Գյումրի

Գյումրիում, նախնական տեղեկությամբ, դպրոցական է դանակահարվել |armtiems.com|

armtimes.com: Գյումրիում այսօր դպրոցականի մասնակցությամբ հերթական միջադեպն է գրանցվել։ Կեսօրն անց, ժամը 13:00-ի սահմաններում աջ ազդրի կտրած-ծակած վերքով բուժօգնության է տեղափոխվել 2000 թվականին ծնված մի երիտասարդ։ Տղան Գյումրի բժշկական կենտրոն է տեղափոխվել շտապ բուժօգնության մեքենայով։ Կենտրոնի փոխտնօրեն Արմեն Խաչատրյանը ասաց՝ տուժածին ընդունել, հետազոտել են։ Կատարվել է վերքի մշակում, այնուհետ երիտասարդը տեղափոխվել է Գյումրու Ավստրիական մանկական հիվանդանոց։

13:16 - 18 ապրիլի, 2019

Գյումրու թիվ 27 դպրոցի տնօրենի նկատմամբ ընտրված կալանք խափանման միջոցը փոխվել է

Քրեական գործով որպես մեղադրյալ ներգրավված Գյումրու թիվ 27 դպրոցի տնօրեն Կ.Լ.-ի նկատմամբ ընտրված կալանք խափանման միջոցը փոխվել է չհեռանալու մասին ստորագրությամբ, և նա ազատ է արձակվել: Նման որոշումը կայացներիս հաշվի է առնվել, որ նախաքննության ներկայիս փուլում արդեն նվազել են քրեական դատավարությանը մասնակցող անձանց վրա անօրինական ազդեցություն գործադրելու, գործի համար նշանակություն ունեցող նյութերը թաքցնելու կամ կեղծելու ճանապարհով քննությանը խոչընդոտելու, քննությունից խուսափելու ռիսկերը, որով պայմանավորված՝ վերացել է նրա նկատմամբ խափանման միջոց կալանքի հետագա կիրառման անհրաժեշտությունը: ՀՀ դատախազություն

12:32 - 12 ապրիլի, 2019

Գյումրիում ծորակներից պղտոր ջուր է հոսում. որոշ դպրոցներում դասերն ընդհատվել են |armtimes.com|

armtimes.com: Վաղ առավոտից Գյումրու գրեթե բոլոր թաղամասերի բնակարանների ծորակներից պղտոր եւ հողոտ ջուր է հոսում: Սա խուճապ է առաջացրել դպրոցներում, նախակրթարաններում, բնակչության շրջանում: Հիվանդությունների վերահսկման եւ կանխարգելման Ազգային կենտրոն ՊՈԱԿ-ի «Շիրակ» մասնաճյուղի տնօրեն Վարդան Ուռուտյանի հետ զրույցում պարզվեց, որ խնդիրը ծագել է Ղազանչի 1 ջրագծի վթարի հետեւանքով: «Վթարը երեկ երեկոյան ժամը 18:00-ի սահմաններում է եղել: Խոշոր ջրագիծ է վթարվել, հող է լցվել խողովակաշարի մեջ, բայց հիմա մեր ուսումնասիրությունները, որոնք արել ենք այսօր ժամը 10:00-ից մինչեւ 12:30-ի սահմաններում մինչեւ ժամը 13:00-ը, լրիվ նորմալ էր: Մենք ուսումնասիրել ենք ամբողջ Գյումրու ջրամատակարարումը, նմուշառում ենք արել, մնացորդային քլորի քանակը նորմայի սահմաններում է: Դրանից բացի ուսումնասիրել ենք նաեւ Գյումրին եւ հարակից համայնքները սնող քլորակայաններից դուրս եկող ջրերը: Այսինքն Մայիսյան, Մարմաշեն, Հովունի, Կապս, Վարդբաղ: Այդ տարածքներում եւս մնացորդային քլորի քանակությունը բավարար է: Առավոտյան են նկատել պղտորվածություն, որը կապված է վթարավերականգնման աշխատանքների հետ: Ահազանգեր ենք ստացել ե՛ւ մարզպետարանից, ե՛ւ բնակիչներից, ե՛ւ դպրոցների տնօրեններից: Անմիջապես երկու աշխատանքային խումբ, ես էլ հետները զբաղվել ենք էդ խնդրով: Այս պահին անհանգստանալու կարիք չկա»,- ասաց Վարդան Ուռուտանը: Գյումրու որոշ դպրոցներ ընդհատել են դասերը, նախակրթարանները երեխաներին տուն են ճանապարհել:

15:33 - 11 ապրիլի, 2019

Գյումրու թիվ 37 ավագ դպրոցի տնօրենն ազատվել է աշխատանքից. ժամանակավոր պաշտոնակատար է նշանակվել |news.am|

news.am։ Կրթության եւ գիտության նախարարի հրամանով Աստղիկ Ավետիսյանը ազատվել է Գյումրու թիվ 37 ավագ դպրոցի տնօրենի պաշտոնից, դպրոցի ժամանակավոր պաշտոնակատար է նշանակվել Գյումրու թիվ 11 հիմնական դպրոցի դաստիարակչական գծով փոխտնօրեն Գեւորգ Գասպարյանը։ Կրթության եւ գիտության նախարարության հանրակրթության վարչության պետ Աշոտ Արշակյանը հայտնեց, որ այսօր Գեւորգ Գասպարյանը դպրոցի ուսուցչական անձնակազմին է ներկայացվել։ «Անձնակազմին ներկայացրել ենք, մոտ ժամանակներս ընդունում–հանձնում կլինի, պարոն Գասպարյանը պարտականությունները կատարողը կլինի, մինչեւ եռամսյա ժամկետում տնօրենի ընտրությունը»,–նշեց ԿԳՆ հանրակրթության վարչության պետը։ Նշենք, որ Գյումրու թիվ 37 դպրոցում առերեւույթ կաշառք տալու, կաշառք ստանալու եւ կաշառքի միջնորդության փաստերի առթիվ քրեական գործ էր հարուցվել դպրոցի տնօրենի դեմ, որը հայտարարված մրցույթը հաղթել էր 2018 թվականի հոկտեմբերի 5-ին:

10:08 - 10 ապրիլի, 2019

Վարչապետ Նիկոլ Փաշինյանը շրջեց Գյումրու ավտոկայանի տնակային 104-րդ ավանում |armenpress.am|

Արմենպրես: ՀՀ վարչապետ Նիկոլ Փաշինյանը Գյումրի կատարած այցի ընթացքում շրջայց կատարեց ավտոկայանի տնակային 104-րդ ավանում։ Վարչապետը տնակային ավանում ծանոթացավ տեղի բնակիչների կենցաղային պայմաններին։ Ավտոկայանի տնակային 104-րդ ավանում առկա 164 տնակների բնակիչներին վարչապետը հորդորեց սպասել, մինչև տնակների օրինականության ու պետության կողմից նրանց նկատմամբ պարտավորությունների վերաբերյալ հարցերը կստանան իրենց պատասխանները։ «Մի կողմից ասում եք՝ տնակները վերացնենք, հետո ասում եք՝ սեփականաշնորհենք։ Պետք է հասկանալ՝ օրինական են տնակները, թե օրինական չեն, պետությունը ձեր նկատմամբ պարտավորություն ունի, թե՝ ոչ»,- ասաց Փաշինյանը։ Ավտոկայանի տնակային 104-րդ ավանում առկա 164 տնակներից բնակեցված է 137-ը։ Վարչապետը Գյումրի է ժամանել նոր արագընթաց գնացքով, շրջել է Տիգրան Մեծ փողոցով, շրջայց կատարել «Չերքեզի ձոր» կոչվող ձկան արտադրամասում, այցելել ավտոկայարան։

13:21 - 05 ապրիլի, 2019

Որքանո՞վ է օրինաչափ 2 մլրդ դրամ պարգեւավճար տալ ՊԵԿ-ին, երբ Գյումրիի ողջ բյուջեն 3 մլրդ է. գյումրեցին՝ Փաշինյանին |news.am|

news.am: ՀՀ վարչապետ Նիկոլ Փաշինյանի՝ Գյումրի կատարած աշխատանքային այցի ժամանակ բնակիչներից մեկը հետաքրքրվեց, թե որքանո՞վ է օրինաչափ, որ կառավարությունը 2 մլրդ դրամի պարգեւավճար է սահմանում ՊԵԿ-ի համար, իսկ Գյումրիի ողջ բյուջեն ընդամենը 3 մլրդ դրամ է: Ի պատասխան Փաշինյանն ասաց, որ դա օրինաչափ է: «Եթե այդ գերատեսչության առջեւ խնդիր է դրված 40 մլրդ դրամով ավելի հարկեր հավաքել, որը պետք է ծախսվի այդ թվում նաեւ Գյումրիում, ապա այո, օրինաչափ է: Դա տրվել է ի պատասխան այն գործողության, որի արդյունքում այս տարի պետական բյուջեում 40 մլրդ դրամի գերակատարում ենք ունենալու, որի արդյունքում ուսուցիչների աշխատավարձն է ավելանալու, այդ թվում գյումրեցի: Դրա արդյունքում մենք 310 կմ ճանապարհ ենք նորոգելու, այդ թվում Գյումրի բերող, որի արդյունքում 10 մլրդ դրամի սուբվենցիոն ծրագիր ենք իրականացնելու, այդ թվում Գյումրիում: 590 մլն դրամի սուբվենցիա է իրականացվելու միայն Գյումրիում»,-հայտարարեց վարչապետը: Նա նաեւ նկատեց. «Մենք հիմա կարող ենք ամեն ինչ կտրել, բայց դրա արդյունքում կոլապսում կհայտնվենք»: Հիշեցնենք, որ ապրիլի 4-ի կառավարության նիստում որոշում կայացվեց ՊԵԿ-ի պարգեւավճարների գումարն ավելացնել 1,5 մլրդ դրամով եւ հասցնել 2,3 մլրդ դրամի:

10:57 - 05 ապրիլի, 2019

Ամբողջ աշխարհում էլ մայթը քանդում, սարքում են, բայց քաղաքացու համար պայմաններ են ստեղծում քայլելու համար. Վարչապետը՝ Գյումրու քաղաքապետին

Նիկոլ Փաշինյանն այսօր Գյումրի ժամանելուն պես շրջԵց Տիգրան Մեծ փողոցով, որտեղ արդեն երկար ժամանակ է՝ ճանապարհը քանդված է, և շինարարություն է ընթանում: Քանդված ճանապարհը տեսնելով՝ Փաշինյանը դիմեց Գյումրու քաղաքապետին. «Ամբողջ աշխարհում էլ մայթը քանդում, սարքում են, բայց քաղաքացու համար պայմաններ են ստեղծում քայլելու համար: Մեր շինարարական կուլտուրան նոր մակարդակի պիտի բերենք: Հայաստանում շինարարակական բոլոր հրապարակները աղբանոցի են վերածված: Պարո՛ն Բալասանյան, պարո՛ն մարզպետ, կհրավիրեք այստեղ շինարարության ճարտարապետներին, ինժեներներին և կհետևեք, որ, երբ շինարարություն է արվում, մարդկանց համար պայմաններ ստեղծվի, մարդիկ անցանելիություն ունենան: Չեմ ասում, որ զրոյից նոր մայթ կառուցեք: Էդ ճարտարապետին վճարել են: Հիմա մենք չենք կարող բոլորին ասել բոթաս կամ սապոգ հագեք: Մարդը պետք է կարողանա հարսանիք էլ գնա, ծնունդ էլ գնա: Ստեղ ո՛չ կռիվ անելու, ո՛չ էլ մեղադրանքի թեմա է, չենք եկել դատ անենք, մենք եկել ենք՝ արձանագրելու: Հիմա այս հարցը եկել, մինչև ինձ է հասել, դրա համար ես այստեղ եմ»:

09:29 - 05 ապրիլի, 2019

Երևան-Գյումրի երթուղու նոր էլեկտրագնացքի առաջին ուղևորը Նիկոլ Փաշինյանն է

07:30 - 05 ապրիլի, 2019

Գյումրու քաղաքապետարանը դիմել է քաղաքի միջուկը ՅՈՒՆԵՍԿՕ-ի պահպանման տարածքում ընդգրկելու խնդրանքով |armenpress.am|

Արմենպրես։ Գյումրու քաղաքապետարանը դիմել է ՅՈՒՆԵՍԿՕ-ի ղեկավարությանը՝ քաղաքի միջուկը այդ միջազգային կազմակերպության պահպանման տարածքում ընդգրկելու խնդրանքով: Այս մասին օրերս լրագրողների հետ ունեցած հանդիպման ժամանակ նշեց Գյումրու քաղաքապետ Սամվել Բալասանյանը՝ տեղեկացնելով, որ այս պահին դեռ պատասխան չի ստացվել: Խոսքը վերաբերում է հիմնականում Գյումրու «Կումայրի» արգելոց-թանգարանի տարածքում ընդգրկված շինություններին, որոնց մեծ մասը վթարային է և ունի վերականգնման կարիք: Նույն խնդրով դեռ 2018 թվականի նոյեմբերին 13-ին Հայաստանի Հանրապետության նախագահ Արմեն Սարգսյանը Փարիզում ՅՈՒՆԵՍԿՕ-ի կենտրոնակայանում խոսել էր կազմակերպության գլխավոր տնօրեն Օդրի Ազուլայի հետ՝ միջազգային կառույցի ուշադրությունը հրավիրելով քաղաքի հնագույն և հարուստ մշակութային ժառանգությանը եւ ներկայացնելով պատմաճարտարապետական արժեքավոր շինությունները: «Դեռ սպասում ենք: Գործընթացը շատ երկարատև է՝ ասում են նույնիսկ մինչև 5 տարի է տևում, մինչև վերջնական հաստատումը: Եթե դրական արձագանք ստանա այս առաջարկը, ապա դա քաղաքի պատմական միջուկի պահպանման լավագույն լուծումներից կլինի»,- նշեց քաղաքապետը:

19:35 - 02 ապրիլի, 2019

Գյումրու թատրոնը տնօրենի թեկնածու է առաջադրել «ավելորդ ցնցումներից հեռու» մնալու համար |panarmenian.net|

panarmenian.net: Գյումրու Վարդան Աճեմյանի անվան դրամատիկական թատրոնում լրատվամիջոցների մասնակցությամբ տեղի է ունեցել ընդլայնված ժողով, որի ժամանակ անձնակազմը հայտարարել է ապրիլի 26-ին թատրոնի տնօրենի թափուր պաշտոնի համար կայանալիք մրցույթում սեփական թեկնածուն ունենալու մասին։ Իսկ թեկնածուն թատրոնի գլխավոր ռեժիսոր, տնօրենի ժ/պ Լյուդվիգ Հարությունյանն է, հայտնում է «Առավոտը»: «Մենք մեր թեկնածուն ունենք, մենք պաշտպանում ենք մեր թեկնածուին և կարծում ենք, որ թատրոնն ավելորդ ցնցումներից, խնդիրներից հեռու պահելու համար ամենաճիշտ որոշումը սա է։ Լյուդվիգ Հարությունյանը տնօրեն աշխատելու փորձ ունի։ Մենք աջակցելու ենք նրան»,-ասել է ժողովրդական արտիստ Անահիտ Հարությունյանը։ Դերասանները նշել են, որ իրենց դիրքորոշումը նախապես հայտնելու պատճառն այն է, որ երկու տարի առաջ զայրացրել էին իրենց՝ փորձելով թատրոն մտցնել ոչ ցանկալի թեկնածուի։ «Այլ անձ այստեղ անելիք չունի»,-հայտարարել է թատրոնի անձնակազմը՝ հիշեցնելով, որ Գյումրու թատրոնի մասին աշխարհում նորից են սկսել խոսել․ այստեղ «ամեն ինչ իդեալական վիճակում է՝ թե՛ կազմակերպչական հարցերը, թե՛ բարոյահոգեբանական մթնոլորտը։

12:48 - 01 ապրիլի, 2019

Նախարարությունը Գյումրիի ծննդատանը կտրամադրի անհրաժեշտ սարքավորումներ |armenpress.am|

armenpress.am: Գյումրիի ծննդատանը լուրջ խնդիր է նույնիսկ խիստ անհրաժեշտության բժշկական սարքերի բացակայությունը: ՀՀ առողջապահության նախարարությունը ներկայում քննարկում է խնդիրը, և ծննդատանը կհատկացնի որոշակի սարքավորումներ: Այս մասին ԱԺ առողջապահության և սոցիալական հարցերի մշտական հանձնաժողովի նիստում հայտնեց փոխնախարար Արսեն Դավթյանը: «Ցավոք վերջին տարիներին Գյումրու ծննդատան ծնունդների թվաքանակը պակասում է, և դա իր ուղիղ անդրադարձն է ունենում ծննդատան ֆինանսական վիճակի վրա: Ներկայում այս տարվա պետական բյուջեից հատկացվող միջոցների շրջանակում ավելացվել են ծննդօգնությանը ուղղվող միջոցները: Կատարվել են ծննդօգնության գների ավելացումներ, դրա արդյունքում լրացուցիչ հոսքեր են տեղի ունենում ծննդօգնություն իրականացնող հաստատություններ, այդ թվում Գյումրու ծննդատուն: Սակայն Գյումրու ծննդատան խնդիրները դրանով չեն սահմանափակվում, այնտեղ կան նաև սարքավորումների խնդիրներ, շենքային պայմանների հարց: Մենք հիմա քննարկում ենք սարքավորումների հետ կապված խնդիրները, որոնք ներկայացրել է ծննդատան տնօրենը»,-ներկայացրեց փոխնախարարը:

07:58 - 25 մարտի, 2019

Անօթևանների հաշվառման հանձնաժողովը Գյումրիում արտագնա նիստ կանցկացնի |lragir.am|

Վարչապետի հանձնարարականով ձևավորված անօթևանների հաշվառման հանձնաժողովը Գյումրիում մեկ շաբաթից արտագնա նիստ է անցկացնելու: Այս մասին լրագրողներին տեղեկացրեց Գյումրու քաղաքապետ Սամվել Բալասանյանը՝ նշելով, որ այդ հանձնաժողովին զուգահեռ, քաղաքապետարանը ևս ուսումնասիրություններ է իրականացնում: Տնակների հաշվառման արդյունքում Գյումրիում դրանց թիվը պակասել է: «Մենք նույնպես հանձնաժողով ենք կազմել, ուսումնասիրում ենք ամեն մի տնակի վիճակը: Մեզ համար արդեն պարզ է, որ Գյումրիում կա 2805 տնակ: Մեկ տարի առաջ կատարված հաշվառմամբ այդ թիվը 2854 էր, այսինքն` այս ընթացքում 49 ընտանիք բնակարան է ստացել: Հնարավոր է` մեր հաշվարկներում 5 տոկոսի սխալ թույլ տված լինենք: Հիմա այդ 5 տոկոսն էլ ուզում ենք ճշտել: Մեր հաշվարկներով կա 410 քարաշեն տնակ, 500 բնակիչ դեռ չի սեփականաշնորհել իրեն հատկացված բնակարանը: Այդ 500-ից 121-ը դեռ տնակում են ապրում: Հաջորդ երեքշաբթի կառավարության հանձնարարականով ստեղծված հանձնաժողովը արտագնա նիստ կանցկացնի այստեղ»,- նշեց Սամվել Բալասանյանը:Ուսումնասիրությունները Գյումրիի քաղաքապետարանը կշարունակի, իսկ վարչապետին հանձնաժողովը վերջնական արդյունքները ներկայացնելու է հունիսի 30-ին: lragir.am

11:31 - 22 մարտի, 2019

Գյումրիում մեկնարկել են լայնածավալ փողոցաշինական աշխատանքներ|armenpress.am|

Gյումրիում փողոցաշինական աշխատանքների իրականացման համար ոչ մի խնդիր չկա: Այս մասին մարտի 20-ին հրավիրած ասուլիսում ասաց Գյումրու քաղաքապետ Սամվել Բալասանյանը: «Փողոցաշինական աշխատանքները մեկնարկել են: Բնական է, շինարարության ժամանակ կլինեն անհանգստություններ, բայց դա ժամանակավոր է»,-նշեց Սամվել Բալասանյանը՝ գյումրեցիներին համբերատարություն մաղթելով: Ընտրված 34 փողոցները նորոգվելու են հիմնովին, սակայն, նախորդ անհանգստությունը բացառելու համար, այս անգամ քանդելու են ոչ թե մայթերն ու փողոցները միաժամանակ, այլ նախ մայթերը, ապա՝ փողոցները: Փողոցները հիմնականում կենտրոնական փողոցներն են: «Մինչ այս երբեք նման աշխատանքներ չեն կատարվել, նման ծավալով: Ոչ մի խնդիր չունենք՝ փողը կա, նախագծերը կան, շինարարները կան, ժամկետները տրված են: Բոլոր շինարարական ընկերություններն արդեն սկսել են աշխատանքները: Սա 3 տարվա ծրագիր է, իսկ փողոցների վերանորոգումից հետո քաղաքում շուրջ 11 հազար 500 լուսակետ էլ է տեղադրվելու»,- ասաց նա: Քաղաքապետի խոսքով՝ ծրագրի առաջին փուլը կավարտվի հունիսին, իսկ օգոստոսին նախատեսվում է սկսել երկրորդ փուլը: «Ամեն ինչ կանենք կանոնակարգված՝ հնարավորինս քիչ անհանգստություններ պատճառելով բնակչությանը»-նշեց քաղաքապետը: Սամվել Բալասանյանը նաև տեղեկացրեց, որ այս պահին չկա նախագծային փոփոխության խնդիր, դրանք արդեն կատարվել են: Տվյալ փողոցներում կառուցվելու են ջրահեռացման համակարգեր, բոլոր վերգետնյա համակարգերը դառնալու են ստորգետնյա: Խոսելով ժամկետների մասին՝ Սամվել Բալասանյանը տեղեկացրեց, որ յուրաքանչյուր կազմակերպություն աշխատանքներն իրականացնում է պայմանագրով, և ժամկետների խախտման դեպքում տվյալ կազմակերպությունը կենթարկվի տուգանքի: Աշխատանքներն իրականացվում են Վերակառուցման և զարգացման եվրոպական բանկի միջոցներով: ՎԶԵԲ-ի ծրագիրը մեկնարկել է 2018 թվականին, առաջին փուլն ավարտվելու է 3 ամսից` հունիսին, երկրորդ փուլը սկսվելու է օգոստոսին, ավարտվելու է հաջորդ տարի հունիսին, այնուհետ մեկնարկելու է ծրագրի վերջին փուլը:ՎԶԵԲ-ի, Համաշխարհային բանկի, նաեւ համայնքային բյուջեի միջոցներով հիմնանորոգվելու է քաղաքի փողոցների ու հրապարակների 60 տոկոսը` շուրջ 40 կիլոմետր երկարություն:armenpress.am

14:36 - 20 մարտի, 2019

Չինական ու թուրքական ջինսերին փոխարինելու կգան «Made in Armenia» ջինսերը՝ Գյումրիից

Շուկաները գրաված չինականին ու թուրքականին փոխարինելու է գալիս հայկականը: Մեկ ամսից հայկական ջինսերը արդեն վաճառքում կլինեն: «Made in Armenia» գրառումով ջինսերն արտադրվում են Գյումրիում: Զաքարյան ընտանիքը այստեղ ջինսերի արտադրությունը հիմնելու համար 2 միլիոն դոլար է ներդրել: Որակյալ արտադրանք ապահովելու համար արտադրական սարքավորումները բերել են դրսից, որի համար ՀՀ կառավարության աջակցությունն են ստացել: Երեք տարով կրճատվել է ընկերության ապրանքների ներմուծման դեպքում մաքսային եւ հարկային մարմինների կողմից հաշվարկված ավելացված արժեքի հարկի գումարների վճարման ժամկետը: Նշում են, որ դա հնարավորություն տվեց խնայել գումարներ, որոնք ներդրեցին այլ սարքավորումներ գնելու մեջ: Հայ մասնագետներին իրենց փորձը փոխանցելու եւ հմտություններ սովորեցնելու համար Հայաստան են ժամանել իտալացի մասնագետները: ՀՀ կառավարություն

05:31 - 18 մարտի, 2019

Արցախի բնակիչները պետք է մասնակցեն մարդու իրավունքներին առնչվող եվրոպական ծրագրերին. Արտակ Բեգլարյան

Արցախի Հանրապետության մարդու իրավունքների պաշտպան Արտակ Բեգլարյանը մարտի 6-8-ը Բրյուսելում հանդիպումներ է ունեցել Եվրոպական խորհրդարանի որոշ պատգամավորների, ԵՄ ոլորտային պաշտոնյաների և ոչ կառավարական կազմակերպությունների հետ՝ քննարկելով եվրոպական ծրագրերում Արցախի ընդգրկվածության մակարդակի բարձրացման հետ կապված հարցեր: Հանդիպումների ընթացքում Արտակ Բեգլարյանը շեշտադրել է, որ անկախ քաղաքական կարգավիճակից՝ Արցախի բնակիչները պետք է հնարավորություն ունենան մասնակցել հատկապես մարդու իրավունքներին առնչվող եվրոպական ծրագրերին: Նա կարևորել է ինչպես Եվրոպական Միության, այնպես էլ եվրոպական ոչ կառավարական կազմակերպությունների ակտիվ ընդգրկվածությունն Արցախի ժողովրդավարության ու քաղաքացիական հասարակության ամրապնդման և մարդու իրավունքների պաշտպանության գործում: Պաշտպանը ոչ կառավարական որոշ կազմակերպությունների ներկայացուցիչների հետ քննարկել է հետագա համագործակցության հնարավորությունները՝ ձեռք բերելով կոնկրետ պայմանավորվածություններ այդ ուղղությամբ: ԱՀ մարդու իրավունքների ներկա և նախկին պաշտպաններ Արտակ Բեգլարյանը և Ռուբեն Մելիքյանը մարտի 6-ին Եվրոպական խորհրդարանում մասնակցել են «Հայատյացություն. Պատմական և արդի դրսևորումները» խորագրով համաժողովին, որը կազմակերպվել է Եվրոպայի Հայ դատի հանձնախմբի և Թուֆենկյան հիմնադրամի կողմից՝ Եվրոպական խորհրդարանի պատգամավոր Էլենի Թեոխարուսի աջակցությամբ:

08:04 - 08 մարտի, 2019