ՆԱՏՕ

Հյուսիսատլանտյան դաշինքի կազմակերպությունը Հյուսիսատլանտյան պայմանագիրը ստորագրած անդամ-երկրների ստեղծած ռազմաքաղաքական կազմակերպությունն է, որը նպատակ է հետապնդում հավաքական անվտանգության և պաշտպանություն պարտականությունների իրականացումը։ Հիմնադրվել է 1949 թ․ ապրիլի 4-ին։ Հաճախ անվանում են ՆԱՏՕ՝ անգլերեն բառերի հապավումից։

ՆԱՏՕ-ին անդամակցում են 29 երկիր, որոնցից 27-ը եվրոպական են, երկուսը՝ հյուսիս-ամերիկյան: Հյուսիսատլանտյան դաշինքի որոշում կայացնող գլխավոր մարմինը Հյուսիսատլանտյան դաշինքի խորհուրդն է, իսկ միջազգային բարձրագույն պաշտոնյան՝ ՆԱՏՕ-ի գլխավոր քարտուղարը։

Փաշինյանը ընդունել է ՆԱՏՕ-ի գլխավոր քարտուղարի ներկայացուցչին․ քննարկվել է նաև Լաչինի միջանցքի հարցը

Վարչապետ Նիկոլ Փաշինյանն ընդունել է Կովկասում և Կենտրոնական Ասիայում ՆԱՏՕ-ի Գլխավոր քարտուղարի հատուկ ներկայացուցիչ Խավիեր Կոլոմինա Պիրիսին: Կողմերը քննարկել են Հայաստան-ՆԱՏՕ համագործակցությանը, ինչպես նաև Հարավային Կովկասում տեղի ունեցող գործընթացներին վերաբերող հարցեր: Այս մասին հայտնում են ՀՀ վարչապետի աշխատակազմից։ Նշվում է, որ վարչապետն անդրադարձել է Ադրբեջանի կողմից Լաչինի միջանցքի արգելափակման հետևանքով Լեռնային Ղարաբաղում ստեղծված հումանիտար իրավիճակին: Նիկոլ Փաշինյանը շեշտել է, որ Ադրբեջանն իր սադրիչ քայլով հերթական անգամ խախտում է 2020 թվականի նոյեմբերի 9-ի եռակողմ հայտարարությունը և կարևորել միջազգային հանրության ուշադրությունն ու հասցեական արձագանքը տեղի ունեցողին: «ՆԱՏՕ-ի Գլխավոր քարտուղարի հատուկ ներկայացուցիչը մտահոգություն է հայտնել Լաչինի միջանցքի արգելափակման հետևանքով ստեղծված իրավիճակի կապակցությամբ և կարևորել միջանցքի անխափան գործունեության ապահովումը: Խավիեր Կոլոմինան հավելել է, որ ՆԱՏՕ-ն շահագրգիռ է տարածաշրջանում կայունության և խաղաղության ապահովմամբ և իր աջակցությունն է հայտնում այդ ուղղությամբ միջազգային գործընկերների կողմից ներդրվող ջանքերին: Հանդիպմանը զրուցակիցները քննարկել են նաև երկուստեք հետաքրքրություն ներկայացնող այլ հարցեր»,- ասվում է հաղորդագրության մեջ։

16:46 - 18 հունվարի, 2023

ՆԱՏՕ-ի գլխավոր քարտուղարի ներկայացուցիչը Հայաստանում է․ նա հանդիպել է ԱԳ նախարարի տեղակալի հետ

Հունվարի 18-ին ԱԳ նախարարի տեղակալ Վահե Գևորգյանն ընդունել է Կովկասում և Կենտրոնական Ասիայում ՆԱՏՕ-ի Գլխավոր քարտուղարի հատուկ ներկայացուցիչ Խավիեր Կոլոմինա Պիրիսին: Այս մասին հայտնում են ՀՀ ԱԳՆ մամուլի ծառայությունից։ «Կողմերը քննարկել են Հայաստան-ՆԱՏՕ համագործակցության օրակարգային հարցեր, ինչպես նաև միջազգային և տարածաշրջանային անվտանգությանը վերաբերող խնդիրներ։ Նախարարի տեղակալը զրուցակցին է ներկայացրել Ադրբեջանի կողմից Լաչինի միջանցքի արգելափակման հետևանքով Լեռնային Ղարաբաղում օրեցօր վատթարացող հումանիտար իրավիճակը՝ ընդգծելով, որ Ադրբեջանն իր գործողություններով նպատակ է հետապնդում էթնիկ զտման ենթարկել ԼՂ հայությանը»,- նշված է հաղորդագրության մեջ։ Ավելի վաղ հայտնել էինք, որ Կոլոմինան ժամանելու է Երևան, սակայն օրակարգի մասին տեղեկություններ չէին հաղորդվել։ Ադրբեջանական աղբյուրների համաձայն՝ այս շաբաթ Կոլոմինան կայցելի նաև Ադրբեջան։

15:25 - 18 հունվարի, 2023

Երևան կժամանի ՆԱՏՕ-ի գլխավոր քարտուղարի ներկայացուցիչը |azatutyun.am|

azatutyun.am: Առաջիկա օրերին Երևան կժամանի Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան։ Այս մասին հայտնում են ՀՀ ԱԳՆ մամուլի ծառայությունից։ Այցի օրակարգի մասին մանրամասներ չեն հաղորդվում։ Ադրբեջանական աղբյուրների համաձայն՝ այս շաբաթ Կոլոմինան կայցելի նաև Ադրբեջան։ «Այցի ընթացքում հատուկ ներկայացուցիչը բարձրաստիճան պաշտոնյաների հետ մտքեր կփոխանակի անվտանգության ոլորտում տարածաշրջանում տեղի ունեցող զարգացումների և այդ երկրների հետ ՆԱՏՕ-ի գործընկերության վերաբերյալ»,- այս մասին, հղում անելով ադրբեջանական պաշտոնական աղբյուրների, հայտնում է ադրբեջանական ԱՊԱ գործակալությունը:

16:48 - 17 հունվարի, 2023

Արևմուտքի և Ռուսաստանի միջև հարաբերությունների կարգավորում տեղի չի ունենա նույնիսկ Ուկրաինայում կարգավորումից հետո. Ստոլտենբերգ |tert.am|

tert.am: ՆԱՏՕ-ի գլխավոր քարտուղար Յենս Ստոլտենբերգը կարծիք է հայտնել, որ արևմտյան երկրների և Ռուսաստանի միջև հարաբերությունների կարգավորումը տեղի չի ունենա նույնիսկ ուկրաինական հակամարտության ավարտից հետո։ Համապատասխան հայտարարությունը նա արել է գերմանական Handelsblatt թերթին տված հարցազրույցում, գրում է РИА Новости-ն:«Նախկինի պես չի լինի. եթե անգամ Ուկրաինայում զենքերը լռեն, չպետք է ակնկալել, որ մեր հարաբերությունները Ռուսաստանի հետ կկարգավորվեն»,- ասել է գլխավոր քարտուղարը։ Ավելի վաղ ՌԴ ԱԳ նախարար Սերգեյ Լավրովն էլ հայտարարել էր, որ Ռուսաստանի և Արևմուտքի հարաբերությունները չեն վերականգնվի նախկին մակարդակին։ Ռուսական գործակալության փոխանցմամբ՝ ՆԱՏՕ-ի գլխավոր քարտուղարը նաև հայտարարել է, որ Ուկրաինայում պատերազմը վճռորոշ փուլում է։ «Մենք պատերազմի վճռորոշ փուլում ենք»,- ասել է գլխավոր քարտուղարը՝ ընդգծելով, որ «կատաղի մարտեր» են ընթանում։ Միաժամանակ Ստոլտենբերգը կարծիք է հայտնել, որ Կիևի ռազմական աջակցությունը «խաղաղության ամենաարագ ճանապարհն է»։ Ստոլտենբերգը կարծում է, որ արևմտյան երկրները շուտով կավելացնեն ծանր սպառազինության մատակարարումները Ուկրաինա: Նրա խոսքով՝ ՆԱՏՕ-ի դաշնակիցները գիտեն, որ Ուկրաինային անհրաժեշտ են այնպիսի մարտական տանկեր, ինչպիսին գերմանական Leopard 2-ն է։ «Եվ դա կլինի այն թեմաներից մեկը, որը մենք կքննարկենք Ռամշտեյնում (ամերիկյան ավիաբազա Գերմանիայում): Ուկրաինան ներկայացված կլինի այնտեղ: Ծանր զինտեխնիկա տրամադրելու վերջին խոստումները շատ կարևոր են, և ես առաջիկայում ավելին եմ սպասում»,- ասել է դաշինքի գլխավոր քարտուղարը։ «Մենք կատաղի մարտեր ենք ապրում: Ուստի կարևոր է, որ Ուկրաինային տրամադրենք հաղթանակի և անկախ պետության գոյության շարունակման համար անհրաժեշտ զենքերը: Դա կարող է պարադոքսալ թվալ, բայց Ուկրաինային ռազմական աջակցությունը խաղաղության ամենաարագ ճանապարհն է», - ասել է ՆԱՏՕ-ի գլխավոր քարտուղարը։ Ռուսաստանը նախկինում նոտա է հղել ՆԱՏՕ-ի երկրներին՝ Ուկրաինային զենք մատակարարելու պատճառով։ Ռուսաստանի արտգործնախարար Սերգեյ Լավրովը նշել է, որ ցանկացած բեռ, որը զենք է պարունակում Ուկրաինայի համար, օրինական թիրախ կդառնա Ռուսաստանի համար։ ՌԴ ԱԳՆ-ն հայտարարել է, որ ՆԱՏՕ-ի երկրները «կրակի հետ են խաղում»՝ զենք մատակարարելով Ուկրաինային։

09:21 - 16 հունվարի, 2023

Պատրաստվում ենք շարունակել ՆԱՏՕ-ին Շվեդիայի և Ֆինլանդիայի անդամակցության գործընթացը. ԱՄՆ Պետդեպ |news.am|

news.am: Մենք անհամբեր սպասում ենք Շվեդիայի և Ֆինլանդիայի անդամակցությանը ՆԱՏՕ-ին, և մենք պատրաստվում ենք շարունակել գործընթացը։ Այս մասին ճեպազրույցի ժամանակ հայտարարել է ԱՄՆ Պետդեպարտամենտի մամուլի քարտուղարի տեղակալ Վեդան Փաթելը։ «Ընդամենը մի քանի օր առաջ Թուրքիայի նախագահի խրտվիլակը կախվել է Շվեդիայի մայրաքաղաքի քաղաքապետարանի առջև։ Նույնիսկ Շվեդիայի վարչապետն ասաց, որ դա չափազանց լուրջ է և ՆԱՏՕ-ին իրենց դիմումի սաբոտաժ է: Երեկ նույն ամբիոնից մեր գործընկեր Նեդ Փրայսը հայտարարեց, որ Շվեդիան պատրաստ է անդամակցել ՆԱՏՕ-ին։ Բայց չե՞ք կարծում, որ հաշվի առնելով վերջին իրադարձությունները՝ Շվեդիան դեռ որոշակի ճանապարհ ունի անցնելու, երբ խոսքը վերաբերում է իր տարածքում ահաբեկչությունն արմատախիլ անելուն»,- ասել է Փաթելը։ Նա նշել է, որ Թուրքիան բախվում է «անվտանգության շատ բարդ միջավայրի»։ «Եվ ինչպես մենք արդեն ասել ենք ավելի վաղ, Թուրքիան ՆԱՏՕ-ի մեր դաշնակիցներից մեկն է, որը բախվում է ամենամեծ թվով ահաբեկչական հարձակումների։ Ինչ վերաբերում է այս կոնկրետ միջադեպին, ապա ես ծանոթ չեմ դրան, ուստի թույլ կտամ ինձ նկատել, որ այն խորը տագնապ է առաջացնում։ Բայց ես կցանկանայի կրկնել Փրայսի խոսքերն այն մասին, որ մենք, իհարկե, անհամբերությամբ սպասում ենք Շվեդիայի և Ֆինլանդիայի անդամակցությանը ՆԱՏՕ-ին և պատրաստվում ենք շարունակել գործընթացը»,- հավելել է նա։ Հիշեցնենք, որ Ֆինլանդիան և Շվեդիան Թուրքիայի հետ եռակողմ համաձայնագիր են ստորագրել 2022 թվականին, որի նպատակն է հաղթահարել Անկարայի առարկությունները Հյուսիսատլանտյան դաշինքին իրենց անդամակցության վերաբերյալ։ Մայիսին նրանք դիմել են ՆԱՏՕ-ին անդամակցելու համար, սակայն Թուրքիան դեմ է արտահայտվել և մեղադրել է երկրներին «ահաբեկիչներին» ապաստանելու մեջ։ Խնդիրն այն մարդկանց արտահանձնումն է, ում Թուրքիան համարում է ահաբեկիչներ։ Անկարան հիասթափություն է հայտնել անցյալ տարվա վերջին շվեդական դատարանի որոշման առնչությամբ՝ դադարեցնելու լրագրողի արտահանձնման հարցումը, ով կասկածվում է իսլամական հասարակական գործիչ Ֆեթուլլահ Գյուլենի հետ կապեր ունենալու մեջ, ում Թուրքիան մեղադրում է հեղաշրջման փորձի մեջ։

10:51 - 14 հունվարի, 2023

Քրդստանի աշխատավորական կուսակցությունը «ական է դնում ՆԱՏՕ-ին Շվեդիայի անդամակցության տակ». Չավուշօղլու |tert.am|

tert.am: Թուրքիայի արտգործնախարար Մևլութ Չավուշօղլուն ասել է, որ Անկարան չի աջակցի Շվեդիայի անդամակցությանը ՆԱՏՕ-ին, քանի դեռ Ստոկհոլմը «վճռական միջոցներ չի ձեռնարկել»՝ հակազդելու Քրդստանի աշխատավորական կուսակցությանը (PKK), որը Թուրքիայում ճանաչված է որպես ահաբեկչական կազմակերպություն։ Այս մասին Չավուշօղլուն ասել է TRT հեռուստաալիքի եթերում։ Թուրք նախարարը նշել է, որ Քրդստանի աշխատավորական կուսակցությունը «ական է դնում Հյուսիսատլանտյան դաշինքին Շվեդիայի անդամակցության տակ»։ «Եթե Շվեդիայի կառավարությունը պատշաճ կերպով չարձագանքի նման գործողություններին, մենք չենք տա այն պատասխանը, որին սպասում է Շվեդիան ՆԱՏՕ-ին իր անդամակցության հարցում։ Շվեդիան պետք է կատարի իր ընտրությունը»,- ասել է նա։ Թուրքիայի ԱԳՆ ղեկավարը նշել է, որ Անկարան սպասում է, որ Ստոկհոլմը կատարի ահաբեկչական կազմակերպությունների գործունեությանը հակազդելու մասին իր հետ ստորագրված հուշագիրը։ Դա Թուրքիայի կողմից պայման է դաշինքին միանալու հարցով Շվեդիայի դիմումի հաստատման համար։ Այս փաստաթուղթը ստորագրվել է անցած հունիսին՝ Մադրիդում ՆԱՏՕ-ի գագաթնաժողովի շրջանակում։

10:45 - 13 հունվարի, 2023

ԵՄ-ն և ՆԱՏՕ-ն պայմանավորվել են ամրապնդել համագործակցությունը Ուկրաինայի հակամարտության պատճառով |tert.am|

tert.am: Եվրամիությունը և Հյուսիսատլանտյան դաշինքը նախատեսում են ակտիվացնել համագործակցությունը ուկրաինական ճգնաժամի սրման պատճառով։ «ՆԱՏՕ-ն մնում է դաշնակիցների հավաքական պաշտպանության ողնաշարը և կարևոր նշանակություն ունի եվրատլանտյան անվտանգության համար: Մենք գիտակցում ենք ավելի ուժեղ և արդյունավետ եվրոպական պաշտպանության արժեքը, որը դրական ներդրում է ունենում գլոբալ և անդրատլանտյան անվտանգության մեջ», - ասված է համատեղ հայտարարության մեջ: Հունվարի 10-ին Հյուսիսատլանտյան դաշինքի գլխավոր քարտուղար Յենս Սթոլթենբերգը, Եվրոպական խորհրդի նախագահ Շառլ Միշելը և Եվրահանձնաժողովի նախագահ Ուրսուլա ֆոն դեր Լեյենը ստորագրելու են երկու կազմակերպությունների միջև կապերի ամրապնդման համաձայնագիրը։

09:56 - 10 հունվարի, 2023

ՆԱՏՕ-ում Ադրբեջանի ներկայացուցչությունը մեղադրել է Երևանին Լաչինի ճանապարհի շուրջ իրավիճակի համար |azatutyun.am|

azatutyun.am: ՆԱՏՕ-ում Ադրբեջանի ներկայացուցչությունը մեղադրել է Երևանին Լաչինի ճանապարհի շուրջ ստեղծված իրավիճակի համար՝ ասելով, թե «Հայաստանը հուսահատության մեջ է Լաչինի ճանապարհն իր անօրինական գործունեության համար օգտագործելու անկարողության պատճառով»: «Հայաստանը բազմաթիվ կեղծ պատմություններ է քարոզում՝ տեղում իրականությունը խեղաթյուրելու համար… Հասկանալի է, թե ինչու է Հայաստանն այդքան հուսահատ, որովհետև Լաչինի ճանապարհն այլևս հասանելի չէ իր անօրինական գործողությունների համար»,- ասվում է առաքելության Twitter-ի միկրոբլոգում տեղադրված հայտարարության մեջ։ Ինչպես փոխանցում է Interfax-Azerbaijan-ը, ՆԱՏՕ-ում երկրի ներկայացուցչությունը հայտարարել է, որ «Լաչինի ճանապարհը Ադրբեջանի ինքնիշխան տարածքն է, որը համաձայնել է օգտագործել բացառապես մարդասիրական նպատակներով՝ համաձայն եռակողմ հայտարարության վեցերորդ կետի, և նույնիսկ ավելի քիչ, քան երկու տարի ժամանակում շահագործման հանձնեց նոր ճանապարհը»: «Ադրբեջանը բարեխղճորեն կատարել է իր բոլոր պարտավորությունները, իսկ Հայաստանը առաջին օրերից օգտագործում է Լաչինի ճանապարհը անօրինական գործունեության համար։ Հայաստանը նույնպես չի բացել բոլոր տրանսպորտային հաղորդակցությունները տարածաշրջանում, ինչը եռակողմ հայտարարության 9-րդ կետի կոպիտ խախտում է»,- ընդգծել է ՆԱՏՕ-ում առաքելությունը։ «Հայաստանն օգտագործել է Լաչինի ճանապարհը զենքի և անձնակազմի ապօրինի տեղափոխման համար»,- ասվում է հայտարարության մեջ։ 2022 թվականի դեկտեմբերի 12-ից Ադրբեջանը փակել է Արցախը Հայաստանին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում Հայաստանից վերադառնալ Արցախ։ Շրջափակման պատճառով Հայաստանից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս: 350 հիվանդ չի կարողանում բուժում ստանալ Հայաստանում: 13 երեխա գտնվում է նորածնային և վերակենդանացման բաժանմունքներում, 13 բուժառու՝ վերակենդանացման բաժանմունքում․ 6-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 13 հայ և 4 օտարերկրացի է միայն Կարմիր խաչի միջնորդությամբ տեղափոխվել Հայաստան, իսկ Արցախում բուժօգնության կարիք ունեցող և ծանր վիճակում գտնվող հիվանդներից մեկը մահացել է:

12:06 - 09 հունվարի, 2023

Շվեդիան չի կարող կատարել բոլոր պայմանները, որոնք առաջ է քաշել Անկարան. վարչապետ |azatutyun.am|

azatutyun.am: Շվեդիան վստահ է, որ Թուրքիան կհաստատի ՆԱՏՕ-ին անդամակցելու իր հայտը, սակայն չի կարող կատարել բոլոր այն պայմանները, որոնք առաջ է քաշել Անկարան։ Այս մասին հայտարարել է Շվեդիայի վարչապետ Ուլֆ Քրիսթերսոնը, փոխանցում է Reuters-ը։ «Թուրքիան հաստատում է, որ մենք արել ենք այն, ինչ խոստացել ենք անել, բայց նրանք նաև ասում են, որ ցանկանում են այն, ինչ մենք չենք կարող կամ չենք ուզում տալ»,- ասել է Քրիստերսոնը: Ֆինլանդիան և Շվեդիան Թուրքիայի հետ եռակողմ համաձայնագիր են ստորագրել 2022 թվականին, որի նպատակն է հաղթահարել Անկարայի առարկությունները Հյուսիսատլանտյան դաշինքին իրենց անդամակցության վերաբերյալ։ Մայիսին նրանք դիմել են ՆԱՏՕ-ին անդամակցելու համար, սակայն Թուրքիան դեմ է արտահայտվել և մեղադրել է երկրներին «ահաբեկիչներին» ապաստանելու մեջ։ Խնդիրն այն մարդկանց արտահանձնումն է, ում Թուրքիան համարում է ահաբեկիչներ։ Անկարան հիասթափություն է հայտնել անցյալ տարվա վերջին շվեդական դատարանի որոշման առնչությամբ՝ դադարեցնելու լրագրողի արտահանձնման հարցումը, ով կասկածվում է իսլամական հասարակական գործիչ Ֆեթուլլահ Գյուլենի հետ կապեր ունենալու մեջ, ում Թուրքիան մեղադրում է հեղաշրջման փորձի մեջ։

18:39 - 08 հունվարի, 2023

Իրանը չի ընդունի ներկայիս սահմանների որևէ փոփոխություն, տարածաշրջանային անվտանգությունը պետք է պահպանվի. Այաթոլլա Խամենեիի միջազգային հարցերով ավագ խորհրդական |tert.am|

tert.am: Իրանի Իսլամական հեղափոխության առաջնորդ այաթոլլա Սեյեդ Ալի Խամենեիի միջազգային հարցերով ավագ խորհրդականը վերահաստատել է Թեհրանի բացահայտ դեմ լինելը տարածաշրջանի քաղաքական աշխարհագրության ցանկացած փոփոխության: Այդ մասին Ալի Աքբար Վելայաթին ասել է Թեհրանում Ռուսաստանի Պետդումայի նախկին պատգամավոր Սերգեյ Նիկոլաևիչ Բաբուրինի հետ հանդիպմանը, գրում է Tasnim գործակալությունը:Հարավկովկասյան տարածաշրջանում տեղի ունեցող զարգացումների վերաբերյալ Վելայաթին, կրկնելով այաթոլլահ Խամենեիի խոսքերը, ասել է.«Իրանի Իսլամական Հանրապետությունը չի ընդունի ներկայիս սահմանների որևէ փոփոխություն։ Անկասկած, տարածաշրջանային անվտանգությունը պետք է պահպանվի»։Նա նաև մատնանշել է Ուկրաինայի պատերազմը՝ ասելով, որ ԱՄՆ-ն և ՆԱՏՕ-ն բախումների տարածման գլխավոր մեղավորներն են։«Ժամանակակից աշխարհն այլևս միաբևեռ չէ։ Անկախ պետությունների համար չափազանց կարևոր է զգույշ լինել տարածաշրջան իրենց (արևմտյան) ներթափանցման հարցում», - ասել է նա:

12:03 - 06 հունվարի, 2023

Արևմտյան երկրները պետք է պատրաստ լինեն երկարաժամկետ աջակցություն ցուցաբերել Ուկրաինային. Ստոլտենբերգ |azatutyun.am|

azatutyun.am: ՆԱՏՕ-ի գլխավոր քարտուղարն ասել է, որ արևմտյան երկրները պետք է պատրաստ լինեն երկարաժամկետ աջակցություն ցուցաբերել Ուկրաինային, քանի որ Ռուսաստանը զիջման նշաններ ցույց չի տալիս։ Յենս Ստոլտենբերգը BBC-ին ասել է, որ ռազմական աջակցությունը կապահովի Ուկրաինայի՝ որպես ինքնիշխան երկրի գոյատևումը և կստիպի Ռուսաստանին նստել և բանակցել պատերազմի ավարտի մասին։ Ռուսաստանի առաջնորդը մեղադրում է Արևմուտքին Ուկրաինային իր երկիրը ոչնչացնելու համար օգտագործելու մեջ։ «Ուկրաինական ուժերը մի քանի ամսվա ընթացքում ունեին թափ, բայց մենք նաև գիտենք, որ Ռուսաստանը շատ ավելի շատ ուժեր է մոբիլիզացրել, նրանցից շատերն այժմ մարզվում են,- ասել է Ստոլտենբերգը՝ նշելով,- այդ ամենը վկայում է այն մասին, որ նրանք պատրաստ են շարունակել պատերազմը, ինչպես նաև փորձում են պոտենցիալ նոր հարձակում սկսել»: Ավելի վաղ ՌԴ նախագահ Վլադիմիր Պուտինը հանդես է եկել ամանորյա ելույթով՝ ասելով, որ վտանգված է երկրի ապագան։ Ուկրաինայի նախագահ Վլադիմիր Զելենսկին Պուտինին մեղադրել է իր զորքերի հետևում թաքնվելու և ոչ թե դրանք ղեկավարելու մեջ։

12:59 - 02 հունվարի, 2023

Կիևին զենքի մատակարարումները «խաղաղության ամենակարճ ճանապարհն են». ՆԱՏՕ-ի գլխավոր քարտուղար |armenpress.am|

armenpress.am: ՆԱՏՕ-ի գլխավոր քարտուղար Յենս Ստոլտենբերգը կարծում է, որ դաշինքի երկրների կողմից Ուկրաինային զենքի մատակարարումներն արագ զինադադարի կհանգեցնեն։ Այս մասին տեղեկանում ենք Europa Press լրատվամիջոցից: «Կարող է պարադոքսալ հնչել, բայց Ուկրաինային ռազմական աջակցությունը խաղաղության հասնելու ամենակարճ ճանապարհն է»,- ասել է Ստոլտենբերգը DPA գործակալությանը տված հարցազրույցում: Ստոլտենբերգի խոսքով՝ որպես անկախ ժողովրդավարական երկիր Ուկրաինայի գերակայության և բանակցություների միջոցով խաղաղ լուծման հասնելու համար հարկավոր է զենք մատակարարել Կիևին, քանի որ «դա միակ միջոցն է՝ ցույց տալու ՌԴ նախագահ Վլադիմիր Պուտինին, նա չի կարող հասնել Ուկրաինայի հանդեպ վերահսկողություն հաստատելու իր նպատակներին»։ Ստոլտենբերգը նաև նշել է, որ պատերազմներն անկանխատեսելի են, սակայն հարկավոր է պատրաստվել երկարատև պատերազմի և Ռուսաստանի կողմից նոր հարձակումների:«Մենք չպետք է թերագնահատենք Ռուսաստանին»,- հավելել է ՆԱՏՕ-ի գլխավոր քարտուղարը:Նա նաև նշել է, որ պատերազմի ավարտը չի նշանակում, որ ամեն ինչ կվերադառնա նորմալ հուն:«Թե ինչ տեսակի հարաբերություններ կլինեն Ռուսաստանի հետ ապագայում, կախված կլինի Ռուսաստանի վարքից»,- ասել է Ստոլտենբերգը: Միևնույն ժամանակ անդրադառնալով վերջին շրջանում Ուկրաինայի կողմից Ռուսաստանի տարածքում ռազմական թիրախների վրա հարձակումներին՝ Ստոլտենբերգն ասել է, որ Ուկրաինան ինքնապաշտպանվելու իրավունք ունի, ինչն ամրագրված է ՄԱԿ-ի կանոնադրությամբ:

14:13 - 30 դեկտեմբերի, 2022

ԱՄՆ-ն և ՆԱՏՕ-ն ցանում են ռազմի դաշտում հաղթել Ռուսաստանին՝ նրան ոչնչացնելու համար. Լավրով |tert.am|

tert.am: Ռուսաստանի Դաշնության արտաքին գործերի նախարար Սերգեյ Լավրովը կարծում է, որ ԱՄՆ-ն և ՆԱՏՕ-ի նրա դաշնակիցները ցանկանում են ռազմի դաշտում հաղթել Ռուսաստանին, որպեսզի ոչնչացնեն նրան։ Այս մասին նա ասել է ՏԱՍՍ-ին տված հարցազրույցում։ ՌԴ ԱԳՆ ղեկավարի խոսքով՝ արևմտյան երկրների և նրանց վերահսկողության տակ գտնվող Ուկրաինայի նախագահ Վլադիմիր Զելենսկու գործողությունները հաստատում են ուկրաինական ճգնաժամի գլոբալ բնույթը։ «Այլևս ոչ մեկի համար գաղտնիք չէ, որ ԱՄՆ-ի և ՆԱՏՕ-ի նրա դաշնակիցների ռազմավարական նպատակը Ռուսաստանին մարտի դաշտում հաղթելն է՝ որպես մեր երկիրը էականորեն թուլացնելու կամ նույնիսկ ոչնչացնելու մեխանիզմ»,- ասել է Լավրովը։Նրա կարծիքով՝ այդ նպատակին հասնելու համար Ռուսաստանի Դաշնության հակառակորդները «շատ բանի են պատրաստ»։

10:26 - 27 դեկտեմբերի, 2022

Ուղիղ քննարկումներում մենք կոնկրետ մեխանիզմ կամ ֆորմալ դեր չունենք․ ՆԱՏՕ-ի ներկայացուցիչը՝ հայ-ադրբեջանական հարաբերությունների կարգավորման գործընթացի մասին

Ես իսկապես ողջունում եմ բոլոր կառուցողական ջանքերը, որոնք նպաստում են կարգավորման գործընթացին։ Այս մասին ադրբեջանական APA գործակալության հետ զրույցում ասել է ՆԱՏՕ-ի գլխավոր քարտուղարի՝ Կովկասում և Կենտրոնական Ասիայում հատուկ ներկայացուցիչ Խավիեր Կոլոմինան։ «Ես նաև ողջունում եմ Եվրոպական միության կենտրոնական դերն այս հարցում։ Ես հավատում եմ, որ ՆԱՏՕ-ն կարող է աջակցող դեր խաղալ երկու մայրաքաղաքների միջև քաղաքական երկխոսության միջոցով վստահության ձևավորման գործում: Սակայն ուղիղ քննարկումներում մենք կոնկրետ մեխանիզմ կամ ֆորմալ դեր չունենք»,- ասել է Ստոլտենբերգի հատուկ ներկայացուցիչը։ Կոլոմինան նաև հավելել է, որ իերնք կշարունակեն աջակցել բոլոր դիվանագիտական ջանքերին, որոնք ուղղված են կարգավորման գործընթացի առաջխաղացմանը։

17:46 - 19 դեկտեմբերի, 2022

Անդրանիկ Քոչարյանը ՆԱՏՕ-ի ԽՎ պետությունների գործընկերներին կոչ է արել Ադրբեջանի սադրիչ գործողությունները դատապարտող քայլեր ձեռնարկել

Դեկտեմբերի 14-ին ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը գրությունով դիմել է ՆԱՏՕ-ի ԽՎ անդամ պետությունների իր գործընկերներին` ներկայացնելով Ադրբեջանի կողմից իրականացվող սադրիչ գործողությունները և կոչ արել համապատասխան քայլեր ձեռնարկել նմանօրինակ գործողությունները դատապարտելու վերաբերյալ:

10:56 - 14 դեկտեմբերի, 2022

ՀՀ ՊՆ պատվիրակությունը մասնակցել է ՆԱՏՕ-ի միջազգային համաժողովի

Դեկտեմբերի 8-ից 9-ը ՀՀ պաշտպանության նախարարության գլխավոր քարտուղար Համլետ Բատիկյանի գլխավորած պատվիրակությունը Բրյուսելում մասնակցել է ՆԱՏՕ-ի «Զինված ուժերում բարեվարքության կերտման դերը ժողովրդավարական արժեքների պաշտպանության և հասարակական ու ինստիտուցիոնալ դիմակայունության ամրապնդման գործում» խորագրով միջազգային համաժողովին։ Այս մասին հայտնեցին ՀՀ պաշտպանության նախարարությունից: Համաժողովին մասնակցել են ՆԱՏՕ-ի անդամ և գործընկեր երկրների պաշտպանական գերատեսչություններում բարեվարքության ամրապնդման, կոռուպցիայի դեմ պայքարի և մարդու իրավունքների պաշտպանության համար պատասխանատու կառուցների ղեկավարներ, միջազգային կազմակերպությունների և առաջատար փորձագիտական կենտրոնների ներկայացուցիչներ։ Ներկայացվել ու քննարկվել են տարբեր երկրների զինված ուժերում բարեվարքության ամրապնդման լավագույն փորձը, առկա խնդիրները և դրանց լուծման համակարգային մոտեցումները։ Բրյուսելում ՀՀ ՊՆ գլխավոր քարտուղար Համլետ Բատիկյանը նաև երկկողմ հանդիպումներ է ունեցել ՆԱՏՕ-ի բարեվարքության կերտման ծրագրի ղեկավարության հետ։ Պայմանավորվածություն է ձեռք բերվել համատեղ ծրագրերի ակտիվացման ուղղությամբ, վերահաստատվել է հաջորդ տարվա միջոցառումների ցանկը։ ՊՆ գլխավոր քարտուղարը ծրագրի ղեկավարությանը և փորձագետներին հրավիրել է Հայաստան՝ անձնակազմի կառավարման, ֆինանսական պլանավորման, աուդիտի և գնումների համակարգի ռիսկային հարցերի վերհանման և դրանց չեզոքացման համալիր գործողությունների մշակման վերաբերյալ տեղում անհրաժեշտ խորհրդատվություն ստանալու նպատակով։

13:29 - 09 դեկտեմբերի, 2022