Ճապոնիա

Կղզեխմբային ինքնիշխան միապետություն է, որը գտնվում է Արեւելյան Ասիա տարածաշրջանում։ Այն Խաղաղ օվկիանոսի արեւմտյան ափին է՝ զբաղեցնելով Ասիա աշխարհամասի արեւելյան ծովափը, տարածվելով Օխոտի ծովից մինչեւ Արեւելաչինական ծով, Չինաստանի Ժողովրդական Հանրապետության հարավը։

Ըստ չինական եւ ճապոնական գաղափարագրերի` Ճապոնիա անունը նշանակում է «արեւի ծագում» կամ «ծագող արեւի երկիր»։ Ճապոնիան կազմված է մոտ 6,852 հրաբխային ծագման կղզիներից։ Առավել խոշոր չորս կղզիներն են Հոնսյուն, Հոկայդոն, Սիկուկուն եւ Կյուսուն, որոնք զբաղեցնում են Ճապոնիայի ցամաքային տարածքի մոտ իննսունյոթ տոկոսը։

Բնակչության թվաքանակով աշխարհում տասներորդն է՝ մոտ 127 մլն մարդ։ Բնակչության կազմը միատարր է․ ճապոնացիները կազմում են Ճապոնիայի ամբողջ բնակչության 98.5 %-ը։ Մայրաքաղաքի՝ Տոկիոյի բնակչությունը կազմում է մոտ 9,1 մլն մարդ։

Ադրբեջանն ու Թուրքիան պետք է պատասխանատվության ենթարկվեն․ Ճապոնիայում Ռուստամ Բադասյանը ներկայացրել է Արցախում կատարված ռազմական հանցագործությունները

Արդարադատության նախարար Ռուստամ Բադասյանը 2021 թվականի մարտի 5-ից 11-ը Ճապոնիայի Կիոտո քաղաքում է։ Նախարարը մասնակցում է ՄԱԿ-ի Հանցավորության կանխարգելման և քրեական արդարադատության 14-րդ կոնգրեսին (UNODC)։ Այս մասին տեղեկացնում է ՀՀ Արդարադատության նախարարությունը: Վերջինին մասնակցում են նաև Արտաքին գործերի նախարարի տեղակալ Արտակ Ապիտոնյանը և ԱՆ քրեական օրենսդրության, քրեակատարողական և պրոբացիայի ոլորտի քաղաքականության մշակման վարչության պետ Արփինե Սարգսյանը։ Մարտի 7-ի ելույթում նախարար Բադասյանը շնորհակալություն է հայտնել Ճապոնիային և UNODC-ի քարտուղարությանը միջոցառումը կազմակերպելու համար և նշել, որ ՄԱԿ-ի այս հարթակը լավ հնարավորություն է կառավարությունների համար քննարկելու հանցագործությունների կանխարգելման և քրեական արդարադատության խնդիրների վերհանման, ինչպես նաև անհրաժեշտ մեխանիզմներ և գործիքակազմեր ներդնելու հարցերը։ Նախարարի խոսքով՝ 2018 թվականի թավշյա հեղափոխությունից ի վեր Հայաստանը նոր վճռականությամբ է ձեռնամուխ եղել բարեփոխումների հավակնոտ օրակարգի իրականացմանը և զգալի առաջընթաց է արձանագրել օրինականության մշակույթը խթանելու և հանցագործությունների կանխարգելման ու քրեական արդարադատության օրենսդրական շրջանակները բարելավելու հարցերում: Անդրադառնալով դատաիրավական բարեփոխումների գործընթացին՝ Ռուստամ Բադասյանն ընդգծել է, որ առաջնային նպատակը դատական համակարգի անկախությունն ապահովելն ու համակարգի նկատմամբ հասարակության վստահությունը ամրապնդելն է՝ դատավորների բարեվարքության ստուգման հավասարակշռված մեխանիզմների և այլ գործիքների ներդրման միջոցով։ Խոսելով Կառավարության օրակարգի մյուս առաջնահերթությունից՝ կոռուպցիայի դեմ պայքարից, ՀՀ արդարադատության նախարարը ներկայացրել է Ռազմավարությամբ նախատեսված ինստիտուցիոնալ լուծումները՝ ուղղված կանխարգելմանը, քննությանն ու կրթությանը, այնուհետև անդրադարձել է քրեական արդարադատության բարեփոխումներին՝ նշելով, որ դրանց հիմքում մարդակենտրոն և մարդասեր մոտեցումն է՝ պատժողական քաղաքականությունից վերականգնողական արդարադատության անցնելը, որը և արտացոլված է Քրեական և Քրեական դատավարության նոր օրենսգրքերի նախագծերում։ Որպես հանցավորության դեմ պայքարի առանցքային ուղղություն՝ նախարարն առանձնացրել է նաև քրեական ենթամշակույթի բացասական ազդեցությունը վերացնելու հասարակական պահանջով պայմանավորված քրեական տարրերի դեմ պայքարն ու այդ նպատակով իրականացված օրենսդրական փոփոխությունները։ Նախարար Բադասյանը հատուկ անդրադարձել է նաև ատելության խոսքի հիմնախնդիրներին և նշել, որ այս հարցը արդիական է Հայաստանի համար, քանի որ իր էթնիկ, կրոնական և մշակութային ինքնության հանդեպ անհանդուրժողականության պատճառով ողջ պատմության ընթացքում հայ ժողովուրդը խտրականության, հետապնդումների, ատելության հիմքով հանցագործությունների և ցեղասպանության զոհ է դարձել: «Այս համատեքստում Հայաստանի պատվիրակությունը նախաձեռնել է Կիոտոյի հռչակագրում ներառել ատելության հանցագործության վերաբերյալ առանձին պարբերություն»,- նշել է Ռուստամ Բադասյանը՝ ընդգծելով, որ ատելության և ինքնության հատկանիշների վրա հիմնված հանցագործությունները առաջին քայլն են, որոնք կարող են հանգեցնել մարդկության դեմ ուղղված լուրջ հանցագործությունների, ներառյալ՝ ռազմական հանցագործությունների և էթնիկ զտումների: «Կարծում եմ, որ անցյալում կատարված հանցագործությունների համար անպատժելիությունը, դրանց արդարացումն ու մերժումը ճանապարհ են հարթում բռնության և նոր վայրագությունների վերածննդի համար»,- շեշտել է Հայաստանի արդարադատության նախարարը՝ որպես ակնհայտ օրինակ ներկայացնելով 2020 թվականի սեպտեմբերին ԼՂ հակամարտության գոտում թուրք-ադրբեջանական ագրեսիայի հետևանքները՝ հայերի դեմ պայքարի համար Լիբիայից և Սիրիայից վարձկանն ահաբեկիչների ներգրավումը՝ ընդգծելով, որ ինչպես և 1990-ականների սկզբին Լեռնային Ղարաբաղում տեղի ունեցած առաջին պատերազմի պատճառները ևս պայմանավորված են եղել հայերի նկատմամբ ատելությամբ և խտրականությամբ, մարդու հիմնարար իրավունքների ժխտումով։ «Տասնամյակներ շարունակ խթանված Ադրբեջանի հակահայ քաղաքականությունն իր առավել անմարդկային արտահայտությունն է գտել Արցախի ժողովրդի դեմ վերջին ագրեսիայի ընթացքում, որն ուղեկցվել է ռազմական և մարդկության դեմ հանցագործություններով: Նման հանցագործությունների ամենանշանավոր օրինակներից են, երբ քաղաքացիական բնակչության դեմ օգտագործվեց կասետային զինամթերք, թիրախավորվեց և ոչնչացվեց հայկական մշակութային ժառանգությունը, օգտագործվեց արգելված ֆոսֆորային զինամթերք՝ այդ թվում նաև անտառներում ապաստանած, բռնի տեղահանված բնակչության դեմ՝ պատճառելով հսկայական վնաս ինչպես մարդկությանը, այնպես էլ շրջակա միջավայրին»,- ասել է Ռուստամ Բադասյանը՝ որպես մեկ այլ վկայություն բերելով Ադրբեջանի կողմից Ժնևի «Ռազմագերիների հետ վարվելակերպի մասին» կոնվենցիան կոպտորեն խախտելու փորձերը՝ հայ ռազմագերիներին և այլ գերիներին, այդ թվում` կանանց, վերադարձնելուց հրաժարվելը։ «Թուրքիայի կողմից օտարերկրյա ահաբեկիչների հավաքագրումը և նրանց հետագա տեղակայումը Ադրբեջանի զինված ուժերի շարքերում՝ Արցախի դեմ ծավալած ռազմական գործողությունների համար, Ադրբեջանի և Թուրքիայի կողմից կատարված հերթական ծանր հանցագործությունն է՝ միջազգային բոլոր նորմերի կոպիտ խախտմամբ: Համապատասխան աղբյուրներից ստացված բազմաթիվ ապացույցները վկայում են, որ Թուրքիան և Ադրբեջանը աջակցում և նպաստում են մեր տարածաշրջանում ահաբեկչական սպառնալիքի ավելացմանը և տարածմանը: Հետևաբար, կարծում ենք, որ միջազգային հանրությունը պետք է միանա ջանքերին՝ այս սպառնալիքին դիմակայելու և այս հանցագործության կողմնակիցներին ու մեղավորներին պատասխանատվության ենթարկելու համար»,- հայտարարել է Ռուստամ Բադասյանը և այդ համատեքստում ողջունել Կիոտոյի հռչակագրի՝ ահաբեկչության հանցագործությանն անդրադառնալու փաստը։ Նախարարը ևս մեկ անգամ շնորհակալություն է հայտնել կազմակերպիչներին ջերմ ընդունելության համար և բոլոր մասնակիցներին մաղթել է արդյունավետ քննարկում։

14:41 - 07 մարտի, 2021

Հայաստանի և Ճապոնիայի միջև ձևավորված է բարի կամքի և փոխըմբռնման վրա հիմնված սերտ համագործակցություն. Տիգրան Ավինյան

ՀՀ փոխվարչապետ Տիգրան Ավինյանը Ճապոնիայի ազգային տոնի՝ Նորին Մեծություն Ճապոնիայի կայսեր ծննդյան օրվա կապակցությամբ ուղերձ է հղել, որում ասված է. «Հարգելի՛ պարոն դեսպան Ջուն Յամադա, Հարգելի՛ բարեկամներ, Ջերմորեն շնորհավորում եմ Ճապոնիայի ազգային օրվա՝ Նորին Մեծություն Ճապոնիայի կայսեր ծննդյան օրվա կապակցությամբ: Գոհունակությամբ ցանկանում եմ նշել, որ Հայաստանի և Ճապոնիայի միջև դիվանագիտական հարաբերությունների հաստատումից հետո անցած քսանինը տարիների ընթացքում համատեղ ջանքերի շնորհիվ մեր ժողովուրդների ու պետությունների միջև ձևավորվել է բարի կամքի և փոխըմբռնման վրա հիմնված սերտ համագործակցություն: Մեր երկրների կառավարությունները զգալի ջանքեր են գործադրել հայ-ճապոնական գործընկերության զարգացման համար: Մեծ կարևորություն ենք տալիս Ճապոնիայի հետ բարեկամական հարաբերությունների և փոխգործակցության հետագա ամրապնդմանը` հաշվի առնելով Ճապոնիայի ներդրումը մեր տարածաշրջանում և աշխարհում խաղաղության առաջխաղացման, ժողովրդավարական ինստիտուտների, աղետների կանխարգելման ու բնապահպանական կարողությունների զարգացման գործում: Հայաստանը մեծ նշանակություն է տալիս Ճապոնիայի ներգրավվածությանը հարավկովկասյան տարածաշրջանում և գնահատում է Ճապոնիայի հավասարակշռված դիրքորոշումը և աջակցությունը Լեռնային Ղարաբաղի հակամարտության բացառապես խաղաղ կարգավորմանը ԵԱՀԿ Մինսկի խմբի համանախագահության շրջանակներում: Այս կապակցությամբ մեծապես գնահատելի է Ճապոնիայի կառավարության որոշումը 3,6 մլն. ԱՄՆ դոլարի չափով մարդասիրարական օգնություն տրամարդելու Արցախի դեմ սանձազերծված պատերազմից տուժածներին: Ճապոնիան իր պատմական փորձով ապացուցել է, որ պատերազմների հետևանքների հաղթահարման լավագույն ուղին կայուն խաղաղության հաստատումն է և մարդկային կարողությունների զարգացումը: Կարևոր է նշել նաև, որ Հայաստանը կիսում է Ճապոնիայի հետ ժողովրդավարության, հասարակական ազատության ու արժանապատվության ընդհանուր արժեքներն ու սկզբունքները, որոնք լրացուցիչ խթան են մեր երկրների և ժողովուրդների փոխգործակցության համար: Մեր ժողովուրդների պատմությունն արձանագրել է նաև փոխօգնության և մարդասիրության դրսևորումներ, որոնք ամուր հիմք են հանդիսանում հայ-ճապոնական միջմարդկային սերտ կապերի համար: Այդպիսի մի դրվագ էր 1922թ. Զմյուռնիայում ճապոնական «Տոկեի Մարու» նավի կողմից տեղաբնակ հայերի փրկության փաստը, որի մասին երախտապարտ հիշողությունները պահպանվել են փրկվածների սերունդների կողմից: Մեր երկրներին հուզող հարցերի շուրջ Հայաստանը և Ճապոնիան արդյունավետ համագործակցում են միջազգային կազմակերպություններում: Հայաստանն աջակցում է Ճապոնիային ՄԱԿ-ում և այլ միջազգային կազմակերպություններում ու գնահատում Ճապոնիայի դերը գլոբալ մարտահրավերներին արձագանքելու ու կայուն զարգացման օրակարգի առաջխաղացման գործում: Այս առումով մենք բարձր ենք գնահատում Ճապոնիայի մոտեցումը զարգացած ու զարգացող երկրների, ինչպես նաև տարբեր մշակույթների միջև «կամուրջ» ծառայելու հարցում: Հայաստանի կառավարությունն արժևորում է Ճապոնիայի կառավարության օգնության քաղաքականությունը, որի շրջանակներում Հայաստանին պարբերաբար տրամադրվում են դրամաշնորհներ, տեխնիկական օգնություն, ինչպես նաև արտոնյալ վարկեր: Այս բոլոր ծրագրերը, անկասկած, տնտեսական բարեփոխումների իրականացման ճանապարհին զգալի օգնություն են Հայաստանի համար: Պաշտոնական օգնության ծավալներով Ճապոնիան Հայաստանի համար դասվում է խոշորագույն դոնոր երկրների շարքին: Զարգացմանն ուղղված պաշտոնական օգնությունը տարիների ընթացքում նպաստել է մեր երկրի տարբեր ոլորտների, այդ թվում՝ արտակարգ իրավիճակների, էներգետիկայի, տրանսպորտի, փոքր և միջին գործարարության, մարդկային ռեսուրսների զարգացմանը, ենթակառուցվածքների և կարողությունների ավելացմանը: Միաժամանակ, մենք տեսնում ենք տնտեսական կապերի աճի և տարբեր ոլորտներում համագործակցության ավելի մեծ ներուժ: Վերջում, կուզենայի կրկին շնորհավորել մեր ճապոնացի բարեկամներին ազգային տոնի կապակցությամբ և խորին շնորհակալություն հայտնել դեսպան Յամադային՝ հայ-ճապոնական հարաբերությունների ամրապնդման գործում ունեցած զգալի ավանդի համար։ Կեցցե՛ Հայաստանի և Ճապոնիայի բարեկամությունը»:

19:13 - 23 փետրվարի, 2021