընտրությունները, այս փուլում համենայն դեպս, ոչնչով չէին նպաստելու դրան։ Ավելին՝ շիկացնելու էին առանց այն էլ առկա լարված մթնոլորտը: Այժմ, կարծում եմ, ոչ թե քարերը նետելու, այլ հավաքելու ժամանակն է»,- ասաց Ավինյանը։ Երևանի ավագանու նոր ընտրություններ անցկացնելու առաջարկով հանդես էին եկել «Ազգային առաջընթաց» կուսակցությունը և «Մայր Հայաստան» դաշինքը։ Նրանք ընդդիմադիր մյուս ուժերին կոչ էին անում չմասնակցել Երևանի ավագանու առաջին նիստին, քվորում չապահովել, որպեսզի նոր ընտրություններ նշանակվեն։ Սակայն «Հանրային ձայն» կուսակցությունը մասնակցեց նիստին և ապահովեց քվորում։ Երևանի քաղաքապետի միակ թեկնածուն «Քաղաքացիական պայմանագիր» կուսակցության ներկայացուցիչ Տիգրան Ավինյանն է։ Երևանի ավագանու ընտրություններն անցկացվել էին սեպտեմբերի 17-ին: Ընտրություններում մասնակից 14 քաղաքական ուժերից անցողիկ շեմը հաղթահարել է 5-ը: Անցողիկ շեմը հաղթահարած ուժերն են «Քաղաքացիական պայմանագիր» կուսակցությունը, «Ազգային առաջընթաց» կուսակցությունը, «Մայր Հայաստան» դաշինքը, «Հանրային ձայն» կուսակցությունը և «Հանրապետություն» կուսակցությունը։

11:23 - 10 հոկտեմբերի, 2023

Այն մեխանիզմները, որոնցում կա ՀՀ-ն, գործոն չեն և Հայաստանը պետք է մտածի՝ ինչպես ամրապնդել իր անվտանգությունը․ Խանդանյան |azatutyun.am|

azatutyun.am: Այն մեխանիզմները, որոնցում կա Հայաստանի Հանրապետությունը, գործոն չեն, և այս առնչությամբ Հայաստանը պետք է մտածի և հասկանա, թե ինչպես պետք է ամրապնդի իր անվտանգությունն ու անվտանգային մեխանիզմները, «Ազատության» հետ զրույցում հայտարարեց խորհրդարանի իշխող «Քաղաքացիական պայմանագիր» խմբակցության պատգամավոր Սարգիս Խանդանյանն՝ անդրադառնալով վարչապետ Նիկոլ Փաշինյանի վերջին հայտարարությանը։ Երեկ վարչապետն իր ուղերձում, վկայակոչելով վերջին տարիներին Հայաստանի դեմ Ադրբեջանի ձեռնարկած հարձակումները, մասնավորապես, շեշտեց՝ «արտաքին անվտանգության այն համակարգերը, որոնցում ներգրավված է Հայաստանը, արդյունավետ չեն՝ ՀՀ պետական շահերի և անվտանգության տեսակետից»։ «Ազատություն»․ - Սա Հայաստանի արտաքին քաղաքական կուրսը փոխելու հայտարարությո՞ւն էր, ՀԱՊԿ-ից դուրս գալու նախապատրաստությո՞ւն։ Անվտանգային միակ դաշինքը, որում ներգրավված է Հայաստանը ու որի մասին առանց անուն տալու խոսեց վարչապետը, Ռուսաստանի առաջնորդած այդ կազմակերպությունն է։Խանդանյան․ - Սա իրողությունների արձանագրում է և մարտահրավերների արձանագրում է, որի միջով մենք անցել ենք վերջին տարիների ընթացքում, և ոչ միայն վերջին երեք տարիների ընթացքում, այլ նաև դրանից առաջ ևս, և սա նաև մեր անելիքների մասին էր։ Ինչ վերաբերվում է ՀԱՊԿ-ին և անվտանգային համակարգերին, ապա այս մասին բազմիցս է դիրքորոշում հայտնվել, որ այո՛, այն մեխանիզմները, որոնք որ առկա են և որոնցում կա Հայաստանի Հանրապետությունը, գործոն չեն, և այս առնչությամբ մենք պետք է մտածենք և հասկանանք, թե ինչպես պետք է ամրապնդենք մեր անվտանգությունը և անվտանգային մեխանիզմները, և դրանց մի քանիսին անդրադարձավ վարչապետը։ Դուք գիտեք, որ մի շատ երկրների հետ անվտանգային և պաշտպանական ոլորտների հետ կապված բանակցություններ են ընթանում, նաև արդեն արդյունքներ կան մի քանի երկրների հետ և նաև, բնականաբար, դա Հայաստանի զինված ուժերի վերազինումն է, բարեփոխումների այն օրակարգն է, որով առաջ է ընթանում Հայաստանի կառավարությունը։«Ազատություն»․ - Եթե ավելի բացենք փակագծերը՝ Դուք որոշ երկրների հետ բանակցություններից խոսեցիք, անվտանգային այլընտրանք ստեղծվե՞լ է, կարո՞ղ եք փակագծեր բացել՝ ո՞ր պետությունների հետ։ Եթե դուրս գալու հարց էլ ուղիղ չդրվի, պարոն Խանդանյան, ես նկատի ունեմ ՀԱՊԿ-ից, հասկանալի է, որ սրանից հետո Ռուսաստանի հետ հարաբերությունները դաշնակցային դժվար թե լինեն։Խանդանյան․ - Անվտանգային կոնկրետ համակարգի մասին այս պահին խոսել չենք կարող, որովհետև դա բարդ և երկարատև պրոցես է, բայց ինչ վերաբերում է երկրների հետ, որոնց հետ մենք ունենք համագործակցություն, Հնդկաստանի մասին է շատ խոսվել, Ֆրանսիայի հետ կան որոշակի շփումներ և համագործակցության արդյունքներ և այլն, բայց նորից կրկնեմ, որ ՀՀ-ի զինված ուժերի բարեփոխումն է այս իմաստով առաջնային։«Ազատություն»․ - Վարչապետն ասաց, որ «որոշ գործընկերներ անվտանգության ոլորտում Հայաստանի խոցելիությունը ի ցույց դնելու գործում ավելի ու ավելի մեծ ջանքեր են գործադրում՝ հարվածի տակ դնելով ներքին անվտանգությունն ու կայունությունը»։ Ո՞ւմ է այս մեղադրանքն ուղղված, ձեր իշխանությունը Ռուսաստանի՞ն է մեղադրում ցույցեր կազմակերպելու մեջ, իշխանության տարբեր ներկայացուցիչների անուղղակի հայտարարությունները դրա մասին են վկայում։Խանդանյան․ - Ակնհայտ է վերջին օրերին և վերջին շաբաթներին Ռուսաստանի մեր գործընկերների արած հայտարարություններն ուղղակի միջամտություն են Հայաստանի ներքին գործերին, մասնավորապես, պետական հեռուստատեսություններով հնչող խոսույթը և որոշ մեդիա դեմքեր, որոնք հաճախ արտահայտում են Ռուսաստանի պաշտոնական դիրքորոշումները, շատ ուղղակիորեն Հայաստանի քաղաքացիներին կոչ են անում դուրս գալ Հայաստանի իշխանությունների դեմ և այլն, և նաև պաշտոնական շրջանակներից են հնչում հայտարարություններ, մասնավորապես, Պետդումայի պատգամավորներ և այլն, որոնք խոսում են Հայաստանի պետականության վերացման և նման այլ գործընթացների մասին, ինչն անընդունել է։ Մեր ակնկալիքը մեր գործընկերներից՝ լինել գործընկերային ու չմիջամտել Հայաստանի ներքին գործերին և կատարել իրենց դաշնակցային պարտավորությունները, բայց, ցավոք սրտի, վերջին շրջանի զարգացումները հակառակն են ապացուցում։

13:58 - 25 սեպտեմբերի, 2023